|
|
密探名稱 : 山區麵包王
|
|
江戶前
|
標題 : 暖暖壽司拼搞鬼菜飯 |
地址 : 荃灣大河道21號1樓 |
地區 : 荃灣 |
|
現時分數:
|
日期 : 2012-09-28 12:01:00
又喺老婆教會嘅弟兄小組一月一聚嘅日子,原本安排參觀歷史博物館,因為好幾個弟兄當日有事未能出席,淨得番4個人,咁就無謂再逛博物館,改食番餐飯,深入交流吓,分享吓就算喇,晚飯地點揀咗晌番教會附近嘅江戶前。
荃灣本身都有幾多日式食肆,數埋都有成6、70間,雖然依間日式理料食物水準一般,晌OR仲喺喊面多過笑面,但依然有好多人幫襯,無他嘅,佢哋勝在款式多,就如小弟之前對佢所寫嘅食評,主題就叫「乜都有日式茶餐廳」,好似茶記咁,真喺乜都有;兼且佢定個價位確喺平,幾十蚊個定食已經有交易,直頭平過去連鎖快餐店,仲要有番現金券回贈(每食滿$20,即送$2現金代用券,喺當現錢使,夠直接),誘你返兜再返兜。荃灣貧苦大眾居多,平平哋又試到日本嘢,所以,小弟覺得江戶前個定位對得幾啱。依一晚喺星期六,樓下企咗一大堆人等位,我哋無訂位,結果就罰企20分鐘先有得入座喇。
三文魚壽司 $7/兩件
煙三文魚壽司 $7/兩件
壽司特賣,其實當大家想叫嘅時候,我都有啲擔心,$7仲要兩件喎,可以去到咩水平心裡有數啦。三文魚壽司,果然唔多夠新鮮;而煙三文魚壽司就仲差,瘀瘀哋色,外觀唔得,食落竟然暖暖哋,如果合埋眼食心裡會好過啲,咪當佢火灸過囉。飯方面,一夾即散,做炒飯絕對可以做到飯粒分明,做壽司唔係好得喎!
蟹籽沙律冷麵 $43
唔講以為喺一道沙律添呀,因為唧沙律醬多到成碟面都喺。不過咁,冷麵都幾爽,撈勻晒青瓜絲、沙律醬、蟹籽,夏天食真喺透心涼。
秋刀魚鹽燒 $35
賣相單調咗啲,只喺伴有檸檬同蘿蔔蓉,但條秋刀都幾大條,仲燒得幾甘香。外皮脆脆,味道唔腥有鹹香,雖然肉質未喺最肥美,但我都覺得幾OK。
燒原隻日本魷魚筒 $45
真喺原隻咁燒,一條魷魚鬚都無少留番晒俾係,燒嘅色水幾靚,淋埋少少醬油,不過唔知點解,江戶前真喺好實際,一啲伴碟嘢都唔搞。幾香魷魚味,質感又唔韌,不過,最衰喺上到枱唔喺好熱,感覺有少少失色。
石燒蒜片牛肉粒菜飯
最後依道菜正式嚟講,喺菜牌都搵唔到,唔喺咩預訂秘製菜式,但又一定食得到。菜飯?不過唔同上海菜館嘅菜飯,要自家製,我依班弟兄真搞鬼,咁都諗得到。事緣有次其中一位弟兄同屋企人嚟食晏,叫咗個炒雜菜、石燒蒜片牛肉粒,感覺油淋淋,就不如叫個白飯撈埋一齊食,又真喺有淨白飯叫喎。今次照辦煮碗有機會又試吓,效果又真喺唔錯喎。三者價錢如下:石燒蒜片牛肉粒$45、炒雜菜$22、白飯$10。前兩者都頗為香口惹味,之但喺有啲肥,又確喺油淋淋,撈埋啲白飯,易入口好多,再者,啲牛肉粒幾香蒜味,飽肚之作!
邊食邊傾偈,又搵咗啲有意思嘅文章分享吓,大家都覺得今晚過得幾暢快。
|
|
|
鏞記
|
標題 : 七十饌.走訪粵菜經典之旅 |
地址 : 中環蘭桂坊威靈頓街32-40號 |
地區 : 中環 |
|
現時分數:
|
日期 : 2012-09-27 18:39:31
鏞記喺本地粵菜老字號,相信無人不識,一道「飛天燒鵝」曾成為一時佳話,亦深受旅客歡迎嘅著名手信。但喺鏞記已經屹立咗70年,就未必個個都知。為咗慶祝70週年依個大日子,就以「七十饌」為題,由5月到11月一連7個月,每月以10為始至下個月9號為終,一月一帖推出10款菜式放入週年菜牌。雖然隆重其事,但唔使擔心所有菜式都喺貴價高檔嘢,當中有精緻家常菜,亦有得獎佳餚,以及罕有菜式,當然始終喺鏞記,又中環地段,唔會喺一百幾十蚊落樓嘅地方。人少嘅話大可點三數款加其他招牌菜,夠人多嘅話不妨試勻10款,領略其真味與情意。
之前推出咗嘅有五月篇嘅「啟蒙」、六月篇嘅「歷練」、七月篇嘅「風雲」同八月篇嘅「路途」。今次到訪,品嚐到喺九月篇嘅週年菜式,分題喺「里程」。所以題外話講少少鏞記嘅里程。原來始創人甘穗煇先生用上經營燒味大牌檔嘅所有積蓄,晌1942年租下永樂街32號鋪位開始鏞記嘅歷程;其後香港淪陷,鋪位被炸,1945年香港重光,故晌砵甸乍街32號鋪位重整旗鼓,擴展業務;跟住,再晌1964年一口氣購置威靈頓街4個互連鋪位,即鏞記現址,1978年鏞記大廈重建竣工,既保留傳統粵菜嘅餐飲風貌,同時亦加入現代化經營理念,奠立咗鏞記最新里程碑,將粵菜繼續發揚光大。唔知喺咁啱定有意,鏞記現址又喺32號喎(威靈頓街32-40號),32號、32號,攞個諧音「生意好」,做生意嘅嘢,當然喺想生意好啦!
有幾道菜較得小弟歡心,分享一下當中嘅細味,又睇吓會唔會喺啱你口味嘅菜式:
薑蔥絲白灼雙星($138「七十饌」菜式)
老套啲講句,真喺要以「平凡中嘅不平凡」嚟形容依道菜,豬肉丸、豬肚!食粉麵、打鞭爐周不時都食到啦,不過以白灼嚟整,食材唔新鮮就無所遁形。豬肉丸選用刁鑽嘅裡脊肉(即喺脊骨下面與大排骨相連嘅瘦肉),肉中無筋,應該喺豬肉中最嫩嘅肉位,師傅自家手打,肉質鮮甜彈牙有保證。而豬肚眾所周知,喺要經過繁複嘅工序先可以清洗得一乾二淨,今晚食到嘅灼豬肚,咬落極之爽口,又帶少少韌勁。伴少少薑絲、蔥絲,再蘸丁點辣椒豉汁,真喺盡見不平凡!
野葛菜燉生魚湯($90 / 每位「七十饌」菜式)
南方人一向都好注重湯水,作為一個週年菜牌,點都預備好一款滋補湯水。今晚嘅湯水就喺野葛菜燉生魚湯,野葛菜綑為一紮方便飲用,每碗又有一大件生魚,魚肉無乜味且多骨。服務員解說此湯喺食療湯水,有活血祛濕、清熱下火之效,姑勿論療效如何,單以味道已感覺清甜。
溫馨子母明蝦球($320「七十饌」菜式)
無論賣相、口感、味道都非常出色,所以,喺今晚最鍾意嘅菜式。鮮海蝦油泡為蝦球,蝦球碩大有睇頭,口感爽脆鮮彈,蝦球本身已做得相當好;再加上蝦球均勻咁沾滿晒蝦子,多添一份鹹香海洋味。不過若想要品嚐此海洋氣息,就確要花點錢,$320一客,例牌一碟8兩計,都喺得大概10粒左右,亦喺全個九月篇最貴嘅菜式。
老陳皮花菇魚唇($198「七十饌」菜式)
唔講唔知,原來依個喺香港嘅經典懷舊菜,魚唇咪以為喺魚個咀,查實佢喺大海魚嘅翅裙,亦即喺魚翅頭有皮無針嘅部位(但跟「裙翅」又絕對唔同,裙翅喺魚腹下面嘅魚鰭,因貌如裙形,屬最上品嘅魚翅)。講番個菜,魚唇扣得軟腍,口感似食花膠,含豐富骨膠原且有滋陰養顏之效,女士恩物,配以原粒大花菇,厚肉菇香,又隱約滲出陳皮香味,好食。
高湯蟹肉片兒麵($180 / 每窩「七十饌」菜式)
整個九月篇有兩款「單尾」供客人選擇:香肉蟹籠仔蒸飯及高湯蟹肉片兒麵,如果人多當然點齊兩款嚟試試,相反人少的話,小弟建議後者「片兒麵」,兩者同樣以蟹入饌,但片兒麵較有特色。片兒麵原來喺懷舊特色麵食,更喺滿漢全席菜式之一,雲吞皮做成小塊先炸後煨就成了片兒麵,質感滑溜,就好似浸粥嗰啲薄脆咁,經上湯煨煮又好入味,配以鮮拆蟹肉、花菇,口感一流呀!
其他「七十饌」九月篇嘅菜式,仲有紅袖添香燻雞翼($128)、柱侯芋香砵仔鵝($168)、龍菱腩仔豆卜煲($138)、香肉蟹籠仔蒸飯($198)、鴻圖豆沙富葉粿($45)。上述價錢都喺大堂散坐嘅價位,如果想私隱度高啲,可以上4/F貴賓廰,,菜價會貴多10%左右。
九月篇「里程」之後,跟住上場喺十月篇嘅「英雄」,最後一輪喺十一月篇嘅「年代」,據知十一月篇喺真真正正踏入70週年嘅生日月,不單菜式會更特別,價錢亦相對會高啲,有興趣者可以拭目以待。
|
|
|
富久保手打烏冬 Tomikubo |
標題 : 烏冬.長久保證 |
地址 : 尖沙咀廣東道17號海港城港威商場3樓cooked Deli by citysuper 3001號舖 |
地區 : 尖沙咀 |
|
現時分數:
|
日期 : 2012-09-27 10:35:51
晌玄拉麵點咗碗鹽味叉燒湯拉麵,咁富久保又點咗咩呢?烏冬喺必然之選(其實佢都有飯賣),因為日藉師傅日日駐場手打烏冬,當住你面即場搓粉、即場做烏冬,全人手,唔靠機器。
望住堆定食模型,又喺心大心細嘅時候。眾裡尋它,就喺炸豬扒烏冬定食,因為有吉列炸豬扒,有鱆魚燒,又有關東煮蘿蔔,一個定食可以試到幾款心頭好,代價就喺一張City Super $50現金券+補番$18。
炸豬扒烏冬
食物模型喺將吉列炸豬扒放在湯烏冬之上,好彩正式售賣版喺兩者分開上,吉列炸豬扒以小發泡兜盛載,添加咗濃厚醬汁,豬扒又炸得幾鬆化,麵包糠外層略嫌有啲厚,而且離身。湯烏冬配料簡單,一片鳴門卷,少許昆布、蔥花喺咁多,湯底以昆布嚟煮,味唔重,烏冬又如何?真喺條條彈牙有嚼勁,兼且非常滑溜。
鱆魚燒
跟定食嘅鱆魚燒,一客有三大粒,喺鋪面阿姐密密燒嘅新鮮貨色,配上木魚碎同沙律醬,每粒鱆魚燒內裡梗有一粒鱆魚粒,時大時細,可惜粉漿非常厚,影響口感,小弟就覺得一般般喇。
關東煮蘿蔔
有好大兜架,真喺好大兜,無錯,喺個發泡兜好大,蘿蔔就得4細粒,味道鹹鹹甜甜,蘿蔔又幾清甜,只可惜太少囉!
鋪面(食物模型上面),設有自助調味架,有豉油、七味粉、蒜蓉、紫菜碎,啱用嘅就記緊加啲。手打烏冬的確有一手,不過,吉列炸豬扒、鱆魚燒都好嘛嘛,所以,俾個OK佢算喺拉上補下。
|
|
|
玄拉麵 Gen Ramen |
標題 : 玄慳一麵 |
地址 : 尖沙咀廣東道17號海港城港威商場3樓cookedDeli by citysuper 3001號舖 |
地區 : 尖沙咀 |
|
現時分數:
|
日期 : 2012-09-26 23:03:51
之前因為親友送贈咗兩張$50City Super嘅現金券,同老婆唔煮飯,搵晚去咗海港城City Super個美食廣場度撐枱腳。之前嘅食評都寫過:「雖然喺City Super,美食廣場即喺美食廣場,食物水準都喺一般啲,若非唔使錢,應該都唔會嚟幫襯,$50可以食到好少少嘅嘢囉!」點知依晚又再嚟過食,就喺因為唔使錢,哈哈,咁啱有啲運仔,抽獎中咗兩張$50City Super現金券,晌度食餐飯最實際,因為晌City Super裡面$100買唔到幾多嘢啫。
我同老婆不約而同都揀食日本嘢,佢想要拉麵,我就食烏冬。見玄拉麵對出嘅位都坐咗幾多日晌度食拉麵,感覺似乎唔錯,用一張現金券再補番$2,慳番啲,食碗麵;而富久保手打烏冬晌度屹立多年,頗有名氣,手打烏冬確喺吸引唔少食客。今餐就儘管一試佢哋嘅手勢啦。
鹽味叉燒湯拉麵 $52
比起外間一碗拉麵賣到八、九十蚊,甚至過百,$52咁嘅價位無疑平咗一截。其實賣相都唔差,有板有眼,有兩大片叉燒、溏心蛋、竹筍、菠菜、大蔥蔥絲,老婆幾鍾意依度啲叉燒,雖然咬落唔算好鬆化,但就因為唔肥;溏心蛋嘅溏心效果勉勉強強,流與實嘅邊緣之間,而蛋黃蠻香。拉麵質素都OK嘅,少少彈牙,配合鹽味醬油湯底,無落味精,淡淡醬油香味。
|
|
|
caffe HABITU the table |
標題 : 免費為工作打氣 |
地址 : 中環和安里1號德和大廈101室 |
地區 : 中環 |
|
現時分數:
|
日期 : 2012-09-25 17:55:38
公司最近嘅caffè HABITU要去到金鐘夏愨道和記大廈嗰頭,不過年中,佢都晌中環插旗,選址中環和安里德和大廈,如果唔太熟中環嘅人可能覺得隱蔽,條街名都未聽過,但喺一講中環豚王嗰條街呢,即刻咪「啊!」囉。其實呢條街都幾多嘢食架,美式、粵式、越南菜、印度菜、墨西哥、意大利、歐陸菜……等等,街仔短短,已有10多間食肆喇。
HABITU依個品牌,除咗caffe HABITU、仲有caffe Habitu the Table同HABITU Ristorante。簡單嚟講,caffe HABITU喺「精品咖啡館」,主要提供飲品、輕食及甜品,讓人暫且放鬆一下緊張生活,好好感受生活真諦;caffe HABITU the Table以「分享」為概念嘅餐廳,食物選擇上就多好多喇,有前菜、沙律、餐湯、全日早餐……連主菜同意粉都有,營造出輕鬆、充滿活力嘅餐飲空間;HABITU Ristorante顧名思義,就知佢喺一間全面嘅意大利餐廳,提供各類意式美饌,讓人客充分感受到獨特嘅意式情懷。
廢話似乎講多咗,言歸正傳,點解無啦啦有杯免費咖啡?因為有朋友晌度食晏,打電話嚟問我想唔想嘆杯靚啡,作為之前幫忙嘅回禮,既然免費,當然唔拘啦,就要一杯鮮奶咖啡啦唔該,店舖門口交收。因為外買緣故,無拉花公仔啦,不過依然氣味芳香,口感細滑,可能喺朋友嘅一番心意,杯咖啡感覺特別有份打氣嘅力量!
|
|
|
景村雲南米線
|
標題 : 用心專一賣米線 |
地址 : 美孚蘭秀道2號N16A地舖 |
地區 : 美孚 |
|
現時分數:
|
日期 : 2012-09-21 15:57:21
以我記憶所及,晌美孚有米線賣嘅店鋪唔多,好似「味味佳」依類茶記、「金裝燉奶佬」連鎖餐廳、「美孚冰室」……等等都有兼賣吓米線,但「景村」就喺唯一一間打正旗號專賣雲南米線,而且佢都非常專一,獨沽一味只賣米線,想食其他粉麵,就唔該過主喇。
鋪位細細,全店坐得廿個人左右,一室鮮紅,天花吊燈頗別緻,牆上掛畫又甚有共產味道,襯以木枱木凳,整體好有中國色彩。餐牌好簡單,就只有一張A4大細,底面兩頁一眼睇晒,不外乎米線配車仔餸,另外就只不過有啲特色小食。
店內分3款招牌米線底,分別喺:小窩米線($21,唔辣,配料包括酸菜、韮菜、芽菜、芫茜、蔥)、酸辣米線($22,由小辣到勁辣5級,配料比小窩米線仲多咗肉碎)、麻辣米線($22,無論辣度選擇,抑或配料,都跟酸辣米線一樣)。配料有成30多款,分$5、$8、$10三級,而餐飲優惠就喺凡食米線,可以加$6配飲品,仲要冷熱同價,而且唔收加一。
小窩米線 + 豬大腸、腐竹、冬菇 $36
嘩,成碗米線裝得滿滿又大碗,米線份量超多,胃納細嘅女士多數都會食剩呀,口感滑滑。豬大腸,切得細細片,但食吓食吓食極又有咁,都唔少,無乜豬臊味,喺鹹咗少少啫;腐竹,成張紙巾仔咁大大片,唔喺碎濕濕,足有三、四塊,豆味都唔錯;冬菇,雖然唔喺原隻,已經切咗片,但食得出幾厚肉,又幾香菇味。
小窩米線 + 豬肚、竹笙 $31
豬肚,切成絲,腍得嚟帶少少煙韌;竹笙,好多吓喎,又幾爽口,因為竹笙本身無乜味,所以如果食酸辣或麻辣米線,等啲竹笙索滿湯汁嚟食,味道應該更好。講番個湯,湯底幾香,唔會淡如水,可能下咗味精,因為食完有少少渴喉,當然點都唔及酸辣同麻辣兩個湯底咁搶咁惹味。另一方面,配料落得都算重手,以芽菜、芫茜最鬼多,其次酸菜亦都唔少。
仲有啲小食,除手拍青瓜、涼拌木耳、油菜外,其餘嘅如麻辣豬耳、麻辣牛肉、麻辣墨魚頭、尖椒皮蛋都喺嘢。因為仍然抱恙,辣嘢免問,否則我老婆應該會試麻辣米線,而小弟都會試吓小辣嘅酸辣米線啦,唔使太寡丫嘛!今次只喺試咗個清湯底,未知佢酸辣同麻辣嘅實力,整碗米線都幾好食,不過豬大腸過鹹,湯底有加味精,所以俾住個OK佢先,等有機會再試埋酸辣同麻辣,到時先叫試到真章,如果掂嘅,到時俾個笑佢都未遲!
|
|
|
Subway |
標題 : 實惠Subway潛水牛 |
地址 : 尖沙咀麼地道67號半島中心地下35G號舖 |
地區 : 尖沙咀 |
|
現時分數:
|
日期 : 2012-09-20 16:14:45
Subway啲潛水堡真喺幾得架喎,次次嚟食,次次都保持到水準,真喺稱得上大件夾抵食,今回試咗「優質」級別嘅芝士牛扒,仲要喺要咗超值12吋長,因為同老婆兩份食嘛!
Subway嘅潛水堡分4個級別:經典Classics($27.8 -6吋 / 45.8-12吋)、滋味Favorites($32.8 / $50.8)、傳統Traditional($35.8 / $53.8)、優質Premium($39.8 / $57.8),+$12轉套餐,多杯飲品加薯片一包或曲奇兩塊。因為買番屋企食,有自家飲品,我哋就無謂轉喇!
芝士牛扒優質潛水堡
選咗蜂蜜燕麥做包底,喺四款包之中至愛嘅一款,因為外型粗中有柔,粗糙嘅燕麥包面,內裡軟熟有蜜糖甜香,當然所謂蜜糖甜香唔好諗住爆炸性咁湧出嚟啦,只喺食落帶少少甜味。十多款配料任揀,我就唔多心,只喺揀咗紫洋蔥、蕃茄、酸瓜同青瓜,再唧上蜜糖芥辣汁,又喺「賣飛佛」嘅醬汁。麵包輕輕烘過,加入大量配料,而牛扒粒亦落唔少,加埋芝士同蜜糖芥辣醬,一大啖喺咁噬落去,滿口豐富滋味,牛扒粒好重牛味唔喺流,蕃茄酸瓜帶出酸味,平衡番牛肉同芝士嘅濃味,洋蔥青瓜又加添脆脆爽口感,蜜糖芥辣甜甜辣辣,多種味道集於一身又唔亂,自己都覺得今次所揀嘅配搭極之唔錯。
作為一餐輕怡嘅午餐,其實算豐富咗喇,哈哈!見佢依家星期一至日,每日都推出一款精選,只喺買$21(6吋),Subway慣性足料大份,配料選擇多又健康,久唔久食晏轉吓口味都唔錯啦!他朝有日要改個中文名,「實惠」唔知得唔得呢,發音又近,又代表到佢啲潛水堡抵食,不過只喺跟本地一間家品傢俬鋪同名,可能被人話侵權啫。 |
|
|
Subway |
標題 : 實惠Subway潛水牛 |
地址 : 尖沙咀麼地道67號半島中心地下35G號舖 |
地區 : 尖沙咀 |
|
現時分數:
|
日期 : 2012-09-20 16:12:18
Subway啲潛水堡真喺幾得架喎,次次嚟食,次次都保持到水準,真喺稱得上大件夾抵食,今回試咗「優質」級別嘅芝士牛扒,仲要喺要咗超值12吋長,因為同老婆兩份食嘛!
Subway嘅潛水堡分4個級別:經典Classics($27.8 -6吋 / 45.8-12吋)、滋味Favorites($32.8 / $50.8)、傳統Traditional($35.8 / $53.8)、優質Premium($39.8 / $57.8),+$12轉套餐,多杯飲品加薯片一包或曲奇兩塊。因為買番屋企食,有自家飲品,我哋就無謂轉喇!
芝士牛扒優質潛水堡
選咗蜂蜜燕麥做包底,喺四款包之中至愛嘅一款,因為外型粗中有柔,粗糙嘅燕麥包面,內裡軟熟有蜜糖甜香,當然所謂蜜糖甜香唔好諗住爆炸性咁湧出嚟啦,只喺食落帶少少甜味。十多款配料任揀,我就唔多心,只喺揀咗紫洋蔥、蕃茄、酸瓜同青瓜,再唧上蜜糖芥辣汁,又喺「賣飛佛」嘅醬汁。麵包輕輕烘過,加入大量配料,而牛扒粒亦落唔少,加埋芝士同蜜糖芥辣醬,一大啖喺咁噬落去,滿口豐富滋味,牛扒粒好重牛味唔喺流,蕃茄酸瓜帶出酸味,平衡番牛肉同芝士嘅濃味,洋蔥青瓜又加添脆脆爽口感,蜜糖芥辣甜甜辣辣,多種味道集於一身又唔亂,自己都覺得今次所揀嘅配搭極之唔錯。
作為一餐輕怡嘅午餐,其實算豐富咗喇,哈哈!見佢依家星期一至日,每日都推出一款精選,只喺買$21(6吋),Subway慣性足料大份,配料選擇多又健康,久唔久食晏轉吓口味都唔錯啦!他朝有日要改個中文名,「實惠」唔知得唔得呢,發音又近,又代表到佢啲潛水堡抵食,不過只喺跟本地一間家品傢俬鋪同名,可能被人話侵權啫。
|
|
|
Patisserie Yamakawa |
標題 : 山川正品 |
地址 : 中環港景街1號國際金融中心商場二期1樓(Citysuper內) |
地區 : 中環 |
|
現時分數:
|
日期 : 2012-09-20 15:33:29
Patisserie Yamakawa喺京都過江龍嘅蛋糕店,店名改得直接「山川先生的法式蛋糕店」,稍稍晌網上搵番此店嘅資料,就會知道佢喺來自日本京都,創辦人叫山川良廣先生,曾經學藝於法國,故此蛋糕、甜餅揉合咗法日風格,再者,日本人做事一向認真嚴謹,選料、製作又點會馬馬虎虎丫。
不過講開京都嘅甜點就有啲失禮,好多年前去過京都旅行,但嗰次以大阪為主,京都都喺即日來回,去咗好多景點,食咗好多嘢,晌嵐山食糰子、豆腐雪糕,清水寺試咗啲湯豆腐,又晌二年坂買栗子食,仲有街邊檔嘅鯖魚燒餅……,竟然無食過賣相精緻嘅法日甜品囉!
中午時段去,見到一櫃都放滿多款甜餅,淨喺睇都心郁郁,最終揀咗兩款跟同事一齊當下午茶分享。個包裝盒都幾大個,但我哋得兩件餅,唔使擔心啲甜餅晌盒內打筋斗,因為都貼好晒膠紙。
鮮士多啤梨撻(Strewberry Tart)$45
呢個鮮士多啤梨撻既為人氣第一位,定必有其實力之處,其次第二、三位喺朱古力熱情果慕絲蛋糕同栗子布朗蛋糕。首先個士多啤梨撻賣相確喺好靚,本身個牛油撻底做得好完整,上面鋪滿飽滿鮮紅又大粒嘅士多啤梨,絕對喺紅色誘惑。為咗影張橫切面嘅甜餅相,都有啲啲難度呀!撻底富牛油香,鬆脆實在,而士多啤梨新鮮清甜多汁,果真用上上乘食材,士多啤梨內嘅吉士亦都打得幼滑有蛋香,當然蛋味唔及下面個雞蛋布甸咁強勁,但做吉士又何需蛋味咁霸道呢?最緊要喺整件果撻夠平衡,牛油香、蛋香對士多啤梨嘅清甜,撻底鬆脆對著吉士嘅幼滑同士多啤梨嘅多汁,咁先有種層次感嘅享受!
焦糖雞蛋布甸(Caramel Pudding)$25
外觀無乜賣弄花巧,極之平實嘅外型,喺一款唔講外表講內涵嘅甜品。雞蛋布甸嘅蛋味澎湃濃郁,但喺,雖然布甸內睇到混有好多雲喱拿籽,足證以原條雲喱拿條製作,不過好老實,雲喱拿味真喺唔明顯,或者因為蛋味超強,蓋過雲喱拿味,而且,底部嘅焦糖質地水汪汪,整體比期望中有頗大落差。
因為個焦糖雞蛋布甸未附預期,淨喺得件鮮士多啤梨撻超水準喺未夠,所以,今次只好俾住個OK佢先。
|
|
|
東海堂 Arome Cake Shop |
標題 : 關西柚惑芝味 |
地址 : 荔枝角長沙灣道833號長沙灣廣場地下G09B1號舖 |
地區 : 荔枝角 |
|
現時分數:
|
日期 : 2012-09-19 17:00:29
之前試咗佢幾款切餅同千層酥,卒之都買咗個「關西柚子芝士蛋糕」返嚟試試,趁今晚人齊啲晌小弟屋企查經,就買一個一齊分享,當查經後嘅小茶點。
東海堂一向致力出品優質日式蛋糕、甜餅,近年多做咗宣傳,又搵日本人氣西餅師合作嚟做料理顧問,依個關西柚子芝士蛋糕就喺佢嘅頭炮,以歐洲風格嘅芝士餅揉合日本食材,又睇睇成績如何?味覺有咩衝擊?
蛋糕本身有三層,佔成個蛋糕1/3嘅底層喺海綿清蛋糕,跟住薄薄一層柚子皮夾柚子果醬,另外2/3就喺柚子芝士慕絲,再跟一包杏仁方脆鋪在餅面,可說有四重唔同質感。外型純潔簡樸而帶少許玩味,呈長形無乜花巧裝飾,海綿蛋糕底喺基本功,做得鬆軟綿綿;中間一層嘅柚子果醬做得太薄唔明顯,差啲唔知,喺食到時候嗒到啲柚子皮才稍為食出,味道還是香甜;至於柚子芝士慕絲,睇介紹喺以關西直送100%純柚子汁同法國忌廉芝士打成,口感幼滑,又散發出柚子清香,感覺幾清新可人,柚子味確喺頗為突出,相反,芝士味就較為隱約喇。好多年前去過日本關西,真喺唔知原來關西柚子都幾出名喎。杏仁方脆,似喺杏仁牛油曲奇咁,食落鬆化。講到玩味,就喺啲杏仁方脆,客人可自行用佢哋做出自己心水圖案,鋪晌餅上,不過,其實可變化嘅地方都唔多。如果送多支朱古力或芒果漿唧筆,等客人發揮更大創意晌餅面寫寫字或畫圖案,相信仲有趣、玩味更大。
依款餅話喺季節限定,相信源於關西柚子,咁遲啲又可唔可用上其實柚子嚟出呢?如泰國金柚,台灣文旦柚,唔知味道又會喺點呢!
|
|
|
豐盛酒樓
|
標題 : 無要求.起勢滾 |
地址 : 荃灣青山公路264-298號南豐中心商場4樓 |
地區 : 荃灣 |
|
現時分數:
|
日期 : 2012-09-18 09:47:23
自從加入咗老婆教會嘅一個弟兄小組,同依班弟兄一時晌教會聚會,一時就出去食飯,所以就多咗出嚟一齊飯局,差唔多個個月都有。不過,我哋志在搵個聚腳點,彼此交流傾偈,食乜嘢反而真喺好次要,好似今餐咁,只喺嚟到豐盛依間可謂街坊酒樓打鞭爐,烚吓烚吓起勢滾。
晚市好多客都喺嚟打鞭爐,勝在夠抵,星期一至日同價,成人$78,小童$68(9:00pm後平多$10),但就收番$12茶芥、$20醬料費同加一,所以埋單每位$120。任飲任食2.5鐘,比一般只喺食兩個鐘頭更加夠喇。
$12茶芥就擺明巧立名目,因為多款任飲飲品,有幾多個會飲茶丫?另外佢本身又收$20醬料費,所以個「芥」又喺搵老襯,不過,依$12我就當任飲費,飲得兩罐汽水都賺番啦。哈哈!之可過講開任飲,又算幾好喎,完全自取,唔使剔紙咁麻煩,出面擺晒幾大桶汽水、啤酒任拎,仲有竹蔗水、酸梅湯、橙汁任斟。打鞭爐咁燥熱,小弟就邊食邊飲,一般都3、4罐汽水加酸梅湯先夠皮。
收得$20醬料費,佢都俾番咁上下嘢你。飲品旁就喺自助醬料枱,有蔥花、紅椒絲、青椒絲、香茜、生蒜蓉、炸蒜粒(熟蒜)、XO醬、麻醬、白芹粒、指天椒粉、豉油、辣椒豉油多種,俾係點混醬得!
未講火鍋料前,仲有一樣嘢喺自助嘅,自助餐有沙律吧,佢就有個蔬菜吧,一大張圓枱,放滿成廿多款蔬菜、瓜果、菇菌……,拎個小筲箕,就可以埋嚟睇埋嚟揀。依個安排真喺幾好,佢又唔使嘥人手拎嚟拎去,食客又可以按自己喜好要邊款、拎多少,最緊要好似店家話齋:「食物寶貴,切勿浪費。」故此,佢哋都好似其他任食嘅店舖咁,清楚寫明剩餘食物,無論生熟,每兩$5,不過為免得失啲客,都喺得個講字,好少執行嘅,咁依家啲食客普遍都好守規矩,唔會太過份。
湯底分為免費同特選,免費嘅有4款,如粟米豬骨湯、潮式豬肚湯……;而特選就要加錢,由$28-$48,共5款,如有藥膳醉雞湯、馬來沙嗲湯……。我哋無要求,覺得要啲免費嘅湯底都夠喇,就點咗最大路嘅粟米豬骨湯同香茜皮蛋湯。
一開始就講話喺弟兄聚會,一枱都喺男士,加上大部份睇身形都喺戰鬥格,所以首輪點料毫無顧慮呀,一於去盡啲都唔怕。撇除番出面蔬菜吧有嘅嘢,火鍋紙上有成50、60款火鍋料,一口氣點咗好多嘢,乜丸物丸、肥牛雞件、鮮蝦吊桶、魚雲魚滑、鯇魚片炸魚皮……,全部一小碟為一小份,幾盆火鍋料輪住送上嚟,都無對嚟多定嚟少,反正唔夠下一輪再落。新鮮食材如鮮蝦、吊桶、鯇魚……用料不俗,三寶丸(自家手打豬肉丸、牛肉丸、鯪魚球)、魚滑打得唔錯,反而凍肉嘅丸類同肥牛一般,不過整體而言,所食嘅十幾廿款配料裡面,算喺穩打穩紮,無乜太大出錯。再者,一大班人飲住食住高高興興咁傾偈,都好盡慶啦!
|
|
|
紅螞蟻 Red Ant Restaurant |
標題 : 孤伶伶.但食得有營 |
地址 : 九龍灣宏照道38號Megabox2樓25號舖 |
地區 : 九龍灣 |
|
現時分數:
|
日期 : 2012-09-17 11:59:00
因工作要過一過浸會大學,完事都成5點幾,順便去埋九龍灣Mega睇啲嘢,知道今晚都無住家飯食,一支公就打算食埋先返去。平時如果得一個人孤伶伶食晚飯,策略多數都喺平簡快,目標就只不過喺填飽肚,今晚就有少少唔同,想食得營啲。
甚少平日嚟Megabox,原來人流真喺咁少,晌二樓尾見到間紅螞蟻,諗起都好耐無幫襯過,記得佢啲質素都有一定水準,又想食好少少,就試吓紅螞蟻。裡面空無一人,得幾個侍應準備緊晚市,可能真喺早咗啲,7:00pm未夠。
餐廳環境裝修得幾舒服,卡奇色襯啡,店內燈光柔和,入門口左邊一列卡位特別寬趟,而拍牆位有挨背梳化。睇睇餐牌先,封面做到成本雜誌咁,幾型格喎。內裡有風味小食、乳酪咖喱、金牌焗飯、湯麵、異國麵食、甜品……等等,無某一種菜系主導,可謂集各家大成。凡點主菜一款,可以加$28配上精選沙律或餐湯,跟一杯普通啡茶熱飲。突然間又好想飲奶昔,所以無加錢轉餐,只喺多叫一杯木瓜奶昔。
香蒜欖油加州番茄乾雜菜炒意大利粉 $69
睇名就知喺素食一碟,以橄欖油嚟炒意大利粉,點都算健康啲。個意粉賣相真喺平平無奇,雜菜有西蘭花、椰菜花、荷蘭豆、蘑菇、大菇,配合埋番茄乾,聞落好香香草味,味道帶有濃郁蒜香,雜菜如西蘭花、荷蘭豆煮得幾爽,番茄乾又別有風味,而且意大利粉做得煙韌有咬口,甚有水準。唯一要挑剔嘅,就喺欖油稍多啫,雖然橄欖油相對都屬於健康食油,但太多感覺都唔多好!
木瓜奶昔 $22
一大杯鮮橙色嘅木瓜奶昔隨著碟意粉跟手送上,一飲就覺得好正,好簡單,木瓜味濃,夠冰凍,口感仲要幼滑香甜唔會「稀淋淋」,炎夏「爽身品」呀!況且,平時飲得多奶茶咖啡,木瓜奶昔點都喺健康多一點吧!
雖然只喺食碟意粉飲杯嘢,加埋一,都要成舊水落樓,但感覺良好,因為兩樣嘢都水準不賴嘛。
|
|
|
Pantry Bread & Pastries |
標題 : 閃亮人生 |
地址 : 銅鑼灣百德新街50-56號唐寧大廈地下D舖 |
地區 : 銅鑼灣 |
|
現時分數:
|
日期 : 2012-09-14 12:19:29
啱啱睇完套法國電影「閃亮人生」,真人真事改編,故事幾輕鬆有趣,結局又帶幾分感人。劇中兩位主角,一個有錢到不得了因跳降傘意外導致幾乎全身癱瘓嘅白人,另一個窮到褲穿窿剛出獄嘅黑人,兩人由幽暗無望嘅生命,因偶遇成為主僕,擦出友誼火花,令人生逆轉,閃亮出第二個精彩人生。我嘅際遇就當然無咁神奇,工作依然勞勞碌碌,所以嘆個優質嘅下午茶嚟閃亮吓我嘅人生先!
除咗同老婆,仲有約埋另一對夫婦齊齊嚟食, Ivan兄就喺以前一齊學整甜品、學整麵包嘅同學仔,因為佢都好有興趣試吓依個「茶水間」嘅出品,食完佢哋就話順道朝聖吓希慎添。
餅店位處名店坊食街內,睇名就知主打麵包同凍餅,鋪內左邊一排排籐籃放滿各式各樣歐陸麵包;正中間就喺有成廿多款嘅餅櫃,款款都只會擺得幾件,有啲仲標示「售罄」添,店員話為保持質素新鮮,唔會太大量製作;最右邊有個小雪櫃存放咗啲樽裝凍飲。
如要堂食,就要晌鋪外嘅露天位,有晒簷蓬唔怕落雨,不過唯一唔好喺露天位可以吸煙,去到啱啱得番一張枱,點知前後有幾名煙民夾攻,無奈!店員Tracy見我哋有啲唔知點算嘅時候,問我哋介唔介意坐晌鋪角另一邊巷仔,地方更闊落,只喺無咗道簷蓬,反正無落雨無所謂,「拿拿淋」幫手開枱拎凳,因為依邊位感覺仲正仲開揚,更無鋪面正門啲位咁逼添。
凍餅實在太多款式,樣樣都做得別出心裁、精巧的骰,真喺花多眼亂款款都想試,幾難抉擇下卒之揀咗4款,再加三杯凍飲。落單後所有嘢都會由店員送上,大可安心返埋位等食。由於若將每件凍餅都一開四比較麻煩,所以我哋兩家人,每款凍餅一開二簡單啲,各自分享就可以喇!
紅豆綠茶蛋白卷 $32
見好多食家都讚,點都要親身試吓架喇!好少做卷蛋個卷心落咁少忌廉,少忌廉合晒老婆口味,就算面層嘅忌廉,食落少甜輕柔,加上佢真喺偏愛紅豆綠茶依個好和式組合。綠茶海綿蛋糕較實在,唔會食落太過一陣風咁,但口感依然軟綿;有啲餅鋪想綠茶味夠強,有時會弄巧反拙,出嚟味道會濃得嚟帶苦,而今次所食到嘅綠茶味夠出之餘,有種茶香韻味,正。紅豆,鋪滿整個卷心,保證啖啖滿口紅豆滋味,加上紅豆香甜。
無花果芝士餅 $38
粉紫色旋扭嘅外型,以特製噴槍做出紫色朱古力粉嘅絨面,賣相高貴典雅。我哋先嚟猜猜頂上嘅球體喺乜,破開後原來喺中空既白朱古力波,當然喺裝飾大於一切。由下至上,有海綿蛋糕、無花果肉、紅桑子啫喱、芝士慕絲;鮮無花果肉味道突出,雖然喺芝士餅,仲以忌廉芝士嚟做,但芝士味唔會好似紐約芝士餅嗰種咁重,感覺較輕盈,所以芝士反而喺配角。總括咁講,整體嘅配搭有種清新感!
果餡酥(蘋果 / 芒果 / 香桃) $38
平時我哋慣叫拿破崙,芒果就食得多,今回試一試香桃。你見餅櫃只有一件做樣板,主因原來依款甜品喺即叫即做,提高酥皮嘅香脆度。酥皮個質素,確喺有一手,每層酥皮都好有牛油香酥,而且極之鬆脆,最特別喺面層酥皮撒咗啲黃糖嚟焗,有種麥芽、焦香嘅味道,初時我哋仲以為加焦糖!而吉士加入原條雲喱拿煮,帶有好多點點雲喱拿籽,所以除蛋味,仲有輕輕一朕天然雲喱拿味;至於裡面,吉士之上鋪滿香桃,果肉清甜!
紅桑子牛奶朱古力餅 $40
依個凍餅,喺小弟第一眼就好想試嘅款式,個餅細心數,一共有成7層,事後問過餅廚黎師傅,原來要花兩日時間嚟製作。初頭食落有朕榛子味,好似金莎朕味,以為加咗榛子,原來係餅底加咗杏仁粉,仲有脆米,所以口感既香且脆。而當中幾層淺啡色喺牛奶朱古力慕絲,中間一長形條只喺簡單一朕紅桑子啫喱,再數上去仲有一層朱古力脆脆。個餅除咗層次多之外,仲有一個亮點,就喺餅面嘅鏡面朱古力漿,手工真喺一流,色澤夠閃爧,平滑無起泡,質感夠柔滑,厚薄啱啱好。做法喺易學難精嘅嘢,先雪凍個餅,溶好嘅朱古力漿控制好合適溫度,撞落個餅度,利用個餅嘅冷溫,凝固返啲朱古力漿,做成一朕柔滑嘅鏡面朱古力。我哋間中玩吓整餅就知,如果朱古力漿溫度控制得唔好,唔夠熱嘅話,倒落去唔流開,又或出嚟層漿過厚,相反,過熱會搞到好瀉身,化晒個餅四周,做唔成層軟漿,仲記得以前學整「歌劇院蛋糕」(Opera),真喺搞到捩咁棄(音:呢咁hea)。想番起,比起嗰時晌灣仔永豐街ēpöch食到嘅7 Layer Valrhona Chocolate Cake,覺得有過之而無不及,單單講番件餅,口感紛陳,淨係睇手工咁繁複都值回票價啦。所試嘅4款餅之中,佢喺小弟至愛囉!
講完啲餅,又講講啲飲品先。因為老婆唔好凍飲,其實依度有供應花茶,不過又唔喺太想飲,所以孖埋我飲咗一杯凍啡,另外兩位朋友就各自各精彩。
凍意大利鮮奶咖啡 $36
其實咖啡我都喺首選熱飲,因為熱飲先真正感受到嗰份香濃細滑、醇香回甘,不過,天氣有點熱,晌度又只有露天位,改飲一下凍嘅意大利鮮奶咖啡。雖然咖啡香味猶存,始終加咗冰塊,令醇滑度打咗折扣,所以,今勻杯咖啡唔講太多!
Blueberry Smoothies $36
Kiwi Fruit Smoothies $34
晌網上幫Smoothies搵咗個中文譯名「思慕雪」,音譯得嚟幾有思意,我都幾鍾意依個中文譯名,我打食評盡可能都用中文去描述,以廣東話形式就想令人讀起嚟更親切,就好似小弟親口向你介紹美食,題外話講多咗,返番嚟啲思慕雪度。成份大多數離不開蔬果原材料、蔬果汁、牛奶、酸奶或者乳酪、冰粒,而晌度賣嘅思慕雪,就以新鮮生果、乳酪、蜜糖、冰粒打成,選用蜜糖自不然希望杯思慕雪更天然、更健康啦,比例要視乎打邊隻生果,因為隻隻生果含水份都唔同。見到佢哋兩個都話杯嘢唔錯,當然我又想試啦,問問店家有無紙杯仔,喺有嘅,倒少少試一試。視覺上已令人覺得充滿新鮮果肉,先試藍莓思慕雪,見佢色水咁深紫,但藍莓味無想中咁濃,反而後試嘅奇異果思慕雪,奇異果味相對突出好多,帶酸,炎夏一飲,感覺涼快醒神。除味道外,質感圓滑,帶有少少微細果肉,但又唔會好似思樂冰、沙冰咁有粒粒碎冰口感,冰凍得嚟唔會太冰冷,凍到牙都酸,夏日降溫推介。
享受緊個下午茶期間,遇到餅廚黎師傅,當然趁機問咗所試幾款凍餅嘅問題啦,好似上面件紅桑子牛奶朱古力餅,特別多嘢想知。仲有其他有關整餅衰咗嘅問題,黎師傅有問必答,真喺獲益良多。而店內服務員溫文有禮,服務幾貼心。
蜂蜜合核丹麥酥 $32(全條) / $17(半條)
丹麥方包近年都幾熱門,尤其博洛利亞嘅出品。既然店名叫得“Bread & Pastries”,見佢哋凍餅做得咁上乘高質,所以又再試吓佢啲麵包,揀來半條蜂蜜合核丹麥酥,可以叫店員切片。包內合桃唔多,只喺搓好個丹麥方包落殼後,晌面面加入合核粒再烘焙,所以,只有包面有少少合桃。其實都見到麵包內嘅層次,整體都好鬆軟,富牛油香,不過個人對丹麥方包要求高啲,感覺未去到一層層如手撕種酥化。不過,都喺試咗佢哋一款包,評價佢嘅麵包出品自覺未夠全面,等有機會試多幾款先再分享。
除凍餅同麵包,店家仲有出品曲奇、蝴蝶酥,以及為應節嘅自家品牌迷你奶黃月餅,後者就無機會試喇,但前者嘅曲奇同蝴蝶酥倒有一試嘅機會,因為晌麵包架側仲有一個貨架,擺賣多款袋裝或禮盒裝曲奇同蝴蝶酥,下面放有一個個玻璃甕,一共7款曲奇及1款一口蝴蝶酥任君試食,每個甕都要揭蓋兼且側跟有個小鉗,試食得嚟都衛生啲。大致上曲奇口感鬆化鬆脆、滲出牛油香氣有水準,眾多款式裡面小弟較喜歡一口蝴蝶酥、紅莓杏仁曲奇、咖啡合桃曲奇、斑蘭榔絲曲奇,黎師傅透露,話曲奇都喺即日做,保證新鮮鬆脆。你又會鍾意邊款?一於去食件餅,嘆杯思慕雪,再試試佢啲曲奇啦!講開再講,曲奇試食睇得出店家嘅大方,因為曲奇一開二,大大粒曲奇令人咁先食出佢嘅味道。 |
|
|
新星海鮮酒家 New Star Seafood Restaurant |
標題 : 飯堂撐枱腳 |
地址 : 荔枝角長沙灣道680號麗新商業中心地下59號 |
地區 : 長沙灣 |
|
現時分數:
|
日期 : 2012-09-13 17:46:11
長沙灣新星喺我同班好兄弟(又喺好弟兄)嘅火鍋飯堂,一來對我哋嚟講地點就腳,二來因為要就其中一人,食親都揀9:00pm任飲任食無時限,食得何其暢快,三來食過咁多次質素依然有保證。今晚再嚟,就唔喺同班老死,而喺同老婆嚟撐枱腳,因為早前三、四月佢做咗個推廣「二送一」,每兩個幫襯就送一張「人頭」優惠券,值$78,啱啱得兩張,就晌限期前個星期五27/4嚟幫襯,所以,唔好意思,依篇食評都無乜心裝載放埋咗一邊無理,都已經喺好幾個月前嘅事,可能參考價值唔大,純粹講番吓佢啲食材嘅質素。
雖然任飲任食火鍋已經悄悄加咗價,以前9:00pm前成人$98,依家就$108;9:00pm後成人$78,依家就$88,另湯底、茶芥加一,但近排知道佢又做番「四送一」優惠,喺四個人光顧就俾三個人錢,唔使等下次,個著數仲直接,依然覺得抵食,所以已經打算又約班老死出嚟打打鞭爐,傾吓偈。
就返老婆加班,都喺食番9:00pm後嗰輪,可能星期五關係,都無諗過咁夜都仲咁多人,成個大堂爆晒,等位嘅都成十多人,我哋都要等成廿分鐘先有位,真喺緊要。兩張優惠卷抵番人頭費,淨喺俾番湯底、醬油、小食、加一,埋單$94,抵到爆啦!
湯底有成12款:粟米銀蘿豬軟骨、枝竹鯇魚、海鮮豆腐、花彫醉雞……,價位由$55-$98,各式其式,結果平平哋要咗個香茜皮蛋馬蹄($55),個湯底好香芫茜味,因為湯面住一大炷芫茜;撈撈底,皮蛋馬蹄就好少喎,變咗香茜豬骨湯底。
火鍋配料有成60多款,兩個人一定試唔晒咁多啦,所以有啲要另外收錢嘅配料,如龍蝦片、帶子片、特級肥牛粒……就當然無嘥錢叫啦。之前食過好幾次,揀料已有一定心水,首推就包括:海蝦、鮮滑牛肉、鮮滑雞片、鮮魷、魚滑、蟹粉流心丸、芝士流心丸、鮮腐竹、炸魚皮、鯇魚腩片、黑椒牛根丸、順德魚腐。不過,可惜海蝦、鯇魚腩片賣晒無貨,黑椒牛根丸變咗淨喺牛根丸,所以無要到轉食其他丸,順德魚腐依家就直情無埋添。此外,仲點咗黑豚豬肉、牛柏葉、四寶丸、秀珍菇、生根、栗米、炸芋頭條、蘿蔔、唐生菜、油麥菜、芥蘭咁多款嘢,全部俾個剔,無寫數量,當一份啦,執出嚟已經成一大盆嘢,睇落真喺唔嘢少呀!講到上述心水,鮮滑牛肉、鮮滑雞片依然用料新鮮,尤其牛肉,非常嫩滑;鯪魚滑,加咗大量香蔥打,味道鮮香;其他嘅都用料不賴,又食咗好多蔬菜嚟平衡番啲肉,成盆料清得一乾二淨無嘥嘢,但就相當之飽,臨尾想整多個出前一丁都食唔落,所以都無剔第二輪喇。
雖然任飲,但我哋都只喺叫咗一渣夏枯草,仲要成大樽差唔多由小弟主力飲晒,志在解解燥熱。始終老婆唔喺大飲大食之人,所以,今晚飲得少,食又唔多,有點未能盡慶,都喺跟番班老死出嚟大涮一餐先至過癒囉!
|
|
|
魚滑粥粉麵茶餐廳
|
標題 : 超爽滑鯪魚丸 |
地址 : 大埔翠樂街8號富萊花園8號 |
地區 : 大埔 |
|
現時分數:
|
日期 : 2012-09-11 18:31:39
太和,雖然都有朋友住晌依區,不過都好少入嚟依區,反而一年有一次約,一定會入嚟,就喺去長霞淨苑掃掃姑媽嘅墓,平時都喺跟大伙親戚一齊嚟,完咗一齊食飯。不過,今次唔同,因為老婆都有嚟,所以完咗閃先落去太和搵食。
晌區內兜咗個圈,睇定有幾個心水,老婆話想食粉麵,最後揀嚟「魚滑」。「魚滑」格局屬街坊粉麵小店,所以環境唔多講。
睇睇餐牌,見到「招牌鯪魚滑」特別標示出嚟,所以視為首選;粉麵每碗$17,雙拼就要$20,而牛筋腩、金錢肚就貴啲,$19 / $22;另外,仲有個「粥+腸粉餐」,一款粥品搭一款腸粉賣$27,抵食喎,又有興趣試埋依個先。
招牌鯪魚滑油麵 $17
麵條有好多選擇:河粉、米粉、粗幼麵、油麵、米線,揀嚟油麵因為好耐無食過。份量頗多,唔單止麵條,餸料都好多,有炸魚皮、炸鯪魚片同鯪魚丸。炸魚皮做得非常脆口,因為放咗晌湯面,所以要食佢先;炸鯪魚片,好似平時食魚蛋粉嗰啲炸魚片,不過就用咗鯪魚做餡,而鯪魚丸細細粒,口感超爽滑,估唔到咁正架喎。湯頭味唔喺好濃,叫話清清甜甜,每碗都附有一匙羹炸蒜粒,放埋入湯攪一攪,多份蒜香。
粥、腸粉餐 $27
依款套餐一共有5款粥8款腸供選擇,詳細唔講,可以睇相,講到明腸粉喺即叫即製。我哋要咗生菜鯪魚球粥,撞鬼丫,啲鯪魚球好大粒,同樣爽滑,老婆嗒得出話加咗果皮,不過小弟又唔喺好食得出,不過粥底綿滑就大家都一致認同。腸粉揀嚟鮮豬潤腸粉,雖然豬潤新鮮嫩滑,可惜喺腸粉皮拉得有少少削,而豬潤切到細細條「奀挑」咁,夾起時「散修修」,跌到一碟都喺。
平均廿零蚊食個晏,抵過去快餐店,招牌鯪魚滑確喺有一手,粥都唔錯喎,腸粉如果以今日嘅質素,就不宜沾手!
|
|
|
蒲點 Champs Bar |
標題 : 利迷蒲點飯堂嘆美饌 |
地址 : 灣仔灣仔道209-219號利景酒店地庫1樓 |
地區 : 灣仔 |
|
現時分數:
|
日期 : 2012-09-10 12:04:06
好耐之前都嚟過利景酒店嘅逸亭餐廳食自助晚餐,原來已經喺5年前嘅事,嗰時都知佢有間酒吧晌地庫,不過甚少落吧嘅我,未有再深究其中。機緣之下,今日終有機會一試,並且順道幫老友兼舊同學Eva賀佢牛一,又再順手預祝埋小弟老婆生日,不過佢正日已經訂咗枱食飯,今晚只喺趁人多高興啲嚟賀埋一份。
Champs Bar,原來有個中文名字:蒲點美式酒吧,格局跟一般酒吧無異,周圍安裝咗好多部平面大電視,又有巨型投影銀幕,不斷播放各種運動賽事,當然唔少得直播英超啦。此外,座位嘅安排比較闊落,感覺寬敞舒適,但更能吸引我雙眼球喺牆身嘅掛飾,好多利物浦唔同年代嘅球衫,仲有一張海報印咗好多利物浦嘅典堂球員:杜格利殊、魯殊、奇雲基謹……,嘩!簡直稱得上利迷嘅飯堂啦。先申報個人利益,小弟雖然喺曼聯死硬粉絲,但對依班典堂球員一樣帶有一份敬重,因為佢哋真喺好波丫嘛。除咗睇波,餐廳內仲有電子飛鏢機,又可以享用無線寬頻上吓網,所以唔睇波都啱嚟。
入門口時,見佢有個推廣:「歡樂時光飲品買一送一」,而且依度飲品選擇有幾多,果汁、非酒精類特飲Mocktail、Cider、Beer、Classic Cocktail、Special Cocktail、Wine、Whisky、Brandy、Vodka、Rum、Gin、Tequila……等等,而且,歡樂時光由5:00-9:00pm,比一般去到8:00pm嘅歡樂時光長多一個鐘,所以,食埋飯都喺個唔錯嘅配搭。不過,有少少溫馨提示,唔喺樣樣都買一送一,有少部分飲品就無依個優惠,例如部份Classic Cocktail、全部Special Cocktail同Wine……等,到時留意一下個飲品餐牌你就見。此外,HSBC / 恆生信用卡仲有9折,真喺可以一慳再慳!
賀生日就自不然無理咁多,各自揀選心水飲品。
Manhattan $60
屬於經典嘅雞尾酒系列,成份有Bourbon威士忌、Sweet Vermouth苦艾酒同Bitters,幾隻酒溝埋,無其他喇,唔好睇佢細細杯,小弟唔喺好酒之人,入口都覺得幾「哽」吓。
Long Beach Iced Tea $72
老婆都幾大膽,竟然揀隻仲多酒溝埋嘅雞尾酒,又有Gin、Vodka、Rum同Triple Sec,隻隻酒精度都唔低架。不過咁,再加埋Cranberry Juice、7-Up,色澤真喺似杯凍茶,而飲落又無想像中咁勁,但喺,佢飲到半杯後都已經話有少少醉意喎!
Cozy Eyes $62
咁多杯之中,依杯賣相就最靚,以Tequila、Triple Sec、Blue Curacao、Lemon同Pineapple Juice所打成碧藍色嘅雞尾酒,高身酒杯載住,杯面一撮白泡加片薄荷葉,色澤誘人。味道喺點?賣個關子,但據試飲者話令人飲得愜意!
Lychee-tini $62
好有一個傳統雞尾酒樣子嘅感覺,黃色嘅外表源於加入咗菠蘿汁,仲有Vodka、Lychee Liqueur、Crème de Banane,後者兩款利口酒帶有荔枝同香蕉甜味。因為酒名以荔枝掛帥,但飲落其實荔枝味又無想像中咁出。
聽餐廳講,遲啲仲會推出一系列Signature Drink,暫時未有詳情,不過都喺一啲雞尾酒,好此道嘅朋友值得留意一下,最希望梗喺都晌「歡樂時光買一送一」之列啦,哈哈!
老友相聚,邊飲邊食自然喺開心事。因為Champs Bar不單喺間酒吧,亦喺一間美式餐廳,故此食物種類真不少。由沙律、湯、頭盆小食、三文治漢堡、薄餅……以至於意粉、多款主菜及甜品都有供應。餐牌細細印咗50多款美食,可能你會略嫌覺得難睇,感覺花多眼亂,但有個簡單做法,就喺試吓佢哋嘅「10大招牌美食」(Top 10 Signature Dishes),當中已包括唔同類型嘅食物。又或者向侍應查詢,因為佢哋手持ipad,有晒食物圖片,等你一目了然有樣睇。
蒲點拼盤(Combo Plate)$168
雖然佢唔喺店內嘅10大招牌美食,但絕對喺我哋今晚最鍾意嘅一道美食,極之值得推介。侍應捧過嚟上枱時我哋已經即刻起哄,嘩嘩聲四起,因為成個拼盤好大份,甚有睇頭,小食款式又多,包括:焗薯皮、炸雞柳、水牛城雞翼、洋蔥圈及墨西哥粟米片,並伴有3款醬汁:酸忌廉、蜜糖芥茉醬、墨西哥辣醬。焗薯皮焗得夠透,質感粉軟,配上車打芝士、煙肉同香蔥,非常滋味;炸雞柳,出奇地嫩喎,炸得外層香脆又大大件,食得過癮,依個蘸蜜糖芥茉醬就最正,芥茉味濃帶蜜糖香,質感柔滑,亦係我哋幾個最欣賞嘅醬汁;以辣見稱嘅水牛城雞翼,喺經典嘅美式小食,不過今次所見就唔喺用上雞中翼部份,而喺用咗半截雞中翼連埋翼尖,而且無乜辣勁,但最窩心喺雞中翼部份已經去晒骨,啖啖肉方便食;炸洋蔥圈亦都睇到廚師嘅心思,個個洋蔥圈都頗大圈,表示大廚用上一個洋蔥較外環嚟做,賣相好睇好多,配酸忌廉就最合拍,只喺覺得粉漿有少少厚,但其實已經炸得頗出色,因為無乜油淋淋嘅油膩感;最後嘅墨西哥粟米片,份量上相對多,為添味道層次,仲加咗青辣椒碎、蕃茄粒、黑橄欖、蔥粒,點酸忌廉或墨西哥辣醬都好食,後者酸酸辣辣,十分醒胃,原來食到下一朕粟米片,仲加咗啲肉醬,味道非常豐富。所以,依個拼盤非常抵食,學Ivan兄話齋,三四個老友記,一人一杯啤,加埋依個蒲點拼盤,已經夠坐一晚啦!
碳燒美國排骨(BBQ Baby Back Ribs)$118(半份)、$168(全份)
燒豬肋骨又喺好多美式餐廳嘅招牌菜,依度都唔例外,分半份同全份,侍應Kenny強烈推介我哋點全份,話好抵食,不過我哋又想試多啲嘢,半份啱啲。半份有6條骨,燒得好香,伴碟有少許沙律菜、酸椰菜、脆薯條,並跟自家製蜜糖燒汁。比起Ruby Tuesday、Tony Roma,依度嘅燒豬肋骨肉質方面較為挺實啲,無咁鬆散,而以燒汁慢烤,汁醬入肉三分好入味,唔蘸蜜糖燒汁都已經好OK,另外難得肉汁仍保持豐盈。雖然配菜一般嚟講喺點綴,但都唔馬虎,酸椰菜絲酸酸甜,幾爽脆;至於薯條,比起麥記嘅大成個呎碼,炸得金黃,食落外脆內軟,加上份量頗多,點啲蜜糖燒汁就更惹味。果然喺店內嘅10大招牌美食之一,又一值得推薦菜式!
美國安格斯肉眼扒(U.S. Angus Rib Eye Steak)$218
對比起上面個碳燒美國排骨,依道肉眼扒就有啲失色。足有12安士嘅肉眼扒,厚身大塊,燒得蠻香,伴有多種蔬菜(珍珠筍、車厘茄、西蘭花、香菇)同原個焗薯。點解話個肉眼有啲失色?一來我哋要五乘熟,但切開所見近乎全熟,只喺有少部份仍帶粉紅,口感雖不至嚡口,但少咗份香嫩,還好喺肉味甚濃;另一方面,伴菜同焗薯未見有咩特色,只喺作為平衡一道主菜嘅角色。反而驚喜位竟然喺啲香草牛油,啡黃色嘅香草牛油,聞落無乜嘢,但塗落啲肉眼扒度,嗒出草香油潤。
百里香燒銀鱈魚柳(Grilled Black Cod Fish with Fennel and Fresh Thyme)$188
唯一一款魚類嘅主菜,銀鱈魚柳伴以鮮百里香同茴香用燒烤方式處理,魚柳隱約帶點香氣,最正喺魚肉油香滿溢又滑溜,雖然件頭細,但好滋味。跟肉眼一樣,伴碟有多種蔬菜及原個焗薯,因為上面都食咗好多薯仔嘢,又焗薯皮,又薯條,所以啲焗薯有少少被我哋冷落,反而今餐無點沙律,食番多少少蔬菜均衡一下。
蟹肉天使麵(Drunk Angel)$88
餐牌中有7款意粉類:千層麵、長通粉、蝴蝶粉……,以一間酒吧餐廳嚟講都算喺多。我哋就專燈挑天使麵嚟試,因為依個屬於難煮得好嘅一款意大利麵。賣相平平無奇,但味道都幾突出,忌廉汁都幾多,絲絲天使麵都掛滿醬汁,味道帶點甜,有人估佢加咗一啲甜酒,細問之下原來個忌廉汁加入咗龍舌蘭酒(Tequila),再配上蟹肉,撒上安文達芝士粉(Emmental),比巴馬臣濃香。論到個麵嘅焦點—質感,其他人覺得OK,小弟就稍稍覺得過咗個分界位少少,麵質幼滑但有啲腍;我最怕喺食到「一PatPat」爛糊糊嘅天使麵,好似食餬仔咁,幸好眼前依碟都仲未喺咁,因為天使麵太幼,真喺好易煮過籠。既然個天使麵都煮得唔差,相信其他意大利麵都有一定水準,尤其是醬汁部份。
特式甜品拼盤(Special Dessert Platter)$78
本來大家夠晒皮,都無打算食甜品,但嚐過美酒佳餚,唔食少少甜品好似若有所失。小弟心水原本喺特級朱古力軟心蛋糕同個焗蘋果金寶,前者怕等得耐,後者有反對聲音,所以就揀個大包圍-特式甜品拼盤,樣樣有唔使煩,亦問過侍應,唔會太大份,就咁扑鎚試依個啦。以一隻大長碟盛載著8件甜品,共4款每款兩件,都喺的的骰骰,整個甜品拼盤賣相亦花咗啲心思,一邊碟尾打咗啲芒果醬,放咗藍啤梨、士多啤梨同龍珠果做裝飾,碟中又灑低點點開心果仁碎,睇起嚟感覺無咁單調。等小弟逐款甜品評吓先:
意大利芝士餅-底下用咗朱古力海綿蛋糕,但中間依然正統用上手指餅。手指餅有咖啡香,但似乎酒味欠奉,而馬加風芝士打得幼滑,配合面層嘅唂咕粉,味道OK。
德國芝士餅-芝士跟海綿蛋糕相間,無用消化餅底,感覺輕盈啲,但芝士味依照十足。
芒果慕絲蛋糕-芒果慕絲跟海綿蛋糕相間,再晌餅面做一層芒果果醬,慕絲都算柔滑,但芒果味唔算好強勁。
木糠布甸-我就覺得煉奶忌廉個質感幾好,但友人就嫌佢化得滯,太流質,仲有就喺大家都認為奶味太重,可以減番少少就更好。
甜品整體唔算好高質,佢始終主打唔喺甜品,但都算中規中矩唔失禮!
整晚服務幾貼身到位,值得一讚。如果無記錯,招呼過我哋侍應嘅名字喺Kenny同Yuki,佢哋不時都會過一過嚟睇吓我哋有咩需要,幫手收一收碗碟,食甜品時又換過晒所有碟同叉,同埋時刻保持笑容對客人嚟講都好重要。今晚客人唔太多,可能客多嘅時候先喺真正考驗。仲有就喺一入嚟所遇到個經理阿Rex,佢知我哋唔喺齋飲酒,喺食埋晚餐,就建議我哋由卡位轉去六人枱,地方寬敞啲,方便擺嘢食,因為美式食物碟頭始終都頗大件。
不經不覺講吓食吓,食吓又飲吓,餐飯食咗成三粒鐘,但大家都好享受,因為彼此啱傾,啲嘢啱食,主題所指嘅「美饌」,當然喺指美式食物,更喺指美味佳餚。好友住晌太子,佢屋企附近都有好多酒吧,不過佢就唔喺咁鍾意嗰類,太嘈太雜,Champs Bar佢話會喺跟班好酒老友嘅聚腳新點!我就見佢有個「Mix & Match半自助午餐」,自助頭盤、甜品,主菜6揀1,包茶啡,凍茶任飲,都喺賣$108,日日都都有供應,最好喺信用卡優惠照有,仲加個8送1優惠(儲印仔形式),雖未知質素如何,但都幾有興趣想試喎! |
|
|
美心MX Maxim's MX |
標題 : 我的星期六美孚早餐 ~ 更有營系列 |
地址 : 美孚美孚新村5期地下N10-N12號舖 |
地區 : 美孚 |
|
現時分數:
|
日期 : 2012-09-07 11:37:39
早前8月初寫咗一系列「我的星期六美孚早餐」,講過麥記、美心MX、大家樂、La Kaffa,都話美心喺我晌星期六食早餐心水之一,我哋又嚟幫襯佢啦。
更有營系列
老婆一向食嘢都比我健康,佢見到個早餐類別叫「更有營系列」,就鐵定食佢,依個系列都係啲麵餐,共有3款:菠菜蕃茄甘筍麵、菠菜雞肉蕃茄甘筍麵、菠菜豬肉蕃茄甘筍麵,由$19.5-$21,配餐飲。老婆要咗菠菜雞肉蕃茄甘筍麵($21),大大碟湯麵,麵條加咗甘筍嚟做,所以係橙色,配以蕃茄湯底,所以成碟嘢都係一片「橙」情。麵條甘筍味唔係好突出,勝在咬口煙韌,而湯底帶有淡淡茄湯酸香,幾醒胃。三粒雞肉餃子,不過不失,只恨太少。熱奶茶,跟方程式製作,始終保持到美心嘅水準。
港式早餐
小弟今回就食番個港式早餐,一共5款,以唔同嘅主食跟火腿煎蛋,配厚多士或蘿蔔糕,送餐飲,咁多嘢都喺賣$20-$20.5,又喺抵食之選。我揀咗羅宋湯通粉跟火腿煎蛋,要蘿蔔糕($20)。個羅宋湯通粉幾夠味,好港式,份量足,最緊要通粉無過腍;火腿煎蛋都OK,不過蘿蔔糕就麻麻哋,無乜蘿蔔味,應該喺美心水準以下。還好有杯香濃嘅MX特濃咖啡,對我嚟講,已經喺一份滿足喇!
晌美孚,除咗早餐,下午茶都喺另一個多幫襯嘅時段(午餐、晚餐反而少),都儲咗堆貨,遲啲整理吓又寫番輯「我的美孚下午茶」系列先!
|
|
|
星巴克咖啡 Starbucks coffee |
標題 : 為咗紅豆抹茶我包底 |
地址 : 荃灣楊屋道1號荃新天地上層UG06號舖 |
地區 : 荃灣 |
|
現時分數:
|
日期 : 2012-09-06 17:38:09
老婆大人都幾鍾意紅豆朕豆香味,偶爾見到星巴克出咗隻紅豆抹茶星冰樂,心大心細又想試吓,但查實佢唔鍾意飲凍嘢,成日覺得對身體無益、傷腸胃,相反凍嘢我就啱晒啦,尤其依家天氣咁鬼熱。所以,我就拉佢一齊試,一杯兩份飲,同佢講妳想試幾多咪飲幾多,剩番我包底。結果,依餐晏仔緣起就喺咁!
意大利香腸卷 $21
除咗杯星冰樂,點咗兩款包點當午餐。我揀咗意大利香腸卷,個香腸卷雖然翻烘,外層嘅「脆皮」還可以,麵包嘅鬆軟度一般,喺有少少芝士香;而條腸就無乜特別,問過個店員,都只喺話普通嘅熱狗腸。
煙肉蛋沙律芝士長法包 $38
法國百吉包烘得非常香脆,包內先塗上一朕蛋沙律,加埋薄薄又唔肥嘅煙肉,再放入車打芝士,組成依個鐵三角:蛋沙律嘅清爽,煙肉嘅鹹香,芝士嘅濃郁,真喺好正嘅配搭。更正嘅喺,輕烘令啲芝士半溶,比起凍冰冰、「乾爭爭」嘅芝士自不然更有口感,令我最意外喺餡面加咗一大舊意大利乾蕃茄,蕃茄味好濃郁,令整個包嘅味道層次更豐富。老婆揀依個法包,果然有眼光呀!
紅豆抹茶星冰樂 $42
今日嚟食晏嘅重點,因為一杯兩份飲,梗喺叫杯特大啦($36中、$39大、$42特大)。綠茶、牛奶加冰塊攪拌而成嘅抹茶星冰樂,果真涼透心,爽呀,綠茶味又夠突出;杯面鋪咗好多紅豆,老婆當然將飲管放晌杯面喺咁吮,佢話啲紅豆又大粒,又香甜,講真,啲紅豆又真喺幾得喎!
今個午餐雖然輕怡啲,但份量都OK,只喺個意大利香腸卷普通咗。
|
|
|
大家樂 Cafe De Coral |
標題 : 抽水菜名龍骨湯.縮水豬扒咖喱飯 |
地址 : 美孚美孚新村萬事達廣場1樓N95(B) |
地區 : 美孚 |
|
現時分數:
|
日期 : 2012-09-06 11:10:14
雖然家住美孚,但就好少晌番依區食夜晚飯,食早餐或下午茶就多啲,一來老婆鍾意晌屋企煮,所以有時間都已經返咗屋企煮;二來,如果有飯局,就番啲朋友,美孚唔會喺熱點囉。其中一個情況次次都會出街食嘅,就喺小弟去完大陸出差,返嚟香港依晚,放低行李就會扯埋老婆出去食。點解要出去食,無他嘅,上親去都喺啲苦差,晌啲細縣小鎮「飽嚐地道」,可惜去咗咁多年都仲喺唔多啱口味,返到嚟香港,快餐店啲嘢未必好好,但多份親切感。
今餐想食吓大家樂,因為仲有剩啲信用卡換返嚟嘅現金券,所以用埋唔好嘥啫。知道老婆鍾意飲中湯,所以就幫佢揀咗個老火湯小菜餐,我就鍾咖喱,所以要咗個豬扒飯。
老火湯小菜餐 $48
原煲老火湯,喺老黃瓜赤小豆扁豆煲龍骨湯,味道唔濃,可以講無乜味,唔見老黃瓜,只喺多咗紅蘿蔔、粟米。所謂龍骨,睇水牌嘅英文翻譯都見,其實喺豬骨,改埋啲咁嘅名,好抽水囉,個湯真喺麻麻哋。幸好,個小菜揀口水麻醬雞(半隻),值得一讚,我哋兩個都覺得隻雞做得甚有水準,雖然話喺半隻,但查實雞隻本身好細,所以份量唔喺話好大份,不過真喺勝在雞嫩肉滑,而且花椒引出少少麻,唔太辣,又帶有麻醬香,絕對喺遷就港人口味,不過就啱我囉。
講老實,其實我唔鍾意啲「口水嘢」,因為小弟出差點就喺重慶啲細縣,餐餐都要對住花椒,一餐半餐都無所胃,但早午晚餐餐都喺咁,就唔多頂得順,除非你本身好愛花椒啦,炒個青菜都帶有花椒味,死唔死丫。雖然花椒味道只麻不辣,但係喺地道得重手喎,所以嚟到見到啲水煮系列、口水系列,真喺有啲食到怕、食到驚。咁補充番句,重慶嘢唔喺樣樣都又麻又辣,又啲都好好食,喺衰在重油膩,有時未食到碟底已經油淋淋喇。
千層香咖喱豬扒飯 $32
我個豬扒飯又點呢?千層香當然又喺誇張啲啦,不過個咖喱味道頗香,屬東南亞風味嘅馬來咖喱,椰奶下得比較重手少少。但喺令人O晒咀嘅喺豬扒少得可憐,又細件喎,外觀感覺有少少寒酸。依家啲牛肉喺咁加價,真喺想知,如果依碟喺咖喱牛肉飯,唔知啲牛肉會唔會得嗰兩粒呢! |
|
|
詩特莉餅乾 Aunt Stella's |
標題 : 配對阿姨曲奇遊戲 |
地址 : 銅鑼灣勿地臣街1號時代廣場地庫1層Citysuper (銅鑼灣港鐵站A出口) |
地區 : 銅鑼灣 |
|
現時分數:
|
日期 : 2012-09-05 08:05:12
無啦啦,姨仔轉贈咗盒「詩特莉」阿姨曲奇俾我,佢話唔多好曲奇,知道我哋鍾意食,就當喺益我哋咁話,真喺老實不客氣,多謝晒先!
依個阿姨品牌晌香港唔算好出名,亦唔算無人識,不過,晌台灣就頗具名氣,各城市都有幾多分店,尤其台北市。店家出品嘅賣點喺全以人手製造、新鮮烘焙,並以天然原料、質優食材而成,每個製造過程都喺用心、誠意嘅付出,有別一般工廠機啤倒模式製作。
手上依盒曲奇喺禮盒裝,如果走去睇佢台灣個網站介紹,依盒嘢叫「天使心手工餅乾彌月禮盒」,粉嫩嘅色系同滿滿嘅愛心,裝著滿滿嘅曲奇,喺要表達嗲哋同媽咪迎接新生命嘅喜悅同祝福,盒面個紙牌仔寫到明“Welcome Baby”,喺賀人生咗BB嘅。不過嚟到香港,佢哋無標明,你叫佢乜都得架啦,盒面心形圖案,生日用又得,母親節又得,情人節就更得啦。
盒內一共有三條獨立包裝嘅曲奇,由於喺全人手做,所以厚薄不一,每條約有6-7塊,總之整盒曲奇就有20塊,賣$90,價錢都OK架。而內裡包含多款經典口味同,如:朱古力碎曲奇、濃味咖啡曲奇、芝麻曲奇、粟米片提子曲奇、朱古力燕麥曲奇……等等。而且,因為唔用防腐劑,晌常溫下保存期限大概一個月左右,要快啲食用,不過20塊曲奇,都好易幹掉啫!
盒內有20塊曲奇,估唔到喺竟然20塊都喺唔同口味,究竟有咩口味?等我逐一介紹吓啦,不過先旨聲明,唔好以為我咁勁食出每款味道,只喺禮盒附帶嘅紙牌除介紹「詩特莉」嘅故事、起源之外,仲會人手剔番裡面有咩曲奇款式,以及每款味道嘅成份、營養資料。
1. 朱古力碎曲奇Chocolate Chip Cookie:經典口味,主要加入朱古力碎粒嚟整。
2. 濃味咖啡曲奇 Espresso Coffee Cookie:以特濃咖啡為主,有少少合桃碎碎,帶苦澀咖啡香味。
3. 牛奶砂糖曲奇 Milk Sugar Cookie:用牛奶、忌廉混入烤烘,焗出具有牛奶香味嘅曲奇。
4. 芝麻曲奇Sesame Cookie:唔使多講,加咗黑芝麻,自然獨特香脆。
5. 粟米片提子曲奇Corn Flake Cookie:成份有粟米片、合桃、提子乾,口感比較有趣嘅曲奇。
6. 朱古力燕麥曲奇Chocolate Oatmeal Cookie:有朱古力粒,又有燕麥,會喺幾香嘅曲奇。
7. 冧酒燕麥提子曲奇Rum Raisin Oatmeal Cookie:又喺燕麥,又有提子乾添,加埋冧酒,幾獨特。
8. 藍莓曲奇Blueberry Cookie:將小藍莓乾加入曲奇內,誘發淡雅香氣。
9. 合桃曲奇 Walnut Crispy Cookie:好多合桃碎粒,脆口非常嘅款式。
10. 肉桂曲奇 Cinnamon Cookie:肉桂嘅芳香,杏仁片嘅香脆,美味嘅組合囉。
11. 蕃茄曲奇 Tomato Cookie:添加蕃茄、香芹,少有帶鹹味嘅蔬菜組合,新奇之作。
12. 牛油杏仁碎曲奇 Butter Almond Cookie:牛油同杏仁又喺經典組合之一。
13. 香橙曲奇Orange Cookie:較少見嘅生果曲奇,以橙皮搭橙汁所做,期望帶出橙香滋味。
14. 朱古力果仁曲奇Chocolate Nut Cookie:黑朱古力醬配上合桃碎,有啲驚喜。
15. 蘋果曲奇Apple Cookie:另一款生果曲奇,含大量蘋果果肉,曲奇做得薄脆,幾有創意喎。
16. 檸檬曲奇 Lemon Cookie:單以新鮮檸檬汁調製,口感清爽。
17. 牛油曲奇 Butter Scotch Cookie:品嚐番曲奇嘅原味,曲奇嘅味道就喺咁。
18. 小藍莓提子曲奇 Blueberry & Currant Cookie:以藍莓、黑加倫子做餡,有啲果醬風味。
19. 什錦水果曲奇 Fruit Cookie:其實只喺多款乾果做餡:無花果乾、合桃、紅莓乾、提子乾。
20. 焦糖大胡桃 Caramel & Pecan Cookie:用上原粒大合桃,加入焦糖漿,口感飽滿。
略略點評咗20款味道,有賴有份食嘅家人同朋友,整體嚟講,曲奇做得鬆脆,牛油味唔喺太重,勝在款式多,有啲特別味道幾有驚喜。其實面對住依20款味道,就算有張紙牌介紹嘅「貓紙」,仲要款款味道得嗰一塊,食起上嚟有時都喺估估吓,好似玩配對遊戲咁,再者,口味有時都幾個人化,我就肉桂、焦糖粉絲,但老婆就一定話唔好食架。所以,志在同大家分享吓依份「口禮」,味道都喺其次啦!
|
|
|
興發茶餐廳
|
標題 : 早來鳥下午茶 |
地址 : 太子大埔道70號太子中心地下 14-15號 |
地區 : 太子 |
|
現時分數:
|
日期 : 2012-09-04 15:39:00
唔係刻意走嚟食下午茶,都喺完咗第三堂崇拜,都成1:30pm,啲教會老友走晒無飯腳,記得表姪女依個時間仲晌太子上緊英文補習班,所以急電佢父母有無時間一齊食個晏,原來啱啱好,表哥表嫂正正就晌太子等佢放學,結果,由佢哋提議食興發,佢哋話久唔久放完補習班都會嚟依友食,因為1:45pm就有下午茶餐,又真喺比一般茶記早喎,仲供應到6:30pm添。
環境跟一般茶記無異,細圓枱、卡位、麵包櫃……下午茶餐牌一張A5紙印晒,以港式麵包加杯餐飲嘅「精選茶餐」,賣$14-$15;亦有粉麵、公仔麵、西多、三文治搭杯餐飲嘅「休閒下午茶」,賣$22-$28。表哥提示一句,下午茶份量會細一截,所以建議另外晌「特色粉麵飯」餐牌中揀番一款,份量會正常啲,價錢又當然會貴啲啦,要成$40-$55架。
生炒雞絲飯 $27
依碟屬下午茶餐嘢,好細碟,好迷你吓,一位男性應該都唔夠食喇。就咁單睇單一炒飯嘅相,唔覺咁細碟,拍埋個正常份量嘅粉麵飯,咁就比較到。雖然份量少、料又稍為少,但個飯炒得都唔錯,炒得頗香,而且飯粒幾爽,喺油少少啫。
乾炒豬頸肉河 $27
都係下午茶餐嘅選擇之一,份量跟上述都喺一樣。棄牛用豬,仲喺豬頸肉,多份爽口感,而河粉炒得色澤「勻巡」,仲要包杯嘢飲,廿零蚊貨仔算喺咁喇。
石窩菠蘿雞粒炒鴛鴦米飯 $40
「特色粉麵飯」系列,價錢高一截,所以份量好「正常」,比起個炒飯炒河,可以講喺多成倍。菠蘿雞粒炒飯唔喺咩特別,就算以石窩上都只喺噱頭,反而揀佢喺因為用咗白米紅米鴛鴦米嚟做,睇吓咗做法效果如何。小弟家中都有間中食開紅米,煮飯時會加少少紅米同白米一齊煮,盡可能都會預先浸一晚,今次食到嘅紅米比家中所煮嘅稍硬,仲要喺炒添,所以口感唔喺太好,影響咗整體效果,覺得有啲可惜。
奶茶,喺小弟去茶記嘅必然首選餐飲,興發沖嘅奶茶都幾好喎,既香且滑,飲到杯好嘅奶茶,對一餐飯嘅觀感都有住唔少影響架。
間餐廳仲有啲額外優惠,如果惠顧上述嘅「休閒下午茶」,可以以$1.5換購$3.5嘅麵包,可惜星期六、日唔得,否則就整多個菠蘿包或雞尾包送埋杯奶茶。此外,仲有個升級優惠,就喺一個月內堂食或外賣累積滿$400,就送紅豆冰一杯或瑞士卷一條;滿$600嘅話,就送海南雞飯一份或蛋撻一打。好在可以累積計數,而且有成個月時間,擺明希望你長期幫襯,如果住晌附近,食吓早餐、嘆吓下午茶、搵幾晚嚟開飯,真喺唔難喎!
|
|
|
Goossens Chocolatier |
標題 : 友禮巧克力 |
地址 : 跑馬地源遠街8號 |
地區 : 跑馬地 |
|
現時分數:
|
日期 : 2012-08-31 18:03:18
今期有食神喇,無啦啦抽獎中咗盒Goossens Chocolatier精選比利時朱古力禮盒(9粒裝),包裝幾得體,以一粒$22計,成盒嘢值成二百蚊架,一於拎番去跟同事分享吓!
本身對依間品牌唔喺好熟悉,上網睇番先知喺比利時安特衛普一個品牌,原來都有近成60年歷史,晌比利時都幾家喻戶曉,真係失覺晒!
從官方網站得知,店家所售賣嘅朱古力分為8大類,我見有食家都寫過,就無謂晌度重複再敘。禮盒中9粒朱古力,小弟試咗當中4粒,儘管講吓個人食後感。
TNT Blue (Ganache filling類)
右上角藍色花紋嗰粒就喺喇,因為花紋圖案幾特別,第一粒就揀咗佢。外層係甘苦嘅黑朱古力,包住柔滑帶點檸檬酸香嘅朱古力,味道幾得意。
Heart Dark (Cream filling類)
盒裡正中間嗰粒,心形已經帶有甜蜜之意,外層做得好圓滑。睇色澤就知,同樣用咗黑朱古力做外層,中間係朱古力啡咖味嘅忌廉,內裡仲有少少生果蓉,都幾特別。
Ginger (Ganache filling類)
就喺Heart Dark右邊,「金漆」印有店家名字。同TNT Blue好相似,因為都係同一類別,只係依粒主打用咗薑味,始終黑朱古力味幾重,所以薑味比較隱約,都算喺唔錯嘅。
Brabo (Ganache filling類)
最後試到嘅一粒,晌左下角有個「人仔」嗰粒。牛奶朱古力搭黑朱古力,感覺喺大路啲嘅款式,但質感保持住柔滑。
其實,仲有Caramel filling、Truffle filling、Liquor依三類頗有興趣,未知幾時再有機會再試,但至少對依個品牌嘅手做朱古力印象唔錯!
|
|
|
PizzaExpress |
標題 : 以人為本貼心飯聚 |
地址 : 九龍塘達之路80號又一城2樓43號舖 |
地區 : 九龍塘 |
|
現時分數:
|
日期 : 2012-08-31 11:05:36
以往飯局搵食多數約晌尖沙咀,其實都已經幾方便,不過,依期其中一位老友住得好北,所以改去又一城搵食,方便大家飯後歸家。事隔又成大半年,飯腳就喺一班團契裡面嘅老朋友,識咗十幾廿年,雖然依家團契聚會甩晒,但靠依啲開飯活動久唔久半年、一年聚一聚,維繫一下,大家關係仲保持到,算唔錯呀。
一早訂定位,因為我哋有成7個人,所以定枱時已指明麻煩安排圓枱,比起一字排開嘅長枱方便好多。
大家睇完餐牌,感覺有啲花多眼亂,既然見佢有啲2、4、6人套餐,就簡單啲向套餐埋手。套餐只有晌星期一至五晚市適用,公眾假期除外,亦問一問過侍應,菜式嘅份量跟散叫一樣,最終決定,就喺先點一個6人餐,因為我哋女多男少,睇睇夠唔夠食,免得浪費嘥嘢。6人餐$648,晌指定餐牌中選擇,包咗兩款頭盤(4選2),一款沙律(3選1),兩款薄餅(7選2),一款意粉(4選1),再加兩客甜品拼盤,飲品就包六杯。題外話,雖然叫咗套餐已經喺劃一價,下面各項菜式都標埋個散叫價等大家當個參考。
雖然安坐於圓枱當中,但擺好餐具,上埋飲品嘅話,恐怕枱面地方都唔多見使,為免啲嘢食堆到一枱都喺,所以要求先上頭盤、沙律,食完先後上薄餅、意粉,侍應姐姐一句無問題,完全安排到晒,貼心服務未至於此,稍後仲有得講。
焗麵包球 $49
4款頭盤當中,揀咗「焗麵包球」同「焗磨菇」。依個麵包球都算係Pizza Express嘅「名物」,雖未喺為佢慕名而來,但都差唔多枱枱都會點嚟試吓。麵包球一碟有9粒,實夠分,被人講到好正咁,食落只可以講喺唔錯,因為麵包心感覺都比較實;反而汁醬似喺賣點,伴有三款汁醬:蒜蓉牛油、乾蕃茄醬、香草汁,三者以香草汁較突出,青青綠嘅香草汁,香草味好重,又油潤,點麵包球好食;而蒜蓉牛油嘅蒜蓉味只係輕輕點出,至於乾蕃茄醬,跟期望之中較大落差,唔喺太有蕃茄香。
焗磨菇 $70
第二個頭盤,正常情況下喺有6粒磨菇加6粒焗麵包球,因為有7個人,所以跟個女侍應講,希望用麵包球換焗多一粒磨菇,佢話無問題嘅,點知?喜出望外,直情俾多粒焗磨菇,而焗麵包球則一粒都無少,咁嘅服務態度幾窩心呢!有機磨菇醸入馬蘇里拉芝士、香草汁、忌廉汁,焗後帶少許焦香,磨菇非常多汁,菇菌香味又夠,配合芝士、醬汁,真喺好味。而依碟嘅焗麵包球,只附上乾蕃茄醬、香草汁,少咗蒜蓉牛油,正如上欄所講,個牛油嘅蒜味唔突出,如果因只叫焗磨菇而試唔到個蒜蓉牛油,唔喺咩損失囉。
意大利火腿沙律 $109
材料包括意大利火腿、磨菇、醃洋蔥、青菜沙律、車厘茄、青豆角、橄欖、巴馬臣芝士,配上洋醋汁,依個喺晌餐牌標示嘅成份,都幾細心,等食客對菜式用料一目了然。睇番碟沙律,材料確實幾足,味道幾清新,加咗巴馬火腿,添上幾分鹹香;醬汁喺橄欖油搭意大利陳醋,感覺酸香醇和,醬汁喺以小兜另上,如要拌入沙律中,反而要事先向侍應提出,依個做法又幾有心思。而每份沙律均配上烤麵包條,一客都有成4大條,點意大利陳醋又得,點番之前食焗麵包球嘅醬都得。
辣牛肉薄餅 $125
店家嘅薄餅分羅馬薄餅或那波里薄餅,辣牛肉薄餅屬前者,餅底更大、更薄、更香脆。其實,都幾大個,直徑大概都有13、14吋左右,材料比較簡單,只有辣牛肉碎、青椒、洋蔥,雖然唔係鋪到滿,但分佈算平均,啖啖都食到3款材料,而且,餡料下嘅蕃茄醬同芝士落得一啲都無手緊,再配合埋脆薄餅底,使味道更突出,雖然叫辣牛肉,但唔喺點辣。
松露菌薄餅 $132
薄餅有7款可揀之時,依個已經喺首選,屬那波里薄餅,無咁大個,直徑10吋左右,傳統脆薄餅底,口感同食羅馬薄餅又唔喺好大分別。材料包括野菌、松露菌油、迷迭香、蒜蓉,全部都喺濃味嘅材料,加埋蕃茄醬、巴馬臣芝士,可想而知味道幾搶幾濃郁。
意式野菌螺絲粉 $107
螺絲粉煮得啱啱好,有咬口,雖然佢話個螺絲粉加入咗牛肝菌、蘑菇汁、松露菌油嚟煮,不過牛肝菌唔多。原以為蘑菇汁加松露菌油,幻想個效果會幾出,不過,食落唔算好濃,如果講以菌入饌,上次晌美孚Mia碟「忌廉野菌雞柳配扁意粉」就上乘好多。
馬沙拉雞肉長通粉 $103
以上套餐嘅菜式就食晒,真喺唔多夠,所以散叫多一款長通粉。聽見馬沙拉三個字,腦海已定型咗喺嫣嫣紅紅、富印度香料嘅模樣,點知錯晒,色澤跟一般忌廉汁打底嘅意大利麵無異。長通粉,配合上雞肉、大蘑菇、馬沙拉醬汁、百里香醬汁、巴馬臣芝士而製成,據餐牌介紹,大蘑菇及白蘑菇均來自上水嘅有機農場,支持本地農作之餘,亦減低碳排放,當喺對環保出多一分力。大蘑菇切到碎碎,而雞肉亦未見好多,但醬汁頗香,刨埋巴馬臣芝士晌面,相得益彰呀。
甜品拼盤
每一客可從4款迷你甜品之中(芝士蛋糕、焗麵包球配朱古力榛子醬、意式芝士餅、朱古力蛋糕)揀3客,既然我哋有兩客,自然可以試晒4款,只係傷腦筋揀邊款重複啫。之前睇食評普遍對意式芝士餅同朱古力蛋糕較推薦,所以就多要依兩款。但估唔到,竟然喺芝士蛋糕覺得佢做得有水準,薄薄消化餅底配濃郁芝士餡心;其次意式芝士餅確喺有料到,馬卡風芝士打得幼滑,手指餅有酒香;焗麵包球配朱古力榛子醬,OK啦;講到個朱古力蛋糕,質地較濕,但朱古力濃郁就貨真價實。
餐飲可供選擇唔太多,都喺凍檸茶、汽水、咖啡、茶。我就當然揀飲凍檸茶啦($35),因為只有凍檸茶可添飲,不停添加凍茶,仲可以要求額外俾啲檸檬。汽水($33)原支355ml樽裝上,都算少有啦,唔係汽水機斟出嚟,不過就無得添飲嘅,而茶啡($32-38)我哋當中無人試,無意見。
依餐唔單只因為一班老友聚舊食得開心,亦因為有咁好招呼,而食物又有水準,所以感覺更舒暢。下餐幾時?可能又多等半年咯!
|
|
|
Teddy's Cafe |
標題 : 隱蔽優閒露天茶座 |
地址 : 九龍塘海棠路66號女青年會雅舍地下 |
地區 : 九龍塘 |
|
現時分數:
|
日期 : 2012-08-30 17:06:55
本來約了一班團契細胞小組成員食飯,有幾個人甩底,最後得番我哋三個人食依餐晏仔,雖然我唔係搞手,不過,人腳變得咁凋零,感覺都係差啲啲。雖然係咁,飯局照去!
因為我本身返開嘅教會晌又一村,以前又係晌大坑東返學,所以嚟Teddy's Café真係無咩難度,不過區外客就可能有少少難搵,有地圖都要搵一陣,因為佢瑟縮埋死角一邊。
餐廳分室內室外,夏冬兩季客人多數瞇埋入內室部份,夏天涼冷氣,冬天唔使捱寒風;要是天氣清爽嘅,當然室外露天位搶手啦,睇門口餐牌架之下嘅小陶瓷狗仔,就知餐廳歡迎携犬內進,所以經常見好多狗主聚晌露天位之下。老實講,室內室外環境都唔錯,始終依頭都係低密度純住宅區,感覺會係幽靜啲,好似今日我哋未夠12:00pm就到,一個客都未有呀!
午市主要供應套餐,午餐一共5款,有飯、有意大利粉、有沙律……,包餐湯餐包、前菜、甜品同飲品,都係賣$54-$62,價錢定位都合理。
粟米磨菇忌廉湯
味道還可以,粟米同磨菇味都有啲,未夠濃郁,係質感方面太稀唔夠滑,而且微暖唔夠熱,所以,要扣扣分。跟湯嘅法包,雖然無再烘過嘅,但皮脆內軟,新鮮無話擺太耐嘅問題。
雜果沙律
午餐話包前菜,其實都只係一小杯雜果沙律配一撮沙律菜,雖然普通咗啲,但味道OK夠穩陣。
忌廉汁吞拿魚意大利粉
兩個朋友不約而同揀依個意大利粉,K小姐係細食人,唔介紹被我試少少。意大利粉有韌勁,吞拿魚係普通罐頭貨,碎濕濕;反而有好多秀珍菇同大菇,絕對令啲吞拿魚比下去,而且,個忌廉汁做得幾好,幾香又好掛麵。
香脆雞扒配茄茸汁
啲主菜估唔到上得超快,嚟完餐包、餐湯、沙律,影咗幾張相都未開始食,就上咗個主菜,咁搞難免攤凍晒,亦可見啲嘢好似整定晒咁。我依個雞扒可以跟飯、意粉、薯菜,小弟揀咗飯,所謂「香脆雞扒」,其實就係吉列,以麵包糠脆炸,確實件雞扒炸得香脆,仲有成3件咁多添,蘸茄茸汁,非常鮮甜,但竟然係凍嘅,如果慶熱住我覺得效果更好,而啲飯亦都係微暖,配菜嘅甘筍仔同翠玉瓜係凍嘅添,真係有啲怪怪哋,因為我哋都算係頭嗰批客,照理好多食材應該啱啱整好無耐架?
甜品
原來係泡夫,每人有兩粒,唧埋朱古力漿,所以外觀幾好;之不過食落唔得,因為有啲雪過籠,裡面忌廉餡硬到好似食雪糕,但有啲又OK喎,真係好鬼飄忽啫。
餐飲點咗杯咖啡,口感麻麻,因為有啲澀,而且未夠香,奶係凍嘅,出面好多餐廳俾奶或忌廉都係就咁從雪櫃倒出嚟,只可以講係未夠窩心唔專業嘅做法啫。
整餐飯,以食物水準而言,仲有好多執漏嘅地方,大有進步空間,環境比較係間餐廳嘅一個賣點。至於服務方面,雖然招呼普普通通,服務水平唔係好專業,但侍應有禮勤快,斟茶遞水送食物,難得店子又唔收加一,加上我哋係附近教會會友,揸住個洗禮証以資識別,仲有9折添。
|
|
|
星巴克咖啡 Starbucks Coffee |
標題 : 齋食唔飲嘢 |
地址 : 尖沙咀廣東道17號海港城港威商場地下G111號舖 |
地區 : 尖沙咀 |
|
現時分數:
|
日期 : 2012-08-30 15:40:40
老婆知我一向都鍾意食甜品,佢話一時興之所至,晌星巴克外賣兩件餅返嚟,同我一齊嘆個下午茶,查實知我近排做嘢幾辛苦,當係慰勞下我啫,咁我又真係受得起呀,對住個火星老細,成日話我哋地球依樣唔好嗰樣唔啱,咁就快啲返火星啦,晌地球咁危險!呻完,講番嗰兩件餅先:
Red Velvet Cake 雲喱拿朱古力絲絨蛋糕 $29
據說係一款經典美式甜品,不過,有時去美式餐廳都唔覺有依款嘢喎;又據說係一款傳統聖誕節應節蛋糕嚟,但係,聖誕又唔係太覺依款蛋糕嘅出現。點都好,睇外表總算係款色澤搶眼嘅凍餅,一身艷紅身軀,係上下兩層紅莓蛋糕,中間一朕忌廉夾心,而餅面則係白朱古力漿。咪見佢紅得咁交關,但紅莓味又無想像中咁重,而質感跟一般海綿蛋糕稍為實淨,白朱古力又比較甜,所以整個組合小弟就覺得麻麻哋喇!
Salted Caramel Cheesecake 海鹽焦糖芝士餅 $30
依款睇樣成舊磚頭仔,笨笨實實咁款,餅身嘅芝士又濃又重,本身嘅密度亦相當高,加上當中又注入咗啲焦糖醬,味道絕對係又甜又漏,除非你本身好嗜甜,否則,唔係人人都受得起。由於一般嘅芝士餅味道都係鹹鹹甜甜,所以,海鹽嘅味道晌度唔會好突出,即係唔會話突然間食到一朕鹹味。兩者嚟講,鍾意依款芝士餅多過上面個絲絨蛋糕啲!
雖然只係晌屋企,無靚環境,無靚梳化,只有三合一即沖白咖啡,但同樣享受著兩件蛋糕嘅味道,因為世事唔係樣樣嘢都係必然,知足常樂丫嘛!
|
|
|
越膳 Viet Lime |
標題 : 縮水酸辣湯檬 |
地址 : 尖沙咀廣東道17號海港城港威商場3樓cookedDeli by citysuper 3001號舖 |
地區 : 尖沙咀 |
|
現時分數:
|
日期 : 2012-08-29 18:57:52
前文提要,喜獲親友送贈嘅City Super現金券,就嚟咗佢個美食廣場呃餐免費飯食,老婆揀咗「梨花園」,食評已見另文「油浸石頭鍋飯」,而另一間係由小弟揀嘅「越膳」,都唔係好得過梨花園幾多,質素好少少咁啦。
越式酸辣湯檬$50,附送飲品,飲品要雀巢檸茶,唔係罐裝,只係斟出嘅杯裝,感覺總係淡過罐裝咁。至於個湯檬,湯底有啲似冬蔭功,不過幾辣吓,但就幾香,越南嘢都係重香料味;雖然餸料跟個「樣板」有齊咁多款式,有青口、墨魚仔、蝦仁、磨菇、蕃茄……,不過料少,件頭又細啲,樣樣縮晒水,同個樣板有一大段距離;再者,檬粉亦都好縮皮,份量頗為少,還好嘅係整體味道都OK,都係同一個結論啦,要我俾$50,我會有其他選擇囉!
|
|
|
梨花園韓國料理 Lee Fa Yuen Express |
標題 : 油浸石頭鍋飯 |
地址 : 尖沙咀廣東道17號海港城港威商場3樓cookedDeli by citysuper 3001號舖 |
地區 : 尖沙咀 |
|
現時分數:
|
日期 : 2012-08-29 16:37:50
依餐都可以話係親戚請嘅,事緣親友送贈咗兩張$50City Super嘅現金券,一向都好少去嗰度買嘢,嫌佢貴囉,反正平時要買開嘅嘢去一般超市都有,所以,搵晚唔得閒煮飯,就用咗嚟去佢個美食廣場免費食番餐。
海港城City Super個美食廣場,都有成十多間食店,中西日印韓泰越……都有,不過以日本嘢佔多數,但係我哋都無揀,小弟揀咗間賣越南嘢嘅「越膳」,食評另文再見,而老婆就揀咗賣韓國嘢嘅「梨花園」。
多款套餐樣板晌晒鋪前玻璃櫃,慢慢睇過晒先揀,卒之揀咗個石頭雞肉飯套餐$50,一份雞肉石頭鍋飯,配一份沙律或泡菜,跟例湯或飲品。
石頭雞肉飯
雞肉超多,睇相就知,堆滿成個石頭鍋面,味道不過不失,而且飯亦好多,真係好似趕收工大贈送,但點知油更多,飯內很多油,食完一底都係油,都唔敢刮底食飯焦,嘥料。
無要沙律,更係揀泡菜,老婆至愛,泡菜嘅味道都只可以話係OK,夠辛辣,但未夠爽脆,仲係得好細兜;而要咗例湯,昆布湯,亦都係OK嘅水平,唔濃亦唔淡,叫做有碗湯到肚。
雖然係City Super,美食廣場即係美食廣場,食物水準都係一般啲,若非唔使錢,應該都唔會嚟幫襯,$50可以食到好少少嘅嘢囉!
|
|
|
Cafe Roma
|
標題 : 午餐在羅馬 |
地址 : 馬灣珀麗灣沙灘商場1樓 |
地區 : 馬灣 |
|
現時分數:
|
日期 : 2012-08-28 17:58:06
因工關係,去咗香港基督少年軍個馬灣臻訓中心做訓練,主要都係啲攀攀爬爬嘅嘢,體力需要少少要求啦,靠食老本,都叫應付到,完咗個訓練之後,拉隊去珀麗灣沙灘商場嘅Cafe Roma食晏,雖然係食公司嘅,但同事都算幾節制,無亂咁嚟!
點咗多款美食,稍後逐一介紹下。因為用餐時間係星期六嘅正中午,暫時無乜客人,所以差唔多全店服務員只係應付我哋依枱客,自不然斟茶遞水快快手,佢哋都幾有禮貌,上好晒菜又唔企正你後面睇住你哋食嘢。室內環境裝修簡約,感覺俾人係輕鬆悠閒。至於室外呢?環境就一流架啦,對住沙灘對住海,送埋青馬大橋靚景,枱凳架置晌木條地板上,幾有渡假感呀!
落單後先上沙律醒醒胃,都幾快上到,不過,之後上其他主菜、麵食就要稍為等耐少少,但就一次過上晒,都算幾好安排。
烤雞胸凱撒沙律Caesar Salad with Grilled Chicken Breast $88
斜形大湯碗盛住沙律,其實個人嚟講唔係太鍾意依啲「懶有型」嘅湯碗,因為好易跌啲嘢食出嚟。基本味道調得幾好,稍嫌醬汁少咗啲,沙律內有唔少雞肉,不過質感都係嚡烚烚。
脆香雞鎚配甜椒醬 Marinated Crispy Chicken Drumsticks with sweet chili sauce $72
一客5件,本身都已經有少少辣,點埋甜椒醬,都幾辣吓。雞鎚外層炸得卜卜脆,夠甘香,而且大啖大啖肉,非常惹味,對我嚟講,只係辣啲啫。
招牌千層麵 Café Roma Lasagna $118
份量比預期少,可能隻碟大啩,搞到我哋每人都係分得一炷仔。個千層麵共做咗4層,與茄蕃肉醬相間,面頭灑上芝士,以菠菜葉圍邊。汁醬就非常好味,茄蕃味鮮活,可惜千層皮有啲未焗透嘅感覺,食落去口感有啲啲韌,份量有點少始終未夠喉。
香烤10安士肉眼扒配蕃茄、炸薯條及火箭菜 Grilled 10oz/280g Rig-eye Steak with Garlic Butter with grilled tomatoes, potato fries and rocket $198
講真,件肉眼扒真係燒得好靚仔,好有炭火香,伴有粗薯條同火箭菜。先講件扒,我哋要5乘,出嚟效果係肉質非常之軟腍,但脂肪唔太多,好重肉味;而炸薯條,老套啲講句,薯有薯味,好香脆,夾住啲火箭菜同食,無咁罪惡感。不過,伴牛扒食用嘅調味料,就無其他被邀試食嘅食家講到咁有驚喜,又香檳芥末、又龍篙法式芥末、又五殼天堂……多款選擇,服務員晌呢方面都無特別問我哋,跟扒上就係個香蒜牛油醬,味道呀?OK啦,香蒜味算唔上好突出。
無肉不歡薄餅 Meat Lovers Pizza $128
個薄餅用料包括:煙火腿、辣肉腸、肉醬、甜椒、車厘茄、燒烤醬、馬蘇里拉芝士,不過好鬼少餡,睇相你就知,樣樣都係得嗰少少,感覺有點寒酸囉,仲話無肉不歡,失去晒個名嘅粗豪感。唯一要讚,係個餅乾批底,猶如紙咁薄,但就極之脆口,好似食薯片咁。
三重奏朱古力蛋糕 3 Layer Chocolate Cake $48
反而叫甜品我哋有啲狂,足足叫咗成3款。無放晌餐牌嘅今日推介,就係依個三重奏朱古力蛋糕,絕對係狂熱朱古力迷嘅必然之選,合桃班尼士打底,中層軟朱古力ganache,面層就係朱古力漿,朱古力嘅濃與甜,啖啖都食得入心入肺。不過,伴碟嘅士多啤梨、乾果、士多啤梨醬,係令個賣相好睇啲,感覺唔係齋黑色咁寡,但味道配合上就無謂啲。
香濃朱古力香蕉麵包布丁配Movenpick榛子雪糕Warm Chocolate Banana Bread Pudding with Movenpick Hazelnut ice-cream $68
有點其貌不揚,「黑古勒特」,又「岩岩巉巉」,不過,叫麵包布丁就有啲名不符實,因為點睇點食,都係個類似心太軟嘅焗朱古力蛋糕,但就唔會有流心效果,內裡加咗少少香蕉肉。味道,都係以濃郁為核心,濃郁嘅朱古力味,微暖嘅蛋糕,配上榛子雪糕,雪糕奶味都幾重,但就頗軟滑,榛子味很出。
香蕉船 Banana Split $58
其實佢哋賣意大利菜,依個甜品大可改為「香蕉貢多拉」啦!香蕉有點兒生,所以未夠香。雪糕都係用上Movenpick品牌,雖然餐牌寫上指定味道,不過,我估佢哋都預備定三幾款味道,我哋依個就開心果變咗杏仁味,另一球就係士多啤梨味,好彩依兩隻味我哋都食,既然佢都唔係跟餐牌咯,我覺得啲服務員都應該問聲我哋使唔使揀想要咩口味。除香蕉、兩球雪糕,仲有忌廉、烘杏仁片同好寒酸嘅朱古力漿。
食完Café Roma,感覺都唔太差,只係馬灣依啲咁僻嘅地方,若非入嚟訓練,相信都唔會專燈入嚟搵食。 |
|
|
紅蔥頭 Cafe MED |
標題 : 無椰香嘅椰香咖喱飯 |
地址 : 太子彌敦道750號始創中心3樓315-317號舖
|
地區 : 太子 |
|
現時分數:
|
日期 : 2012-08-28 11:29:59
完咗自已教會主日崇拜,多數落太子花園街一帶搵食,但今次啲團友仔話行遠少少,去始創中心嘅紅蔥頭,有人之前試過話唔錯,咁我依啲無所謂謂嘅人都係跟大隊。
紅蔥頭晌始創中心3樓角落位,人流比較少啲,雖然都已經12:30pm,但餐廳入座率都係一半一半,格局就係好一般西餐廳,唔係太覺有咩賣點,招呼亦都麻麻哋,點菜時佢哋只係識:啊!嗯!……,侍應們都木無表情,好似做到無晒士氣咁。雖然服務唔好,但都要加一架喇!
翻翻餐牌睇睇有咩好食啦,廚師推介午餐,有4款選擇,包餐湯、牛油蒜蓉多士同餐飲,由$37-$41;另外有由No.1- 18款嘅特餐,選擇較多,由最平嘅$31到最貴嘅$44,飯麵意粉、鐵板樣樣有啲,只送餐飲,想升級可加$6多一客餐湯同牛油蒜蓉多士;此外,仲有一個經濟套餐餐牌,其實只係個特餐餐牌嘅延續,No.19-34,價錢相約$32-$40,亦係只附送餐飲,升級加$6,完全睇唔出「經濟」何來。
黑椒汁雞扒伴薯菜 $37
朋友A嘅選擇,屬於「廚師推介午餐」嘅一款,是日餐湯只係普普通通嘅忌廉湯,而牛油蒜蓉多士亦只係一片蒜蓉法包。反而份主菜就幾有睇頭,大大件雞扒,伴幼身炸薯條、四季豆、甘筍、白蘿蔔。朋友嘅意見:黑椒汁做得幾辛辣有勁,好有黑椒香,雞扒亦都煎得甘香,係配菜嘅組合就「騎尼」啲,好似尋日有剩咩菜就用咩菜嘅感覺,蘑菇忌廉湯味道亦係一般,唔太好亦唔太差。
芝士焗咖喱雞扒飯 $38
朋友S揀咗個又係雞扒嘢,不過就芝士加咖喱焗,屬於「經濟套餐」內嘅「秘製焗咖喱飯系列」,配奶茶。依個焗飯相對真係等得耐,幾件裁細咗嘅雞扒,咖喱汁睇落唔係好多,加上半溶芝士,賣相都OK嘅。味道又如何?朋友嘅意見:味道夠晒濃香,因為又芝士又咖喱,雞扒肉質軟腍,不過杯奶茶就唔係好得,無乜茶味,更加唔滑添。
咖喱燒牛粒 $38
另一個「經濟套餐」選擇,不過就係「椰香咖喱飯系列」嘅一款,小弟揀佢都係「椰香」「咖喱」依幾個字,配上燒牛粒,應該唔錯。可惜,我嘅決定雖未至超錯,但亦只係一個幻想。啲咖喱好唔得,一啲椰香都無,只係死辣,又過鹹,好彩試咗少少味先,無一起手撈勻碟飯,否則就中晒伏,唔通漏咗臨尾加椰奶?幸而啲米飯軟熟,燒牛粒軟腍,食得出佢先煎封過,蹤使加埋薯仔、翠玉瓜、雜菜粒,份量都係偏少,燒牛肉真係得嗰幾粒。至於杯即磨咖啡,卻係香濃醇滑兼備,如果今餐個咖喱做好啲,咁感覺好好多!
綜觀幾個餐嘅食物同嘢飲,有好有唔好,俾個OK佢算係中肯嘅決定。 |
|
|
麻酸樂米線專門店 Marsino Expert Noodle |
標題 : 香辛腐柳 |
地址 : 荃灣荃灣楊屋道18號荃新天地二期UG60號舖 |
地區 : 荃灣 |
|
現時分數:
|
日期 : 2012-08-28 10:51:50
個主題改得有啲夾硬嚟,不過都係代表今餐嘅4樣嘢食,相信睇完篇食評你都估到係乜。之前因為團購嚟幫襯過麻酸樂一次,試咗素菜雞湯米線、喇沙米粉、鹽酥一口雞、蒙古大漢雞翼,都覺得唔錯有水準,價錢又幾實惠,所以又趁完咗返主日,就再拉多個弟兄過嚟,等我哋可以試多少少嘢,得我倆公婆真係食唔得幾多。
既為米線專門店,米線款式當然選擇多多,12款米線餐,賣$36-$42,5款湯底任揀,唔食米線改米粉、上海拉麵、紅薯粉又得,仲跟一杯熱飲。
韓風泡菜餅雞柳粒粒米線 $38
米線由老婆發板,我都估佢要個韓風嘢架喇!韓風泡菜餅雞柳粒粒米線,配金銀蛋芫茜湯底,韓風泡菜餅跟米線係分開上。泡菜餅係啲煎栗米餅,加咗啲辛辣泡菜醬,入口醒神啦,伴住一小碗韓式冷盤菜粒,辣得過癮。至於一大湯碗嘅雞柳粒粒米線,雞柳唔係好多,至少無佢餐牌影出嚟嗰張相咁多啦;好在個金銀蛋芫茜湯底確係幾正,除鹹蛋皮蛋,仲有芫茜、芽菜、腐竹、生菜,材料幾豐富架。
蔥油蒜香骨拉麵 + 紫菜豆腐肉碎鴛鴦丸熱鍋 $42
話原價要$64,依家推廣價賣$42,拉麵係用上上海拉麵,而鴛鴦丸寫明有一粒手打肉丸同一粒雞軟骨丸,一粒進貢俾老婆,另一粒俾個朋友,所以無試啲鴛鴦丸,唔知咩味,不過個熱鍋仲有紫菜、豆腐粒、肉碎、菠菜,純粹當例湯飲都幾好。個麵同蒜香骨嘅份量亦唔少,麵條柔韌,帶有蔥油香,又加咗啲銀芽,食落多份爽口感;蒜香骨都係啲肉排,肉多過骨,滋味啖啖肉呀,而且蒜香味濃,整個拉麵都幾好食。
咖喱吉列龍脷柳飯 $39
試過米線、米粉,又試埋個拉麵,所以又點個飯睇吓邊景?塊吉列龍脷柳都幾巨型,大過我隻手掌,薄薄嘅麵包糠,炸得幾香脆喎,魚柳咬落又幾軟熟;咖喱汁亦都煮得唔錯,幾香吓,內裡嘅薯仔係先泡油再煮,食落唔會又腍又散,幾啱我口味!
餐飲我哋叫咗奶茶、菊花杞子蜜,都唔係咩特別嘢,所以今次就唔費唇舌多寫。整體今餐大家都好滿意,份量還覺得佢偏多添,食得我哋飽飽;而且個韓風泡菜餅同蔥油蒜香骨,著實唔錯有特色,值得今次我哋翻兜再幫襯! |
|
|
美心food2
|
標題 : 睇戲前打底午飯 |
地址 : 九龍灣偉業街33號德福廣場P17號舖 |
地區 : 九龍灣 |
|
現時分數:
|
日期 : 2012-08-27 18:07:56
第一次幫襯美心food²,我仲以為跟美心MX一樣,原來有啲唔同,環境裝修得雅致少少,燈光營造得柔和啲,有啲假花假樹,又擺咗啲座地燈,掛吊扇,扮吓歐陸氣氛。不過食物方面,擺脫唔到快餐店式嘅食物,跟美心MX差唔多。
因為過嚟MCL睇戲,所以先晌度出現,時值啱啱好下午茶時段,都幾多人。同老婆叫咗兩份下午茶餐,都係廿零蚊一份,包埋嘢飲,但服務方面就比美心MX好啲喇,取食物嘅櫃枱分開幾類,其中我所叫嘅炒意粉係即叫即做,需要等一陣,如果美心MX就等叫號碼出嚟自己拎,但依度就相反,俾個號碼牌你,整好之後就有人親手送嚟,抵讚。
燒鴨瀨粉 $23
老婆較為鍾意食粉麵,所以要個燒鴨瀨粉,配熱奶茶。瀨粉都幾大碗,湯底就唔好有太多期望,清清哋都幾好啦;美心燒味一向都唔差,份燒鴨亦都幾OK喎,油潤帶少少羶香,鴨肉又唔嚡,$23一個餐,收貨喇!
XO醬叉燒炒意粉 $28
我就要咗依個炒意粉跟杯即磨咖啡,雖然係下午茶餐,都唔會太細份量,賣$28抵食啦。個炒意粉新鮮即炒,所以送到嚟熱辣辣,幾香噴噴,不過面頭加咗啲紫菜絲同芝麻,懶靚仔,感覺有啲無謂,又唔係和風炒意粉。好彩,個意粉以XO醬炒,少少辣,夠晒惹味,叉燒又唔肥,整體算唔錯。杯即磨咖啡又濃郁芳香,令小弟醒醒神,等陣睇戲都唔會「恰眼瞓」呀!
|
|
|
Cafe Roma
|
標題 : 午餐在羅馬 |
地址 : 馬灣珀麗灣沙灘商場1樓 |
地區 : 馬灣 |
|
現時分數:
|
日期 : 2012-08-24 12:02:12
因工關係,去咗香港基督少年軍個馬灣臻訓中心做訓練,主要都係啲攀攀爬爬嘅嘢,體力需要少少要求啦,靠食老本,都叫應付到,完咗個訓練之後,拉隊去珀麗灣沙灘商場嘅Cafe Roma食晏,雖然係食公司嘅,但同事都算幾節制,無亂咁嚟!
點咗多款美食,稍後逐一介紹下。因為用餐時間係星期六嘅正中午,暫時無乜客人,所以差唔多全店服務員只係應付我哋依枱客,自不然斟茶遞水快快手,佢哋都幾有禮貌,上好晒菜又唔企正你後面睇住你哋食嘢。室內環境裝修簡約,感覺俾人係輕鬆悠閒。至於室外呢?環境就一流架啦,對住沙灘對住海,送埋青馬大橋靚景,枱凳架置晌木條地板上,幾有渡假感呀!
落單後先上沙律醒醒胃,都幾快上到,不過,之後上其他主菜、麵食就要稍為等耐少少,但就一次過上晒,都算幾好安排。
烤雞胸凱撒沙律 Caesar Salad with Grilled Chicken Breast $88
斜形大湯碗盛住沙律,其實個人嚟講唔係太鍾意依啲「懶有型」嘅湯碗,因為好易跌啲嘢食出嚟。基本味道調得幾好,稍嫌醬汁少咗啲,沙律內有唔少雞肉,不過質感都係嚡烚烚。
脆香雞鎚配甜椒醬 Marinated Crispy Chicken Drumsticks with sweet chili sauce $72
一客5件,本身都已經有少少辣,點埋甜椒醬,都幾辣吓。雞鎚外層炸得卜卜脆,夠甘香,而且大啖大啖肉,非常惹味,對我嚟講,只係辣啲啫。
招牌千層麵 Café Roma Lasagna $118
份量比預期少,可能隻碟大啩,搞到我哋每人都係分得一炷仔。個千層麵共做咗4層,與茄蕃肉醬相間,面頭灑上芝士,以菠菜葉圍邊。汁醬就非常好味,茄蕃味鮮活,可惜千層皮有啲未焗透嘅感覺,食落去口感有啲啲韌,份量有點少始終未夠喉。
香烤10安士肉眼扒配蕃茄、炸薯條及火箭菜 Grilled 10oz/280g Rig-eye Steak with Garlic Butter with grilled tomatoes, potato fries and rocket $198
講真,件肉眼扒真係燒得好靚仔,好有炭火香,伴有粗薯條同火箭菜。先講件扒,我哋要5乘,出嚟效果係肉質非常之軟腍,但脂肪唔太多,好重肉味;而炸薯條,老套啲講句,薯有薯味,好香脆,夾住啲火箭菜同食,無咁罪惡感。不過,伴牛扒食用嘅調味料,就無其他被邀試食嘅食家講到咁有驚喜,又香檳芥末、又龍篙法式芥末、又五殼天堂……多款選擇,服務員晌呢方面都無特別問我哋,跟扒上就係個香蒜牛油醬,味道呀?OK啦,香蒜味算唔上好突出。
無肉不歡薄餅 Meat Lovers Pizza $128
個薄餅用料包括:煙火腿、辣肉腸、肉醬、甜椒、車厘茄、燒烤醬、馬蘇里拉芝士,不過好鬼少餡,睇相你就知,樣樣都係得嗰少少,感覺有點寒酸囉,仲話無肉不歡,失去晒個名嘅粗豪感。唯一要讚,係個餅乾批底,猶如紙咁薄,但就極之脆口,好似食薯片咁。
三重奏朱古力蛋糕 3 Layer Chocolate Cake $48
反而叫甜品我哋有啲狂,足足叫咗成3款。無放晌餐牌嘅今日推介,就係依個三重奏朱古力蛋糕,絕對係狂熱朱古力迷嘅必然之選,合桃班尼士打底,中層軟朱古力ganache,面層就係朱古力漿,朱古力嘅濃與甜,啖啖都食得入心入肺。不過,伴碟嘅士多啤梨、乾果、士多啤梨醬,係令個賣相好睇啲,感覺唔係齋黑色咁寡,但味道配合上就無謂啲。
香濃朱古力香蕉麵包布丁配Movenpick榛子雪糕Warm Chocolate Banana Bread Pudding with Movenpick Hazelnut ice-cream $68
有點其貌不揚,「黑古勒特」,又「岩岩巉巉」,不過,叫麵包布丁就有啲名不符實,因為點睇點食,都係個類似心太軟嘅焗朱古力蛋糕,但就唔會有流心效果,內裡加咗少少香蕉肉。味道,都係以濃郁為核心,濃郁嘅朱古力味,微暖嘅蛋糕,配上榛子雪糕,雪糕奶味都幾重,但就頗軟滑,榛子味很出。
香蕉船 Banana Split $58
其實佢哋賣意大利菜,依個甜品大可改為「香蕉貢多拉」啦!香蕉有點兒生,所以未夠香。雪糕都係用上Movenpick品牌,雖然餐牌寫上指定味道,不過,我估佢哋都預備定三幾款味道,我哋依個就開心果變咗杏仁味,另一球就係士多啤梨味,好彩依兩隻味我哋都食,既然佢都唔係跟餐牌咯,我覺得啲服務員都應該問聲我哋使唔使揀想要咩口味。除香蕉、兩球雪糕,仲有忌廉、烘杏仁片同好寒酸嘅朱古力漿。
食完Café Roma,感覺都唔太差,只係馬灣依啲咁僻嘅地方,若非入嚟訓練,相信都唔會專燈入嚟搵食。
|
|
|
麻酸樂米線專門店 Marsino Expert Noodle |
標題 : 香辛腐柳 |
地址 : 荃灣荃灣楊屋道18號荃新天地二期UG60號舖 |
地區 : 荃灣 |
|
現時分數:
|
日期 : 2012-08-23 14:59:44
個主題改得有啲夾硬嚟,不過都係代表今餐嘅4樣嘢食,相信睇完篇食評你都估到係乜。之前因為團購嚟幫襯過麻酸樂一次,試咗素菜雞湯米線、喇沙米粉、鹽酥一口雞、蒙古大漢雞翼,都覺得唔錯有水準,價錢又幾實惠,所以又趁完咗返主日,就再拉多個弟兄過嚟,等我哋可以試多少少嘢,得我倆公婆真係食唔得幾多。
既為米線專門店,米線款式當然選擇多多,12款米線餐,賣$36-$42,5款湯底任揀,唔食米線改米粉、上海拉麵、紅薯粉又得,仲跟一杯熱飲。
韓風泡菜餅雞柳粒粒米線 $38
米線由老婆發板,我都估佢要個韓風嘢架喇!韓風泡菜餅雞柳粒粒米線,配金銀蛋芫茜湯底,韓風泡菜餅跟米線係分開上。泡菜餅係啲煎栗米餅,加咗啲辛辣泡菜醬,入口醒神啦,伴住一小碗韓式冷盤菜粒,辣得過癮。至於一大湯碗嘅雞柳粒粒米線,雞柳唔係好多,至少無佢餐牌影出嚟嗰張相咁多啦;好在個金銀蛋芫茜湯底確係幾正,除鹹蛋皮蛋,仲有芫茜、芽菜、腐竹、生菜,材料幾豐富架。
蔥油蒜香骨拉麵 + 紫菜豆腐肉碎鴛鴦丸熱鍋 $42
話原價要$64,依家推廣價賣$42,拉麵係用上上海拉麵,而鴛鴦丸寫明有一粒手打肉丸同一粒雞軟骨丸,一粒進貢俾老婆,另一粒俾個朋友,所以無試啲鴛鴦丸,唔知咩味,不過個熱鍋仲有紫菜、豆腐粒、肉碎、菠菜,純粹當例湯飲都幾好。個麵同蒜香骨嘅份量亦唔少,麵條柔韌,帶有蔥油香,又加咗啲銀芽,食落多份爽口感;蒜香骨都係啲肉排,肉多過骨,滋味啖啖肉呀,而且蒜香味濃,整個拉麵都幾好食。
咖喱吉列龍脷柳飯 $39
試過米線、米粉,又試埋個拉麵,所以又點個飯睇吓邊景?塊吉列龍脷柳都幾巨型,大過我隻手掌,薄薄嘅麵包糠,炸得幾香脆喎,魚柳咬落又幾軟熟;咖喱汁亦都煮得唔錯,幾香吓,內裡嘅薯仔係先泡油再煮,食落唔會又腍又散,幾啱我口味!
餐飲我哋叫咗奶茶、菊花杞子蜜,都唔係咩特別嘢,所以今次就唔費唇舌多寫。整體今餐大家都好滿意,份量還覺得佢偏多添,食得我哋飽飽;而且個韓風泡菜餅同蔥油蒜香骨,著實唔錯有特色,值得今次我哋翻兜再幫襯!
|
|
|
東海堂 Arome Cake Shop |
標題 : 千層酥勝出 |
地址 : 荔枝角長沙灣道833號長沙灣廣場地下G09B1號舖 |
地區 : 荔枝角 |
|
現時分數:
|
日期 : 2012-08-22 14:42:01
老婆有朋友來訪,知道小弟嗜食甜品,與其買梳蕉,就不如買盒西餅上嚟。仲一買半打,原來其中4件係醒俾我同老婆兩份嘅,果然好姊妹,真係唔話得喇!
平時都真係少食東海堂嘅產品,不過近年都見佢做多咗宣傳,又搵咗知名日藉女餅廚做顧問,兼且出咗多款特色產品或期間限定,知名度應該都大增咗。至於佢早前出嗰款「關西柚子芝士蛋糕」,柚子搭芝士,小弟又幾有興趣,睇吓遲啲有無機會又有得試吓先!
朱古力芝士切餅
外貌有啲似意大利芝士餅,不過換咗面層唔係灑唂咕粉,而係做咗層朱古力軟漿。海綿蛋糕底,加厚厚一朕輕柔嘅芝士慕絲,再係餅面打一層朱古力軟漿,芝士慕絲幼滑,朱古力餅面甘苦,不過,略嫌整件切餅無乜特色。
黑森林切餅
有啲失望架,因為唔係街坊西餅幾蚊件丫嘛,中間都仲係用車厘子味啫喱,而唔係正宗嘅黑森林用上車厘子果肉。朱古力海綿蛋糕、鮮忌廉,依啲基本功係實在嘅,但都唔係好值依個價錢。
粒粒芒果千層酥
雖然係酥皮千層,但唔係成件都係酥皮,都係以一層海綿蛋糕、一層酥皮相間各兩層。酥皮做得蠻鬆脆嘅,芒果粒粒鋪滿餅面,幾鮮甜。
榛子千層酥
比預期正喎,夾住嘅啡色海綿蛋糕仲以為係咖啡味嚟,原來係加入咗榛子粉做嘅海綿蛋糕層,搭酥皮,各兩層「卡啦」相間,上面鋪咗好多碎榛子,份量一啲無手軟,食落好香榛子味。
試咗4款嘢,切餅嘅賣相、味道都稍欠特色,可以講亳不吸引,反而千層酥吸引度稍勝!
|
|
|
吸飲臺式飲品專門店 C-IN DRINKS |
標題 : 朱古力狂熱 |
地址 : 旺角西洋菜南街2A號銀城廣場地庫B11-12舖 |
地區 : 旺角 |
|
現時分數:
|
日期 : 2012-08-21 15:40:47
雖然係九龍人,但一向都唔多出嚟旺角蒲,因為咩時候都係太多人,唯獨想買波鞋就會走過嚟逛逛,睇睇有咩心水。行完波鞋街,又順道行埋女人街,嚟到西洋菜街尾,走入百老匯睇手機兼過冷河,外面熾熱高溫真難頂。
嚟到銀城個地庫商場,有好多細鋪,一落扶手電梯對正係間買杯子蛋糕(cupcake),一櫃都係,成十幾款,頗為吸引。行入少少見到間賣凍飲專門店,攞起啲單張睇睇,幾吸引,大熱天時嘆杯凍飲就最實際。見佢仲賣埋小食、厚多,咁就真係啱晒喇,行到有啲餓,整多份厚多當下午茶,食完先返歸啦。
朱古力胚芽可可 $17 / $18
飲品方面都有幾多選擇,亦有啲較特別嘅產品,更有一埋人氣推介,經店員介紹,揀咗朱古力胚芽可可,以朱古力粉加唂咕粉開沖,再灑上胚芽,份量分兩款,大杯700ml 賣$17,至尊750ml則賣$18,我手執依杯就係至尊份量。可可味濃郁,又夠冰凍,胚芽口感好似加咗麥片咁,大大杯的確幾抵飲。同個店員傾多兩句,佢話近期人氣仲有雪沫系列,因為係獨家嘢,所以幾多人試,尤其薄荷味,好清爽,夏天至正;不過,我就鍾情焦糖唂咕雪沫,下次再嚟要試吓先!
厚切雙層多士 $15
見到好似幾正,我又點埋一份。厚切雙層多士分為原味(即係奶油)、花生醬、藍莓同朱古力,花生醬平時成日食,所以要咗朱古力,厚多即叫即做,不過都唔使等太耐,因為要烘,都係等幾分鐘。我以為朱古力味就淨係加朱古力,原來先搽牛油,再唧朱古力漿同煉奶,兩片厚多夾為一份,$15都算得上抵食。由於麵包稍稍烘脆,朱古力漿又勁多,多到漏呀,所以都幾正!順提一提,事後專燈問番個店員貴姓,因為份人好有禮貌,聲線溫柔,又夠細心,提我食時摺起個袋尾,以防漏漿,佢個名字?叫阿香!依家都好少見啲後生女咁有禮貌架喇。
|
|
|
八喜
|
標題 : 喜慶賀生日 |
地址 : 灣仔軒尼斯道314-324號W Square 2樓 |
地區 : 灣仔 |
|
現時分數:
|
日期 : 2012-08-20 16:27:06
老朋友生日,又晌正灣仔返工,二話不說就想起嚟八喜,搵埋另一對撞啱結婚周年嘅老死,加埋我老婆,一行5人一齊慶賀一番。因為之前嚟過好幾次,美心品牌,粵台風味小館,幾次都食得滿意,而且算係美心品牌中收費較相宜嘅一間,所以,都幾得我心!
環境、服務之前食評都講過,晌度唔多講,入正題講嘢食:
肉燥蒸芋粿 $28
咩叫做情有獨鍾呢?前後幫襯過依間八喜三次,肉燥蒸芋粿同灌湯小籠包都有叫,今次亦唔例外,招牌點心都係點咗依兩味,再加個台南肉碎手捲。確係水準依然,蒸芋粿以蕃薯粉、米漿、芋頭絲做,橫睇芋絲密密麻麻蹤橫交錯,鬆化唔易散,很有芋頭味。加上肉燥、蔥粒,芋香中多添一份惹味。
灌湯小籠包 $30
例食招牌就係依個灌湯小籠包,扁撻撻外形其實包著濃湯,夾起時皮軟墜墜、湯汁蕩漾,肉餡鬆軟好味,幾次食質素都一樣無閃失。
台南肉碎手捲 $28
上次跟教會細胞小組朋友試過,覺得幾有趣,所以就點俾大家試。薄薄餅皮,捲住肉碎同肉鬆,軟軟糯,煙煙韌,口感QQ,甚有台式風味。
上湯河蝦泡南瓜 $55
河蝦同南瓜絲,同樣以上湯泡煮,但咁樣食法南瓜味唔係好出,而河蝦亦未見好有特色,而且河蝦始終較細隻,蝦味唔強,整個菜口味嚟得清淡。
拔絲咕嚕肉 $58
賣相就如同生炒骨,當然咕嚕肉用上脢頭,啖啖肉,唔會骨巉巉。咕嚕肉上咗炸漿,食落唔算厚,係覺得有部份咕嚕肉頗肥。拔絲個汁味道對板,但質感過杰,所以拔絲效果唔明顯。
金瓜川味牛 $65
今晚小炒嘅亮點。本來我哋幾個人,叫咗個炒飯臨尾墊底已經好夠,不過,為咗佢我哋再叫咗白飯。以原個南瓜仔作為盛器,牛筋牛腩切得大件,但炆得夠晒腍,醬汁加入添少許辣椒同花椒,微微辣就少許麻,帶點四川風味,就係因為個汁好味,所以咪多叫碗飯嚟撈汁唔好嘥囉。食完啲牛腩,都唔好忽略個南瓜,一樣可以起肉點汁食!
櫻花蝦炒飯 $60
上一次試過個炆飯,感覺普通,所以,為咗等朋友試到啲好嘢,都係揀番個穩膽:「櫻花蝦炒飯」。除櫻花蝦,加咗煙肉碎同露筍粒嚟炒,口感豐富,飯粒炒得少油爽身,又帶點鹹香。難怪大家都讚個飯好食!
白飯$12,茶位$8,泡菜$12,加埋一,埋單都唔使$500,好划算嘅一餐生日飯。
|
|
|
見多一麵
|
標題 : 實惠小店抵食炒粉麵 |
地址 : 荃灣西樓角路186-200號荃昌中心昌寧商場1樓51號舖 |
地區 : 荃灣 |
|
現時分數:
|
日期 : 2012-08-16 10:50:25
雖然荃灣經常嚟,但係荃豐中心、華都中心、荃昌中心依個「串燒」商場就好少過嚟搵食,查實嚟過嘅人或者附近街坊都知,依幾個商場裡面有好多細鋪食肆,今次所試就係瑟縮一個小鋪位嘅「見多一麵」,係老友推介。
咪見佢個名以為賣麵主打,其實店家係以茶餐廳自居,幾張餐牌紙,除早餐、茶餐,仲有啲炒粉飯麵套餐及泡飯、米線套餐,款式雖然大路,但價錢就肯定平過連鎖快餐店。店鋪細細,部份枱開咗晌商場嘅行人通道,地方屈質少少,勝在食得夠隨意。
先向是日快餐度落手,其中一款係香煎白倉魚飯,估唔到係平靚正之選。送餐飲,但可以+$3轉例湯「節瓜瑤柱仔豬骨湯」,老婆一向鍾意飲湯多過飲其他嘢,轉湯啱晒佢。2:00pm就開始有下午茶餐,雖然仲差少少先夠鐘,但一樣被我哋點,所以分別點咗兩個炒飯同一個炒米。
香煎白倉魚飯 $30
今日嘅「是日快餐」並有5款,以依款香煎白倉魚飯睇嚟最吸引,真係有啲估唔到,原條白倉魚一啲都唔細,配幾條菜遠,條白倉魚煎得外皮頗為香脆,肉質又幾鮮。另外,節瓜瑤柱仔豬骨湯,大大碗,都算落足料,入口唔會淡而無味。收你三十零蚊,又飯又有靚湯,又要人工、燈油火蠟,真係賣一碟唔知賺得幾多?
薑蛋炒飯 $25
特惠下午茶餐之一,跟一杯餐飲。顧名思義,就係薑同蛋,加埋生菜絲嘅炒飯,簡單得嚟好夠薑,好重薑味,碟頭唔細,飯粒炒得爽口唔油,又幾唔錯喎!
蝦醬雞粒炒飯 $25
以蝦醬嚟炒,自不然多添一份惹味,雞粒、生菜絲、蛋碎,落料份量十足,都唔覺因為係下午茶餐,就偷工減料。同樣食到碟底唔會一灘油,雖然係小店,製作有誠意。
星洲炒米 $25
無蝦仁版嘅星洲米,取而代之係換作火腿,加埋叉燒、雞蛋、芽菜,只賣$25仲要包杯啡茶,實屬情有可原。還好係炒得幾好食,咖哩粉、黃薑粉下得恰到,香而不俗!
雖然地踎小店,無乜服務可言,但上枱速度幾快手,眨下眼4個碟炒飯炒米搞掂晒。有趣嘅係,每枱有一樽自家製香蒜油任用,好香濃蒜蓉味,可惜今日叫咗嘅唔係炒飯就炒米,只係淺嚐少少,相信叫炆米、泡飯、米線,味道仲夾啲!
奶茶,係我去茶餐廳飲嘢嘅必然首選,依趟都無乜例外。以厚身茶杯盛載,茶色較深,茶味亦相對濃郁,有茶味富奶香,個人嚟講,係滑度稍欠而矣。不過,對依餐都好滿意,況且,每人平均三十都唔使。
|
|
|
小越南 Little Vietnam |
標題 : 隱蔽越南小館 |
地址 : 美孚美孚新村吉利徑5G號地下37號舖 |
地區 : 美孚 |
|
現時分數:
|
日期 : 2012-08-15 10:43:10
小越南對區外客都屬於少少難搵之地,因為唔晌正地鐵站上蓋嘅萬事違廣場,瑟縮晌荔灣街市附近,正正晌美孚巴士總站尾穿過天橋底側。
如果唔係店名叫「小越南」,門口又有啲越式餸菜食物相,都真係幾難估中佢係賣越南菜,因為店內裝修非常簡約,無咩傳統越南裝飾,一室白色或薄荷綠牆身,白色方形小餐枱配奶啡色梳化椅。由於鋪位細細,故此枱凳排得有點密,但兩行通道啱啱好係一個人嘅身位。
除咗基本餐牌,仲有一個廚師推介餐牌,內裡有3款廚師推介,包括越式酸辣海鮮湯河、越式金不換炒蜆及沙嗲牛肉炒河粉,我同老婆就揀咗個海鮮湯河。另外,大可留意吓近廚房出餐口對上塊黑板,因為仲寫有餐牌上都搵唔到嘅另一堆廚師推介,有主菜、有炒粉麵同小食,好似今晚所見,我哋就試試越式軟殼蟹卷同小越南焦糖薑雞翼兩款小食,另外店員話佢哋啲咖喱都做得幾出色,所以就點多一個咖喱豬扒飯,加埋一杯熱嘅越南滴漏咖啡(有優惠嘛!),而老婆就唔多鍾意飲嘢,結果就無叫套餐!
小越南焦糖薑雞翼 $41
原來係打算叫牛油雞中翼,不過店員話有另一款廚師推介嘅雞中翼「焦糖薑雞翼」,問我哋試唔試吓呢?咁牛油雞中翼以前都食過,既然有新嘢,又不妨一試呀。雞翼煎得焦啡色,面層鋪滿薑粒,雞翼本身醃得好入味,薑味幾重,但味道會較甜,如果你嗜甜依個值得一試,頗惹味,否則,揀牛油雞翼可能好啲,聽店員講牛油雞翼晌依度都算熱買。而伴碟嘅酸蘿蔔絲,亦都唔好錯過,自家醃,酸得嚟開胃唔揦喉。
越式軟殼蟹卷 $41
去食壽司,老婆就特別鍾意軟殼蟹手卷,所以,既然有個越式軟殼蟹卷,順理成章都點嚟試試。一客有4件,都做得頗為大件,以越南米紙卷上生菜、檬粉、青瓜絲、金不換、軟殼蟹而成,酸酸鹹,口感清爽,蘸點自家製碌冧,即係魚露,多添一份鹹香。唯一要挑剔係米紙卷卷上兩層,所以咬落帶少少韌勁,賣相亦無咁通透。記得之前晌中環Delicieux Bistro食過嘅水晶卷,其實都係同一樣嘢「米紙卷」,只係改個名靚啲,佢哋只以薄薄一層米紙包住幾樣材料,令賣相更通透。
越式酸辣海鮮湯河 $48
河粉經常食,所以轉咗濛粉,店員問使唔使多湯,既然個酸辣湯係賣點,要多啲又無妨。上枱嘅越式酸辣海鮮湯濛粉大大碗,望落去好似好少料,得幾隻蝦仔浮浮吓,原來寶物沉歸底,越食越有,除幾隻解蝦外.仲有魷魚條、蜆肉;而酸辣湯底,感覺有啲似泰國冬陰公,涼著冷氣夏天食確係幾醒神,仲越食越辣,問過店員,原來湯底用咗菠蘿、醋、蕃茄嚟做,又幾特別喎。
咖喱豬扒飯 $38
估唔到咁大份添,我又要發揮吓我嘅戰鬥格喇。咖喱頗香,雖然唔似印度嗰啲咁多香料味,但帶出淡淡椰香,又做到香而不辣,最適合小朋友食。豬扒同薯仔亦有不少,豬扒切成條狀,方便食用,肉質對辦,反而薯仔質感較鬆身,放入口一咬即散,應該係無經油泡嘅做法,我個人就稍為喜歡口感挺實嘅薯仔,但整體依個飯都好唔錯,淨係撈汁都足以搞掂一碗飯!
越南滴漏咖啡 $11
正價熱嘅要$23,凍嘅要$25,因為點咗主食,依家可以$11就飲到,無理由唔叫啫,如果唔係老婆唔好飲嘢,真係想叫多一杯特飲嚟試試呀!一開始上菜時就上埋個咖啡,因為真係逐滴逐滴咁漏落去,等啲餸菜食到一半,個咖啡就啱啱好都滴完。以越南咖啡粉沖調,杯底一早以傳統做法加入煉奶,搞勻就飲得,咖啡頗香而帶少少苦,無澀無酸,好啱自己口味,若非怕飲得太多咖啡瞓唔著,真係想叫多一杯架,反正老婆無叫嘢飲,仲有一個配額!
餐廳定價都算實惠,又唔收加一,以今餐份量計,3個人食絕對無問題。美孚區搵食選擇唔算好多,而專賣越南嘢就僅得此檔,算係「獨市」,所以我哋七點幾到嘅時就得三幾枱客,但過多半個鐘後,已九乘多滿,仲有唔少買外賣嘅街坊客,可見店子晌區內都頗受歡迎,亦已經站穩住腳!老婆都話值得再嚟,下次再嚟嘅話相信就會搵埋姨仔、舅仔一齊試試,因為大家住晌同屋苑,多啲人嚟可以試多啲嘢嘛!
|
|
|
韓國屋 Korea House |
標題 : 好味香辣泡菜湯麵 |
地址 : 九龍塘達之路80號又一城L2層22號舖 |
地區 : 九龍塘 |
|
現時分數:
|
日期 : 2012-08-13 10:10:26
兩公婆晌又一城匆匆搵食,美食廣場定當可以快快手,小弟揀咗mi2cool,超失望,食評見另一文章《何解跟misocool差咁遠.難食》;老婆就揀韓國屋,因為佢係韓國泡菜粉絲。
韓國屋都有幾多嘢揀,全日饌、石頭飯、粉絲或麵類,全部包韓式例湯、汽水或柚子茶,食麵無咁大份量,揀要麵餐,麵餐一共有10款由N1-N10,價貴都幾闊,由$34-$45,老婆二話不說就睇中N7嘅香辣泡菜湯麵。
香辣泡菜湯麵
湯麵以矮身闊口鐵碗盛載,幾墜手,又熱辣辣,所以都要小心拎埋位。麵條有啲似公仔麵,唔叫得好爽,但有韌勁,面面放有好多泡菜同雞蛋,泡菜香辣爽脆,老婆話好正喎!
熱柚子茶
餐飲要咗熱柚子茶,感覺正氣又健康啲,味道係柚子味稍輕,反而紅棗味重喎,真係估佢唔到呀。
|
|
|
Mi2cool |
標題 : 何解跟misocool差咁遠.難食 |
地址 : 九龍塘達之路80號又一城L2層20號舖 |
地區 : 九龍塘 |
|
現時分數:
|
日期 : 2012-08-10 15:05:38
晌九龍塘出席完朋友囡囡的洗禮活動,而晚上又約咗班朋友上小弟屋企開派對,需要預備食物,又要回家打點,所以,就過番嚟又一城嘅美食廣場,貪唔使等位可以食快啲。
依度嘅美食廣場有大家樂、有吉野家,亦有其他特色少少嘅店舖。mi2cool係misocool嘅分支,之前晌K11嘅misocool食過,感覺良好,食物有水準,所以面對住mi2cool,都頗有信心。而老婆係韓國泡菜迷,佢不其然就揀咗另一檔「韓國屋」(「韓國屋」嘅食評當然另文再講)。
mi2cool除散叫,仲有午餐供應,價錢唔貴,都係$38-$40,以又一城嚟計算係咁。午餐有拉麵、湯飯、烏冬……等等,未試過佢啲湯飯係點,就膽粗粗挑咗豚肉野菌味噌湯飯($38)配餐飲即磨咖啡。
豚肉野菌味噌湯飯
兩個字形容晒:「失望」,豚肉少到你唔信,就係飯面得嗰4條,無味兼「嚡烚烚」;野菌又點?又係極之少,兩片冬菇絲搭兩小撮金菇咁大把,唉!唯一多嘅係日本大蔥,係勁多,可惜係唔好食,又生又老又韌,問你死未?仲未,因為連核心嘅味噌,都竟然係無味,唔怪之得店名都唔用miso(味噌咁解)依個字啦。
早知咁差,食返大家樂就算!
|
|
|
御花園咖啡室 Cafe Rivoli |
標題 : 未遊英倫.只好味遊御花園 |
地址 : 銅鑼灣怡和街88號富豪香港酒店1樓 |
地區 : 銅鑼灣 |
|
現時分數:
|
日期 : 2012-08-09 17:13:14
富豪香港酒店內嘅御花園咖啡室,雖然餐廳名字叫「御花園」,花園嘅感覺就無乜,但天花鑲嵌咗幾組大型工藝美術嘅彩繪玻璃,加上樓底又高,倒有一股氣派,再者,入口位有專人鋼琴演奏,悠揚樂韻嘅環境下,又多添幾分優雅。
踏入暑假,餐廳以主題《招牌‧海鮮極級自助晚餐》仍為招徠,加上最近係「倫奧」,大廚為響應此盛事,特別加插數款英倫美食,同大家「味遊英倫」,不過英倫美食只係做到12/8啫!
能夠藉今次飲食網站及酒店所搞嘅試食會,可一嚐餐廳嘅招牌美食、海鮮食品、特色英倫菜式,真係大飽口福。故此,多謝有關單位及酒店嘅款待,令小弟有個飽足到深夜嘅晚上,唔使食宵夜可以繼續追睇倫奧!
未拎嘢食,就梗係先遊一遊「花園」,所有自助餐食物集中於餐廳中間位置,頭尾都係用餐區。款式都幾包羅萬有,當然,又唔係小林尊上身,點食得晒過百款嘢丫,既衝著主題美食而嚟,就自不然游擊戰,重點出擊。之不過,話雖如此,有兩樣嘢係我食開自助餐必食嘅,仲係一頭一尾添,一係沙律,二係甜品。
超級醬汁沙律吧
沙律吧配料有近30款:羅馬生菜、紅椰菜、翡翠苗、黑橄欖、雞心豆、紅菜頭、煙肉碎……真係記唔晒咁多,令小弟最深刻係竟然有成8款醬汁:千島、凱撒……大路嘅唔講,較特別有芒果醬汁、藍芝士沙律汁、芥茉籽沙律汁、陳年黑醋沙律汁……等等。揀好多款沙律菜、車厘茄、紅腰豆、黑橄欖、雞心豆、紅菜頭、芝士粉後,主打配上3款醬:芒果醬汁、藍芝士沙律汁、芥茉籽沙律汁。各項沙律配料幾鮮爽,由於所以配料都係以小筒冰鎮住,流量快又夠凍,好似沙律菜咁,咬落「索索聲」,而3款醬汁真係各有千秋,芒果醬汁芒果味勁濃鮮活,藍芝士沙律汁鹹香濃郁,而芥茉籽沙律汁微辣醒神。淨食沙律可能有啲「寡」,所以有時我會配冷盤,如肉腸、煙三文;但有時又會配海鮮,為一試今晚主題,就揀配海鮮。
海鮮地帶
海鮮有阿拉斯加蟹腳、凍花蟹、凍甜蝦、青口、藍貝青口、翡翠螺、瀨尿蝦,陣容都唔弱,不過質素有啲參差。阿拉斯加蟹腳拆出啖啖肉,不過一隻鹹鮮,肉質甜美,但另一隻出現肉質「霉霉哋」嘅情況;凍花蟹、瀨尿蝦嫌煩就無試喇,甜蝦就幾唔錯,雖然唔係超爽彈,但蝦味鮮甜。如何有生蠔嘅話,可能會對海鮮一環搶攻啲!
咯嗲雙子星
分別係龍蝦蟹子釀芒果、鮮蝦配熱情果沙沙醬,係是晚招牌推介,放晌冷盤附近,以雞尾酒杯一杯一杯擺出嚟,而且賣相做得幾精緻。前者係龍蝦、蟹子、芒果、青瓜絲嘅組合,龍蝦肉唔多,芒果變咗係主角,果味帶微酸,夏日醒胃小食;後者較得我歡心,鮮蝦肉起雙飛,配上熱情果、芒果粒粒做嘅醬,底下墊有紅色、黃色車厘茄,味道清新!
飲碗湯食個包
一輪沙律、海鮮、前菜,係時候餐湯餐包環節。御花園提供兩款餐湯:龍蝦湯、鱆魚蓮藕煲唐排,打個煲蓋,中湯湯面泛出點點油光,所以就揀飲西湯。龍蝦湯味道幾濃郁,質感柔滑,想食點龍蝦肉就要撈撈底喇,水準唔錯。餐湯側邊就係小型麵包櫃,放有6-7款迷你個裝包,不過麻麻哋。除了以麵包伴湯,仲搵嚟主廚推介嘅煙肉焗生蠔及帶子,同埋煎鵝肝多士,生蠔就比較細隻咗,但大大隻帶子頗有睇頭,以煙肉、芝士烤焗,自然滋味啦;而鵝肝多士加點陳醋,唔單只無咁漏,仲多份醇香。
味遊英倫
跟住就試一試加映分題「味遊英倫」,分別有燒牛肉配約克布甸、威靈頓牛扒、甘筍牛柳、煙肉焗生蠔、英式牛肉牛腰批、愛爾蘭燉什燴、薯蓉肉醬批、炸魚伴薯條,輪流登場,全部名牌以彩色米字旗為底紙,好易認出邊啲係英倫菜式。煙肉焗生蠔上一碟食咗,今回就揀咗後四者,竟然最好食係炸魚伴薯條,不愧最英式地道美食;而薯蓉肉醬批因為過鹹,所以最唔好食。還有,加多一小份主廚推介嘅招牌菜酥皮焗三文魚,三文魚加菠菜蓉包酥皮焗,外層酥皮自然香脆,內裡三文魚油潤肉嫩,菠菜蓉增添味道層次,加點自家配製香草醬汁,值得一試嘅菜式。
因為仲要留肚晌自助餐必食嘅甜品,走向我嘅不甜無歸之路,所以幾款招牌嘢如火焰壽司、中東烤肉串、印度天多里烤肉就無試,其他墊肚嘢如即煮粉麵就更不用多提。
火焰雪山騷
招牌甜品火焰雪山同即製梳乎厘,豈會錯過。首先登場係火焰雪山,酒店為隆重其事,特別為我哋預備咗個火焰雪山即席表演,淋上冧酒,點火,誘出藍藍火光,可惜現場環境比較光,「火焰」效果大打折扣,依家嘢都係最好晌啲浪漫氣氛嘅餐廳,昏昏暗下搞就最有睇頭。舊時啲人叫依個甜品做「焗雪山」,老派嘢,中間仲會用紅黑白三色雪糕,今晚依個就以雲喱拿雪糕做心,包海綿蛋糕。有人問做法係點,究竟點樣整完個火焰雪山啲雪糕仲可以咁凍?外面層蛋白係咪要焗一焗?當時就乜都唔記得晒喇,但睇番小弟十多年前晌工聯會學過嘅講議,先記番起係以海綿蛋糕墊底,圍邊,加雪糕,再以海綿蛋糕冚番個面,咁就變成海綿蛋糕包實啲雪糕,不過竅妙係做好依個工序後要入雪櫃雪硬,等到有落單,先拎出嚟晌外層唧上已打起嘅蛋白,再入爐以大面火(唔要底火)焗到蛋白金黃上色就可以出爐,所以食起嚟蛋白香脆,海綿蛋糕回軟,雪糕仍要冰凍,又好有酒香!係一道好有心思嘅甜品。
即製梳乎厘
有多款口味,有薑味、檸檬味,都係口感輕盈嘅甜品,而酒店又特別做咗一款別注版,香蕉朱古力梳乎厘,因為係以香蕉果肉做,唔係靠香精,香蕉味很濃郁,內裡又有點點朱古力粒,不過,代價係整個梳乎厘成份變得重身,無咗梳乎厘嗰重輕盈質感,放唔得耐就已經塌番落嚟,而且口感較濕潤,變得似香蕉蛋糕多過梳乎厘。
搶手法式馬卡龍(杏仁餅)
非常搶手,我晏咗去,已經睇到所餘無幾,有幸試到多款口味都係多謝對坐嘅另一位食家。酒店本身設有餅店,臨走所見一粒馬卡龍標價$18,數數手指我都前前後後食咗6粒,都成舊水喇!原本小弟無機會食咁多,同枱另外3位食家對太甜嘅嘢都受不了,我依啲嗜甜鬼見愁,無有怕喎,加上馬卡龍黏黏濕濕嘅口感,又唔係個個人都啱,造就小弟多啲嚟就密啲手!杏仁餅味道幾多元化,有朱古力、開心果、腰果、紅桑子、榛子、綠茶……一下子都記唔得晒。
搶灘咗3款甜品,食番啲雪糕同生果間一間場,雪糕係Dreyer’s,共有四款味道,朱古力碎碎(名牌搞錯係薄荷朱古力)、杏仁、雲呢拿、士多啤梨,揀嚟3球,加埋杏仁片、朱古力針大手入貨,再配雪米糍、蜜瓜、鮮菠蘿,淋上朱古力漿,加幾片芝士,係一個頗別出心裁嘅組合。
甜品拼盤大放送
作為最後衝刺,一份私已甜品大拼盤走唔甩!其實整晚嘅甜品款式輪流出場,臨尾有啲無再出都試唔到。不過,一口氣都揀咗8款甜品,有芒果布甸、朱古力蛋糕、木糠蛋糕、芒果拿破崙、桂花糕、斑尼士(有人嫌硬,其實佢質感本身就係較挺實)、黑加侖子啫喱(緬懷兒時味道)、蜜瓜奶凍,整體不俗。只係可惜有個主廚推介嘅香蕉朱古力卷,都無機會試,仲有綠茶紅豆蛋糕、焦糖吉士蛋糕……等等!
綜觀整晚食物,有高有低,主題海鮮方面,有啲失望,英倫美食好壞參半,而招牌菜式,偶有驚喜。其實依家食餐自助晚餐真係唔平,閒閒哋動輒四、五百落樓。依家御花園做緊成人價$408(一至四)、$438(五六日及公眾假),加埋一都咪話唔貴,不過獅子銀行嘅信用卡做緊65折,平日計變咗三百頭,還算係有啲吸引度。
|
|
|
海天堂 Hoi Tin Tong |
標題 : 借題發揮 |
地址 : 荃灣青山道210號富華中心1樓1C舖 |
地區 : 荃灣 |
|
現時分數:
|
日期 : 2012-08-08 11:25:45
一向都唔食中藥,有咩頭暈身臖,一係食成藥,一係睇西醬,又唔係對中醬信唔過,只係無睇中醬嘅習慣,不過,有時又會飲廿四味,食龜苓膏……有啲嘢就係習慣成自然。
近日有幾聲咳,我就覺得無乜嘢,不過老婆覺得我有嘢,咁啱經過海天堂,被佢捉咗入去整番碗川貝枇杷膏,佢就要一碗生魚野葛菜。
鮮製川貝枇杷膏 $35
色澤、口感都好似龜苓膏咁,睇佢啲單張簡介,成份有川貝、枇杷葉、桔梗、仙人草、款冬花、大棗、桔紅,其實對我都意義唔大,除咗知道川貝係啲貴嘢外,其他都唔認識;不過,功效方面可以對喉痛咳嗽、聲音沙啞、日咳夜咳、寒咳熱咳、痰多、肺燥、止咳除痰有顯著療效,依樣就至為實際。雖然唔係話食一盅就即刻藥到病除,乜咳都無晒,至少心理好過啲,況且啲川貝枇杷膏味道甘甘哋,下少少蜜糖當甜品咁食!
生魚野葛菜 $15
海天堂啲嘢都靜悄悄咁加價,記得年初,啲火麻仁、五花茶……都係賣$6樽,依家已經賣成$8樽,足足加三乘幾;而老婆所喜歡嘅生魚野葛菜茶,嗰時賣$12,依家要成$15,都加25個巴仙,物價上漲真係生活逼人。生魚野葛菜功效係清熱潤肺、開胃祛積,都係滋養好嘢。小弟就覺得老婆想飲,就捉埋我入去啫,哈哈!
|
|
|
御花園咖啡室 Cafe Rivoli |
標題 : 未遊英倫.只好味遊御花園 |
地址 : 銅鑼灣怡和街88號富豪香港酒店1樓 |
地區 : 銅鑼灣 |
|
現時分數:
|
日期 : 2012-08-07 16:57:17
富豪香港酒店內嘅御花園咖啡室,雖然餐廳名字叫「御花園」,花園嘅感覺就無乜,但天花鑲嵌咗幾組大型工藝美術嘅彩繪玻璃,加上樓底又高,倒有一股氣派,再者,入口位有專人鋼琴演奏,悠揚樂韻嘅環境下,又多添幾分優雅。
踏入暑假,餐廳以主題《招牌‧海鮮極級自助晚餐》仍為招徠,加上最近係「倫奧」,大廚為響應此盛事,特別加插數款英倫美食,同大家「味遊英倫」,不過英倫美食只係做到12/8啫!
能夠藉今次飲食網站及酒店所搞嘅試食會,可一嚐餐廳嘅招牌美食、海鮮食品、特色英倫菜式,真係大飽口福。故此,多謝有關單位及酒店嘅款待,令小弟有個飽足到深夜嘅晚上,唔使食宵夜可以繼續追睇倫奧!
未拎嘢食,就梗係先遊一遊「花園」,所有自助餐食物集中於餐廳中間位置,頭尾都係用餐區。款式都幾包羅萬有,當然,又唔係小林尊上身,點食得晒過百款嘢丫,既衝著主題美食而嚟,就自不然游擊戰,重點出擊。之不過,話雖如此,有兩樣嘢係我食開自助餐必食嘅,仲係一頭一尾添,一係沙律,二係甜品。
超級醬汁沙律吧
沙律吧配料有近30款:羅馬生菜、紅椰菜、翡翠苗、黑橄欖、雞心豆、紅菜頭、煙肉碎……真係記唔晒咁多,令小弟最深刻係竟然有成8款醬汁:千島、凱撒……大路嘅唔講,較特別有芒果醬汁、藍芝士沙律汁、芥茉籽沙律汁、陳年黑醋沙律汁……等等。揀好多款沙律菜、車厘茄、紅腰豆、黑橄欖、雞心豆、紅菜頭、芝士粉後,主打配上3款醬:芒果醬汁、藍芝士沙律汁、芥茉籽沙律汁。各項沙律配料幾鮮爽,由於所以配料都係以小筒冰鎮住,流量快又夠凍,好似沙律菜咁,咬落「索索聲」,而3款醬汁真係各有千秋,芒果醬汁芒果味勁濃鮮活,藍芝士沙律汁鹹香濃郁,而芥茉籽沙律汁微辣醒神。淨食沙律可能有啲「寡」,所以有時我會配冷盤,如肉腸、煙三文;但有時又會配海鮮,為一試今晚主題,就揀配海鮮。
海鮮地帶
海鮮有阿拉斯加蟹腳、凍花蟹、凍甜蝦、青口、藍貝青口、翡翠螺、瀨尿蝦,陣容都唔弱,不過質素有啲參差。阿拉斯加蟹腳拆出啖啖肉,不過一隻鹹鮮,肉質甜美,但另一隻出現肉質「霉霉哋」嘅情況;凍花蟹、瀨尿蝦嫌煩就無試喇,甜蝦就幾唔錯,雖然唔係超爽彈,但蝦味鮮甜。如何有生蠔嘅話,可能會對海鮮一環搶攻啲!
咯嗲雙子星
分別係龍蝦蟹子釀芒果、鮮蝦配熱情果沙沙醬,係是晚招牌推介,放晌冷盤附近,以雞尾酒杯一杯一杯擺出嚟,而且賣相做得幾精緻。前者係龍蝦、蟹子、芒果、青瓜絲嘅組合,龍蝦肉唔多,芒果變咗係主角,果味帶微酸,夏日醒胃小食;後者較得我歡心,鮮蝦肉起雙飛,配上熱情果、芒果粒粒做嘅醬,底下墊有紅色、黃色車厘茄,味道清新!
飲碗湯食個包
一輪沙律、海鮮、前菜,係時候餐湯餐包環節。御花園提供兩款餐湯:龍蝦湯、鱆魚蓮藕煲唐排,打個煲蓋,中湯湯面泛出點點油光,所以就揀飲西湯。龍蝦湯味道幾濃郁,質感柔滑,想食點龍蝦肉就要撈撈底喇,水準唔錯。餐湯側邊就係小型麵包櫃,放有6-7款迷你個裝包,不過麻麻哋。除了以麵包伴湯,仲搵嚟主廚推介嘅煙肉焗生蠔及帶子,同埋煎鵝肝多士,生蠔就比較細隻咗,但大大隻帶子頗有睇頭,以煙肉、芝士烤焗,自然滋味啦;而鵝肝多士加點陳醋,唔單只無咁漏,仲多份醇香。
味遊英倫
跟住就試一試加映分題「味遊英倫」,分別有燒牛肉配約克布甸、威靈頓牛扒、甘筍牛柳、煙肉焗生蠔、英式牛肉牛腰批、愛爾蘭燉什燴、薯蓉肉醬批、炸魚伴薯條,輪流登場,全部名牌以彩色米字旗為底紙,好易認出邊啲係英倫菜式。煙肉焗生蠔上一碟食咗,今回就揀咗後四者,竟然最好食係炸魚伴薯條,不愧最英式地道美食;而薯蓉肉醬批因為過鹹,所以最唔好食。還有,加多一小份主廚推介嘅招牌菜酥皮焗三文魚,三文魚加菠菜蓉包酥皮焗,外層酥皮自然香脆,內裡三文魚油潤肉嫩,菠菜蓉增添味道層次,加點自家配製香草醬汁,值得一試嘅菜式。
因為仲要留肚晌自助餐必食嘅甜品,走向我嘅不甜無歸之路,所以幾款招牌嘢如火焰壽司、中東烤肉串、印度天多里烤肉就無試,其他墊肚嘢如即煮粉麵就更不用多提。
火焰雪山騷
招牌甜品火焰雪山同即製梳乎厘,豈會錯過。首先登場係火焰雪山,酒店為隆重其事,特別為我哋預備咗個火焰雪山即席表演,淋上冧酒,點火,誘出藍藍火光,可惜現場環境比較光,「火焰」效果大打折扣,依家嘢都係最好晌啲浪漫氣氛嘅餐廳,昏昏暗下搞就最有睇頭。舊時啲人叫依個甜品做「焗雪山」,老派嘢,中間仲會用紅黑白三色雪糕,今晚依個就以雲喱拿雪糕做心,包海綿蛋糕。有人問做法係點,究竟點樣整完個火焰雪山啲雪糕仲可以咁凍?外面層蛋白係咪要焗一焗?當時就乜都唔記得晒喇,但睇番小弟晌十多年前晌工聯會學過嘅講議,先記番起係以海綿蛋糕墊底,圍邊,加雪糕,再以海綿蛋糕冚番個面,咁就變成海綿蛋糕包實啲雪糕,不過竅妙係做好依個工序後要入雪櫃雪硬,等到有落單,先拎出嚟晌外層唧上已打起嘅蛋白,再入爐以大面火(唔要底火)焗到蛋白金黃上色就可以出爐,所以食起嚟蛋白香脆,海綿蛋糕回軟,雪糕仍要冰凍,又好有酒香!係一道好有心思嘅甜品。
即製梳乎厘
有多款口味,有薑味、檸檬味,都係口感輕盈嘅甜品,而酒店又特別做咗一款別注版,香蕉朱古力梳乎厘,因為係以香蕉果肉做,唔係靠香精,香蕉味很濃郁,內裡又有點點朱古力粒,不過,代價係整個梳乎厘成份變得重身,無咗梳乎厘嗰重輕盈質感,放唔得耐就已經塌番落嚟,而且口感較濕潤,變得似香蕉蛋糕多過梳乎厘。
搶手法式馬卡龍(杏仁餅)
非常搶手,我晏咗去,已經睇到所餘無幾,有幸試到多款口味都係多謝對坐嘅另一位食家。酒店本身設有餅店,臨走所見一粒馬卡龍標價$18,數數手指我都前前後後食咗6粒,都成舊水喇!原本小弟無機會食咁多,同枱另外3位食家對太甜嘅嘢都受不了,我依啲嗜甜鬼見愁,無有怕喎,加上馬卡龍黏黏濕濕嘅口感,又唔係個個人都啱,造就小弟多啲嚟就密啲手!杏仁餅味道幾多元化,有朱古力、開心果、腰果、紅桑子、榛子、綠茶……一下子都記唔得晒。
搶灘咗3款甜品,食番啲雪糕同生果間一間場,雪糕係Dreyer’s,共有四款味道,朱古力碎碎(名牌搞錯係薄荷朱古力)、杏仁、雲呢拿、士多啤梨,揀嚟3球,加埋杏仁片、朱古力針大手入貨,再配雪米糍、蜜瓜、鮮菠蘿,淋上朱古力漿,加幾片芝士,係一個頗別出心裁嘅組合。
甜品拼盤大放送
作為最後衝刺,一份私已甜品大拼盤走唔甩!其實整晚嘅甜品款式輪流出場,臨尾有啲無再出都試唔到。不過,一口氣都揀咗8款甜品,有芒果布甸、朱古力蛋糕、木糠蛋糕、芒果拿破崙、桂花糕、斑尼士(有人嫌硬,其實佢質感本身就係較挺實)、黑加侖子啫喱(緬懷兒時味道)、蜜瓜奶凍,整體不俗。只係可惜有個主廚推介嘅香蕉朱古力卷,都無機會試,仲有綠茶紅豆蛋糕、焦糖吉士蛋糕……等等!
綜觀整晚食物,有高有低,主題海鮮方面,有啲失望,英倫美食好壞參半,而招牌菜式,偶有驚喜。其實依家食餐自助晚餐真係唔平,閒閒哋動輒四、五百落樓。依家御花園做緊成人價$408(一至四)、$438(五六日及公眾假),加埋一都咪話唔貴,不過獅子銀行嘅信用卡做緊65折,平日計變咗三百頭,還算係有啲吸引度。 |
|
|
La Kaffa |
標題 : 我的星期六美孚早餐 ~ 拉膠花全日英式早餐 |
地址 : 美孚蘭秀道1-24號地下N9號舖 |
地區 : 美孚 |
|
現時分數:
|
日期 : 2012-08-07 10:26:55
星期六唔再使返工,又可以出街hea嘆早餐。主打食「全日英式早餐」嘅La Kaffa卒之晌美孚插旗,新開咗幾個星期,見無咁多人先去幫襯,豪少少食個富貴啲嘅早餐。
其實之前幾次經過,見近門口個易拉架顥示晒9款「全日早餐」,賣相、份量都幾吸引,都尊燈註足望兩眼研究有咩好食。代號A1-A8嘅「早餐」賣$36-$48,而代號E1/E2嘅「早餐」係超豐富,足夠兩個人食,賣$82/$92。同老婆經過一輪研究,揀咗A2加A3,因為可以試到最多唔同款式嘅嘢,係唯獨店子亮點嘅班尼廸蛋試唔到啫。各款「早餐」免費包熱奶茶、熱低糖紅茶或綠茶;如果轉即磨咖啡,凍奶茶、凍低糖紅茶或綠茶,要加$4;轉咖啡凍朱古力、鮮奶咖啡、黑糖咖啡嘅話,就要加多$14喇。此外,「添餸」由$6-$10,好似額外要茄汁焗豆加$6,加法蘭克福腸加$8,加牛角包加$10,不過就無得加班尼廸蛋囉!
鋪位細細,全店以黑襯白,估唔到燈火通明「光撐撐」,不過就極之逼,埋牆位基本上都係要靠走廊位借借先入到,好唔方便。而買嘢採半自助形式,好似Delifrance嗰類,先晌櫃面買嘢,拎個號碼牌等「送貨」,所以唔收加一,暫時仲只收現金,店員話啱啱新開,遲啲應該可以用電子貨幣。
A2餐 $38
成個餐有煎雙蛋、法式多士配白糖霜或蜂蜜、辣味香腸、茄汁焗豆。法式多士揀咗蜂蜜,但又唔見有蜜糖俾我,細問之下原來整法式多士時已加咗蜂蜜,真係食唔出有咩蜂蜜味添,而且多士好薄,上枱時唔多夠熱辣。辣味香腸,辣味徐徐滲出,唔係好辣,至於茄汁焗豆應該都係屬罐頭貨色,跟晌超市買嘅唔會有咩分別。全個餐最正係份煎雙蛋,雖然一眼睇出係用煎蛋模做,如果唔係點會咁圓咁厚邊丫,但蛋黃煎到半熟,一篤流心好滑溜;相反,最不悄係啲生菜,只得撮生菜已無甚特色,加多一、兩款如火箭菜、紅葉生菜嚟做沙律菜,好睇又好食好多啦,最馬虎位係嗰唧沙律醬,唔多想講,睇圖就知咩叫做「求其」。
A3餐 $44
至於A3,包括火腿芝士奄列、全麥多士、牛仔腸、脆薯餅、粟米粒、蕃茄,整體都未見好出色。火腿芝士奄列煎得幾嫩,奄列內仍有溜溜蛋漿,不過芝士味無乜;全麥多士只係稍微烘過吓,唔夠香脆;牛仔腸同脆薯餅做得較為好,牛仔腸煎得外皮香脆,薯餅炸得脆身無油;粟米粒太大朕牛油味,搶走咗粟米甜品,而且有少少實,好似擺咗好耐咁,口感比較奇怪。
熱低糖紅茶、即磨咖啡
老婆要熱低糖紅茶,小弟就揀即磨咖啡。低糖紅茶一般,而即磨咖啡頗香醇,係今餐最大慰藉,不過打開個蓋睇睇,唔多滿喎,同埋要加多$4,似乎唔夠大方!
平均成40幾蚊一個早餐,質素唔算好突出,感覺上仲有啲馬虎添,而且環境又逼,坐多陣都覺得唔好意思,讓人食得唔夠寫意。唯獨招呼、服務方面拉番唔少分,啲妹妹仔侍應好有禮貌。唔知依間係直營店定加盟店,不過,始終覺得性價比低,試過就算,我都係鍾意去返麥記食珍寶。
|
|
|
La Kaffa |
標題 : 我的星期六美孚早餐 ~ 拉膠花全日英式早餐 |
地址 : 美孚蘭秀道1-24號地下N9號舖 |
地區 : 美孚 |
|
現時分數:
|
日期 : 2012-08-06 10:22:09
星期六唔再使返工,又可以出街hea嘆早餐。主打食「全日英式早餐」嘅La Kaffa卒之晌美孚插旗,新開咗幾個星期,見無咁多人先去幫襯,豪少少食個富貴啲嘅早餐。
其實之前幾次經過,見近門口個易拉架顥示晒9款「全日早餐」,賣相、份量都幾吸引,都尊燈註足望兩眼研究有咩好食。代號A1-A8嘅「早餐」賣$36-$48,而代號E1/E2嘅「早餐」係超豐富,足夠兩個人食,賣$82/$92。同老婆經過一輪研究,揀咗A2加A3,因為可以試到最多唔同款式嘅嘢,係唯獨店子亮點嘅班尼廸蛋試唔到啫。各款「早餐」免費包熱奶茶、熱低糖紅茶或綠茶;如果轉即磨咖啡,凍奶茶、凍低糖紅茶或綠茶,要加$4;轉咖啡凍朱古力、鮮奶咖啡、黑糖咖啡嘅話,就要加多$14喇。此外,「添餸」由$6-$10,好似額外要茄汁焗豆加$6,加法蘭克福腸加$8,加牛角包加$10,不過就無得加班尼廸蛋囉!
鋪位細細,全店以黑襯白,估唔到燈火通明「光撐撐」,不過就極之逼,埋牆位基本上都係要靠走廊位借借先入到,好唔方便。而買嘢採半自助形式,好似Delifrance嗰類,先晌櫃面買嘢,拎個號碼牌等「送貨」,所以唔收加一,暫時仲只收現金,店員話啱啱新開,遲啲應該可以用電子貨幣。
A2餐 $38
成個餐有煎雙蛋、法式多士配白糖霜或蜂蜜、辣味香腸、茄汁焗豆。法式多士揀咗蜂蜜,但又唔見有蜜糖俾我,細問之下原來整法式多士時已加咗蜂蜜,真係食唔出有咩蜂蜜味添,而且多士好薄,上枱時唔多夠熱辣。辣味香腸,辣味徐徐滲出,唔係好辣,至於茄汁焗豆應該都係屬罐頭貨色,跟晌超市買嘅唔會有咩分別。全個餐最正係份煎雙蛋,雖然一眼睇出係用煎蛋模做,如果唔係點會咁圓咁厚邊丫,但蛋黃煎到半熟,一篤流心好滑溜;相反,最不悄係啲生菜,只得撮生菜已無甚特色,加多一、兩款如火箭菜、紅葉生菜嚟做沙律菜,好睇又好食好多啦,最馬虎位係嗰唧沙律醬,唔多想講,睇圖就知咩叫做「求其」。
A3餐 $44
至於A3,包括火腿芝士奄列、全麥多士、牛仔腸、脆薯餅、粟米粒、蕃茄,整體都未見好出色。火腿芝士奄列煎得幾嫩,奄列內仍有溜溜蛋漿,不過芝士味無乜;全麥多士只係稍微烘過吓,唔夠香脆;牛仔腸同脆薯餅做得較為好,牛仔腸煎得外皮香脆,薯餅炸得脆身無油;粟米粒太大朕牛油味,搶走咗粟米甜品,而且有少少實,好似擺咗好耐咁,口感比較奇怪。
熱低糖紅茶、即磨咖啡
老婆要熱低糖紅茶,小弟就揀即磨咖啡。低糖紅茶一般,而即磨咖啡頗香醇,係今餐最大慰藉,不過打開個蓋睇睇,唔多滿喎,同埋要加多$4,似乎唔夠大方!
平均成40幾蚊一個早餐,質素唔算好突出,感覺上仲有啲馬虎添,而且環境又逼,坐多陣都覺得唔好意思,讓人食得唔夠寫意。唯獨招呼、服務方面拉番唔少分,啲妹妹仔侍應好有禮貌。唔知依間係直營店定加盟店,不過,始終覺得性價比低,試過就算,我都係鍾意去返麥記食珍寶。
|
|
|
大家樂 Cafe De Coral |
標題 : 我的星期六美孚早餐 ~ 牛乳滑蛋加超值選 |
地址 : 美孚美孚新村萬事達廣場1樓N95(B) |
地區 : 美孚 |
|
現時分數:
|
日期 : 2012-08-06 08:23:43
大家樂相對所住嘅屋苑遠啲,所以比較少去啲,不過,小弟嘅信用卡積分就最常換啲飲飲食食嘅現金券,大家樂當然都有份,換啲現金券睇門口,不時食番個免費早餐或下午茶餐嘛。
依次上到嚟大家樂,又要對住眾多早餐組合上左揀右揀,「牛乳炒滑蛋」好似幾有睇頭,先揀一份佢,又見佢個「天天超值早餐」類別內有個「新產品」,其實只係麥片拼熱狗,就試試睇你點新產品法?
牛乳炒滑蛋早餐
以牛乳炒滑蛋為主打,跟唔同配菜,如腸仔、餐肉……等等,再跟厚牛油多士或蘿蔔糕,送餐飲,由$20-$24.5不等。老婆真識揀,要個最貴嘅,牛乳炒滑蛋拼牛扒($24.5),選厚多士,飲熱檸水。塊厚多唔係好大塊,而且無乜點烘過咁款,但佢就鍾意加埋滑蛋一齊食,由於啲牛乳滑蛋好得,加咗少少香草,又帶點蛋漿,好食。廿零蚊份早餐,牛扒都無可能大大塊咁俾你,而且都幾薄身,不過,配洋蔥汁,味道唔差,牛扒又幾鬆軟。
天天超值早餐
好耐無食麥片,又見佢話隻迷你熱狗係新產品,加埋杯熱飲,都係賣$20,都幾超值。鮮奶麥片煮得幾滑口,稀杰度啱啱好,而隻熱狗話迷你,其實都係快餐店常見的正常長度,香腸都只係一般嘅雞肉腸,驚喜位係啲熱狗醬喎,奶黃嘅熱狗醬加咗蛋黃,味道酸酸甜,內裡仲有啲甘筍粒、蔥粒,認真唔錯喎。慢慢嘆埋杯咖啡,跟住行吓荔枝角公園,幾hea呀!
其實嚟快餐店食嘢水準一向都OK,唔太好亦唔太差,但今餐個牛乳炒滑蛋同隻熱狗俾到少少意外驚喜,所以鬆手啲俾個「好食」笑佢!
題外話,雖然依家啲人成日話物價貴,周時諗辦法慳啲錢,但依然見好多人出街食嘢。晌萬事達廣場上面依間大家樂,早餐時段保持九乘幾滿,人流快上快落,純粹睇食早餐嘅人流指數,依家個經濟好似好好咁,或許美孚中產較多啦! |
|
|
美心MX Maxim's MX |
標題 : 我的星期六美孚早餐 ~ 經典糯米雞 |
地址 : 美孚美孚新村5期地下N10-N12號舖 |
地區 : 美孚 |
|
現時分數:
|
日期 : 2012-08-04 18:53:19
之前講過,自從唔使再返星期六,就多咗晌星期六出街食早餐,屋苑樓下間麵飽王選擇少、質素普通,盈暉臺間荔苑一早入咗我嘅黑名單,而美心就算係最就我哋腳,所以除咗早餐,下午茶都經常有幫襯。
美心嘅早餐選擇多多,又港式、又歐陸、有粥又有出前一丁,通常都望一輪至決定到食咩。我就要個經典早餐,老婆話食隻糯米雞就搞掂。
經典早餐 $23
所謂經典,就係好早期港式茶餐廳嘅早餐,一小碗叉燒湯意粉,配厚多士、炒滑蛋、煎火腿,再加多杯奶茶,以早餐而言,豐富到極啦。叉燒湯意粉,意粉有少少腍咗,叉燒係美心出品,有保證嘅;厚多士雖然只有半件,但幾厚吓,烘得脆,我就加少少炒蛋嚟一齊食,而蛋炒得又幾滑喎。美心近年都專燈加強宣傳佢哋嘅奶茶「香港地奶茶」,雖然始終都總覺得跟茶記差少少,但選用錫蘭茶葉泡茶,以黑白淡奶開沖,口感幾香,水準已有番咁上下喇!
正宗糯米雞 $18
美心幾人氣嘅早餐,晏啲嚟都會賣晒。大大隻,好鬼足料,裡面有齊雞中翼、叉燒、火腿、臘腸、冬菇……,淨係食料都抵啦,夠大堆頭,味道又唔差,真係晏晝都可以拖到下午茶先再食呀!
用埋張美心早餐$2折扣券,真係平均一個人廿蚊都唔使,以後星期六落嚟食早餐,我都仲會久唔久揀嚟美心。
|
|
|
麥當勞 McDonald's |
標題 : 我的星期六美孚早餐 ~ 麥記珍寶 |
地址 : 美孚美孚新村萬事達廣場地下N60A號舖 |
地區 : 美孚 |
|
現時分數:
|
日期 : 2012-08-04 18:12:12
平時日日朝早都係晌屋企整早餐食,食完先返工。自從公司最近改咗5日制,星期六就多咗出街食早餐,懶得整之餘,想食得hea啲同豐富啲。
依朝先搵嚟麥記,平時去麥記都係但求快快手頂餐飽,咁既然唔趕時間,又想食得豐富啲,「珍寶套餐」係必然首選,一份珍寶有齊脆薯餅、兩件熱香餅、兩件英式烘鬆餅、炒滑蛋、豬柳,加埋一杯即磨咖啡,咁嘅陣容實屬小弟平時早餐嘅兩倍份量。
可能好多人都不悄麥記出品,麥記就等於垃圾食物,有時人就唔理好醜鍾意為反而反。眼見麥記近幾年都不斷改進,雖然質素唔係好到飛上天,收你十零廿蚊,咁你想點?總好過有啲餐廳真係收得你貴仲要唔好食,我屋企附近間荔苑就係表表者啦!
講番個珍寶套餐,幾樣都係我鍾意食嘅嘢,脆薯餅、熱香餅、烘鬆餅都係心頭好,熱香餅鍾意多牛油多糖漿,咁至夠香;烘鬆餅捨果醬,還是鍾意搽牛油多啲。炒蛋唔算好滑,勝在份量多;豬柳搭薯餅,你試過咁食未丫?仲有咖啡可以添飲,我又鍾意多奶,想點都得,幾寫意呀!又有免費報紙睇,依間麥記又大又闊落,幾好hea呀,想坐得更加舒服啲,過隔離嘅McCafe就得喇,偶爾唔使返工整份珍寶,感覺都唔知幾好。
俾個「好食」佢,因為廿零蚊大大份,樣樣啱食,咖啡添飲,刨埋份星島,hea足成個鐘呀,絕對係早餐大滿足! |
|
|
The Live House |
標題 : 地牢拉闊美食 |
地址 : 旺角彌敦道731號地庫 |
地區 : 旺角 |
|
現時分數:
|
日期 : 2012-08-01 15:53:14
太子有好多酒吧,尤其是旺角警署後面一段西洋菜北街同通菜街,真係成條酒吧街咁,不過杯中物依家嘢唔係好啱小弟,至多係有少少喜慶嘢先飲番杯,就算出差晌大陸做嘢,都企硬滴酒不沾,因為佢哋真係瘋飲,食餐飯開一、兩箱啤酒係閒事,仲有紅酒、白酒呢?唔係white wine嗰啲白酒喎,係國家名牌太白詩仙、五糧液嗰啲酒精度60-70以上嘅白酒呀,點避?我咪次次話身體問題唔適宜飲酒囉!
雖然唔多鍾意落吧,但去酒吧餐廳都OK,以前去過曼聯餐廳,食飯飲嘢睇英超,不過依家執咗(或者叫酒主「被逼」改名繼續做啦)。今趟一大班人嚟試The Live House,又係一間酒吧餐廳,特別在於晌度可以即興夾吓band,事後先知逢星期二至四8:00pm後原來有live band表演,據知唔一定好嘈吵嗰啲,而星期五10:00pm後都有,不過就會係搖滾得勁啲嘅band喇。是日係星期天,無緣一會,不過又幾好彩喎,有個後生仔食客,撞正係佢生日,走咗上台玩電子琴同打鼓,小弟唔多識音樂,不過見佢琴彈得有紋有路,鼓打得強勁有節奏,頭都跟住揈揈吓,個身都想郁郁吓呀!
環境方面,除咗牆上掛多部平面電視,不斷播放外國MTV外,仲有飛標機,最突出就自然係餐廳尾嘅小舞台,有晒夾band器材,此外,啲枱枱凳凳跟平常西餐廳格局無異,柔和天花燈,皮梳化皮椅,蠟燭燈,氣氛幾有情調,所以,就算就唔啱睇人打band,嚟食飯傾偈都OK喎。
Lady in the Live $78
人未齊,就先叫杯嘢飲吓,除紅、白酒、啤酒、烈酒,仲有多款雞尾酒,以及幾款非酒精類嘅特飲Mocktail(即係無酒精嘅雞尾酒)、茶啡同汽水。小弟就點咗杯Lady in the Live一試,影低咗啲飲品資料,先知佢成份有龍舌蘭酒(Tequila)、雞蛋利口酒(Advocaat)、橙汁、青檸汁,加半粒士多啤梨裝飾。好老實,講明唔好酒,唔係好識點評價好唔好,只係記得幾年前睇過一套日劇「王牌酒保」(嵐嘅相葉雅紀主演),講到溝雞尾酒好神奇,就正如神之雫(神之水滴)講紅酒咁。咁講,飲落依杯雞尾酒都幾得意,酒精度故然唔高,易入口,橙搭青檸味道感覺幾清新!
蕃茄忌廉湯
色澤唔係咁對辦,較為淡橙色,似甘筍或南瓜忌廉湯多啲,不過,嗒落又確係蕃茄味,但就偏淡,幸而濃稠啱啱好,質感仍算幼滑。
海鮮田園沙律配意大利汁 $78
以咁嘅價位依個海鮮田園沙律一啲都無欺場,沙律菜搭鮮蕃茄,配意大利汁,味道酸酸鹹鹹幾醒胃,酒醋香帶出意大利風味。海鮮配料亦相當認真,有鮮蝦、魷魚圈、青口、蜆肉,唔係得三兩粒,份量一啲都無手軟,雖然未話誇張到食到啖啖海水味,但質素確實不賴!
芝士乳酪薯條 $68
藉沙律清清味蕾之後,嚟個芝士炸薯條就最好不過。粗大嘅薯條炸得甘香,上面係已溶透嘅芝士,再灑上煙肉碎,美國餐廳常見嘅小食,亦係極之滋味香口嘅小食。難得晌度配埋乳酪醬,帶微微酸,除減低油膩感之外,更減少成日食熱氣嘢嘅罪惡感。記得盡快食,因為一攤涼咗,啲芝士就會變成一pat咁,黐實晒啲薯條之餘,口感又搞到好似食緊塊軟膠咁,再者,薯條腍晒都唔好食啦!
啤酒煮青口 $98
白酒煮青口聽得多又食過,搵啤酒煮就第一次喇,真係要見識吓!幾有創意,啤酒味滲入晒落青口度,食落真係幾重啤酒味,侍應話啤酒係用上生啤嚟整。不過可能係小弟本身唔好啤酒啦,所以梗係覺得有啲唔夾。
錫紙焗芝士煙肉牛肝菇 $78
又係芝士煙肉嘅配搭,剛才個青口亦有煙肉嘅蹤影,似乎大廚對前菜嘅出品都幾情有獨鍾晌煙肉身上。兩大件牛肝菇,澆上煙肉條同芝士,包錫紙焗,側旁伴有少少沙律菜,侍應哥仔一鎅開張錫紙,香氣溢出。雖然牛肝菇菇味唔差,但跟著芝士,多少都被搶風頭,幸好夠肉地又多汁。
馬爹利酒香什菌配法包 $68
相對個牛肝菇,小弟就鍾意依個什菌多啲,一來賣相幾有層次,下面係炒什菌,再以法包架起沙律菜,最重要係食出菇菌嘅香味。以白蘭地嚟炒什菌,感覺高檔咗,不過,可能啲酒都揮發得八八九九,唔係太食得出酒香,反而什菌味嚟得較濃郁;以法包墊住少少沙律菜加什菌,自家DIY什菌多士,輕怡好食!
卡邦尼意粉 $88
淺嚐咗多款前菜小食,係時候搵啲飽肚嘢喇。卡邦尼意粉打頭陣,雖然話份量唔係好多,但甚有質素,意粉煮得有咬口已經過咗基本關,忌廉蛋黃汁做得啱啱好,包住晒所有意粉,加埋煙肉、白菌片,簡單好味。
香草大蝦薄餅 $88
小小一碟意粉咁多人分,每人一炷仔當然唔夠喉啦,所以薄餅就打孖上,兩個仲好似樣,因為一個大蝦,另一個海鮮,都係蕃茄醬底。香草大蝦薄餅,顧名思義,只有大蝦,餅底超薄,好脆邊,上面鋪有唔少大蝦,蕃茄醬滿瀉,反而落芝士就無咁重手,所以個薄餅蕃茄味好濃郁,如想食重少少芝士味,就自行加芝士粉,一大樽任你用,我就覺得再加多啲香草碎就更啱小弟喇。
什錦海鮮薄餅 $98
什錦海鮮除咗大蝦,就多咗魷魚圈同蜆肉,望落餡料比上面個大蝦薄餅更多,同樣係2-3毫米厚嘅脆批底,10吋直徑大細,井字形鎅開,件件都鋪有海鮮餡、芝士、濃香蕃茄醬,侍應話蕃茄醬自家製,唔怪得食落咁鮮活。賣$98,小弟就覺得好抵食!
酥皮焗忌廉三文魚批 $98
最後上埋兩個主菜:三文魚批、烤豬肋骨。依個三文魚批都幾特別,有別一般以麵粉做嘅餡批或以蛋漿做嘅蛋批,改以酥皮焗嚟做,無咁重份量。以酥皮做批身,內裡加入咗忌廉汁、三文魚粒、蜆肉粒、磨菇碎,其實份量就唔算多,味道都OK,不妨一試,配菜仲有沙律菜同薯條,4個人分享一客我認為最好。
德州醬烤豬肋骨 $138
哩道菜係小弟是晚推介,只係賣$138,豬肋骨足有一呎多長,大大件好有睇頭,重量當然要重質先值得推介啦。燒好嘅肋骨外貌色澤已叫人覺得對辦,醬汁微酸帶甜,惹味香濃;難得係肉質烤得鬆化,又夠晒入味,真係想番起晌Ruby同Outback食嘅燒肋骨呀!
鐵板冰火朱古力心太軟 $68
店家極力推薦嘅甜品,亦見佢枱上個揭頁掛牌都特別介紹。心太軟、杏仁雪糕、鮮忌廉一層疊一層,放晌個圓形小鐵板度上枱,初時以為就係咁,原來侍應再會淋下朱古力漿,頃刻「咋咋聲」好似鐵板燒咁,幾過癮,跟住侍應叮囑盡快食,因為啲熱氣好快令啲雪糕同忌廉溶化,冰火效果就打晒折扣。為咗影吓個「流心」情況,真係搞耐咗,個雪糕同忌廉都溶溶哋,不過有啲失望,因為一啲流心都無,只係「軟心」,應該少少焗過籠,還好嘅係個蛋糕朱古力味香濃,蘸埋微暖嘅朱古力漿、雪糕同忌廉一啖過咁食,Yummy,爽!小弟有個奇想,為貫徹「冰火」,大廚不如試吓淋完朱古力,再淋少少白蘭地,跟住點火,嚟一個升級版,可能極盡視覺效果呀。
酥皮蘋果批配雪糕 $58
逢係批嘅食品大廚都鍾意搞少少破格嘢,依個蘋果批又係棄用麵粉餡批皮而改用酥皮,我估都係因為用現成酥皮比以自己搓批皮較合符經濟效益。形式較為似班戟,賣相都幾靚,灑上糖霜,劃上朱古力漿,伴有一球雲喱拿曲奇雪糕同鮮忌廉,內裡裝有好多煮過嘅蘋果肉同提子乾,係肉桂味稍欠奉,否則就更高分。
散叫以外,套餐一定唔少得,店家提供二人或四人晚餐,前者前菜4揀2,主菜又係4揀2,包餐湯、甜品、餐飲,賣$298 + 10%;後者就前菜6揀3,主菜又係6揀3,包餐湯、甜品、餐飲,賣$598 + 10%。算小弟係算死草一名,我比較過兩者,前菜、主菜大同小異,咁梗係叫兩個二人餐抵過四人餐啦,合計平$2仲要多一個前菜同主菜喎!哈哈!
事後先知原來9:30pm後嚟,嘢飲半價,餐牌內所有嘢食七折,真係有機會同班老死落嚟吹吓水,飲吓嘢食吓小食都好丫!
|
|
|
古法烘焙 Gu Fah Bakery |
標題 : 脆口窩心斑點雞蛋仔 |
地址 : 荃灣楊屋道1號荃新天地G31號舖 |
地區 : 荃灣 |
|
現時分數:
|
日期 : 2012-07-31 14:53:48
西鐵係小弟常搭嘅交通工具,而荃灣亦係小弟常到之地,所以經常都會由荃灣西站行天橋經過荃新天地,故此,「古法烘焙」依間小店都有留意到,主因係「烘焙」二字,多數跟做麵包有關,鍾意食麵包嘅我就稍加留意,久唔久經過都見有一大堆人排晒晌門口,啊!原來係賣雞蛋仔。初時都未有幫襯之意,但睇過好幾位殿堂、資深食家嘅食評,近期又從啲飲食雜誌睇過相關介紹,就更加想一試。
對於搵咗大坑雞蛋仔伯伯吳師傅、鯉魚門鳳香園黎老闆做顧問,又以做法式薄餅加啤酒嘅秘技融入整雞蛋仔當中,老闆Eric佢自己仲晌網上公開做雞蛋仔嘅方程式及心得……此等種種已經好有話題性。因為之前好幾個食評都有講依啲嘢,所以小弟都唔多累贅重提。
雞蛋仔
除了原味($13),仲有朱古力夾心($17)、肉桂提子夾心($17)、花生醬夾心($20)同薄荷夾心($20)幾隻口味。可以任揀兩款味道嚟雙拼,以較貴嘅口味計價,所以如果有得兩三個人一齊嚟,最化算係叫兩底,一底朱古力拼肉桂提子,另一底花生拼薄荷啦。
因為嚟到都望咗一輪佢啲產品,又跟店主Eric問吓佢整雞蛋仔啲嘢,大家都傾得幾投契,佢仲話遲啲出隻海鹽焦糖味(好期待,因為焦糖係小弟至愛),又話如萬聖節考慮出隻「期間限定」嘅香橙朱古力夾心味,聖誕節或者出款紅莓味,咁小弟都膽粗粗俾個提議佢,農曆新年就出隻椰汁年糕味啦,真係用椰汁年糕切細細粒嚟整喎,哈哈,唔知味道同口感係點呢!
可能佢見都啱傾,又見我對啲味道嘢好好奇,所以破天荒整咗一底4式嘅俾我,佢話因為依家客多,雞蛋仔又係即叫即做,所以4式嘅話應付唔徹。咁真係多謝晒Eric先,落單後都真係要等大概15分鐘,幸好荃新天地夠大,打個圈睇吓嘢都好快過咗15分鐘。
手上接過熱辣辣嘅雞蛋仔,好期待味道會係點?依家出面好多雞蛋仔都以做到內裡中空、既薄身且脆口為主流,而「古法烘焙」既以「古法」自居,雖然唔係用碳爐,但以舊式做法,做到外層脆口,內層鬆軟如蛋糕仔。雞蛋仔嘅呎吋比出面常見嘅會細粒啲啲,相對地連住雞蛋仔嘅「蛋邊」就多好多,依啲蛋邊烘得好香脆,食到咯咯聲,好似威化餅;而雞蛋仔內裡填滿蛋漿,咬落就好似食緊一小粒一小粒蛋糕仔咁,鬆軟彈牙,而外層帶微脆,果真外脆內軟,讚!店員叮囑盡快食,因為依個做法有個弊端,就係「蛋糕仔」內心水氣較重,水氣慢慢滲出就會令外層變腍無咁脆,Eric教我,如果真係拎番去食,可以搵啲焗爐仔190℃火烘番兩三分鐘,咁我同老婆就梗係晌店外速速幹掉佢啦。因為雞蛋仔真材實料,雖然由於成本不斷上漲,Eric話以前用澳洲蛋,依家改用咗泰國蛋,但小弟覺得蛋香依然,而味道方面,唔係靠色素增味劑整落啲蛋漿度整色整水,而係以味道原粒放晌雞蛋仔內,所以令表面呈現點點又綠又黑……嘅斑點。我就最鍾意肉桂提子,因為小弟係蘋果批粉絲嘛,未食都聞到朕肉桂香;朱古力味則好香濃,因為朱古力落得一啲無手緊,所以食到滿口可可香味;反而花生醬好似平淡咗少少,其實花生醬同雞蛋仔味道都夾,花生都濃郁,只係無咩帶嚟驚喜啫;最有驚喜莫過於薄荷,來自比利時嘅薄荷粒,老婆一向都唔多鍾意薄荷味,成日覺得好似樟腦咁,不過今次佢話有少少改觀喎,可能天口熱,薄荷味透心涼,加上雞蛋仔新鮮熱辣出爐,食落有種冰火感覺,真係估唔好薄荷同雞蛋仔都可以做朋友!所以你話賣到成廿蚊一底抵唔抵,食功夫,食心思,我就覺得值喇!題外話,啲店員全部都係後生仔女,有禮貌又殷勤,我好奇想睇吓啲味道原粒,佢哋又唔介意俾我睇喎,連影相都得,真係對自家出品嘅信心表現。
杏仁批
店員話依款杏仁批經常斷貨,咁今日小弟又真係幾有食神,因為見店員晌鋪面外,將一分為二嘅杏仁批免費派發給公眾試食,雖然只係試咗半條,口感超鬆脆,7層如拿破崙嘅酥皮,加一層蛋白脆糖,放上數片杏仁晌面,確係心機之作。一盒有12條,條條獨立包裝,大可買盒慢慢食,係怕自己忍唔住口一鋪清啫!
鳳梨酥
依日另一款店員免費派發嘅試食產品,Eric話係誠意推介,因為不單減低糖份,食落唔會過甜,而且冬瓜蓉做得軟糯細緻。大貪少少試咗半件,果然比起經常食到嘅鳳梨酥甜度降低咗好多,中間嘅「鳳梨」冬瓜蓉煙煙韌有咬口,當然如用上菠蘿肉做就更傳神啦。
骨子整潔嘅小店,仲有多款產品,如:唔同味道嘅雞蛋卷、鳳凰卷、曲奇餅、老婆餅、老公餅、合核酥、杏仁餅、芝麻酥、牛油楓葉批……等等,咁送禮又多個選擇啦!
|
|
|
Cafe de New Age |
標題 : DNA新寫法 |
地址 : 尖沙咀漆咸道南61-65號DNA Galleria 3樓312-315號鋪 |
地區 : 尖沙咀 |
|
現時分數:
|
日期 : 2012-07-27 14:42:52
其實小弟一向無咩要「第一時間要去試新店」嘅習慣,只係偶然晌團購見到依間新餐廳,打著旗號:$29嘆尖沙咀法式午餐,心裡其實已預先打定個折扣,唔好抱太多期望,重點係店舖晌尖沙咀近漆咸道南一個新潮點商場DNA,好近老婆教會尖沙咀嘅總堂,每個月第一主日都要出出嚟返集合主日,$29好醜試試損失都唔慌大啦!
團購個賣點:餐湯、主菜、飲品,已包加一(原價$58),餐廳內無限 Wi-Fi,星期一至日、公眾假期都用得,只係要1:00pm後,OK喎,我哋返完第三堂都成1:30pm,時間啱啱好啦。趁著個星期日,試試依間新開嘅寫意法式餐廳。
餐廳晌商場三樓,唔難搵,因為由地下搭扶手電梯開始,地下已一直有指示點去。佢係全個商場唯一一間食肆,位處角落,頗為清靜,整間餐廳採半開放式,一眼就睇得晒個內籠,木地板、木椅、小圓木枱,一室棕啡色,感覺幾舒適,當然靠牆幾組皮椅係最舒服嘅選擇。門口放置嘅餅櫃,一共有8款凍餅,雖然款式唔算好特別,但睇落都唔失禮,每件標價$28。
表明來意係團購客,即送上指定午餐餐牌,主菜共有4款:香草忌廉汁海蝦天使麵、墨西哥德國腸扁意粉、日式鰻魚汁煙鴨胸闊條麵、蒜香辣椒炒雞肉扁意粉;睇勻4款主菜,都好難跟「法式」兩個字有任何聯想。反而餐飲有啲心思,除熱啡,仲有多款花茶及果汁,不過溫馨提示一句,係無檸茶檸水供應,依個都係隔離枱有人點先知。
粟米忌廉湯
雖然係其貌不揚,但質素比預期好,以為例湯會馬虎啲,點知食出點點誠意。忌廉湯打得非常幼滑,粟米跟忌廉味道頗為平衡,加咗少少香草,令味道多元化咗。如果配多一小件法包,感覺就更好!
未講主菜,想講講啲器皿,好有一種錯配嘅感覺。餐湯湯碗好大,裝半碗湯其實份量正常,但睇落好似好少咁。相反,主菜隻碟好細,好似有啲茶餐廳嘅下午茶餐咁,收平啲但轉咗細碟,拎到嚟俾人感覺份量好似唔多。查實,碟頭稍為偏細,女孩子食就絕無問題,男生可能有機會唔夠食。
墨西哥德國腸扁意粉
以墨西哥汁為醬汁底,酸酸辣辣幾醒胃;配以德國腸,詢問之下係普通嘅德國熱狗腸,但質素唔差,香腸份量亦唔少;只係扁意粉煮得有些微未夠透,意粉心有啲啲硬。
香草忌廉汁海蝦天使麵
我老婆好讚個天使麵,因為啲麵煮得恰到好處,忌廉汁夠香又夠奶味,真係柔滑如絲都未為過,有點點香草,有畫龍點睛之效。而海蝦較細隻,口感又比較實肉,總之一分錢就一分貨架喇!
熱花茶
老婆揀咗紅莓熱花茶,花茶採用英國老牌子Ridgways of London,色澤好似利賓納咁,味道較淡,紅莓味唔算好突出,或許係我哋唔曉欣賞。相反,要欣賞係佢哋嘅茶杯,印上咗自家店名及算係餐廳標誌嘅小白花。
即磨咖啡
本來想揀洋甘菊,可惜無,改要即磨咖啡,咖啡用澳洲著名品牌Danes Coffee,小弟對咖啡無咩研究,品牌嘅嘢都係人講我又吹吓啫,哈哈。不過,杯咖啡真係幾芳香,同埋啲細節位睇出店主對咖啡都抱有誠意,就如牛奶以小壺仔盛載,摸上手非常熱,仲帶少少泡,係打過嘅牛奶。加咗牛奶之彼嘅即磨咖啡,確係香濃馥郁。
本來打算試吓佢啲凍餅,問跟餐會唔會平啲,點知係無嘅,要食就要俾正價$28。所以,就不如等下次再經過,嚟食個cake set仲划算吧。因為佢個cake set一件凍餅加一杯$22飲品,只係賣$32,真係食件餅嘆杯即磨咖啡hea吓仲抵。
作為一頓午餐,我倆都覺得唔錯,當然講話法式,就言過其實喇。午餐標價亦有少許貴,不過店主都知未有名氣,又唔係大街地鋪,吸引力稍欠,所以除咗以團購作為短期宣傳手法之一,亦有派啲七折卡,都係短期有效,希望小店繼續努力,做出成績。
題外話講講,DNA折散成為好多鋪頭仔,都幾多特色、有個性嘅嘢賣,食完我哋都行咗一陣,經個一間叫JR嘅小鋪(2樓210A鋪),專賣一啲擺設精品,晌鋪放咗好多茶杯,精緻得嚟好有趣味。同個店員傾開,佢話係老闊周遊列國時搜羅返嚟,而個店員小姐招呼周周,有問必答,又唔介意俾我影相,所以借依度小小版位提提依間鋪,啲茶杯幾值得當生日禮物送俾老友!(申報利益先,小弟跟此店絕無任何關係,只係偶然睇到,覺得有趣跟大家分享下,嘻嘻!)
|
|
|
海皇粥店
|
標題 : 富貴版艇仔粥 |
地址 : 美孚美孚新村蘭秀道28B地下43號舖 |
地區 : 美孚 |
|
現時分數:
|
日期 : 2012-07-26 12:34:27
晌美孚真係無乜粥檔,以前有間「好滿粥」,不過年多兩年前執咗,後尾大半年前多番間「味味佳粥麵店」,兩間嘢都係買啲貴價生滾粥。反而小弟去得多係地鐵站口嘅海皇,今晚又嚟食,事緣老婆有活動,自己抱病在身,食粥都係個上佳選擇。可能依區競爭細啦,依間海皇經常都坐滿人。
本來都係食碗皮蛋瘦就算,點知見佢有款艇皇粥$24,好似幾勁咁,係艇仔粥嘅富貴版,又另送半份油炸鬼,所以就改咗叫艇皇粥。
艇皇粥
海皇嘅粥一向都大大碗,而依碗艇皇粥用料又幾豐富,有鮮蝦、魚片、滑牛、魷魚、炸魚皮、豬皮……,用料不賴,一啲都無欺場,加上粥底綿香,清埋半份油炸鬼,飽晒!係時候又要食葯,跟住返屋企大覺瞓 zzzzz!
|
|
|
Delicieux Bistro (已結業) |
標題 : 法茅後巷尋覓 |
地址 : 中環嘉咸街41-43地下B舖 |
地區 : 中環 |
|
現時分數:
|
日期 : 2012-07-24 15:20:05
早前Ivan兄搵咗我去Café CAPs食晏,依回輪到小弟益番佢,搵佢去Delicieux Bistro食越式法包。我哋都係晌中上環返工,所以嚟位處嘉咸街大斜路頂頂嘅Delicieux Bistro無乜難度,記得第一次食越式法包就係大角咀添記,買咗晌附近公園仔食,今次晌Delicieux當然唔使踎公園仔啦!
店鋪面門細細,但入內發覺個鋪位幾深,原來仲有個「後花園」,其實係個疑似後巷位,半露天,放有幾張枱仔,不過就無乜裝飾過,如果稍為修飾一下個環境,感覺唔會似後巷,真係可以變成個小花園哩!因為人多嘅時候店內都比較嘈,加上今日天氣都有啲清爽,所以都揀坐出嚟,日日晌寫字樓都吸夠冷氣啦。
店小主打售賣越式法包,但亦有提供少少越式小食,前者賣$40-$42一份,而後者則賣$28一份。再配一杯飲品,無論普通飲品或越式特飲,都咪話唔平,好彩店家提供幾款套餐組合,大大減省荷包負擔,好似越式套餐,就係任何法包加任何飲品只售$48(特飲另加$5),而特式套餐就係額外多半份越式小食,賣$58,仲有早餐、下午茶餐可揀,真係咩時間嚟食都得!
藉團購關係,今餐可以以$29食到佢個特式套餐,即係一款法包 + 半份越式小食 + 一杯普通飲品,雖然法包方面限於指定嘅4款,但係4款裡面都有啱我哋嘅口味;而小食可以揀不同口味嘅水晶卷。
水晶香茅豬肉卷、水晶蝦卷
米紙外皮令春卷睇得通透,故名水晶卷。擺設得幾精緻,每條春卷橫刀一切一開二而直立,唔單只睇出有咩餡料,食材誘出嘅色澤又白又紅又綠,添加賣相嘅可觀性。
米紙內包著有生菜、蘿蔔絲、米粉、香茅豬肉或蝦肉,灑少少花生碎同魚乾碎,佐以海鮮醬,食落感覺很清新,尤其蘿蔔絲下咗點點魚露醃製,多添一份鹹香。而香茅豬肉令水晶卷味道多份層次,相反,蝦肉嘅則令水晶卷口感更清爽,所以兩者都各有特色!
香茅牛肉法包
指定嘅4款選擇包括招牌肉丸包、香茅豆腐香菇包、香茅雞肉法包、香茅牛肉法包,可以話雞牛豬素樣樣有啲。據介紹,店內麵包原來採用La Rose Noise嘅法包,而基本上嘅法包係以原味嚟製作,但亦可加$4改用有機燕麥法包、乾番茄班尼里、香草班尼里。
每份6吋長嘅法包都會一開二,法包都係烘過晒再塞入各種食材,咬過包面好鬆脆。香茅牛肉塞晒入內籠,跟手面面就放有好多蘿蔔絲同青瓜絲,加幾片芫茜,再撤啲花生碎,故此口感豐富多元化,自家醃製過嘅蘿蔔絲同青瓜絲都好好味,而且香茅牛肉亦都做得入味軟腍,真係幾正!
香茅豆腐香菇法包
全店有兩款全素包款,依個係其中一個款式。跟上面所講嘅香茅牛肉法包差唔多,只係牛肉換來豆腐香菇,豆腐係用咗豆腐乾切條,而香菇係啲雜菇,不過就加咗較大量嘅芫茜,如果唔鍾意芫茜嘅人就唔好叫依款喇。雖然豆腐係清淡之物,但配以濃味嘅香菇同芫茜,加埋香茅醬汁,味道又幾特別,一啲都唔「寡」。
熱香茅薄荷特飲
嚟到無理由仲飲檸茶檸水架,所以揀咗一杯熱香茅薄荷特飲嚟試試。可以話係一杯香茅茶加一片鮮薄荷葉,香茅味道唔會好濃,薄荷葉帶出幽幽薄荷香,兩者都幾夾幾平衡,飲落都幾舒服,秋冬天飲一定更正!如果你對香茅、薄荷嘅味道都OK,依個特飲值得一試!
雖然食物未有帶來好大驚喜,但水準唔錯,食物質素幾高,唯獨招呼麻麻,尤其我哋坐在後花園,有少少叫天不應叫地不聞,有咩需要只好走入鋪內搵人幫幫。 |
|
|
唯一麵家
|
標題 : 間場想食就食 |
地址 : 尖沙咀厚福街10號地下 |
地區 : 尖沙咀 |
|
現時分數:
|
日期 : 2012-07-19 00:02:06
出開尖沙咀教會聚會,想食得快手又有水準,非唯一「飯堂」莫屬,所以,我哋偶有幫襯,食咗咁多年,水準依然。雖然店內環境勁擠迫,少少地踎,但大有捧場客,經常堆滿人,依家唔只本地客,仲多咗啲遊客,想必旅遊書亦作出唔少嘅介紹。
因為依餐唔係正餐,當係下午茶啦,所以叫嘅嘢唔多,就只有淨水餃雲吞同蔥油餅咁大把!
淨水餃雲吞 $25
賣$25一客嘅淨水餃雲吞,其實份量唔多,水餃、雲吞各得3粒,不過比廣東式嘅就大隻好多,睇外觀都係只有少許分別,前者包得較長形平身,後者則圓啲拱啲。由於係上海做法,唔似廣東式用來貨薄薄嘅雲吞皮,而係自家麵粉搓成嘅外皮,食落厚身有質感。而兩者味道都有水準,水餃以豬肉同韭菜做餡,豬肉調味偏濃,重醬油味,刴得細緻有咬口;至於雲吞就用豬肉配白菜,調味亦無咁重手,個人偏愛水餃多啲!
蔥油餅 $8
我覺得北京餡餅係「唯一」嘅名物,不過次次都係食佢,有啲偏心,所以今次改咗叫蔥油餅。蔥油餅稱得上上海傳統小食,製作簡單,粉漿加上香蔥,香煎就係喇,晌依度仲係即叫即煎,熱辣新鮮度唔使多講,不過,下次都係叫返北京餡餅好啲,因為今次個蔥油餅好少蔥,似係淨食一舊粉糰,唔夠香咯!
|
|
|
大丸迴轉壽司
|
標題 : 回魂乏力 |
地址 : 深水埗元州街18G號富匯居1樓 |
地區 : 深水埗 |
|
現時分數:
|
日期 : 2012-07-18 16:20:27
又係久唔久搵表姪女食晏嘅日子,聽佢阿媽講,即係我表嫂,話佢近排好似乖咗,不過啲懶嘢仲時不時有,唉,依家啲細路真難教!
表姪女係壽司迷,不過佢阿媽唔係好俾佢食啲生嘅壽司,怕唔安全,所以查實佢食壽司嘅選擇唔多,但因為食壽司(尤其迴轉位)佢可以自己揀,所以佢咪鍾意囉,小朋友有時就係咁,有時鍾意一樣嘢原因未必係佢好好,只係因為有自主權。既然食壽司,就番佢哋一家,去返同區嘅「大丸」。
跟上次一樣,當然坐迴轉位,全程表姪女想食乜就拎乜,但係晌迴轉帶出嘅壽司比上次少咗,仲要嚟嚟去去都係嗰幾款,侍應解釋:有時客唔多,就唔會擺太多壽司晌上面,為盡量保持鮮度,建議客人剔紙仔點壽司。哩個任務就俾咗阿表姪女身上,等佢都叫有得自己揀吓,以下就細說當日食咗乜。
加州卷 $20
第一碟上嘅就係依個卷物,賣相認真唔得,首先係包得鬆散,中間嘅材料無緊貼晌米飯之中,而米飯部份又邊厚邊薄,材料除青瓜、蟹柳、雞蛋,亦唔見有牛油果;最「揦西」係反卷嘅外層沾蟹籽同唧沙律醬,絕對係馬虎之作。味道?普通囉!
玉子壽司 $10
表姪女必食之選,因為安全指數係100。玉子煎得一般,蛋面斷斷裂裂影響賣相,幸好幾有蛋味,而飯粒黏糯唔死實。
蟹柳壽司 $10
蟹柳唔錯喎,比起超市一大排嗰啲蟹柳好食好多。
火炙三文魚壽司 $16
幾款壽司中,以依個火炙做得最好,三文魚滿有油香,火炙後嘅帶點點焦香,而且外觀層次感突出咗,因為係生魚,就只係我同表哥可以享受到。
味附螺肉軍艦 $15
大大粒螺肉鋪滿軍艦之上,螺肉煙韌帶微辣,始終唔鍾意螺肉成日跟住「杯撻撻」嘅鼻涕醬。
蟹籽沙律腐皮壽司 $18
小弟覺得佢幾特別,蟹籽沙律幾清新,腐皮作底包著壽司飯,口感特別,又唔怕夾起時啲飯會散晒,兩口一件就搞掂。
煙鴨胸手卷 $10
係表姪女同表嫂共享之物,無試,所以不便評論。只係以$10咁嘅價錢,有幾舊煙鴨胸,配裝滿飯嘅手卷,都抵食嘅。
蟹籽手卷 $15
唔好見以為好多蟹籽,其實都係得面面一朕,還好係蟹籽唔腥,紫菜又夠脆。
日式叉燒拉麵 $42
拉麵口感算係幾彈牙,但份量偏少,跟四小片叉燒,附有粟米、紫菜、鳴門卷。叉燒有別常見嘅捲形,表哥一家話鍾意佢唔肥,亦都幾入味。唯一可惜係個湯底,唔濃郁,很稀身,只係一般般!
日式鰻魚炒飯 $58
個炒飯唔單只以有鰻魚粒,仲加咗啲鰻魚汁嚟炒,飯粒炒得「勻巡」又分明,所以食起嚟幾爽,而且頗為惹味,算今趟嘅驚喜!
大丸作為地區街坊小店,食物質素還可以,但整體感覺已經無最初咁好;雖然個女經理都好好招呼,服務有禮,不過相比起一啲大連鎖壽司店、拉麵專門店,就真係比下去喇!最近經過,都見佢開始做放題,似乎希望藉放題挽回一下個勢。不過,晌其他網站睇番其他食家對佢放題嘅評語,絕對係做壞自己個名囉!既然想將價就貨,奉勸佢都係無謂做喇,啲客試得你一次,無回頭啦。仲咁搞,真係走唔落去。
|
|
|
德藝會 Telford Recreation Club |
標題 : 清新粵菜迎初夏 |
地址 : 九龍灣德福花園P13-14號 |
地區 : 九龍灣 |
|
現時分數:
|
日期 : 2012-07-17 13:41:16
依家算係西九人,東九龍真係好少嚟,飲食足跡晌依頭都無乜幾多個腳印。今晚有幸獲邀出席是次以「夏至.清新粵菜經典」為題嘅星級試食會,多謝邀請方及德藝會,等小弟可品嚐多道清新新派粵菜。
「德藝會」,名字比較陌生,原來係港鐵上蓋嘅私人休閒會所,初到門口,真係睇唔出裡面有間咁大、裝修咁瑰麗高雅嘅中菜館。整個大堂一睇就知以擺婚宴做賣點,25呎超高樓底,無柱宴會廳、巨型水晶燈,童話式南瓜車,高架小舞台,回旋雲石長梯,都算氣派不凡,絕對係擺婚宴佳點。不過,唔知晚飯價位如何,因為整晚所見,頭尾都係兩枱散客,感覺顯得頗為冷清,再者,德福選擇多的是,生客更加唔會識入嚟幫(雖然無入會都可以嚟嘆茶、食飯)。
除咗環境好之外,服務亦都值得一讚,服務員細意殷勤,時刻保持笑容。整晚每道菜都先俾我哋影影相(可能已經成為香港食肆嘅奇景,餸菜一上枱啲客企晒起身猛影相,哈哈),之後再為我哋分好後才再送上。但係,不知何解,今晚係以龜速上菜,每道菜都相隔近乎十多廿分鐘,雖然唔係急住走,但令人食得有種「斷橛禾蟲」嘅感覺,唔夠一氣呵成咁囉!所以,後尾大廚李師傅問大家係咪好趕時間,真係有啲搭唔上咀,做慣酒席菜應該乒乒澎澎架嘛,真係費解呀!
環境同服務講過,輪都輪到講飲飲食食。德藝會傳統或創意粵菜都有做,今晚大廚都係想晌夏天以清新為出發點,精心炮製咗8道菜,食材都係酒席常見用料,如海參、花膠、鮑魚、魚翅、石斑……等等,但就想用較新派手法去演繹。結果係點?下面繼續睇片……
香芒沙律船
如果講食材,依道沙律故然係普通咗啲,生果沙律鋪上兩塊芒果,旁邊再跟埋火龍果同蟹籽。不過,講賣相又幾有趣,個沙律加咗粒士多啤梨同兩粒藍莓,變咗好似眼同鼻咁,成隻反肚蟲蟲咁,蟹籽就變咗佢啲卵。作為頭盤,清新有餘,香甜不足,因為芒果未熟透,我所食嘅兩片都係酸嘅,而火龍果一向都係好睇唔好食,因為火龍果嘅甜味好快散,只有晌產地即食先食到上佳嘅貨色。不過,大廚後來都有解釋,點解將蟹籽分開擺,原來為咗方便一啲唔鍾意食蟹籽嘅人,果然細心呀!
燒汁海參條
賣相好家常,但香與味就一流,一上枱真係香氣四溢,個個食家聞到都話好香。以燒汁爆炒海參條、蓮藕條、蜜糖豆、茄瓜條,再配埋黃椒、紅椒,撤把芝麻。因為個燒汁調得好,非常惹味,尤其用晌海參依類本身無乜味嘅食材。而加咗蓮藕條、蜜糖豆、黃椒、紅椒,令口感多添幾分爽脆,係今晚其中一款我幾鍾意嘅菜式。不過,海參條同茄瓜條外觀好相似,服務員分餸時都難以辨認,所以有食家大嘆無乜海參嘅!
消暑佛跳牆
係今晚一大亮點,因為據介紹:「保留傳統佛跳牆嘅矜貴食材,加入清潤嘅竹蔗、茅根、馬蹄,燉足4.5小時,令魚翅、海參、花膠、響螺嘅精華完全溶入湯中,味道清甜,是夏日消暑佳品。」,你話係咪好令人期待呢?一大窩送到眾人眼前,先驗明正身,真係睇得出用料十足,豐富得很,無論海參、花膠、響螺,都切得大大件,一啲都無手緊,反而魚翅比較細且少,其實無仲好啦,因為睇過啲獵鯊取翅嘅紀錄片都覺得幾殘忍,所以,依家自己都唔會主動叫魚翅食。服務員隨後還放上剩餘湯渣,正當我哋一眾疑惑唔通花膠、海參……仲未分晒?原來係其他湯料,包括老雞、冬菇、瘦肉……等等,怪不之得湯頭清潤之餘,又咁夠味啦,不愧是晚亮點!查實連湯渣嘅冬菇同雞肉都唔錯,尤其前者,好有肉地。唯一要挑剔係「分贓」唔勻,有啲食家分多啲,有啲就分少咗,可能無咗魚翅,可能無咗響螺咁囉,哈哈!
嫣紅脆石斑
以原條石斑起骨脆炸,伴以士多啤梨醬同食,不過上枱個「版本」賣相嫣紅換來有啲「血腥感」,而且士多啤梨醬只係底下嫣紅一抹,原來晌分碟再上之後,每客石斑跟一小杯士多啤梨醬先係真身,位上賣相順眼好多。事後亦都向太廚查問過,佢話平時散叫都係逐位上,好少一大碟咁上枱。講番道菜個味道,石班肉頗鮮嫩,脆漿口感比平時食到嘅輕盈啲,伴酸甜開胃嘅士多啤梨醬,幾啱夏天食,但係有食家話似果醬,搽麵包都得,但小弟覺得又未至於去到果醬咁杰身,不過就偏甜。平時斑塊配沙律醬就食得多,今次配上士多啤梨醬,又幾有特色。
西紅柿焗原隻鮑魚
原個大蕃茄,掏空再配上鮮鮑,釀滿牛油果、洋蔥粒、西芹粒,加點點芝士輕焗,伴以露筍仔,紅紅綠綠,賣相幾賞心悅目。大廚提到蕃茄係澳洲有機貨,而鮑魚係澳洲種嘅原隻鮮鮑(唔一定係來自澳洲),而調配嘅醬汁加咗白酒。食落,細細隻嘅鮮鮑魚仔未至好韌,但唔係食溏心嗰種口感,更唔會有咩啜刀效果,係一種爽而煙韌嘅感覺,但伴已混有芝士、牛油果、洋蔥粒嘅醬汁同食,味道係唔錯。以一道熱盤而言,蕃茄比較生,再焗軟少少更啱我口味。
冬林百籽蝦
講賣相,真係幾有種透心涼嘅感覺,隻蝦好似瞓晌張浮床度咁,可惜佢被人清蒸咗。清雞湯煨煮過嘅冬瓜,甚為腍身,而且幾入味,加幾粒夜香花點綴一下個清湯;而海中蝦「屈」成鳳尾,加上蟹籽作裝飾,幾鮮明突出,蝦肉蒸得幾爽口,只係蝦隻偏細,變得肉少,蝦頭瘀黑,外觀要扣分!後來跟大廚傾開,以為依個係新派菜,原來唔係,佢話係古老嘢,以前啲人興將啲海中蝦排成扇形,仲話道菜有百子千孫嘅喻意!唔怪得依家無啦,養一個都要成4百萬喎!
西施海皇泡飯
個泡飯玩「大廚出馬」,由李師傅即席表演,先嚟材料晒冷介紹,跟手起火將砂窩嘅雞湯煮滾,然後加入白飯、蝦仁、帶子、小棠菜粒,再滾起之祭,最後倒入以200度高溫熱油炸熟嘅炸米粒,嘩,「咋咋聲」幾過癮,一陣香氣四噴!分小碗時,加埋啲蔥粒、芝麻粒提升香味,而個湯底原來本身已加有冬菇粒、大頭菜粒,所以整體嚟講,個泡飯口感豐富,飯粒飽吸雞湯精華,蝦仁帶子味鮮。故此,在座好多食家都評佢為是晚最愛,包括小弟,誠意推介之作。
燒焗椰皇蛋白
依款糖水唔算多食,以前都係晌大角咀嘅豬仔記食過,但就好滋味,今晚再重遇,自然可以再回味。椰皇注上以鮮奶、蛋白混和嘅材料漿,原個燒焗,有別出面,就係加多一層酥皮,唔講以為上錯酥皮湯。老實講,作為結尾甜品,加咗酥皮變得太重身,不過,今晚餸菜份量有啲偏少,食咗頭6道菜感覺都係半飽,去埋個泡飯,加埋依個酥皮先係啱啱好。我當塊酥皮係副產品,所以不多講。但鮮奶蛋白焗得嫩滑,「sir」一聲就滑過喉嚨不留痕,奶味濃郁,而且甜度啱啱好。最可惜係無附上小鐵匙,未能盡興刮晒啲椰皇肉嚟食!因為椰皇啲肉本身幾軟腍,唔難刮,跟鮮奶蛋白焗過會帶有少許奶香,幾好食架!
今晚部份菜式都幾特別,亦見花咗唔少心思,營造酒店級嘅體驗,環境同服務都好好;只係有啲菜式跟期望有較大落差,而且份量稍為偏少,仲有係等上菜等得有啲納悶,否則,會更加盡興。 |
|
|
甜甜地甜品屋 Tian Tian Di Dessert House |
標題 : 漆黑明光一點甜 |
地址 : 深水埗福華街120號 |
地區 : 深水埗 |
|
現時分數:
|
日期 : 2012-07-16 14:09:23
同一班老死食完飯,成十一點幾,意猶未盡,就再落去深水埗食糖水當宵夜。先去綠林,門口已堆咗好多人,有排等,大家一致決定放棄;過咗去糖水佬睇睇咩景,店員完全無視我哋嘅存在,同幾個店員講都無一個理過我哋,真係把幾火。諗住散水行去搭地鐵,點知晌福華街街口見到有間甜品店個燈箱,望入去近乎漆黑嘅福華街,一眼就望到近街中燈火通明嘅「甜甜地」,其實依度客都唔少,未至於爆,但最重要係有人理我哋丫嘛。
我哋一大棚有成12人,坐埋一齊要稍等,決定分枱坐因為費事等。同枱老細叫咗香滑蛋白燉鮮奶、芝麻糊加湯圓,而小弟揀咗芒果撈河,因為個「河粉」都幾蝦人整架。
香滑蛋白燉鮮奶 $16(熱 / 凍)
朋友嘅簡單評語就係:個燉鮮奶做得幾好,奶味幾濃,口感嫩滑。
芝麻糊加湯圓 $13 + $6
另一個朋友更讚依個芝麻糊加湯圓抵食,首先生磨芝麻糊做得夠香夠滑,又有光澤,唔會太杰,更抵係加$6有成4粒湯圓咁多,湯圓質素又唔差咁先正嘛!
芒果撈河 $20
小弟個撈河又如何?總算無失望,不愧為店方嘅精選。首先賣相幾吸引,「河粉」皎白似模似樣,伴以5件芒果肉,淋上芒果汁,灑上白芝麻,絕對唔馬虎。椰汁河粉厚薄適中,拮起都唔易斷,雖則椰汁味自覺未夠突出,不過沾滿芒果汁嘅河粉不失美味。芒果肉切得大件,當然係另一亮點,晌深水埗哩個甜品、糖水鋪競爭激烈嘅市場,唔夠名氣嘅,多少要靠抵食招徠。
值得繼續支持嘅小店,請加油!
|
|
|
Grove Sandwiches |
標題 : 再嚐甜頭 |
地址 : 上環永樂街50號昌盛大廈地下 (近上環地鐡 A2出口) |
地區 : 上環 |
|
現時分數:
|
日期 : 2012-07-13 11:25:03
之前曾經買過Grove嘅團購,已試過佢嘅質素,知道佢哋唔會將貨就價,用料認真,所以今回再見佢出團購,唔使左度右度,絕無懸念,快快手又買兩張嚟睇門口先啦。
搵咗個星期六收工後嘅晏晝,拉埋同事一齊嚟食晏。始終好嘢人人爭,所以嚟到都見幾多人,大部份都係手執團購券嘅客仔。
團購內容係三文治搭沙律杯加餐飲,或者就係自選意粉加餐飲。我就選前者,鍾意食麵包,又有杯沙律添;同事就要意粉,佢喜歡濕潤啲嘅嘢食。
燒牛肉蜜糖芥末三文治 + 蛋沙律 + Mövenpick即磨咖啡
三文治嘅選擇,無上次團購咁多,上次係5揀1,今就得3揀1(燒牛肉蜜糖芥末三文治、雞肉凱撒三文治、香橙醬煙鴨胸三文治),不過3款我都啱,而上次已經試過香橙醬煙鴨胸三文治,故此今勻就揀咗燒牛肉蜜糖芥末三文治,透過包裝盒已見佢塞滿餡,打開一食,餡料滿到瀉,塞滿好多燒牛肉,雖然質素唔係話特別標青,同埋比較碎濕濕,但配合埋生菜、蕃茄、蜜糖芥末醬,真係有層次,有咬口。
上次係配鮮果杯,今次就正啲,係3揀1嘅沙律杯(吞拿魚沙律、蛋沙律、新鮮水果沙律)。揀咗蛋沙律,真真正正嘅蛋沙律,係蛋 + 沙律,唔係我認知中嘅蛋沙律,即係伴以蛋黃醬嘅沙律。一整杯沙律以生果沙律為基調,再晌上面加隻一開二嘅烚蛋,沙律本身唔錯,冰涼清爽,只不過感覺係沙律還沙律,烚蛋還烚蛋咁嚟食啫!
餐飲有一般熱飲選擇,但既然有得揀Mövenpick即磨咖啡,無乜理由飲杯檸茶檸水啫?一如過往,依然係一杯有質素嘅咖啡,芳香細膩無苦澀,一頓好滿意嘅午餐。
卡邦尼煙肉意粉 + Mövenpick即磨咖啡
同事要嘅意粉又如何呢?自選意粉一樣係3揀1(卡邦尼煙肉意粉、依文士雞蘑菇扁意粉、意式雜菜千層麵),意粉以膠盒盛載,因為櫃面後就係簡便廚房,大致睇到製作過程,無論製作,抑或賣相,都睇到係快餐式水準。可能意粉賣晒,換來嘅係扁意粉,烚好嘅扁意粉放入膠盒,擺一兩粒西蘭花,淋上白汁蘑菇煙肉,就完成咗依盒卡邦尼煙肉意粉。同事話味道一般,卡邦尼汁無蛋黃味,又無芝士香,個汁真無唔多合格,只係扁意粉煮得煙韌,而煙肉大大塊又多又唔肥,算係打個和喎。
不過收得嗰$28,仲有杯咁靚嘅咖啡,都係抵嘅。或者其餘兩款意大利麵唔錯哩(同事自我安慰)!
|
|
|
文華餅店 The Mandarin Cake Shop |
標題 : 杏福丹麥酥 |
地址 : 中環干諾道中5號香港文華東方酒店M樓 |
地區 : 中環 |
|
現時分數:
|
日期 : 2012-07-12 10:03:42
為還人情債,過到嚟買凍餅作回禮,本來目的已達,不過見到餅店後面一列歐陸、法式麵包,種類繁多。雖然全部都係啲傳統嘅包款,如合桃包、牛角酥、長法包、鬆餅、丹麥酥……,但晌射燈下,個個金黃耀眼,好似揮晒手叫你買佢啦買佢啦咁,而新鮮烘焙嘅香味在餅店內遊走,令人欲欲想試。不過名牌就係名牌,價位唔會便宜。既然嚟到,既來之則安之,買個試試又何妨丫。
杏脯丹麥酥 $21
咁多款包,最終選上杏脯丹麥酥,絕對唔係隨意,原因係丹麥酥以牛油千層酥皮嚟做包,淨係功夫都比一般麵包都好幾重,而且,酥皮麵包特別有牛油鮮香,搭住蜜餞香甜嘅杏脯,夾到無朋友啦。賣相相當吸引,因為一個杏脯丹麥酥,竟然用上四件原粒大大粒嘅杏脯,色澤橙黃艷麗,包邊撒上糖霜,增加酥皮立體感。果然,文華嘅丹麥酥真係做得頗上乘,睇外觀已見酥皮一層疊一層,一口咬落鬆脆得很,又富有牛油香;而杏脯柔軟清甜,大大粒嘅杏脯令人食得好有口感、好滿足;此外,晌杏脯之下、酥皮包心之內,加咗一抹吉士,增加咗質感嘅層次外,帶著蛋香嘅吉士,既柔且滑,點到你唔覺得幸福有時就係你身旁!收咁嘅價,唔係貴,係叫值呀!簡直係抵食啦。
|
|
|
伯伯加奴 Pappagallo |
標題 : 開心兔仔迎生日 |
地址 : 觀塘觀塘道418號創紀之城五期(apm)UC-45號舖 |
地區 : 觀塘 |
|
現時分數:
|
日期 : 2012-07-11 16:36:47
同細佬、細妹做生日,都係走埋一齊晌石硤尾食餐飯就算,好少搞咁多嘢。不過,今趟細佬餐生日飯除咗過嚟美孚食之外,細妹仲搞搞新意思,預備咗個PPG嘅雪糕蛋糕添,等食完飯再嚟個雪糕做甜品。
生日飯設宴晌美孚嘅富臨皇宮,上文都講過,侍應阿姐真係好幫手,細刀唔掂就幫我哋搵把大啲嘅生果刀嚟切蛋糕,仲自動預備埋新碟、鐵叉仔,清晒張枱面放蛋糕,果然服務一流。另外,睇番個蛋糕盒,又要多讚店方一聲,除寫上枱號,仲有貴姓名,真係調亂嘅機會大大減少!
講番個雪糕蛋糕,造型極之可愛,係開心兔仔(一磅裝),原價$248.8,會員網上有85折,所以折實$211.5。雪糕味道有7款揀,本來訂咗咖啡碎朱古力,之前一日先打嚟話咖啡碎朱古力無貨,唯有改要意大利朱古力,都算大家啱食嘅。
打開個蛋糕盒,大家見到個雪糕蛋糕都嘩嘩聲,因為確實好盞鬼。面頭薄荷綠係忌廉嚟,再加啲杏仁片、藍莓粒,而蘿蔔同兔仔做得唯妙唯肖、好可愛,兩個公仔係用糖粉做,得意到唔捨得食,更加唔應該食,因為係唔好食。至於中間意大利朱古力雪糕部份,其實盒側都有介紹過食用方法,建議食前20分鐘放晌雪櫃下格解凍,不過效果唔明顯,所以初時切「蛋糕」比較硬,但攤多一陣就軟化咗好多,質感唔算特別幼滑,但味道頗為香濃,不過,就比起食酒樓嘅糖水貴好多喇。哈哈!
|
|
|
富臨漁港
|
標題 : 紅袍金衣賀生日 |
地址 : 美孚美孚新村百老匯街85號C |
地區 : 美孚 |
|
現時分數:
|
日期 : 2012-07-10 15:55:38
老友晌度食完晚飯,就贈送咗一張「紅袍金衣」贈券,因為限期要一個月內享用,老友又未有打算再幫襯,就借花敬佛醒咗俾小弟,咁啱又就快到細佬生日,一於賀佢餐生日飯移施到美孚嘅富臨皇宮,因為唔係就細佬妹,就係就我倆公婆,而且依間富臨新裝修無耐,都想睇睇佢係咩環境。
上到二樓,以前個大魚缸拆走,換咗個玻璃紅酒櫃,加上一室以白色為主調,配上水晶吊燈,比以前感覺醒神啲。食物選擇亦都多元化,先係一個圖文並茂、印刷精美嘅廚皇每月推介餐牌,有海鮮、小炒、湯水;另外一張A4紙一頁過嘅簡便餐牌,又印有數十款燒味、小食、小菜……等等;再嚟係甜品清單,估唔到甜品一環都唔弱,有成12款之多,好少酒樓晚市仲有咁多甜品揀,可惜,我哋已預備咗自攜甜品喇,留番下次先再幫襯佢啲甜品。
川貝椰皇燉鷓鴣 $88
未諗好點咩菜,阿姐已整力推介,佢話係依期推介嘅湯水之一,晚晚都有好多客點,問我使唔使留起一份,怕晏咗會賣晒。見阿姐誠意拳拳,再者,又椰皇,又燉鷓鴣,都只係賣$88,不妨一試喎。估唔到,一大盅燉湯直送,撈出嚟嘅湯渣一大碟,真材實料無花假,不過,講到尾川貝就唔係好覺架喇,始終係貴嘢,但其他料足,原隻鷓鴣,仲有啲雞件、瘦肉,椰皇又起埋肉,帶有好香椰子味,味道非常清潤,前前後後都裝到6、7碗,真係抵飲得無話可說呀!
紅袍金衣
免費送嘅,究竟係乜?其實係乳豬搭脆炸腐皮卷,雖然係贈食,但估唔到都幾大份,睇落幾靚,但原來好睇就唔太好食。乳豬主要得層皮,燒得幾脆,可惜下底黐得肥膏比較多,有啲肥;而腐皮卷大大件,包住好多素餡,外層又炸得甘香,唔知點解,咬落一口油,炸功真係唔得,要改善。
濃湯鮮竹浸菜苗 $56
上面個紅袍金衣食到一口油,好彩叫咗個清淡小菜浸菜苗,菜苗頗嫩滑,但最得我心係啲鮮腐竹,豆味濃,又夠甜;而濃湯有啲落差,睇色水就知唔多點濃,味道未至於淡如開水,只係一一般般咁。
野菌和牛粒 $78
野菌主要係雞脾菇切粒,配合和牛粒,以濃香醬油爆炒,下面再以油炸鬼墊底。首先和牛粒都幾多吓,炒得又夠軟腍,而味道帶少少甜,非常之惹味,送飯、送粥都一流。
法式焗大蝦球伊麵 $78
一上枱,係一道甚有睇頭嘅菜式,大大碟鋪滿蝦球,份量一啲唔少,而整個菜又淋滿由檸檬汁同牛油煮成嘅法式文也汁,香得嚟帶少少酸。所以本應係幾期待嘅,只係伊麵過腍,而大蝦球跟餐牌張相好唔同,相中嘅蝦球估計係一般嘅油泡,依家所見嘅係加咗脆漿酥炸,上面都講過啲炸功唔係好得,咁做反而出現咗反效果,啲大蝦球咬落一口粉之餘,粉漿外層太油,結果我哋就拆開層粉漿淨食蝦。
生果盤
酒樓免費送嘅,雖然只得西瓜同菠蘿,但以我哋買4個人計,佢都算唔少啦,難得菠蘿又係新鮮貨,甜道鮮甜,西瓜雖未起沙,但勝在汁多。依家唔係間間酒樓都送果盤,就算有可能都係幾片平平哋嘅西瓜。
整體嚟講,富臨嘅餸菜份量頗大,雖然新裝修,但價錢唔覺佢特別貴,都係街坊價,計埋茶位$9,酸菜$10碟,加埋一,都未過四舊。味道方面一般般啦,不過唔知係咪個別師傅嘅手勢,今餐好幾個菜都比較油膩,否則,感覺就更好。服務方面就真係要讚一讚負責我張枱個阿姐,我哋拎咗個雪糕蛋糕賀細佬生日,原先送嚟把刀仔唔多掂,阿姐就幫我哋搵把大啲嘅生果刀,勁呀!雖然人手有少少唔足,但佢都好落力招呼,拎個蛋糕時,仲跟手準備埋新碟、鐵叉仔,唔使嗌出聲。仲有,酒樓唔收切餅費,又送生果盤,完全係加分嘅細節位,就算食物質素唔係好出眾,都仍然有再幫襯嘅念頭。
|
|
|
Outback Steakhouse |
標題 : 依然「回」味 |
地址 : 尖沙咀彌敦道26號東企業廣場2樓1號舖 |
地區 : 尖沙咀 |
|
現時分數:
|
日期 : 2012-07-09 22:40:51
好耐無幫襯賣澳洲菜嘅Outback喇,所以老婆話約咗一個耐無見嘅姊妹食晏,問我去邊度食好,就推薦咗Outback,除咗環境幾有氣氛,地方闊落好坐之外,食物一向都有水準。老婆仲問我一唔一齊,佢請喎,唔使諗都應承啦,仲可以食到我好懷念嘅餐前小麥包(以前叫開「黑糖麵包」)。反正嗰個姊妹我都識,係唔太熟啫!
餐晏約晌星期六中午,因為老婆同個姊妹工作關係,要兩點先到,我就早早晌Outback打躉,細看有咩好食。睇勻都係午市優惠套餐最抵食,$68-98 + 10%,附送是日餐湯、伴菜沙律、蜜糖小麥包,包凍熱茶啡汽水。萬一午市優惠套餐裡面無樣啱你食,散叫單點菜式一樣有得送埋餐湯、沙律、小麥包、餐飲嘅,當然價格會高啲啦,但選擇就會多好多。
午市優惠套餐每次都會推出9款,款式都幾多元化,依次所見嘅,有烤魚、牛扒、寬條麵、牛柳粒、炒飯、沙律、漢堡、烤雞、燒肋骨,盡量俾到唔同選擇大家,隔幾個月又轉一轉。經商量後,我哋就揀咗牛扒粒寬條麵、香脆海鮮沙律、燒烤肉排3款,傾多幾句,就已經送上是日餐湯、伴菜沙律、蜜糖小麥包喇。
蜜糖小麥包
日頭附送嘅小麥包係圓碌碌細個裝,夜晚就會變身成大條裝。黝黑嘅小麥包上枱時,仲係微微暖,隨包送上嘅有別於慣性嘅牛油,而係酸忌廉,撕開麵包,手感非常軟熟,塗啲酸忌廉,晌酸酸咪襯托下,小麥包嘅蜜糖甜香更突出,始終無懷念錯你!
伴菜沙律
跟餐個沙律細細碟,都係啲沙律菜、紫椰菜絲、甘筍絲加車厘茄咁,再落啲現成沙律醬。算用料新鮮,車厘茄又鮮甜。
是日餐湯
係普普通通嘅粟米忌廉湯,唔係因為係粟米湯就話佢普通咗啲,其實啲粟米都打得幾融,不過除咗粟米味唔夠濃郁之外,個忌廉湯亦比較杰,口感唔夠滑,所以先覺得佢個水準普通咗啫。
牛扒粒寬條麵 $88
以茄汁為汁底,配上蕃茄同蘑菇嚟炒寬條麵,麵條煮得有咬口,而醬汁醒胃,撒上面嘅辣椒碎令麵條又帶點辣勁,層次有趣。牛柳粒肉質軟腍,相信無乜經過過多調味,所以,食落感到濃濃肉味。
香脆海鮮沙律 $78
作為主菜,當然比個「伴菜沙律」大份好多,不過個沙律底就無乜兩樣,都係沙律菜、紫椰菜絲、甘筍絲,拌上蒜蓉蛋黃醬,但係個醬汁似乎過辣咗,個人覺得主導咗個清新味。而香脆海鮮有蝦仁、八爪魚仔、蜆肉,全部酥炸,口感甘香脆口。
燒烤肉排 $68
燒肋骨有4細條,比較晌一般美式餐廳見到嘅無咁闊大,但以自家製醬汁火烤,味道香濃,滋味好食。而且,同時配意大利飯及時菜,前者煮得有啲過爛同太腍,無咗意大行飯粒獨有嘅煙韌口感;而後者時菜有南瓜、紅蘿蔔、西蘭花片、翠玉瓜、秀珍菇,好豐富,可惜又係煮過籠,變得無咁多食!
餐飲
餐飲要咗凍檸茶、熱檸水,凍飲唔會另外多收錢。而檸檬係切件上,有別一片片,以手揸汁,唔使篤篤吓,仲有係檸檬分開上,一碟咁俾我哋,多少隨意。
講番少少服務先,因為已經過咗午餐嘅高峰時段,所以人手較充裕,而侍應普遍都有禮。值得欣賞係麵包、沙律同餐湯都係同一時間上枱,等我哋差唔多食完晒,就再一次過上晒三個主菜,係侍應同廚房之間嘅默契同配合!今餐都食得好飽、好滿足,甜品?唯有下次先啦,大家都懷著開心嘅心情離開,依度係值得「回味」嘅餐廳。 |
|
|
百樂門囍宴 Joy Cuisine |
標題 : 輕鬆假日嘆早茶 |
地址 : 美孚美孚新村荔灣道12號B萬事達廣場一樓 |
地區 : 美孚 |
|
現時分數:
|
日期 : 2012-07-06 21:38:38
假日朝早好節目,都係去嘆茶居多,美孚區嚟嚟去去都係嗰幾間,依家間間都已經係集團式經營嘅酒樓,稻香、富臨、百樂門,真係唔集團式都好難做落去。同老婆、姨仔三個人,搵咗百樂門囍宴試一試,睇吓質素又如何?
百樂門近年都銳意發展婚宴生意,所以一般嚟講,百樂門嘅裝修都幾富麗堂皇。雖然要等位,但都好快有,仲安排咗去角落位一個偏廳,兩面落地大玻璃對街景,採光十足,而且亦較大堂無咁嘈雜;再者大多數食客都係上年紀嘅,自顧自刨報紙,就顯得更加清靜。
我哋志在輕輕鬆鬆嘆吓茶,所以叫點心亦都好隨意。11:30am前有個「早市特價」,$6.8-$15.8,共有廿款之多,梗係要點幾款著數點心啦。另外一張「十大名點.傳統加創意」,又睇睇有無啱食嘅;加埋一張基本嘅點心紙(近50款),又揀啲啦,就咁揀咗6款點心成為我哋嘅嘆茶組合。
早市特價
南瓜煎堆仔($7.8)
一啲都唔係「仔」呀,個個炸得漲卜卜,近乎有個網球咁大,一客仲3個添,非常抵。煎堆炸得好香軟,咬落外皮煙煙韌,可惜就無乜南瓜味啫,同食普通煎堆無分別,但咁嘅價,咁嘅呎吋,依然抵食。
香菇雞包仔($9.8)
一籠3個雞包仔,啱啱好又夠分,雞包仔好軟熟,裡面塞滿香菇同雞肉,而且本身都唔係話細細個,又一抵食之選。
生煎蓮藕餅($9.8)
一碟3件煎藕餅,睇落煎得幾香脆。蓮藕味唔重,反而魚肉佔較多,所以,味道似食煎鯪魚肉多過蓮藕餅。
十大名點
雪山叉燒包(大點)
雪山包系列依家好多酒樓都有得食,味道仲五花八門添。今回依個係以叉燒做餡,叉燒包亦都幾經變化,由傳統嘅叉燒包變奏出叉燒餐包,依家又有雪山叉燒包,叉燒包嘅可塑性都幾大。白雪雪嘅墨西哥外皮,嫌佢焗得未香,反而叉燒餡得幾出色,醬汁唔會過多,又炒得香,加入咗洋蔥粒,多咗朕爽口感。
基本點心
潮州蒸粉果(小點)
基本上都有水準,搓得皮薄透光,食落又唔黐牙,餡料口感豐富,有花生,肉粒,沙葛……等等。
金珠鹹水角(小點)
今日所點嘅點心,唯一一客有4件,小弟就可以多食一件。味道方面,鹹水角我唔知點評為出色,純以個人口味,做得外皮軟糯,餡料調味得宜,已經OK啦。係最怕啲皮又乾又硬,餡料無味啫。
雖然只係嗌咗6個點心,茗茶、加一,都要成舊水落樓;整體質素,不過不失咁啦,勝在環境唔錯,坐得舒服,食得輕鬆,週末嘆茶,志在都係咁啫! |
|
|
椰林閣餐廳 Yeh Lam Kok Restaurant |
標題 : 到會亦出色 |
地址 : 美孚美孚新村4期美孚廣場212-216號舖 |
地區 : 美孚 |
|
現時分數:
|
日期 : 2012-07-05 09:28:53
以前幫襯過椰林閣好幾次,印象中都唔錯,屬於抵食嘅豉油西餐聽,見佢出團購,唔係堂食,而係到會,仲啱啦,因為約咗班舊朋友搞大食會,都預咗叫薄餅、加啲嘢到會,依家直情唔使煩,一次過靠晒椰林閣依個到會就掂晒。難得係節日、假期都用得丫嘛。
依次派對美食套餐都係供8人用,有兩款選擇:「異國風情 8 人派對套餐」(原價$850)、「至尊滋選 8 人派對套餐」(原價$930),同樣包8個罜宋湯加5款美食,平貴在乎款式,至尊滋選嗰個似乎啱食啲,所以就揀後者,團購價$465,啱啱好係半價。我都事前上佢個網站睇過吓,對比一下佢做緊嘅派對套餐咩價,確實,依次團購好抵呀!雖然加送一張「3 磅派對炸薯條 / 炸薯角優惠劵」,不過要訂派對美食到指定金額先用得著。由於係團購關係,5款美食係指定嘅,如果係椰林閣本身平時做開嘅派對套餐,則每個類別都有得揀,靈活性大好多。
取貨當日,依時到達,經理叫我哋稍等,因為仲有一個焗西蘭花未得,不過都好快。之後以大紙箱裝好所有食物,配埋好餐具,就走得!加加埋埋都成十幾廿磅嘢,好彩一早拉埋朋友A幫幫手,雖然都係十零分鐘腳程,但一個人拎晒就係幾手軟架。
大蝦鮮雜果薯仔沙律
雜果同薯仔都好平均,唔係為慳成本猛落薯仔,加上蛋黃醬個稀杰度啱啱好,所以淨係個沙律底已經幾好食。擺上一撮沙律菜,再將12隻大蝦撓翻個鳳尾造型,圍圈擺連個賣相都靚仔過人,真係做得有心思。大蝦幾鮮甜,撤少少刁草,自然印象都加多幾分啦。
日式風味烤雞扒
有12件雞扒,件件都頗為大件,煎得金香,撤上芝麻加添和風味,而日式醬汁另以小碗盛上。其實,雞扒經過醃料調味,所以淨食都已經OK,雞汁都能鎖住,所以咬落雞扒多汁唔嚡。如想再食得濃味啲,蘸蘸碗日式醬汁都無妨,感覺就再「和」味啲!
香草茄茸煙歐陸脆皮腸
脆皮腸一向都係小朋友恩物,配上香草同茄茸,味道更吸引。啲歐陸脆皮腸唔係細細條嗰啲,香腸用上德國蒜腸(Knackwurst),每條一開二,確實外皮幾脆,係嫌佢茄茸下得少。
.
芝士焗西蘭花
好大盆,一定足3磅啦。滿滿都係西蘭花,亦有啲蘑菇,白汁同芝士鋪滿面,烘得金香,做得水準唔錯呀!
XO醬海鮮炒烏冬
同樣又係大大盆份量足,海鮮料有青口、魷魚、蝦呀……等等,烏冬炒得唔算好油,但幾入味,又夠勻循;因為添加咗XO醬,有些少辣,但就惹味好多,小朋友就可能唔係太啱食。
雖然話今個套餐係8人餐,我哋8個大人2細路,食完都剩唔少嘢,所以10-11個大人食都應該無問題呀。而試咗依次團購,先知椰林閣都有做派對美食,加上質素不賴,又足秤,咁下次搞派對又多一個選擇喇!
|
|
|
匠工房秀吉 Syokudouraku Hideyoshi |
標題 : 大判勝便當 |
地址 : 尖沙咀梳士巴利道12號崇光百貨B2美食天地 |
地區 : 尖沙咀 |
|
現時分數:
|
日期 : 2012-07-04 19:38:08
拎住張SOGO嘅$100現金券,買唔到咩衫褲鞋襪,就不如去佢個祟光超市裡面個美食廣場食咗佢算咯。因為撞正祟光啲折扣日,祟光超市逼滿人,排隊俾錢嘅更大排長龍,搞到個美食廣場感覺更擠擁。所以,都無乜心情逐間逐間食店慢慢睇、慢慢研究食咩好,只係隨意揀來「秀吉」。
$100揸手,自不然食盡佢。除4款便當,主打食物仲有日式燒餅、奄列炒麵、鱆魚燒。先揀一款最貴嘅便當「鰻魚炸雞肉丼」,加多一份「燒餅炒麵八爪魚球」,要多兩個大判燒拎走當下午茶,應該差唔多近$100,點知依日折扣日,連食店都有九折,所以,可以叫多罐Zero可樂!
鰻魚炸雞肉丼 $52
便當一共有4款:鰻魚炸雞肉 $52、雜錦燒餅 $45、雜錦雞串炒麵 $38同豬頸肉炒麵 $38,每款都配綠茶一杯,圖文並茂之餘,有晒實物模型做參考,而出嚟個便當跟個樣板又唔差得遠喎。
講番個便當,首先就係幾足秤,無論飯呀,餸呀,都堆得滿滿,可謂份量十足。便當有齊鰻魚、炸雞粒、炸雞捧、香腸、蟹柳、炸豆腐、辣泡菜同野菜,陣容鼎盛。不過味道就不過不失,除鰻魚食落油潤甘香之外(可惜只有兩件仔),其他餸料就比較平庸,屬快餐級質素。
燒餅炒麵八爪魚球 $36
日式燒餅、奄列炒麵、八爪魚球有多款指定配搭,共有6款A-F,唔算貴都係$25-$36。我哋又係揀個最貴嘅,有齊燒餅、炒麵、八爪魚球。
燒餅,主要都係薯仔絲同啲粉漿,勝在個汁醬好味,再唧上沙律醬,酸酸辣辣,幾惹味。配上木魚碎,面頭有塊煙肉,都算唔錯;而炒麵呢,加入椰菜、甘筍片、豬肉片同炒,可能係炒定晒,所以入口只係微暖,而且亦較為油膩;八爪魚球就最唔得,厚粉,有啲熟唔透嘅感覺,八爪魚韌過擦紙膠,都幾失望。
大判燒 $7
味道有紅豆、吉士或鴛鴦,外賣咗兩個拎走,所以每款一個。因為拎返屋企當下午茶食,所以食嘅時間已經係事隔都兩、三個鐘頭之後嘅事,始終無新鮮熱辣即食咁好,但燒餅外層依然好鬆軟,無論紅豆或吉士,都落得唔手軟,薄薄外皮內裡填滿餡料。味道方面,紅豆稍勝吉士,紅豆味道較為清甜;吉士則蛋香不強,亦因為攤凍咗變得無咁滑。
|
|
|
客家好棧 Hak Ka Hut |
標題 : 友情自然有聚 |
地址 : 尖沙咀彌敦道26號東企業廣場3樓 |
地區 : 尖沙咀 |
|
現時分數:
|
日期 : 2012-07-03 12:37:54
稻香系嘅酒家,以「客家好棧」幫襯得最多,亦以尖沙咀東企業廣場依間分店最常到,無他嘅,位置好,港鐵東、西鐵線、荃灣線都就到,啱晒今次出席飯局嘅九龍人同新界人。再者,客家好棧經常賣廣告推出全包宴,不時又定期轉款,價位實惠,又提供埋$100折扣優惠券,人少半圍又得,每人百鬆啲就食到飽飽,至緊要係質素又唔差丫嘛。
以前團契三十多人,依家經過十幾廿年,個個組織晒家庭就各散東西,住晌香港唔同角落,返嘅教會都轉晒,大部分見面都少咗好多,個別熟落啲嘅就會間中聚一聚。就係咁,每隔一年左右,就會約班舊團友聚聚舊,食番餐,依類飯局一年都有好幾次,因為團契內都分咗唔同團友組合。雖然現今通訊發達,又快速,facebook、msn、whatsapp……要聯絡嘅應有盡有,但奇就奇在大家真係要等餐飯局先嚟聚一聚,傾吓偈!
今晚7人出席,女多男少,半圍菜夠晒咯。依輪「好客情」全包宴陣容仍然保持豐富,一共8道菜、一個蒸米粉、一個糯米飯,仲有糖水同飲品,雖然係半席,但份量唔少。可能好多人都係基於同一心態,交通方便,抵食夾大件,加上是晚係星期五,真係座無虛席,驟眼所見,有啲仲翻咗兩轉枱,幸好無話有時限交枱,我哋咁耐無見,一晚都唔夠傾啦!
雪梨茶
基本上,一席會送啤酒2支、汽水6罐,仲可以改要雪梨茶,估唔到半席都送2渣雪梨茶喎,大家都即時舉手讚成轉,點都健康過啤酒汽水啦。因為啲水杯大大隻,都係勉強分到7杯,味道方面雖然飲到雪梨味,略嫌稍淡,但感覺還算清潤。
金薯糖醋焗大蝦
跟平時食到嘅煎蝦碌分別唔大,蝦隻幾大件頭,酸甜惹味,又夾雜好多洋蔥同青椒。我諗有趣在底下墊有好多蕃薯條,蘸上糖醋汁,令到啲蕃薯特別粉甜。
客家藏珍寶
睇個餸名真係估唔到係乜,原來係炸蝦丸,但客家菜偏向食啲粗嘢,依道菜就似乎似粵菜多啲。不過,都要讚一讚,因為無話半席就只俾6粒你,一碟足有9粒,而且蝦丸打得彈牙肉爽,唔錯喎,只係個名有啲夾硬啫。
醬皇雙翠炒豚爽
雙翠係翠玉瓜同西芹,仲搭單加咗雲耳添,配以醬油爆炒豬頸肉,所以,成碟餸樣樣都係爽口嘢,係唯獨西芹唔知係咪「飛水」耐咗定其他原因,口感較腍,未能做到樣樣都咁爽!
玉環鮮菌扣原隻鮑魚
全圍菜最大嘅賣點就係依道菜,既然係得半席,就唔好期望佢會俾多過6件鮑魚喇,不過,玉環鮑魚可以逐位另加$58,但席上又唔係個個對鮑魚都好大興趣,所以就無謂額外加。賣相又確實幾有睇頭,有兩隻手指大嘅鮑魚,扣得幾腍滑,鮑味亦唔太弱;以冬瓜做嘅玉環,同樣炆得夠腍,加上鮑汁,味道無咁單調;中間仲加咗好多茶樹菇,多添幾分健康啦!
竹笙海皇燴花膠
以竹笙、花膠為主嘅海皇羮,名字就幾響吓,不過竹笙又好、花膠又好,都少得可憐,就連蝦粒、魷魚粒、豆腐粒、筍絲之類海皇羮常見嘅成員,都好似練咗隱身術咁。
客家麵醬蒸多寶魚
個海皇羮無料到,但條多寶魚就拉番唔少分,一來條魚幾大,肉嫩鮮甜,二來以客家麵豉醬同蒸,又下咗唔少蔥絲,蘸點蒸魚豉油,真係幾滋味架。以前多寶魚屬貴價魚,依家晌內地大量養殖,身價平咗好多喇。
杞子魚滑泡青蔬
依家人人都講飲食要健康,之前幾道菜唔係炸就係煎,咁呢個泡青蔬就最健康啦。以杞子、魚湯泡浸白菜仔,加埋大堆頭魚肉,人人都啱食。魚湯色水夠晒奶白,魚鮮味亦幾夠突出,泡浸過魚湯嘅白菜仔故然又好味啲啦;魚肉下咗好多蔥粒同蝦米嚟打,都唔錯。
河源自家清炖雞
淨係上枱個大瓦砵,已經顯得好有份量,雖然只係半隻雞,可能隻雞本身都幾大隻,所以睇落份量亦唔少,真係抵食。以紅棗、當歸同其他材料一齊嚟炖隻雞,葯膳味十足,夠晒滋補,啱晒同枱嘅女士享用。以清炖方式,雞肉出嚟個效果唔錯,頗為嫩滑,肉味不賴。
客家肉絲蒸米粉
比起炒米粉一定健康得多啦,估唔到客家菜有蒸米粉呢招!做法睇落都幾簡單,不過,我就直覺覺得係將米粉煮熟再撈肉絲加蔥花,「蒸」字都係可能借用。由於唔係炒米粉,口感嚟得清淡啲,所以要撈勻肉絲同蔥花,否則感覺會好寡。
臘味糯米飯
埋尾有米粉,又有糯米飯,一定食得飽大家。個臘味糯米飯都唔差,似模似樣,糯米軟糯黏口,臘味份量偏少,下多少少甜豉油就更合小弟心水。
海底椰蕃薯蜜
蕃薯糖水嘅進化版,加多咗海底椰、圓肉同杞子,味道唔太甜,總之口感滋潤,著實係一碗幾好嘅飯後甜品!
一班知心友,唔知下次飯局幾時再約,不過,今晚大家就食得好開心!
|
|
|
富源點心小廚
|
標題 : 富良嘢 |
地址 : 荃灣沙咀道141-151號滿樂大廈福至樓地下 |
地區 : 荃灣 |
|
現時分數:
|
日期 : 2012-06-30 09:21:14
約咗一對夫婦食晏,一心一意係嚟幫襯媽子廚房,點知嚟到先見到轉咗名,叫「富源」,日頭賣點心炒粉麵,夜晚做小炒。本來無打算飲茶食點心,但既然都嚟到,所以都費事再搵咁煩,既來之,則安之。
雖然係星期日,但由於入座時已經成1:30pm,過咗食晏高峰期,富源又無做特惠下午茶,所以食客唔多,成個場都係三、四乘客左右,唔使等位!餐廳查實佔用咗兩個鋪位,中間一道拱門連系兩邊鋪,環境雖然裝修簡單無乜花巧,無地毡,無水晶燈,但夠晒乾淨企理。基於鋪身呈長形,故此多以4人、6人枱居,而鋪尾架高咗地台,可以擺到張12大枱。
富源有乜嘢食?一張A4紙底面印晒,點心、粥品、甜品合共有32款($12-$20),另外兩款蒸飯,反而炒粉麵就幾多,多達36款($40-$65),再加埋10款小食($22-$28),點心供應7:00am-4:00pm,標榜即叫即蒸,需時10-15分鐘,茗茶每位收$5。晚市主要做小菜,亦有全包宴供應,勝在全日免收加一。
除咗張點心紙,佢仲有一個「想點就點套餐」$148,包一客點心拼盤(6件)、富源燒雞或客家鹹雞半隻、小菜或粉麵飯自選2款。此外,另有一個仲平啲嘅「火速午市套餐」$88,包點心8揀3,加粉麵飯8揀1。所以,我哋揀咗後者個火速套餐,再加咗3個小食同一籠蒸飯,其實都有啲叫多咗,不過,難得同依對夫婦一聚,咪慢慢傾,慢慢食囉!
火速午市套餐 $88
真係幾火速,雖然即叫即蒸,眨眼就到。點心8揀3,無對過單價幾多,只係揀想食嘅啫,點知後尾睇番原來已經係較貴嗰幾款。粉麵飯如果想最著數嘅,就只有揀金菇瑤柱炆伊麵或福建炒飯,因為單賣要成$58,相反,我哋揀嘅係沙茶皇炒米,原來散叫餐牌係無嘅,參考其他粉麵飯,大概賣$48左右,所以,夾埋晒原來都只係平6蚊咁大把。萬一你揀正啲較平嘅點心,加埋又係最平嘅炒粉麵,仲要倒蝕添,唔信?點心鮮竹卷、蒸粉果、牛肉球搭魚香茄子炆粉,散叫加埋只係$84,仲唔蝕返$4俾佢,哈哈!都未見過套餐可以貴過散嗌。
山珍野菌餃 $15
依個野菌餃做得認真出色,餃皮透薄咬落又唔黐牙,包住筍粒、菇菌粒,粒粒剁得幼細,好有咬口,再者。
蟹籽燒賣皇 $16
相信燒賣裡面嘅豬肉、蝦肉都撻到起晒膠,因為食落質感鬆化爽彈,加唔加蟹籽都俾人覺得係用心之作。
香茜牛肉腸 $15
三款點心中,以依個牛腸稍為遜色啲,皮是拉得薄,但略賺有少少削;再者,香茜味唔強,牛肉餡亦偏少。
沙茶皇炒米
初頭問阿姐個炒米有啲咩配料,搞咗好耐,佢先幫手問到有啲肉絲咁囉。因為炒米粉都幾蝦人炒,自己晌屋企炒一般都炒得麻麻,所以揀食依個炒米粉。其實又唔係淨得肉絲咁少料,仲有蝦仁、韮王、銀芽,以新竹米粉加沙茶醬同炒,味道少少辣,有點點花生同芝麻香,米粉幼身啲,但有韌勁,又唔會碎濕濕,口感幾好。
蜆介炸鯪魚球 $28
一碟有成8粒,粒粒跟乒乓球咁上下大,睇樣幾抵食咁款,但食落麻麻,主要係炸得頗為乾身,魚肉有啲實,唔夠彈牙,然而蜆介則幾鹹香。
欖菜肉碎四季豆 $25
午市叫小食,晚市已經係個小炒。睇上去確係油咗啲,但味道搭夠。欖菜帶出惹味,四季豆好甜,肉碎就幫助提升口感,襯白飯先係好朋友,可惜已經叫咗個籠仔蒸飯。
雲耳炒勝瓜 $25
雖然係一道簡單小炒,但炒得幾好,雲耳同勝瓜都炒得爽脆,尤其勝瓜,唔會太過腍,值得推介嘅清淡之選。
荷香籠仔北菇雞飯 $30
比起平時見到嘅盅頭飯多,飯粒裝滿整個大蒸籠。亮點還是塊荷葉,飯粒真係帶有荷葉香,而且雞件幾滑,北菇又厚肉,只係食到尾,飯底稍為油淋淋。
無論點心抑或小食,整體嚟講,都覺得有水準,當然部份嘢如牛腸、鯪魚球有啲甩碌情況,大家對依餐晏仔都幾滿意。食到好嘢,人都自然開心啲!
4個人食咁多嘢,真係食得我哋好飽,甜品佢哋話食唔落喇。不過甜品唔算吸引,更無特色,得兩款:香芋椰汁糕,香芒凍布甸,所以,無必要係度食!要食嘅,過返路德圍大把甜品專門店啦。我哋真係慢慢嘆,最後,食到4:00pm先埋單走。 |
|
|
富源點心小廚
|
標題 : 富良嘢 |
地址 : 荃灣沙咀道141-151號滿樂大廈福至樓地下 |
地區 : 荃灣 |
|
現時分數:
|
日期 : 2012-06-30 09:19:26
約咗一對夫婦食晏,一心一意係嚟幫襯媽子廚房,點知嚟到先見到轉咗名,叫「富源」,日頭賣點心炒粉麵,夜晚做小炒。本來無打算飲茶食點心,但既然都嚟到,所以都費事再搵咁煩,既來之,則安之。
雖然係星期日,但由於入座時已經成1:30pm,過咗食晏高峰期,富源又無做特惠下午茶,所以食客唔多,成個場都係三、四乘客左右,唔使等位!餐廳查實佔用咗兩個鋪位,中間一道拱門連系兩邊鋪,環境雖然裝修簡單無乜花巧,無地毡,無水晶燈,但夠晒乾淨企理。基於鋪身呈長形,故此多以4人、6人枱居,而鋪尾架高咗地台,可以擺到張12大枱。
富源有乜嘢食?一張A4紙底面印晒,點心、粥品、甜品合共有32款($12-$20),另外兩款蒸飯,反而炒粉麵就幾多,多達36款($40-$65),再加埋10款小食($22-$28),點心供應7:00am-4:00pm,標榜即叫即蒸,需時10-15分鐘,茗茶每位收$5。晚市主要做小菜,亦有全包宴供應,勝在全日免收加一。
除咗張點心紙,佢仲有一個「想點就點套餐」$148,包一客點心拼盤(6件)、富源燒雞或客家鹹雞半隻、小菜或粉麵飯自選2款。此外,另有一個仲平啲嘅「火速午市套餐」$88,包點心8揀3,加粉麵飯8揀1。所以,我哋揀咗後者個火速套餐,再加咗3個小食同一籠蒸飯,其實都有啲叫多咗,不過,難得同依對夫婦一聚,咪慢慢傾,慢慢食囉!
火速午市套餐 $88
真係幾火速,雖然即叫即蒸,眨眼就到。點心8揀3,無對過單價幾多,只係揀想食嘅啫,點知後尾睇番原來已經係較貴嗰幾款。粉麵飯如果想最著數嘅,就只有揀金菇瑤柱炆伊麵或福建炒飯,因為單賣要成$58,相反,我哋揀嘅係沙茶皇炒米,原來散叫餐牌係無嘅,參考其他粉麵飯,大概賣$48左右,所以,夾埋晒原來都只係平6蚊咁大把。萬一你揀正啲較平嘅點心,加埋又係最平嘅炒粉麵,仲要倒蝕添,唔信?點心鮮竹卷、蒸粉果、牛肉球搭魚香茄子炆粉,散叫加埋只係$84,仲唔蝕返$4俾佢,哈哈!都未見過套餐可以貴過散嗌。
山珍野菌餃 $15
依個野菌餃做得認真出色,餃皮透薄咬落又唔黐牙,包住筍粒、菇菌粒,粒粒剁得幼細,好有咬口,再者。
蟹籽燒賣皇 $16
相信燒賣裡面嘅豬肉、蝦肉都撻到起晒膠,因為食落質感鬆化爽彈,加唔加蟹籽都俾人覺得係用心之作。
香茜牛肉腸 $15
三款點心中,以依個牛腸稍為遜色啲,皮是拉得薄,但略賺有少少削;再者,香茜味唔強,牛肉餡亦偏少。
沙茶皇炒米
初頭問阿姐個炒米有啲咩配料,搞咗好耐,佢先幫手問到有啲肉絲咁囉。因為炒米粉都幾蝦人炒,自己晌屋企炒一般都炒得麻麻,所以揀食依個炒米粉。其實又唔係淨得肉絲咁少料,仲有蝦仁、韮王、銀芽,以新竹米粉加沙茶醬同炒,味道少少辣,有點點花生同芝麻香,米粉幼身啲,但有韌勁,又唔會碎濕濕,口感幾好。
蜆介炸鯪魚球 $28
一碟有成8粒,粒粒跟乒乓球咁上下大,睇樣幾抵食咁款,但食落麻麻,主要係炸得頗為乾身,魚肉有啲實,唔夠彈牙,然而蜆介則幾鹹香。
欖菜肉碎四季豆 $25
午市叫小食,晚市已經係個小炒。睇上去確係油咗啲,但味道搭夠。欖菜帶出惹味,四季豆好甜,肉碎就幫助提升口感,襯白飯先係好朋友,可惜已經叫咗個籠仔蒸飯。
雲耳炒勝瓜 $25
雖然係一道簡單小炒,但炒得幾好,雲耳同勝瓜都炒得爽脆,尤其勝瓜,唔會太過腍,值得推介嘅清淡之選。
荷香籠仔北菇雞飯 $30
比起平時見到嘅盅頭飯多,飯粒裝滿整個大蒸籠。亮點還是塊荷葉,飯粒真係帶有荷葉香,而且雞件幾滑,北菇又厚肉,只係食到尾,飯底稍為油淋淋。
無論點心抑或小食,整體嚟講,都覺得有水準,當然部份嘢如牛腸、鯪魚球有啲甩碌情況,大家對依餐晏仔都幾滿意。食到好嘢,人都自然開心啲!
4個人食咁多嘢,真係食得我哋好飽,甜品佢哋話食唔落喇。不過甜品唔算吸引,更無特色,得兩款:香芋椰汁糕,香芒凍布甸,所以,無必要係度食!要食嘅,過返路德圍大把甜品專門店啦。我哋真係慢慢嘆,最後,食到4:00pm先埋單走。 |
|
|
太興燒味餐廳 Tai Hing Roast Restaurant |
標題 : 粽有你伴隨 |
地址 : 中環租庇利街12-13號萬安商業大廈地下A 及B舖 |
地區 : 中環 |
|
現時分數:
|
日期 : 2012-06-29 18:22:02
每年端午節,龍舟就無乜興趣睇,不過粽就年年都會食,通常都係煲定一大煲蠔豉瘦肉粥,同家人一齊食粥送粽做早餐。今年都唔例外,唯一特別係食咗兩隻貴粽,抽獎禮物,由太興送嘅,太興個品牌本身都唔差,寫明係香港自家鮮製,又真空包裝。攞粽時阿哥仔仲強調無加防腐劑,「吩咐」我記得月底前好食,又話如果打開包裝發現有問題,記得拎嚟換,真係幾細心啫!
所送嘅粽有兩大隻:原隻鮑魚元貝裹蒸粽($108)同極上醬油金沙叉燒粽($42),如果夾埋兩款一齊買有優惠套餐,不過,都要成$128,食粽咋喎,都咪話「乸脷」呀!按佢指示整翻熱,都幾費時,隻裹蒸粽要水滾後煮45分鐘,而叉燒粽都要30分鐘。當然,唔係呃小朋友嘅IQ題,夾埋煮要75分鐘!以前細細個真係被啲大哥哥呃到架。
原隻鮑魚元貝裹蒸粽
未食,睇個呎吋就已經夠晒珍寶,成個6吋湯碗咁大,又墜手喎。包裝袋寫住材料包括:原隻鮑魚、原粒瑤柱、金華火腿、豬肉、鹹蛋黃、太興燒鵝、原隻花菇、蝦米、蓮子……等,以泰國糯米加上等綠豆包裹,材料真係幾揼本。煮熟以後大刀中間切開,餡料真係多到爆,雖然話係原隻鮑魚、原粒瑤柱,但呎碼唔係好大,至於其他材料,都無走漏,俾足無呃秤。晌咁多材料襯托下,味道都無乜差池喇,咁多料猶如食緊盆菜咁,哈哈!
極上醬油金沙叉燒粽
單張係咁樣介紹依隻粽:日本頂級醬油調味嘅糯米包住太興叉燒、原隻鹹蛋黃、花菇、蝦米等材料做成。身形比較修長,大概等於原隻鮑魚元貝裹蒸粽一半大小。由於糯米以日本醬油調味過,所以色澤啡黃,單以糯米部份計,食起嚟比裹蒸粽更正更好味,唔使點豉油或沙糖都已經夠晒味;餡料方面,就無咁大堆頭喇,食到少少叉燒、鹹蛋黃、花菇、蝦米、瑤柱絲咁樣。
依個端午,食咗兩隻好粽,都算係一個特別嘅端午!明年,又會食咩粽渡端陽呢? |
|
|
魚米
|
標題 : 轉戰鮮魚湯米線及韓國鮮年糕 |
地址 : 荔枝角深盛路9號宇晴軒商場2樓91號舖 |
地區 : 荔枝角 |
|
現時分數:
|
日期 : 2012-06-26 16:53:16
上次嚟試咗依度嘅菜飯同麻辣米線(下午茶時段),因為手上仲有一張團購券,當然要趁到期前用咗去啦。
又係星期六晏晝,再過嚟食下午茶套餐,而今次稍有目標啲。店名稱之為「魚米」,很易令人聯想起魚湯米線,況且,不論內在裝修、餐牌、餐紙,抑或宣傳單張,你都會見到佢好多魚仔一正一反做成嘅標記;再者,晌餐紙都煞有介事咁介紹佢哋個秘製鮮魚湯,寫住係由上等老雞、豬骨、新鮮鰂魚、紅衫、大眼雞等做成,含豐富鈣質,有益健康之良湯。故此,試佢嘅鮮魚湯米線成為目標之一。
跟上次嚟時,下午茶套餐餐牌依舊,未有轉款,仍有10款選揀,我就揀好要鮮魚湯米線,老婆唔記得上次食乜,今次竟然又係揀麻辣米線,不過就轉食年糕。
鮮魚湯雙拼米線 $28
個米線係雙拼嘅,不過唔係有好多餸料被你任揀兩款嚟雙拼喎,而係佢指定好晒雙拼嘅組合,一共有6款:炸醬酸菜、魚蛋魚腐、鯪魚球肉丸、雞絲扎肉、雲吞魚蛋、腩肉牛肉。我就揀魚蛋魚腐米線,魚蛋魚腐各有兩粒,仲有件豆卜,魚蛋都幾濃魚味喎,口感爽彈;魚腐同樣幾重魚味,做得算滑身。反而鮮魚湯魚味唔算好濃,但仍呷出鮮甜味,唔覺有味精,米線份量則幾多吓,食完好飽肚。
麻辣豬潤牛肉米線 $29
今次唔食米線,加$3轉韓國鮮年糕,相對上次,今次明顯好少豬潤,牛肉竟然得一舊,不過唔好睇好似無乜年糕,全部細細片沉晒底,越食越有咁。而且,湯底明顯比起上次深澤嫣紅,老婆都話今趟真係幾辣,食完碗嘢都要攤住攤住咁飲杯銀菊蜜。跟上次一樣,豬潤、牛肉唔算有咩突出,係啲鮮年糕幾好食,煙煙韌韌幾有咬口呀。
銀菊蜜
餐飲今勻兩公婆都揀銀菊蜜,貪其清潤,你話杯銀菊蜜好正,又唔算,不過飲到朕朕菊花香,又唔太甜,叫幾啱飲啫。
|
|
|
吉野家 Yoshinoya |
標題 : 留心不流心 |
地址 : 荔枝角寶輪街9號九巴總部地下 |
地區 : 荔枝角 |
|
現時分數:
|
日期 : 2012-06-25 12:09:29
一向都好少食吉野家,因為老婆唔多鍾意佢啲肥牛,總覺得啲牛肥淋淋,好多肥膏,所以,好似咩雪花肥牛嗰類嘢,真係請佢都唔食架!
不過,記得舊年食過佢嘅溫泉玉子,印象幾好,見早前又再推出,「温泉玉子祭」野菜牛肉温泉玉子推廣套餐,仲話期間限定,所以搵日得番自己一支公時,就晌番同區嘅吉野家食番次溫泉玉子牛肉飯。推廣套餐包大碗牛肉飯,配汽水、日本茶或麵豉湯,零售價$35.5,跟附近嘅快餐店食個晏差唔多。
招牌嘅吉野家牛肉飯真係幾大碗,拎起幾墜手,面頭鋪滿以日式秘製上湯烹製而成嘅洋蔥牛肉,側旁仲有一大堆野菜,包括西蘭花、紅蘿蔔、椰菜花、玉豆,色彩鮮明;而温泉玉子係以小碗另外盛載,蛋白半凝半固,蛋黃被薄薄「蛋白漿」包住,柔弱得一戳即破。因為仲有啲咳,只好乖乖飲綠茶。此外,特別鍾意食佢啲酸薑,所以要求俾多兩包小弟撈飯食。
牛肉飯拎到手,我就鍾意將隻温泉蛋放晌飯面,篤穿佢等蛋黃流晒出嚟,再加埋酸薑,成碗飯撈勻嚟食,不過,今次隻温泉蛋有啲過熟,睇落佢外表水汪汪盪盪吓,點知篤穿都唔流心,半凝咁嘅狀態,幸好還可以勉強撈勻落啲飯度,有少少窩蛋嘅感覺。野菜中嘅玉豆幾好食,口感爽甜,而牛肉幾嫩滑,配以熱騰騰嘅珍珠米,帶丁點黏糯有咬口,酸薑甜甜酸酸,令個飯多份個性,係好有趣嘅配搭!
下次再嚟吉野家,又不知是何時了。
|
|
|
粵
|
標題 : 粵.悅人無數 |
地址 : 北角城市花園道9號城市花園酒店1樓 |
地區 : 北角 |
|
現時分數:
|
日期 : 2012-06-22 22:49:02
米芝蓮一向都唔係小弟搵食嘅指標,唔係睇低車呔人,只係無刻意摘星,所以,晌自己嘅飲食經歷當中,都無乜太多追星記錄,點數都係得鼎泰豐同滿福樓,但都已經係好耐之前嘅事,都唔記得食嗰時摘咗星未?但既然「粵」獲得米芝蓮2012一星評級,又加上得過旅發局主辦嘅「2010美食之最大賞」海鮮(魚、蝦、蟹)至高榮譽金獎、「2011美食之最大賞」點心組金獎,自不然有其實力。故此,今次獲邀一試「粵」多道招牌或特色菜,實在喜出望外,兼且甚為期盼。
由入門口經過一排排卡位廂座,到轉入另一大廳,超高樓底,清亮雅致,環境空間甚為寬敞。是次試食被安排晌獨立貴賓房,私穩度更高,舒適更恬靜;一側係落地大玻璃窗,雖然只係街景,但感到空間感更十足。
開飯前跟幾位酒店公關同餐飲部要員打過招呼,就準備開始依晚「佳餚悅人」之旅。但未上菜前,酒店竟然為各位食家送上一樽「粵」自家製嘅XO醬,配以一個淺黃小錦囊袋住,甚有特色,絕對係一份大驚喜,真係又食又拎,趁此再次多謝「粵」嘅招待及心意。當然,亦唔少得要多謝邀請小弟嘅飲食網站,否則都未能成為座上客。
粵四小碟
先嚟一份粵式前菜四小碟,包括:脆皮素鵝、柚子醋黑木耳、蜜汁叉燒、蒜片和牛粒,賣相雅致的骰,當中擺放次序亦見心思,味道由淡至濃。
- 脆皮素鵝,腐皮炸得脆身,捲住甘筍絲、冬菇絲、西芹絲,清淡得嚟有咬口。
- 柚子醋黑木耳,除咗黑木耳,仲有雞脾菇幼條,微微醋香唔嗆喉,黑木耳又夠晒爽脆,感覺挺清新。
- 蜜汁叉燒,肥瘦適中,蜜味甘香,略嫌無乜碳燶位,幾款中依個叉燒比較唔突出。
- 蒜片和牛粒,呎吋係一口和牛,伴上大蔥同炸蒜片,和牛肉質鬆化肉味重,食落腍滑無渣,大蔥同蒜又令味道層次豐富咗,有啲畫龍點睛之效,記得夾埋一齊食,唔係就嘥料!
杏汁花膠燉蹄筋湯
跟住再上嘅燉湯,好啱小弟口味,亦係今晚其中一款喜愛菜式。以龍皇杏經幾重功夫榨汁嚟整,杏香故然濃郁,色澤呈米白更對用料有信心,口感柔滑滋潤。而棄豬肺,取花膠蹄筋,自然升價十倍,顯得此湯更有睇頭。花膠非常之大件,爽滑唔韌,足證燉得夠耐;蹄筋細細件,軟滑有咬口,如果可以嘅話真想添飲架!
紅梅蝦球
紅梅就係蟹膏粒粒,配以油泡大蝦球,蝦球鮮甜彈牙有肉地,不過個人覺得搭蟹膏兩者有啲分離,唔係好夾得到。未知改搭鮮蟹粉又如何?當然,依家鮮蟹粉仲未係時令,或者當造時改用蟹粉睇睇效果又如何!主角蝦球出色,配角蟹膏一般,但作為大茄嘅芥蘭度令人刮目相看,以芥蘭裁出最嫩部分,脆嫩無渣又清甜,用料夠精。
雪嶺紅梅映松露
全晚最亮點出場,賣相好搶眼,杯中三色蒸蛋白,猶如甜品咁樣,如果唔係一摸上手熱辣辣,真係有啲幻覺係一道甜品嚟。此外,依道菜都引起大家好多討論,絕對係一道好有話題性嘅菜式,不愧為得獎菜式。
首先係面層嘅東星斑,魚肉挺實唔鬆散,入口又夠嫩滑,加上配以一小撮黑松露醬,令菜式更矜貴之餘,多添一份馥郁幽香。側跟嘅露筍,亦令菜式更具立體感。原來東星斑裡面仲包住薄薄一片花膠,再蘸蛋白嚟煎封,所以,魚肉外層更脆口,真係大廚唔講唔知咁多細節位。可惜花膠片好薄,兼且半透明,望上去跟魚肉差不多,所以小弟食咗都唔知。小弟晌度又有個大膽建議,改用雲腿薄片替代花膠,不但色澤跟魚肉對比大,較突出,雲腿嘅鹹香可更勾起魚肉鮮味,唔知掂唔掂呢?
東星斑下嘅蒸蛋白分別為甘筍汁蛋白、菠菜汁蛋白、上湯純蛋白,服務員建議逐層逐層食,先能體會共精髓,而剩低嘅松露油徐徐滲下,令蛋白多添一分味道。以嫩滑度計,甘筍同上湯兩層蛋白最嫩最滑,菠菜嗰層有啲嚡氣孔多;而以味道計,甘筍味無疑最為突出,菠菜色澤翠綠但味道不彰。
北菇鮑汁扣鵝掌
幾道別出心裁嘅菜式後,輪到扣鵝掌此等大路嘢難免有啲回落嘅感覺。不過,單以質素而論,一樣顯出功夫紮實,用料不賴。鵝掌扣得軟腍,北菇選用厚冬菇,菇味會較為重,肉厚夠腍,又一證明炆煮時間足。再者,香濃嘅鮑汁令整道菜相得益彰。只係小弟覺得,伴碟嘅小棠菜無必去葉,再多添兩夥半環形伴碟,一樣美觀古雅。
龍井茶皇燻雞
顧名思義,以龍井茶葉作為燻雞主材料,但原來係以滷水浸過再用茶葉煙燻,茶香未算好濃,故有種食油雞嘅感覺。不過,雞隻嘅質素始終有一定水準,肉嫩皮下脂肪少,整體味道依然唔錯。
籠仔鮑汁荷葉飯
另一個有鮑汁入饌嘅菜式,飯粒乾身飽滿,配以蝦米、蝦乾、冬菇粒、豬肉粒同煮,口感豐富;色澤啡黃,滿有鮑汁味道,而以荷葉包裹再蒸,又帶有隱約荷香。以小蒸籠盛載,一客一份,分外討好。
雪蓮子五補茶
飯嚟得精彩,個糖水一樣有特色。內裡細數有雪蓮子、湘蓮、杞子、紅棗、百合、圓肉,真係何止五補呀!總之係補,又係寶。雪蓮子應該第一次食,半透明軟軟糯糯,少少似蘆薈咁,但無咁實淨;而紅棗啲棗味好強勁,其實個五補茶一上枱,最先聞到就係啲紅棗味。依個五補茶,都係第一次食,糖水清潤順喉,又唔太甜,秋冬天更加啱呀!
麥皮紫薯包
雪蓮子五補茶係依晚指定甜品,而麥皮紫薯包則係同場加映,試食當日仲未正式推出,所以我哋有幸能先睹為快。以一般常見嘅蓮蓉包為基礎,包身加添咗幼麥皮同搓,因為下嘅份量唔多,所以口感唔會粗嚡,包身仍然保持軟熟。蓮蓉一向為人垢病係太甜太漏,轉以紫心蕃薯蓉替代,真係一絕,既香甜,又唔漏,正。如改用小弟更喜歡嘅「雞蛋黃」蕃薯,感覺更完滿呀!
除咗飲飲食食,尾段亦有請總廚賴正成師傅粉墨登場,跟眾人交流一下。賴師傅除咗介紹吓幾款菜式嘅特別之處,又講解少少有關做法之外,對大家嘅提問有問必答,談吐亦頗為風趣,有啲周中師傅嘅感覺。
整晚所試嘅菜式,大多甚高水準,用料、製法、賣相均一絲不苟,可謂用心製作。得獎菜「雪嶺紅梅映松露」故然係全晚焦點,但個人而言,好似「杏汁花膠燉蹄筋湯」、「籠仔鮑汁荷葉飯」、「麥皮紫薯包」等都甚得小弟歡心。其他食家,都各有心頭好,對菜式亦很欣賞。所以,「粵」所做嘅粵菜,相信悅人無數!
題外話,米芝蓮除咗分為一、二、三星外,仲有一堆無星嘅精選食肆。不過,睇番資料,過往幾年,「粵」唔好話有無星呀,連精選食肆個榜都未入過,點知2012就即摘一星,所以,米芝蓮我都係當本飲食雜誌睇吓就算!
|
|
|
京華酒樓 King Wah Chinese Restaurant |
標題 : 京喜飯局 |
地址 : 太子彌敦道760號聯合廣場2樓 |
地區 : 太子 |
|
現時分數:
|
日期 : 2012-06-14 17:14:51
又係久唔久一次嘅教會細胞小組飯局,今次雖然唔係齊晒人,但都坐滿成圍枱,多謝大家俾面出席。揀嚟太子京華,純粹較就腳,因為其中一員完咗教會事務先從又一村趕過嚟,太子區算係不二之選。而京華,睇過網上食評,唔貴之餘,味道唔差,適合大棚人「柴嘩嘩」,而且睇食評見有啲餸菜仲偶有驚喜,試得過!
未人齊,先由小弟發板揀食乜,度掂之後再俾大家過過目,佢哋真係「過過目」,揀好嘅餸菜傳個圈就俾返我。晚市有提供京滬美點,所以,點咗幾客點心,等大家邊食邊等;見有啲小食類,又叫咗兩款,作為餐前小食,又可以當兩味餸;全包宴雖然豐富,但覺得唔係咁抵啫,反而佢有啲孖寶、三寶仲實惠啲,故此,又揀咗一款,再加多3個餸都差唔多,唔夠先再添,無謂食唔晒盞嘥!
京滬美點有14款之多,都係啲常見嘅款式,如南翔小籠包、生煎窩貼、京式蔥油餅……,款款$30,最後揀咗下面幾款:
京式生煎包 $30
一直嘅認知生煎包都係上海嘢,京式又會係點呢?食完同跟上海生煎包無咩分別喎,真係整古做怪。包身鬆軟,包底煎得香脆,肉餡就普普通通咁啦。
蘿蔔絲酥餅 $30
外皮做得鬆化唔油,裡面蘿蔔絲清甜濕潤,如果再炸燶少少金黃啲就仲靚仔、仲香口。
京式炸饅頭 $30
只係普通炸饅頭仔,無咩特別,炸得亦唔夠「勻巡」,只係想大家過過口癮啫。
脆皮燒腩仔 $45
估唔到外皮真係幾鬼脆,咬落「咯咯聲」;而腩肉肥瘦相間,少少一朕肥膏搭一層瘦肉,所以唔覺肥。
五香牛展 $38
牛展就有啲失色,煮得幾腍,又煙煙韌帶有少少咬口,但唔知點解係唔夠入味。
柚子話梅京燒骨 $68
依道菜見睇名覺得幾特別,幾想試吓,不過跟期望有啲反差。其實色香皆全,排骨炒得有光澤,香口又帶微酸,味道唔錯,可惜肉質稍為乾身,而所謂「柚子」,心想會係加咗柚子蜜之類作提調,唉!點知只係晌啲京燒骨上面灑幾撮柚子粒,真係把鬼。
百里香牛柳粒 $75
加埋洋蔥、蜜糖豆同炒嘅牛柳粒,夠重百里香香草味,幾特別,只係嫌牛柳粒略肥,而且根多,有啲韌,仲有係感覺好油,有啲唔健康喎!
錦江海鮮豆腐煲 $78
煲仔細細,但非常之足料,海鮮有蝦、魷魚、魚塊、貴妃蚌,鮮甜味就一般啦,而豆腐故然所佔份量較多,整體惹味又香濃,同樣,去到煲底就油咗啲喇。
三寶 $338
三寶C嘅組合包括翡翠炒龍躉球、清蒸龍躉頭腩、濃湯山珍浸翡翠,三款餸菜都幾得,但浸翡翠似乎較得眾人歡心。
翡翠炒龍躉球,大大件龍躉球,以西芹同炒,魚肉鮮甜,西芹又爽脆,但依度大廚似乎有啲慣性多油。
清蒸龍躉頭腩,以蔥絲清蒸,蒸熟下點豉油就係喇,味道油潤鮮味,不過腩位始終都係稍肥。
濃湯山珍浸翡翠,可能以上多道菜唔係油就係肥,所以大家食得有啲膩,故此輪到依個浸翡翠,就好似一小道清泉。濃湯不錯,好有魚鮮味,加上好多菇菌同白菜仔浸在濃湯中,搞到幾搶手。
之前打電話訂枱時,已經再三確認過話散叫都有糖水生果盆送,但臨尾糖水果盆乜都無,仲搵個經理嚟同我解釋,真係廢話。好彩我哋例牌都會預個蛋糕,順便幫幫組員慶生日,沖喜吓咁,買咗個美心藍梅脆脆,大大個有1.5磅重,面頭鋪滿新鮮生果,壽星仔女睇到都開心晒。訂枱時亦都有問明收唔收切餅費,唔收之餘仲快快手咁拎埋紙碟同膠叉,算係拉番啲印象分。雖然發生糖水果盆甩底事件,有少少掃興,但一大棚人開開心心食餐飯慶祝,點都係一件值得歡喜嘅事!
|
|
|
六合小館
|
標題 : 骨膠原豬手米 |
地址 : 九龍塘聯合道320號建新中心LG層8號舖 |
地區 : 九龍塘 |
|
現時分數:
|
日期 : 2012-06-12 20:29:12
因為過嚟浸會探病緣故,所以,難得晌樂富搵食。由於對依頭唔太熟,無刻意搵食咩好,只係就晌醫院附近見到有間六合小館,打正旗號賣粥麵,簡簡單單醫飽肚就算。六合,咪睇佢門面小店格局,入到去原來幾大,堂座呈L形,內裡伸延得幾入。燈光幾足,唔係老舊嘅粥麵鋪,地方幾企理乾淨。食客除住晌附近嘅有錢人之外,其次睇落多數係西裝骨骨嘅地產經紀,因為聯合道都幾好地產鋪。
坐定定睇吓有咩好食,見佢原來有個特價飯,全日供應,分$29或$32,,跟熱飲加$7,凍飲加$10,本來都想食佢嗰梅菜排骨飯,不過可能嚟得夜咗啲,老闆話賣晒,咁只好點粉麵。
我哋一行三人各自叫,分別係雲吞麵($24)、水餃麵($25)、豬手米($27),價錢唔算平,前兩者睇嚟做得唔錯,雲吞同水餃包得大大粒,家人都話啲料都幾新鮮,尤其雲吞內嘅蝦肉幾彈牙,而生麵爽口、梘水唔重,湯底亦都鮮甜有肉味。
小弟就揀食豬手米,因為都好似好耐無食過豬手,一碗粉麵只有兩件豬手,豬手炆得入味又腍化,好夠南乳香,而豬皮咬落好夠膠質,年紀大都要補補腳骨,添加吓啲骨膠原都好嘛! |
|
|
麵留香茶餐廳 Noodle Eleven Restaurant |
標題 : 地捫炒紅米飯 |
地址 : 太子花園街219號地下 |
地區 : 太子 |
|
現時分數:
|
日期 : 2012-06-11 16:33:25
返完自己教會,落到太子花園街搵食例點,依期晏晝飯無咩心水,同行會友話食麵留香,咁就麵留香喇。花園街有兩間麵留香,都係同屬關係,今次入咗去大嗰間,啱啱有位嘛。
但求平靚快,快餐就最啱,快餐一共有6款,賣$30或$32,包餐湯同熱飲,見個快餐E叉燒雜果炒紅米飯,好似幾特別,感覺健康啲,就嗌佢啦,跟杯奶茶。
點知叉燒粒得好少,而雜果原來係地捫貨,熱帶雜果嗰款,有啲菠蘿粒、木瓜粒、提子乾咁,連埋白米、紅米炒埋一堆。雖然啲紅米唔硬,但炒得無嚟鑊氣,仲要好「乾爭爭」,啲雜果粒跟個飯其實唔係好夾,成碟飯都好麻麻。
例湯係青紅蘿蔔煲豬骨,味道稍淡,無乜湯味,唯一唔錯只得杯奶茶。
見隔離阿夏生個梅菜扣肉飯餐($33)仲好似幾好,依個餐只包熱飲,無湯餸,比我個午餐仲要貴多$3,但起碼好食丫。見個賣相似模似樣,黐咗一舊扣肉嚟試,掂喎,梅菜幾香,扣肉唔算好肥,就算肥豬肉嗰部分都係肥而不膩,食得過。
其他人嗰啲就唔多講,一來都係普通粉麵飯,二來無試無食。家吓乜都加價乜都貴,總之,以太子區計,都算旺區,仲係賣三十零蚊一個飯餐,有湯有嘢飲,算係咁喇。味道唔太差嘅,都叫做抵架啦,如果好食嘅,已經稱得上平靚正啦!最後俾個「一般」佢,因為我碟飯真係唔多好食,但如果你揀啱嘅,應該又唔會咁差! |
|
|
文華餅店 The Mandarin Cake Shop |
標題 : 出嚟行,預咗要還 |
地址 : 中環干諾道中5號香港文華東方酒店M樓 |
地區 : 中環 |
|
現時分數:
|
日期 : 2012-06-08 16:12:05
上年尾,petite amanda開業無耐,某某國內電信公司搞咗個宣傳送petite amanda咖啡,嗰時去換免費咖啡嘅同時,同事就買咗幾件餅,一齊試吓Amanda嘅手勢。
受人恩惠千年記,出嚟行,就預咗要還,既然佢請我食咗件好嘢,無理由回番美心、聖安娜咁大眾嘅檔次架,所以走過去文華餅店揀番兩件好嘢作為回禮先!
好精緻嘅餅櫃,下面打晒燈,好似手飾櫃咁。依日一共有8款蛋糕,款款都做得好精細,色彩有鮮艷,亦有沉實,儼如藝術品。選好Chocolate Truffle,始終朱古力都係穩膽之選,另一款要咗Green Tea Mousse,被佢翡翠綠嘅外表所吸引。
Chocolate Truffle
無話一層疊一層好似歌劇院蛋糕咁花巧嘅外型,完全似係一個踏踏實實嘅中年漢子,要令人聯想到佢係平凡中嘅不平凡咁。確實,重點晌內心深處,簡單嘅製作,朱古力海綿蛋糕、搭一小層朱古力慕絲;再一層朱古力海綿蛋糕、搭一層厚身嘅朱古力慕絲,就成為蛋糕基本「內涵」。海綿蛋糕做得軟綿,而慕絲又打得柔滑輕盈,朱古力味甘苦馥郁。雖然裝飾都只係插住兩塊朱古力方塊晌餅面之上,但係有內在美又何需幫佢穿金戴銀咁俗氣丫!
Green Tea Mousse
同係慕絲系列,但明顯佢就係一個打扮新潮、又紅又綠,誓要搶人注意力嘅後生靚女。跟Chocolate Truffle做法有啲相似,又係一層綠茶海綿蛋糕搭一層綠茶慕絲,唯獨係餅心加多一朕紅桑莓果肉同吉士,令人覺得佢唔單止外表年青有活力,內心仲有個性而不簡單。綠茶海綿蛋糕做得有少少濕潤,而慕絲依然滑溜非常,而中間嘅吉士超軟滑,只係紅桑莓果肉偏酸,但感覺好有層次。當然,餅面裝飾用嘅紅桑莓及白朱古力片,點綴大於味道!
同事話試到好嘢之餘,又有機會一嚐文華出品,連聲多謝,我都係禮尚往來啫。 |
|
|
松家日本料理
|
標題 : 潮流興.多花樣 |
地址 : 中環德輔道中55號協成行中心二樓 |
地區 : 中環 |
|
現時分數:
|
日期 : 2012-06-07 17:35:45
松家之前嚟過一次食晏,今次再嚟,又係同番嗰位長期晌廣東省工作嘅老朋友阿東一齊,平時各有各忙,都難得一聚,今餐正好又可以聚聚舊。
再嚟松家原因之一都係因為上次試過啲嘢有質素,加上地方夠大唔太嘈,再者,係度食個晏平均要$100有多,可以晌快餐店或茶餐廳食兩、三次,所以上嚟嗰啲多數係搵得到錢嘅斯文客居多,真係方便傾偈唔怕太被騷擾。
上回我哋兩個就食定食,試咗個咖喱豬扒飯定食同銀雪魚西京燒定食,今次見佢有個新餐牌,叫「午市自選三款套餐」,賣$108,比大部份定食平啲,客人又可自由組合自己三款心水食物,覺得幾好咁。整個套餐,足足有成45款食物以供選擇,包含晒刺身、壽司、手卷、燒板燒、炸物、燒物 / 天婦羅、料理,每類別都有6、7款俾你揀,應該都唔憂搵唔到啱食嘅,係怕你心多多揀嚟揀去樣樣都想食啫。
經過一輪思前想後,左度右度,淨係揀得三款都真係幾難,小弟卒之選咗#10嘅壽司組合、#19什錦魚生粒飯同#27牛油炒帶子;而老友阿東嘅選擇又係#10嘅壽司組合,再加#24白汁魚柳及#40牛肉烏冬。雖然係各有各揀,除壽司組合外,其他嗰4款嘢都有分甘同味。
#10壽司組合
壽司類共有6款可揀,都係一客4件咁唔同組合,因為好少食希靈魚,所以點選#10壽司組合,包括油甘魚、吞拿魚、希靈魚壽司、加州卷。可惜壽司做得較為鬆散,魚生還魚生,飯還飯,加州卷亦都散開晒,賣相要扣分。而今次所食嘅油甘魚、吞拿魚仍然保持到份鮮味,希靈魚就魚春十分之多,但個人覺得味道一般。
#19什錦魚生粒飯
份量當然無可能同散叫咁多啦,大概家常飯碗嘅份量,但作為1/3主菜都足夠。什錦魚生個賣相一樣又係麻麻哋,但勝在種類幾多,有希靈魚、八瓜魚、立魚、油甘魚、青瓜粒同蟹籽。魚生粒伴過少少醬油,味道都唔錯,珍珠米黏糯,撈勻魚生粒同食都幾好。
#27牛油炒帶子
一客5粒,唔算好大粒,煎得金黃,好有牛油香,趁熱食幾正,帶子肉彈牙唔韌,不過攤凍咗就差啲。
#24白汁魚柳
一客有兩小片,真係好細片,而魚柳又薄身,兩啖可以食晒,亦都無標明係咩魚柳,可能係青衣柳啩。基本上煎得幾香脆,肉質就算唔得細嫩,反而個白汁忌廉突出啲,打得濃稠恰到好處,又很有忌廉香。
#40牛肉烏冬
好普通一碗牛肉烏冬,幾片和牛片,算係肥美嫩滑,加塊鳴門卷、一啲紫菜碎,但就多咗棵小棠菜,伴以清雞湯,唔係話佢唔好食,只係普通啲,食完都差啲無印象嗰隻。
綜合評價吓依個成舊水嘅午市自選三款套餐,雖然可以揀三款食物,彈性大又等你一次可以試多幾樣嘢,之不過,每樣嘢份量偏細,味道水準又比較參差。以日本菜嚟講,好幾款都係,賣相真係「求其」咗。感覺上無上次嚟食定食咁好,有啲滑落之勢!
早前見佢有派啲送餐飲兼免加一嘅優惠券,近排又唔見有,可能生意好咗,唔使再搞推廣吸客吧!就算無優惠券派都唔緊要,如果你係可以彈性時間食晏嘅人,佢有個優惠時段,12:45pm前埋單走人,又或1:45pm後先入座,所有定食半價,$108自選套餐亦有七折,真係好吸引,只可惜我依啲打寫字樓工嘅,硬性食晏時間,無得走盞!想食得慳啲,最好打定電話問一問,你知啦,優惠嘅嘢隨時可能會無咗。 |
|
|
名豪海鮮酒家 Grandco Seafood Restaurant |
標題 : 結業前嘅最後一程 |
地址 : 深水埗南昌街223-227號名都廣場1-3樓 |
地區 : 深水埗 |
|
現時分數:
|
日期 : 2012-06-06 16:04:31
過時過節出街食飯,一向都唔抵食,我同老婆就極少揀大節日出街被人劏,不過,屋企飯就另計,總要互相就一就。唔單只日子要就,地點都係,就返老爸,梗係揀番石硤尾村附近。其實我老豆、細佬妹對食真係完全無要求,所以,就腳方便已經係上算,佢哋對面嘅名豪就係可選擇之一。
名豪都嚟過好幾次,飲茶、晚飯都食過,不過下面近石硤尾街市嘅多彩搞完大裝修,遠少少北河街隧道口又開咗間稻香,再者,附近仲有間明星,幾間都係集團式經營,晌石硤尾佢哋都可謂三雄鼎立。原來依餐團年飯都無打算寫食評,因為之前都寫過名豪,其實又無咩好特別,只係叫抵食夾大件。但今次摷番出嚟寫,係因為聽細妹講間嘢摺咗,所以,就臨尾幫佢寫多篇當悼念吓佢。講真,名豪依類街坊酒樓,晌三雄之下,真係撐唔得幾耐,試諗吓,小弟一家晌年廿七去食,成個大堂都無三乘人,如果唔係當日訂唔到多彩(因為多彩裝修後都未去過),應該都未必揀嚟名豪。
既然團年飯,一年得一次,故然想大家食好啲,因此就比平時叫得多啲,啲嘢又揀貴價啲。
孖寶E $228
孖寶係芝士焗波士頓龍蝦搭老火例湯,波士頓龍蝦足一隻,幾足斤兩,睇樣真係焗過嚟,而且幾厚肉又幾爽彈,芝士汁調校都OK,少少杰身,不過個伊麵底就唔係好得,煮過籠,比較腍又比較碎濕濕。
而老火例湯係合掌瓜煲豬骨,原瓦煲上,幾夠味,又無味精,分到成7、8碗。湯渣另外碟上,又係食之無味,棄之可惜嘅嘢。
鹵水拼盤 $78
拼盤包括有紅腸、鹵水鵝、豬頭肉、鴨翼、鹵水豆腐,鹵水頗為入味,只係稍鹹。咪以為佢幾大碟,睇嚟幾抵食,但查實紅腸、豬頭肉佔多數,不過以$78計,已有咁多款鹵水嘢食,總多過次次都係食燒味。
西蘭花帶子 $118
全晚最貴嘅一碟菜,但鮮帶子貨真價實,又大粒,又厚肉,味道都算鮮甜。西蘭花亦都煮得啱啱好,唔會太腍,色澤翠綠。
菠蘿咕嚕肉 $58
全晚最平嘅一碟菜,但也好意外地咁細碟,好似被人偷食咗咁,幸好質素都唔跩,脆漿少少厚身,但個甜酸汁幾開胃,無過酸,又唔嗆喉。全部都係肉排,無博大霧俾啲骨排,所以都啖啖肉。
脆皮燒雞半隻 $88
隻燒雞估唔到都幾掂喎,炸得外表金黃甘香,做得到皮脆肉嫩。皮下脂肪真係好少,唔太肥,雞肉又幾嫩,小弟覺得係是晚佳作。
以往對名豪嘅印象都唔太差,味道雖則無驚喜,但簡單講就係抵食,一般都係七、八十一個人。但係今次就唔同,一來物價漲咗好多,二來團年關係,所以埋單要七百多,圍起每個人差唔多舊半!當然,依家出街食嘢,完全感受到物價上漲得好厲害,乜都貴咗好多。
|
|
|
八喜
|
標題 : 食得喜.食得起 |
地址 : 灣仔軒尼斯道314-324號W Square 2樓 |
地區 : 灣仔 |
|
現時分數:
|
日期 : 2012-06-05 09:01:40
教會細胞小組今日晌山頂嗰邊搞行山,小弟因事未能參與,不過之後嘅飯局,一定奉陪。故此,佢哋就叫我負責夜晚食飯一事,OK無問題喎,食過八喜,有特色又唔貴,美心品牌又穩陣,灣仔又有分店,所以就成為今餐晚飯地點之選。
約好6:30pm,小弟先去到攞位兼打點一切,時間尚早,人客未多。食乜佢哋都一早講好由我發板,不過等吓等吓成7點多先到,原來山頂纜車超多人,改搭巴士直剷過嚟灣仔,但係都好唔得幾多,一樣有啲塞車。都無緊要,八喜好在無分時段,又唔使限幾點交枱,所以我都睇吓雜誌hea住等。
八喜依個美心品牌,我都幾鍾意,因為價位相對其他美心中菜為低。佢以粵台風味為主,裝修設計較摩登,一室潔白,配以深啡木枱,開放式廚房,供應各類特色冷盤、小菜、麵點,而最欣賞係佢啲台式點心,有特色又有水準。
雖然我哋一共5大1細加個兩歲B,但當中有幾位係好擦得之人,又想佢哋試多啲嘢,故此比平常叫得多嘢啲,等大家食得盡慶。先點一個冷盤開開胃,跟手仲有5款點心,主菜叫咗3個餸搭1 個飯,臨尾組員E太仲話加多條蒸銀絲卷,因為阿仔仔鍾意,無問題喎,最緊要食得開心。
梅酒雙脆 $32
染到粉紅嘅蓮藕片,酸酸咪咪,酒味唔重,但好爽脆,不過何謂雙脆,只係得藕片,另一脆係乜?就係大頭菜,不過真係摷勻成碟都無,算啦,反正啲藕片真係好好食。碟面仲放有一粒浸酒嘅話梅,試咗少少話梅肉,又係好醒神,夾雜少少酒香,幾得意呀。
灌湯小籠包 $30
上次同太太試過,覺得好有水準,所以一定要介紹俾組員試吓,一叫就兩籠但求人人有份試。結果都無令眾人失望,依然係高水準,包內湯汁蕩漾鮮甜,外皮又薄又軟,餡肉鬆化有咬口。
台南胡椒餅 $30
同樣係安哥之選,一客兩個,侍應細心幫我哋已經一開四,等大家都可以試少少。感受到新鮮即焗,因為咬落時熱辣辣。免治牛肉餡,唔係完全搞爛,令你食到肉碎,兼且肉汁豐盈,肉中滲出胡椒香味,配上鬆脆嘅芝麻外皮,又係值得推介嘅點心。
肉燥蒸芋粿 $28
依個又係小弟推介,好味在於芋粿做得縝密,芋頭絲切得唔會太幼太削,又唔會太粗太掘,咬落鬆化唔易散;芋粿切成丁方,面頭放上濃香肉燥,再加點蔥粒,惹味得嚟又唔會搶走芋頭嘅粉香。
台南肉碎手捲 $28
晌度第一次試,記得晌高雄嘅澄清湖,都食過類似嘅嘢,不過叫蛋餅,內餡主要係蛋。而今次試到嘅手捲,外皮質感似薄身少少嘅熱香餅咁,軟軟糯糯,而內裡捲住豬肉碎同肉鬆,都幾得意。
南瓜鮮肉煎包 $30
一客有4個,外型好似生煎包咁,又係加咗少少肉鬆同蔥晌面做裝飾。顧名思義,就知包內係南瓜蓉同豬肉碎,味道一般,南瓜味唔突出。佢竟然係廚師推介嚟,真係有啲失望。
砂窩雲吞津白 $68
食咗好幾款點心,嚟個砂窩雲吞津白就正好喇,因為當係有啲湯水落肚。主材料當然係雲吞同津白啦,但個湯絕對唔失禮,奶白嘅上湯好有肉香,仲加埋大大粒嘅蝦乾,又有粉絲。雲吞唔算好大粒,但蝦鮮爽甜,津白吸收晒上湯精華,食落好甜。
嘉義三杯雞 $55
本來想試吓有個推介嘅宜蘭茶壺老酒雞,不過要預訂,唔訂就睇吓廚房有無預多幾客存貨,可惜係無嘅。所以改叫嘉義三杯雞,係一味煲仔菜,上枱時芳香撲鼻,主要係以醬油同酒嚟爆香啲雞件,味道有少少辣;又加咗少少九層塔,非常惹味;雞件亦唔錯,稱唔上好嫩滑,但入味肉質唔嚡。如果你唔係太怕油淋淋,煲底嘅醬汁用嚟撈飯相信無得彈!
左營夜市蚵仔砵 $50
大大個仔砵,蛋漿滿滿之餘,焗得一片金黃,賣相引人流晒口水。蛋漿之內,蠔仔唔少,雖然細細粒,但啖啖都有,而且算幾鮮甜。
金瑤茄子炆飯 $55
上次試過招牌嘅櫻花蝦炒飯,所以今次就轉轉口味,點咗個金瑤茄子炆飯,何謂炆飯?其實即係煮有味飯,又比燴飯乾身啲,當然就比炒飯濕潤好多。以瑤柱粒、茄子粒、冬菇粒同煮,粒粒材料偏少,雖然啲飯粒上晒色,但總覺得味道唔突出。
蒸銀絲卷 $16
雖然係一款大路點心,但只要你鍾意食,佢都變咗係好嘢嚟。見阿仔仔點啲煉奶,食得滋味,普通嘢都頓時成為美食。事實上,條銀絲卷又蒸得好鬆軟,咬落又唔黏牙,不過相比起,我就偏向鍾意炸銀絲卷多啲,較為香口嘛,不過八喜係無供應嘅。
因為實在叫咗唔少嘢,可能有啲貪心咗,所以大家都非常之飽,甜品?下次有機會先試啦。另外白飯$12碗,茶位收$8,加埋泡菜$12(以四人一碟為基礎),收埋加一,食咗咁多嘢,埋單都係$605,只計大人,每人都係百二大洋,大家都認為係好划算嘅一餐! |
|
|
太子飯莊
|
標題 : 平民飯莊 |
地址 : 荔枝角景茘徑8號盈輝商場2樓 |
地區 : 荔枝角 |
|
現時分數:
|
日期 : 2012-06-04 15:16:22
因為晏晝有活動,今晚就費事嘥時間煮,一於兩公婆扯埋舅仔落街食就算。唔過美孚新村咁遠,近近哋嚟咗盈輝臺度食。盈輝臺個商場有兩間茶餐廳,一間叫荔苑,已經入咗黑名單,另一間晌黑暗中對話館隔離,叫太子飯莊,日頭就以茶餐廳形式經營,個格局都係茶餐廳嘅款,有卡位,有圓枱,圓枱有大有細,招呼、服務就無乜架喇,賣吓午餐、茶餐、炒粉麵飯……等等,到夜晚,就主力做小炒,仲有一圍圍酒席添,似番個「飯莊」囉,哈哈!
因為係星期日緣故,好爆場,我哋都夠早啦,先7:00pm多,已經要等位,一心上到嚟費事再行,好彩人流都算快,都係等咗約15分鐘,俾咗個卡位我哋。
志在填飽個肚,所以無咩特別要求,見佢有個「全日小菜特價套餐」,星期一至日,日日有6款唔同嘅小炒,款款都係賣$45,配白飯一碗,例湯或熱飲,經濟實惠,唔使多懸念,就揀依個小菜套餐。由於水吧做到晏晝5:00pm,所以晚市冷熱乜餐飲都無,焗飲例湯,而且另收茶位$2(可以唔要,免收$2),不過就無加一。
例湯
是晚例湯係蓮藕煲豬骨老火湯,大大碗俾你飲過夠,無乜湯渣跟例湯上,所以唔知有幾真材實料,但至少色水對板,味道又無話淡茂茂,感覺清潤,而且相信無落味精,唔會飲完仲好口渴。
燒汁四季豆炒雞柳
6款餸,以依個最惹味,好送餸,所以成為點菜首選。份量唔細,等同晌酒樓食嘅小炒,除咗四季豆、雞柳,原來仲加咗啲雞脾菇、冬菇同炒;四季豆幾甜,又無炒到過腍,雞柳都唔錯,加咗啲菇菌,多份爽口感;而且炒得乾身唔油,燒汁校得幾香,夠鑊氣,整道菜頗有小炒風味!
白菜仔炒魚鬆
想食啲魚類,就只有依個炒魚鬆,魚鬆好有魚味,炒得幾香口,不過確實有啲鹹,而且份量偏少,大部份都係白菜仔,性價比低。
瑤柱鮮菇扒時蔬
最敗筆嘅一味小炒,應該係濕炒,濕到瀉呀!啲獻汁實在太重手,煮得過多,成碟膠水咁,杰到一撻撻。鮮菇淨係得草菇,話就話鮮菇,應該都係罐頭貨,因為成晚流流長,應該唔少人點依味餸,邊嚟得咁多鮮菇,而且一般食肆都係慣用罐頭草菇,貨源、質素穩定成本又易控制。瑤柱?寥寥無幾,都唔使多講好唔好食。時蔬揀嚟生菜,都係正路,一來相對易洗,價格比較平,本來諗住揀味多啲蔬菜嘅,但就點錯相。
白飯晌度應該都無咩好講,又唔係話特別有米香,飯粒軟硬適中之類,只係想講係超大碗,裝到倒滿,等同家常飯碗兩平碗。所以,佢哋啲餸又夠件頭,飯又夠大碗,真係絕對可以兩餸三個人食,三餸四個人食呀!
|
|
|
Cafe CAPs |
標題 : 誠意小店渡過小小閑暇 |
地址 : 中環域多利皇后街12號 |
地區 : 中環 |
|
現時分數:
|
日期 : 2012-06-01 17:00:11
麵包班嘅同學仔I兄,買咗依間Café嘅團購券,佢晌上環做嘢,本打算平日行過嚟用咗當食晏,但無為意享用時間係由1:30pm先開始,咁樣趕返公司時間就變得有啲緊,結果,就搵咗我陪佢一齊星期六收工後過嚟食喇。大家都係收1:00pm,時間上都幾就啱,食完嘆住杯咖啡,傾吓偈,講吓近來食過咩好嘢,最近整咗咩甜品,又有咩飲食著數優惠……等等吹水話題,唔使趕住走,幾輕鬆呀!
平日都有經過Caps,食晏時段真係幾多人,不過星期六食晏時段就差天共地,客人寥寥無幾,反而去到下午茶時段,又多番啲人喎,唔通啲人總覺得星期六嚟café係飲下午茶好啲?
門面睇落唔係好大,入到去就發覺店子頗深長,廚房及落單位置就座落店裡盡頭。一室幽幽暗暗,一邊係二人矮身梳化位配小圓枱,另一邊就係多張二人一組嘅木凳大圓枱位,可隨意合成四人一組。行入啲先發現原來仲有二樓,不過攔住咗,店員話因為客唔多,就唔開放上面,都啱嘅,相信佢哋搞團購,都係想多啲生意,開源以外,都要截流,咁先可以控制住成本!點餐付款後,就俾你一個號碼牌,等待侍應送上食物,是幾好嘅半自助服務模式。
團購內容係黑椒雞肉蘑菇意大利包或三文魚沙律,任擇其一,再加大杯裝Mövenpick咖啡,味道有三款:焦糖意大利鮮奶咖啡、榛子意大利鮮奶咖啡、朱古力鮮奶咖啡。原價標示$73,係以散賣價計出嚟。實際佢本身都有啲意大利粉、長通粉、意大利飯午餐供應,包餐飲,價錢由$65-$88;不過就無以三文治或包類組合作為午餐,要食都係要散叫。依家$29可以試到一款包,一杯咖啡,咁嘅價位,淨係買杯咖啡都唔得啦,所以抵得無話可說。
黑椒雞肉蘑菇意大利包 $38
點揀都係要個意大利包,話晒都係食晏,擔心三文魚沙律唔夠飽。製作需時,黑椒雞肉蘑菇意大利包由店員送上,原來個包都幾大個喎,而且攞上手係熱烘烘,印象分已即刻有所提升。橫身切開,睇到半溶嘅芝士,上面厚厚嘅雞肉,夾雜好多蘑菇,並伴有豐盈嘅黑椒醬汁,再放有一層生菜,見到咁嘅配搭,已覺得製作認真。砌出嚟個包變得幾厚身,但小弟點都盡量獅子開大口,一啖咬齊意大利包跟咁多配料,包身暖暖又鬆軟,黑椒醬汁唔係好辣,但幾有黑椒香;可能醬汁多又有蘑菇,雞肉食落唔會覺得嚡;半溶嘅芝士更係其中精彩嘅部份,芝士柔軟芝香,又帶少少黏口感;要挑剔就一定係啲生菜,因為被啲醬汁「浸淋」,無晒生菜應有嘅索索聲爽脆感,好似撈咗幾塊蠔油生菜咁,唔知晌生菜之下,再搵幾片薄薄青瓜片隔一隔,效果會唔會仲好啲呢?
焦糖意大利鮮奶咖啡 $35
套餐所包嘅三款Mövenpick咖啡都好啱自己心水,但始終都對焦糖有多少少偏愛。話係大杯裝,其實大概係一般12oz嘅份量,以依家嘅專門咖啡店,都只係普通份量。咖啡以紙杯盛載,所以打開蓋,唔會見有咩拉花嘅花巧嘢,倒是感覺咖啡醇厚芳香,奶泡口感柔滑,加上嗒落徐徐滲入舌尖焦糖嘅苦甜,感受到用料及製作仍帶著誠意。
一份出色嘅三文治,加上一杯香濃嘅咖啡,雖則未完全將工作、生活上嘅煩惱一掃而空,但好似經常身處人流如鲫嘅中環,看著打工仔急促嘅步履,輕輕鬆鬆咁食個晏,渡過一個小小閑暇,唔使趕返公司,那一刻悠然係可以由心去感受到嘅! |
|
|
Paul Lafayet |
標題 : 多謝都嚟唔徹嘅贈食 |
地址 : 尖沙咀河內道18號K11購物藝術館G23舖 |
地區 : 尖沙咀 |
|
現時分數:
|
日期 : 2012-05-31 11:03:15
姨仔一晌唔嗜甜品嘅人,佢食完Paul Lafayet嘅法式燉蛋竟然話好好食,仲竟然專燈走多一轉買嚟請我倆公婆食,真係唔話得!既然係佢嘅推介,又係Paul Lafayet出品,甜品又開正我嗰瓣,點會唔心郁郁丫,真係連聲多謝都嚟唔徹呀!
法式燉蛋
典雅有鄉土味嘅「瓦砵」,印有Paul Lafayet字樣,已經係佢品牌無出其右嘅印記。燉蛋面層嘅焦糖做得上乘,就係平均、脆甜、焦香;而內裡嘅燉蛋蛋味濃、嫩滑,食時睇到底下有粒粒雲喱拿籽,不過,講味道又唔多覺有雲喱拿味喎!
朱古力慕絲
同樣以鄉土味「杯仔」盛載,依個朱古力慕絲絕對無乜花巧嘢,要呈現就係佢嘅「原型」,即係慕絲嘅原味,朱古力慕絲做得超柔軟、細滑,黑朱古力味好濃郁,帶點甘苦;而面層鋪了一抹朱古力漿,薄薄一層,平滑又無起泡,口感同樣細膩柔滑。
依個甜品下午茶,真係簡單得嚟易滿足,再次多謝姨仔! |
|
|
井上日本料理 Inoue Japanese Restaurant |
標題 : 投井下食 |
地址 : 荃灣鱟地坊80號華成樓B座地下A1舖 |
地區 : 荃灣 |
|
現時分數:
|
日期 : 2012-05-30 12:56:07
成語「投井下石」相信好多人都明點解,意思係睇見有人要跌落陷阱裡,唔伸手救助不特止,反而推他落去兼扔多舊石頭添,比喻為乘人之危仲加以陷害,都夠晒毒。職場上依啲場景比比皆是,同事間爭上位,見你做嘅嘢有啲問題,唔出聲提水都算,有事時仲要晌老細面前踩多你兩腳,完全係「睇你死未」嘅心態。
今篇食評標題叫「投井下食」,當然係另一會事啦,講嘅係正面嘢。上次同老婆跟教會朋友一齊嚟食過井上,試咗四色魚生飯定食、鹽燒鯖魚定食,最尾嘅評語係食物做得有心機,食材具質素,值得翻兜嘅食店。所以,今次再嚟「投井」,在乎搵吓好嘢食,只係估唔到時隔無耐就再嚟食過啫。同樣完咗教會,拉埋姊妹K,人少少,一齊食個晏。
環境、服務啲閒話唔多講,上次都寫過,見2012-03-18篇「橙色部隊魚生飯」,所以,今次食評直路快放,「拿拿淋」入主題,講返啲嘢好唔好食?
火炙三文魚飯定食 $52
相信姊妹K都係三文魚迷,上次都係佢介紹我食四色魚生飯定食,不過今次佢話唔食魚生,改食依個火炙三文魚飯,定食包埋前菜同麵豉湯。前菜係中華沙律,清爽咬口;麵豉湯亦唔錯,幾濃麵豉味,又無過鹹情況。主角火炙三文魚飯,以一隻頗雅致又幾墜手嘅大飯碗盛載,飯量唔係多,女士啱啱好,男士感覺有啲啲偏少,雖然無份試,但飯粒睇落圓潤有光澤,應該唔錯;而三文魚足有6大件,冚晒成個飯面,頗厚身,炙燒成粉橙色,賣相幾靚,如果燒深色少少,可能仲好睇。
雜菜魚餅手打烏冬定食 $56
老婆鍾意食魚餅,所以揀依個雜菜魚餅手打烏冬,烏冬、拉麵類定食,因為已有湯底,所以唔會有麵豉湯送,反而跟前菜,同埋壽司、卷物各兩件,所以都幾豐富。
壽司係三文魚同墨魚壽司,做得細細件,可以一口一啖。飯粒包得唔鬆散,但食落唔會太死實,前者三文魚新鮮,不過覺得未夠油潤;後者嘅墨魚都感到用料新鮮,柔軟可口。至於卷物係兩件加洲卷,包住牛油果、蟹柳同雞蛋嘅反卷,感覺以青瓜代替雞蛋嘅版本好食啲,而且黐上蟹籽一環亦做得有啲馬虎。
主角烏冬出場,簡單配以清湯、蔥花及紫菜就係喇,無花巧,清湯味道清甜,伴以蔥花,多一朕清新感覺。手打烏冬果然唔錯,咬落有韌勁,但食落又好滑溜,食到尾嗰一炷烏冬仍然無話又腍又爛,好耐浸,仍然有咬口。個炸雜菜魚餅,一大塊,並已經切成條狀,方便食用,魚餅幾彈牙,炸過又香口啲,係魚味欠咗少少;魚餅加咗雜菜嚟搓,因為落得唔多,所以同一件炸淨魚餅分別唔係好大。
安格斯牛肉豬骨湯拉麵定食 $54
小弟就要咗個拉麵定食,上文講過,拉麵定食同樣跟前菜、壽司、卷物各兩件,款式無變。故此重點講講個拉麵,雖然係豬骨湯底,但就唔會濃到漿住個口嗰隻,豬骨味頗重,但質感輕身啲、稀啲。除牛肉,仲伴有粟米粒、蔥花、紫菜。安格斯牛肉,名字令人覺得個檔次高啲,不過依家都唔係咩特別嘢喇,牛肉頗為滑身,又無日本肥牛咁多脂肪,幾大片放晌面;唔知依度嘅麵條屬邊個派系,只見麵條本身較幼而直身,加上唔係啲啜口濃湯,所以你見唔係好掛湯,但食到「殊殊聲」,一樣過癮。
午市定食仲有好多選擇,留番第時再嚟再試!
|
|
|
必勝客 Pizza Hut |
標題 : 午飯奇遇被耍黑 |
地址 : 荔枝角深盛路9號宇晴匯2樓89-90號舖 |
地區 : 荔枝角 |
|
現時分數:
|
日期 : 2012-05-29 15:22:07
外送速遞多數叫PHD,近來都少咗去必勝客堂食,不過利用信用卡積分換咗張$100現金券,就搵埋老婆一齊嚟食個晏。我哋2:15pm到,晌門口問個帶位侍應,下午茶餐幾點,佢答2:30pm開始,不過可以入去坐住先,就入去打打躉先。
咁啱張枱一早擺好份午餐餐牌,又未夠鐘叫,出於好奇,咪比較吓午餐同下午茶餐抵幾多,一睇,全部嘢標個價錢都係一樣,例如迷你必勝批、意粉同炒焗飯。咁咪再睇會唔會配搭唔同,午餐搭餐湯一客(跟蒜蓉包兩片)或迷你凱撒沙律,再配餐飲一杯,全日汽水免費添飲;而下午茶餐又點呢,搭餐湯一客,再配熱飲或凍飲一杯,加$4可享無限添飲,同樣汽水免費添飲,兩者同樣收加一。有啲唔通,竟然午餐好似抵過下午茶餐咁,所以就問問午餐同下午茶有咩分別?
問第一個侍應,完全搭唔到,係個後生女,好新,對啲嘢好唔熟,問佢個分別,佢好唔知點算好,淨係話唔清楚,好迷惘咁行開咗,完全漠視我個問題,亦無打算請上級支援,更無意去了解番問題,之後一直都無再理我。
咁樣我就只好搵個高級啲嚟問題,以滿足我個好奇,唔問由自可,問咗就知點解之前個妹妹仔係咁嘅素質。搵咗個著套裝嘅女經理或副經理問問,午餐同下午茶究竟有咩分別,佢竟然第一句答我個價錢唔同,我即時O晒,我揸兩個餐牌,用同一款主菜「西班牙海鮮炒飯」為例,我話都係賣$75喎,同樣兩個餐都係跟湯跟餐飲,佢就再答我一句:午餐個餐湯會多跟兩片蒜蓉包;我再問:咁係咪食午餐反而應該抵啲呀?佢又「九唔搭八」咁話:兩個餐係唔同時段供應嘅。OK,我回應佢一句:咁唔該晒,我再睇睇先決定食咩丫。不如我幫佢答啦,除咗迷你必勝批、意粉同飯會同時晌兩個餐牌出現,下午茶餐就多咗一啲沙律套餐(配餐湯及餐飲)、小食套餐(只配餐飲)、甜品套餐(只配餐飲),所以如果你係食啲較飽肚如必勝批、意粉同飯嘅時候,食午餐或下午茶餐對個價錢係無分別,反而午餐彈性仲大咗,可揀餐湯或沙律,又著數咗,餐湯多兩片包,真係唔知必勝客內部點做管理同培訓?我再細心對比吓個餐牌,都睇到佢哋兩者個分別啦!唉!
問吓搞吓,都成2:25pm,我都係決定食午餐,所以同老婆晌截單前拿拿淋落單,我要咗西班牙海鮮炒飯,揀沙律;老婆就揀忌廉白汁三文魚長通粉,跟餐湯。
上面個好奇問題被人耍咗一輪,估唔到出菜都再被耍多一輪,都唔知係咪自己黑仔,真係晌必勝客食咗咁多年,未試過咁樣架。一起手,有個侍應拎咗兩片蒜蓉包嚟,以為個餐湯轉頭再上,無特別為意,跟住嚟個沙律,然後好快咖啡到咗,杯熱檸水又上埋,依刻我哋就順便同個女侍應講講,欠咗個餐湯未上,佢仲問我哋係忌廉湯定雜菜湯,滿以為轉頭就有。隔咗幾分鐘,炒飯同個長通粉前後腳嚟埋,我哋仲食到一半,見個湯無晒影,再問另一個女侍應,先至幫我哋出番個湯。真係問你服未?上菜次序已經夠晒亂,仲要甩甩漏漏。所以,嗰10%服務費真係俾得唔心甘命抵架!
唔好再講啲管理同服務,盞一肚子氣,講番廚房嘅出品,除咗個湯、麵包,其他嘢都覺得甚有水準,唔錯唔錯,所以,就不至於俾個喊包面佢。
雜菜湯,味道怪怪,湯色唔清徹,感覺蕃茄酸味有啲濁。
蒜蓉包,唔熱,無乜蒜蓉味,外層唔夠脆,包心有啲乾硬,都幾失望,因為一向佢啲蒜蓉包幾耍家,幾好食架嘛!
迷你凱撒沙律
唔止迷你,仲係簡化版,羅馬生菜撈撈醬汁,加幾粒煙肉碎、撤撤芝士就係,咩銀魚柳呀、烘麵包粒…就欠奉喇,不過雖然簡化咗,但生菜入口清爽,醬汁酸酸甜。可惜,跟沙律嗰條蒜蓉包條,同樣唔好食,又凍又乾。
西班牙海鮮炒飯 $75
論賣相,雖然無餐牌張相擺得咁靚,但睇到海鮮好足,個炒飯底色澤橙紅搶眼,又有啲紅椒、黑橄欖做配料,又添少少香草晌飯上,似模似樣。講味道,一啲都唔賴皮,個炒飯粒粒爽口唔爛,又有啲香味,雖然唔信佢會加蕃紅花嚟煮,但都已經幾好食;而且,海鮮有齊魚、蝦、帶子粒、魷魚仔,又加少少肉腸,幾豐富呀,難得質素唔差喎,所以無論賣相、味道都好滿意。
忌廉白汁三文魚長通粉 $75
雖然賣相刻意營造,但個煙三文魚花就有啲甩轆,散開咗少少。長通粉煮得幾咬口,而且幾大碟,不過,忌廉白汁味道OK,只係煮得稍為稀咗啲,唔係好掛汁;另外就係加咗黑橄欖,感覺同個汁唔太夾,因為黑橄欖比較鹹酸,個人就覺得加多少少菇菌效果應該仲好。
即磨咖啡,氣味幾香,一小罌滿滿牛奶熱辣辣,完全滿足我要多奶嘅期望,加咗之後,咖啡變得更香滑。熱檸水呢,熱水以小茶壺盛上,足以沖到兩杯熱檸水,比起一杯過咁上令人感覺慷慨咗同高檔咗。
餐後搵搵佢張意見卡,想俾俾意見講講今餐,尤其佢哋啲服務,真係唔到位兼低水平啦,不過最後都無填,因為見佢張意見卡係填完就咁交俾店員,仲要由店員填寫用餐分店、日期、時間、邊個係當值經理,咁嘅安排即係嘥氣啦,如果我寫得咁負面,仲點可能會上書到上面管理層咩?
|
|
|
印度今日 India Today |
標題 : 頂!誇誇自助午餐 |
地址 : 尖沙咀麼地道36-38號麗東大厦3樓 |
地區 : 尖沙咀 |
|
現時分數:
|
日期 : 2012-05-28 16:52:38
未至於係團購中伏,查實部份食物的確唔錯,仲好有質素,但係食後依然有啲貨不對辦嘅感覺。
印度今日長期做唔同形式團購,今勻標題:「平均 $70/位〈印度今日〉自助午餐 (2位原價 $304)」,都知依家晌團購所講嘅原價未必係真正嘅原價,最見得多係明明間餐廳都有做開百零蚊個晚餐,跟手出個團購話只需九十多,原價二百幾,嗰二百幾就係將個晚餐折散,逐道菜以單價計番出個原價價值,問你服未!
講多少少嗰次個團購,除標題外,內文仲詳細寫住二人享用「北印度自助午餐」(原價 $304 / 2 人),享樂價就$140 / 2 人,平均每位 $70,享用時段:星期五至日(12nn – 2pm,公眾假期照常),食物包括印式香烤雞、咖喱羊肉、香炸雜錦時蔬、印度咖喱角、印度薄餅、秘制三色沙律、素食春卷、咖喱雞、咖喱鮮魚、印度炒麵、印度炒飯、甜品、雪糕及餐湯等十多款北印度皇室美饌,每位奉送餐飲 1 杯,可選︰紅酒 / 白酒 / 啤酒 / 汽水 / 咖啡。更話「餐廳開業23年,菜式適合港人胃口,同樣深受在港印度鄉里歡迎。菜單源於印度皇室,材料配搭及烹飪手法都是精益求精、別具心思,菜式尤其注重香味,有別於一般只有辣味的南印度菜,印度大廚特別擅長香料處理,能夠將不同的香料組合,將香料與食物的拼配發揮得淋漓盡致,地道豐收的食材,加上獨特的香料,配合巧妙精湛的烹調方法,炮製出來的菜式不單止味道濃郁、層次豐富,每道菜式均蘊含當地的飲食智慧,總令人回味無窮!座位寬敞舒適,印度風情佈置,大伙兒聚餐,或情侶享受異國風情亦可,餐廳通風良好,絕對不怕香料味道薰染到衣物、頭髮上。」
食完之後,心裡哼咗一個字:「頂!」,實際就係一味誇大,所以先有貨不對辦嘅感覺!講吓點誇大啦,揀咗個唔使返工嘅星期六去食,當日最後所見,因有七乘滿嘅客,座位及空間顯然有啲逼狹,我同老婆坐晌窗口位,經常同背後嗰客凳撞凳,真係講唔到點座位寬敞舒適。而說到餐廳通風良好,唔知23年歷史嘅「印度今日」有無裝修過,環境殘舊得緊要,最弊係空調好唔足。你話好異國風情,除咗枱上個銀花樽仔同一室咖喱味,小弟又真係唔係好覺囉!啲餐具就咁放晌枱面,但唔覺佢張枱布係乾淨喎。而最誇應係以「自助午餐」自居,確實係自助形式,隨意任食,但食物區只係餐廳嘅一小角,一眼睇晒,款式少得可憐,亦無轉過款,無素食春卷、無咖喱鮮魚、無印度炒麵、連雪糕一樣無,所謂甜品亦只有一樣連名都唔知,又食唔出係咩嘅嘢。當問及餐廳負責人,雖態度友善,但確切回覆無雪糕,亦唔包餐飲,因為當時無記低包唔包餐飲,所以無為此爭論。正如上面都講過,嘢食係唔差,但點都係唔多對路。呻完一輪,都係時候講番啲嘢食先!
餐湯
旁邊個名牌寫住菜湯,但就唔知咩菜湯,唯一可知就係湯色深橙,唔講以為南瓜湯,但又唔係喎,總之飲唔出主要係咩菜味啦,謎一樣嘅菜湯!
秘制三色沙律
事前以為係一款沙律嚟,以三種不同色系嘅材料做成,但感覺又唔似,因為見佢擺出三大碟沙律出嚟,都搞唔清佢想講係三色定三式。不過咁,三款沙律都好好食喎,搞到我晌唔太多嘢食選擇之下,臨尾都再整多碟嚟食吓。因為三款沙律都無名牌,唯有以材料及味道幫佢哋命名啦。
第一款:酸雜菜沙律,有青瓜、甘筍、洋蔥、蕃茄粒粒,以橄欖油、醋調味,簡單得嚟口味清新。
第二款:酸奶油椰菜沙律,椰菜切細塊,以一啲酸奶油汁撈均,食落又幾好味喎。
第三款:咖喱薯仔沙律,特別在於咖喱帶有香料味,比一般酒店常見嘅咖喱薯仔沙律唔同。
印式烤雞Tandoor Chicken
兩口子都公認係全場最好食嘅食物,始終天多尼烤雞一向都係一間印度餐廳嘅手本嘢,晌依度都唔例外,雞件無話燒到「乾爭爭」,香料味夠香夠濃,又夠入味,真係無得彈,所以臨尾再食多轉沙律時,都要搭多兩件烤雞。
香炸雜錦時蔬Mix Veg Pakora
無乜特別,只係一啲香口嘢,有炸青椒、炸蕃薯片,而炸漿又極之厚身,食一兩件當試過就算。
咖喱眉豆、咖喱雜菜Mix Veg Tafrezi
蔬菜類仲見有兩盆,分別係咖喱眉豆、咖喱雜菜,睇樣認真麻麻,食都係一樣,個咖喱雜菜就好啲,不過都係嫌佢哋個汁水汪汪。
咖喱雞Chicken Curry
另一個好唔錯嘅美食,咖喱汁底伴有雞蛋件、蕃茄,咖喱唔係得個死辣,又係帶有多層香料味道,雖則雞件唔係好嫩滑,但個咖喱汁可以彌補佢嘅缺點。
咖喱羊肉Keema Mutter
依個同咖喱雞嘅咖喱有啲唔同,味道偏重,咖喱及香料味都比較濃,而羊肉心想會係一塊塊,原來唔係,碎濕濕咁樣,同肉醬或免治牛差唔多,齋食無咁好,所以用嚟夾住印度薄餅食就最夾喇。
菠菜豆腐粒Paiak Paneer
有驚喜喎,菠菜打到爛,又未爛得晒,似菠菜蓉但仲食到一絲絲質感,內裡又撈咗啲豆腐粒同青豆,口感幾過癮,味道又比較清,同樣淨食唔係咁好,搵印度薄餅伴住嚟食就一流喇。
印度炒飯Indian Bashati Rice Dullao
飯粒比較幼身偏長,此外,其實個炒飯仲無咩特別,都係加咗啲蛋嚟炒,不過,搭住唔同咖喱菜式一齊食,無咗佢又令人若有所失咁囉。
印度咖喱角Samosa
有啲餐廳譯佢為印度三角炸餃。包得大大件,漲卜卜,外皮唔似我哋港式嘅咖喱角咁薄身,佢會比較厚,不過咬落幾鬆化。內餡有青豆、薯仔蓉,填到滿一滿,都咪講笑,食落幾飽肚架!
印度薄餅Naan
一直都唔見有印度薄餅,都感到有啲出奇,食到中段,去完晒啲咖喱角,先至換咗薄餅,原因都係無位擺嘢食。薄餅薄身有油香,軟軟熟,烤得少少燶有啲焦碳香,最愛搭咖喱、咖喱羊肉、菠菜蓉嚟食。其他沙律傍有兩兜醬,一綠一紅,綠者係帶有薄荷味嘅醬汁,紅者就酸酸辣辣,因為無寫明係乜,都係估估吓,相信應該係用嚟蘸咖喱角、春卷、薄餅嘅。
甜品
一盆啡啡黃黃嘅糕,上面鋪有少少果仁碎,名牌無寫係咩,只係寫住甜品。質感軟糯糯,食唔出係乜,可能係啲豆蓉,一味得個甜字。
其實以$70食咗好幾款甚有質素嘅咖喱菜式嚟講,都算抵嘅,不過若以原價,加上依度嘅環境同服務,翻兜嘅可能性微乎其微喇! |
|
|
稻坊 Tao Square |
標題 : 短週早茶在稻坊 |
地址 : 荔枝角寶輪街1號曼克頓山商場(曼坊)1樓102舖 |
地區 : 荔枝角 |
|
現時分數:
|
日期 : 2012-05-25 10:37:41
依個週末遇正短週唔使返工,舅仔又咁啱都唔使,老婆同姨仔週六例休,難得大家依朝無細藝,就一齊行遠少少過嚟稻坊飲啖茶,食個包。
都差唔多成10點,等位唔多人,等咗一陣就有位。個場都裝修得幾靚喎,天花一列水晶燈,亮麗但唔俗套;近窗係一排卡位,感覺較為闊落光猛,場中就稍為逼啲,全部枱凳都係一張緊貼另一張。
點心紙分為炸點、蒸點、粥點、腸點、飯點、甜點……,大部份以大中小點計價錢,至於大中小點咩價,在於你晌邊個日子、邊個時段幫襯;不過,有啲又標明價錢,而且,仲有一張紙仔「時尚點心」,有晒價錢之餘,仲圖文並茂添;當然,唔少得一啲優惠美點,價錢會更抵啲。拿住堆點心紙,輪流揀幾款點心,剔吓剔吓就咁剔咗成10樣嘢,應該都差唔多,唔夠再補單。
鮮蝦炸油角
個名唔係好記得,不過,外貌跟過農曆年時食嘅油角一樣,角邊扭晒花。餡內包裹蔥花、蝦肉,食起嚟無咁油膩,不過,外皮有啲厚,又唔夠脆。
酥皮叉燒餐包 $13.8
叉燒餐包加咗菠蘿包皮嘅版本,上面層菠蘿包皮幾鬆脆,包身亦都發得鬆軟,不過,叉燒餡得好少,唔好見佢好似大大個,漲卜卜,查實內裡好「真空」。
陳皮牛肉腸(大點)
即拉腸粉夠熱辣,始終好食啲,腸粉皮拉得都夠薄,透出牛肉,牛肉係用免治牛,但分佈有啲唔平均,兼且陳皮香味唔突出,可謂美中不足。
擂沙紫麥包(中點)
紫麥包比人覺得帶有健康元素,但係味道唔覺有好大唔同;擂沙令個想起擂沙湯圓,包內嘅芝麻流心好香芝麻味,流心效果都勉強OK,因為有一半唔係好流,變咗芝麻蓉。
醬皇金錢肚(大點)
金錢肚炆得好腍,醬汁濃香幾惹味,真係想叫個白飯嚟撈架,哈哈!所以,墊底嘅蘿蔔都唔會走雞。
娥姐蒸粉果(中點)
包得大大粒,但係外皮厚同埋黐牙,就算餡料有幾足,都係好影響口感。
京滬小籠包 $14.8
小籠包做得不過不失啦,小籠包內注滿湯汁,餡肉幾鮮,係多咗少少肥肉,而十多摺包得算係咁。
蒜香春卷拼鹹水角 $13.8
好大路嘅油炸點心,好處就係雙拼咗,一碟可食到兩款嘢。春卷帶有少少蒜香,濃啲就仲好,炸得又幾脆口,唔錯;鹹水角,無咩特別,就係大多數人食點心會叫嘅傳統。
皮蛋瘦肉粥(小點)
當得小點,你都唔好望有好多料,查實又真係可以話無乜料,粥底都綿,只不過皮蛋又好,瘦肉又好,唔多見影,有都碎濕濕得緊要。
砵仔蘿蔔糕 $12.8
個蒸蘿蔔糕麻麻哋好食,一則蘿蔔味唔濃,二則個質感有少少削,最衰係裡面比較多肥豬肉,屋企人唔太鍾意。
食完10籠嘢,大家都覺得差唔多飽,再者食物質素又無話好好,故此都無再加單,飲多啖茶,吹多幾句,都埋單走人。因為之前請咗幾餐,依餐姨仔話唔好同佢掙,咁多謝晒佢喇。事後無問佢食咗幾多,我估大概都要兩舊水落樓。
|
|
|
Regala Cafe & Dessert Bar |
標題 : 唔係無聊.只因無料 |
地址 : 赤鱲角香港機場B區客運大樓2樓 |
地區 : 赤鱲角 |
|
現時分數:
|
日期 : 2012-05-24 11:04:57
同機場富豪酒店真係有啲緣份,早前嚟過佢嘅藝廊咖啡室食自助晚餐,嗰餐食咗唔少嘢,感覺幾暢懷;估唔到咁快又再入嚟食多餐,不過就唔係藝廊啦,而係晌2/F嘅Regala Café,嘆下午茶啫。咁遠入到嚟,只為食個下午茶?唔係無聊,只因無料,因為喜獲4張下午茶自助餐券,就拉埋表哥表嫂,仲有表姪女一齊入去食。
一行四人,先約晌東涌東薈城等,再搭酒店免費穿梭巴士入去。表哥表嫂仲話難得入嚟東涌,專燈早啲可以行吓東薈城,而且,見Regala Café旁邊有個通道口,原來係條冷氣天橋直駁去機場一號客運大樓嘅到埗大堂,步行都係5min-10min,所以食完之後,揀搭遲一兩個班次嘅穿梭巴士出返東涌,帶個細路參觀吓機場。因為表姪女都未搭過飛機,從來都未嚟過機場,無法啦,佢咁唔聽話,讀書又心散,去遠啲嘅旅行,表嫂話等佢乖啲,考得好啲先再講喎。
下午茶自助餐由3:00pm開始,去到5:30pm,成人$118,小童$98,收加一,比起市區啲下午茶自助餐,大概平二到四乘,仲要有信用卡折扣優惠,經常都見富豪系嘅酒店推出唔少信用卡折扣,長期都有。不過咁,雖然平,但食物嘅選擇同質素,跟個價錢又成正比,晌依度確係好少嘢揀,絕對可以試勻晒所有嘢,而質素亦平平無奇,無甚驚喜。
第一轉
開開胃先,所以,理所當然就係沙律打頭陣。沙律吧選擇少,得幾款,先嚟一碟紅生菜、九芽菜、粟米粒、車厘茄,加啲油醋汁,伴一件細細件嘅火腿生菜芝士法包三文治。沙律菜幾清爽,咬落索索聲,油醋汁酸酸咪,叫醒吓個胃,而個法包唔差,外皮鬆脆,包人軟熟。
第二轉
都係再想食多少少沙律,只揀九芽菜搭紫椰菜,淋上法汁,再加埋哈蜜瓜,菠蘿,提子,啲生果料係晌朱古力噴泉嗰邊拎。食咗兩份沙律,真係夠晒「開胃」喇!
第三轉
盡試所有熱盤食物,包括小籠包、迷你薄餅、什錦炒烏冬、煙肉腸仔卷、寶雲酥焗青口、炸雞寶、羊肉車厘茄串。中式點心仲有燒賣,不過見賣相麻麻,所以無試。咁多樣嘢,稍為個羊肉車厘茄串同個寶雲酥焗青口見得吓人,其他都係好普通嘢。咁個羊肉串又真係幾好食,肉味濃少少羶,肉質柔嫩,車厘茄嘅清爽又平衡番羊肉嘅濃香。而個焗青口以大量麵包糠同焗,加添香脆口感。
第四轉
除咗件法包三文治,再試埋啲手指三文治,一共有兩款:芝士火腿同吞拿魚,吞拿魚調校得比較乾身。反而烘焗嘅豬肉卷同咖喱菜批唔錯喎,兩者嘅酥皮都做得香脆,咖喱香得嚟帶少少辣,細細件咁,輕易一件接一件呀!
第五轉
去到依刻,都係甜點時間,餐廳正中間嘅圓枱就擺放咗近10款甜品,先試其中7款,包括:杯裝麵包布甸、香蕉蛋糕、果撻、鮮果忌廉蛋糕、香梨慕絲餅、特濃朱古力蛋糕、咖啡蛋糕。睇名你都知有啲都係大路貨式,不過,其中嘅麵包布甸、香蕉蛋糕、香梨慕絲餅、特濃朱古力蛋糕做得頗出色,尤其後兩者,香梨慕絲餅很濃梨味,而且頗為清甜;特濃朱古力蛋糕就軟滑味濃,質感幼軟。
第六轉
除麵包布甸,以小杯形式嘅仲有士多啤梨布甸同雲呢拿奶凍,士多啤梨布甸味道比較甜,反而奶凍好食啲,口感好柔滑,上面仲加多一小件馬卡龍,令人更討好。
第七轉
甜品時間仲未完,梗係要嘆番件即做班戟啦,班戟皮做得既薄又柔軟,可惜係生果配料選擇少,只得水蜜桃同芒果,乾配料亦都只係得粟米片同朱古力脆米。不過件班戟都好好食,除因為係新鮮製作之外,加多一球朱古力低脂意大利雪糕,淋埋朱古力醬汁,一凍一熱,冰火嘅口感,大呼過癮啦。
最後一轉
食咗幾轉甜品都係仲未止咳,硬係想試埋佢另一款低脂雪糕先想收手,咁好事成雙,就朱古力、士多啤梨各一球,再淋啲士多啤梨糖漿,又加啲粟米脆片。雖然雪糕無標明咩品牌,只知係低脂意大利雪糕,但確實口感幾軟滑。
食物方面稍為遜色,但係就好欣賞嘅係佢個場,一上到2/F,感覺豁然開朗,地方夠大,樓底又幾十呎高,環境好開揚。由於餐廳係Café形式,全場都係矮矮嘅梳化凳,配大大張長形茶几,梳化凳好坐又好挨,又唔似Pacific Coffee嗰啲咁大張,令人坐得幾舒服,只係食嘢有啲唔方便。雖然環境正,但係可能酒店人流少,餐廳客又少,所以好唔夠冷氣,奇景就係晌一啲角落位擺放咗好幾部吹風機,等啲空氣更流通,令人覺得無咁翳焗。除咗環境係賣點,服務都唔錯,可能源於客少,加上又係酒店,所以,服務都比較妥貼,斟茶遞水都係快手快腳,態度有禮。
|
|
|
魚米
|
標題 : 菜飯.米線抵食下午茶 |
地址 : 荔枝角深盛路9號宇晴軒商場2樓91號舖 |
地區 : 荔枝角 |
|
現時分數:
|
日期 : 2012-05-23 12:12:13
一向都好少走過嚟西九四小龍搵食,不過,繼早前逛咗去碧海藍天吉之島內嘅CoCo壹番屋,今個晏晝有目得咁又嚟咗依頭,就係宇晴軒嘅魚米。
講話有目的,原因團購所致,見佢出咗個團購,$30購原價$60嘅「魚米」現金券,太古、荔枝角、黃埔3間分店都用得,仲要唔使預早揀定去邊間,有3個月期限,一至日都合用,只係食晏12:00 –2:00pm除外,堂食、外賣都可以。見只係$30,試吓無妨,所以就買嚟用晌食下午茶度。
入到去感覺幾好,一室光潔明亮,近門口一排卡最得我歡心,因為夠闊落好挨,此外都有好多活動式二人或四人枱;中間靠入仲有一排大長枱,應該對坐可坐六人,不過最唔鍾意,一則無椅背無得挨,二則直情硬木凳,相信都唔多會坐得舒服。內裡一牆店家嘅大魚圖案標誌,覺得設計得簡約有趣,餐紙同樣以此為圖案!
咪聽個名以為淨係食魚湯米線,打開多款餐牌睇睇,主餐牌內確印備咗好多米線、泡飯、菜飯、烏冬、炒飯,連咖喱都有,仲有多款滋味小食、拼盤、甜品、飲品;而其他餐牌就有好多炒粉飯麵嘅套餐,一啲二人餐,適合夜晚嚟食嘅小菜套餐,都幾多元化。咁講明嚟食下午茶,梗係睇下午茶餐牌啦,有十多款,$26-$33,包一杯咖茶或特色熱飲,凍飲加$2,全日免收加一,亦都無茶芥。
手執一張$60現金券,兩個下午茶餐就差唔多價,至多補少少。結果小弟揀咗個菜飯,老婆就要米線,最後補番一蚊雞就可以鬆人,即係實質出咗$31,當然係非常抵食啦!
果醋豬軟骨菜飯 $32 + 紅葡萄柚汁
果醋聽起嚟感覺較健康,其實跟平時食到嘅無錫骨嘅味道差唔多,都係酸酸甜甜,而一客有3大件豬軟骨,以下午茶餐嚟講,唔算多亦唔算少。豬軟骨做得頗為鬆化,雖然稍稍肥啲,但可能因為以果醋烹煮,又唔覺油膩,亦都非常入味。此外,個菜飯我都幾欣賞,飯質鬆軟,最好係無咗一般菜飯常遇到油淋淋嘅情況。
至於杯紅葡萄柚汁,雖然無問佢點溝出嚟,但感到似係利賓納溝柚子茶,味道唔算怪怪,只係初嚐有啲得意嘅感覺,可能凍飲效果會好啲。
麻辣豬潤牛肉米線 $29 + 金桔青檸
雖名為麻辣,但睇樣未見到嚇人噴火嘅模樣,不過食落原來花椒下得幾重手,感覺幾麻吓,至於辣呢,仍晌可接受嘅地步,初初食都只係辣辣哋咁,係食到尾先有燙咀嘅感覺,依啲都係老婆食完碗米線嘅心聲,小弟只係淺嗜一吓個麻辣湯底啫。豬潤、牛肉各有幾塊,加埋豆卜、酸菜、肉碎,材料不過不失,唯獨米線嘅份量唔少。
金桔青檸,青檸味比較重啲,金桔味就若隱若現,比起不時都係檸茶檸水,試吓一次依杯金桔青檸都無妨。
只係個下午茶餐,其實份量跟正餐差唔多,整體味道都幾OK,至少唔覺因為用咗團購券有將貨就價嘅感覺,手上還有一張,留待下次再嚟,可能食早餐,又或照舊嚟下午菜,不過就要試試佢啲鮮魚湯得唔得,話晒係佢嘅主打! |
|
|
Brat |
標題 : 貴富狗 |
地址 : 中環蘇豪伊利近街7號 |
地區 : 中環 |
|
現時分數:
|
日期 : 2012-05-21 11:36:19
貴在價錢,富在內餡,就係我俾Brat嘅終極評語。每份熱狗賣近百大洋,算係城中數一數二之貴,但有質素、有特色,又有其吸引人之處。所以搵咗依度幫太太慶祝生日。
全店黑白灰為主色調,門口落地玻璃,地台單以水泥鋪成,但配襯以原色嘅木枱木凳,冷酷得嚟有種隨和感。加上一室燈光調校至昏昏暗暗,而枱上又點有蠟燭杯,雖然係熱狗店(其實應該係美式香腸專門店),但入夜後嘅店內環境,確幾有氣氛吓,唔係拘束,而係叫人放鬆咁!
打開餐牌,有沙律、餐湯、全日早餐、廚師意粉精選、香腸拼盤、10吋薄餅、多款濃郁惹味油炸美式小食(如炸芝士、洋蔥圈、水牛雞翼……)及多款配菜;當然仲有餐牌右手一欄嘅「Be A Brat」,主打肉腸熱狗,細數一下有15款之多,好多都極具特色嘅,如乾番茄香蒜雅枝竹肉腸、羅勒羅馬綿羊芝士香蒜肉腸、古耶芝士艾曼圖芝士香蒜肉腸、乾番茄水牛芝士肉腸……,所有肉腸有公仔標明係雞肉(混雜埋火雞肉)、豬肉、牛肉定素腸,而每隻腸都有說明包括咩成份,等你心裡有數。麵包方面只有兩款:招牌白包同黑麥包,店員介紹話前者似係一種短身嘅法包,口感鬆脆富牛油香;而後者教軟身,麥味會重啲又帶有少少酸甜味。此外,有5款芥末醬汁,及多款配料供配搭,但每個包只限揀一款,真係每項細節都做得精細。
其實散叫逐樣計都幾確係幾貴,不過,可幸早前店子搞團購推廣,$68就可以有一個精選一人餐,包一款熱狗或意粉,一客小食,再加一客甜品同餐飲。而下面個價目係散叫價,以供參考!
炸薯條 $40及炸番薯條 $45
先來兩個小食,炸薯條係配自家製黑松露醬,而炸番薯條則配沒有跟任何醬汁。薯條同番薯條同樣炸得鬆脆唔油,以兩個小不鏽鋼小筲箕盛載,型格十足。雖然薯條係連皮切,但沒有影響口感,蘸點黑松露醬,雖則松露香味唔係好濃,在蛋黃醬中隱約滲出點點松露幽香,配以炸薯條感覺唔錯,至少比起經常食到嘅蕃茄醬有多啲新鮮感啦。至於炸番薯,感覺更特別,甜甜好有番薯嘅粉香,小弟覺得淨食最體現番薯嘅甜香,麥記都不妨諗諗佢啦,唔使上嚟食成四十幾蚊一客咁貴丫嘛。
廚師精選意粉(Chef’s Pasta) $128
兩個主菜,揀一個意粉,一個熱狗。今晚嘅意粉精選係西班牙辣肉腸意大利粉配忌廉汁,西班牙辣肉腸叫Chorizo,真係唔講唔識,餐牌介紹隻腸係以芫茜、蒜頭同啲辣味香料做嘅雞肉腸,香香辣辣幾惹味,腸肉又好有質感,唔會一糰粉,又幾好喎。而意粉煮得煙韌有咬口,恰到好處,忌廉汁調校稀杰剛好,很香忌廉味,滑溜得嚟意粉又掛到汁,整體做得很到功夫。不過,單叫價賣到$128一客,貴唔貴就見人見智。
大啡菇雞肉腸熱狗(Portobello) $88
麵包揀來黑麥包,貪其重麥香,而包身長度厚度係店方要求本地麵包工場特製,長度同條肉腸啱啱好,而厚度唔會太橫,免得難食。熱狗包放晌印有店名嘅木板送上,又一型格手法。肉腸成份包括多種菇菌:大啡菇、牛肝菌、香信菇,並以鼠尾草調味,我當然無咁叻食得出個成份啦,只係睇番個餐牌,有啲字都未識解,先問問阿侍應哥仔啫,怪不之得咁濃菌味啦。加上我最鍾意嘅蜜糖芥末汁,微辣帶甜,腸肉又油潤,外皮烤得香脆,果然甚出色。阿哥仔順便介紹埋,佢話店內嘅熱狗腸用美國出產嘅全天然腸衣,安心食用之餘又健康,而香腸都係先烚熟,再以火山石爐燒香,所以零舍脆口,仲有係腸肉以純手打,不會攪得太碎,怪不之得食落有粒粒口感。原來一條腸咁大有學問,唔講唔知,所以要賣到咁貴一客熱狗。
雲喱拿雪糕
雪糕係Ben & Jerry’s品牌,不過賣相就過於普通,單單一隻香蕉船長碟,放上兩球雲喱拿雪糕,撤少少唂咕粉就係喇,無多餘半點裝飾。雪糕味道感覺天然,雲喱拿味唔造作,質感柔滑。
餐飲
小弟點咗杯鮮奶咖啡,散叫要成$40架,口感幾細膩香滑,而太太例牌熱檸水,清清味蕾,亦為依餐作結!估唔到只係食熱狗、意粉,太太對今餐生日飯都收貨喎,佢話就係啲腸夠特別囉! |
|
|
樂園潮州粉麵
|
標題 : 失落園 |
地址 : 美孚美孚新村4期百老匯街93號 |
地區 : 美孚 |
|
現時分數:
|
日期 : 2012-05-18 18:00:32
平時星期日比較得閒啲,都會下廚同屋企人晌屋企食,不過依晚同太太都有啲事,索性同埋姨仔舅仔一齊出街食,好耐無打過冷,所以就去同區嘅樂園食吓潮州嘢。
樂園晌美孚都好似好耐,一室無乜裝修,係街坊食堂,逼逼狹狹,食碗粉麵又得,鹵水打冷又得。門口明檔掛滿鹵水鵝、紅腸、墨魚、生腸及多款潮州嘢,價位唔算貴,都有幾多街坊幫襯。
所有潮州嘢,一張餐牌睇晒,各款鹵水、小食、泡粥、炒蜆共40多款,點咗幾款小食,加個炒大蜆,一個鹹菜豬肚湯,再整個泡粥,咁就已經好夠數。
鹵水鵝掌 $55
鵝掌一向肉唔多,志在「倫」吓個鹵水味,雖則鵝掌好入味,可惜鹵水偏鹹,有啲失望,否則應該個鹵水鵝掌唔錯。
蘿蔔豬皮 $25
蘿蔔好腍,不過唔夠清甜,而且有渣;豬皮亦都係普通,問題在於有啲啲韌,而且份量亦好少。
香腸墨魚 $50
賣到$50一客,都咪話唔貴,但係墨魚唔少,同香腸有一半一半。香腸就一般,有少許肥肉,反而墨魚幾好,柔韌得嚟有墨魚味。
即炒大蜆 $40
大蜆果真即炒,上枱好香,豉汁幾濃香,蜆肉都鮮甜,不過空殼唔少,有啲搵笨。
鹹菜豬肚湯 $48
我見有啲食家寫依道係胡椒豬肚湯,相信記錯居多,店家只有一款鹹菜豬肚湯,亦係打冷鋪常見湯水,有啲店舖都有鹹菜胡椒豬肚湯或胡椒豬肚湯,上次晌增煇試過佢個胡椒豬肚湯,確係幾正。今餐個鹹菜豬肚湯,鹹鹹酸酸,天熱飲幾醒謂,鹹酸菜多到不得了,豬肚就偏少,得嗰幾舊。整體個湯水都OK,但我嘅老婆一飲就知佢落咗味精,要扣分。
方魚蠔仔粥 $60
潮州粥一向都幾有特色,又似粥,又似飯。方魚蠔仔粥,方魚碎碎好鬼少,蠔仔就意外地有幾多,加埋少少肉碎,像湯飯般,加上個湯底有少少魚鮮味,算為成晚拉番啲分。
今餐食咗唔少嘢,食完有啲失落,對樂園真係有啲失望,據知佢都係依區打冷老字號,咁耐都唔執應該有一定食力,莫非越做越差?屋企人同聲話唔會再嚟喎!唉,我都有同感。
|
|
|
樂園潮州粉麵
|
標題 : 失落園 |
地址 : 美孚美孚新村4期百老匯街93號 |
地區 : 美孚 |
|
現時分數:
|
日期 : 2012-05-17 17:58:14
平時星期日比較得閒啲,都會下廚同屋企人晌屋企食,不過依晚同太太都有啲事,索性同埋姨仔舅仔一齊出街食,好耐無打過冷,所以就去同區嘅樂園食吓潮州嘢。
樂園晌美孚都好似好耐,一室無乜裝修,係街坊食堂,逼逼狹狹,食碗粉麵又得,鹵水打冷又得。門口明檔掛滿鹵水鵝、紅腸、墨魚、生腸及多款潮州嘢,價位唔算貴,都有幾多街坊幫襯。
所有潮州嘢,一張餐牌睇晒,各款鹵水、小食、泡粥、炒蜆共40多款,點咗幾款小食,加個炒大蜆,一個鹹菜豬肚湯,再整個泡粥,咁就已經好夠數。
鹵水鵝掌 $55
鵝掌一向肉唔多,志在「倫」吓個鹵水味,雖則鵝掌好入味,可惜鹵水偏鹹,有啲失望,否則應該個鹵水鵝掌唔錯。
蘿蔔豬皮 $25
蘿蔔好腍,不過唔夠清甜,而且有渣;豬皮亦都係普通,問題在於有啲啲韌,而且份量亦好少。
香腸墨魚 $50
賣到$50一客,都咪話唔貴,但係墨魚唔少,同香腸有一半一半。香腸就一般,有少許肥肉,反而墨魚幾好,柔韌得嚟有墨魚味。
即炒大蜆 $40
大蜆果真即炒,上枱好香,豉汁幾濃香,蜆肉都鮮甜,不過空殼唔少,有啲搵笨。
鹹菜豬肚湯 $48
我見有啲食家寫依道係胡椒豬肚湯,相信記錯居多,店家只有一款鹹菜豬肚湯,亦係打冷鋪常見湯水,有啲店舖都有鹹菜胡椒豬肚湯或胡椒豬肚湯,上次晌增煇試過佢個胡椒豬肚湯,確係幾正。今餐個鹹菜豬肚湯,鹹鹹酸酸,天熱飲幾醒謂,鹹酸菜多到不得了,豬肚就偏少,得嗰幾舊。整體個湯水都OK,但我嘅老婆一飲就知佢落咗味精,要扣分。
方魚蠔仔粥 $60
潮州粥一向都幾有特色,又似粥,又似飯。方魚蠔仔粥,方魚碎碎好鬼少,蠔仔就意外地有幾多,加埋少少肉碎,像湯飯般,加上個湯底有少少魚鮮味,算為成晚拉番啲分。
今餐食咗唔少嘢,食完有啲失落,對樂園真係有啲失望,據知佢都係依區打冷老字號,咁耐都唔執應該有一定食力,莫非越做越差?屋企人同聲話唔會再嚟喎!唉,我都有同感。
|
|
|
東海酒家 East Ocean Restaurant |
標題 : 福如東海生日飯 |
地址 : 大角咀海輝道11號奧海城1期1樓101號舖 |
地區 : 大角咀 |
|
現時分數:
|
日期 : 2012-05-17 13:37:29
今餐又係教會細胞小組飯局,上次去Pancake Colour唔多齊人,今勻就差唔多出齊晒,11大4細成15人,仲有幾個組員生日,自不然幫佢哋慶埋生日啦,就祝壽星仔、壽星女福如東海。東海有幾樣嘢好,一就係有16人大枱,我哋一次過坐得晒,二就係就算週末旺日,都無要我哋分時段,唔使話要幾點交枱,三就係免切餅費,仲俾啲新碟我哋分蛋糕,又預備埋刀叉,服務真係幾到位,抵讚。雖然我哋無叫貴價嘅套餐,只係散叫小菜,埋單都係千四多啲,絕對無遭白眼,叫人食得舒服開心。
哩一類飯局,志在人齊高高興,食就唔係太講究,況且在座各位對食又真係無所謂,打開本餐牌,盡量搵啲經濟實惠,一人揀一款,就咁點咗9個餸,扮晒九大簋,加兩個湯羮,已經超豐富。況且仲有飯後甜品-大大個生日蛋糕,夠晒皮啦!
北京片皮鴨 $198
唔知點解,好多時大棚人嘅飯局,好鍾意叫依道菜,貪其一次過滿足大家三個願望:好睇、好玩、好食。好睇-就係睇住大大隻燒鴨送嚟,童叟無欺咁,由師傅晌堂前將隻燒鴨「剥光豬」,睇睇師傅刀法如何,唔差,無乜黐住肉,否則變咗北京填鴨;好玩-就梗係由自己親手包薄餅皮,加醬加京蔥加瓜絲啦,我就勁貪心,加到差啲餅皮都包唔住,跟手一口噬落去嗰下先過癮;好食-通常一人分得一、兩件,當餐前小食,少吃多滋味,再者,一般大酒樓賣得片皮鴨都唔會太差,上枱時都色香俱在,食落皮幾甘香鬆脆,當然少少皮下油脂係奉旨,一件半件無問題嘅。
生菜包鴨崧 $68
叫得片皮鴨,「二食」就似乎係指定動作,無理由淨得個鴨殼由佢架,梗係加少少錢整多一道菜啦,酒家嘅「片皮鴨二食」係生菜包鴨崧,又係一道好玩好食嘅餸。鴨殼起肉,加埋蔥粒、菜脯粒、冬菇粒炒成粒粒,伴生菜包住食,鴨崧惹味有口感,生菜爽脆夠清生,當小食又得,鴨崧撈飯又得,得咗!
海參醬爆雞煲 $98
肉類菜式仲揀咗依個煲仔菜,不過份量方面感覺偏少。主材料係海參同雞件,送嚟滾熱辣,滋滋聲,海參軟腍有咬口,又夠入味,而雞件亦夠鮮嫩,醬汁味道類似啫啫雞煲咁,不失為啫啫雞煲升級版,不過又如一般煲仔菜通病,煲底油淋淋,食到尾嗰幾件雞,要稍稍隔油先可以控制吓膽固醇唔過高。
乾燒川味蝦球 $108
幾款肉類菜式,輪到講講海鮮類,依味「乾燒川味蝦球」專為迎合嗜辣嘅群眾。大蝦去殼界背起雙飛,以蔥度薑片乾椒乾燒,蝦球本身夠大隻,有睇頭食落有肉地,而且夠晒爽彈;雖以川味為名,但小弟覺得辣度有所為港人調減過,無想像中咁火辣,唔嗜辣嘅我都可接受。
香草鮮茄星斑骨腩 $88
另一道開謂好餸飯嘅海鮮菜,主因就係個香草鮮茄汁底,香草味唔算好強,但蕃茄味絕對搶鏡,酸酸香香,撈飯嘅好朋友。雖則星斑,但講明骨腩,唔知係咪無斑腩咁多肉呢?但份量無交行貨,大大件,一煲都係,仲有啲菇菌作為配菜添。
海鮮賽螃蟹 $88
以普通嘅賽螃蟹為基礎,再加少少蝦仁、帶子粒、魷魚,就成了一道海鮮版賽螃蟹。蛋白炒得頗嫩滑,加上少少陳醋,幾好味。當然,所加嘅海鮮粒,只係錦上添花啫!
西湖牛肉羮 $88
問過侍應,一窩羮約莫分到七至八碗仔,與其叫一窩加大,不如叫兩窩唔同款嘅,等大家有得揀都好。因為一枱都係餸,所以侍應姐姐就係側邊枱仔分好先送上枱。牛肉羮絕對足料,有相為証,牛肉多到冚,啖啖碎牛,個湯羮本身都做得唔錯,濃稠夠滑,唔會水淋淋,又下咗好多蛋花。
粟米魚肚羮 $88
試就個牛肉羮,依個粟米魚肚羮就無試,不過睇樣都係同樣足料,魚肚雖然細細粒,但勝在夠多,打蛋花,羮底一樣滑流清甜,所以,兩個羮都算無揀錯。
魚湯雲吞時蔬 $88
之前食咗咁多肉,例牌會有幾道蔬菜類菜式嚟平衡一下。魚湯浸時蔬就令啲菜特別好食,時蔬用上大白菜仔,魚湯色澤奶白,味道鮮甜,好對板。雲吞包得大粒,餡肉味鮮,亦都唔錯,可恨一窩只有6粒,手快有手慢無。如果人少更值得叫依味餸,因為一窩之內有齊肉、菜、湯呀!
蒜蓉牛油炒野菌 $78
蒜蓉牛油炒,唔使講,都知道貪其惹味甘香。野菌有磨菇、冬菇、秀珍菇,加上芥蘭度、紫洋蔥,配以蒜蓉、牛油香炒,聞落雖香,但食落似乎蒜頭同牛油味都似有還無,有啲失望囉。
蝴蝶夾件藕餅 $78
見個名咁特別,貪得意叫嚟試試,不過一上枱就有「賴嘢」嘅感覺,因為一客只得4件,以蒸包夾住蓮藕餅,我哋十多人都唔知點分。幸好同枱嘅媽媽眼明手快,以佢哋不時跟身嘅小型較剪,將佢哋一開二、一開三,總算大部人都叫有得試吓。講番味道,就普普通通,唔係人多應叫嘅菜式,真失策。
白飯$9個,茶芥$11位,佢又好喎,計我哋11個大人加一個大啲細路,無收足15位茶錢,加一就自不然嘅事。依間東海,雖然第一次嚟,不過印象幾好,食物質素、服務唔錯,限制又少,地方夠大樓底又高,只係枱凳排得有啲密,第時搞啲大圍飯局,可列入考慮之列,值得再幫襯嘅食府。
|
|
|
佳記甜品
|
標題 : 大欖林道後嘆B仔船 |
地址 : 元朗又新街置富中心7號 |
地區 : 元朗 |
|
現時分數:
|
日期 : 2012-05-15 14:04:48
相約好一大班朋友行山,路線由朋友定,係由大帽山郊野公園行到去大欖郊野公園嘅「大欖林道」,以大棠為終點,亦預告咗路程頗長,考耐力,不過就唔難行,全程絕大多數都係石屎路。天公造美,天氣清爽,雖然行咗都成4、5個鍾,但又真係唔算辛苦。最後,到埗大棠,坐車出番元朗,就齊齊去咗佳記食碗甜品過過口癮。
雖然時為傍晚,唔係食甜品嘅黃金時段,依然人聲鼎沸,無他嘅,佢哋做埋小食,見好多客都係篤緊腸粉、魚蛋或雞翼尖。當然,佳記晌元朗好有人氣,好多好似我哋依類區外客,入開嚟就順路幫襯。我哋又成十幾個人,等咗一陣先拍到張三連枱過我哋。
我同老婆叫咗一份B仔船,因為仲有下場,夜晚仲有一個飯局,所以一份B仔船兩個人食,已經夠晒。
B仔船,香蕉船大家都係乜,而「B仔」二字差唔多等同好多生果咁解,所以哩個B仔船就即係生果加雪糕喇!以常用香蕉船嘅長形瓷兜,下面載住好多生果,有香蕉、西瓜、蜜瓜、哈蜜瓜、水蜜桃、椰果,架床疊屋,堆到滿一滿,再加一大球雲喱拿雪糕上面,勝在大堆頭,拎到嚟幾有勢頭。真配服整嗰個師傅同個送食物嘅店員,睇落個B仔船啲嘢多到就跌就跌,但又無事喎,反而我哋一「筆」就「呢咁hea」,啲椰果跌到一枱都係。
講真,單單只係一份雜果香蕉船,西瓜、蜜瓜、哈蜜瓜未算好甜,水蜜桃、椰果又係罐頭貨,味道可以講話係平平無奇,你同我都整到嘅水平。只係行得累,有碗冰凍雪糕生果祭祭肚,涼透心之餘,有種「補充」嘅感覺,補充嗰份為食嘅心情!
|
|
|
CoCo壱番屋
|
標題 : 咖喱湯飯賀生日 |
地址 : 荔枝角深盛路8號碧海藍天JUSCO荔枝角店地下L008號舖 |
地區 : 荔枝角 |
|
現時分數:
|
日期 : 2012-05-15 10:27:42
雖然家住美孚,只係隔個地鐵站,但都好少過嚟西九四小龍依邊,但近來晌碧海藍天開咗間吉之島,下面又多咗好幾間食肆,撞啱小弟嘅生日,同區老死夏生同佢老婆話請我食番餐,地點就係吉之島內嘅食肆,食邊間隨我揀,可惜我老婆要加班,無福消受。
晌吉之島走咗一個圈,真係幾多選擇,不過日式偏多,如大戶屋、Pokka、板長……,最後揀咗CoCo壹番屋,一來記得尖沙咀新港中心嘅CoCo壹番屋都幾人氣,值搏率高;二來好想食咖喱,所以搵間專門店較穩陣;三來唔想人家太破費,CoCo壹番屋就比較實惠啲喇。原來依間都係CoCo壹番屋嘅第三間店,仲有一間晌觀塘。
店內裝修簡約,木紋間條木枱,皮椅,一排卡位亦都寬敞,難得地方闊落,唔焗促。打開餐牌都有啲花多眼亂,咖喱款式極之多,要試勻真係一個月都試唔晒,不過細心睇,大致可分為三類:第一類佔大多數,多達近30款,就係簡單嘅單餸咖喱飯,單價由$50-$70;第二類,有7款,就係奄列咖喱飯,單價由$60-$70;而佔少數只得3款,就係焗咖喱飯,單價全部都係賣$70。
每款主食可以加錢配其他嘢,包括:例湯、迷你沙律、甜品同飲品(非酒精類),加$15可選兩項,加$20選三項,加$25就可以要齊四項。此外,咖喱醬可以揀辣同唔辣,要辣嘅又有由少辣到5分辣,點知飯嘅份量都有得揀,餐牌個價格係300g份量,要200g可減$5,相反,要每多100g就加$10,最多去到600g飯。仲有,好多其實配料選擇,成30多款,如茄子、粟米、煙肉、蜆肉、炸蝦、秋葵豆腐、炸忌廉……等等,由$10-$35,彈性大咗,但加吓加吓碟飯可能成舊水都有,隨時成碟變咗大雜會咖喱飯。此外,佢哋仲提供幾款散叫沙律,都係廿零三十蚊一客。
忌廉雞肉奄列咖喱飯 $65
小弟就要咗依個忌廉雞肉奄列咖喱飯,加$25要齊例湯、迷你沙律、飲品、甜品。
例湯,今晚係洋蔥湯,外觀有啲驚嚇,因為油光泛面,一望落去湯面成層油咁,要滔咁啲油才稍為飲得安心,味道都OK嘅,幾濃洋蔥味,但感覺就唔太健康。
迷你沙律,有沙律菜、車厘茄、青瓜同粟米粒,可揀芝麻汁或豉油汁,我就要芝麻汁,味道香啲,而各種蔬菜都幾清爽。
飲品,凍檸茶,大大杯,無咩意見。
甜品,註明係Dreyer’s雪糕球兩個,味道無得揀,係士多啤梨同雲喱拿曲奇,睇落啲雪糕係溶咗再雪返嘅模樣,而且連個雪糕杯都凍到起霧,即係「筆」定晒一杯杯雪住,製作整之唔專業兼求其。
忌廉雞肉奄列咖喱飯,係屬於無包底嘅奄列飯,屬新派做法,將煎好嘅流心滑蛋冚上飯面,唔係以煎好嘅薄蛋皮包住啲飯。咖喱確實幾辛香,微微辣,少少甜,不過果然咖喱醬汁多如湯咁,成碟咖喱湯飯,名不虛傳,加埋鮮忌廉,滑溜啲之餘仲覺得咖喱香突出啲。而飯粒煮得好,飯粒黏糯又唔爛,搭住咖喱汁同少少滑蛋,幾匹配,不過就真係好少好少雞肉囉!
吉列豬扒咖喱飯 $65
同樣又係「咖喱湯飯」嘅代表作,咖喱汁多得緊要,以「血流成河」嚟形容都唔算誇張。而吉列豬扒嘅份量相比起個忌廉雞肉就多好多,一大件吉列豬扒,炸得幾對板。小弟無試過,只係問番老友食完覺得點,佢話唔錯,外層炸得幾脆,肉質都頗為鬆軟,只係略嫌有啲乾身。飯粒有咬口,咖喱辛辣度較溫和,恰到好處,撈飯確實惹味非常。
紅酒燴牛肉奄列飯 $70
佢位夫人就揀咗個非咖喱類嘅奄列飯,亦係全店唯一一款無咖喱嘅飯,擺晌屬奄列咖喱飯嗰欄,不過,紅酒汁依樣倒滿碟,而牛肉粒亦都唔係好多,即係逢奄列飯系列,餸料都會係偏少。紅酒燴牛肉,色澤深紅,滔咗一小匙羹試試味,口感幾柔滑,紅酒味唔太濃重,易入口。
|
|
|
薈萃閣 IP Cafe |
標題 : 又嚟食嘢唔俾錢免費自助餐 |
地址 : 西環干諾道西152號港島太平酒店1樓 |
地區 : 西環 |
|
現時分數:
|
日期 : 2012-05-11 15:37:22
又一次獲幸運之神錫住,可能見小弟工作唔順,傻更更咁抽到三張自助晚餐餐券,等我開心番吓啦。地點係西環嘅港島太平洋酒店薈萃閣,記得大概三、四年前嚟食過當慶祝生日,但感覺麻麻,除咗食物嘅款式選擇唔多之外,質素亦只係好一般,基本上唔會至翻兜嘅餐廳。雖然係咁,免費嘅又無理由唔去架,拉埋老婆同一個同事一齊去擦番餐。西環話遠唔遠,話近交通又有啲唔方便,幸好有隧巴行西隧直達所住嘅屋村,都算OK!
事隔數事,餐廳環境無乜點變,之前嚟過已對食物質素有所了解,知道唔會有咩驚喜,有晒心理準備。唯服務方面,依然保持待客有禮,好似我哋三個,訂位時講明「食嘢唔俾錢」,嚟到無話俾個死位你,又唔會對你白眼,一坐低好禮貌問你要啲咩嘢飲,最正係好細心解釋:食完通知佢哋一聲,唔使再俾咩費用,就可以走得,服務方面值得一讚。
依度地方唔太大,環境一眼望晒。晌港島區計,佢哋個自助晚餐算幾平,三百鬆啲,仲要有折扣,況且西環酒店又唔多,競爭相對細,今晚所見,都幾多客人。故此,枱凳都拍得頗為密。雖然食物種類叫做樣樣有啲,不過食物區唔大,企晌中間(壽司、沙律、甜品區),向左望(餐湯、熱盤),向右望(薄餅、咖喱、烤肉),都已經睇晒!都唔理多定少,填飽個肚先係正路。
餐湯、餐包
最左側嘅食物區係餐湯,有中式(海底椰煲雞湯)有西式(粟米腿蓉湯),兩者比較,前者較好喇,只係湯味較淡;而個粟米湯真係有啲快餐店水平,可以不理。幾款小餐包,側旁有烘包機,可以烘翻熱。
熱盤
熱盤放晌餐湯嗰邊,只係得10款左右,記憶所及,包括:焗青口、炒菜、燒雞、烤南瓜、蒸魚、紅酒燴牛肉、燒羊扒、煎鴨胸、瀨尿蝦、豉油皇魷魚炒麵……,總之感覺較為大路、普通,無論款式或味道,都係令人食咗都唔係有太大印象。所以,我都係揀咗三幾款比較鍾意嘅嚟食!
魚生、壽司
中排嘅食物區放有魚生、壽司,三文魚、吞拿魚、油甘魚,師傅晌廚房切好晒,你要幾多就夾幾多俾你,睇樣就麻麻,食落都好一般;另外壽司更不俏一看,一睇啲飯就知搵機啤出嚟,啲製作又求其,所以,壽司完全無試。
沙律、凍海鮮
中排食物區仲有自助沙律吧,三幾款沙律菜搭7、8種配料,反而醬汁選擇多,共5款,不過,同樣唔多特別。沙律吧側邊,就係凍海鮮,有甜蝦、長腳蟹、翡翠螺,味道都唔錯,但係長腳蟹長期缺貨,一拎出嚟就好快被人夾晒,每次補貨少。
生果、甜品
嚟到中排最右側,就係生果、甜品,前者有6款生果供應:西瓜、菠蘿、哈蜜瓜、火龍果、西柚、橙,最正當然係新鮮菠蘿啦。甜品數數埋埋都有十多款,但無論賣相及款式,都好一般。雪糕品牌也只有牛奶公司一款,可想而知,水平去到邊!所以,今次都算食得少甜品嘅一次自助餐。
串燒、薄餅、咖喱
右側嘅食物區係個開放式廚房,有串燒(雞翼、牛脷、多春魚、豬肉、雞肉腸、龍脷柳同時蔬)、薄餅、酥炸小食、咖喱同烤肉(今晚係燒澳洲肉眼)。原來枱尾仲有兩款甜品:窩夫同麵包布甸。這一區食物比較好啲,因為有啲係即叫即整,此外有啲係香口惹味嘢,樣樣要小份嚟試試。整體味道唔差,都係嗰句,無乜邊樣難忘。
飲品,坐落服務員會問你要啲咩嘢飲,汽水、果汁、啤酒、紅白餐酒,飲完佢哋會自動為你再添。此外,你亦可以晌出面個自助水吧,斟咖啡、紅奶、檸茶、檸水都得,總之成晚飲品無限量供應。
同樣都係信和系嘅酒店,但跟皇家太平洋酒店嘅柏景餐廳對比,就真係相差咗幾皮喎!應該再翻兜嘅機會好細喇。
|
|
|
又一間餐室 Mo-Ikken Cafe |
標題 : 菜系無間又一餐 |
地址 : 荔枝角寶輪街1號曼克頓山商場G08舖 |
地區 : 荔枝角 |
|
現時分數:
|
日期 : 2012-05-01 19:48:44
平時大多數食住家飯,盡量都返屋企煮,今晚兩公婆收工晏咗,索性出街食,於是孖埋姨仔去「又一間」搞掂就算。好耐之前跟過住同區嘅老死嚟食過,感覺唔錯,所以,今次就帶老婆嚟試吓!
晚市套餐(配餐湯或沙律,加杯啡茶),有中有西,又有東南亞嘢,菜系無一個明確定位,似係茶餐廳,食物多元化,但比起嚟,環境就舒適好多。一室光潔,白磚牆配盞波燈,黑地磚配白格仔,最鍾意係坐卡位,闊落寬趟又好挨。
雖然我哋各有各揀,晌餐牌揀番自己心頭好,不過,全部嘢就一齊分享。
印尼炒飯 + 雞肉串燒 $49
依個配搭係晌中式晚餐個餐牌度,真係有啲奇趣呀!個印尼炒飯幾好喎,飯料十足,有雞肉、火腿、蛋碎、生菜絲、洋蔥粒、花生碎同少少肉鬆,加兩隻蝦,炒得乾身唔硬,份量又唔少;而兩串雞肉串燒就漏咗,我哋食咗半兜飯都仲未見有,追追先後補番,雞肉串燒好一般,雞肉有啲死實,食之無味棄之可惜嘅級別囉!
招牌牛腩炒河 $39
一嚟到見個獻汁多到成河真係有啲擔心,幸好係炒河幼細得嚟有韌度,夾起唔易斷,幾滑溜。而且牛腩炆得鬆化非常,夠晒腍身又有肉味,不愧招牌,若非獻汁太多,咁就做得好出色。姨仔好鍾意食辣醬,示意服務員,就拎嚟一大支泰國「是拉差椒醬」(唔係打錯字,真係叫「椒醬」,好有趣嘅名字),小弟唔嗜辣,所以對辣醬無研究,據說是拉差椒醬晌泰國係經典,適用於炒菜或涼拌,亦可直接當沾醬用,風味又酸又辣且蒜香濃郁,係嘅牛腩嘅好老友。
拿破崙意大利粉 $58
依個唔係晚餐之內,係散叫意粉,加$5,改為寬條麵,另外再加多$15轉套餐,多咗餐湯、沙律同飲品。餐湯要咗中湯,豬骨煲粉葛,OK喎,唔會水汪汪淡茂茂,有啲葛味;沙律係普通沙律菜加少少雜果、紅腰豆、蕃茄,沙律菜爽脆,又係唔錯;主菜個拿破崙意大利寬條麵,麵條煙韌有咬口,可是沙樂美腸有少少過鹹,而且蕃茄醬唔點酸,賣相叫幾好,但味道差少少。
凍朱古力
老婆要熱檸水,姨仔要咗凍鴛鴦,小弟則揀杯凍朱古力,凍飲另加$2,不過就算晚市都唔收加一,有茶餐廳嘅收費風格。凍朱古力以唂咕粉開沖,非朱古力粉,所以,味道較濃郁甘苦,不過,最弊係唔夠凍,啲冰溶晒都係叫涼涼哋,小姐,唔該加啲冰丫!
|
|
|
Coco Frans |
標題 : 夫唱芙隨 |
地址 : 旺角亞皆老街8號朗豪坊地庫2層 |
地區 : 旺角 |
|
現時分數:
|
日期 : 2012-04-30 20:08:24
甚少出旺角,唔係經常出沒嘅範圍,因為實在人多車多,周圍都好逼,同太太一齊出嚟就更少。但太太想買部新數碼相機,先至晌依頭走咗一轉,不過最後係無任何收獲。
閒逛完一輪,正要打道回府,經過朗豪坊下面嘅coco frans,一列餅櫃,好多甜點,樣貌甚為吸引,所以就同老婆揀咗兩款返屋企沖杯咖啡,嘆番個下午茶。
coco frans主打多款唔同口味嘅日法特式芭芙(泡芙)、窩夫,其他產品仲有法式千層酥、巴黎圈(Paris-Brest)、北海道牛奶布丁同朱古力熔漿蛋糕(心太軟)。見收銀位隔離有啲bread papa’s嘅單張,細問店員,原來份屬一家,所以晌度見到嘅泡芙,都係由港鐵旺角站嗰邊嘅bread papa’s供貨!
香草冧酒提子窩夫 $14
經過冰鮮嘅窩夫三文治,始終不及新鮮熱辣即製嘅好食,但體驗一下凍食,感受熱天下所帶嚟嘅冰涼感,其實感覺都唔錯。黝黑嘅窩夫係以朱古力味為基礎,雖然經雪過餅皮有啲實淨,但又唔會乾巴巴硬屈屈。香草意指雲喱拿,加上冧酒、提子做成嘅吉士軟心,軟綿綿,味道都唔錯,不過帶到返屋企就有啲溶溶哋!
意大利芝士芭芙(tiramisu puff) $16
外型飽滿大個,芭芙本身做得好鬆脆,跟晌bread papa’s食到嘅無兩樣,始終係店家嘅招牌,水準不賴。不過,既然稱為“意大利芝士”,自然應期待佢有齊淡淡嘅芝士味、冧酒或拔蘭地酒香、唂咕味,可惜,跟期望總有啲距離。晌芭芙面撒上好多唂咕粉,所以一咬下就嗒到唂咕嘅苦甜味;中間餡心係打得細滑嘅芝士忌廉,芝士味徐徐滲出走進味蕾,口感輕柔;唯獨欠酒香,有感若有所缺。 |
|
|
羽壽司 Ha Ne Sushi |
標題 : 羽不驚人食不優 |
地址 : 美孚美孚新村萬事達廣場1樓N84B-85舖 |
地區 : 美孚 |
|
現時分數:
|
日期 : 2012-04-27 11:11:59
依餐街坊生日飯講咗好耐,約嚟約去搞咗成個月,卒之約定星期六晚,一齊完咗教會一個特別講座,就返美孚食。因為係幫C小姐慶祝生日,佢係算係個哈日族,旅行首選係日本,食嘢都鍾意日式嘢,所以試吓羽壽司。
9:30pm嚟到,因為店鋪收11:00pm,所以剩番三幾枱客,10:30pm截單,基本上我哋食完都走,唔會磨得耐,所以都無所謂。不過,啲店員見咁晏我哋仲成棚人(都係8個啫),好似好有所謂,覺得可能阻佢哋收工,招呼麻麻哋之餘,10:30pm截單問完我哋仲有無嘢要,轉手就要埋單。
佢哋每月都有啲特價壽司推出,不過唔好以為平好多,因為佢專燈標出嚟嘅原價十幾蚊係以兩件計,但個特價7、8蚊就逐件計,少少嘩眾取寵。但係,都叫做抵咗,所以都有點少少嚟試。其他如壽司、手卷、天婦羅、烏冬、拉麵……樣樣都叫啲,總之就樣樣都試吓。
壽司
本月特價壽司點咗其中兩款:甘蝦沙律壽司($7件,原價$16兩件,所以,只係平咗$1件)、芝士蝦壽司($8件,原價$20兩件)。前者係軍艦壽司,以甜生蝦加埋沙律醬同蟹籽,生蝦鮮甜,如果少啲沙律醬就理想啲,因為太多沙律醬啲味冚咗鮮蝦味;後者係熟蝦放在飯糰面,加塊長條芝士再火炙一下,口感麻麻哋,食落較為死實,芝士全無半溶嘅柔軟感,只係一條黑咗嘅芝士條。其他散叫壽司,選咗劍魚壽司($20兩件)同三文魚壽司($12兩件),質素不過不失,算穩穩陣陣!
金龍卷
羽壽司除供應一般卷物之外,亦有自家兩款特色卷物:金龍卷($68)、羽龍卷($78),依次試咗金龍卷先,賣相係幾有睇頭,以反卷形式,包住炸蝦肉,反卷外邊沾滿紫菜粉,再晌每節「龍」身放撮蟹籽裝飾。不過唔知點解,既然叫「金龍」,係咪可以試吓改用炸麵包糠或全蟹籽包住,咁先稱得上為金龍,依家頂多叫草龍卷囉。味道幾好,沾滿紫菜粉嘅反卷食起嚟唔單調,但仍然覺得佢哋係趕收工,整得揦西咗,好似個「龍頭」啲飯糰,都懶得蘸紫菜粉,又求其搵隻唔合身嘅碟盛載條金龍卷,搞到個「龍頭」似被斬首咁。
軟殼蟹手卷 $16
又係沙律醬,又係蟹籽,佢哋真係好鍾意咩都加依兩樣配料。手卷用嘅紫菜麻麻哋脆,所以食落感覺一般。
蕃薯天婦羅 $35
天婦羅脆漿夠晒薄透,但蕃薯就更薄,一客只有薄薄嘅6、7片左右,除番一片都幾唔抵食,還好蕃薯幾粉香。蘸少少蘿蔔蓉一齊食,清清熱!
鹽味叉燒烏冬 $58
變咗無味烏冬,雖然又有銀芽、又有荷蘭豆、紫菜、粟米、鳴門卷,但感覺都仲係有啲寒酸,可能就係烏冬少,托唔起成碗嘢。而兩片叉燒好一般,唔夠油潤,口感粗嚡。
韓式泡菜冷麵 $58
所謂秘製拉麵,與其叫冷麵,不如叫撈麵仲貼切,根本就係煮好個拉麵之後,加啲韓式泡菜同銀芽乾撈,泡菜辛辣惹味,拉麵也算係爽口。但同平時食冷麵時,將啲冷麵沾啲醬汁嚟食,係兩回事!
蛋吉列豬扒飯 $42
全晚比較好嘅一個澱粉類主食,珍珠米煮出嚟嘅飯粒咬口煙楓,跟手嘅洋蔥滑蛋亦煮得唔錯,蛋香而滑溜溜,吉列豬扒肉質鬆軟,脆漿亦唔太厚。
日式芝士年糕 $35
臨尾追加多一份炸芝士年糕當甜品,記得晌鳴門魚湯麵亭食過嗰次,印象中好好食,所以今次又興起叫番一客。一客有三大件,炸得金黃,一口咬入,先脆後軟,裡面嘅年糕炸得軟軟糯糯好煙韌,微微滲出芝士香,如果落重少少芝士,相信仲香仲好食!
五個請一個,為起每人百二左右,其實唔算貴,只係計入埋食物嘅質素,就唔太值依個價。若加上招呼態度麻麻,唔多想做我哋生意咁款,咁依餐就好唔值喇,所以俾咗個一般佢。
唔知係唔係佢哋生意有啲下滑,最近見晌晚市搞8折(會員仲75折添),但只限星期日至四,晚市6:00pm後,仲要係惠顧堂食正價食品先有,所以,更加無誘因會再幫襯! |
|
|
沙嗲軒 Satay Inn |
標題 : 重尋星馬滋味 |
地址 : 尖沙咀廣東道33號中港城皇家太平洋酒店平台1座3號舖 |
地區 : 尖沙咀 |
|
現時分數:
|
日期 : 2012-04-26 11:24:00
剛晌舊年9月跟太太去完新加坡一轉,食咗好多地道美食,久唔久仲同佢講返新加坡之行,晌濱海藝術中心傍嘅Makansutra露天熟食中心嘆黑胡椒蟹、沙嗲,去黃阿細食肉骨茶、鮮灼豬潤當早午餐,又係以馳名自家製辣醬嘅五星試咗海南雞飯……仍然回味緊嗰份味道,但估唔到有幸出席一個試食飯局,一嚐沙嗲軒嘅手勢,讓小弟滋味重溫。更正嘅係,成晚大廚程逸雲師傅可謂施展渾身解數,將沙嗲軒嘅招牌菜盡出,務求令一眾食家回味無窮。
本身未嚟過沙嗲軒,不過,3年前去過佢走年輕路線嘅姊妹店,晌九龍灣國際交易中心平台層嘅沙嗲沙嗲(現已亦轉為「沙嗲軒」),記得當時試過佢嘅精選拼盤、泰式冬蔭雞湯、肉骨茶配飯、怡保貴刁,整體評語係食物特色有質素,價錢相宜地方又舒服。所以,對沙嗲軒嘅出品有一定嘅信心,加上試食嘅菜式,既豐富,又係當地名菜,自然非常期待。
雖然沙嗲軒貴為星馬菜館,但內裡無乜好娘嘅「風味」裝飾,反而換嚟一室時尚簡約嘅裝修,店外亦設有一排露天座位,感覺舒適,天氣清爽不妨揀露天位吧!為著是次試食會,店家安排我們一眾坐在最入面嘅組合大枱,既讓我們自成一角開懷暢談,不太騷擾其他食客,又可讓眾人易於彼此交流,分享飲食心得,多謝公關悉心安排。
未開飯之先,由總廚雲師傅概略介紹一下沙嗲軒同今晚嘅菜式,餐廳每日會以最新鮮嘅食材炮製新加坡及來西亞美食,盡量以正宗、原汁原味嚟呈獻,就等我哋領略下箇中滋味!
肉骨茶 $70
記得嗰時睇旅遊資料,話肉骨茶分為新加坡嘅潮州派同馬來西亞嘅福建派,前者落較少藥材,味道比較清淡,反而多咗朕稍重嘅胡椒味,夏天飲有醒神嘅感覺;後者就下得藥材較多,所以味道比較濃郁,略帶甘苦,冬天飲有暖胃嘅作用,仲可提高身體抵抗力。今次晌度試嘅係後者,不過藥材味唔太濃,但有藥香,兼且甘甜很順喉,細細件嘅排骨也燜煮得鬆化入味。肉骨茶通常都撈白飯或配油炸鬼蘸嚟食,既然稍後有海南雞飯,依家店方醒目遞上油炸鬼,其實我就鍾意肉骨茶搭油炸鬼,因為油炸鬼索滿肉骨茶湯汁,特別正斗!題外話,晌新加坡嗰邊,佢哋鍾意叫肉骨湯,唔多叫肉骨茶喎!
雜錦沙嗲 $88
一客6串嘅雜錦沙嗲,有齊雞牛豬肉,店方還細心將串燒豬肉,以綠色簽尾以「簽」識別,方便因宗教唔食豬肉嘅人。即叫即燒熱辣奉上,用上鮮肉汁豐肉嫩,最正係又有碳火香,配上自家製花生沙嗲醬,成碗仔一大兜,絕對夠你啖啖肉都醮足醬,濃稠度又啱啱好,簡直係最佳拍檔!伴菜仲加咗啲青瓜粒、紅洋蔥粒同菠蘿粒,作為間場,一串沙嗲之後食三幾粒瓜粒蔥粒,然後再食串沙嗲,就保持到嗰份濃香惹味。
家鄉福建薄餅 $58
福建就未去過,不過多年前去過檳城,食過福建炒粿條,有啲似加咗蛋汁嘅濕炒河粉。但福建薄餅就第一次聽兼第一次食,真係呃晒,其實就係我哋所叫嘅春卷,同大家想像到嘅薄餅係兩回事。春卷包得粗大,原因係內裡餡料異常豐富,大概有紅蘿蔔絲、沙葛、豬肉、蛋絲、青瓜絲、唐生菜、蝦仁、花生碎,事後問番原來仲有芫茜、炸豆腐絲、四季豆,所以好有咬口。而味道微微辣,又少少甜,話係新加坡嘅特色,而甜味源於加咗黑椰糖。小弟最欣賞係師傅以春卷皮再墊上生菜,先至包入所需餡料,唔會令啲餡汁整濕啲春卷皮,以致影響口感,依個實在係好一道精彩冷盤前菜,好啱春夏天食。
星洲炒蘿蔔糕 $83
蘿蔔糕係自家製嘅,蘿蔔味重,真材實料,而質感柔身,有啲介乎蒸蘿蔔糕同煎蘿蔔糕之間,依種質地我都OK喎!蘿蔔糕以外,仲有蝦仁、蛋漿同炒,好似仲有啲菜脯粒,撤把蔥花,食落幾惹味,有啲蒜蓉香,又係辣辣地,甜甜地。
福建蝦湯麵 $83
福建蝦麵又係檳城名物,不過上次晌檳城食到嘅,記憶中無咁濃味,今次嘅蝦湯,蝦味既濃郁,又鮮活,細問之下,個湯真係唔簡單,原來先爆香虎蝦殼,加豬骨,加燒骨嚟熬湯,都要熬超過2粒鐘先夠出味。以爽口油麵為麵底,配埋彈牙越南虎蝦、豬肉片、蕹菜、銀芽,整體好好食,但始終都係個蝦湯係亮點,一定要飲清見碗底先對得住師傅嘅心意。
焗胡椒蟹 $320
黑胡椒蟹晌新加坡真係個好出名嘅菜式,猶記得上年晌新加坡首次接觸,印象尤深。今回能在沙嗲軒再次一試,真係好開心。斯里蘭卡肉蟹,大隻有睇頭,肉多夠厚,雖穿州過省,依然鮮甜。以一小粒牛油起鑊,加入黑胡椒碎,將肉蟹回鑊炒熟再微焗多一陣,師傅話咁就令蟹肉更嫩滑。果然,肉質鮮嫩,香而不辣,食到要吮晒手指先罷休。
星洲辣椒蝦 $280
被啲色水嚇親,其實唔係好辣。同樣以越南虎蝦為主材料,賣相似係微酸版煎蝦碌加咗落一碟蕃茄炒蛋度,食過之前兩道菜都係辣中帶甜嘅「星洲味道」,所以依個辣椒蝦唔算太大驚喜,不過,虎蝦爽彈始終有水準,加上師傅已晌蝦背加一刀開殼,入味之餘又易食。喜歡個汁嘅朋友,不妨多叫碗白飯嚟撈汁,一流。
沙嗲軒海南雞飯 $98
依個又係另一個眾星一致齊讚嘅菜式,以上湯浸熟黃油雞,製成香嫩無骨嘅海南雞(如果散叫半隻要$175,全隻要$350),真係鮮香肉嫩無誇張,兼且無乜皮下脂肪,雞味又濃。而泛光嘅雞油飯又係另一精髓,唔係白米加雞油煮飯咁簡單,大廚透露,又要爆香蒜蓉,又用浸雞水,加咗香茅、班蘭葉,先至秘製出咁香嘅雞油飯,睇餐牌賣$20碗,但白飯都要成$18碗,你話應該點揀喇!另外,要食得地遁梗唔少得黑醬油、辣椒醬、薑蓉,大廚講明前兩者來自星洲來佬貨,而後者自家加蔥做成嘅薑蓉,同樣甚具質素,咁先成為完美組合。小弟唔止以黑醬油蘸雞,仲撈埋飯嚟食,好味丫嘛!
蒜蓉鹹魚炒芥蘭 $70
依度菜係同場加映,原本試食菜單係無。芥蘭去晒葉,切度,再以蒜蓉、鹹魚爆炒,鹹香惹味唔在講,雖然只取菜梗,食落依然嫩口,又特別有菜味,同埋無乜苦澀。
飲品
店方讓食家從餐牌隨意選擇,除多款品牌啤酒、汽水、果汁、賓治外,有東南亞特色啲嘅包括椰青、珍多椰汁、薏米水,不過小弟就前後試了柑桔梳打($53)同青檸梳打($53),因為想飲得透心涼啲,又鍾意柑桔同青檸嘅味道。
甜品(同名唔同姓呀!)
原本大會安排星洲紅豆冰係為試食甜品,但只有一款紅豆冰,豈能滿足一眾食家,再情商經理Enid,佢拍心口一句豪氣咁問:「有啲咩想試?」,所以,就變成咗甜品自選環節。
- 星洲紅豆冰($65)- 雖然叫紅豆冰,其實就類似台式刨冰(小弟都會錯意),一大碗刨冰,淋上紅色同紅綠石榴糖水,添色添味(只係甜味),再加上珍多、亞答子(棕櫚樹果實)同紅豆。因為都幾大碗,最好都係兩三個人同享好啲,味道方面中規中矩,可能盛夏時食就過癮啲!
- 嚤嚤喳喳($48)- 唔係渣喳,千祈唔好搞錯,其實係蕃薯、芋頭、椰奶糖水,小弟無試,但食家話唔錯,芋頭粉香。
- 椰香黑糯米($48)- 小弟鍾意芒果,所以點依個,有別於泰式,黑糯米會腍身啲無咁有咬口,但配上椰奶同芒果,香甜好味,最好多啲芒果啦!
- 涼粉雪糕($48)- 哈哈,係一條條幼如天使麵嘅涼粉,真係估佢唔到,雖然無試,但相信比起食開方粒嘅涼粉,應該會係滑嘟嘟!
試咗咁多嘢,真係超滿足;無論環境、服務同菜式,都非常欣賞。最後程師傅再次出場,問問大家意見,與食家彼此交流,除咗少少瑕疵,眾人無不拍掌以示謝意,還對菜式嘅味道、質素都覺得係喜出望外。晌度,真係再次衷心多謝程師傅、經理Enid同有關網站。 |
|
|
綠林三記甜品
|
標題 : 爛食夜明珠 |
地址 : 深水埗元州街9號景業大廈地下 |
地區 : 深水埗 |
|
現時分數:
|
日期 : 2012-04-25 10:32:52
同班老死晌增輝食完飯,意猶未盡,咁啱轉番出元州街有間綠林三記,食碗糖水以完結此行。時為九點幾,人客唔多,得三幾枱人。我哋各有各叫,小弟就嚟一碗鮮蜜瓜明珠。其實依間嘢都開咗好多年,因為小弟讀中學年代已見佢,大大話話都十多廿年都有。以前間中都有嚟幫襯,因為糖水晌依區勁平,嗰時人哋賣緊8、9蚊碗渣喳,佢只係賣緊$5咋,學生哥年代以平行先,邊識好食唔好食架。
今晚嚟到,被睇中嘅係鮮蜜瓜明珠,賣$15,好耐未食過明珠系列喇。除明珠系列,仲有傳統系列、糖水配搭系列、西米系列、涼粉系列、豆花系列、黑珍珠系列、紫糯米系列、燉品………等等,總有一款啱你心水。
鮮蜜瓜明珠,大大粒「明珠」滿佈碗中,添加了椰奶糖水,上面滿滿鋪晒蜜瓜,份量十足。蜜瓜鮮甜,夠香夠熟。不過,今勻嘅明珠難食得很,質地很爛好糊口,水準大跌喎,只好忍心俾「好難食」佢。
|
|
|
增煇藝廚 Glorious Cuisine |
標題 : 中學老死小飯局 |
地址 : 深水埗石硤尾街31-33號 |
地區 : 深水埗 |
|
現時分數:
|
日期 : 2012-04-24 10:30:02
同一大班中學死黨每年都有一、兩次大型飯局,因為人多勢眾,又想盡量就到人人都可出席,所以通常約嚟約去,要搞好耐至成事。故此,當中有幾個老死,又係同教會,情誼較深,所以幾個月就有一次小飯局,大家出嚟食餐飯、吹吹水,睇睇有無穿、有無爛。今回小飯局選返去大家讀書年代嘅紮根地-深水埗,食店揀咗「增輝」。
最終飯局都係差咗晌深圳做嘢嘅P,佢咁啱工作纏身走唔甩,得番我哋4個人,感覺有啲遺憾,因為次次佢都係飯局發起人!
仲係學生年代,都有晌楓樹街球場流過「血」「汗」,踢完波有時都會去幫襯增輝,雖然嗰時已經係大牌檔加個鋪位,但我哋都係揀坐馬路邊摺枱,夠地踎。時至今日,晌大牌檔對面就再加多間大鋪,樓高兩層,改名「增輝藝廚」,不過,今趟無揀馬路邊,選咗上閣樓,想涼冷氣丫嘛。閣樓空間比較細,啲枱拍得勁密,真係盡用每吋空間。是晚雖係閒日,但估唔到無乜客(可能同跑夜馬有關啩),坐咗成晚都係見得三枱客,難得環境靜靜局。由於原本打算有5個人,所以一早訂咗隻招牌頭抽雞(據聞每日限賣10隻)。既然得番4個,就叫一個湯、一個菜、一個荷葉飯都夠晒數。由大牌檔做到入鋪,有晒裝修成間中菜館咁款,連餐牌都做到圖文並茂,中英日文對照,仍唔收茶芥加一,貫徹大牌檔作風,抵讚。
胡椒豬肚浸花蛤湯 $108
原裝小木桶盛載,當然無餐牌中嘅相咁誇,裝滿成桶大蜆啦,不過一撈起都有唔少大蜆,亦都有唔少豬肚添。大蜆確實勻真無呃秤,隻隻有成兩隻手指大,肉質未算好肥美,最緊要吐足沙,無嚵口,而大蜆空殼情況唔算多,可接受;豬肚亦做得唔錯,爽口無豬燥味。湯底用豬骨同胡椒熬煮,至於依個湯嘅靈魂-胡椒,似乎師傅狠下重手,湯頭極重胡椒香,味道辛辣,雖然飲得過癮,但辣味蓋過一切!
蝦醬通菜
雖然貴為小菜館,但份量依然係大牌檔格式,好似依碟蝦醬炒通菜,無咁多花臣嘅年代,炒菜類就最興點依個,通菜咬落爽口,蝦醬又夠惹味,大牌檔鑊氣夠,始終好食過自己晌屋企炒。
木盆龍躉荷葉飯 $148
小弟都幾鍾意食糯米雞、荷葉飯依類嘢,所以見有個木盆龍躉荷葉飯,二話不說就點咗佢。個木盆都幾大,成個面盆咁,墊咗荷葉之後,菜遠圍邊,中間配上蛋白炒飯,再平鋪炒龍躉肉,撤啲金銀蒜整靚個買相好睇啲。由於飯底先炒後加,所以無乜荷葉香,只係爽口啲;龍躉起晒骨,啖啖肉,又幾鮮甜,只係略嫌獻汁落多咗,有啲餬餬嘅感覺;加咗金銀蒜,有點畫龍點睛之效。整體雖未有期望中嘅驚喜,但尚算不錯嘅飯品。
招牌頭抽雞 $238
晌增輝依道菜要預訂,不過感覺唔算好人氣,因為頭抽雞已經成為好多食店嘅招牌菜,都唔係咩獨門秘技,此外,成二百幾蚊一隻雞,都咪話唔貴,大棚人就話叫一隻嚟試試,人少就好似唔化算。既為一道中菜,唔知點解佢會用個壽司盤嚟載住隻雞,感覺有少少格格不入,但係好食就算鬼數啦。頭抽係乜我估依家好多人都知,簡單講就係黃豆經發酵後第一次提煉出嚟豉油,所以質感濃郁,味道醇香,整出嚟雞嘅外觀就好似燒味嘅油雞咁樣。哩隻頭抽雞小弟覺得都唔錯,基本上皮滑脂肪少,肉嫩有彈性,豉油汁有豉香唔覺鹹,用嚟齋撈飯都唔錯!伙計話係將鮮雞放晌頭抽汁度浸熟,怪唔之得肉嫩入味,簡直係中式慢煮。
飯後大家對「增輝」嘅評語都係一般,未達期望中嘅水準,所以,異口同聲話下次試吓斜對面街角嘅「小菜王」喎。其實,我自己就覺得餐飯幾OK,比起我,依班老死食嘢係有啲要求嘅!
|
|
|
海天堂 Hoi Tin Tong |
標題 : 講個信字食番盅 |
地址 : 美孚美孚新村萬事達廣場N59A1地下 |
地區 : 美孚 |
|
現時分數:
|
日期 : 2012-04-23 15:42:34
本身對中葯無咩太大抗拒,亦無太大喜好,有病嘅時候都係睇西醫多,但遇有喉嚨痛、熱氣又會走去飲涼茶消消熱,相信大部分香港人都相信涼茶此等中國傳統智慧。反而龜苓膏比較少食,因為一碗龜苓膏價格頗貴,又唔知係唔係咁快見效。
本地賣龜苓膏嘅店子,有唔少老字號及有名氣嘅,但數到較有宣傳策略或懂得製造宣傳效果嘅,鬍鬚佬嘅海天堂可算係中堅分子。店舖區區都有,不時又有折扣推廣,上電視,賣廣告,乜乜食物嘉年華又梗見佢個檔口,而且產品多元化得厲害:龜苓膏、枇杷膏、涼茶、糖水、軟糖……連烏髮茶都有。因為咁,老婆就買咗套$500現金券一齊用(實價現付$350),亦係7折,內裡有多張$50、$20、$10嘅現金券,可以彈性咁用,都算方便。
近排唔知食得熱氣嘢多,還是邊忽唔妥,生咗細細粒唇瘡,買咗支西葯外搽,返歸途中晌海天堂整咗碗鮮製龜苓膏內服。佢有多款龜苓膏,有平有貴,依款瓦盅裝鮮製龜苓膏都成$50盅,據佢啲單張介紹,龜苓膏能清熱排毒,改善體內器官功能,促進新陳代謝、養顏、皮膚、喉痛、痱滋及便秘、兼可防中風,簡直有病醫病,無病強身咁,實際效用都係講個信字啦。不過,伴住糖漿吃,味道甜中帶甘,我自己都幾鍾意依朕味,就算未知實際效用,至少心理上都有啲幫助嘅,希望快啲好番再周圍勁食! |
|
|
Caffe Habitu |
標題 : 蛇出輕鬆 |
地址 : 中環夏愨道10號和記大廈地下G22-27號舖 |
地區 : 中環 |
|
現時分數:
|
日期 : 2012-04-20 10:18:28
有事要過嚟金鐘政府合署搞點事,返公司途中,經過依間Caffe Habitu,因為仲未夠12:00nn食晏時間,所以偌大嘅店舖,都無乜幾多個客,在門外已聞到陣陣咖啡香,既然難得經過(平時極少晌金鐘留下小弟行蹤),就蛇一蛇王,入去嘆番杯咖啡先再上路。
揀咗一入門口左邊窗門位,對著外街,看住匆匆走過嘅路人甲乙丙,自己卻安座晌寬闊嘅梳化之上,再睇睇書,雖然一陣要返去公司個人間煉獄,但係頃刻間幾有偷得浮生半日閒嘅愉快。
點了一杯12安士鮮奶咖啡,店員隨手整個無乜難度嘅心形拉花,以佢哋日拉夜拉嚟講,依次唔算拉得好靚,而且杯身仲有少少溢瀉嘅咖啡漬。小弟對咖啡唔係咩專業,閒時都係晌屋企或公司沖三合一,但講到眼前杯咖啡本身,咖啡味香,口感柔和細滑,無澀無酸,啱晒我嘅口味。雖然只係蛇咗半笠鐘時間,返到公司都係等食晏,不過,鬆一鬆心靈倍感輕鬆!
有人話三十幾蚊買杯咖啡貴,如果你心態係覺得用咗三十幾蚊淨係買到杯咖啡,確係幾貴,不如過隔離嘅MacCafe飲杯就算。但除咗咖啡以外,其實你仲享受咗寬敞嘅空間、寧靜嘅環境同舒適嘅梳化椅,三十零蚊一啲都唔叫貴! |
|
|
百樂門宴會廳 The Arch Banquet Hall |
標題 : 家常便飯賀舅仔 |
地址 : 美孚景荔徑8號盈暉臺盈暉家居城1樓126號舖 |
地區 : 美孚 |
|
現時分數:
|
日期 : 2012-04-19 14:35:27
上次同啲美孚老友晌度食生日飯,感覺唔錯,無論環境同味道,印象都幾好,所以,今次屋企人有啲小慶祝,就係舅仔完成晒個課程,再拉埋姨仔,近近哋4個人就過嚟再食番餐。今次係閒日幫襯,明顯客人較少,所以,環境比較清靜,真係少有食中菜可以咁靜局。
有優惠嘅,當然要食盡佢啦,所以又係好似上次咁,先嚟「晚飯3選2三寶」,揀咗芝士龍蝦球伊麵($48.8)同原隻鮑魚有機雜菜煲($68.8);而上次試過嘅香脆拔絲骨,正價餐牌有見,不過就賣$65喇,因為試過確係幾好食,所以再下一城;跟手加多碟椒絲腐乳炒通菜($48),4個人計,應該好足喇!
香脆拔絲骨
賣相同上次差唔多,麥糖拔絲鋪滿脆炸排骨之上,水蜜桃伴碟,搶眼依然。不過,感覺無上次咁好食,脆漿炸出嚟效果有啲腍,拔絲糖漿較上次為稀,少咗拔絲效果,但味道仍覺OK。
椒絲腐乳炒通菜
一到揀炒菜,啲人硬係鍾意點椒絲腐乳炒通菜,無他嘅,通菜爽口食落索索聲,椒絲腐乳炒起嚟又夠惹味。可惜,今次跟上次一樣,椒絲同腐乳都落得唔夠狠。
原隻鮑魚有機雜菜煲
大大煲雜菜粉絲煲,又加埋啲冬菇、秀珍菇,份量十足,湯頭清甜。而煲面就係個菜嘅重點,有3粒原隻鮑魚,每隻都有成兩隻手指大細,收你六十零蚊一煲,算幾有睇頭。幾隻鮑魚仔都扣過嚟,幾腍滑煙韌,亦幾有鮑魚味。
芝士龍蝦球伊麵
比較失望啲嘅菜式,不單芝士整得太杰,龍蝦球亦只係得好少,再敗筆係伊麵煮過火,腍晒,加埋啲杰撻撻嘅芝士,就似食餬仔咁,口感極差。我哋係咪見佢只賣$48.8,就應該要小心啲有機會會賴嘢呢?
糖水就無得送,不過晚市有供應,一共有成7款,酒樓都算少有啲。點咗一碗楊枝甘露$15,有問題,味道怪怪哋,但經理唔介意肯換過碗紅豆沙俾我哋;另一款抵食之選,南瓜珍珠露,賣$6,只係一般,南瓜露加咗西米,南瓜味稍淡,而且唔係好夠甜;反而陳皮紅豆沙幾掂喎,據有份食嘅家人講,好香陳皮味,紅豆又起晒沙,都係賣$6碗咋,好過出去食啦!茶芥$10位,白飯$10個,要加一,又送生果盤,橙、西瓜、哈蜜瓜,算係咁啦。埋單都係三百鬆少少,上酒樓計,算街坊價喇! |
|
|
德福茶餐廳
|
標題 : 南丫茶記新食力 |
地址 : 南丫島榕樹灣後街16號地下 |
地區 : 南丫島 |
|
現時分數:
|
日期 : 2012-04-17 15:01:29
晌榕樹灣依邊,想食茶餐廳,一係文記,一係就牛記,兩間都係位處榕樹灣大街,質素覺得OK啦。但舊年初開多咗一間,晌榕樹灣後街,即係去洪聖爺灘方向,接住榕樹灣大街轉左就係後街。青綠色招牌,門口落地玻璃,望入去通透光猛,最吸引係門面前一列麵包櫃,有咩包,賣幾錢,一眼清楚睇晒!
晌南丫島無乜賣港式嘅麵包鋪,頂多咪晌大街獨市嘅佳佳麵包店,不過,款式唔多。入到鋪內,你就見到鋪後有餅房,麵包係自家製,周時傳來香氣,就係新鮮出爐時。依家多個對手,希望有競爭,就有進步。
今趟同老婆嚟食早餐,星期六嘅早上,客唔多,不過已叫做差唔多坐滿,因為店內間咗後面係餅房、廚房,然後係水吧,淨番大概半個鋪位擺枱凳,約莫20個位左右,所以鋪頭細細。但比起文記、牛記,好坐好多,主因都係環境較新簇,再者,啡凳白枱,型格少少無咁老餅。
食物選擇唔係好多,三文治、公仔麵以外,早餐有4款,其次就係10多款炒粉飯麵。不過好得意,早餐竟然係假日暫停,我諗大概要啲客樣樣散叫,咁樣可以賺多少少啦。
同老婆一樣要早餐A,有餐包或方包,伴煎雙蛋或炒蛋(我要前者,佢要後者),再加一碗火腿通粉,跟熱飲,早餐計都好豐富喇!
餐包好鬆軟,果然不愧係自家製,勝在新鮮。煎蛋出色,煎得靚,夾餐包嚟食,一咬蛋黃爆漿特別正。但點解只得一隻蛋?唔係煎雙蛋咩,變相加咗價喎。
火腿絲通粉,好普通,因為湯底淡口無乜味,通粉勉勉強強,一開始食已經有啲腍,明顯煮過籠。
到茶餐廳總係鍾情飲奶茶,今早亦係,德福嘅奶茶好夠茶香,但唔算好滑,不過不失啦。 |
|
|
百樂門宴會廳 The Arch Banquet Hall |
標題 : 擺酒大場食小炒 |
地址 : 美孚景荔徑8號盈暉臺盈暉家居城1樓126號舖 |
地區 : 美孚 |
|
現時分數:
|
日期 : 2012-04-16 11:30:57
一餐生日飯,一拖再拖,拖咗幾個月先食。因為我哋幾家人都算係美孚街坊,地點就揀咗係屋企附近嘅百樂門宴會廳,另一個原因係依度年初搞咗一大輪裝修,同埋轉咗大集團做,即管又睇吓佢哋嘅手勢。雖然轉咗手,但都仲見到啲舊伙計喎。不過,依家由大集團做,感覺成間嘢好似醒神咗好多。
我哋訂早少少,怕人多,6:00pm到,果然無乜人,好似啱啱開鋪咁。就算去到7:30pm,望落都只係七、八乘滿,始終佢個位置確實有啲隔涉,偏埋美孚一角。但係,裝修後環境真係正好多,少咗啲柱位,掛咗幾盞大型水晶燈,加裝彩色射燈,又搭晒台,擺明車馬專攻婚宴生意。初頭都覺得因為位置問題會係先天不足,擺酒席唔多搞得起,估唔到近依個月都見有人晌度擺酒,其實識行嘅,去美孚西鐵站都係5分鐘左右,行去美孚荃灣線亦只不過10分鐘啫。
依間百樂門長期推出「晚飯3選2三寶」,每枱客都可以晌3款特價小菜中揀兩個,今期嘅三寶有香脆拔絲骨($38.8)、叉燒皇($48.8)同帶子三層樓($48.8)。精打細算嘅港人通常都盡享依啲優惠,因為同枱係慶祝三個人生日(應該係補祝),所以,預咗食得豐富啲,故此再加個老火湯及4個小炒,肯定食到飽飽,因為我哋都係5個大人1個細路啫。
老火例湯
老火湯原煲上,湯渣撈起碟上,有紅蘿蔔、豬骨、沙參、玉竹、猴頭菇,證明足料。而且湯味清甜、夠濃郁,煲足火喉,夠老火。
香脆拔絲骨
生炒骨嘅升級版,以生炒骨為基礎,再打做一朕麥芽糖拔絲效果,加上以水蜜桃伴碟,色澤鮮明,賣相搶眼。排骨有肉地,脆漿唔算厚,咬落幾脆,又帶點麥芽糖甜味,拔絲效果純粹綽頭嘢,不過只賣$38.8,確係抵食。
話梅豬手煲
瓦煲就大大個,份量唔算多,只有半滿,不過,都已經有5、6件豬手。味道話梅味幾重,但又唔係死酸,都OK喎。
帶子三層樓
對依個菜幾有好感,一磚磚水豆腐一面醮滿紫菜碎然後脆炸,放上整熟咗嘅帶子,再加啲蟹籽做裝飾,一客6件排得整整齊齊,賣相吸引。豆腐內嫩外脆,紫菜碎有啲畫龍點睛之效,令豆腐食起嚟無咁寡。帶子質素都OK,幾厚肉,有鮮味!
豉椒生炒涼瓜片
同枱多人都鍾意食菜,所以「專登」叫咗兩個淨菜,難得當中亦多人好涼瓜,所以就要咗碟豉椒生炒涼瓜片。其實好簡單,就咁得豆豉、青椒同涼瓜,豉香惹味,涼瓜味甘,唔錯嘅配搭。
椒絲腐乳炒通菜
依個傳統大排檔常見菜式,亦係一道歷久不衰嘅小炒。係略嫌椒絲同腐乳味都唔夠出,腐乳應該再落得狠少少。
水庫魚頭煮走地雞
今餐飯嘅另一道重頭戲,一大個銀盆以Gas爐「慶住」上枱,相中為半份嘅份量。友人講依個係順德菜,好似係專賣河鮮嘅肇順名匯做起依道菜。「水庫魚頭」初頭聽落真係唔知何解,原來係順德特產,順德河鮮出晒名,而依啲大魚晌當地水質潔淨嘅水庫天生天養,所以特別肥美。盆內有3個大魚魚頭,肉質鮮味;湯內仲有走地雞件、粟米,下咗少少胡椒,材料都幾豐富,雞件咬落唔嚡,幾有肉味,估計都有半隻雞,粟米又清甜,當然個湯底都唔可以放過啦,大家一飲而盡,頗為暖身。
因為友人A係依間鋪前身凱旋門嘅長期客仔,所以啲舊伙計見到佢都特別好招呼。今餐生日飯,大家都食得好開心,除咗食物唔錯之外,最主要都係一班老友,相識多載,老套一句,友誼永固,嗰份友情特別珍惜。
可能店鋪新轉手,都想做番啲表現,樣樣嘢都整得唔錯,頗有水準同心思,希望佢保持到,所以,今次俾個笑佢先! |
|
|
Pancake Colours Cafe & Bar |
標題 : 小組飯局之大飲大食 |
地址 : 旺角彌敦道628號瓊華中心7樓全層 |
地區 : 旺角 |
|
現時分數:
|
日期 : 2012-04-13 11:17:19
每個月一次嘅教會細胞小組,依個月由勁忙碌嘅姊妹R負責,原本十多人嘅小組,最後都係得幾個人出席到,湊埋兩個細路,先叫夠半打,不過,我依啲磨爛蓆一定奉陪到底,人多人少都會撐吓場。
由於人少,就唔搞咩活動,只係食餐飯,傾吓偈就算。時間、地點、訂位一切由R姊妹,我就帶個人去食食食,不過,點餐時都幫吓眼。
最原先,姊妹R係訂8個人,店方俾個卡位我哋,好疑惑點坐到8個人呀!臨時一個甩底,我哋當中有兩個係小朋友,加埋4個大人,總共6個人,先叫做坐得有啲鬆動,真係嚟多個都坐得夾硬添,所以覺得店方安排座位確有問題。雖然,依度其中一個賣點係店中有好多特別嘅座椅,但大部份其實都幾殘舊,好似我哋所坐嗰張卡位,揭起鋪面塊絨布,下面張梳化其實又殘又爛,真係環境夠昏暗,先叫人唔覺唔覺架咋。由於環境幽幽暗暗,又係不利於小弟部DC仔,影出嚟嘅相係差啲,請見諒!
晚市有要求每人最低一個主菜消費,感覺唔多合理,始終有啲人可能細食啲。最後,我哋點咗個4人餐,五百零蚊,包好多嘢:4客餐湯、任選主菜兩款、任選薄餅一款、小食拼盤款、任選$54以下甜品四客、任選$34以下飲品四杯。加上,我哋已問咗服務員,兩個幾歲嘅細路可以豁免「最低一個主菜消費」嘅規限,再者,原來姊妹R有VIP卡(怪不之得揀嚟依度食),即係有10%折扣,慳番加一。以咁嘅份量,款式又可任揀,個4人餐確實好抵食,不過,相信係4個男仔嚟食就OK,因為依家4個大人加埋兩個細路,都勉勉強清晒,如果4位女士都真係擔心會食唔晒。
羅宋湯
一般貨色,因為蕃茄味唔夠濃郁,似係有辣味嘅什菜湯啫!
小食拼盤
一份有齊意式茄醬芝士腸、脆香雞翼、鮮蝦特長春卷、椒鹽薯條,估唔到又幾OK喎,諗住都係普通嘢,雖然唔係話勁好食,但一切上枱時都熱辣辣、口感香脆,兩個細路就最鍾意。
美式原條燒豬仔肋骨配薯菜沙律
任選主菜,心態上一定會揀啲貴嘢,依個燒豬仔肋骨就係全個餐牌中最貴,散叫要$168。落咗單後無耐就到,明顯預計較多人點4人餐,預備定先可以咁快上枱,都擔心會唔會整定效果無咁好呢,但食落外皮脆口又夠熱辣,醬汁又香濃,唯一係肉汁唔多,又有少少嚡。因為係原條肋骨,份量頗大,伴有沙律菜同炸薯條,絕對有美式格局。
照燒鰻魚蛋包飯
媽咪W話啲細路鍾意食蛋包飯,雖然個照燒鰻魚蛋包飯唔係餐牌中次等貴嘅主菜,但最緊要都係大家啱食,不過散叫價都要$109。蛋包飯係白飯底,照燒鰻魚係放晌蛋包飯之上,再撤上木魚碎同紫菜碎。個蛋包飯比起晌尖咀Niji嘅就差咗一皮喇,原因蛋皮厚;反而個鰻魚做得唔錯,鰻魚油潤,照燒汁又幾夠味,而且啲木魚碎又郁吓郁吓,啲細路睇到又覺得好得意咁。
意大利美腿薄餅
薄餅有成10款,有啲都幾有特色,例如:橫行薄餅(軟殼蟹、松葉蟹棒配咖喱醬)、農村風情薄餅(野菌配牛肝菌醬)、希特勒革命薄餅(德國肉腸配肉醬)……。我哋揀嘅係意大利美腿薄餅,係巴馬火腿配蕃茄醬,10吋批,薄批底,咬落幾脆,除巴馬火腿,仲有啲磨菇、青椒同粟米粒,餡料幾足架,只係火腿鹹香未夠、油潤不足,整體味道只可俾個不過不失嘅評語。
甜品
甜品都稱得上係Pancake Colour嘅強項,餐牌中有成3版紙介紹,足足30多款任君選,分成幾大系列。
藍莓美式班戟 - 媽咪W話大女好鍾意食美式班戟,指定點佢,所以我哋絕對唔介質由大女一個獨吞晒成份藍莓班戟。賣相算係咁,一件班戟淋上好多藍莓醬,再加一大球雲喱拿雪糕,唧啲忌廉花,大女睇見笑到見牙唔見眼,開心死佢呀。最後,咁大份,佢梗食唔晒,阿媽包底啦。
香蕉法式班戟 - 班戟皮做得好薄,香蕉肉切片圍邊,做靚少少賣相,所以無放晌入班戟內。雖然班戟內嘅忌廉打得好夠滑,但又未免太多喇。仲有一球雲喱拿雪糕伴碟,淋上朱古力醬,依個甜品都唔錯!
宇治綠茶乳酪雪糕 – 較新推出嘅乳酪雪糕,一共有6款口味,以原味乳酪雪糕搭唔同配料,我依個係紅豆圍邊,淋上綠茶漿,再以粟米脆片墊底,個配搭又幾好食喎。乳酪雪糕酸酸甜,頗為醒神,紅豆又腍又香,綠茶漿有色水,不過綠茶味淡,反面粟米脆片增加脆脆口感,比較有點子,不過啲乳酪雪糕溶得好快。
紅豆雪糕豆腐花 – 晌豆腐花之上加上雲喱拿雪糕同紅豆蓉,4個甜品最麻麻係依個。
飲品
唔好凍飲嘅姊妹R要咗杯桂圓紅棗茶,爸爸J點嘅係鹹檸七,媽咪W就試咗杯黑牛,佢話好懷念依類古早味。小弟就揀嚟雪糕紅豆牛奶沙冰,凍飲杯杯都超大杯,加上我依杯又雪糕、又紅豆,仲要係搵牛奶打成嘅沙冰,食你唔飽都飲到你飽呀!好冰凍,令人飲落超涼快。
|
|
|
藝廊咖啡室 Cafe Aficionado |
標題 : 去機場富豪.扮一晚闊佬 |
地址 : 赤臘角香港國際機場 暢達路9號富豪機場酒店地面層 |
地區 : 赤鱲角 |
|
現時分數:
|
日期 : 2012-04-12 16:53:43
真係從無打算過山長水遠入到嚟機場食自助餐,就算東涌諾富特東薈城酒店嘅Essence,算係城中有名抵食嘅自助餐,都未有打算去,更何況仲要遠啲又隔涉啲嘅富豪機場酒店,但唔使錢嘅話又無理由唔去嘅。事緣晌一啲網站遊戲,無啦啦贏咗兩張自助晚餐贈券,所以走到老遠扮闊佬,請老婆入去大擦一餐,雖然佢成日強調唔多鍾意食自助餐,因為唔抵喎,但免費嘅就「捱義氣」陪我啦!
揀咗星期五晚入嚟食,雖然收工先入嚟,到咗都成7:30pm,但係自助餐供應由6:00pm到10:00pm,可能地點遠離市區,所以,供應時間比一般市區內嘅較長。之不過,最後我哋都係食到9:30pm就走,因為已經食到飽一飽,主要人客唔太多,目測睇落6-7乘滿,加上我哋7:30pm先到,所以唔使點排隊搶食。
因為係免費關係,無睇過佢啲食評,更無留意佢個自助晚餐做咩主題,純粹以平常心態嚟試試。未拎嘢食前,掃視一下成個場先,地方比想像中大,但樓底矮,裝修好聽啲叫有時代感,唔好聽啲似大眾飯堂,不過枱凳唔算排得太逼,我哋兩個又被安排坐晌四人枱,空間自己更寬趟。座位分開咗幾個區域,而食物所在位置就集中晌餐廳中間,種類、款式比唔上市區一啲出名嘅酒店,但計埋都數十款嘢,睇落又唔差,預計自己都可以飽肚而回!順提一帶服務方面,雖然見服務員唔多,但似蜜蜂般殷勤不停咁做,只係去到尾段陸續有客埋單,客人已走嘅枱上杯碟未得閒清理,其他服務就如常密密做,同埋普遍都客氣有禮。
沙律吧
所有沙律菜、配料、醬汁都用小桶盛載,感覺衛生企理,另有數款預製沙律。雖然,沙律食材無咩突出,全部都係常見嘅大路貨式,但以沙律為基調,再加上部份冷盤食物、生果,做出一道豐富而清新嘅自家製頭盤,開開胃,大可增加食慾,強化一下戰鬥力。
冷盤小食
就晌沙律吧傍,放有4款精緻冷盤小食:柑橘伴BBQ蝦沙律、西班牙辣肉腸、燒墨魚仔伴茄蓉汁、椰子柑柚沙律。我試咗前者三款,的的骰骰,味道又各具特色,尤其個蝦沙律,BBQ蝦爽彈,柑橘酸酸甜,好鮮活。
此外,冷盤仲有一盤盤嘅雜肉拼盤(凍肉腸)、自制肉醬批、煙三文,我就樣樣都要少少,加埋落份沙律度一齊食,再淋上蜜糖芥末汁,正呀!
海鮮
海鮮一環比較普通,只有甜蝦、青口、龍蝦仔、長蟹腳。甜蝦、青口尚算不俗;龍蝦仔不嬲都好睇唔好食,無乜肉地,得個鹹字;長蟹腳返貨都少咗,而且瘦削肉少,食兩隻,志在淺嚐。
壽司、魚生
大環形食物枱,沙律吧、冷盤、海鮮區背後就輪到係壽司、魚生,魚生反而唔錯喎,長形凍櫃放有三文魚、吞拿魚、旗魚、鯛魚,師傅長註,要幾多,就切幾多,味道都幾新鮮;側邊就放咗一大盤壽司,不時轉款。
熱盤
正正中間就擺有熱盤嘅長枱,約十來款,都無留意有無轉過款,所以款式上唔太多,不過有三幾款係是晚心水。憑相片紀錄,熱盤大概包括燴牛肉、香草忌廉汁燴蜆、香煎爐魚配士多啤梨沙沙汁、炒薯、士多啤梨排骨酥、清蒸海上鮮、蘋果蝦乾炒花枝片、豉椒青口、燒雜菌、椒鹽瀨尿蝦、
炸海鮮配水瓜柳汁……。個人心水就有燴牛肉、香草忌廉汁燴蜆、燒雜菌、蘋果蝦乾炒花枝片,今回唔逐款評,但論質素、味道係比較突出、好食,前三者味道濃郁,後者就清香!
中湯、西湯
依晚中湯係蓮藕鱆魚煲豬展,而西湯係鮮蝦濃湯,一碗同老婆兩份飲,兩者都試勻。中湯湯料足,味道都唔錯,不過西湯較為出色,濃稠啱啱好,飲落滑身好濃蝦味,湯中有粒粒細蝦仔,我仲私人加咗隻龍蝦仔拍埋扮晒嘢影相,變得有睇頭啲。去到見啲鮮蝦濃湯無龍蝦仔,就千祈唔好投訴人哋喇,哈哈!
烤肉
烤肉相信稱得上今晚亮點之一,因為一般自助餐都係得一款烤肉,唔係燒西冷,就燒肉眼,但藝廊竟然一門三傑,同一時間供應燒豬柳、燒牛肉、燒羊脾,醬汁分別有燒汁同黑椒汁,再多配英國芥辣、法國芥辣、辣根汁。我都幾鍾意食肉,所以真係幾喜出望外,就要一碟燒肉拼盤,一次過試齊三款肉,除咗豬柳較乾身,牛肉同羊脾都肉嫩汁多,好食!
現場即煮
由大師傅即點即煮嘅有香煎羊架、意大利燴飯同蕃茄汁炒意大利麵,意大利麵唔係太大興趣試,所以就點咗少少意大利燴飯同羊架。意大利飯煮得幾好,煙韌有咬口,好香芝士味,最有趣係晌飯面加咗啲搶眼蟹籽,賣相型格咗仲咬落多咗朕卜脆口感;而羊架雖然煎得濃啲,但好香口,羶香惹味,肉質嫩腍。我就加埋落上面碟烤肉一齊食,成為自家品牌食肉獸意大利碟頭飯。
咖喱
晌烤肉旁有一列印度瓦煲仔,係另一亮點,多款咖喱美食,好似咖喱牛肉、咖喱海鮮、馬沙拉雞、咖喱雜菜……等等。咖喱味道唔單薄,整作感覺唔馬虎,撈飯一流,不過會太飽,我就淨食餸,另有一盤果蓉、提子乾、椰奶…伴食,可加添咖喱香味同口感。
其他小食
被放遂埋一邊仲有兩款小食,包括:芝士菠蘿薄餅、葡撻,因為一早預先制好,只係放晌熱燈下烘住,味道自然大打折扣,除非你本身好鍾意食依兩樣嘢,否則,可入全晚可放棄之列。
甜品
除有朱古力噴泉,仲有3款桶裝雪糕,品牌唔知,口味就有朱古力、芝麻、芒果,提供雪糕筒及幾款配料,啱小朋友搞吓手作仔。另外,麵包布甸呀、慕絲呀、芝士蛋糕呀、朱古力蛋糕呀、布甸呀、迷你撻呀、奶凍呀、刨冰呀……近廿款之多,原個蛋糕嘅、細件裝嘅、杯裝嘅一應俱全。
我都幾嗜甜品,所以,臨尾最後一擊,都鯨吞咗兩碟甜品加兩球雪糕至收手,可歸納一句:選擇多多但出色恨少!唔係話佢啲甜品好差,只係大路啲,食完無乜邊幾款令人難忙咁啫。如果你唔係對甜品太有要求,其實,依度供應嘅已經好唔錯。附近仲擺放咗幾款生果:哈蜜瓜、菠蘿、西瓜,甜品唔啱嘅,都可以食幾個飯後果幫助消化。
啡茶
咖啡、奶茶、檸茶、檸水任飲任斟,果汁就欠奉,咖啡亦係用時依家自助餐時興嘅即磨咖啡機,咖啡選擇多啲,都係慣性,食甜品,嘆咖啡,總係感覺夾啲,亦係一個晚餐完整嘅終結!
總結整體質素晌好食與一般之間,始終位置較輸蝕,所以佢哋做嘅價位比起市中心嘅平一截,好似依家閒日星期一至五,自助晚餐做緊$348 + 10%,星期六、日就$368 + 10%,但係如果晌市區嘅,連加一,一般都去到近$500,所以平成20%有多。再者,富豪系嘅酒店做宣傳、推廣都好進取,經常見佢晌免費報紙賣廣告之餘,又久唔久收到信用卡宣傳單張,某某閒日以某某信用卡簽帳有65折,雖然係遠啲,但計番個折實價,為起都係$260左右,性價比又會扯番高啲。 |
|
|
彩晶軒 V Cuisine |
標題 : 難得一遇.聚舊晚飯 |
地址 : 尖沙咀加連威老道100號港晶中心2樓全層 |
地區 : 尖沙咀 |
|
現時分數:
|
日期 : 2012-04-10 15:41:45
跟老婆晌紅磡出席完一單白事,其間遇番好耐無見嘅弟兄姊妹,難得一遇,一齊飯聚係自然不過嘅事,一行七人,本想就咁晌紅磡搵間菜館,可以襟坐啲嗰隻,就想起不如上都會商場,點知咁啱擺酒,所以就行遠少少過返尖東彩晶軒,由於之前嚟過飲茶,覺得食物有水準,所以再嚟幫襯食晚飯,感覺有信心啲。即時打電話訂枱,真好,啱啱仲有位!
有套餐,略嫌貴咗啲,再翻翻餐牌,有幾多選擇,再翻後啲,有一列廚師精選推介,係實惠啲嘅小菜,$55-$98,結果晌餐牌中散點幾款,晌廚師精選推介中又揀幾款。
澄海老四冰鎮鵝肉卷 $48
叫咗兩個餐前小食,亦係兩道冷盤,一個鵝肉卷,一個木耳蝦。正幻想緊依個澄海老四冰鎮鵝肉卷究竟係乜,好快就上枱喇。覺得佢係腐皮卷嘅變奏,鴨絲、甘筍絲、芹菜絲……以鹵豆腐皮包捲,以煙燻代蒸,好濃重嘅煙燻香,又冰冰涼涼,有個性嘅冷盤小食。
長白山冰天木耳蝦 $48
第一道冷盤出色,估唔到第二道冷盤亦算係唔錯。「長白山冰天」個名就只係整色整水,改得令人感覺犀利啲。木耳同蝦簡單以醬汁醃過,木耳爽脆,可惜蝦未做到爽彈,否則又係一道出色小食。伴有手拍青瓜,味道鹹鹹辣辣,青瓜清新,幫個小食拉番多少少分!
馳名欖角醬烤骨 $78
值得推介嘅小菜,因為甘香惹味,同白飯絕對係老友記。排骨泡油後,再以醬料、欖角兜炒,欖角好提味,齣香非常突出,排骨鬆化唔油,正!
百合糖豆炒吊片 $68
雖未至於妹仔大過主人婆,但蜜糖豆應該較搶鏡,因為蜜糖豆好清甜,炒得又爽口;魷魚片大片得嚟又多,魷魚味鮮,雖然依道菜簡單,但大廚功夫紮實。
魚湯鮮菌浸什菜 $68
除咗有秀珍菇,仲有西蘭花、生菜、菜心,賣相就麻麻,好似埋亂草咁,但無可否認魚湯確係幾夠濃,如果要揀一款多菜嘅菜式,依道魚湯浸菜值得考慮。
藕斷絲不連豚肉藕餅 $78
簡單講,就係煎藕餅,仲諗住睇吓佢點樣「藕斷絲不連」添,會唔會有咩花招。藕餅好有蓮藕味,加埋豬肉、蔥粒、紫菜碎,香口唔鬆散,外層又煎得甘香,幾OK!
星馬喇沙海鮮煲 $88
好雅致嘅陶瓷小窩,滿滿嘅馬來西亞咖喱喇沙汁,咖喱喇沙好香,唔係單單咖喱味,因為有南薑、又加椰奶,香辣得嚟甘醇啲,又係撈飯好拍檔啦。既然叫海鮮煲,海鮮料都唔賴皮架,有蝦、有魷桶又有帶子,仲配以蜜糖豆、薯仔、紅蘿蔔,埋滿一窩,抵食之選。
雖然無糖水,但晚飯例送生果盤,都有少少驚喜,因為份量唔少之餘,仲唔係求求其其西瓜一碟,而係包括哈蜜瓜、西瓜、火龍果,切得整齊擺得靚靚,啲客見到心裡都覺得成餐飯抵晒。茶芥$10位,白飯$10碗,加埋一,都係六百幾,除勻每人都唔使一舊水,抵食!
|
|
|
林記涼茶店
|
標題 : 功效多多自家製涼茶 |
地址 : 榕樹灣後街17號 |
地區 : 南丫島 |
|
現時分數:
|
日期 : 2012-04-09 14:33:16
南丫島係本地人假期行山嘅熱門地點之一,逢假日,就逼滿人,相反,其他日子,就顯得水靜鵝飛。話晒小弟都晌裡面生活咗成5年,平日除咗返放工嘅時段外,其餘時間都靜繩繩。老實講,住就非常好住,但交通始終有啲唔方便,買嘢又係選擇有限。
行山行到累自不然要休息吓,行到口渴嘅,除咗阿婆豆腐花之外,其實林記涼茶店都係一個值得推介嘅選擇,與其晌士多買水飲,不如晌林記買支健康自家製嘅涼茶。
一共有成16款涼茶之多,大路又常見嘅,有酸梅湯、夏枯草、銀菊露、五花茶……等等,較特吃少見嘅,有雪梨雪耳枇杷葉、羅漢果枇杷葉桔餅、雞骨草搭金錢草……等等,幾年嚟都無乜轉過款,當然價錢有別啦。各樣飲品寫晒有咩功效,如:清濕熱、消暑、化痰、解毒、祛肝火、生津止渴,真係各式其式。
蘋果桂花茶 $13
功效包括養顏、健脾、開胃、消口氣,有無咁靈,真係飲一支相信都唔係話咁快見效,但色澤金黃嘅蘋果桂花茶,飲落感覺幾柔和,桂花味唔係好重,蘋果味比較側重啲,整體會係幽幽香咁,況且屬於少甜,更覺健康!
|
|
|
舢舨海鮮酒家 Sampan Seafood Restaurant |
標題 : 環境勝於食物 |
地址 : 榕樹灣大街16號 |
地區 : 南丫島 |
|
現時分數:
|
日期 : 2012-04-05 12:05:08
由南丫島搬返出市區都一段時間,早輪趁星期五晚入返嚟,晌星期六朝就落去舢舨嘆番個早茶先。兩公婆落嚟飲茶,都真係志在hea,享受個環境多個啲食物,因為舢舨始終主打海鮮,做埋早市賺多個錢,兼俾個場等街坊有地方落腳打牙骹,不過,佢早市嘅點心都OK架。
自已搵好位,枱上已有筷子、茶杯、碗仔同匙羮,等伙計送上熱茶,可能唔係熟客仔啦,都好似唔多理啋,叫咗幾次先送到壺茶嚟。而點心就擺晌晒鋪面嘅檔口度,全部都係大路貨色,因為都係街坊生意,平平實實,唔會有咩花臣嘢,自助形式,拎個托盤,攞齊點心就吸印仔返埋位。
蝦腸
亮點就係多蝦,不愧係做海鮮生意呀!多蝦之餘,蝦隻新鮮又大粒,食落鮮味爽彈,可惜,以為啲腸粉皮拉得夠薄兼通透,點知口感有啲削身,美中不足之處。不過,個人嚟講,都值得推介嘅點心。
牛肉球
一客三粒,牛肉味鮮,咬落唔死實,加咗馬蹄粒、芫茜,整體味道唔錯。
鳳爪
晌出面檔口睇見啲鳳爪時,好似好大籠,仲只係小點添,返到埋位,夾起啲鳳爪時,先發現用咗好多芋頭墊底,仲大大舊添,真係走漏眼。好彩嘅係鳳爪啲味道唔差,夠晒入味;雖然好多芋頭,其實啲芋頭都幾好食,一來夠粉,二來就係索晒啲汁,幾惹味哩!
一邊嘆一盅兩件,一邊呷啖菜,吹吹海風望望天,難得藍天碧海,心情都爽啲。最後埋單$60,事前都無問茶錢幾多,點心咩價,不過,開揚海景無遮無擋,撻住拖鞋絕不歧視,晌香港都搵唔得幾多地方係咁啦!食夠,起行,行山去。
|
|
|
柏景餐廳 Cafe on the Park |
標題 : 太平盛宴饗法味 |
地址 : 尖沙咀廣東道33號中港城皇家太平洋酒店園景翼2樓 |
地區 : 尖沙咀 |
|
現時分數:
|
日期 : 2012-04-04 18:27:16
小弟自問未敢聲稱咩星級食家,只係喜歡試吓新嘢嘅為食家,今趟有幸被青睞成為試食嘅一份子,實在榮幸至極,多謝主辦機構之餘,更要多謝柏景餐廳,因為未試過咁嘆嚟食自助餐架,點嘆法?等陣先講。
去親食飯,我依啲嘍囉甚少跟啲大廚打交道,今晚得公關安排,晌開餐前,行政總廚袁師傅Kenneth不單同一眾食家打個招呼、傾幾句。中段亦再過嚟問吓我哋覺得啲嘢點,非常親民。又同我哋一齊嚟張大合照,最可惜未有請求一入廚房重地參觀,成日都好想知裡面有幾大?運作係點?今晚唔係一般普通嘅自助餐,而係好有fine dining感覺嘅自助餐,因為袁師傅早已從眾多自助餐食物中,精挑咗8樣嘢作為今晚嘅試食精選(Tasting Menu),以華麗賣相逐一登場;再加上餐前先來一道震撼嘅海鮮拼盤,簡直頂級呈獻;中場又加插原盅嘅滋補燉湯,淨係咁嘅排場,已經係一個非一般嘅自助餐體驗!好老實,若非我為食,基本上真係唔使點出去拎嘢食都飽晒,真係非常多謝酒店嘅公關同袁師傅嘅貼心安排。
海鮮拼盤
自助餐一向都會提供唔同嘅冷盤海鮮,柏景當然唔例外啦,但經過袁師傅嘅安排,首先登場係以巨大透明玻璃碗盛載嘅海鮮拼盤,由侍應捧嚟,免除排隊搵食之苦,包括雪花蟹腳、甜熟蝦、瀨尿蝦、加拿大翡翠螺、紐西蘭青口、大蜆,絕對係陣容鼎盛嘅海鮮大匯。除咗瀨尿蝦較為細隻,無乜肉地,其他都鮮味非常,尤其蟹腳、甜蝦同翡翠螺,餐廳早已預備好鉸剪俾我哋拆蟹腳,所以可以大啖大啖成條「蟹捧」放入口,呷到蟹肉滲出淡淡海水味,正;甜蝦咬感爽彈,蝦味鮮活;後者翡翠螺亦不惶多讓,韌勁中帶出鹹鮮味,不愧頂級呈獻!據知,海鮮仲有法國螃蟹、大頭蝦、法國黃金螺……等等,每日轉款。雖然你未必可以好似我哋咁有如此「特別待遇」,但質素絕對一樣,而且去到尾段,仍見到餐廳為海鮮翻貨,所以,海鮮嘅供應一定會滿足到你。
柏景都唔係第一次幫襯,佢哋嘅自助晚餐每兩個月就轉主題一次,記得上年又係差唔多依段時間,試過佢以黑松露為主打嘅「黑鑽‧盛饌」自助晚餐,印象猶深。故此,今次佢以法國菜為主題嘅「味遊.法式饗宴」,未食之前已有一定嘅期望!在食物枱上,無論海鮮、冷盤、熱盤、甜品……每類都滲進幾道法式美食,所以小弟覺得,既為主題,亦為特色,應該試咗嗰一堆主題菜式先,唔知邊啲係?話都無咁易就認得出,因為柏景另一個細心位就係佢哋每道食物都有個牌仔標明係乜,中英對照,而主題菜式就加多支藍白紅法國國旗仔晌名牌右下角,菜名就改為中法對照,易睇易認。
既然袁師傅早已為一眾食家預備好試食精選,當然先介紹依8道精緻細膩嘅法式美饌啦。法國菜一向俾人感覺係用料上乘、烹調獨特、賣相精細,食自助餐就較難做到後者,不過,既為試食精選,袁師傅係依點都絕無偷懶,擺設盡顯心思。所以,侍應每次將精選菜式奉上時,都引來席間嘩嘩聲,跟住就係相機嘅嚓嚓聲,然後就係我哋嘅「習習聲」。
1. 鮮鮭魚他他 Tartare de saumon frais
好一道醒胃前菜,新鮮三文魚切碎,簡單哋加上香草碎、洋蔥粒,以中式湯匙盛載,嚟得簡約而不失精巧。三文魚油潤肥美,香草同蔥粒有畫龍點睛之效,令三文魚食起嚟,油潤而唔覺膩。
2. 芝士焗波菜蓉伴帶子 Coquilles St. Jacques au Gratin a la Florentine
大大隻連殼帶子一上枱已令人覺得好有睇頭,烤烘得金黃,真係流晒口水。入口夠晒熱辣辣,帶子肉厚而爽,下面嘅波菜蓉嫰綠味清,原來下面仲有少少薯蓉墊底,打得柔滑甘香,面層嘅芝士也份量啱啱好,香濃得嚟唔會太搶。除咗安哥添食之外,值得推介!
3. 法國香草包糠焗羊架 Rack of Lamb "Provencale" Style
我諗保雲蘇焗羊架都應該係法國菜嘅經典之一,羊架先煎封,再搽上法國芥末、麵包糠,入爐再輕焗。所以,食得到肉質幼嫩,肉汁豐盈,大廚棄芥末,取香草,異曲同工減低羊羶味,易入口,當然,小弟好食羊,羶啲仲啱添。見出面自助餐枱嘅羊架係一支骨,捧上俾我哋試食嘅每件有兩支,足見為我哋刻意營造,令小弟感動不矣。
4. 煎薯蓉班戟伴鴨肝 Potato Pancake au Foie Gras
在自助餐枱好易搵到佢個蹤影,因為切好晒大大塊嘅鴨肝片,似玩層層疊咁一大盤,有師傅即場密密煎。造型小巧嘅班戟,係先輕煎鴨肝片,反轉後再淋上加入薯蓉做嘅粉漿,煎成班戟模樣,幾有創意同心思嘅一款菜式。鴨肝味唔算好濃,班戟有點點薯香,不過,咬落兩者質感有啲似,口感未夠突出。
5. 蜆殼粉焗釀田螺 Escargot avec des cuit Conchiglioni
法式焗田螺依家好多餐廳都有做,都唔一定要晌法國餐廳先食到。大廚今轉巧妙玩色差,深黑色嘅田螺配淺黃色嘅蜆殼粉,伴啲香草、牛油,以焗釀方法處理,仲要加一撮唧花薯蓉,盡顯法國菜彷如藝術品嘅別緻精細。又係另一個添食兼推介嘅菜式,因為螺肉味鮮,又充滿牛油香,搭上咬口嘅蜆殼粉,感覺唔太「漏」,細細件一份,猶如睇波時嘅香口小食。
6. 烤豬柳伴焦糖洋蔥蘋果 Pork Medallion and Caramelized Onion and Apples
我係焦糖粉絲,所以極期待依道菜上場,一碟十多塊烤豬柳平斜排列,淋上醬汁,撤點鮮香草裝飾,不愧為千呼萬喚始出來。烤豬柳雖然薄切,但本身都幾闊身大件,豬柳烤得軟腍腍,又帶少少油潤,肉身唔太嚡;配上焦糖洋蔥蘋果汁,甜甜哋有種蜜香嘅感覺,吸收咗醬汁嘅洋蔥亦唔好放過。
7. 布吉尼燴牛肉 Boeuf Bourguignon
即係法式紅酒燴牛肉,大大方粒牛肉整齊排列晌大碟上,甚有立體視覺效果。紅酒燴一向都係花心機之作,加上牛肉咬落軟綿鬆化入味,相信烹煮時間不少。小弟覺得肉味頗濃,牛肉中間又隔咗一層油脂,味道會甘腴多點,唯紅酒味唔算好突出,但更能突出肉味呢!
8. 白朱古力象牙蛋糕 Ivoire
試食精選中唯一一道甜品,以前亦未曾聽過佢大名。色澤亮麗得如象牙,橢圓外形的的骰骰,伴上小巧嘅蛋白球同紅莓,賣相惹人討好。底部似係一層杏仁餅底,中間放有提子粒,再淋上象牙色嘅白朱古力慕絲,味道複雜而特別,但未係小弟是晚心水甜品。
當然法式美食豈止於此,要數嘅仲有法國洋蔥湯、法國巴約訥風乾火腿伴蜜瓜、傳統鮭魚甜椒盅、百厘香白酒煮硯、三文魚凍批伴甜椒、慢煮油浸鴨脾、法式洋蔥炒牛肚、法式紅酒燴雞、法式香橙鴨、香煎田雞腿配雜香草、香煎鱒魚伴香草忌亷汁、法式檸檬撻、栗子巴夫、朱古力紅桑子蛋糕、法式焦糖燉蛋、酸果櫻桃杏仁薄荷撻、香梨果凍、蓋莓脆餅……等等。
除咗試勻以上精選,其實自助餐仲有好多好嘢食,小弟就唔一一細數,重點推介幾款心水:
1. 原盅燉湯 – 柏景嘅燉湯例飲,因為料足夠火喉。今晚係懷杞螺頭瘦肉湯,懷山(淮山)、枸杞子有滋補脾腎之效;螺頭又可清熱去濕,啱晒我啦,添飲唔該。
2. 燒西冷 - 西冷質素高,師傅手勢好,燒得肉嫩,伴燒汁、芥辣都好食。仲有伴菜嘅烤菇、烤蕃茄、烤翠玉瓜,都一樣咁正。
3. 焗忌廉薯 – 薯仔切成一片片,以忌廉汁、芝士烤焗,雖則簡簡單單,但一切忠於原味。
4. 沙律吧 – 可能好多人都覺自助餐食沙律好唔回本,但食嘢都要講味道,講平衡,佢哋嘅沙律菜新鮮爽脆,車厘茄超甜,幾款醬汁有水準,法汁係小弟首選。
5. 甜品 – 稱得上柏景嘅亮點,除十數款精緻蛋糕、慕絲、凍餅外,仲有麵包布甸、焗梳芙厘、炒雪糕、即製班戟、朱古力噴泉……,連杯裝雪糕都有3隻品牌,都咪話唔陣容強勁。次次都試唔晒架啦,今趟重點,除上述幾款法式甜點,仲有焦糖合桃蛋糕、紅橙慕絲蛋糕及焦糖慕絲蛋糕。
因為試食關係,我哋晌服務上多幾分優待,但食材跟大家晌出面食物枱所拎到嘅都係一樣,只係賣相執靚咗。整晚活動,能夠認識到咁多星級食家,一窺其廬山真面目,又邊食邊傾,講吓飲食,講吓旅遊,真係快樂不知時日過。溫馨提示,是次「味遊.法式饗宴」自助晚餐供應期去到四月尾,一個價錢,無拘無束試勻廿多款法式經典前菜、主菜或甜品,確實吸引! |
|
|
大阪好樂滿 Osaka Horumon |
標題 : 肚滿腸肥大滿燒 |
地址 : 銅鑼灣登龍街41-43號金龍大廈地下 |
地區 : 銅鑼灣 |
|
現時分數:
|
日期 : 2012-04-03 18:20:58
初聽「好樂滿」以為係個老細想改番個好意頭嘅名,好似「喜運來」呀、「好彩」呀、「福臨門」呀……之類,睇番佢啲宣傳單張,原來佢係日文嘅中文借音,原文「ホルモン」(HORUMON)取自大阪方言,意思即係「唔要都唔覺可惜嘅廢物」,據說就係有位料理大師將啲廢棄嘅內臟搞一搞,就成為一類獨特美食,仲紅遍整個大阪咁厲害。
日式燒肉開到其門如市,大阪好樂滿又有咩突圍殺手鐧?就係燒內臟,五花八門,雖則一講內臟就等同膽固醇、脂肪,但世事無絕對喎,據介紹話部份內臟其實含有天然骨膠原蛋白、豐富維他命,有美肌作用,信不信由你!其實香港人有都食內臟嘅習慣,喜歡試新嘢嘅港人應該接受到日式燒內臟。況且,店中幾十款選料,都唔係吓吓都係內臟嘅,仲有好多肉類,再加上店子亦提供其他非燒肉料理,如炒麵、石頭鍋飯……,所以,一試無妨,唔會燒一燒,膽固醇就超標嘅!況且,見識一下「刁鑽」嘅內臟部位,偶一為之,亦都係個有趣飲食經驗。
為方便附近嘅返工族,星期一至五,只供應午市套餐,有成9款選擇,有飯、有麵、有烏冬,$39-$65,包茶啡,另外加錢可再配其他嘢。想嚟燒好樂滿,一係就閒日夜晚,一係就星期六、日喇。睇番個價位,細細碟嘅內臟或燒肉,都係$28-$58,比起一般日式燒肉相宜,而其他理料就貴少少,不過就大大份丫嘛。
今次有幸成為「好樂滿」試食嘅先頭部隊,講講環境先,銅鑼灣租金超貴就毋容置疑啦,所以,店方亦要地盡其用,枱凳嘅格局以對坐嘅二人位為主,由於下面連接咗煤氣喉,所以啲枱係唔郁得,不過,有啲二人位孖住孖住,間接成為四人或六人枱。其實,枱與枱之間都幾狹窄,尤其中間位啲枱,加上抽風系統係以上抽式,天花之下豎立一支支抽風筒,多少都令整體空間多咗份焗促感。另外,抽風力度唔多夠,就算唔係燒到肥膏出現搶火嘅關係,有時都會出現煙火瀰漫嘅情況。此外,啲枱都幾細張,放咗個烤爐、醬汁、生菜籃,空位也所餘無幾,好彩店方特別預備一個三層嘅木架放食物,總算啲食材有掟企!除咗一部位挨牆位,其他都係無得挨嘅方凳位,凳下係個空木箱,專用嚟俾客擺隨身物品,算幾妥貼。一室鮮橙色,令人感覺幾有活力,抽風煙通貼有free WiFi貼紙,提醒你店內可免費自由上網架。
全餐試食,小弟幫佢大致細分為6個回合,頭4個係燒烤各款內臟同燒肉,尾兩個係一啲店內招牌料理。
泡菜、雜綿涼拌
未入正題,先上啲前菜俾大家開開胃。辣得入味,少少酸,確係醒神,為之一震。雜綿涼拌,有大豆芽、木耳絲、酸蘿蔔絲、芝麻菠菜,幾款食起嚟都清清新新,各有不同口感,有腍滑,有爽口,佢哋亦係我一陣食內臟時嘅良伴涼拌!
第1回合:厚切牛脷、豬沙加利、豬尾、牛沙瓜伴檸檬汁
依一轉係鹽燒,所以啲肉都係以鹽同芝麻粒輕輕一醃,燒好之後沾沾獨家秘製檸檬汁嚟食,已經好夠。
厚切牛脷 – 唔算好厚,燒1分燒就夠,質地軟腍得嚟有種咬口,牛脷不嬲係我至愛之一。檸檬汁調校過,唔會太酸,但帶有清爽檸檬香,配牛脷真係正。
豬沙加利 - 即係豬橫隔膜側,真刁鑽,極少接觸,色澤深,燒好後幾似牛肉,軟腍,唔肥,同樣點檸檬汁食就OK。
豬尾 – 望落白色一糰膏,無諗過豬尾係咁肥,怕食肥嘅人一定望而生畏呀。嚟得試食,就係神風突擊隊上身。侍應教路,逢係有肥膏嘅,盡量向上,無咁搶火兼咁大煙,了解!燒完之後都仲係感覺好肥,所以,店方另配備嘅「大阪生菜卷套餐」($38份)就大派用場,包括生菜、蔥絲、青椒片,加埋甜辣醬、辣醬,一齊夾住啲豬尾嚟食,去咗啲油膩感之餘,味道層次都多樣化咗。小弟就有個升級版,就係加埋泡菜、雜綿涼拌同啲燒黃金蒜頭,過癮呀!
牛沙瓜 – 即係牛第四個胃,中環水記招牌之一,唔太陌生。牛沙瓜面面帶有一層脂肪,燒好之後,食落好聽啲講就係爽脆、煙韌,個人心聲就係惡「0趙」。
第2回合:雞頸肉、牛小扒、豬軟骨伴醬油
經過第一階段,侍應小姐細心換上新網。3款肉均以醬油醃過,所以總體而言味道濃郁啲。
雞頸肉 – 已經去咗雞皮,切成一條條大肉絲咁款,同食一般雞肉分吃唔大,係比軟嫩滑。
牛小扒 – 有別一般帶有好多「雪花」嘅和牛,真真正正嘅細塊牛扒,係牛腹位置,肉味濃,腍滑軟身又香口,正呀!
豬軟骨 – 以醬油醃始終入味好多,除軟骨部位比較硬,肉位就非常軟熟,加上少少油脂,甘香豐腴。
第3回合:牛小腸、豬吉士伴味噌醬
由淡到濃,依轉出場就係醃味夠濃嘅味噌,燒完嘅內臟再點麵豉醬,鹹中帶甜,滿口香味。
牛腸仔 – 即係牛小腸,店方仲有牛大腸賣,俾咗個名叫牛腸哥,有緣下次一試。牛小腸嘅肥膏幾澎湃,成半吋厚,睇見隔離枱無反轉燒,搶火甚勁。又係要包生菜、涼拌嚟食,去去油膩,牛小腸無想中咁韌,又幾好食喎,係肥啲囉。
豬吉士 – 話人夠唔夠吉士(gutsy),即係夠唔夠膽,唔知點解佢借用咗當豬胃?口感爽爽脆脆,幾得意。試咗咁多款內臟嘢,食得出店家晌處理內臟時清洗得幾夠,乾淨,又無臭臊味。
第4回合:特選西冷牛肉涮涮鍋
雖然叫涮涮鍋,但就唔係水涮,係火涮,不過好蝦人燒。因為西冷牛肉切得非常薄,一落燒網好易黐,最佳方法將西冷鋪上烤網,千祈唔好郁佢,過1分鐘轉色後,慢慢捲住嚟反,試咗兩次都OK,咁就出到塊完整嘅特選西冷牛肉喇!牛肉唔係咩雪花肥牛,油花唔係好多,但勝在肉嫩、牛香滿口,大啖大啖咁食,感覺豪氣。
第5回合:好樂滿炒麵 $52
顧名思義,叫得好樂滿,即係內臟搭炒麵,不過,其實亦係店方自家信心之作。內臟有牛柏葉、牛肚、牛腸,再配上椰菜絲、大豆芽、洋蔥,調味帶些甜,炒得乾身而唔油,頗為惹味,作為臨尾墊肚嘅粉麵確係個好選擇,小弟一個人都食咗成大半碟,哈哈。
第6回合:香辣豬骨薯仔鍋 $148
依個係店內唯一一款鍋物,大鍋夠晒4個人食,人少可以點個細鍋$88啫。睇佢紅油泛面,就算未到四川級別,都唔係嘢少,果然辣得幾上喉,唔食得辣嘅我,湯就淺嚐半碗夠皮喇。鍋內材料甚豐富,有薯仔、豆腐、蘿蔔、唐蒿、大豆芽同豬骨,食咗咁多內臟同肉類,係時候補番多啲蔬菜平衡吓。雖然湯底頗辣,但其他材料應係後加,所以初段食嘅時候唔會太辣,蔬菜質素都幾有水準,薯仔趁未腍透,口感仲有少少鬆化,好夠薯味;豆腐軟滑豆味濃;蘿蔔又夠晒清甜。
甜品:Billiken雪糕
Billiken(ビリケンさん)晌好多日本人心目中嘅吉祥物,係日本公認為考試合格、締結良緣等嘅幸運之神。依家大阪通天閣觀光塔仲有埋供奉Billiken嘅神舍,所以,佢就成為通天閣嘅象徵,向佢許願後再摸摸佢腳板底,願望就能實現,問你服未?
基於信仰原則,佢腳板我就唔摸喇,凳下張幸運紙卡就更加無謂要啦,不過,有佢嘜頭嘅雪糕我又唔怕食喎。由日本空運過嚟嘅Billiken雪糕,店方話雪糕有3款味:雲喱拿味、綠茶味同薑味,但今日試到嘅只有雲喱拿,睇出一點點雲喱拿籽,又食出重雲喱拿味,質感有啲似雪葩種沙冰感。食咗咁多熱嘢,一杯冰凍嘅雪糕為眾食家帶來滿足嘅涼快感。 |
|
|
Tango Argentinian Steakhouse |
標題 : 唔識探戈.只想嘆多 |
地址 : 中環雲咸街77號嘉兆商業大廈1樓 |
地區 : 中環 |
|
現時分數:
|
日期 : 2012-04-02 09:16:47
一位老友記約食晏,小弟工作於中環,地點方面自然要就一就我,選址係雲咸街嘅Tango,都係以前有朋友推介過,突然想起,就不如去試吓。一向中環晌晏晝搵食都唔容易,通街都係人,所以,一早打定電話訂枱,以策萬全,不過都係多餘,1:00pm嚟到都仲有大把位,概略一數都只係6乘滿,比起雲咸街其他樓下鋪,就有點差距。
訂枱時已要求坐窗口位,因為敞大嘅窗口,對住成條雲咸街,景觀非常開揚。其實,餐廳本身都幾有格調,一室木地板、木枱、木椅,牆上畫有假磚牆,加上一啲南美風格嘅油畫。大廳係一般餐枱高矮,但靠窗一排枱凳就係高腳嘅,女士坐可能無咁方便,我哋兩個男士梗係無問題啦。
睇過佢啲食評,都知道夜晚嚟食都會幾貴,而食晏就會經濟一啲。一般午餐,兩道菜,前菜加主菜,另包汽水1杯,價錢係$118+10%;而仲有一個牛扒午餐(Gaucho Lunch),前菜加阿根廷10oz碳燒肉眼扒伴沙律或薯條,另包汽水1杯,價錢要成$268+10%。其實以雲咸街一帶計,兩至三道菜嘅一個午餐多數都係賣緊$90-$100左近,依度食晏唔算好貴。只係以個人嚟講,雖話中環食嘢普遍貴啲,但使成$150食個晏,感覺總有點唔慣,一來平時公司包伙食,都唔使俾錢,二來工作日食晏,一笠鍾時限匆匆趕趕,嘥咗個環境啫!
散叫唔多講,就一定貴啦,所以兩個人就要兩個一般午餐,較實惠。前菜5揀1,有湯、沙律、小食……等,而主菜同樣都係5揀1,有意粉、海鮮、燒雞胸……等,選擇都唔少;另加$30,可晌單點餐牌中任揀一款甜品,而甜品共有7款選擇,散叫價錢由$65-$98,所以,加$30就有嘅話,當然要試番款啦。由於老友唔太好甜品,我哋都只係叫一客共享就算!
前菜 – 羊奶芝士芝麻菜烘蒜蓉法包
大大件蒜蓉法包經碳火烤過,上面再放有一大片羊奶芝士,跟住加上芝麻菜、豆粒、香草碎,就成為依道前菜。法包既脆且軟,不過蒜蓉味唔太突出,相對就係羊奶芝士成為主角,烘過嘅羊奶芝士變得軟綿柔滑,味道濃郁得嚟唔會有羶味,幾得意嘅前菜。
前菜 – 甘筍甜粟紅洋蔥沙律
賣相幾得意,用一個小型煎盤盛載,沙律堆到高一高,其實份量都幾多吓。幾款簡單嘅材料,甘筍、甜粟、紅洋蔥,做出嚟個效果確係唔錯,重點似乎係個汁醬,因為個汁做得夠稠密,唔會稀淋淋,味道一酸酸甜,好清爽,令人感到越食越開胃。
主菜 – 烤魷魚沙律伴蕃茄牛油果
雖然係一道沙律菜式,但份量頗大,所以成為咗一道主菜。墊底係大量沙律菜同蕃茄、牛油果,調味手法只係極簡單咁淋上橄欖油啫。在沙律菜上面,就係依道主菜嘅靈魂:烤魷魚,原隻大大件嘅魷魚,相貌帶有碳火嘅焦燶,好有原始風味。廚師為方便食客,已將魷魚切件,魷魚肉咬落軟腍唔韌,好有碳火香氣,夾雜住沙律菜同食,感覺無咁「熱氣」之餘,熱烘烘嘅魷魚同清爽嘅沙律,很有冰火之感。
主菜 - 7oz 布旺倫芝士火腿漢堡
上枱之時,漢堡係半開放形式,即係上層嘅包身未冚埋,等你睇得到佢哋已經將個包輕輕「碳燒」烘過,不單止幫個包做咗啲「熱身」運動,亦令到食起嚟多點焦脆香。
而餡料第一眼睇到嗰層,原來係芝士嚟,我仲以為係塊火腿。個層次應該係布旺倫芝士、火腿、牛肉,睇番直切面張相就清清楚楚架啦。
布旺倫芝士(provolone cheese)依個名,我都係事後上網查番出嚟先知係咁譯,平時接觸嘅多數都係巴馬臣芝士呀、莫撤利拉芝士、車打芝士……等等。布旺倫芝士源於意大利南部,雖然薄薄一片,但味道頗濃,帶有少許香草味。中間嘅火腿,起到鹹香調和嘅作用。最底層嘅牛肉,自不然係來自阿根廷啦,雖然唔知牛肉出自咩個部位,但肉味濃郁,做得鬆軟唔死實,又有肉汁,正!
甜品 - 炸麵粉條伴朱古力醬
依個叫Churros con Chocolate,算係店中招牌甜品,散叫要成$65,不過份量唔知會唔會多啲。據說係西班牙人嘅早餐,亦流行於好多拉丁地區,但嚟到香港就成為咗一道甜品。成份好簡單:麵粉、牛油、雞蛋,做出嚟嘅效果質感有啲似食雞蛋仔,當然中間唔係空心啦,而且因為係油炸,外層香口同鬆脆啲,仲有因為炸條沾滿沙糖同肉桂粉,味道變得再豐富啲。如果嗜甜嘅人,更可蘸埋跟炸條同上嘅朱古力醬,甜味得以提昇,猶如腸粉沾上麻醬,相得益彰。記得第一次遇到這款炸麵粉條,係晌大阪環球影城嗰啲車仔檔,初見所以好奇,因為當時天氣比較凍,味道無咁好,而且又無跟咩醬。今次唔同喇,夠熱辣又伴有朱古力醬,正好多!
同老友嘅短聚都因要開工而結束,都已經偷雞咗十幾分鐘,如果能夠再嘆多幾款甜品,又嘆多啲時間,唔使咁趕,咁就最好不過啦! |
|
|
井上日本料理 Inoue Japanese Restaurant |
標題 : 橙色部隊魚生飯 |
地址 : 荃灣鱟地坊80號華成樓B座地下A1舖 |
地區 : 荃灣 |
|
現時分數:
|
日期 : 2012-03-29 18:00:40
今個星期返太太嗰邊教會,所以食晏就落腳於荃灣,由於有位姊妹嘅好推介,就係鱟地方嘅井上,日本料理,午市定食50、60左右,唔貴,但勝在有質素,所以拉隊過去一齊食。
一室深啡同白嘅配襯,近門口收銀處一櫃嘅清酒,而牆上除咗掛有日式食物嘅相片外,仲有一啲東瀛風格嘅掛布同一張張手寫嘅食物推介,此外,就再無咩日式嘅擺設,裝修上和風味道唔濃,但係座椅算得上寬敞,一來餐枱比多好放題店大張,二來枱與枱之間唔太逼,部份枱椅更間有矮身嘅屏風,感覺無咁被騷擾。
是日大概1:30pm嚟到,人唔多,5乘滿左右,始終荃灣食肆真多,就算晌鱟地方依段街仔,都唔使愁搵食嘅事。揀咗較入嘅6人枱就坐,大家就埋首睇吓有咩好食。午市定食分兩類,一版係手打烏冬 / 拉麵,共有10款,價位由$50-$56,拉麵湯底可揀地獄或豬骨,每款仲附有壽司或卷物各兩件;另一版係飯類,選擇就多好多,一共有成24款,價位由$44-$68,附送前菜及麵豉湯。全部唔包飲品,但你可以加$5就有汽水,加到$8可要任何凍或熱飲。最正係午市唔收加一服務費,抵贊!
雖然一行6人嚟食,但有部份人唔係太熟,無謂係咁影人哋食乜,更加唔方便試啦,所以無謂提,淨係講番我哋兩公婆嘅定食就算。
四色魚生飯定食 $66
依個係姊妹嘅極力推介,佢上次食過話正,所以叫我試吓。亦係午市餐牌內第二貴嘅定食,最貴係賣$68嘅特上魚生飯定食同火炙魚生飯定食。
麵豉湯,麵豉味道算唔上好濃郁,但感覺沉實,微微昆布味。
前菜係中華沙律,一個成日我覺得好錯配嘅名稱。雖然材料就只係海帶絲,稍稍調味再加啲芝麻,但口感清爽,柔韌有口感。
四色魚生飯,四色包括海膽、三文、蟹籽、蟹棒,滿滿鋪晌飯面。唔知師傅有無咩原因揀依幾樣嘢作為主材料,但色水啱啱好係晒橙色同系,配上珍珠米之上,令賣相好搶眼醒目,碗邊伴食嘅仲有生薑片同日本芥辣。飯粒圓潤煙韌,海膽柔滑鮮甜,三文油潤肥美、蟹籽細小卜脆、蟹棒味道鮮活,令人感到食材優質,確係誠意之作,果然係好推介。
鹽燒鯖魚定食 $46
老婆食定食一向鍾情晌燒魚度,唔係銀雪,就係秋刀,鰻魚就必然拒選,因為太油太肥,覺得唔健康。晌今次定食中,都有燒魚,一係就蒲燒鰻魚,一係就鹽燒鯖魚,唔使多問一定係後者啦!同樣跟麵豉湯、中華沙律,仲有一大碗白飯,鹽燒鯖魚伴上白蘿蔔蓉及檸檬,解熱之餘,又令鯖魚食起嚟清新一啲。魚嘅份量唔多,只係得半邊,但燒得好有水準,外皮香脆,內裡肉滑,一樣有質素、有水準,只係如果男仔食嘅話,應該唔係好夠喇!
今趟可能客唔多,服務好到位,不時添添茶;相信師傅做菜都時間充裕啲,食物都做得有心機,加上食材頗有質素,個人認為值得翻兜嘅食店!事關依區雖然有唔少日本料理,數埋都成幾十間以上,但叫有質素、有水準嘅就真係唔太多! |
|
|
美心MX Maxim's MX |
標題 : 哎呀!真係抵打! |
地址 : 美孚美孚新村5期地下N10-N12號舖 |
地區 : 美孚 |
|
現時分數:
|
日期 : 2012-03-28 08:03:25
因為有親友入咗院,去完探病都有啲晏,得兩公婆,無謂煮,加上又天寒地凍,返到美孚就晌美心打個「邊爐」啦,見佢近排推出咗個火鍋「一心火鍋」,主打係上乘嘅美國穀飼牛肩肉。
火鍋有5款,主打嘅美國穀飼牛肩肉再搭另一款主打食材,例如:蟹籽蝦滑、豚肉、清酒醉雞、鮮蝦,賣$42-$55。4款湯底任擇其一,湯底包括:蕃茄豚骨湯、鮮蕃茄濃湯、北海道3.6牛乳南瓜湯、北海道3.6牛乳南金粟。而火鍋本身除上面所講嘅主食材外,基本配料仲有墊底生菜、冬菇、龍蝦丸、獅子狗魚蛋(竹輪)、烏冬、南瓜片、翠玉瓜片、金菇、時蔬。
美國穀飼牛肩肉配蟹籽蝦滑 $52
湯底要北海道3.6牛乳南瓜湯,貪佢以牛乳入湯可令湯底滑溜啲,又有朕奶香,南瓜原來係一細個兜仔另上,已經打好成蓉,湯滾先落,不過因為份量唔多,南瓜味唔係好突出。
豚肉怕佢肥,清酒醉雞煮一煮怕無晒酒味,所以就揀搭蟹籽蝦滑。牛肩肉約有5片左右,薄切但都幾大塊,灼兩灼就食得,味道都唔錯,腍滑有肉味。最重點唔太肥,啱晒我老婆。蟹籽蝦滑一條短竹筒(當然唔係真竹,膠製啫),自己打落啲湯度,食落估唔到咁爽彈味鮮,加咗蟹籽咬落有啲脆卜卜感,真係有驚喜喎,實在揀對門路。醬料包咗芝麻醬同豉油,前者用嚟蘸嫩滑嘅牛肩肉確係幾正,蝦滑就梗係用後者嚟點啦,提鮮丫嘛!
其他副食材,出品不賴喎,冬菇、龍蝦丸、竹輪,都係兩舊兩舊咁,鮮冬菇又大大件;而南瓜片、翠玉瓜片就每樣有三幾片,時蔬仲唔係得一款菜,加上盤盤食物都有生菜墊底,夠晒多菜食。
配料半價
逢星期一至四,10款配料都係做半價,如脆脆響鈴、新鮮蔬菜、蟹籽蝦滑、豚肉、清酒醉雞、出前一丁……等等。由於我同老婆叫一個火鍋兩份食,所以就加配咗原個鳥冬(折扣價$5)同水餃一份(折扣價$8)。唔知道個火鍋本身都跟一份鳥冬,否則就改要出前一丁。即係我哋前後有兩份鳥冬,而原個鳥冬確係幾大個,所以就一定食得夠飽(仲好飽添);而水餃一份都有6隻,味道幾好喎,餡肉醃得入味,又無肥豬肉,係個皮就韌啲。
打鞭爐好多時都會越食越熱,故此就多加一杯嘢飲,依家個推廣係配22oz特大有汽凍檸賓、凍檸樂、鹹檸碧、凍檸碧,22oz唔係嘢少,好大杯,但只係+$5就有,抵呀!所以,就要咗杯特大鹹檸碧,一啖熱一啖凍,爽呀!
夾埋晒都係$70,夠晒我同老婆食,除咗有啲質素又抵食之外,仲可以過吓「打邊爐」癮。最抵死係用信用卡積分換咗啲美心現金券(面值$50),作為不時之需,結果依餐實際就只係俾出廿蚊雞。服務方面,火鍋食材一份份以保鮮紙包好晒,夠晒衛生,但就有啲唔環保。而開爐、加湯,阿姐都有求必應,又幾好禮貌。依間美心仲裝有大電視,揀個好位就可以邊食邊睇。 |
|
|
和光日式燒肉放題店
|
標題 : 平賣燒肉 |
地址 : 銅鑼灣軒尼詩道502號黃金廣場9樓全層 |
地區 : 銅鑼灣 |
|
現時分數:
|
日期 : 2012-03-27 07:56:28
依篇係篇放埋一邊被我遺忘咗嘅食評,現在先摷返出嚟寫,不過店鋪都已經結咗業,所以都無乜參考價值,寫嚟都係幫自己留個記錄。
日式燒肉都比較少食,因為太太唔太好,所以起初都無打算買佢個團購。但後來細看詳情,又真係諗得過喎,團購個標題係咁樣嘅:「無限量追加:以 $68享受原價 $138 和光日本料理1.5小時極級任食鹽燒西班牙黑豚肉一人前午膳,食薄燒安格斯牛扒、香草羊扒……抵抵抵!」,雖然要補番$7服務費,但當時PayPal會員每宗交易可享25%回贈(每會員回贈總額高達$100),即係最終實際要俾嘅都係$58啫;再者,團購券有效期足足由年中到年尾成半年咁長,星期一至日都用得(午市12:00nn – 3:00pm堂食),真係好值搏,跟同事計過度過,就一於去馬買3張,預埋我老婆揀個星期六長週放工後過去,1:30pm食到3:00pm就啱啱好夾晒時間。
1:30pm上到去,一出閚就人山人海咁,原來個個都係團購客,晌度等安排入座,約莫等咗10分鐘左右我哋都得入,安排中間一截嘅卡位,位置都算闊落;又間有高身木屏風,私隱度多一啲,又唔會咁受前後左右嘅客人騷擾。仲有,由一出閚,就見到門外大大幅好日本風嘅牆畫,入到鋪內全木裝修,通道寬闊,同樣好多和風牆畫,感覺幾唔錯。而烤爐係下抽風式嘅,抽風力夠強勁,油煙唔大,食完唔會一頭煙(味)。雖然遲咗入座,但係到3:00pm都要埋單,不過就無趕你走,隨你坐,只係侍應忙於清場,無乜人理你!
個一人前午膳,生肉指定有薄燒安格斯牛扒、法式香草羊扒、鹽燒薄牛舌、意大利香草雞同祕製魷魚鬚,一份一份上,無得添加,望落感覺份量唔多,樣樣嘢少少咁,但夾埋一餐飯有咁多餸其實好夠數。而鹽燒西班牙黑豚肉、白飯、麵豉湯、甜品就係任食部份,基本上係可以無限追加。
白飯、麵豉湯、前菜
一起手,先嚟嘅係依三樣嘢,白飯既然係最好食嘅,煮得帶少許黏糯;麵豉湯睇落色淺,飲落味淡,似係將貨就價之作;而前菜係一小箸芽菜同蔥,有啲寒酸嘅感覺。
燒肉盛合
黑豚肉、安格斯牛扒都切得非常之薄,各有三薄片,兩者都無乜點醃過,真係食佢哋原味。烤燒後,前者縮埋一細,而後者仍然都幾大塊,蘸少少醬油食,扒啖飯,味道都幾唔錯喎。而薄牛脷有兩片,落咗少少鹽醃,所以燒完可以就咁食,刻意燒燶少少,有啲燶邊咬吓,牛脷質感又幾煙韌,有咬口。
羊扒(1件)、雞扒(1件)、魷魚鬚(1大抽)就分別用唔同方法醃過,個人覺得味道一般,似乎因為團購關係,去貨急,啲嘢醃得唔太入味。還好嘅係幾樣嘢嘅肉質唔太差,羊扒軟腍唔太羶,雞扒燒後都唔過嚡。
再追加一份黑豚肉,一碟有4片,依次就加咗少少黑椒碎,不過,就仲肥過第一輪嗰啲,少肉多膏得似煙肉,故此,叫完一次都無再追加,費事搞到膽固醇攀升到爆錶。
甜品
無咗雪糕,只得冰心泡芙,唔知點解,個侍應一嚟就俾咗兩兜我哋,一共8粒,好食都話丫,裡面啲忌廉雪到硬,變咗好似雪糕咁,結果無晒泡芙外層應有嘅鬆脆、內裡柔幼嘅口感,依家似係一件雪糕麵包囉。唯一可取嘅係,食燒肉食到個人有啲慶恰恰,冰凍嘅泡芙就可以解解暑。臨尾靈機一觸,與其啲泡芙又凍又硬,就不如趁個爐仲有啲餘溫,就慶一慶吓佢,試咗,雖然回復唔到外層鬆脆,但個心無咁硬,感覺好食啲!
賽後檢討,佢話原價$138,單以今日牌面同質素,真係唔值咁嘅價,況且,任食鹽燒西班牙黑豚肉,但肥成咁,俾你又可以食得幾多丫!此外,可以任食嘅仲有白飯、麵豉湯、甜品,但依幾樣嘢你都唔會真係因為任食而追加又追加啩?所以,任食都係噱頭之一。只不過,俾個$58,嘢食雖中規中矩,但俾你自己一手一腳燒吓燒吓,玩吓玩吓,過吓親手烤肉癮,咁都OK啦。
|
|
|
越棧越式湯粉專門店
|
標題 : 我老婆係大佬,轉轉口味食越棧! |
地址 : 荃灣惠荃道22-66號綠楊坊2樓S33-34舖 |
地區 : 荃灣 |
|
現時分數:
|
日期 : 2012-03-26 14:38:14
依個星期返太太嗰邊教會,完咗之後又係搵食時間,今次由佢發板提議食乜,就係去荃灣綠楊坊嘅越棧,佢跟朋友食過覺得幾好,就帶我再嚟試吓。佢知我一向喜歡試新嘢,指係試吓以前未幫襯過嘅食肆啫,而且,越南菜都係平時少食嘅菜系,所以,今餐就跟老婆搵食,等佢做大佬。
雖然過到嚟都點半有多,都要等一陣。星期日嘅綠楊坊,真係人來人往,搵食嘅人就更加唔少,途經同商場內嘅潮江春,門口仲企滿人晌度等位,越棧對面鋪嘅南翔都係咁。
全店以啡色為主調,木紋細方枱,配淺啡梳化凳,靈活配合唔同人數。凳就坐得舒服喇,不過,位就實在拍得太埋太逼,同隔離枱近乎零距離,傾偈實在唔太方便。
侍應遞上熱茶,就開始睇睇餐牌。餐牌正面寫住:「一個湯底的傳說」,自不然佢個湯底係店鋪嘅亮點,所以跟老婆要咗一個湯河、一個湯檬,再加一份灼菜。湯河可免費轉湯檬或金邊粉,配飲品加$7,特飲就加$10,雙拼加$10……及其他配搭。
越式生牛肉湯河 $35
依個係店內人氣推介,餐牌內專燈加一版圖文並茂嚟介紹,文中係咁講嘅:「精選進口牛肉,秘製新鮮牛骨湯,特別研製之軟滑河粉,多種新鮮空運抵港越式香料」,仲話日賣超過5,000碗,係就係有啲誇張咗,不過好歹都要試一試嘅。
唔使等太耐,都好快有得食,賣相方面平平,擺上一小棵九層塔就係唯一嘅點綴。如果寫緊西餐食評,咪叫佢做羅勒囉,寫緊泰菜嘅,就轉口叫佢金不換架喇。焦點先放咗晌個湯底之上,棕啡色嘅湯底,色深而不濁,又無泛起一朕朕油,睇落首先色澤幾對板;少有咁真係未食粉,先呷啖湯,的確湯頭氣香味濃,又滲出少少越式香料味,如南薑、香茅,又有少少檸檬酸香,感覺幾清新。至於生牛肉,當然比起餐牌中嘅相片少得多,有三幾片,還好嘅係都幾大片,上枱時仲係半生熟,肉味唔錯,很肉嫩;講到河粉,當然比廣東式嘅河粉幼身好多,但未有想像中幼,不過就頗為滑溜,只係略嫌佢份量有啲少啫!整體,個生牛肉湯河都甚有水準。
香茅豬扒湯檬 $35
個湯檬就要耐少少先上枱,原因都係件香茅豬扒即叫即炸,稍稍需時。雖然有骨香茅豬扒得一件,但係就幾大件吓,兼且分碟上,仲已經切成條形,確係抵讚,因為一來唔會放晌湯中被浸腍,二來切細咗又方便食。豬扒炸得香口,又唔太油,肉質都好鬆軟,香茅味亦徐徐滲出,如果啲香茅醃製時重手啲仲好,更有個性。檬粉跟河粉一樣,都幾出色,配湯故然好食,未知撈檬係點,有機會下次再試。
灼唐生菜 $5
見佢$5一份平平哋,份量都有小一兜,即係好似快餐店啲湯兜仔,但唔使自己洗菜、淥菜,$5都係化算嘅,況且,志在食啲蔬菜。唐生菜都幾鮮甜,輕灼過,帶爽脆。如果可以加少少蠔油,就更好喇。
店方人手幾足,周時都見到侍應進進出出,斟茶遞水,忙於收拾,不過都係務求做多幾轉生意啫。雖然依度係有晒侍應服務,但就講明全年不設加一服務費,依樣就真係幾好。因為有啲餐廳,基本上都無乜服務可言,有都係麻麻哋,仲要收服務費,真係俾得唔甘心架! |
|
|
金裝燉奶佬餐廳 Daniel's Restaurant |
標題 : 飯堂嘅青天豬扒飯 |
地址 : 美孚美孚新村5期蘭秀道6號地舖 |
地區 : 美孚 |
|
現時分數:
|
日期 : 2012-03-23 14:28:17
漸漸,金裝燉奶佬成為懶煮飯貪方便出街食嘅飯堂之一,其實,佢嘅質素又唔係話好好,好到得閒就去食嗰種嘅飯堂,只係想平平哋快快趣填飽肚嘅話,唔係茶記,就係快餐店。依區啲茶記好一般,未有一間覺得好突出,一食就諗起佢;而快餐店,都係嗰幾個牌子,只係之前幾次晌金裝燉奶佬度食飯,質素都唔錯,偶有驚喜添,所以多少對佢偏好多啲啲啫。
今晚又無煮,皆因老婆返夜校最後一晚,上堂地點就正正同區嘅中大校外進修中心,佢9:00pm多放學,就一齊去幫襯燉奶佬,當慶祝讀佢完個短期課程。
晌度有個Chef Special 930,即係9:30pm先開始供應,當然比起一般嘅晚市平啲,三十零蚊一個餐,包餐飲或糖水,算幾抵,而且選擇又唔止三幾款,餐牌底面兩頁,一共成16款俾你揀。
滑蛋豬扒飯 $36
小弟揀咗個滑蛋豬扒飯,想返起,依個飯係讀書時代至愛嘅碟頭飯之一,最正係啲滑蛋,滑溜溜撈飯一流。落咗單,好快上枱,嘩!人都癲呀,勁多飯,多到我估有一般屋企飯碗嘅三碗份量,但豬扒就得兩舊,心諗好搵笨囉。不過,好彩無鬧出口啫,因為正將啲滑蛋撈勻啲飯時,刮吓刮吓原來有成5舊煎豬扒,雖然唔係舊舊都成大塊咁,但夾埋都唔少呢!人哋就撥開雲霧見青天,我就撥開米飯見豬扒,飯又多,扒又多,稱得上抵食夾多件。而質素方面,豬扒都軟腍,煎得香口,只係肉味稍遜,好彩啲滑蛋做得幾滑身,最緊要無過杰,否則變咗膠水獻就死晒火,最怕啲獻煮到好似食漿糊鼻涕咁。
鴨胸肉羅宋湯意粉 $32
一大個湯碗盛上,睇落好似唔係好多,絕對好嘢沉歸底。之前已經試過佢啲羅宋湯,做得確有一手,所以對依碗羅宋湯意粉都有一定信心。今趟再試,仍然有水準呀,依然做到濃郁非常,酸辣、肉香均徐徐從湯中滲出。意粉亦都煮得啱啱好,咬落仲帶有少少韌勁,所以,都唔可以攤得太耐。至於啲煙鴨胸肉,不過不失,有微微煙燻味,肉質煙煙韌咁啦。
糖水
既然餐飲以外,可以揀糖水,同老婆兩個都想食碗糖水作結。我就要椰汁西米露,佢就要椰汁紫米露,前者好重椰奶味,又勁多西米,唔會撈嚟撈去都水汪汪;而後者紫米已經煮得好軟糯,只可惜太杰身啫,杰到有啲似食糊咁!
兩個餐嘅份量都比預期大,食得我好飽,仲要咁夜先食到咁飽,所以,一於夜啲先瞓,乘機打吓食評,唔使搞到太飽而瞓得唔舒服。如果佢唔係個紫米露麻麻哋,而煙鴨胸又普普通通,我可能會俾個笑面佢!今次都係OK住先,希望佢哋繼續做好啲啦!
|
|
|
Park Cafe |
標題 : 喜有免費午餐 |
地址 : 尖沙咀漆咸道南61-65號百樂酒店4樓 |
地區 : 尖沙咀 |
|
現時分數:
|
日期 : 2012-03-20 14:55:00
近年,比較少咗去食自助餐,無話好特別原因嘅,可能想慳番啲錢啦。反正,太太成日話食自助餐唔抵,平嗰啲啲嘢又麻麻哋,貴嗰啲又唔食得佢幾多,俾四、五百嘅話大把好選擇啦。不過咁,又唔係話完全唔食,總有好多例外嘅,又成人都聽到人講,依個世界豈有免費午餐架?今趟個自助午餐,就係其中之一個例外喇!事緣某某信用卡嘅推廣,舊客戶推薦新客就送雙人自助午餐,而新客當然又有迎新禮品啦,依啲雙贏著數,自不然唔會放過,咪由我老婆推薦我依個新客囉!當然,都真係唔係完全免費,我都要填表影印文件架!少少付出咁啦,哈哈!
Park Café都好多年無嚟過,成日見佢賣廣告,記得以前間嘢地方無咁大,而且陰陰暗暗懶有氣氛咁,依次再嚟,感覺唔同晒,地方大咗,環境光猛咗,裝修簡潔明亮,最鍾意入門再入啲左手邊嘅一排卡位,高椅背,坐得舒服。招呼方面都唔錯,收碟、斟水又幾快手,可能係因為星期六晏晝啩,個場都唔係好多客,約5乘左右。另外,食物補充方面都OK,唔會話成日無晒嘢,而且,即煮即做嘅檔口,大部份時間都見有師傅駐守。
由於今日同老婆都唔使返工,所以校啱準時12:00nn到,被安排坐晌卡位,感覺真好。甫坐下,同老婆就開始各自「搵食」,未拎嘢食當然先巡視一下有咩食先,好概略計劃一下自己個「搵食」攻略。食物分類有沙律、冷盤、壽司及魚生、中西湯、生滾粥檔、鐵板燒、多款熱盤、咖喱吧、切肉車、即煮車仔麵檔、生果、甜品,而啡茶、檸茶檸水任斟任飲,大致上都有成60、70款以上嘢食,絕對填得滿滿你個肚皮。至於質素方面,食物都唔係咩貴價嘢,但整體都屬中等,平平中偶有佳作,以折咗之後百鬆啲一個自助午餐,都稱得上抵食,除非你係個慣食好嘢、樣樣要精嘅人,否則一班老友聚聚舊,平平哋,任揀任食,依度都係唔錯囓選擇!
沙律
沙律吧有8、9種沙律菜同配料,如粟米粒粒、車厘茄、甘筍絲……等,再有4款醬汁同油醋可揀,基本上都可以自製一份美味沙律作頭盤。當然,唔想煩嘅,可以揀食預製調校好嘅沙律,例如:長通粉沙律、蘋果沙律……等。我就鍾意兩溝,再加啲生果、冷盤嘢同魚生作為頭盤嘅,砌出嚟咁先似樣嘛,唔少得加番少少凱撒沙律醬,咁先至好食!
冷盤
冷盤食物唔多,一眼睇晒,就係眼前嗰兩盤,一個係凍切肉片,另一個係煙鴨胸,水準一般啦。
壽司、魚生
晌冷盤旁,就係放有壽司、卷物同冷麵。壽司同卷物無試,因為睇落好一般,反而蕎麥冷麵夾咗少少嚟食,做得幾清爽,口感幼韌;而魚生則放晌另一邊檔口位,由師傅即點即切,雖只供應三文魚同立魚,但算幾鮮味,我就加咗落去啲沙律當前菜一齊食!
中西湯
中湯係冬瓜湯,而西湯係普通忌廉湯,完全無賣點,所以,只有淺嚐半碗中湯就算,叫無味精囉。
生滾粥檔
雖然嚟食自助餐揀食粥好似好傻,不過咁,食嘢都係想食自己鍾意嘅嘢。喜歡食粥多過食飯嘅人,又不妨要碗生滾粥落落肚丫,唯可惜選料唔多,否則,吸引力應該大好多,尤其啱老一輩嘅食客。
鐵板燒
負責生滾粥檔個師傅,亦負責埋鐵板燒,位置晌食物區最埋嘅角落位。不過,雖然佢個牌「棟住」鐵板燒Teppanyaki一組大字,但睇真啲查實只係串燒啫。有雞肉串、粟米、墨魚嘴同肉腸,樣樣同老婆夾埋嚟食啲,質素還可以啦,係個墨魚嘴幾過癮;反而醬汁惹味突出,因為熱住熱住,感覺唔同啲。
熱盤
熱盤唔算多,一開始約有12款,其後都有轉過款。部份熱盤都覺得唔錯喎,好似當中嘅燒鴨配柚子蜜、巴東燒雞扒配芝麻汁、椒鹽三文魚頭腩、杯裝蒸蛋,依幾款確係較特別,又幾好食,好似個燒鴨配柚子蜜,鹹鹹甜甜,鴨又唔羶;其他嘅,如燒肋骨、煎秋刀魚、芝士焗時蔬、焗長通粉、炒飯……,味道都唔差,只係無咁突出啫。
咖喱吧
專燈設個咖喱吧,有啲吸引性。一共有3款食物,再搭一煲白飯同一啲印度薄片伴食咖喱,3款食物包括咖喱牛腩、炸雞同咖喱時蔬,基本上,3款都甚有水準,咖喱幾香而唔係死辣,牛腩做得好腍。
切肉車
隱身晌車仔麵檔側邊,佢又冚埋咗個銀箱,又唔見有師傅晌度喎,咪以為係無供應囉。原來,負責麵檔個師傅又係負責烤肉,佢見我眼望望一臉疑惑,就問我係咪想要喇。是日嘅供應係燒西冷,就叫師傅薄切兩大片,蘸芥辣食。果然唔錯,有肉味,燒到裡面仍然係粉粉紅紅,但唔會話有血水滲出,很嫩很軟。
車仔麵檔
本來真係無諗過會晌度食車仔嘢,但最後都有食到,就因為係阿師傅推介,切完肉俾我嘅師傅,佢又負責個麵檔,就介紹話啲牛雜好食,見佢盛意拳拳,就一於試吓。丫,又估唔到啲牛雜真係幾得,牛雜炆得夠晒腍,尤其啲牛孖根,既腍且滑,而且啲汁很有鹵水香,少少意想不到添!如果唔係留番少少肚(其實都唔少)掃甜品,一定添碗白飯撈汁囉,哈哈!
甜品
陣容都幾鼎盛喎,中式西式、有凍有熱,成十多廿款,不過都係常見嘅貨色、一般嘅質素,如果唔係特別對甜品有好大興趣嘅,其實眼見依啲應該都好滿足。不過,對我依類甜品鬼見愁,就未夠盡慶。所以,今次無試勻晒所以甜品,都係重點出擊,先嚟一大碟私伙甜品拼盤,有藍莓芝士餅、松露朱古力蛋糕、芒果蛋糕、朱古力慕絲蛋糕、蘋果撻、栗子蛋糕、桂花糕,後尾再出咗款意大利芝士餅,照殺!其實咁多款都有水準,只係略嫌大路啲。最後衝刺嘅,就係加多一份即製窩夫配鴛鴦雪糕球(可惜係牛奶公司啫),同一份即製香蕉班戟現紅莓醬,因為兩者都係新鮮即製,都係特別好味,尤其個窩夫,好脆口。我老婆都話服咗我,起先話人哋啲甜品係一般貨色,但最後又食咁多,叫我千祈唔好出咗門口嘔番晒出嚟呀!OK喎,我大肚能容啫。 |
|
|
Barg |
標題 : 借意浪漫晚餐 |
地址 : 銅鑼灣耀華街3號百樂中心1樓 |
地區 : 銅鑼灣 |
|
現時分數:
|
日期 : 2012-03-19 12:48:36
有時會借啲特別節日食番餐好嚟慶祝一下,今次都係「借啲二」慶祝,同老婆嚟銅鑼灣搵間有格調啲嘅西餐廳食餐好!Barg係瑟縮晌耀華街嘅樓上餐廳,唔多起眼,亦唔多見佢有賣廣告,感覺算係比較低調嘅店子。
一出升降機,就係大大個啡底銀字嘅招牌,一定唔會搵錯。全店都係以咖啡色為主調,裝修算係簡約,只係晌擺設同燈光方面營造出醉人氣氛,牆上掛有畫飾,又配以座地燈,加上天花一組組石英射燈,令整間餐廳感覺柔和而又有格調,雅致得嚟又有特色,絕對適合嚟浪漫吓!唯一係太有氣氛,環境會比較昏暗,所以小弟部DC仔患有暫時性白內障,影啲相出嚟無咁清晰,請見諒。
雖然,佢好似主打賣意大利菜,但打開餐牌,不難發覺事實又並非如此。查實食店集Wine Bar於一身,除提供意大利菜,仲有啲泰國、本地fusion、四川、歐陸、美國……所以感覺都幾雜。能否殺出條血路,還看食物質素喇。
要化算啲,選4道菜晚餐連飲品為上算,散叫始終唔平,況且,晚餐無論晌頭盤、主菜定甜品,都有唔少選擇,總可以配搭出心水組合。招呼方面幾好喎,有高級餐廳嘅水準,侍應落單時已問定邊個要啲乜,食物上枱時果然無擺錯,經理久唔久又會問吓啱唔啱食;而之前見我哋研究個餐牌時,就細心介紹一下,個套餐點揀法,又講吓邊啲熱門多人揀,等我哋有個參考。
餐包籃
雖然法包烘得微暖,包身外脆內軟,但感覺有點「寒酸」,因為大大個餐包籃就係只有兩塊法包,無其他款式嘅麵包,賣相就似係椰林閣呀、花園呀嗰類嘅層次。而枱上則放有橄欖油、黑醋、紅椒粉、鹽、黑椒碎供客人隨意使用,醮包自然係橄欖油搭黑醋啦!
凱撒沙律配巴馬火腿(頭盤)
凱撒沙律做得唔馬虎,有銀魚仔、煙肉碎……等等,沙律菜撈得足味,又以巴馬臣薄片代替芝士粉,感覺高檔啲;雖然巴馬火腿只得兩片,但鹹香油潤有質素。
香煎法國鵝肝配黑醋汁(頭盤)
經理話除咗個生蠔外,依個頭盤係另一熱選,較多人點,無他嘅,11款頭盤裡邊,大多數都係沙律,咁鵝肝、生蠔當然俾人覺得矜貴啲,由於老婆唔食生嘅生蠔,自然就要個鵝肝啦。鵝肝小半隻手掌大細,煎得有水準,底面都好香脆,但鵝肝心有啲散;最正係伴住件烤蜜桃同啲油醋沙律菜,令到件鵝肝食起上嚟無咁膩。
龍蝦湯
色澤好對板,橙紅嘅湯色,試一口先,掂!龍蝦味好濃郁、好鮮活,質感柔滑,加上有三幾粒龍蝦肉在內,真材實料好好味。
野菌湯
睇個賣相就差少少,望落去同飲入口,都係覺得較粗嚡。不過,湯中充滿野菌粒、洋蔥粒,菌味又夠重,叫拉番唔少分數。
是日鹽燒海魚(主菜)
老婆鍾意食魚,所以一眼佢就以此道菜為目標。是日海魚係鱸魚,我哋兩個都少食依種魚。整道主菜賣相一流,長形餐碟,一邊放有鹽燒鱸魚,並以菠菜墊底,配1/4個檸檬,另一邊則有炒甘筍同薯仔作為伴菜。鱸魚簡單就咁鹽燒,肉嫩味鮮,唧少少檸檬汁提提味,肉味更清新。可惜係菠菜有少少澀,而甘筍同薯仔粒味道唔錯,但炒得僅僅熟,部份仲有啲生添。
炭燒澳洲羊扒配芝士檸檬欖油(主菜)
揀主菜我就有啲心大心細喇,小弟較喜歡食肉,安格斯肉眼、炭燒牛柳串都係想試嘅菜式,不過,見有個羊扒,仲配隻芝士檸檬欖油嘅汁,相比嗰兩款配紅酒燒汁同甜辣汁,依個想試嘅興趣多咗。澳洲羊扒連住3條骨,幾有睇頭,下面墊有烤薯,長餐碟嘅另一邊係烤蕃茄同露筍仔。羊扒肉好嫩,燒得啱啱好,而且肉面帶少少燶,很有炭燒嘅焦香味;而烤薯、烤蕃茄都唔錯,不過唔知係咪師傅錯手,碟羊扒唔多係芝士檸檬欖油,味道似係紅酒燒汁,不過既來之,則安之,反正味道都好好。
薑汁法式燉蛋
甜品共有5款選擇,就揀依個傳統法式甜品先,加入薑汁就更加啱我老婆口味。燉蛋雖則有少少削身,但無損佢個蛋味,既濃且香,而最正係個焦糖面,做得焦香且脆,插住一小束薄荷葉,靚仔晒。
意大利芝士餅
依個芝士餅係無底嘅,即係無手指餅,又無海綿蛋糕,表示用料唔縮骨,反而中間就有一層薄薄哋嘅蛋糕,沾滿咖啡酒,夠晒香。而馬卡風芝士打得幼滑軟綿,加上面面香濃嘅唂咕粉,真係好有水準嘅一道甜品!
餐飲
老婆一向都飲開熱檸水,小弟就鍾意甜品配熱咖啡。杯熱啡送嚟,跟手就送上牛奶、沙糖、啡糖,牛奶係熱嘅,糖罌又好精緻,雖然咖啡唔算好香,但勝在口感幼滑,食住兩款甜品,真係好滿意今餐。老婆開到聲俾多少少貼士,無問題丫!
|
|
|
文華餅店 The Mandarin Cake Shop |
標題 : 露斯咪嚟! |
地址 : 中環干諾道中5號香港文華東方酒店M樓 |
地區 : 中環 |
|
現時分數:
|
日期 : 2012-03-19 10:31:49
同老婆有共識,除咗唔會送花之外,亦唔會特別晌啲大節日度慶祝,如平安夜、情人節……等等,費事被啲餐廳鋸,其實佢都係想幫我慳住個荷包啫。之不過,點都要有少少表示嘅,所以,就晌文華餅店買咗兩件餅嚟應吓節,雖然都幾貴,但兩件餅始終都係有限錢。
老婆係朱古力迷,所以Chocolate Truffle成為必然之選;又見文華為應情人節,出咗隻玫瑰花形嘅Chocolate Ganache Cake,就咁使咗差唔多成舊水。
Chocolate Truffle $39
外型唔算好突出,叫做無乜花巧嘢,重點在心中,而且製作算簡單,底層朱古力海綿蛋糕、加一層朱古力慕絲,然而再一層朱古力海綿蛋糕加一層朱古力慕絲,叫做好多甜品、凍餅嘅基本手法。但蛋糕軟綿唔在講,慕絲打得幼細軟滑,朱古力味香濃甘苦,確係好唔錯!
Chocolate Ganache Cake (Rose Shape) $58
大大朵紅玫瑰花形,係賣點所在,花瓣以糖粉做成,大細不一,要逐塊逐塊整上去,都係心機、手工嘢。明知唔多會好食,都要試吓嘅,果真,啲「花瓣」味道麻麻,咬落煙煙韌韌、沙沙嘅感覺咁,只係得個甜字。而中間係chocolate ganache,之前晌petite amanda食過嘅Chocolate Tart,都係以chocolate ganache為主打,不過,相比之下,小弟覺得今次文華嘅就被比下去喇。Ganache係一啲直接用忌廉加朱古力做成嘅軟朱古力,雖則係軟身,但唔會好似慕絲咁樣柔滑法嘅。底層似係朱古力牛油蛋糕,跟住一層薄薄嘅軟朱古力,再上又係一層朱古力牛油蛋糕同一大層封頂嘅軟朱古力。其實,味道都OK架,好有朱古力香,係口感唔得,封頂嘅軟朱古力太厚層,咬緊舊朱古力磚多過食緊件蛋糕,再者,質感有少許實,唔知關唔關我雪得耐嘅事?老婆一句評語唓過嚟:「唔好食」,就為依件餅一鎚定音!我就帶點無奈附和啦!哈哈!
|
|
|
韓味
|
標題 : 韓風凜凜 |
地址 : 上環皇后大道中181新紀元廣場201號 |
地區 : 上環 |
|
現時分數:
|
日期 : 2012-03-16 02:02:23
小弟對韓國菜無特別喜好,當然都好鍾意食燒牛肋骨、石頭鍋飯……等等,但太太就特別鍾意韓國嘅泡菜,好似晌麻酸樂食米線,都要揀個韓風泡菜餅雞柳粒粒米線,又試過買咗樽泡菜返屋企撈粉麵;最近仲追緊套韓劇「成均館緋聞」,古裝劇,估唔到套劇又幾好睇喎,個女主角朴敏英都幾靚幾有氣質,不過當事人都親口講過曾經整過容,難得佢又咁率直喎!
言歸正傳,小弟唔會刻意揀食韓國菜,不過,既然有著數嘢,就自然加大考慮因素。適逢見到有個網站推咗個團購:「$40正宗韓國廚師料理9選1,前菜+白飯+蘿蔔牛肉湯無限任添任飲!(原價$95)」,確係非常之吸引,有時去快餐店食好少少,都三、四十落樓啦。而且,見佢9款主菜,都唔係話得啲平價嘢揀,不乏貴價主菜,而且,種類款式多樣化,如:烤牛肉、豬肉、海鮮煲、石鍋飯、涼麵……所以,氹氹老婆都買番兩張團購劵試試啦。
前菜
揀好主菜後,店員就即時送上兩小碟前菜,一其有6款嘢食:有魚仔、芽菜、韓式粉絲、泡菜、醬汁薯仔、西蘭花,樣樣都份量少少,既然都可以再添,就無謂一下子拎咁多嚟,試過邊隻好食再添都未遲。店主話前菜日日都有唔同款供應,仲有青瓜、菠菜、生魷魚……等等。試勻之後,我哋兩公婆都覺得前菜都做得用心,好似啲魚仔,鹹鹹甜甜咁;韓式粉絲,就煙煙韌韌;泡菜,酸酸辣辣;至於個醬汁薯仔,薯味濃,粉腍啱啱好!
蘿蔔牛肉湯
有啲意外驚喜喎,因為唔好睇佢個湯樣淡茂茂、水汪汪咁款,查實好濃牛味,呷一口就嗒得出。蘿蔔味道好清甜,食落無渣,可見用料不賴唔馬虎。所以,飯後再添飲多一碗,好飲自然值得再細嚐!
烤特級牛肉
與其講烤,不如講炒似啲。大大個碟,同樣裝得滿滿牛肉,伴啲沙律菜,絕對大大份,無將貨就價。雖然唔知佢點特級法,但至少好啱食,因為牛肉唔會太肥,老婆最怕食日本啲肥牛,尤其好似吉野家嗰類膏多過肉嘅牛肉;此外,牛肉醃得幾入味,肉質幾鬆軟。
石鍋雜錦飯
無論賣相、味道都幾出色嘅石頭鍋飯,叫得「雜錦」,自然材料多多,有菠菜、銀芽絲、冬菇絲、酸菜、牛肉、紫菜、甘荀絲,一份份咁圍住石鍋內圍排好,再加隻煎蛋放晌面,所以賣相睇出師傅花咗啲心機。由於飯粒分明,咬落爽身,又以滾熱嘅石鍋裝住,啖啖都係熱辣辣。食前,我哋將所有材料跟飯撈勻,所以,每啖飯都食出唔同味道!我見佢餐牌幅圖係「生蛋」一隻,如果有得揀,我都鍾意窩蛋多過煎蛋,因為篤穿個蛋黃等佢同啲飯撈勻,味道仲正,又滑又有蛋香呀!
整體嚟講,食物味道的確幾好食,尤其個蘿蔔牛肉湯,招呼普普通通咁啦,前菜、白飯都唔介意你再添,不過,我哋就無添過,因為套餐本身已經夠晒食,唔需要再添。反而係環境比想像中有啲啲落差,可能以前去過嘅韓國菜館都比較有「地道」包裝,但依度就唔知點形容好,牆身掛咗好多大細不一嘅畫同相片,又釘咗好多薯片吉包同餅乾吉盒,有啲古靈精怪,望落又可以叫幾似間型格嘅咖啡店;但睇埋啲枱凳同擺位,有啲雜亂無章,似個飯堂咁。雖然係咁,佢啲匙羹、筷子又好認真,係銀嚟嘅,因為好墜手。裝飯嘅碗又係用番韓式,銀碗兼有埋蓋。
|
|
|
松家日本料理
|
標題 : 閒話家常定食午餐 |
地址 : 中環德輔道中55號協成行中心二樓 |
地區 : 中環 |
|
現時分數:
|
日期 : 2012-03-14 16:08:00
大部份時間晌大陸做嘢嘅死黨阿東,啱啱要落返嚟開會,少有咁晌閒日係香港,難得佢約小弟一齊食晏,就算公司包伙食都要出去同佢一齊食啦。突然叫食飯,仲要晌中環,中環食晏好似蝗蟲攻城咁丫嘛,又想食得舒服,要夠靜局傾偈,真係對我有啲難,幸好公司周時有幾本飲食雜誌睇門口,又「拿拿淋」上網摷一摷料,就搵咗松家。其實都知佢開咗段日子,日頭多數做定食,夜晚就做放題,網上食評都唔錯,雖然食個晏平均要百鬆啲,但睇嚟質素都應該OK,即刻訂位先。
約好12:30pm,小弟就先去攞位。環境確實幾清靜,深啡牆身同間隔,紫色梳化,有部份卡位仲有高身通花隔住,私隱度再多啲。可能時間尚早,都只係幾成人,不過到1:00pm,眼下所見,都差唔多坐滿全場,中環食晏就係咁,多好地方都爆得緊要。
兩個男人,自然唔使多諗,定食搞掂,壽司、魚生、咖喱、鐵板燒,有飯又有麵,悉隨專便。平嘅七、八十,貴嘅去到百幾、二百,收加一。
咖喱豬扒飯定食 $98
- 咖喱飯定食有三款選擇:牛肉、豬扒、雞扒,小弟就揀咗咖喱豬扒飯定食,附有麵豉湯、沙律、鹹菜。
- 麵豉湯味道幾濃,又無過鹹;沙律係啲生菜、芒果、火龍果,叫做湯後飯前清清味蕾;而鹹菜,今次食到嘅係中華沙律(海帶)同醬醃蕎頭,啲海帶調得幾好味,而蕎頭帶有少少鹹酸,幾有趣呀!
- 豬扒飯份量著實幾大份,好抵食吓。珍珠米黏糯軟身,足有兩碗飯份量,而豬扒厚身,肉質鬆軟,肉嫩多汁,外層吉列脆口甘香,又唔太厚粉,水準做得幾好;至於咖喱,係傳統日式做法,唔辣,帶果香及甜味,撈飯當然好食。碗飯內另有兩粒無醃過嘅蕎頭,所以食幾件豬扒,又「趙」番粒蕎頭,中和一吓,感覺清爽啲,無咁熱氣又無咁「漏」。
銀雪魚西京燒定食 $138
- 阿東所揀嘅係銀雪魚西京燒,燒魚類定食唔係好多,其他嘅仲有蒲燒鰻魚、鹽燒鯖魚,跟飯、麵豉湯、鹹菜,無沙律嘅。珍珠米、麵豉湯、鹹菜上面都講過,唔多提喇!
- 銀雪魚頗大片,若一大隻手掌之呎吋,伴有蕃茄片同青瓜片,賣相叫平穩沉實。小弟見啲銀雪魚燒得咁靚,都黐食咗一小片。因為係西京燒關係,肉魚會用味噌同味醂醃漬過,所以較入味,味道感覺略為濃,帶少少鹹,而魚油又十足,所以醮點點沙律醬嚟食感覺平衡啲,無咁肥膩。
話午飯時間一個鐘,但難得一聚,真係頭頭尾尾傾咗個半鐘有多。雖則閒話家常,但都帶有一份彼此關心嘅友情!不過,今次又係阿東請,非常唔好意思,下次等小弟埋單啦。 |
|
|
Awfully Chocolate |
標題 : 蕉蕉cake cake |
地址 : 尖沙咀河內道18號K11購物藝術館G32-G33舖 |
地區 : 尖沙咀 |
|
現時分數:
|
日期 : 2012-03-13 12:54:13
晌美孚Mia Pasta Trattoria嘆完餐生日飯,就返屋企食生日蛋糕,太太特別準備咗Awfully Chocolate嘅chocolate banana cake,6"直徑賣到成$228,都咪話唔貴,不過,值唔值就睇質素喇。
記得最初遇見此店係開晌堅道嘅,一室監獄裝修,仲要乜嘢產品都無陳設出嚟,夠神秘,夠綽頭,令人好奇,仲要只得三款味道嘅朱古力蛋糕同黑朱古力雪糕賣,之後,被雜誌介紹,被明星吹捧,就大熱起嚟。依家叫開枝散葉,多咗好幾家分店,不過裝修就無玩得咁型格有個性,變得商業味多咗,但係產品就多元化咗,有Chocolate Truffles、Cupcake、Butterscotch、Khalua Bar……(部份產品要晌指定店先有供應),都係食家們嘅口福。對間餅店嘢唔再多講,因為有咁多食評都講咗九九十十啦,不如講吓小弟點評佢個蛋糕啦!
朱古力香蕉蛋糕(Chocolate banana cake)
想講少少個包裝盒先,白底黑字黑邊,貫徹番店舖裝修嘅色系,夠精簡。最鍾意佢包裝盒兩邊底位畀開咗個窿位,方便兩邊盒舌可以攝入去,唔使撒開晒。因為兩公婆一次過點食得晒成個蛋糕丫,食剩嘅2/3入返盒,唔使搵繩綁都易入返落雪櫃。
好多人都形容個蛋糕表面無乜裝飾,係見慣咗啲蛋糕上面有好多嘢就係有裝飾,小弟就覺得佢都唔算係無裝飾,如果做好晒個餅,再淋完冚面嘅朱古力漿,四圍連餅面都平平滑滑,咁就真係一啲裝飾都無喇!稍稍留意嘅話,都見到餅面嘅紋有一定嘅線路,又有高咗一小朕嘅圍邊,顯示出師傅功多自不然藝熟。有做過蛋糕嘅朋友都知,倒朱古力漿做到個面平滑唔算太難(重點在於做個朱古力漿嘅技巧),晌上面搞一大埋裝飾亦非難事(在乎花幾多心思),但單以紋刀做出花紋就未必做得靚仔,隨時岩岩巉巉唔好睇!
一刀切開,清晰可見上中下一共三層朱古力海綿蛋糕,中間「卡拉」夾住兩層新鮮香蕉果肉,再外圍同蛋糕面淋上朱古力漿,製作上唔算複雜,係一層疊一層要花多少少功夫。但論質素,確係上乘,海綿蛋糕除咗夠濃郁朱古力味之外,亦頗為鬆軟;而朱古力漿同樣好香朱古力味,甜度唔會令人食落過「漏」,質感亦都軟滑;夾層嘅蕉肉,做得幾厚身,而且夠熟夠香蕉味濃,唯一挑剔係食落稍嫌帶少少實,唔知係咪雪過籠?還記得第一次食依類朱古力香蕉蛋糕,係晌海運大廈嘅California Pizza Kitchen,嗰次食到嘅一樣做得非常出色;今晚依個,整體嚟講都係一樣非常好食,朱古力搭香蕉嘅甜蜜魔力,無得頂啦!
個蛋糕預咗一開六,生日依晚就同太太各食一件,剩番2/3共四件就留番聽晚同姨仔、舅仔分享一齊食,延續多一晚嘅滿足! |
|
|
Mia Pasta Trattoria |
標題 : 菌菌同陳 |
地址 : 美孚美孚新村2期平台65C舖 |
地區 : 美孚 |
|
現時分數:
|
日期 : 2012-03-12 19:43:15
Mia晌美孚區都算係間有名氣嘅意菜小店,經常都爆滿,一來由於店主兼廚師出身自大酒店(好似係新世界萬麗同半島任職過),自然有一定嘅實力;二來依區無間正式嘅意菜館(唔好搵PizzaHut、PHD嚟比較),相對競爭性又細咗;三來就係全店只有14個位,叫做物以罕為貴,好易坐滿,較容易做成長爆嘅景象。所以,依兩年幾,都係齋行過無幫襯,等佢人氣無咁盛先去。
依餐其實係小弟嘅生日飯,太太知我想去試好耐,就「指定」去依間,不過由打電話去訂枱、當晚攞位都係由小弟負責,當然俾錢就佢負責啦。打到去問訂枱,個店員就問我想訂7:00pm、8:00pm定9:00pm,要準時交枱喎,我心諗,仲係咪旺得咁緊要呀!不過,我覺得都係佢哋慣晒口,同埋以妨嗰晚真係客多嘅話可以做多一兩輪,買個保險。當晚小弟訂咗8:00pm,準時到,但已經未見滿,入門右邊4人枱係吉嘅,左邊亦有兩張2人枱係吉嘅,即係得3枱客共6人,8:00pm嗰輪就多兩枱客共4人(連埋小弟同太太),再晏少少有多兩位無訂枱嘅女士入嚟,其後做過幾個外賣客,我同太太食到九點鬆啲,都已經叫「包場」得番我倆公婆,之後都再無人嚟!可能依晚係週三,加上寒流襲港,有啲天寒地凍,比預期中少客。
對此店綜合意見:小店設計簡約,白色牆身、棕啡色木枱、黑色矮背皮椅,枱面都無任何擺設;四、五十蚊一客餐湯,八、九十,甚至過百大洋一客意粉,價錢唔算親民,但食落知佢貨真價實;雖然客唔多,上菜依然緩慢,正所謂慢工出細貨,但絕對食得出水準同誠意。
由於散叫唔平,晚餐成為必然首選,除非幾款主菜都唔啱食,價位$105-$135,包沙律或餐湯,3揀1主菜,再配咖啡或茶,收加一服務費。今晚主菜方面,有忌廉野菌雞柳配扁意粉($105)、意大利風乾火腿意粉配芝士忌廉汁($125)同海鮮天使麵配意式雜菜湯($135),所以晚餐絕對抵食,而我哋就揀咗前兩者。
Mia特色沙律
我哋叫咗兩個晚餐,就自然一個要沙律,另一個要餐湯。沙律可稱為輕盈簡單,睇圖辨物,有羅馬生菜伴以油醋汁做底,再放上幾片鮮蘑菇片、車厘茄、細條青瓜片,生菜爽脆,汁醬清新,作為前奏開胃至極。可能師傅都幾鍾意「菌」,沙律同兩個主菜,都有菌出現!
是日餐湯
是日精選餐湯係粟米忌廉湯,當然唔係家常嗰隻罐頭粟米湯啦。橙黃色嘅忌廉湯,賣相平平無奇,通常會晌湯面加啲忌廉整靚佢都無,但一啖飲落,粟米味勁濃郁囉,質感幼滑無起粒,真材實料得無嘢講。散叫有個野菌忌廉湯,賣到成$58一客,有機會真係要試試!
忌廉野菌雞柳配扁意粉
賣相絕對講得樣樣衰衰唔靚仔,睇落好普通咁款,但擺入口就唔會當佢係堆亂草,依啲咪叫做味道囉!首先,依晚出面真係幾寒,而碟扁意粉送嚟時熱辣辣,食落令人暖笠笠,很窩心嘅感覺,忌廉汁好足,令每箸扁意粉都掛滿汁;雞柳雖然唔係話好突出,但感覺唔似雪藏貨;最精彩就係個野菌,雖然啲菌望落去都係「黑孖孖」,但大致都睇到又食到有好幾款野菌,臨離開時因為見無晒客,師傅都忙完晌後面廚房hea緊,所以就問佢因乜做到個味咁濃郁野菌香,佢話用咗木耳、磨菇、雞脾落、大菇同黑松露醬,果然落足料,唔怪得咁正;至於啲扁意粉,啲人鍾意話意粉好食叫一句al dente,意粉柔韌度啱啱好,柔軟得嚟咬落帶點韌勁,簡單一句有嚼勁就係啦。仲有,唔好睇佢好似細細碟,食落原來都有幾多。
意大利風乾火腿意粉配芝士忌廉汁
依個主菜晌賣相就相對出眾得多,意粉之上放有好多大菇片同菜苗,最上就係捲為花狀嘅巴馬火腿,再碎灑即刨巴馬臣芝士,睇見已好想快啲將佢哋放入口喇。3大片巴馬火腿,意大利來貨,雖然無問師傅依條火腿風乾咗幾多個月,但食落甘香唔肥,太太一向都對肥牛、煙肉都怕怕,但依個巴馬火腿佢話好啱佢。芝士忌廉汁,又係加咗巴馬臣芝士做,好香好濃夠稠,汁醬夠多,每箸意粉同樣都可以掛滿汁,不愧為當過大酒店醬汁部主管,醬汁真有一手;中層嘅大菇片同菜苗都好味,而且有中和火腿嘅甘香同汁醬嘅濃膩;意粉同樣做得出色,煮得啱啱好,有咬口,有嚼勁!所以,小弟覺得依道意粉真係做到色香味全,太太同我都細意品嚐,亦好滿意兩個主菜。
附送餐飲
本來餐飲好多時都無咩好講,但今次就有話兒喇。我點嗰杯熱咖啡,香但係唔濃,聞到咖啡香,但飲落唔濃,好似係落沖即溶咖啡粉時,要落兩匙羹咖啡粉嚟沖一杯,依家就好似落得一羹半,個味淡咗,還好啲奶係熱辣嘅,否則令到杯咖啡又唔濃、又唔熱就無癮!相反,太太杯熱檸水就賣大包,查實隻茶杯又唔係好大,用唔著俾4塊檸檬咁多嘅,除非係跟熱水壺上,就叫做可以沖多杯啫,哈哈!
甜品
如果想完滿啲,食晚餐可另外加錢配甜品,+$20係是日甜品,依晚係朱古力慕絲,+$30係意大利芝士餅,不過店員話無貨。但一早太太已經唔准我叫甜品,因為佢已經準備咗個awfully chocolate嘅朱古力香蕉蛋糕晌屋企喇,仲點會叫甜品丫!哈哈! |
|
|
韓國屋 Korea House |
標題 : 一肉二菜石頭飯 |
地址 : 尖沙咀廣東道30號新港中心地庫大食代 |
地區 : 尖沙咀 |
|
現時分數:
|
日期 : 2012-03-06 19:44:40
交待少少先,話說同太太去港威嘉禾睇戲,所以晌新港嘅Food Republic食完飯先過去戲院,美食廣場點都又快又多選擇,唔使趕,輕鬆開完餐先慢慢睇住時間行返過去。
晌另文「喜運來 – 台式六寶」講過我哋其中一間揀咗食台式鹵水飯餐;而太太揀嘅係食韓國嘢嘅韓國屋。佢個廚師推介好簡單,一係石頭飯,一係湯麵或湯粉絲類,同樣賣$42,只係前者就揀一款肉搭兩款蔬菜,後者就只可以揀一款肉而矣。櫃面前又係有晒各款樣板,清清楚楚。因為即叫即做,所以要啲時間,大概10-15分鐘,睇吓多唔多單做緊啦。
太太要咗石頭窩飯,一款肉就要燒雞肉(其他仲有辣泡菜豬肉、燒牛肉、韓式辣豬扒),兩款配菜就揀辣泡菜同菠菜(其他選擇有雜菜、雞蛋、炒粉絲、芽菜、薯仔絲、白豆),而且,包多一碗韓式例湯,係碗無乜味嘅紫菜湯。
燒雞肉石頭飯
先講賣相,幾有睇頭,一砵石頭飯,餸料堆到滿滿,拎起餐盤好墜手,當然個石頭鍋本身都有番咁上下重嘅。由於新鮮即做,手捧托盤都感受到個石頭鍋所散發嘅熱力,亦聞到餸菜嘅香氣。辣泡菜同菠菜都放得唔少,泡菜酸酸辣辣,醒胃得嚟又帶點刺激,菠菜就只不過係灼菠菜,但都幾嫩滑。燒雞肉比較普通,唔係話差,只係好似一件雞扒煎熟斬件落鍋,雞味都係一般。其實整體味道唔錯,但最可惜係個飯,無飯焦都唔係問題,最弊個飯底較爛,好影響個口感,認真失色。 |
|
|
喜運來台式小廚
|
標題 : 台式六寶 |
地址 : 尖沙咀廣東道30號新港中心地庫大食代 |
地區 : 尖沙咀 |
|
現時分數:
|
日期 : 2012-03-05 19:37:24
跟太太去港威嘉禾睇戲,所以就揀咗嚟新港嘅Food Republic開餐,兩公婆各有各揀,但揀好就坐埋一齊同分享。
其實都無乜心水,因為都較少落美食廣場搵食,隨意就揀咗「喜運來」台式小廚,因為價錢算幾實惠,款式都OK,而且見佢有一款「台式雜綿鹵水飯」,賣$38,鹵水餸樣樣有啲,包一個例湯同一碟菜,睇落都唔錯喎,就決定一試。而太太都係左度右度,結果睇中隔幾個鋪位嘅「韓國屋」,因為想食吓韓國泡菜,就咁叫咗一個餐。(韓國屋另文再講)
喜運來嘅選擇唔多,兩張A4呎吋餐牌一目了然,有飯有麵,價位由$28-$38,另外可再加一啲台式小食,都係$6、$7左右,而最貴都係「台式鹵水拼盤飯奪餐」($56),因為有實物樣板睇,鹵水拼盤幾大碟吓,又配一大碗肉燥飯,如果係女仔,真係可以叫一份兩個女仔食呀!由落單至上碟都好快,皆因啲鹵水嘢都預製好,適合趕時間。
例湯
黃瓜煲豬骨,不過不失,味唔濃,但不至於淡而無味,叫有碗湯水到肚,好過汽水、奶茶之類,叫有益啲啦。
台式雜綿鹵水飯
我哋廣東燒味有五寶飯,依碗雜綿鹵水飯都唔弱,有六寶:鹵蛋、牛展、鹵肉、雞腳、雞翼、冬菇,樣樣一件、幾舊咁,堆埋都幾大份量,碗飯亦都唔係嘢少,絕對夠晒飽肚。飯粒OK,無話生,無話爛,幾有米香。鹵水餸就好壞參半,鹵蛋較實,雞腳亦都比較韌,鹵肉肉質有少許嚡,其實都好入味嘅,只係質地差啲;相反,牛展、雞翼幾好食,同樣入味,好有鹵水香,冬菇就鹹咗啲。其實佢啲鹵水汁有些少過鹹,不過,撈埋啲飯,好快就可以扒光碗飯!
準備上載食評時,發覺原來「喜運來」此店在原有鋪位先前係賣雲南米線,叫「喜運來雲南米線」,依家就賣台式嘢,連喜運來個招牌都一模一樣,只係變咗台式小廚。 |
|
|
香港華商銀行公會
|
標題 : 開心萬歲嘆點心 |
地址 : 中環雲咸街1號南華大廈5樓 |
地區 : 中環 |
|
現時分數:
|
日期 : 2012-02-27 14:52:00
承蒙姨仔之福,有機會走嚟一試「華商銀行公會」嘅點心同炒粉麵。星期日,太太嗰邊要去薄扶林掃墓,一大家人先過嚟中環匯合,食完晏仔先出發,姨仔係依度嘅會員,所以提議晌度食,貪佢夠靜局,騷擾少,況且食物質素不賴。仲有就係依餐免費,因為姨仔話出咗花紅,由佢請,真係姨仔萬歲。
華商銀行公會屬私人會所性質,供華商會員銀行及其屬下嘅銀行員工使用,但其實入會都唔算太難,都係俾少少會費啫。雖然叫私人會所,但環境猶如中式酒樓,樓底矮矮,比一般酒樓感覺仲要迫少少,但星期日嘅中環,中午時段本身已經唔多人,更何況依類上樓嘅中菜「私人會所飯堂」,我哋係第一枱客,食咗成個鍾,計埋我哋全場都係得兩枱客,清靜得緊要,真係好少飲茶咁寧靜,所以,如果三幾個老友,又想嘆吓點心,又想靜靜哋傾吓偈,依度算得不二之選。
一入門口嘅告示板,就印有「招牌名菜」同「廚師特別介紹」嘅推介,另外,仲有一個菜譜,包羅多款小菜及炒粉麵飯。依趟飲晏晝茶,點心係主打,所以睇點心先,點心紙一張過睇晒,分兩大類:「蒸益求精」同「甜得有營」,前者一共羅列咗20款點心,後者就係5款甜品。點心價位唔平,特點$34,頂點$29,大點$25,中點$21,小點$18,茶芥加一就唔使多講啦。一口氣落咗10個點心,加兩個炒粉麵,其實都好夠飽,但臨尾姨仔極力嘅推介,就再試埋佢個紅豆糕同焗布甸,嘩!搞到夜晚嗰餐都要拖晏少少先食呀!
生煎菜肉包(特)
生煎包個子都幾大個,底面都煎得甘香,而且撤滿芝麻;菜肉餡以豬肉、椰菜加少少蔥做成,味道唔錯,肉餡無死死實實。
麒麟馬拉糕(小)
質感鬆軟,味道清香,手功紮實嘅一件古法馬拉糕。後尾上網翻查,何解加上「麒麟」二字,原來老一輩師傅蒸糕時會敲一敲蒸爐,令糕面呈現麒麟紋(大概有啲似魚鱗一片片咁),而麒麟有祥瑞之意,都係攞個意頭。不過,今日眼見嘅馬拉糕,得幾條縐紋咋喎!
蠔皇叉燒包(中)
包身咬落有彈力,唔死實,一搣開熱氣騰騰,最正係啲叉燒,入味唔肥又夠多獻汁。
古法牛肉球(中)
牛肉打得鬆彈唔死實,味道平穩。
開洋糯米包(小)
糯米包依款點心依家少見咗,難得依度有就要點番一籠啦。皮薄煙煙韌,餡料豐富,糯米軟糯入味。
蜆芥鯪魚球(特)
雖為特點,但都貴得有理。鯪魚球魚味濃,肉質很彈牙,炸得夠金香。蜆芥鹹鮮,蜆味突出,輕醮已足夠,太多會過鹹。
蟬衣鮮蝦腐皮卷(特)
「蟬衣」又誇張啲,不過改用腐皮當春卷皮咁用,做成炸腐皮卷,一樣咁香脆,咬落咯咯聲,用料新鮮,蝦肉鮮甜。
生煎蒲魚藕餅(特)
平時食藕餅多數用鯪魚,今回用蒲魚,查實對蒲魚唔係好認識,都唔多知係咩魚,所以魚味方面就唔講,講番個藕餅。藕餅煎得唔會易散開,底面帶脆,蓮藕味十足。
芝士海皇春卷(大)
對比起碟蟬衣鮮蝦腐皮卷,依個芝士海皇春卷較為平淡啲。海皇都係啲碎濕濕嘅海鮮料,芝士唔多,味道唔突出。
馬拉盞龍鬚(大)
以馬拉盞煮魷魚鬚,OK無乜驚喜,因為馬拉盞差唔多等同我哋常用嘅蝦醬。魷魚鬚煮得夠腍唔韌,而小弟就較鍾意金銀蒜蒸,惹味啲!
蛋白海鮮炒飯
佢啲炒粉麵份外大碟,好似依個炒飯,堆到成個小山丘咁。而個炒飯本身都幾足料,海鮮有帶子有蝦,配啲甘筍粒、蔥粒、菜心梗切片,加蛋白炒,飯粒爽身,唔會食到碟底一攤油。
三絲炒麵
同樣又係一碟足料嘅炒粉麵,堆到滿瀉咁滯。有肉絲、冬菇絲、銀芽……等等,麵餅炒得「外脆內軟」,不過,咁都係三絲炒麵嘅基本,所以,都係功夫紮實平穩。
椰汁紅豆糕(小)
椰汁糕加紅豆粒,一客三件,椰汁味幾濃,不過,依家多數都係用罐頭椰汁處理。而紅豆好少,且分佈唔平均,仲有糕身有少少削。
蓮茸西米焗布甸(中)
落單後要等十多廿分鐘,不過都值得喎,因為真係好食。賣相已經似模似樣,布甸很香蛋味,而蓮茸竟然係白蓮茸,在布甸底部,柔滑而唔會過甜,正呀!
大家都食飽飽,起錨要出發喇! |
|
|
第一腸粉
|
標題 : 面薄底厚腸粉新食法 |
地址 : 太子砵蘭街373號 |
地區 : 太子 |
|
現時分數:
|
日期 : 2012-02-21 18:17:38
小弟一向都唔多會為咗食等餐懞,因為真係覺得無咁嘅必要,香港遍地美食,食少間唔係咩大問題,不過,今次嚟「等」第一腸粉卻係帶點無奈,事出必有因。
事緣10月尾,見網站推出第一腸粉嘅團購,內容係$10即購「第一腸粉專門店」8 選1 單拼腸粉一碟$19再加凍豆漿一杯$5(總值$24),而小弟因返教會都算常出沒太子區,當食早餐都好,額外加多少少嘢當食晏又得,再者限期由11月1日去到至1月1日,相信好易用到,所以就買咗兩張,結果,都係自己唔好,拖吓拖吓到咗最後一日,唔用唔得,就拉埋老婆一齊試試佢啲腸粉。
原本佢晌該區都唔算好出名,只因自稱為「第一腸粉」,所以有啲話題性,食客都唔算多。點知最近成為米芝蓮推介,食客蜂擁而至,排個不奕樂乎。依日,已經專燈晏啲先嚟(2:30pm左右),都係有條小人龍,都係嗰句啦,無謂排,外賣兩客腸粉拎走食算數!
雖然唔係排入場,但等外賣都要等咗近廿分鐘。我留意過,如果我有跟埋去排隊,我走時應該排晌我前面嘅人都有要排多幾個人先到佢哋,相信排足30分鐘走唔甩。仲要唔係一叫就有得食,可能又要等10多、20分鐘先有得食!
招牌第一拉腸
能夠諗到以菜甫、肉燥做餡,都算佢第一啦,不過,既然起名為「招牌」,必定係店家認為全店最好,令食客一試難忘。講真,飲食多少帶點主觀,而我就覺得只可以叫唔錯。先講皮再講餡,腸粉皮拉得的確薄,睇到條腸粉透餡就知佢皮薄,但透餡唔代表一定係上佳,個人覺得係花招,因為包出嚟嘅腸粉只係面薄底厚,咬感唔均勻;而且唔覺話好滑身喎,當然,依個可能多少同我唔係即食有關,所以唔入佢數住。餡料方面,菜莆搭肉燥做餡,我就覺得幾出色,味道突出夠惹味,菜甫多份脆口感,只可惜餡料偏少,而且唔係三條腸份都落料咁平均,底下其中有一條腸份真係無乜料添!
薑汁豬潤拉腸
依個豬潤腸,我諗都可以用失望嚟形容。依個腸粉落餡仲衰過上面嗰盒招牌第一拉腸,一打開個盒,以為其中一條腸粉啲豬潤甩晒出嚟,原來直情有條腸粉係無落豬潤嘅,即係純齋腸,師傅求其執番兩塊豬潤落盒度就算,因為如果包得好哋哋無理由啲豬潤會甩到出嚟,真係腸粉新食法。此外,面面嗰條腸粉係得一塊豬潤咁大把,還好,料靚,黃沙潤做爽口既滑,帶些微薑汁香,一啲臊味都無,算是一點點安慰。同樣,厚薄鴛鴦皮問題超嚴重,一啲滑溜感都食唔出,只係一口軟糯嘅粉糰感。
門口放置自助豆漿機,可能著實店內空間有限,索性將豆漿機放晌門外。如果大熱天時都幾好,排緊隊時口渴渴,可以即場整番杯解解暑。
由於唔係堂食,唔知佢啲服務係點,但有樣嘢可以一提,叫外賣,落咗單佢唔會俾個籌或一啲記認你,只係叫係大概幾耐之後返嚟攞,完全講個信字。如果外賣單少,都無乜問題,但單多,前後客都叫同樣外賣,可能出現爭駁;又或遇正啲大懞嘅食客,隨時被人拎錯咗!
據說米芝蓮對一間食店嘅評分,會透過幾次造訪,既然獲得米芝蓮推介,相信水準有番咁上下穩定,但點解小弟一食個水準就有咁大落差?唔好彩?定水準確係跌到咁差?相比起早期各食家所貼上嘅腸粉相,真係有退步嘅跡象。整體對此店嘅評價係,餡料得但份量少,腸粉薄但包得衰,如果佢唔係叫「第一腸粉」,仲要係「專門店」,我應該會俾個OK佢,但依家咁,個人覺得只值得俾個喊臉啫! |
|
|
滝生堂
|
標題 : 低價位便當 |
地址 : 美孚新村第三期吉利徑6-8號平台86C舖 |
地區 : 美孚 |
|
現時分數:
|
日期 : 2012-02-20 14:28:41
約咗老友睇英超早場,所以就相約晌佢樓下間滝生堂搞掂餐晚飯。美孚平台都有幾多出色嘅食肆,不過因為位置較難搵,街外客較少,但一樣好旺場,因為淨係美孚新村咁多座樓,區內客源已經好夠做。今晚嚟到滝生堂,一樣爆,試過之後唔係覺得因為佢啲嘢好好食,只係鋪仔細細,3張四人枱,加逼逼狹嘅幾個bar位,所以嚟幾批人就已經全店滿座!
我記得以前見過佢哋晌下面地鋪專做零售,依家轉咗上平台做埋堂食。雖然鋪仔細細,但有成兩個侍應,不過略嫌生手,好多關於菜牌嘅問題都答唔上,但就服務殷勤有禮搭夠。只係講到食物質素就好一般,朋友A係魚生迷,所以點了一個魚生飯加多一客刺身,而小弟就只係要咗客豬扒飯,茶水都只係杯涼嘅清水,仲諗住會係杯熱嘅麥茶或綠茶添,不過依度就全日都唔收加一嘅。
鮮活赤貝刺身 $32
朋友A話以依個價都唔係平,一客活赤貝一開四,青瓜絲伴碟,賣相一般啦,但味道都算得上是鮮甜,質素叫OK咁啦。
什錦魚生粒飯 $35
魚生粒主打係三文魚,其次有少少吞拿魚、蟹籽同玉子,朋友A對個飯嘅評語都係話OK咁啦,似乎意思就即係普普通通,唔好又唔差咁!
滑蛋豬扒飯 $35
我嘅豬扒飯就幾大碗,滑蛋部份加咗啲洋蔥絲同金菇,出嚟效果自然唔叫得好滑,但咬口十足。而豬扒就好失望吓,豬扒唔係吉列,只係普通脆炸,但外層一啲唔脆口,最致命係肉質好韌,唔易咬斷,唯飯粒煮得鮮明又帶點黏糯,叫加番少少分過佢。 |
|
|
錦成牛什粉麵茶餐廳
|
標題 : 原汁牛雜飯 |
地址 : 機利士路28號 |
地區 : 紅磡 |
|
現時分數:
|
日期 : 2012-02-14 09:54:26
好少出入紅磡,晌紅磡嘅食評少之又少,過親嚟都唔係好嘢,今次都唔例外,為咗老友嗲哋嘅白事,所以先至收工跟幾個朋友過嚟走個轉。由於此次喪事以道教儀式進行,所以,都唔多久留,主要都係慰問吓老友,睇吓有咩可以幫吓手。
收工收得晏,逗留晌殯儀館都係半個鐘左右,完埋件事都差唔多8:30pm,梗係食埋飯先返屋企。三幾個老友,都費事周圍搵去邊度食,見對面街有間錦成牛雜粉麵茶餐廳,雖然望落裡面好似昏昏暗暗,但志在食完就鬆人,無乜再點諗,走入去坐低就睇吓有咩食。環境格局比較舊式,因地方細細,印象中好似無卡位,全場放有5張小圓枱,都有幾枱客,原來都有好多學生哥(理大學生)嚟食飯。
佢既係賣粉麵,又係茶餐廳。既然以「牛雜」二字為店舖招牌,就食牛雜啦。枱面上嘅餐牌,有經濟粉麵餐,各款粉麵都係賣$21,仲送可口可樂;不過,佢仲有個餐牌,係經濟客飯,亦只不過$22,加杯熱飲都係加多$5,就決定要一客原汁牛雜飯,配熱奶茶。
原汁牛雜飯 $22
牛雜有牛肚、牛肝、牛膀,加多炷生菜,飯底加咗腩汁。牛雜都幾入味,鹵水芳香,牛肚煙韌,牛肝粉嫩,牛膀爽口,雖然唔係話好食到不得了,但以$22嚟講,算有番咁上下喇。依家物價都係咁升啦,$22一碟碟頭飯都已經難得架喇!加多$5仲多杯奶茶,都OK喎,抵過去快餐店啦! |
|
|
Thomas Haas |
標題 : 紅夫人.黑武士 |
地址 : 尖沙咀彌敦道132號美麗華商場1001號舖 |
地區 : 尖沙咀 |
|
現時分數:
|
日期 : 2012-02-10 18:15:07
雖然聽聞Thomas Haas嘅朱古力好出色,但有朋友試過Thomas Haas嘅件裝蛋糕,同樣話正喎,所以就一心走去買嚟試一試。門口餅櫃,放咗賣相約七、八款蛋糕,款式唔算多,有啲外型精緻典雅,有啲紅嘅黃嘅色澤搶眼,賣相極之討好,一律賣$30件,個別蛋糕仲會做75折添。最後揀了一紅一黑,一酸一甜做對比,試試質素如何。
紅草莓之夢 (Rubus Raspberry Dream)
顧名思義,桑莓(覆盆子)做主打。火紅色外型,有啲冷艷感,但餅面幾滴「水珠」,就變得精緻唔冷漠,可比喻為外冷內熱嘅紅夫人。薄薄一層海綿蛋糕做底,中間就填滿晒粉紅色嘅桑莓慕絲,但有層次在於慕絲之中仲夾咗層鮮桑莓果醬,到最後,全年蛋糕先以桑莓軟漿包裹住,稱得上是一件蛋糕藝術品。味道亦好出色,桑莓慕絲既軟且滑,中間嘅桑莓果醬酸得嚟鮮活又莓味濃郁,外層嘅桑莓軟漿柔軟微酸帶甜,而且每部份做得恰到好處,厚薄有序,果醬唔會話側埋一邊,軟漿無話時厚時薄,睇得出師傅嘅心機同手功!
松露朱古力蛋糕 (Classic Chocolate Truffle)
經典嘅圓滑外型,加上一小片銀箔,型格十足。相對上面件「紅草莓之夢」,依件「松露朱古力蛋糕」做法簡單得多,內餡全是黑朱古力慕絲,朱古力濃度甚高,甜中滲出甘味,而且質感較「實淨」啲,感覺好力量型,可比喻為外張內斂嘅黑武士。再外披嘅一層鏡面朱古力漿,幼滑細膩,朱古力迷不容錯過嘅一件經典松露朱古力蛋糕!
|
|
|
Sloop Froyo & Bagel |
標題 : 帆船下嘆乳酪 |
地址 : 中環皇后大道中189-205號地下3號店 |
地區 : 中環 |
|
現時分數:
|
日期 : 2012-02-09 18:08:01
早排趁著天氣仲熱(天氣真係有啲反常),食完晏走咗過嚟老遠嘅Sloop Froyo嘆乳酪,其實因為要拎啲嘢比朋友,晌附近交收,至所以乘機試吓佢嘅乳酪。
店子細細,一室橙色、白色好搶眼醒目,環顧室內環境,基本上都係主打外賣,唯一入門口右邊有張高腳枱,俾我放吓嘢兼擺低杯乳酪影吓相。
此店以重量計算價錢,$18/100g,如果唔想煩,佢哋都有6款已設定嘅配搭,分別叫甜心莓莓、窈窕淑女、熱情森巴、東京雪塔、繽紛樂園、可可狂想曲。想DIY嘅,配料有近廿款,分為鮮果類(士多啤梨、火龍果、藍莓、菠蘿……)同糖果類(可可米、燕麥卷、麻糬、Kit Kat朱古力……),不過,乳酪就只有原味一款,所以,相比起其他乳酪店,覺得佢哋無論晌乳酪款式同配料選擇都有啲輸蝕。
因為唔想味道太雜,有少少刻意唔揀太多配料,最後,只揀咗紅豆同Oreo餅碎。乳酪幾挺身,質感唔算輕盈,帶微酸,但口感頗為幼滑,冰冰涼都幾唔錯。紅豆蓉頗香甜,很有豆味,而Oreo餅碎嘅濃重朱古力味,配合微酸嘅乳酪,都好夾。雖然老闆都秤到好足,不過,$36食一杯乳酪又真係唔平嘅消費!
題外話,此店除賣乳酪,另一主打就係賣New York Style Bagel(百吉圈 / 貝果圈),唔知係咪因為賣似足個水泡嘅百吉圈,就將店名改為Sloop,有帆船之意。如果揸住隻帆船出海,在海中盪漾,曬住太陽,食住件餡料豐厚嘅百吉圈,飲住杯冰涼鮮果沙冰,之後再嘆杯有5、6款配料嘅重量級乳酪,不知幾爽呀。不知店主係咪都有咁嘅幻想呢? |
|
|
新宏利粥麵
|
標題 : 老鋪粥品 |
地址 : 荃灣路德圍75號 |
地區 : 荃灣 |
|
現時分數:
|
日期 : 2012-02-08 18:02:21
新宏利晌路德圍都好多年,生意好旺,鋪內其實好細,而且係開放式,好多摺枱膠凳開晒晌鋪外,大熱天氣都只係牛角扇侍候,所以一般天熱都甚少嚟食。但初春或入秋,就幾鍾意幫襯,因為夠地踎,食得無拘束,而且粥品、油條都好有水準,份量又夠十足無欺場,難得仲係街坊價,故此新宏利甚受街坊歡迎。
兩公婆是日午餐,就係碎牛粥、艇仔粥、銀芽炒麵同牛脷酥卷腸粉,無錯,係牛脷酥卷腸粉,即係炸兩嘅牛脷酥版,我都係第一次食。
艇仔粥.碎牛粥 $12
佢賣嘅粥品款式唔多,都係艇仔、碎牛、豬紅、瘦肉、魚片、皮蛋之間溝嚟溝去,一個牌十來款睇晒,除咗艇仔、碎牛、豬紅粥賣$12外,其他配搭都係一律$14,粥料甚多,非常抵食。今回我哋要咗艇仔粥同碎牛粥,相比之下,艇仔粥比較料多,豬皮、魷魚、炸米粉…,米粒爆晒花,粥底夠綿,而碎牛粥可能因為免治牛肉較為「碎濕濕」啲,所以感到料少啫。
銀芽炒麵 $6
份量足晒秤,不過銀芽肯定係偏少,可好嘅係麵條炒得唔油,幾夠味。不過,唔夠味都唔係問題,因為枱面放晒大大支嘅甜醬、辣醬、麻醬同豉油,想點撈就點撈。
牛脷酥卷腸粉 $10
貪得意,叫咗依個嚟試。一向我都鍾意食牛脷酥,既然有個牛脷酥卷腸粉,當然要試啦。好大碟,都只係賣$10,抵食。腸粉皮比較厚,而牛脷酥味帶甜,又無油炸鬼咁脆身,所以兩者夾埋無炸兩咁好食,食落好似啲腸粉包住個麵包咁。如果未試過,一試都無妨! |
|
|
Subway |
標題 : 百週年公園潛艇野餐 |
地址 : 尖沙咀麼地道67號半島中心地下35G號舖 |
地區 : 尖沙咀 |
|
現時分數:
|
日期 : 2012-01-20 14:53:08
哩個星期日,出咗尖沙咀返崇拜,順理成章就晌尖東嗰邊食晏,太太問食咩好,見天氣唔錯,不如嚟個「野餐」,就去咗尖東百週年紀念公園,食潛艇三文治,因為對住公園就有一間Subway,雖然唔係真係晌郊外,但置身公園內,稍加幻想,享受著和暖陽光,感覺幾舒服。
Subway都算係我幾鍾意幫襯嘅三文治,因為包款多(意大利白面包、全麥、意大利甜心、蜂蜜燕麥),主餡選擇又多,如吞拿魚、肉丸、日式燒雞肉、海鮮蟹肉……等等近廿款,而配料同醬汁又可以按個人喜好隨意揀,多少都得,非常有彈性,況且,佢哋食材嘅質素一向都唔太差,所以,間唔時都會幫襯吓。
太太唔好汽水同佢啲美式曲奇,所以無加錢轉套餐,只係齋買包,而飲品另外晌附近間百佳買,多嘢揀又抵啲,都係幾步腳啫。
特製意大利潛艇堡(Italian BMT) $35
原本打算一個要意大利甜心Parmesan Oregano麵包,另一個要蜂蜜燕麥Honey Oat麵包,可以試足兩款兼比較吓,點知蜂蜜燕麥啱啱賣晒未返貨,故此,只好兩個包都係意大利甜心麵包。我見佢單張就譯意大利甜心麵包,鋪內水牌就譯意大利香奶酪,總之都係同一樣嘢,落單後店員先為麵包烘一烘,所以食起上嚟暖暖哋,包身鬆軟,不過就唔係好覺有巴馬臣芝士同奧勒岡嘅味。而主餡料有辣肉腸、沙樂美腸同火腿,口感層次豐富,各有不同味道。配料方面,揀咗蕃茄、青瓜、洋蔥、生菜同少少黑橄欖,再配上較低脂嘅蜜糖芥辣醬汁。幾款肉餡,伴著大量蔬菜,加上洋蔥嘅生辣、黑橄欖嘅漬鹹、同醬汁帶嚟嘅蜜甜,細嚐之下,味蕾一試多重衝擊,一份很討好嘅潛艇。
公司潛艇堡(Subway Club) $35
公司潛艇堡嘅主餡料有火腿、火雞同燒牛肉,配料雖未能一網打盡要晒,都要求咗唔少:蕃茄、青瓜、洋蔥、生菜、青椒(因為太太唔太好黑橄欖,所以呢個就唔落),醬汁要低脂蛋黃醬,太太至愛嘅醬汁。材料非常咁豐富,一次食到幾款肉,蔬菜又夠新鮮,太太話齋,啖啖都係滿足!
|
|
|
嘉韻酒樓
|
標題 : 點心伴燒鵝 |
地址 : 深井青山公路38號海韻花園商場地下 |
地區 : 深井 |
|
現時分數:
|
日期 : 2012-01-13 16:54:17
一大棚教會友人行山,路線係元荃古道,由荃灣出發行到去深井,條路唔難行,有幾段望住成個荃灣區、青馬大橋……,景觀幾正,到達之後食埋午餐先散水,不過,有部分人唔係行開山,令到整隊人嘅前進速度比預期慢,所以就由原本食晏變咗飲下午茶,都無所謂嘅,係捱吓肚餓啫!
深井有好多食燒鵝名店,不過,揀咗「嘉韻」係因為佢啲燒鵝都唔錯,而且,佢本身係間酒樓,可以晌度叫多啲點心食,選擇多啲,難怪我哋大概3:00pm去到,都仲有好多茶客嚟嘆茶食點心。大家都實在太肚餓,落單叫半隻燒鵝先($188),然後先再慢慢剔點心。
燒鵝
一入門口已見到專整燒鵝個廚房,大大座「太空爐」,燒鵝不停做,不停有新鮮靚燒鵝出,所以,我哋碟燒鵝一上枱,甘香撲鼻,油潤光澤,皮脆肉嫩相信都係基本喇,而且隻鵝唔太肥,唔使擔心一口咬落成層皮下脂肪大肥膏。仲有,鵝油鵝汁亦係撈飯佳品,雖然可能膽固醇會高啲,但少吃多滋味,偶爾食啲,無事嘅!
點心
因為依餐有啲專誠嚟食燒鵝,點心變得有啲其次,所以,都係各人隨心點,剔吓剔吓結果都叫咗成枱嘢,有香煎蝦米腸、特色流沙包、煎釀虎皮尖椒、蟹籽燒賣皇、泰式酸辣鳳爪、海蜇燻蹄、胡椒豬肚、特長春卷、薑蔥牛柏葉、千層馬拉糕、嘉韻蝦餃皇、潮州蒸粉粿、順德鯪魚球、鮮竹牛肉球、醬汁蒸鳳爪,加多碟乾燒伊麵墊底。基本上,無論點心抑或小食,都唔算有咩驚喜,但師傅手功紮實,質素穩當,無咩差池。好似特色流沙包,鹹蛋黃流沙餡,甘香滑溜;泰式酸辣鳳爪,酸辣醒胃,鳳爪爽彈;胡椒豬肚,豬肚無燥味,胡椒香辣;乾燒伊麵也炒得乾身,唔會一碟都係油。一大班人,傾吓食吓,食到人哋熄燈落場,我哋先捨得走,哈哈! |
|
|
七喜粥麵小廚
|
標題 : 佛山鹹肉粽? |
地址 : 太子花園街224號地下 |
地區 : 太子 |
|
現時分數:
|
日期 : 2012-01-12 12:33:58
又係星期日,完咗崇拜搵食嘅時間,落到花園街,大伙兒話想食粥,不假思索,就只有想起七喜。因為晌依區,佢啲粥都幾唔錯,不過,好老實,我自己就少幫襯,一來地方淺窄,唔好坐,二來招呼麻麻,啲嘢又唔係平。但事實上,佢又確係有幾多選擇,有成三十多款,人多叫一煲(煲仔粥)又得,一個人嚟叫一碗就梗得。平嘅鹹瘦肉粥賣$18,貴嘅有款叫十三頭原罐鮑魚雙雞粥,一碗賣成$450,唔知真係有無人叫呢?
鹹瘦肉粥 $18
我就真係平平哋叫咗碗鹹瘦肉粥,下吓火。粥底的確綿滑米香,不過,近乎有味白粥,因為少料到極,鹹瘦肉得嗰3、5、7條。
佛山鹹肉粽 $13
何解鹹肉粽前加「佛山」二字,不得而知。但隻粽無乜餡,鹹蛋黃都欠奉,五花腩都叫有肉有膏,但我食到底下只得舊肥膏,只有食緊齊糯米點甜豉油。 |
|
|
泰昌餅家 Tai Cheong Bakery |
標題 : 難食三糕 |
地址 : 荃灣楊屋道1號荃新天地一期UG03號舖 |
地區 : 荃灣 |
|
現時分數:
|
日期 : 2012-01-05 12:29:28
舅仔返完教會,經荃新天地、如心廣場過去荃灣西站,全由天橋連貫,非常方便。行經晌荃新天地一期嘅泰昌餅家,經過之時,在門口中央當眼位,推出一系列健康糕點,放晌貨架上售賣,個子細細咁,每款$5($12 / 3件),一共有7款:馬豆糕、紅豆糕、西米糕、麥米花生糕、芝麻糕、馬蹄糕、桂花糕。
本身對泰昌嘅蛋撻無話太好,只感覺係「肥彭」效應,並唔覺得非常好食。舅仔知我份人貪新鮮,所以就買咗其中三款俾我試一試:桂花糕、芝麻糕、麥米花生糕。包裝外型幾討好,一打開蓋就可以食,方便到極,感覺又衛生。不過,味道、質感真係可以用差強人意來形容,味道很平淡,無個性,桂花味唔香,芝麻味唔濃,麥米有咬口,但花生未熟透,整體糕身質感亦好硬實,一啲都唔好食。都係食番佢啲蛋撻同沙翁穩陣啲!
雖然仲有4款,不過,都係無乜信心試喇。睇吓有無人試過,俾俾評語,會唔會係小弟咁唔好彩食正最唔好食嗰3款?
|
|
|
新聚寶素食 Tresure Vegetarina Restaurant |
標題 : 閒話家常齋菜宴 |
地址 : 太子彌敦道749號地庫 |
地區 : 太子 |
|
現時分數:
|
日期 : 2012-01-04 12:24:51
又係隔一段時間就搵阿舅母食飯嘅日子,見見面閒話家常,舅母對食無乜要求,唯一係要食齋,佢係信佛之人,殺生故然唔會,連五辛都唔掂,所以唔係間間素食館都得,穩陣嘅梗係搵番齋菜館。之前都試過常悅素食、六榕仙館、三德、功德林幾間,都甚有水準,但小弟貪心想試試其他,唔想翻兜,所以,依次就選中新聚寶,一來晌太子又近地鐵,交通方便,其次食評對店舖評價都唔錯,好幾篇更係值得參考。
店子晌地庫,才7:00pm,一入內估唔到都幾旺,入面嘅位已經坐滿晒,係得番近門口一列枱,不過坐落無耐,餸菜都未點,都坐滿埋。環境屬於老派舊式齋鋪格局,平實樸素。
枱上一個散叫用嘅大菜譜,另一個細嘅係套餐餐牌,翻開內容簡單易明,一整頁都係多款「自選晚飯套餐」,ABC餐係由2位到6位用嘅,價錢由$168去到$468,包招牌靚湯,精選小菜同粉麵飯;另外DEFG餐係一圍圍嘅素宴,8-12位用,特價由$888至$2,080,不過揀半席都得,價錢就一半多少少。跟住就一頁一頁咁,羅列晒套餐可揀嘅小菜同粉麵飯,天天新款招牌靚湯,再加多頁就係大廚嘅6款推介。
我哋4個人,咁就簡單啦,就B餐(4位用),招牌靚湯例窩,精選小菜自選4款,粉麵飯就自選1款,仲送埋糖水,份量都唔細添,真係點止4個人丫,5、6個人都夠食呀!個餐要$338,好似$5位茶錢,$10碟花生,加埋一,四舊水落樓,食到飽飽。
未講食,先講人,一眾侍應唔係後生細仔,都係中年人士,但手腳之快真係唔可以睇少,因為上菜速度超快,落好單無耐,澎澎聲就上晒啲嘢,除咗糖水之外。
金粟海底椰湯
招牌靚湯雖然日日唔同款,但係指定嘅,無得揀,好似今日係星期六,就係金粟海底椰湯。話叫例窩,其實好多,滔完第一輪,仲有成半兜湯可以再添。始終係素菜,無肉無骨,味道難免稍為清啲,但感覺幾潤。
桂花炒素翅
素翅幾好口感,真翅一樣,色澤金光晶瑩,桂花就係炒蛋白粒,內裡仲夾雜咗素火腿、銀芽,食落幾爽口。就算唔點醋,都OK喎!
三菇浸時蔬
唔係浸時蔬喎,變咗蠔油炒。依期時蔬係白菜仔,而三菇分別有草菇、磨菇、雞脾菇,雖然係素蠔油,都幾香,而且啲菇菌幾鮮甜。
五柳炸仙斑
齋菜中嘅經典菜式,仙斑做得好有睇頭,大大條。「魚皮」炸得鬆脆甘香,又唔算厚粉,而裡面嘅芋頭蓉粉香軟糯,蘸點五柳酸汁,中和一吓油膩感之餘,食落更醒胃。
竹笙鼎湖素
好清淡嘅傳統素菜,材料落得幾足,有竹笙、冬菇、草菇、蘑菇、珍珠筍、木耳、銀耳、髮菜,炒埋一大碟,味道較為淡口。據知依個素菜源於肇慶鼎湖山,做法大概以多種素材,煮好依序排列成整成12層包山形上碟,所以取名叫鼎湖素。雖然今日依碟就未有包山咁嘅形,但份量夠晒多。
海鮮荷葉飯
扮海鮮嘅成員有「蝦」同「蟹柳」,再加埋雜菜、素火腿炒香個飯,再以荷葉包裹焗一焗,奈何,無乜荷葉香,而且飯粒炒得太乾身,認真麻麻哋,只係夠大份。
渣喳
糖水係送嘅,似西米紅豆沙多過係渣喳,味道本身已經普通,最弊係少少煲燶,雖然好輕微,都入到口嘅,只係感覺差咗少少啫。
同舅母閒話家常又一晚,唔知幾時再約食下餐。老人家都呻咗好多屋企嘅難處,同仔女相處嘅問題,表面以為佢哋一家幾好,真係家家有本難唸的經,希望佢哋一家平平安安,心寧安好啦!
|
|
|
Venchi Chocolate |
標題 : 喧賓奪主賣雪糕 |
地址 : 尖沙咀海港城海運大厦G樓A16號舖 |
地區 : 尖沙咀 |
|
現時分數:
|
日期 : 2011-12-29 16:16:28
「來自意大利的朱古力品牌,擁有過百年的歷史,堅持只使用天然原料,對品質、新鮮度以及專業度的要求非常嚴格。除生產朱古力,亦提供Gelato意大利雪糕,以高品質食材製造,本地製作,並無添加氫化植物油精、油脂、調味劑或合成添加劑,含有更低的卡路里,比傳統雪糕低脂,而且採用100%純天然成份,健康可口。」有個團購咁樣介紹間鋪,已經有一定嘅賣點,而且,Venchi之前晌上環信德中心開過,食評亦有番咁上下口碑,至少都唔會係二打六。再者,更大嘅亮點係,團購價一句講晒,抵到無譜,$16 / $20 / $38享受到雙球 / 三球 / 兩杯各三球嘅意大利雪糕,第一時間網上即時短訊埋啲老友入大飛啦,齊齊買「兩杯各三球」($38),平均一杯三球先$19,仲有仲有,有成半年限期去到下年二月中,真係抵擋唔到嘅吸引架。
乘住一次去開尖咀食晏,專燈留肚過嚟Venchi食雪糕當飯後甜品。其實佢主打賣手做口味獨特嘅朱古力,副業賣Gelato意大利雪糕,所以雪糕櫃只係佔整間鋪右邊嘅一角落,仲係得六款口味,反而雪糕好似當旺緊,依家啲人嚟買雪糕多過買過朱古力。之前做推廣已經係買朱古力就送雪糕試食裝,依家加埋以團購催谷下其手製雪糕,再者,相信都較多人揀$38買兩杯各三球雪糕嗰款團購,所以銷路一定比正常快多好幾倍,如果晏嚟,隨時有一兩款沽清,我依日都係三點左右到,都無咗兩款味咯。
我就揀咗焦糖布甸+特濃黑朱古力+榛子,太太就要草莓+特濃黑朱古力+榛子,香桃同檸檬就賣晒。兩杯同樣都幾夠份量,佢本身三球裝標明120g,雖然小弟無秤過,但見店員都無就住手,一杯三球疊到滿,頗墜手。至於質感,四款雪糕都做到口感細滑輕柔、味道突出(除咗焦糖布甸味)。
焦糖布甸味
個人覺得無乜焦糖味喎,反而重奶味,似牛奶布甸嗰種味,小弟都好鍾意焦糖丫嘛,所以食落依款焦糖布甸都有啲失望。
特濃黑朱古力味
濃黑嘅外表,果然名不虛傳,黑朱古力味超濃厚,就依點已經夠晒殺食;仲要滑溜非常,唔會硬崩崩,個雪糕球好似要對大家講:我很醜,但我很溫柔!
榛子味
真係好似食緊原粒榛子嘅味道,就算一小啖,都帶出香濃榛子原味,被人覺得食出真材實料、無添加嘅感覺,活活就似係將粒榛子放入口度。
士多啤梨味(草莓)
色澤晌咁多款中最鮮艷搶眼,味道做到果香鮮活無造假,甚有天然成份嘅印證,最衰就無咗香桃同檸檬味,否則生果系列中就可以細膩咁比較一下。 |
|
|
Levain |
標題 : 高質.超值.抵食 |
地址 : 中環鴨巴甸街39號 |
地區 : 中環 |
|
現時分數:
|
日期 : 2011-12-15 13:57:25
中環蘇豪食嘢出名講質素,今餐晏仔食到好嘢有賴同學仔I,上之同佢去完Graham Café,今次再趁齊齊星期六要返工,大家老婆已有飯腳,就相約兩支去嚟半山鴨巴甸街搵食,地點提議由I兄決定,事緣佢好耐之前試過仍晌佐敦開鋪嘅Levain Bakery啲麵包,覺得好食,甚有歐陸水準,見佢再出團購,仲係成個餐,雖然搬咗上半山,仲啱,因為我晌中環返工,佢晌上環,夾啱星期六收工一齊去食,唔使搭多程車,仲好呀。
$22享用依個三文治、沙律套餐,包埋冷熱飲品,堂食或外賣都得,散價計番可以高達百幾蚊,真係超抵。加上之前I兄已試過佢啲包,深信咁嘅價確係超晒值。仲有,Levain賣嘅係歐陸包,依家佢開晌半山,明顯係專攻中產兼外國客,而且仲夠膽拍住賣丹麥方包賣到開巷嘅博洛尼亞隔離,敬佩佢對自家製嘅麵包有高質嘅自信!
晌斜斜嘅鴨巴甸街,Levain鋪面好易認,大大個鋪名連商標,白底綠字。一入內,左邊係一排五層麵包架,擺放各類麵包嘅滕籃置放其上,全部有晒透明膠蓋遮住,保持衛生。右邊一排約4、5個面壁嘅吧位,放有高腳凳,比較啱啲一、兩個人嘅客。而中間偏右就放咗10張枱椅,算幾鬆動,再入啲就係收銀同凍櫃,放有幾款三交治樣板,裝修非常之簡潔。
點好包款同咖啡,收銀後就係廚房,師傅就晌裡面即做麵包。此時,參觀吓佢賣嘅包,真係好多較少見嘅款式,尤其一啲樣貌粗糙嘅歐洲麵包,一室麵包香,睇都會係樂趣。
煙肉沙律
先嚟兩份沙律,正價要$48,但無話團購就將貨就價,份量已睇出店方誠意。橢圓形大碗,載有紅葉生菜、車厘茄、火龍果、麵包粒同一捲煙肉,個組合感覺幾特別。而生菜冰爽帶少少甘苦,車厘茄鮮甜,麵包粒唔係隔夜貨烘脆嗰隻,而係鮮麵包粒;最有趣係捲煙肉,好多時食沙律都係落煙肉碎,但依個沙律就原條一捲呈現你眼前,誓而表明佢係童叟無欺,煙肉唔太肥,咬落仲有啲甜品,頗特別,店員話係糖漬過,真係有啲心思呀!
包款共有6個選擇,全部晌晒凍櫃,一目了然,有晒樣板,唔怕揀錯。包括:煙燻三文魚忌廉芝士配60%裸麥芝麻包、法式長棒三文治、黑椒煙燻牛肉車打芝士配六穀包、水牛山羊芝士沙律配蕃茄古老也芝士包、巴馬火腿布里芝士白松露油配意式脆皮包、薯仔蛋沙律配煙燻三文魚牛角酥。與其無乜邊款包偏好,自不然會揀較貴嗰兩個包款,我就揀古老也芝士包,I兄則揀意式脆皮包,不過話就話各有各揀,但大家都想兩款試晒,當然包到就將佢哋一刀兩斷啦。
水牛山羊芝士沙律配蕃茄古老也芝士包(Goat cheese, Buffalo cheese salad on Tomato and Gruyere cheese bread)$69
古老也芝士包,跟「樣板」一樣,大大個麵包,唔係話樣板只供參考咁流。深啡色包身,包面好脆,一咬咔嚓應聲脆裂,不過唔似港式或日式包咁,軟軟熟熟,質感會比較硬同「饞口」,食唔慣歐陸包嘅人就覺得唔好食,相反,依啲包就會俾人覺得有麥香,又好咬口;話說回頭,個包嘅芝士味就未係好明顯。之不過,餡料就無得頂,大大「pat」水牛芝士,再加新鮮蕃茄片,加咗一啲香草醬,再放有大量火箭菜(或者叫芝麻菜),最面加數小片山羊芝士,頂到個包高一高,一啖咬落都唔係易事,但啖啖都充滿田園氣息,隱隱又食到山羊芝士嘅淡然羶香,好正!
巴馬火腿、布里芝士、白松露油配意式脆皮包(Parma ham, Brie cheese, White truffle oil, Arugula and tomato on Ciabatta)$75
意式脆皮包同樣是外層脆口嘅包款,不過,麵心就較為軟熟。顧名思義,依款包嘅餡有巴馬火腿、布里芝士、白松露油,再加入大量火箭菜,雖然巴馬火腿唔多,但足以帶起成個包嘅鹹香,布里芝士柔軟非常,芝士味道感覺屬於溫和一種,所以唔會搶走白松露油嘅香氣,況且,松露油落得一啲都唔輕手,包底都濕潤晒,個人覺得個配搭幾好。
雖然今次未有揀到酸種裸麥包試食,但對此仍帶著盼望。始終店子以自製天然酵母做麵包,製作具有獨特質感同酸味嘅歐陸包,係香港少有,值得繼續支持!
鮮奶咖啡
雖然餐飲有多樣選擇,如意式泡沫咖啡、特濃咖啡、朱古力咖啡、蜜桃汁、芒果汁,甚至熱柚子蜜,但我哋兩個都係揀咗鮮奶咖啡,貪其香得嚟唔太濃,又有奶泡嘅柔滑感。雖然,杯鮮奶咖啡無拉花,無整色整水,但同樣有質素,醇香幼滑,值得細意品嚐!
可能有啲人都會覺得佢啲包都幾貴,不過,佢哋都有個每週精選(Weekly Special),好似我幫襯嗰日,每週精選係法式長棒三文(BLT),配料5揀2,包一杯果汁或咖啡,零售價都係$46,可以一試天然酵母做麵包做嘅歐陸包,材料又夠新鮮高質,不妨「爬爬山」一試!
I兄對麵包好有研究,較諸於我,我啲飲食練歷只係皮毛,得個吹字,所以一路食,一路聽I兄分析啲包,又講吓啲麵包故事,都幾有得著!
|
|
|
越僑快餐店
|
標題 : 漲爆越式外賣 |
地址 : 中環威靈頓街76號地下 |
地區 : 中環 |
|
現時分數:
|
日期 : 2011-12-14 16:27:23
少有哋晌公司叫外賣,因為公司有包伙食,為咗荷包慳番啲,通常同事都會食「公司飯」,不過一年總有啲日子係例外,遇上同事因病返唔到工,又或同事請咗大假,唔齊人我哋就暫停福食就叫外賣。依日就係同事攞咗假,所以就決定食「越僑」(越南嘢)。
基本上,越僑每日特別供應5款套餐,價錢由$38-$42,包一般熱飲,要罐裝可口可樂加$2,椰汁龍眼冰加$6,鹹檸七加$4,都唔係平架,外賣自取就減$2,不過無謂為慳嗰兩蚊跑到老遠,所以都係等佢送嚟。不過,越僑嘅送貨都準時喎,要求12:30pm就真係差唔多時間就到。
芝麻醬雞扒撈一丁 $42
同事叫咗個撈丁,加$2飲罐裝可口可樂。芝麻醬同雞扒撈丁係分開盒裝,雞扒本身幾大件,而且預先切成細件方便食用,同事話件雞扒都OK,撈丁都幾爽彈,而芝麻醬好似榴槤個特性,聞落好香芝麻味,連坐對面嘅我都聞到,但食落口又唔係嗰回事,嗒落芝麻味又唔係好重咋喎,真係奇怪。
香燒沙嗲雞球飯 $38
講就講係雞球,不過就似雞柳,依個都係好小事,雖然「雞球」多到不得了,鋪滿晒成盒飯面咁滯,再加番塊青瓜同蕃茄做裝飾,可惜沙嗲味道一般,有沙嗲味,不過唔算得香,屬中規中矩啫。配飲熱檸茶,消消滯!
|
|
|
Uncle 4 |
標題 : 有一試,無下次 |
地址 : 尖沙咀港景匯商場地下119號舖 |
地區 : 尖沙咀 |
|
現時分數:
|
日期 : 2011-12-13 17:48:07
Uncle 4晌尖沙咀同佐敦交界位,又近柯士甸站,食完可以搭西鐵走人,幾啱自己路線,所以就買咗佢個團購當一餐。個團購係用$19食到一個午餐,包湯、餐包、主菜同餐飲(冷熱同價),而主菜有成8款選擇(露荀龍脷配炒飯、黑椒牛仔粒配炒飯、川椒龍脷配炒飯、泰式豬頸肉配炒飯、西班牙海鮮飯、帶子鮑粒炒飯、香草煙肉蜆仔天使麵、三文魚蟹籽天使麵),睇落好似幾正幾抵咁,又係衰貪平,結果就係有一試,無下次。
因為個團購要求訂位,所以一早訂家星期六晏晝,就番老婆收工一齊去食。Uncle 4在港景峰商場之內,不過個商場人流少得可憐,近乎無乜客,好靜吓。而餐廳一眼望落去都幾大,樓底幾高,昏暗燈光,有少少氣氛,可是徒有軀殼,我哋晌門口等安排入座,但無人理,侍應望你一望,又行開咗,其實所見都係約有五乘客,不過,就好多吉枱未執拾。見咁嘅情況,只好自行搵位,坐低之後,再表明來意,兩份團購,就改送來另一個「精選推介」餐牌。但無論侍應A或B,全程都黑口黑面,服務態度好一般,對客人愛理不理咁款,落好單之後,餐具就散亂咁擺晌枱面,真係完全趕客行為。
餐湯.餐包
餐湯有中有西,我哋各叫一款試吓。中湯係南瓜煲豬骨(個女店員話呀),查實只係普通無味例湯,唔見南瓜,反而青蘿蔔就見到舊;西湯係羅宋湯,好飲過中漡,起碼夠味濃郁。餐包唔新鮮,有啲乾,佢烘一烘變脆啲,都可以遮吓醜丫。
香草煙肉蜆仔天使麵
太太揀嘅主菜,首先賣相差,所謂香草,就係面面嗰一撮蕃茄香草醬,香草味又確係幾勁,但跟碟嘢有啲分離。天使麵炒到似炒米粉咁,煙肉同蜆仔已經唔多,又青椒又洋蔥,真係似炒米粉架!
西班牙海鮮飯
完全係一個自己攞嚟嘅錯誤選擇,幾十蚊點會有咩海鮮丫,結果只有怨自己一句抵死。炒飯底?唔係,我覺得只係加咗啲蛋碎扮嘅炒飯,唔覺啲飯有炒過。所謂海鮮,有一隻青口、蝦毛、魷魚碎、一小舊炸魚柳、多舊「國貨」蟹柳,配上鮮濃汁醬,咁就係A貨西班牙海鮮飯。「國貨」蟹柳,無錯,我只可以咁形容,因為咬落一舊粉,無味,好似食緊上海年糕咁,結果,成碟飯食剩啲蟹柳囉。
凍啡.熱檸水
唯一無乜負面評語嘅嘢。如果連熱檸水都有問題,咁就真係差到無譜。
依度賣嘅一般午餐,都係三十多左右,包湯包嘢飲,所以依個團購午餐叫價$46,有啲抬高價之賺。當然,$19另原價加一,都仲係好平,但唔講得叫抵囉,因為唔好食之餘,俾面色你睇,又無咩服務可言,仲要收番加一。而且,團購條款寫明另收原價加一服務費$4.8,但個店員一起手已寫定$10單(我哋兩份團購)俾你找數用,屈定你俾埋齊頭,尾數當貼士。雖然,就算係寫$9.6,我都唔會要你找返4毫子俾我啦,但佢咁樣好似有啲「老馮」咁!佐敦區求其搵間茶記都好過佢呀!
|
|
|
澳門大豐新翠苑餐廳
|
標題 : 一粒粒嘅金沙(骨) |
地址 : 太子花園街228號地下 |
地區 : 太子 |
|
現時分數:
|
日期 : 2011-12-13 10:27:03
又係完咗崇拜搵飯食嘅時候,落到花園街,其實都無咩心水,同個弟兄見到依間「澳門大豐新翠苑餐廳 」好似幾旺,即管走入去一試。鋪內呈長形,地方有啲淺窄,相反樓底幾高。因為都係填飽肚食餐晏,食完就鬆人,所以,唔使點睇餐牌,唔使多諗,就快餐啦,A-H共8款,都係$32-34,包無味精靚湯及咖啡或茶,真係比去連鎖快餐店仲抵食,怪唔之得幾多人幫襯!
朋友D要咖喱豬扒飯,小弟就要個醬燒金沙骨飯,大家都飲中湯,因為係蓮耦鱆魚煲唐排,若要西湯只不過係忌廉湯,感覺老火中湯有份量啲。
咖喱豬扒飯 $33
一如往常港式咖喱飯,咖喱豬扒同飯分開上,但勢估唔到兜咖喱豬扒多到滿,雖然下底墊咗少少薯仔,不過豬扒我估都有成兩大塊,仲切條方便食。因為夠多豬扒,我就好唔客氣拮咗一件試一試,質素如何,掂喎!豬扒鬆軟,肉質腍滑,而咖喱少少辛辣,但頗香,而且唔會水汪汪咁稀,撈飯佳品。杯凍奶茶,朋友話唔錯,滑就唔滑架喇,但幾夠茶香!
醬燒金沙骨飯 $33
點依個飯,源於好奇睇吓佢咩叫做醬燒金沙骨,嘩!嚟到同自己心中所想有好大反差,當然只係講緊個買相啫。腦海裡嘅金沙骨通常都係一條條,眼前所見就一粒粒似排骨,醬燒諗住個樣會乾身啲,似燒烤類,實情落獻打晒醬汁咁款。幸好,味道又幾好嘅,味道酸酸甜甜,醬汁幾濃郁,排骨唔韌一咬離骨。不過,與其叫「醬燒金沙骨」,不如叫番做「糖醋排骨」貼切啲啫,因為無論個樣,抑或味道都真係似糖醋排骨多啲。
凍咖啡
我本來要熱咖啡嘅,個阿姐猛咁叫我試吓佢哋啲凍咖啡,係招牌嚟,較為特別啲架,個阿姐硬銷到咁,我又姑且信佢一次。凍咖啡嚟到,比坊間,又確係有少少唔同。其實唔係咩泣鬼神咁特別,只係晌咖啡面再灑咗撮咖啡粉,飲時先搞杯底嘅冰,等咖啡夠凍,飲咗一陣,啲冰溶多啲,先至大搞,令杯面咖啡粉都溶入埋,保持濃度,感覺咖啡味就唔會稀咗。確實,咁樣又真係有啲效果,唔使好似「灰狗」搞咩茶味冰粒咁煩,又要收得你貴、服務又差喎!
你話佢啲嘢好正又唔算,比一般又高啲,真係要俾分,就「好食」與「一般」之間。 |
|
|
藝術茶座 Museum Cafe |
標題 : 週六食環處 |
地址 : 尖沙咀梳士巴利道10號香港藝術館1樓平台 |
地區 : 尖沙咀 |
|
現時分數:
|
日期 : 2011-12-12 17:33:49
太太頗為喜歡嚟依間「藝術茶座」食晏,主因係鍾意佢個環境,大露天茶座式設計,因為位處香港藝術館1樓平台,較少人會行去嗰度,成個平台都係放七、八張枱,開揚又唔嘈雜,一邊對住半島酒店,一邊對住文化中心,再另一邊對住對面海中環景。所以,佢久唔久拉埋同事嚟食晏,尤其晌星期六下晝,長週之時返半日,可以攤抖耐啲,食完唔使趕返公司,仲可以坐晌度睇吓書,嗒住杯咖啡,望吓「海景」,感覺好寫意輕鬆,多少當依度係城市中嘅小綠洲!
依個星期六,拉咗我嚟陪佢食晏。除咗主餐牌,都有提供午餐,「午市精選」提供一個主菜加一杯餐飲嘅簡單午餐,共有6款選擇,久唔久會轉款,由$50-$85,另收加一服務費,都咪話唔貴,因為講真,主菜睇勻又唔算叫好有特色或者特別吸引,故此,唔知係咪咁,就以往所見都唔算多客。
香煎豬扒配士多啤梨汁 $50
我哋兩個主菜都係跟意粉,而意粉類別係扁意粉,煮得幾有咬口無過腍,配菜有西蘭花、椰菜花同甘筍仔,由於意粉同配菜都無乜經醬汁煮過,稱得上白烚咁滯,味道偏淡,唯有靠主菜嘅汁醬。主菜香煎豬扒配士多啤梨汁,豬扒只得一塊,但頗大塊,無太多調味,簡單香煎,又確係煎得幾香幾透,色澤金黃,不過咬落肉汁尚可。至於個汁,淡粉紅色,帶有粒粒士多啤梨,唔算太討好,味道亦未有咩驚喜,因為士多啤梨味比較弱,而且略為甜,個人覺得唔太夾豬扒。
香煎西冷牛扒配黑椒汁 $72
一樣嘅扁意粉,一樣嘅配菜,只係換來香煎西冷牛扒配黑椒汁。薄薄一片嘅西冷扒,真係幾薄吓,都係得一塊,煎得有啲乾身,肉汁欠奉,不過,又唔嚡喎。黑椒汁永遠都係牛扒嘅好朋友,黑椒味濃,辛辣,叫做為碟平淡單調嘅意粉添啲色彩。老老實實,賣$72確係有點貴,跟連鎖快餐店質素唔係高好多。
咖啡.茶
太太要咗杯紅茶,係Lipton茶包;相對哋,要咖啡就好啲,係即磨咖啡,比起只用茶包嘅紅茶有誠意啲。再者,咖啡芳香馥郁,我就鍾意比較奶味重,一小罌牛奶任我斟就合我心水,可以斟多少少。不過佢提供嘅糖包就有啲唔專業,雖然有幼沙糖,有啡糖,但牌子好雜。
食物質素一般,所付出嘅價錢真係覺得俾晌個環境度,食環境多過食佢啲嘢。平日食晏匆匆忙為填肚,嚟依度匆匆食完就走,真係好嘥。所以,週六收工先晌藝術茶座打打躉,無論初夏抑或初秋我都覺得係好時節,暖和嘅陽光或微涼嘅清風,同樣叫人舒泰醒神。都係唔好飲咖啡好,可以「恰」番陣都不知幾爽!
|
|
|
麻酸樂米線專門店 Marsino Expert Noodle |
標題 : 大碗米線好「襟」食 |
地址 : 荃灣荃灣楊屋道18號荃新天地二期UG60號舖 |
地區 : 荃灣 |
|
現時分數:
|
日期 : 2011-12-10 16:55:48
團購出到成行成市,感覺有啲爛,所以依家買團購都會慎選,尤其食肆嘅,以食評做參考已經係指定動作,再者,睇佢有無太多規矩。今次睇中「麻酸樂」,一來食評有一定數量,而且偏好居多,以$25當$50現金用,除咗唔可以叫特價米線套餐外,其他乜都得,大可嘆盡地道米線同一啲風味小食,其他條件限制又無乜,唔使按時按候,唔使預早訂位……絕對值得買嚟傍身,反正荃灣區經常要過去,唔使擔心用唔著。
依個星期日,跟太太返完佢教會,就過嚟幫襯。荃新天地一期成日行過,因為穿完荃新天地再過如心廣場搭西鐵,荃新天地二期就少啲,不過間時都有過嚟,一來上層有戲院,二來依邊都有唔少食肆。而麻酸樂位置有啲啲偏,係偏埋一邊,但唔難搵,兜個圈就搵到。裝修簡潔,淺啡配白,枱凳排得頗為闊落,唔侷促,幾好坐。人手較少,服務變得慢咗啲。
米線選擇好多,13款指定米線一人套餐,$35-$39,另有4款特價米線套餐,都只係$27-$29,湯底(麻辣肉碎湯底、酸辣湯底、鮮茄味菜榨菜湯底、金銀蛋芫茜湯底、清雞湯底、有機豆乳湯底)同麵底(米線、米粉、上海拉麵、紅薯粉)都有多款選擇,送自選餐飲一杯,特飲都只需要補番差價。如果指定嘅一人套餐唔啱,佢又有自選米線,湯底、麵底、配料逐樣揀,俾你揀到啱。最近仲推介緊一個喇沙套餐,一碗喇沙米線、一份小食、一杯熱飲(翠梅綠茶或菊花杞子蜜),特價賣$44咋,好吸引。此外,仲有二人餐、12款特色惹味小食,真係有好多選擇。
因為有$100價錢晌手(兩張團購券),自不然叫得疏爽啲。太太揀咗個米線一人套餐「#4素菜雞湯米線」,餐飲要熱檸賓,需補$3;而我就一向都貪新鮮鍾意試新嘢,所以揀咗個喇沙套餐,餐飲揀菊花杞子蜜;然後要多一客蒙古大漢雞翼,先湊夠數,補多$1,所以,依餐真係食得我哋好鬼飽!
素菜雞湯米線
太太覺得雞湯較普通,轉咗試吓金銀蛋芫茜湯底,要番米線。份量唔使多講,有相為証,非常大碗,米線同餸料同樣俾到足,由於係金銀蛋芫茜湯,所以湯本身已帶有鹹蛋、皮蛋、芫茜、腐竹、芽菜,而素菜則有蜂巢豆腐,紅蘿蔔、雞脾菇、南瓜、冬菇、金菇同時蔬,所以,雖然只得素菜,但好似食極都有咁。湯底幾香芫茜味,令依個較為清淡嘅素菜米線,添份幽香味,味道無咁「寡」。再者,餸料又唔太差,大部份蔬菜都係幾新鮮、清甜。
喇沙米粉
個素菜要米線,咁個喇沙就順理成章要米粉,有得比較吓丫嘛。米線大抵同出面食到嘅差唔多,口感爽彈,而米粉亦係爽身而幼滑,基本上麵底方面都無咩差池。喇沙個靈魂絕對係個湯底,加入大量馬來西亞香料同椰奶煮成,據講有蝦膏、芫荽粉、南薑、香茅、黃薑粉……等十多種材料,我未有咁神級食得出用咗咩材料,但橙紅色嘅湯底夾雜多重香味確係幾唔錯。不過,配料就削咗啲,雖然跟介紹一樣有齊豆卜、時蔬、芫茜、腐竹、芽菜、花生碎,但份量就偏少。
鹽酥一口雞
米線同個米粉都係素,咁跟喇沙套餐個小食「鹽酥一口雞」,就係最好嘅額外配菜之一。雖則係跟餐小食,但一啲都唔少,都有成6、7件;話就話「一口雞」,女士都要分兩啖食,幾大粒吓。炸得酥香無燶,炸漿薄脆,唔油膩,肉質都嫩口,但好似無乜點醃過,無乜味,所以,隨雞附上嘅八味粉就大派用場,查實唔係好知八味粉係乜,但感覺上似落咗淮鹽啫。令我想起曾經晌台中食過一檔小食,都係酥炸雞粒,但就落梅粉,食落更醒神好味。
蒙古大漢雞翼
一客4件大雞翼,雞翼件頭比較大隻,所以叫做「蒙古大漢」。雞翼炸好後,撒上辣粉同黑椒碎,簡單得嚟夠晒惹味,至重要係雞翼炸得夠脆,又唔乾身,夠大隻所以啖啖肉,肉汁又夠多,真係幾正。
熱檸賓.菊花杞子蜜
熱檸賓,唔使多講,港產發明,要向多計、多諗頭嘅港人致敬。菊花杞子蜜,原來係即沖茶包,幽幽菊花香,加咗蜜糖沖調,滋潤得多,加上菊花同杞子有清熱、明目、抗衰老嘅功能(網上資料),總好過次次都奶茶咖啡啦!
|
|
|
豆腐主義
|
標題 : 型格在於包裝 |
地址 : 荃灣川龍街112號 |
地區 : 荃灣 |
|
現時分數:
|
日期 : 2011-12-09 17:47:10
天氣爽朗,梗係行山好時節啦,一行四人小弟、太太、姨仔、舅仔行城門、上針山。用咗唔係好耐時間,就行完城門、上完針山。到針山之巔,一邊沙田景,一邊城門全塘景,幽幽涼風,爽呀。出咗身汗,返到荃灣,自然有啲餓,食個下午茶先返歸啦。
是日公眾假,3:00pm嚟到豆腐主義,人多擠逼得緊要,都好彩等咗唔耐搵到4個位。一室黑白型格裝修,中英文店名改得有型,有別於一般傳統豆腐鋪,電腦機印點菜單,數量、種類一目了然,雖然座位係逼咗啲,但以豆腐鋪嚟講,可接受啦,唔通食到「印印腳」,慢慢hea咩!一坐落,目標係下午茶餐,一共有13款食物配豆腐花或豆漿,$14-$22,差距都好大,改鹹豆花或鹹豆漿加$3,改黑豆漿加$2,2:30-6:30pm有供應。
F餐 - 即制脆口粢飯 $15
我哋叫咗兩個F餐,一個配熱豆腐花,另一個配熱薑汁豆腐花(+$3)。粢飯紮得幾夠實淨,糯米黏糯,加埋肉鬆、香脆油炸鬼,都叫幾好喎。豆腐花晌現場由師傅即煮即撞,亦係此店賣點,新鮮熱辣豆腐花,果然幾香滑,豆味頗濃,都甚有水準。如果天氣再凍啲,加薑汁當然仲好,胃身丫嘛。
H餐 - 煎釀四寶 $18
又叫咗兩個H餐,一個配凍豆腐花,另一個配熱鹹豆漿。四寶有青椒,矮瓜,黑豆腐同普通豆腐,又係現場即釀即煎,咬落夠燙口,要小心食,稍為焦點係釀黑豆腐,質地比普通豆腐較實,豆味亦唔見得特別重,唯聽人講黑豆營養成份高;另外,煎釀嘅魚肉也比較少,得薄薄嘅一層晌面。
鹵水雞中翼拼蛋 $12
仲追加多一份鹵水雞中翼拼蛋,有三隻鹵水雞中翼,加一隻鹵水蛋一開四,撒少少蔥粒扮得靚仔啲。雞中翼鹵得幾入味,而且幾大隻兼厚肉;反而鹵水蛋好一般,無乜味。
成個場人來人往,一枱食完又一枱客,我哋幾個都係咁,食完都「拿拿淋」走,因為都見到啲拖住細路買餸嘅師奶晌度等位。 |
|
|
彩晶軒 V Cuisine |
標題 : 雅緻茶館嘆早茶 |
地址 : 荃灣楊屋道8號如心廣場3樓301號舖 |
地區 : 荃灣 |
|
現時分數:
|
日期 : 2011-12-08 16:36:39
是日假期,照樣早起身,因為安排咗去行山。出門之時,天朗氣清,心情都輕鬆啲呀。行山目的地係城門水塘,打算行上針山,路段夠扯,景觀夠正。一行四人小弟、太太、姨仔、舅仔浩浩蕩蕩出發,不過,未行山之先,梗係要祭祭五臟廟先啦,搭西鐵嚟到荃灣西,過兩段天橋就嚟到如心廣場,食早餐(即係飲早茶)嘅地點就係彩晶軒,屬好彩集團旗下嘅酒家,之前尖東嘅彩晶軒都幫襯過,都覺得幾好,所以又試吓依間。
感覺好唔同,依間裝修型格好多,樹枝形天花燈,夠閃兼搶眼,環境高檔啲,餐具頗別緻。餐碟、茶杯都刻咗曹操《短歌行》頭兩句:「對酒當歌,人生幾何」,詩詞嘅嘢我就無謂晌度班門弄斧,只知首詩大意好似叫人最好及時行樂,啱嘅!啱嘅!活在當下,所以我哋立即「拿拿淋」點點心先。點心紙打正旗號寫住「突破傳統.非常點心」,又睇吓係咪咁堅。點心紙無分咩大中小點,但就明碼實價寫埋件數,例如:粉果係一籠有三件,清楚易明。雖則無分大中小點,但基本上都有分開唔同類別:
新派創意點心
一共有8款,單睇名字唔知有幾創意,試咗其中兩款
蘿蔔千絲酥($24/3件),跟平常見到嘅蘿蔔絲酥餅無咩大分別,食落亦唔見有咩創意嘢,唯水準不錯,蘿蔔清甜多汁,酥皮甘香。
和風鮮蝦手指卷($24/3件),睇樣唔見得有啲咩創意,咬落裡面隱約帶點日本芥辣味嘅沙律醬,再配合鮮彈嘅蝦肉,外皮香脆,都幾有啲意外驚喜。
懷舊粵式點心
有成16款,但有啲我又唔係咁覺係懷舊喎,反而仲有啲覺得係創新添,可能係自己都未聽過個名,好似脆皮奶黃南瓜仔、芙蓉脆煎糯米雞、七彩蔗汁馬蹄糕……等等,小弟係70後,但又真係未聽過依啲名,所以可能幾「懷舊」吓,一時間搞到好似變咗古老當時興口咁,故此,哩個類別揀得比較多點心嚟試。
晶瑩活剝蝦餃皇($28/4件),名字就改得幾有霸氣,而質素都相當,蝦餃外觀透出鮮蝦橙色,餃皮晶瑩嘅表現,而咬落啖啖爽彈蝦肉,活剝就可能誇張啲,但感覺到用料上乘。
香煎海味蘿蔔糕($18/3件),相對較為普通嘅一款點心,海味下得少,糕身有些硬,唯獨蘿蔔味突出。
碧綠欖菜小粉果($18/3件),澄面皮薄如輕紗,出嚟個賣相晶瑩得剔透,碧綠係翠玉瓜粒,加埋欖菜撈入豬肉,味道同質感都頗豐富。
香橙桂花馬拉糕($12/3件),顧名思義,而馬拉糕面面見到粒粒橙皮粒,雖然馬拉糕做得鬆軟,散發點點桂花香,但橙香就比較弱。
小倉紅豆煎軟餅($18/3件),外層糯米皮煎得幾香,咬落煙韌軟糯,中間紅豆味濃質感柔軟,確係幾好食。
仲有另一張特價推介系列紙仔,有7款嘢,如:油鹽水沙薑鳳爪($28/份)、黃金煎堆仔($16/4件)、帶子賽螃蟹餃($24/3件)……,都唔覺咩特別平,跟其他點心差唔多啫,不過,都點咗三款想食嘅:
潮州蒸粉果($18/3件),澄面皮比上面個碧綠欖菜小粉果厚身啲,較黏糯有咬口,餡料傳統無乜花巧,都係豬肉、花生粒、沙葛粒……等等,味道不俗。
粟米魚肚鹹雞粥($24/碗),個粥最突出都係啲鹹雞,醃過嘅雞肉帶有鹹鮮香,而粥底算綿,但米粒未夠爆花。
即製香滑蛋撻仔($20/3件),酥皮底,有蛋香,但唔夠滑,雖話即製,但嚟到都係微暖,始終唔及麵包鋪嗰啲新鮮出爐。
上面所見,我哋都食咗成10樣嘢,夠晒皮喇。以下幾類,雖然無食,但都寫出嚟等大家知吓大概仲有咩嘢,到你嚟嘅時候有個預算。
人工手拉腸粉
暫時都未見有機拉腸粉呀嘛!明顯,突出在用料,好似安格斯鮮牛片腸($30/碟)、脆皮金華蘿蔔絲腸($30/碟)……共4款,不過我哋今次少有咁無點腸粉。
嗜甜之選
估唔到咁多,達14樣之多,唔係紅豆綠豆芝麻糊一類,全部都係特色糕點,大部份仲以自選小糕點形式售賣,有奶凍、凍糕、慕絲、有甸……每款$8件,但要兩件起,可以自由組合整個糕點拼盤。
午市廚點推介
都係唔同種類唔同地方嘅小食, $18-$58一份,如松茸醬烤牛仔腩、XO醬可窩炒腸粉、蒜泥白肉、酒香豬手凍、和風秋燒茄串、燈影牛肉片……共20款,都幾有賣點,可惜要11點後先有。
特色粥粉麵飯
大概$78-$98一碟,同樣,都係用料稍精嘅粥粉麵飯,好似台南肉燥新竹米粉、黑椒牛柳絲炒稻庭烏冬、蒜香雪魚粒炒飯……共16款,同樣又係要11點後先有。
|
|
|
越南牛肉粉專門店 Pho Tai |
標題 : 濛盛盛 |
地址 : 中環閣麟街26號地下 |
地區 : 中環 |
|
現時分數:
|
日期 : 2011-12-05 11:29:45
星期六收工,原本打算一支公搵飯食,但同事突然問一唔一齊食晏,有無興趣食越南嘢,都無所謂嘅,係咁就去咗幫襯越南牛肉河專門店Pho Tai。雖然係星期六,唔係平時嘅中環,都一齊幾多人,我哋都要等咗一陣先攝到兩個位,雖則有位,但地方淺窄,真係坐得幾逼,郁吓身都驚頂親人嗰隻。
因此,我哋就快快手叫嘢。午餐分A、B、C,午餐A賣$38,B就賣$42,可以揀嘅嘢食一樣,係餐飲唔同,前者只係一般嘅港式飲品(凍飲同價),而後者就可以揀$20以下嘅越式特飲;至於C賣$52,除可揀$20以下嘅越式特飲之外,仲多一份越式小食。(P.S.原來已加價,依家A、B、C午餐分別係$42、$46、$56,每個上調咗$4。)
越式生牛肉河.越南凍咖啡
同事覺得有啲「掠水」,因為碗大湯多牛肉少,望落又真係碗就大大,湯就載到滿,河粉同牛肉就唔多。牛肉切得好薄好薄,雖然話生牛肉,嚟到都半生熟,夾兩箸就食晒。河粉比廣東式纖幼,同事話食落又幾滑溜。靈魂在於湯底,佢話不過不失,因為頗為清甜,但係唔夠濃郁。而杯越南凍咖啡,係齋啡嚟,同事嘅意見係啡味濃,唔澀,都OK囉!
香茅牛肉撈濛.熱奶茶
我碗撈濛睇落抵食啲啫,無湯無汁,香茅牛肉、濛粉,加埋其他配料都有成大半碗啦,所以睇得出有番咁上下份量。濛粉幾爽,又無黐埋一舊舊,倒埋碗魚露,撈勻啲青瓜絲、甘筍絲、花生碎、鹹魚碎,鹹鹹酸酸,口感更清爽、開胃。香茅牛肉相對上面啲生牛肉似乎好多,香茅味幾夠,不過稍嫌牛肉有啲啲嚡,但整體都覺得幾好食。至於杯奶茶,完全唔掂,唔好飲,一來無茶味,二來口感嚡,早知飲罐汽水算。 |
|
|
Petite Amanda |
標題 : 感恩!不單只有得食,仲能夠食得好! |
地址 : 中環港景街1號國際金融中心商場二期2樓2096號舖 |
地區 : 中環 |
|
現時分數:
|
日期 : 2011-12-01 15:16:38
某某國內電信公司,晌23/11嗰日買行晒報紙,請大家晌24/11美國佬嘅感恩節飲咖啡,仲大手筆咁一共派2,000杯,憑換領券就可以免費享用餐牌上任何一款咖啡一杯,又或者換張咖啡贈券(有效期至30/11),遲啲先換咖啡又得,而咖啡供應商戶就係petite amanda!
食完晏第一時同同事走過去睇睇咩環境,嘩,又真係幾多人排,不過好多人都係換咖啡贈券,換完就走,所以流量幾快。可能由朝早到依家,都實在好多人排,見到Amanda都有少少「忟忟憎憎」,加上有啲港男、港佬,一個人揸住一疊咁嚟換,心諗:唔使錢啫,唔使咁貪啩!一個店員負責換贈券兼落單,其他店員同Amanda就不停咁沖咖啡,未停過,真係辛苦晒佢哋!可昔店子係得一部咖啡機,排隊等咖啡嘅人(包括埋我哋)就越排越長。
其實,Amanda嘅法式甜餅晌開店之初,已經好有興趣想試,今趟既然咖啡唔使錢,又走到過嚟,就更大理由要幫襯佢啦!晌排隊之時,雙眼已晌個餅櫃不停掃射,一櫃共11款甜品,好像照磁力共振咁,睇樣又睇係咩味道、成份(每款都有介紹牌仔在前)。最終,我揀咗一款心水,同事又揀咗佢嘅「飛弗」,再加上一件好評如潮嘅,兩個人食三件餅,感覺有啲奢侈。
Charlotte aux Poires $40
- 晌餅櫃裡面,每一款甜點之前都有個名牌,除咗有個名之外,仲有簡單介紹埋成份,因為個名以法文相稱,睇見都未必知係乜,下面一組英文成份,至少俾人有個概念。
- 依個我稱佢為「法式洋梨慕絲蛋糕」啦,其實都可能譯得唔係好準,因為好奇之下,查過Charlotte點解,yahoo字典譯為「水果奶油布丁」,慕絲同布丁質感係好唔同,不過依啲都係題外話,邊位有識之仕不妨指教指教!
- 言歸正傳講番件蛋糕先,先講賣相,外型清新灑脫,餅面十數片梨肉,薄薄而斜切排列,令人覺得如女性般溫柔細膩。味道也跟外型相襯,名片嘅成份係咁樣註明:lady finger biscuit, pear mousse, pears,最底層有別於一般海綿蛋糕,而係用咗lady finger。不過好老實,同整tiramisu時所用嘅lady fingers口感有少許唔同,佢會好餅乾嘅質感,較硬身。但依家食到嘅,個人覺得介乎海綿蛋糕與lady fingers之間,點解咁講?因為佢整體無lady fingers咁硬,而蛋糕體外圍除咗甜,口感仲有粒粒幼沙既感覺,口感酥脆,又幾有趣,同事仲話有種嗒沙糖嘅感覺添。仲有樣嘢係小弟好欣賞個餅底,就係你睇佢橫切面就知,餅底除咗薄薄一層「手指餅」墊底,圍圈嘅「手指餅」同樣厚薄勻均。內餡加入少少果肉,再簡簡單單注滿香梨慕絲,慕絲好有梨味,而且帶有輕微天然雲呢拿香,細心嘅話就會留意到慕絲中點點雲呢拿籽,再者慕絲做得甚有水準,柔滑而唔太甜,當然依個甜度應該調校過較為適合港人嘅。至於最上面嘅梨肉,清甜多汁,感覺很新鮮,食得出用料上乘,果然不愧為鎮店甜品之一呀!
Mille Feuille $43
- 同事「飛弗」、必食嘅酥皮拿破崙蛋糕!明明係一種傳統嘅法國蛋糕,唔知點解跟拿破崙扯上關係,晌網上搵吓,都出現好幾個說法,當然晌度唔多講,「盞」班門弄斧獻醜。我都係鍾意佢另一個較少人用嘅名「法式千層酥」,因為Mille Feuille本身就係有千層酥皮嘅意思嘛!
- 成份註明:puff pastry, light pastry cream,相信唔講大概都知。酥皮鬆化得緊要,食到個口感係由一層又一層好幼薄嘅酥皮組合成一件,又唔會有「啃」牙嘅感覺,即係無話有部分厚咗,佢做嘅酥皮真係技巧同功力兼備,咬落上、中、下層層都咁鬆脆。中間原味嘅吉士,個人評語得兩個字:香、滑,香,有蛋香,清甜;滑,唔係軟身就叫滑,係柔滑,挺身得嚟,質感好柔軟。而且,都加咗少少雲呢拿,多咗朕香味。質素無得講,真係「頂」佢,俾個頂級過佢。同事都話,好似綿花糖咁,睇佢好挺身,原來咁軟,所以同事勁讚佢超好味。
Chocolate Tart $43
朱古力一向都係小弟至愛,所以心水就落晌依個「朱古力撻」身上。唔好單睇佢外表矮矮偏偏咁,其實已經有成4層咁多,橫切一眼就見晒,可見個朱古力撻製作一啲都唔「馬虎」,吓吓都係手工嘢。成份簡述有:flourless chocolate sponge, chocolate ganache。撻殼食落幾脆喎,當然同「千層酥」嗰隻唔同,千層酥係鬆脆,朱古力撻就正如曲奇嗰種甘脆,又有牛油香;然後上一層係薄薄既無麵粉朱古力蛋糕,因為無加麵粉,食起嚟較濕潤,又重朱古力味,有啲似班尼士;佔中間餡心大部份係軟朱古力「ganache」,同事話唔夠軟滑喎,因為佢唔係慕絲,而係軟朱古力,係一種以忌廉加朱古力做成、濃郁且軟嘅朱古力夾層,有時食啲粒裝朱古力都會遇到,確實,層軟朱古力幾濃郁,好在又唔過甜;最後,就係最上面嘅鏡面朱古力漿,做得細緻、有光澤唔啞色、無水泡,鏡面朱古力做到咁光滑其實都唔容易,抵俾個贊佢,再者,朱古力夠濃香,好夠朱古力味,又無死甜!同事都覺得好食,係唔唔鐘意個撻殼咁硬啫。
Café latte with organic milk $42 (12oz)
免費咖啡可以任揀,我就要咗杯鮮奶咖啡,零售價8oz為$38,12oz為$42,雖然係免費送嘅,難得送杯12oz之餘,仲製作認真,故要需時。咖啡感覺幾幽香,有輕微澀口,但奶泡夠,口感柔順,絕對無話送嘅就「求求其其」。
感恩節係美國同加拿大共有嘅節日(網上資料:美國感恩節晌每年11月第四個星期四,加拿大感恩節就晌每年10月第二個星期一),真係唔係好關我哋事。不過,人要學識感恩,好多嘢唔係必然。小弟搵得唔算多,但從來衣食無憂,比上不足,比下有餘,有時仲叫做可以食到啲好嘢。$4件西餅我唔會嫌棄,$40一件嘅我會心存恩感去欣賞。我可以睇到眼前美食個賣相,又可以聞到佢嘅香氣,更可以嚐到內藏嘅味道同質感,唔好只睇你杯中少咗半杯水,其實你手裡仲有半杯水!
又一個題外話,小弟幫佢計過數,賣版廣告我就唔知要幾多錢,但2,000杯咖啡,每杯零售價係$42,即係派咗$84,000出去(咁大量,可能實際唔使俾咁多添)。因為齋晌免費報紙賣版廣告,啲人揭完就算,都唔知你乜水電信公司,依家有咁著數嘢,真係望多兩眼,我見有啲人仲成頁廣告撕落嚟,排隊時有啲人又打電話同朋友講排緊隊換咖啡,係乜乜電信送架,咁做真係幾有宣傳之效。希望第時見到多啲商戶都會用依招,益吓啲小市民都好丫! |
|
|
小雪園
|
標題 : 「蝦碌」餐牌,唔「蝦碌」菜式 |
地址 : 長沙灣青山道155-181天悅廣場地下CA3號舖 |
地區 : 長沙灣 |
|
現時分數:
|
日期 : 2011-11-30 11:25:16
又係一年一度細妹生日飯,都係嚟開深水埗區。好耐以前依個鋪位叫「新天地」,後尾轉咗叫「江南美廚」,都係賣上海菜,不過一段時間後變咗火鍋店「輝叔火鍋館」,無耐又做唔住,就變成依家嘅「小雪園」,賣番傳統上海菜,不過,就加多咗啲四川菜。聽朋友講係昔日北角雪園嘅班底開,所以,佢話質素應有保證,而且,既然開晌深水埗區,價錢自不然親民少少。故此,依餐生日飯,就揀定嚟小雪園,試一試以前雪園師傅嘅手勢。
環境幾骨子,簡約裝修,無乜奢華擺設,感覺平易近人,而且,枱排得唔密,中菜館嚟講空間感唔錯,而且,四人卡位好闊落,令人坐得好舒服,唔會逼逼狹,就算一次過嚟齊晒啲餸,都唔會無位擺。
同枱屋企人唔嗜辣,所以都係叫上海菜為主,川菜就免問。菜牌方面,散叫嘅有過百款,不過,都係先睇睇啲套餐,比較吓抵唔抵。佢有二人、四人套餐,計番比散叫平十蚊八蚊,只係慳咗唔使傷腦筋,有啲唔係好啱食。另外,仲有啲精選孖寶($148)、精選三寶($288)同特選三寶($308),各有特色。最後係得個精選孖寶值得考慮,因為選擇彈性大啲,查實比起散叫都係平十零廿蚊,另外就再散叫多幾樣嘢。精選孖寶係砂鍋雲吞雞煲(半份)或金腿冬瓜炖老鴨,配小菜四揀一;而散叫就揀咗兩款江南美點、一個菜、一個炒飯,唔夠先再追加。
上海小籠湯包 $28
一籠4隻,湯汁多,皮夠薄,不愧膽敢叫做「湯包」,手刴豬肉別具咬感,要挑嘅係頂端摺位過厚,少少影響口感。
蘿蔔絲酥餅 $36
雖然一碟只得3隻,但隻隻都幾大粒,唔好睇樣以為攤凍晒,其實裡面熱辣辣,新鮮製作。蘿蔔清甜,酥皮甘脆,個人覺得可以再炸濃少少,就更香口。
金腿津白 $58
金華火腿淨食真係鹹得要命,最好食法都係半片金腿夾一箸津白,金腿就變得香而不鹹,津白則變得更清甜。奶白嘅湯汁唔好嘥,其實可以當湯飲,幾鹹鮮架。
砂鍋雲吞雞煲(精選孖寶$148)
半份,其實已經一大砂鍋九乘幾滿。阿組滔完湯,錨起半隻雞上碟放晌枱上,足證真材實料。奶白色嘅湯頭,底厚味鮮清甜,可以分到7-8碗湯;當然雲吞就規矩得6粒啦,不過,同樣好足料,蝦鮮肉爽;雞肉亦唔嚡喎,有湯飲,有雞、有雲吞食,整體甚有水準。我仲試過加兩三匙金腿湯,多份鹹香,味道仲正。
糖醋菊花魚球(精選孖寶$148)
精選孖寶嘅四款小菜有回鍋肉、賽螃蟹、糖醋菊花魚球、排骨粗炒,計過度過,以糖醋菊花魚球散叫價高啲,而且又夠特色,糖醋汁又好撈飯。依道菜,其實係松子魚嘅小菜版,問過侍應,魚球只係用普通鯇魚,界花撲粉炸,爆出菊花形,加糖醋埋獻。菊花魚球份量唔多,但炸得鬆脆,裡面魚肉幾嫩,糖醋汁唔過酸,撈飯唔錯。
瑤柱蛋白炒飯 $68
滾燙石窩上,一滿窩飯,幾足秤。上海菜飯嘅炒飯版,夠熱辣,但飯粒稍濕,餸料偏少,窩底則有少許飯焦,都OK嘅。
整體服務幾好,係出菜次序亂。點好晒菜後,包你估唔到,竟然係個炒飯最先上,跟住係個砂鍋雲吞雞,再嚟兩個小炒,而點心卻係最後先嚟,好似倒轉晒咁。要賴就賴啲點心全部新鮮即點即做,所以製作需時要最遲上枱,但都無理由炒飯早過啲小炒架,唔通方便糖醋汁撈飯食?!另茶位收$5位,酸菜$8碟。
此外,有少少題外話,雖然店子身處較平民嘅深水埗區,但餐牌做得好認真,中英對照。食嘢之餘,學吓啲餸菜名點譯都幾得意。不過,認真還認真,餐牌雖無「蝦碌」依道菜,但譯名方面就無意中發現有啲「蝦碌」。其中兩道菜係松子雞米、榨菜肉末跟叉子燒餅,叉子燒餅英文譯為pita bread,姑且唔好話佢譯得啱唔啱先,但晌後面點心類嘅叉子燒餅散叫時卻譯為sesame puff,前言不對後語,點都有啲講唔過去喇!幸好,啲餸菜無「蝦碌」啫,如果唔係,糖醋菊花魚球就真係糖醋、菊花、魚球炒埋一碟就弊家伙喇,嘻嘻。 |
|
|
Grove Sandwiches |
標題 : 用心出品小叢林 |
地址 : 中環港景街1號港鐡香港站41號舖 |
地區 : 中環 |
|
現時分數:
|
日期 : 2011-11-28 10:56:39
星期六,無飯腳,所以收工後餐晏仔就自己搞掂。早前透過團購買咗一啲晌中環食店嘅套餐,睇睇有咩心水先?不如就食Grove啦,因為都差唔多到期,食番餐健康三文治,今餐就輕怡啲啦!
團購內容係$23享用三文治一份(全份)、沙律杯一客、Mövenpick咖啡(原價$56),而且全日供應,堂食、外賣都得,又唔使話預訂之類麻麻煩煩,想食就去換,好方便,中環又有分店。三文治又有5款選擇:碎蛋沙律三文治、燒牛肉蜜糖芥末三文治、牛油果雜菜三文治、雞肉凱撒三文治、香橙醬煙鴨胸三文治,都叫有幾多揀。所以,咪買定以備不時之需。係唯一揀咗香港站嘅分店,依間無位坐,只做外賣,都OK嘅,買完咪返屋企邊食邊打食評囉!
香橙醬煙鴨胸三文治
睇得出製作有誠意,材料又夠足。以多穀麥方包嚟做,唔係求其兩片白麵包,煙鴨胸、蕃茄、生菜一層疊一層,堆滿成份包。而煙鴨胸幾軟又帶有微微煙燻味,蕃茄生菜夠新鮮,香橙醬橙味突出唔過甜,整體甚有水準!
迷你鮮果杯
原本個餐係跟一份沙律杯嘅,但不知何解,依家都係星期六晏晝點幾啫,竟然賣晒,不過,仲好,店家以迷你鮮果杯代替,仲啱心水。鮮果杯有哈密瓜、菠蘿、西瓜,哈密瓜唔多甜,但菠蘿同西瓜就夠晒好食,前者味香且甜,而後者肉質起晒沙又多汁。仲有,話就話叫「迷你」,但都成大杯喎,唔係三幾粒架!
Mövenpick咖啡
果然幾得喎,咖啡味芳香細膩,無苦澀,屬於無乜酸度嘅一種,同樣又係啱我口味嘅咖啡。一份輕怡嘅三文治,一份新鮮嘅生果,加埋一杯芳香嘅咖啡,好滿足嘅午餐啦!
整體服務OK,始終都只係買外賣,落完單等拎嘢走,不過,至少都睇到女店員時刻都保持微笑,而落單時男店員都稍稍講解團購內容,唔飲咖啡嘅亦可以轉其他嘢飲。所以,依個團購絕對收到宣傳之效,會翻兜嘅三文治店! |
|
|
Kosmo Wellness Café |
標題 : 有機午餐 |
地址 : 中環蘭桂坊德己立街18號 |
地區 : 中環 |
|
現時分數:
|
日期 : 2011-11-24 10:18:01
又係團購作祟,晌年初透過團購,以$99購買$180 Kosmo Wellness Café嘅現金儲值卡,晌指定期限內到指定分店換取儲值卡就得喇,而且因為係一張儲值卡,基本上無時限,用幾多扣幾多。而且,知道依間店子一向以供應健康有機無添加食物為主,相信食得更安心。再者,張卡仲當係會員卡咁用,買任何嘢都有九折,感覺係抵上抵,又唔使急住去食。不過,張卡袋咗晌身好耐,近排先走去食。
事緣同個老友下午參加咗啲活動,但要到三點先開始,所以依家點幾鐘嚟Kosmo食啲嘢打打底之餘,晌度吹吓水攝時間。今個晏晝,人客較少,揀坐二樓梳化位。老友要杯有機豆奶配三文治,我就揀咗杯雜果汁加盒飯。
龍蝦牛油果三文治 $23 + Soy avocado regular $32
一份其實得半件,感覺都幾貴,如果買兩份就$42,平幾蚊。友人覺得餡料唔係好多,龍蝦肉可能得幾粒仔,大部份都係生菜,燈籠椒…等配料,醬汁太多令到個麵包濕漉漉,唔係太好食,佢話仲要咗兩份添,唉!
而嗰杯牛油果有機豆奶仲令友人失望,因為友人好鍾意食牛油果,但杯嘢只有豆奶味,牛油果味無掟企。
Masala Chicken Rice $43 + Kosmo Fighter regular $28
好鍾意馬沙拉嗰朕印度咖喱香,所以先揀依個飯。個飯由凍櫃交去收銀,佢哋會幫你翻叮整熱,再送到去你個位。唔好睇盒飯細細,原來都幾夠份量。米飯除咗白米,仲加入紅糙米,又有啲黃薑飯,撈埋啲馬沙拉汁,米飯富咖喱香,佢仲有一小兜乳酪青瓜醬跟盒飯,加埋再撈勻,味道仲豐富啲添。而餸料除有馬沙拉雞,仲有車厘茄同烤青瓜片,幾樣嘢都幾好多,咖喱很有香料味,唔單薄,雞肉唔嚡。
至於杯雜果汁係由蘋果、芒果、檸檬、薑打成,薑味主導,味道帶辣帶酸,其他蘋果味、芒果味欠奉,而且有半杯係泡,感覺好搵笨。
P.S. 消費係$145,但折咗就$130.5,不過,因為係團購,按比例計番,依餐實際用咗$72左右! |
|
|
嘉咸咖啡 Cafe Graham |
標題 : 半山誠意小店 |
地址 : 中區嘉咸街51D |
地區 : 中環 |
|
現時分數:
|
日期 : 2011-11-23 12:54:58
星期六,又約咗同學仔Ivan兄食晏,兩個幾十歲男人仲叫同學仔,唔係一齊讀過中小學嗰啲,而係一齊走去學過整麵包,麵包班嘅同學仔。間唔時大家都唔使陪老婆,就約晌星期六收工食晏,貪無時限,慢慢吹水,食得輕鬆唔使趕住走。
正度緊去邊度食好,今次Ivan兄上網摷到依間Café Graham,見食評唔錯,近SOHO嗰邊,較靜局,所以好有興趣一試。
沿中環自動行人電梯直剷,順路拍拍慳$2優惠站,去到士丹頓街轉右插入SOHO,過咗一個街口就係嘉咸街,向大斜路下望靠左就搵到Café Graham,店子門面細細,唔留心都好易走漏眼,以前都行過好幾次依段路,就係無為意所以一直唔知有食間咖啡店子。
1:30pm去到,唔多客,得幾枱人。咁佢本身都係間小店,枱都唔算多,粗略估計大概三十個位左右,呈長形,一室牆壁掛滿好多畫,感覺都幾輕鬆寫意。我哋揀咗個窗口位,光猛啲又有街景。
午餐,一張A4紙印晒,但有好多選擇,共20款,而且菜式頗特別,唔係大大路嘅雞牛豬搭粉麵飯配個汁,例如:「蟹肉、銀魚醬、蜆肉、紅辣椒甜香草醬燴意大利闊條意粉」、「煙鴨胸、香蒜葡萄醋燴天使麵」、「法式濃湯芹香燴牛肉配飯、意粉、薯菜」……等等,睇得出係有誠意之作。而主菜價位由$65-$93,包一杯餐飲,無餐包餐湯,所以都唔係平架,但就唔使加一。
亞枝竹蕊、風乾火腿、薄荷葉、松子仁燴長通粉 $72
雖然我哋兩個各自揀番心水嘅主菜,但都係打算一齊分享,好等大家都試到唔同特色。亞枝竹平時少接觸,所以就揀咗佢。一份長通粉唔算好多,賣相亦未見突出,只係晌旁邊加片蕃茄、青瓜、一粒蕃茜點綴下,但驟眼所見,風乾火腿著實落得唔少,唯可惜亞枝竹就只有兩個半件,叫咗一人一件都夠分夠試。亞枝竹味道酸酸,軟腍,口感幾得意,而風乾火腿就輕炒過,鹹鹹香香,加上帶有微微薄荷香,同粒粒松子仁,味道同口感都幾特別。個人係略嫌長通粉稍硬,加上醬汁唔多,令整體個燴長通粉感覺有啲乾。
薯仔、陳年黑醋、黑糖、南亞香料燴牛仔骨 $89
「陳年黑醋、黑糖、南亞香料」,就係依幾樣嘢吸引Ivan兄揀佢,混埋唔知個味道係點,好期待。原餐牌係寫住「牛仔脾肉」,但手改咗「牛仔骨」,但最後食到嘅都係牛仔肉,我個人鍾意牛仔肉多過牛仔骨,牛仔肉炆得好夠腍,又有肉味。薯仔,唔知係咪咁啱得咁橋,都係得兩件,叫夠分,薯仔夠粉有薯香。個賣相好似碟黑咖喱牛肉咁,醬汁深啡色,嗒落有醋酸香,醇厚唔嗆喉,又帶點黑糖獨特嘅甜香,至於所謂南亞香料,就真係唔係好知有乜,咁多醬汁,梗係配飯最好啦。
餐飲包例牌茶啡一杯,如果想轉其他咖啡就要加錢,例如轉意大利泡沫咖啡,就要加$10。我哋就無轉,飲番普通即磨咖啡,睇佢隻咖啡杯印住「Lavazza」個嘜頭,唔知係唔係賣嘅就係依款意大利品牌嘅咖啡呢?我唔係咩咖啡專家,咩品牌對我嚟講都唔係太重要,總之覺得杯咖啡濃香、平衡、幼滑,我都已經覺得係個好享受喇,Graham杯咖啡,就我而言,都係稱心之作啦。 |
|
|
Epoch |
標題 : 悠然下午茶@ ēpöch |
地址 : 灣仔永豐街12-14號 |
地區 : 灣仔 |
|
現時分數:
|
日期 : 2011-11-22 17:04:41
同太太晌中環食完晏,並未即刻打道回府,因為仲有下場。由於今日稱得上風和日麗,有太陽得嚟又涼涼哋,濕道唔高,所以就經由香港公園行過去灣仔嘅永豐街,沿途當散散步之餘,幫助消化一下頭先食嗰餐,其次就係欣賞下香港公園嘅花花草草,我哋兩個真係好少過嚟依頭,兼且邊有咁閒情逸興致行公園,難得今日好好享受一個悠然下午。
到咗永豐街,雖說係灣仔區,但屬邊皮位置,寧靜之外,都係寧靜。目標店舖就係ēpöch Coffee Bar and Desserterie,之前睇過佢嘅食評已幾有興趣走過來一試,但都係搵唔到腳,卒之撞啱佢搞團購,$29就可以享用任何一款手製法式甜品,再加一杯純意大利illy即磨咖啡,順理成章,完全無諗即買!
雖然依區係個寧靜小區,但入到店內一啲都唔寧靜。雖然餐廳播著輕鬆柔和嘅音樂,因為幾近爆滿,不過,大多數都係斯文客,又唔會話好嘈好吵,只係始終都近乎坐滿,聲浪總有一定分貝。本來想搵梳化坐,但太多人,只好退而求其次,揀咗近窗兩張高腳凳嘅位,老實講,坐就唔及梳化位舒服,但一心一意嚟試佢嘅蛋糕,都無乜所謂啦!
手揸兩套團購券,眼睛先晌精緻亮麗嘅甜品櫃度打量,齋睇住咁多款靚餅都賞心悅目呀,蛋糕揀咗Antton同人人都讚嘅7 Layer Valrhona Chocolate Cake。而抬頭往上望,熱咖啡都有成十多款選擇,最後,咖啡一杯係Marocchino – Chocolate by Valrhona,另一杯則係Cappuccino Viennese。
Antton $35
何解件餅叫Antton,不得而知,但介紹牌上寫住朱古力同榛子,老婆心水,所以就選中佢。三角造型,其實都唔易整,底層帶有榛子碎嘅朱古力餅底,味道很有榛子香;中間嘅朱古力慕絲,打得極致幼滑;而最外層包上薄薄朱古力漿,可可味濃,跟住灑啲榛子粒,令賣相唔會太單調。
7 Layer Valrhona Chocolate Cake $39
之前做咗啲功課,一眾食家極力推介此蛋糕,所以都一心想試試。打正旗號用Valrhona朱古力,用料應該唔會有太大懷疑,由底層起,有薄薄脆餅底、結實嘅朱古力塊、濃郁嘅brownies蛋糕、軟滑朱古力慕絲、柔軟黑朱古力漿、頂層斜放嘅朱古力薄片,數嚟數去都係6層,唔知頂層薄片之下嗰幾粒朱古力係咪當一層呢?7種唔同濃度同質感嘅朱古力放埋一齊,味道、口感紛陳,淨係睇手功咁繁複都值回票價啦。
Marocchino – Chocolate by Valrhona $35
我就當佢係莫卡咖啡Mocha嘅奶泡版,或者叫鮮奶咖啡Latte嘅朱古力版,因為係以特濃咖啡為基礎,加入純厚嘅熱朱古力,再加埋蒸打過嘅牛奶。口感比平時飲到嘅Mocha幼滑細緻啲,朱古力味隱約中又有幾分幽香。
Cappuccino Viennese $32
只係一杯平常嘅泡沫咖啡,再晌咖啡面上噴上鮮忌廉,再輕輕灑一點點咖啡粉做好個賣相。味道幾芳香,因為加重咗忌廉,當搞勻先飲咖啡香會淡咗,但相對就滑身好多,不過慣飲熱辣辣咖啡嘅港人,會感覺杯咖啡變暖咗,咖啡香無咁鮮活。
對於兩件蛋糕都好滿意,雖然都係主打朱古力味,但都叫各有特色。而咖啡方面,小弟覺得Marocchino較為吸引啲,此外,依度沖調咖啡都係跟返外國,唔會好似港式咁熱辣辣,所以,上述嗰杯Cappuccino Viennese當搞勻埋啲鮮忌廉,杯嘢真係少少暖暖哋架咋。嘆完件餅同咖啡,行吓星街、日街,再經聖佛蘭士街離開依個悠閒寧靜小區!
|
|
|
金裝燉奶佬餐廳 Daniel's Restaurant |
標題 : 芝心扒內藏 |
地址 : 美孚美孚新村5期蘭秀道6號地舖 |
地區 : 美孚 |
|
現時分數:
|
日期 : 2011-11-21 17:59:46
以前美孚得大家樂、麥記兩間連鎖快餐店,後尾多咗間美心,近年又多埋間金裝燉奶佬,叫做多咗啲選擇,唔知幾時會有埋大快活嚟美孚插旗,不過嚟唔嚟都唔緊要,雖然佢不斷改形象兼提升質素,但都真係少幫襯阿活。
又係返完大陸山區做嘢無啖好食,所以返到香港叫太太唔好煮出街食,話雖如此,又唔使大魚大肉嘅,嚟燉奶佬食番個扒餐相對地已經係好享受。亦因為晌山區經歷多咗,知道「搵食」難,所以小弟對食物特別珍惜,唔鍾意浪費,同朋友食飯有咩食剩例必包底,除非真係難食到入唔到口啫!
餐枱面有好多套餐嘅介紹單張,五花八門,各有特色,既然一早已預咗食扒餐,當然以此為目標,最終,我哋點咗一個皇牌鋸扒餐同一個軟心豬扒餐。
紐西蘭厚西冷扒
皇牌鋸扒餐有5款選擇,包餐湯,配白飯 / 意粉 / 薯菜,汁底有洋蔥汁或黑椒汁,再送即磨意大利咖啡、餐茶或滋潤糖水。要咗個貴少少嘅紐西蘭厚西冷扒,跟薯菜配洋蔥汁,餐湯要西湯嘅羅宋湯(可揀中湯)。羅宋湯唔錯喎,非常夠味濃郁,雜菜又夠多。西冷扒果然夠厚,伴大量薯菜,扒身雖厚,但都幾嫩滑,而且多肉汁,薯仔夠粉又炸得香口,係椰菜麻麻哋,烚得太腍。
軟心豬扒餐伴鴨胸
軟心豬扒餐一係伴鴨胸,一係伴魚餅,配白飯 / 天使麵,汁底有洋蔥汁或茄蓉汁,同樣跟餐送即磨意大利咖啡、餐茶或滋潤糖水。軟心豬扒炸得香脆,但有少少過火,另外軟心芝士實在少得可憐。令我想起以前西餐廳有一道菜叫嘅哥頓豬,將豬扒刴軟,兩塊豬扒夾住火腿、芝士,醮麵包糠炸,好鬼正,依家唔多見有喇。鴨胸唔多,只有兩片,不過就切得幾厚肉,軟腍又帶少少煙燻味,OK喎!天使麵幾得,因為好多時外面整天使麵會煮到一pat糊咁,但依個天使麵都叫得柔軟如絲,無黐埋兼無過腍一pat pat。
滋潤糖水
我哋都想潤吓,所以無飲嘢,揀糖水,基本上可以晌糖水餐牌任揀,只係唔可以點蛋白燉鮮奶,咁就有啲騎呢,因為全部都係同一個價錢$13,唔知點解唔得呢!一個要海帶綠豆沙,另一個就要蜜棗銀耳木瓜,前者味道清香,綠豆起晒沙;後者就雪耳同木瓜都好足秤,飲落喉嚨有一朕朕滋潤感。
|
|
|
雅饗 ADAGIO |
標題 : 自殺式團購 |
地址 : 上環永樂街68號1樓 |
地區 : 中環 |
|
現時分數:
|
日期 : 2011-11-17 11:14:51
較早前,Adagio跟團購網推出了一個抗通漲午餐(或下午茶餐),因為供應時間晌星期一至六1:30pm – 4:30pm,只賣$19(原價為$36),仲唔使加一,竟然包晒頭盤、主菜、甜品同飲品,抵得緊要,所以就買咗一張等星期六收工無飯腳時得一支公走過嚟食。順帶一提,此店所提供嘅正價午餐,包是日餐湯、主菜及即磨咖啡或茶,價錢為$62-$92,免加一,1:00pm埋單仲有9折添。可想而知,依個團購午餐同佢平時真金白銀賣開嘅午餐不能相提並論。
餐廳雖位處永樂街,但屬樓上鋪兼大廈入口晌小巷內,都有少少難搵,幸好地下有個餐廳嘅「易拉架」幫吓手。餐廳地方唔算好大,呈長形,大概都有三十個位,不過環境都稱得上優雅恬靜。最特別莫過於張餐枱,因為揭起張黑色竹餐墊,會見到枱面玻璃之下係,以幼沙碎石、乾花、貝殼做咗啲裝飾擺設,幾別緻,感覺幾舒暢!
頭盤
點好主菜彼,先上一小兜雜菜沙律伴兩片法式Baguette蒜蓉包,前者只係幾片羅馬生菜加片蕃茄,配點點黑醋,份量少少,味道一般咁啦;後者就烘得幾香蒜蓉味,可惜比較乾,可能法包一早切好而被餐廳內冷氣抽乾水分,再烘就更乾。
主菜
一共有5款選擇,都算係咁啦:焗澳洲火腿意粉、意大利菜湯天使麵配牛肉或燒鴨胸、番茄汁德國腸意粉、粟米菠蘿炒飯配煙肉或什菌、大蝦吞拿魚螺絲粉(凍食)。揀咗意大利菜湯天使麵配燒牛肉,因為想食啲濕濕哋嘅嘢。但質素比預期差咗一大截,菜湯很淡,好似無乜點煲過,亦都無乜甜味。燒牛肉,唔好諗住好似食自助餐晌餐車即切嗰種燒牛肉,而係好似什錦冷盤類嗰種,但唔太覺得食緊牛肉,似係火腿咁,不過就硬身少少肉感重啲啲,三小片,似係一個早餐嘅份量;天使麵亦唔多,叉幾箸都已經叫食晒。男仔嚟講,咁嘅份量真係有啲好勉強。
甜品
其實只係一個細細嘅雪糕球,無得揀,只有雲喱拿味一款,亦唔知係咩牌子,都無所謂啦,十幾蚊成個餐,唔通俾個芝士餅你咩!
飲品
冷熱都得,凍飲唔使額外加錢,店方都幾大方,無係依啲位賺盡你。我要咗杯凍檸茶,茶味唔錯,得意在用外賣膠杯載住,所以索性拎走邊行邊飲,走時個靚女侍應仲問我使唔使加番個蓋,又幾細心喎!
全店只有一個女服務員,未人滿就問題不大,但因為陸陸續續好多團購客,人手就顯得有點不足,不過,難得佢做得辛勤過啲蜜蜂,都保持到好好禮貌,同貼心嘅服務,都總算為間餐廳拉番多少分。
團購嘅出現,其實真係一個雙贏嘅策略,顧客以較低嘅價錢甚至超低價就得到應得嘅服務或產品,而商戶亦能透過團購網產生強大嘅宣傳效用,顧客使用過後亦會作出推介,從而產生連鎖性宣傳,總好過產品無人問津,而出色嘅廚藝亦無人識丫!不過,有啲商戶好似唔多明當中道理,將團購變成促銷渠道。好像今次嘅午餐經驗,以$19嚟講,抵到不得了,但係質素好有將貨就價嘅感覺,而且,仲係以平價吸引嚟促銷1:30pm之後嘅死城時段,任你點平,但啲嘢唔得,一來個客唔會返轉頭,二來更唔會推介俾人,再者,其他人見個午餐係咁,難免都會標籤咗間嘢係唔掂,結果就變咗反宣傳,咁就失去團購嘅意義啦。還是,餐廳嘅產品就係咁此普通呢? |
|
|
麵飽王快餐餅店 Bread King |
標題 : 選擇有限.早餐ABCD |
地址 : 荔枝角清麗商場地下6-8號 |
地區 : 荔枝角 |
|
現時分數:
|
日期 : 2011-11-15 16:28:40
雖然家住附近,但就麻麻哋鍾意幫襯依間「麵飽王」,住咁耐都只係幫襯過兩次,因為佢雖身為茶餐廳,但食物得好少選擇,主要只做屋苑內街坊生意,極少街外客,而且一早收鋪唔做晚市,真係做夠就算嗰款。除咗少選擇之餘,質素亦普普通通,太太話試過一次返工前幫襯佢買個菠蘿包,跟住無下次喇!
今次晨朝早走去幫襯,就係第二次喇,事緣依朝出發去旅行,就晌「麵飽王」搞掂就算,無謂晌屋企嘥時間整。因為都仲好早,茶客唔多,個個客各自坐一張枱,佢哋一係刨報紙,一係睇電視播新聞,好寧靜嘅茶餐廳,最有人聲應該係我哋兩公婆喇!
早餐只有4款,款款$20,全部配茶啡:
A:火腿通粉、西煎雙蛋
B:雪菜肉絲米、火腿三文治
C:牛油多士、火腿腸仔雙蛋
D:沙爹牛肉麵、火腿煎蛋
4款西式早餐都係傳統至極嘅組合,絕無花巧嘢,相信佢哋十年都無變呀!Vita贊助嘅掛牆白膠板、全綠色嘅膠碟、厚身闊口茶杯……仲係有種80年代嘅感覺。餐廳黐住隔離個屋苑仲係第一代居屋嚟添,樓齡都過晒三十,相信依個麵飽王都晌度打躉咗唔少年。
我哋兩個都係揀早餐D,因為比較鍾意食沙爹牛肉,亦都係轉食通粉,貪佢可以連湯汁吮埋入口,不過我要奶茶,太太要檸水。人客少,自然話咁快整好有得食。個火腿煎蛋,煎蛋煎得有手勢,蛋白邊微脆,蛋黃就暖流流;沙爹牛肉通,通粉多就牛肉少,牛肉叫醃得入味,又唔覺「乸」到肉質鬆泡泡;沙爹湯底唔算好香沙爹味,亦不致於淡戊戊,叫做不過不失咁啦。反而頗最欣賞係杯奶茶,未必出色過出面,唔係又香又滑嗰種,但茶味確係幾濃! |
|
|
Pacific Coffee Company |
標題 : 喜有免費咖啡 |
地址 : 荃灣楊屋道8號如心廣場1樓113及113A號舖 |
地區 : 荃灣 |
|
現時分數:
|
日期 : 2011-11-12 10:34:46
抽獎中了兩張免費咖啡券,就同太太嚟食個午餐,嘆杯靚咖啡。咖啡店開晌如心廣場一角,雖然咖啡店設計係開放形式,即係無固定鋪位圍住,側邊就係商場通道,但因為依個場一向都人流唔多,所以無乜影響、況且感覺幾開揚,背住一列大型落地玻璃,夠晒光猛,所以見到好多後生仔打書釘或者傾功課,而且,外面仲有啲露天位,依家有少少涼風,真係幾正。不過又有啲奇,依間Pacific Coffee睇落基本上食物已經較其他分店少選擇,因為只得兩個櫃仔擺食物,一個凍一個暖,星期日,啱啱嚟到先係1:00pm,竟然麵包、鬆餅也所餘無幾,三文治、蛋批、酥皮卷亦剩番唔多,係預貨預得少?抑或今朝突然幫襯多?不得而知喇!相信唔會係未返貨,而依家賣緊嘅係隔夜貨啩!
Sandwich Club $21.Salad Potato with Bacon $34
食物要咗半份公司三文治同一盒煙肉薯仔沙律。三文治點好後,侍應會用夾餅機翻熱兼壓出烤紋,所以睇落有啲似新鮮烤烘製作架,烘過嘅包身帶點脆口,餡料有生菜、蕃茄、雞肉、煙肉、芝士,味道唔錯,口感都幾豐富,雖然又煙肉又芝士,但食落口唔覺膩。至於煙肉薯仔沙律仲出色,不單材料都非常豐富,有爽脆嘅沙律菜、粉香薯味重嘅新薯、清甜嘅車厘茄、以及雞蛋同鹹香嘅煙肉碎,醬汁亦都調和得唔錯,一盒食起上嚟都好夠飽肚。
Caramel Latte $32.Hazelnut Latte $32
飲品我要焦糖鮮奶咖啡,太太唔鍾意焦糖,覺得會太甜,所以就揀咗榛子鮮奶咖啡。Pacific Coffee嘅咖啡一向都唔錯,焦糖更係小弟「飛弗」,所以一杯焦糖鮮奶咖啡唔止係享受,亦係一種滿足。而太太嘅榛子鮮奶咖啡亦有水準,咖啡香細膩,榛子味濃而不搶咖啡香。
三文治同個沙律都好食,依餐又慳咗咖啡錢,人要開心嘅都好易,諗嘢要正面,唔好諗住恆指跌嗰千幾點喇,搵啲好嘢食吓啦! |
|
|
晉嚼川風味
|
標題 : 重慶風味蕃薯粉 |
地址 : 荃灣四陂坊8號地下 |
地區 : 荃灣 |
|
現時分數:
|
日期 : 2011-11-02 11:36:28
工作關係,一年都有幾次上重慶,對蕃薯粉都唔太陌生。就算未上過去嘅,依家晌香港都已經有機會食到蕃薯粉啦。反而,晌香港我就真係一次都未食過,一來在重慶間唔時都會食到,二來小弟對依種粉麵一般,唔知點解,越食越唔慣重慶嘅口味。今晚,完咗個聚會,同太太、舅仔,跟埋個朋友J一齊嚟晉嚼川,依間嘢係朋友J介紹,太太同舅仔又未試過蕃薯粉,所以就嚟醫肚,時為星期六晚9:30pm,人客唔多,否則都幾襟等,因為店仔細細,數落都係16、17個位左右。
餐牌只有兩頁A4紙,一眼睇晒,好易明,因為係好似車仔麵咁,點完粉麵點配菜,餐飲加錢。門口大大個字寫著「正宗重慶手製蕃薯粉」,所以蕃薯粉係主打,其實粉麵都有好多選擇:幼薯粉、粗薯粉、扁薯粉、米線、手工麵、成都抄手、九寨溝水餃。幾款蕃薯粉唔知係點,牆上圖文並戊,一清二楚。而粉麵可伴湯,甚至無湯撈或涼拌;而每碗粉已例包配料有炸醬、海帶、芽菜、四川泡菜,如果揀涼拌,仲多咗花生粒添。至於配菜約有40多款,款款都係$4,唔算貴。如果惠顧兩款餸料以上嘅粉麵,仲可以加錢要多杯嘢飲(冷熱飲品$4、特飲$6、豆漿$8),都幾著數架。
四川臘腸魷魚鬚湯幼薯粉
太太嘅車仔選擇,要幼薯粉,伴湯,配四川臘腸及魷魚鬚。四川臘腸?佢叫四川臘腸時,我已提醒佢應該唔多啱佢食,我都好怕晌上面食佢哋啲臘肉臘腸,肥得緊要,唔係個個都頂得住,果然,一上枱就有種「出事」嘅感覺,因為四川臘腸絕對係帶有一粒粒肥膏晌入面,所以,四川臘腸自動過戶俾晒我,當然,我都要有啲餸要過返俾佢啦。幸好,仲有魷魚鬚及其他配料。四川臘腸除咗肥,味道都幾鹹,浸浸湯都OK,如果無湯撈或涼拌可能幾鹹。幼薯粉好似米線咁上下粗,攣攣曲曲,滑滑溜溜,都幾得意,而且薯粉份量好足,女仔食一定飽得緊要,配小辣湯底,食起上嚟無咁寡。
牛筋丸包心丸魷魚鬚湯扁薯粉
本來度緊要牛筋丸定包心丸好,問阿姐會有幾多粒,佢就話不如每樣一粒啦,都係收你一份餸錢,估唔到咁都得,再加埋魷魚鬚,配走辣清湯,要扁薯粉。扁薯粉色澤暗啞半透明,好似河粉咁闊,但就覺得仲厚身,食落煙韌有彈力,同樣,一碗粉份量依然十足,頂得住平時粉麵檔兩碗河粉咁多。牛筋丸同包心丸都幾好,後者就好似貢丸咁,餡心有啲香菇,咬落幾香,而魷魚鬚軟軟腍,又幾有咬口,不過本身無乜味。配料嘅炸醬、海帶、芽菜、四川泡菜,都各有特色,尤其個炸醬,炒得幾香,撈勻個湯,清湯都變得有味咗;而四川泡菜浸得爽脆帶微酸。雖然碗薯粉無加辣,但做出嚟滾燙熱辣,邊食邊飲住杯凍檸蜜,都幾爽架!
舅仔同朋友碗薯粉無影又無試,晌度就唔多講。整體而言,晉嚼川啲粉麵都好抵食,女仔嚟真係可以一碗蕃薯粉兩份食,至多點多一、兩個餸;而味道都不錯,算有地道特色,係不妨一試之選。
|
|
|
札幌元祖北海道拉麵 (已搬遷)
|
標題 : 搬前最後一戰 |
地址 : 中環交易廣場1樓11至12號 |
地區 : 中環 |
|
現時分數:
|
日期 : 2011-10-28 11:22:40
中環札幌由交易廣場搬到去中上環新鋪,人氣依然,無他嘅,有麝自然香,質素好係取勝之道。我就趁未搬之前,就再嚟食番碗北海道靚拉麵。
星期六,晏畫收咗工,約埋同事及太太,一齊會札幌。一碗拉麵平均六、七十,不過過百一碗都有,而定食就七、八十到一百。我哋三個人,各自點自已喜好嘅拉麵或定食,嚟到先試吓人哋碗味。製作需時,席間同事就問起坊間都有好多札幌或北海道喎,有無關係架,印象中睇過啲雜誌介紹過,其實都好複雜,佢哋之間有啲係朋友,有啲係對手,亦有啲師傅過檔或者自立門戶,當然亦有啲個名改得雷同,基本上無關係,總之依間「札幌元祖北海道拉麵」就只此一家,絕無分店。但點都好,依個係自由經濟社會,汰弱留強,掂唔掂食客自然食得出!大概都等咗15min,卒之有得食,講翻轉頭,我哋等位都等咗一陣,見住啲客一批走又一批又嚟,尤其今日係星期六,無晒平日啲寫字樓客,都依然進出進出人來人往。
味噌拉麵 $65
既然叫札幌,拉麵自不然係攣而粗嘅麵條,掛湯效果好。札幌出名在於佢哋用上北海道札幌嘅西山拉麵,食落確係幾夠彈性有咬口,又耐浸唔易腍。味噌湯底幾夠麵豉香,又帶有少少甜味,呷一口稱得上幾鮮甜。而每款拉麵都有兩大片叉燒,同一般拉麵店比屬於偏瘦,食起嚟質感略硬,但由於切得較為薄,而且豬肉帶有點點油脂,所以口感又未至於嚡口,依種「瘦叉」啱晒我老婆,佢唔多喜歡肥豬肉。另外,配料方面有蔥花、芽菜、筍乾條、紫菜同粟米粒,份量適中,芽菜爽,筍乾脆,粟米粒亦係超甜,做得豐富又認真。所以,吮住啲麵嚟食,等每一啖都可以連湯帶麵咁食,就正得無比。
牛油塩拉麵 $75
湯底味濃而不濁,入口帶點點鹹味,等大片牛油慢慢溶入湯中,拌勻後再呷一口,口感更加幼滑鹹香,亦無肥膩感。所以,食完碗麵,我都飲晒成碗拉麵湯,以示對師傅心機嘅尊重。至於麵條,同樣做得彈牙無失準,足證明無論麵廠嘅來貨,抑或師傅淥麵嘅手勢,都保持水準十足無閃失。叉燒同樣有兩大片,不過配料就跟上面味噌拉麵唔一樣,少咗粟米粒,但整體份量依然十足,一樣咁出色好食。
燒鯖魚定食 $85
太太特別鍾情於日本嘅燒魚,燒三文魚、燒銀雪魚……等等,見有燒鯖魚定食,佢諗都唔使諗就揀定。一份燒鯖魚定食,已包括味噌湯、一小碟醃物、一小碟煮物及一大碗白飯。醃物同煮物賣相都好普通,有啲行貨嘅感覺,以一貫日本人做事嘅認真及精益求精,我就覺得依兩樣嘢唔合格喇。反觀條鯖魚,賣相就好好多,上枱已聞到燒魚香,不過,唔好睇相以為係原條燒,其實得半邊,但已去咗魚骨,所以食起上嚟都好方便嘅,只係略嫌份量少咗啲。雖然只係簡單嘅鹽燒,都已好好食,魚皮香脆帶點鹹香;肉質較結實,但魚味濃得嚟唔腥;魚油OK,擠啲檸汁,醮少少白蘿蔔蓉嚟食,多份清甜清爽嘅感覺。飯粒圓潤有米香,少許黏糯帶濕潤,米粒亦恰如其分有質素哩! |
|
|
味吉拉麵館 Mikichi Ramen |
標題 : 半肥瘦叉燒有幾肥? |
地址 : 旺角登打士街56號家樂坊地庫B07號舖 |
地區 : 旺角 |
|
現時分數:
|
日期 : 2011-10-26 09:49:48
今晚走咗去旺角上啲整餅班,趕住上堂,所以完咗先去食飯,梗係拉埋個朋友Z陪吓食埋晚餐先散啦。登打士街嘅家樂坊地庫開咗段時間,因為自己少出旺角,所以一直都未有幫襯過,既然難得晌旺角,自不然落去睇吓有咩好食,眼見味吉拉麵館都幾多客,就投佢信心一票啦!
店舖以深啡木色作為主調,部份位置以幼竹柱間高,影響空間感。再加上啲枱實在排得太密太密,做多啲生意實在無可厚非,但密到基本上隔離位哥仔講乜,無心嘅都聽到晒囉。全場裝晒石英射燈,好嘅就夠光猛,唔好嘅就太過「光撐撐」。反而晌枱面上擺設就有啲心思,除咗以木盒裝著筷子,調味盤有鹽,仲有七味粉同生蒜。而則邊棟咗個「味吉拉麵博物館」嘅牌仔,落咗單未有咁快有嘢到,除咗同朋友傾吓偈之餘,就趁機翻開睇睇,原來係介紹唔同地區日本拉麵嘅特色,例如博多拉麵:豬骨湯配幼直嘅麵條;札幌拉麵:味噌(麵豉)湯配攣而粗嘅麵條……都幾有趣。
麵未到,先嚟杯唔熱唔凍嘅烏龍茶,味道有點甘,茶味濃。大概等咗15min左右,兩碗拉麵都先後奉上,裝麵個碗大大隻,碗口直徑都有成個薄餅大批咁大,連湯帶麵份量去到個碗一半高,但拿上手極之墜手,難為捧餐嘅侍應生。順便講講服務,雖然對餐牌部份資料唔係好熟,但侍應生大都有禮,斟茶遞水都好快手吓!
自家制叉燒、特色豬軟骨札幌拉麵 $78
朋友Z所揀嘅係叉燒搭豬軟骨,叉燒佢要咗全瘦,要札幌拉麵,即係味噌湯底配攣粗嘅拉麵,伴一小粒牛油粒,配料仲有蔥、粟米粒、木耳絲同一大片紫菜。
味噌湯底色澤幾對板,呷一口,帶有幾香麵豉味。麵條比想像中唔算好攣好粗,麵條只係有啲灣曲,粗幼度同我食嘅博多拉麵一模一樣。一客麵有兩大片叉燒同兩大舊豬軟骨,叉燒雖話係全瘦,都有少少肥膏,肉味一般般;而豬軟骨所謂特色只係以醬油煮,不過咬落幾鬆化。
自家制叉燒、厚切豚肉博多拉麵 $78
見朋友點咗札幌拉麵,我就梗要博多拉麵啦,可以比較吓兩者點唔同丫嘛。小弟嘅選擇係叉燒搭豚肉,叉燒試吓半肥瘦,伴一匙羮明太子,仲有半隻溏心蛋,配料有蔥、木耳絲同一大片紫菜。
博多拉麵,以豬骨湯配幼直嘅麵條,湯底色澤唔算好奶白,豬骨味普通,亦無話嗒落好膠嘅感覺,相信用嚟熬湯嘅豬骨份量唔會話好重手;麵條幼身爽直,又幾有咬口。至於半肥瘦叉燒係點,其實係幾肥,可以話肥多過瘦,一客同樣有兩大片,相信唔係個個都接受到,亦唔好被我哋廣東式嘅半肥瘦叉燒所錯估。厚切豚肉同上面試過嘅特色豬軟骨味道無分別,只係差別於兩者取自唔同部位。明太子係博多名產,即係醃製過嘅鱈魚卵,博多拉麵自然跟一匙羮明太子俾你嘆,明太子本身好鬼死鹹,通常伴飯伴麵,依家將啲明太子同啲湯撈勻,湯頭變得鹹香,感覺又唔同晒喇,多咗層次感。此外,隻溏心蛋亦好正,唔晒多講,睇相都知,蛋黃滑溜,蛋白軟軟嫩嫩,木耳也很爽,只是配料嘅紫菜唔多脆,但反正放湯,都係浸腍,無所謂啦!
試過之後,覺得味吉嘅拉麵只係中規中矩,同好多出名嘅拉麵店仍有大段距離。當然,佢哋嘅定位都係一般中檔消費嘅後生仔,以七十零蚊,叫算係咁啦。 |
|
|
富臨漁港囍臨門皇宴 Foo Lum Fishman's Wharf Restaurant |
標題 : 好耐無咁人齊飲茶喇 |
地址 : 太子彌敦道794-802號協成行1-3樓 |
地區 : 太子 |
|
現時分數:
|
日期 : 2011-10-21 09:18:12
十多年前,自己返開個團契有好幾十人,個個星期完咗崇拜,晌門口打一陣躉,時不時就拉隊落大坑東或太子飲茶,一圍唔夠有時仲開兩圍大枱先夠坐添。不過,隨著人大咗,組織家庭,有兒有女,加上大家都搬咗去唔同地區住,有啲就會改返屋企附近嘅教會。而自己教會亦由兩堂加到有三堂崇拜,所以,一齊返同一時段崇拜的團友就更少。緣於某原因,今次難得有成十多人,成11大2小加個B,所以就一齊落太子富臨飲茶食晏。
依餐茶絕對係聚舊大於個食字,大家坐低傾個雞啄唔斷,咁就由小弟發辦掃佢廿籠點心先,煎炒蒸炸樣樣有,臨尾追加多個炒粉麵添,食物預得算係啱啱好,埋單連茶介加一都係$560,都OK啦!始終今次唔係志在食,我哋人又多,點嘅嘢都係大路啲顧及大眾,所以,講到食就真係無乜好寫,只可以講話整體而言,質素不過不失,無驚喜,亦唔差,招呼亦係一般,唯一印象深啲嘅係個法式蝦球焗伊麵,蝦球大大粒都幾夠爽彈,其次配上個法式文也汁,即牛油加檸檬汁,香得嚟帶微酸,配伊麵中和番個油膩,都幾好食架,係啲伊麵腍身咗啲。
寫晒嗰日點過嘅點心,都係想記低吓咁齊人嘅一次飯聚,大家食過啲乜啫!
順德煎藕餅 $15.8
香煎花枝餅 $18.8
蘿白千絲酥 $18.8
香焗叉燒酥 $15.8
香麻流沙包 $15.8
蜜汁叉燒包 $15.8
古綿馬拉糕 $15.8
豉汁蒸鳳爪 $15.8
醬皇金錢肚 $18.8
鮮竹牛肉球 $12.8
南瓜煎堆仔 $15.8
皮蛋瘦肉粥 $15.8
蔥花炸兩腸 $15.8
蜜汁叉燒腸 $18.8
北菰棉花雞 $18.8
蟹籽燒賣皇 $18.8
碧綠帶子腸 $18.8
法式蝦球焗伊麵 $68
(小點$12.8,中點$15.8,大點$18.8,茶位$8) |
|
|
Yoppi |
標題 : 團購Froyo炎夏食 |
地址 : 荃灣惠荃道22-26號綠楊坊G23舖 |
地區 : 荃灣 |
|
現時分數:
|
日期 : 2011-10-19 09:10:05
近年突然興食乳酪,店舖仲一間接一間咁開,開到成行成市,好似梗有一間晌左近。我本身都鍾意食乳酪,貪佢酸酸甜甜對腸胃又有益,通常晌超市買杯裝返屋企食,至鍾意芒果味,自己再加啲香蕉,咁就已經好鬼正。好少幫襯街鋪,一來覺得佢哋定價偏貴,二來一般都唔會見有香蕉肉。見到Yoppi做團購,$15當$40使,絕對係抵買啦,當然支持吓食街鋪嘅乳酪啦!
嚟到睇睇,原來佢哋唔係斷重計,亦唔係自助形式,不過都無所謂,感覺仲衛生啲,但就無咁好玩囉。售價分3級,150g乳酪 + 1款配料(迷你杯$18),200g乳酪 + 2款配料(普通杯$28),300g乳酪 + 2款配料(大杯$32),如果想再額外加配料就要每款$4,但配料方面添多添少就睇你運數同個店員心情好唔好喇!
雖然之前晌團購嘅介紹,乳酪味道多達十多種,如朱古力、士多啤梨、熱情果、藍莓、石榴、櫻桃、荔枝……等等,不過,依間店基本上每日提供4款乳酪味道,而依日就有原味、紅桑子、青蘋果同法式雲呢拿。而現場概略一數,配料多達35款之多,生果類嘅有奇異果、紅桑子、香芒、藍莓、蜜桃…;糖果類嘅有朱古力粒、熊仔軟糖、朱古力碎條、朱古力脆、樂家杏仁糖…;健康少少嘅有蜜果脆圈圈、燕麥、玉米片…;特別啲嘅有芒果糯米滋、綠茶糯米糍、乜乜爆珠、物物爆珠、啫喱粒……等等,都有啲無奇不有架,配料睇落都好似幾吸引。另外仲有6款糖漿,加州著名品牌糖漿,味道有朱古力、白朱古力、焦糖、士多啤梨…等。
為咗試勻兩款乳酪味道,所以同太太一人一杯迷你杯,方便食,又可以交換嚟試,唔使扮晒恩愛咁叫大杯你一啖我一啖咁麻煩。太太要嘅係紅桑子味乳酪搭蘆薈同燕麥,而小弟嗰杯就青蘋果味乳酪搭咖啡點子。雖然簡單,但作為飯後甜品,口感輕盈清新,味道又酸中帶甜,幫助一下胃部消化都幾好丫。紅桑子味乳酪色澤淺紅,莓味唔算重,太太覺得偏凍,蘆薈粒店員落得一啲都無手軟,非常多,而且有咬口很有質感,配上燕麥嘅香同脆,佢讚自己個配搭唔錯喎。相反我嗰杯就麻麻哋,因為個青蘋果味乳酪跟原味好似無乜分別,純白色,青蘋果味好弱,只有酸味,真係凍到牙骹軟,而咖啡點子即係咖啡啫喱粒,份量落得輕手,嗒落幾有咖啡味,不過唔香,好普通!
|
|
|
八喜
|
標題 : 重溫南台灣美食 |
地址 : 灣仔軒尼斯道314-324號W Square 2樓 |
地區 : 灣仔 |
|
現時分數:
|
日期 : 2011-10-18 13:25:18
舊年同太太去了一轉台南、高雄、墾丁旅行,食咗好多好嘢,雖然本身對台灣菜唔算好熱愛,但又幾鍾意佢哋對小食嘅創意,突然又想食吓台式嘢,不過就唔係晌街邊食台式小食喇,想坐得舒服食番餐好好哋嘅,故此就拉埋太太,揀咗美心系嘅八喜,順便重溫一吓嗰時去台灣嘅種種趣事。
八喜位置少許吊腳,晌灣仔同銅鑼灣港鐵站之間,所以搭叮叮就最好,門口有落。相反,食完返屋企先搭地鐵,一來要過海,二來隔離集成中心有地鐵$2特惠站,拍一拍慳$2!
如果揀到卡位好啲,除咗因為對窗有街景望吓之餘,感覺上座位比較闊落。相反,其他圓枱就顯然排得比較密。不過,因為只得我兩公婆,俾咗張4人圓枱我哋,所以變相坐得鬆動,唔使背對背向著另一枱。至於招呼服務,一貫美心水準,雖然今晚睇落都幾多人,但斟茶遞水、落單上菜都好到位。嗌咗4款點心小食,壓尾加個炒飯,茶芥$8位,泡菜$12,連埋加一,埋單二百鬆啲,話貴唔貴,話平唔平,最緊要輕輕鬆鬆,坐得舒服,食物又好味,咁就OK啦!
灌湯小籠包
一籠有4隻賣$30,試過就真係覺得幾抵食。嚟到嘅時候望落幾大隻,唔好見佢一隻二隻個樣扁撻撻,用筷子一夾起,灌湯得緊要,裡面勁多湯汁蕩吓蕩吓,而外皮又軟又薄得緊要,透出湯色,真係要小心食,免得燙口。味道好好,湯汁濃郁,肉餡鬆軟!
肉燥蒸芋粿
一客有3件賣$28,今餐心水至愛,其實以前都試過,知道好食,所以今次再點。蒸芋粿,以蕃薯粉、米漿、芋頭絲蒸成糕狀,再切成丁方一件件,晌上面淋上肉燥即成。芋粿很有芋香,單睇側面就見有幾真材實料,芋絲一絲絲密密麻麻咁蹤橫交錯,咬落鬆化而不易爛,肉燥醬又惹味香濃,確係好食!
台南胡椒餅
一客有2大個賣$30,每個都一開四,方便食用。新鮮即焗,所以等候需時,上枱時熱辣辣。醮滿芝麻嘅外皮鬆脆甘香,而肉餡食多幾口先知有啲橋妙,牛肉有碎亦有塊,感覺有趣,而且充滿肉香又多汁之餘,胡椒香更係撲鼻而來啦,正!
八喜招牌春卷
基本上一客有兩條春卷,不過,斜切一開二,叫做一客有4件,賣 $30。依個春卷都唔錯,以腐皮作為春卷皮包紮餡料,口感覺得更脆,而內裡有魚塊同翠玉瓜粒,有別於豬肉餡,所以食落真係幾特別!
(P.S.小弟部DC仔無電,用太太部手機影,所以效果差強人意,都照貼出嚟志在俾大家睇睇個買相造型)
櫻花蝦炒飯 $60
有時朋友去台灣旅行都鍾意買一樽樽櫻花蝦返嚟做手信,我哋鍾意用嚟伴粥食。今次點個櫻花蝦炒飯,又試吓味道如何?原來唔單有櫻花蝦,仲有加咗煙肉碎同露筍仔粒,口感豐富咗!而且飯粒炒得少油爽身,帶點煙肉嘅香,又有露筍嘅爽,配合櫻花蝦脆脆咬口,所以個炒飯確係幾好食。
(P.S.相片都係用太太部手機影,請見諒)
後記:初時點菜以為食得晒,結果碟飯食淨大半,打包拎走當早餐。眼闊肚窄,晌上轉台灣之旅又係咁,眼見有好多嘢食,樣樣想試,結果餐餐飽到上心口!哈哈! |
|
|
彩晶軒 V Cuisine |
標題 : 學能測驗點心紙 |
地址 : 尖沙咀加連威老道100號港晶中心2樓全層 |
地區 : 尖沙咀 |
|
現時分數:
|
日期 : 2011-10-17 16:10:21
嚟彩晶軒飲茶應該係第一次喇,其實以前曾經嚟過,不過係出席表姨甥女嘅婚宴。今趟嚟飲茶都係教會朋友推介,佢話依度啲點心都幾有特色,有啲仲頗有新意,而且,以尖沙咀而言,價錢又唔算太貴,確實,好似今餐我哋6個人叫咗11個點心,加2個平價炒粉麵,夾埋都係$390,每人都係$65,認真抵食。再者,招呼同環境都唔錯,地方算闊落唔逼,茶壺貼咗茶葉名,唔會撈亂晒;不過,最得意係張點心紙,有晒使用說明,講埋點畫先正確,形式好似小弟晌廿多年前小六時,考升中嘅學能測驗畫橫間咁,仲有,有晒英文譯名,睇點心學英文,都幾有趣。言歸正傳講吓食咗啲乜先:
蒜香鮮蝦長春卷
粗略估計有成8吋長,屬於大點,一客只得3條添,外皮香脆,咬開之後,蒜香開始隱約滲出,味道頗為惹味,內裡包住蝦膠,味鮮夾彈。
老斗門活折鮮蝦餃
個名好似幾架勢咁,不過同一般嘅蝦餃無甚分別,但整體都係有水準,外皮煙韌唔黐牙,餡料十足,蝦肉絕無偷工減料,味道鮮甜,活折之意,不愧為特點。
韓江風味欖菜小粉果
外貌平平,但有晒內在美,粉果餡除一般常見嘅沙葛、蝦米、炸花生、芹菜、瘦肉…等等,特別添加埋欖菜,味道多咗一層層次,係一款抵試抵食嘅小點。
懷舊風情地道馬拉糕
簡單嚟講,好鬆軟,色澤較深有蔗糖香,馬拉糕果然係我哋中式海綿蛋糕嘅代表!
翡翠苗乾蒸燒賣
燒賣做得大大粒,雖然賣相包得麻麻,但豬肉餡加入菜苗,多份菜葉之香。
冰梅豉蒜蒸排骨
平時食點心蒸排骨多數都係蒜頭豆豉蒸,有時家常菜都有一道梅子蒸排骨,彩晶軒就將兩者合而為一,豉蒜惹味,梅酸清香,仲諗住個味會怪怪哋添,估唔到都OK喎。
九公格芋頭蕃薯餅
見個名咁得意,所以點一碟睇睇係咩嚟,味道唔係賣點,但絕對係搞嘢手作仔。以粉糰包住芋頭條同蕃薯條,搓成長條形,沾上芝麻落鑊炸,因為芋頭同蕃薯特別鋪排,所以切出嚟芋頭同蕃薯形成個九公格咁款。餅身軟糯又有芝麻香,口感似食煎堆,不過係較厚身嘅煎堆。芋頭同蕃薯就唔算太特別,兩者都夠粉香!
紅油抄手
四川著名嘅小食,因小弟唔嗜辣,只有淺嚐半隻抄手(另半隻太太搞掂)。紅油色深泛光,辣勁十足帶有少少甜香。而餛飩包得紮實唔易夾爛,肉餡柔嫩鮮美。
脆皮鬆化蘿蔔絲腸粉
初時大家都估緊佢點「蘿蔔絲」法,我估會唔會粉漿皮加入蘿蔔榨嘅汁嚟拉,原來係加入咗蘿蔔絲晌中間嘅炸兩,因為即做,所以上到枱油炸鬼仍鬆脆,配合埋腸粉皮同蘿蔔絲,口感、味道都別樹一格,依個新意係幾得!
什豆南瓜銀杏燕麥粥
好一碗健康粥品,單睇成份:什豆、南瓜、銀杏、燕麥,都屬較健康嘅材料,雖然材料上無骨無肉,但味道又唔覺太寡,而且個粥都幾綿幾甜,總好過次次都皮蛋瘦肉粥啦。
菠蘿雞粒炒飯,家鄉炒麵線
午市嘅一般炒粉飯麵賣緊$58-$88,但好奇怪晌另一張限於星期六、日及假期供應嘅點心紙中,有一欄有個菠蘿雞粒炒飯同家鄉炒麵線,賣$38,初時以為當點心形式賣,平啲就細碟啲啦,原來又唔係,跟平常見到嘅一樣大碟,真係抵食。當然,兩者都係普通嘅炒飯、炒麵,無乜花巧嘢,不過試過又唔覺佢將貨就價,材料無話少到唔見影,而味道都唔差,實屬填飽肚抵食之選。 |
|
|
新森林焗之專門店 New Forest Restaurant |
標題 : 保招牌焗之選 |
地址 : 中環威靈頓街99號威基商業大廈地下D舖 |
地區 : 中環 |
|
現時分數:
|
日期 : 2011-09-25 08:50:20
星期六收工,太太有自己飯腳,孤伶伶一支公,所以就拉咗同事一齊食晏,好彩佢都係得一個,原本都係打算食完就各有各散,故此晌同區隨意搵間餐廳落腳就算,行吓行吓就揀定咗新森林,無咩特別原因,只係未試過,兼且以焗飯麵為主打招牌菜,好似幾有睇頭,不妨一試。
午餐都有唔少選擇,有每週午餐之選$35-$39,個個星期唔到,每星期共有6款揀,包餐飲;另外,亦有長期供應嘅焗之選、廚師之推介,一律都係賣$39,同樣包嘢飲;平少少嘅都有,賣$33嘅拉麵之選,不過只得一款餸料,另加配料就每款$6,連埋嘢飲。但係有樣嘢比較騎尼,就係午餐要多加$3先奉送羅宋湯或是日忌廉湯連蒜茸包,心態上覺得$3唔係多,都會要埋餐湯試一試。結果我哋叫咗兩個餐,一齊分享嚟食。
餐湯
同事要嘅係羅宋湯,無問所以唔知質素。我要嘅係菠菜忌廉湯,雖然望落綠綠哋色,仲有啲菠菜碎碎,但唔覺有菠菜味,淨係好忌廉,就連加落去嘅忌廉都加得求其,簡言而之,就係茶記水平。蒜茸包烘得脆,可惜係無乜蒜茸味!
芝士白咖喱飯配雞扒(廚師之推介)
本應對芝士配白咖喱都有啲寄予厚望,未食前覺得應該幾特別,不過,試咗之後又覺得麻麻哋,芝士味比較淡口,白咖喱亦唔見得突出有特色,事後先知白咖喱應該係源自北海道,晌調製過程中加入較多嘅忌廉,盡量少啲黃薑粉,所以出嚟嘅色澤較白。個人而言,味道無乜個性,但質感很滑溜。至於雞扒,煎得香口又唔肥,肉質都OK,只係覺得面面再撒撮蔥絲有啲多此一舉啫。
芝士焗石斑豬柳漢堡鴛鴦飯(焗之選)
依個鴛鴦飯反而真係得我歡心喎,可能覺得俾一份錢,但就好似食咗兩碟唔同味道嘅飯,兼且茄汁一邊又醒胃,芝士汁嗰邊又唔錯,配埋炒飯底,感覺仲覺得更加抵。一邊係茄汁配豬柳漢堡,豬柳漢堡就等同晌麥記食嗰隻,口感、味道都一模一樣,而茄汁鮮活又茄味濃郁;另一邊芝士白汁配青衣柳,雪藏魚柳本身魚味都唔重,不過配咗芝士汁就感覺濃重惹味啲,況且啲魚柳食落都有啲脆嫩。依個焗之選果然抵讚,總算無負佢個焗之專門店嘅招牌。
餐飲
同事杯熱檸茶有好多片檸檬,所以篤完都要隔起佢,如果唔係一路浸住啲檸檬就變得太酸;我杯咖啡又幾OK喎,滾熱夠香,一派港式咖啡。兩個人,本來打算食完就走,不過,講吓講吓公司是非嘢,傾咗個幾兩粒鐘,好彩星期六嘅中環一向午市都唔算太多人,唔似勝香園、豚王依類長龍店。
|
|
|
豬仔糖水
|
標題 : 椰皇雙星 |
地址 : 大角咀杉樹街27號 |
地區 : 大角咀 |
|
現時分數:
|
日期 : 2011-08-29 17:19:53
甚少踏足入大角咀,因為唔係自己活動嘅範圍,今次走咗嚟依區嘅豬仔糖水搵食,原因係晌奧海城食完飯,過嚟大角咀極之近,其實主因係得到張$50現金券,梗係要用埋佢啦。
大角咀杉樹街,都算一條小型「食街」,火鍋店都幾間,又有出名賣龍蝦粥嘅煲仔粥,另一間賣甜品嘅水記,又有燒烤專門店……。所以,豬仔糖水開晌度,咁多晚飯、宵夜客,相信有得做。鋪內裝修較似快餐店咁,白枱有椅背橙凳,感覺幾醒目,而且枱凳無松記、綠林嗰啲拍得咁迫,好坐好多,至少唔會迫到插針都插唔入。
選擇方面都有幾多嘢揀,湯圓、紫米露、西米露……依類基本嘢都唔少得,佢仲有時下幾吃香嘅綿綿冰呀、台式嘅芋圓呀,又有啲特色飲品如焦糖咖啡撞奶,荔枝玉露……,仲賣埋小食,好似黃金薯粒、炭燒雞腎串……,算得上應有盡有。最後兩公婆,心大心細,左揀右揀,卒之決定揀咗椰皇雙星:椰林燉奶($27)同椰皇甜蜜湯圓($23),啱啱好$50用晒!
椰林燉奶
原個椰青燉,原個上,餐牌嘅介紹係椰皇+鮮奶+蛋白,燉鮮奶蛋白唔算滑溜到「sir」一聲滑過喉嚨,但奶味就絕對勁濃,而且甜度啱啱好。食完燉鮮奶蛋白,再食椰青肉,肉質燉過已經腍晒,加埋店主提供了鐵匙,刮椰青肉變得輕而易舉,食落椰青肉帶少許奶香,幾好食!
椰皇甜蜜湯圓
同樣以原個椰青上,介紹係有湯圓x5+椰皇水+椰奶+抹茶珍珠,但實情係無珍珠,晌侍應妹妹,佢話無咗好耐,不過餐牌無改,如果晌個餐牌劃走「抹茶珍珠」幾隻字就唔會令食客有誤會。至於個甜品,個糖水底無咩特別,只係椰皇水加椰奶,不過唔太甜就幾啱我哋,湯圓有麻蓉、花生,餡就幾香滑,但唔知係咪就番個椰青,湯圓做得較為細粒少少,而且厚皮,所以,要扣啲分。一樣,食完湯圓又可能刮椰青肉食。
|
|
|
風月堂 Orchard Garden Cafe & Restaurant |
標題 : 夕食.未算好值 |
地址 : 大角咀海庭道18號奧海城二期一根102號舖 |
地區 : 大角咀 |
|
現時分數:
|
日期 : 2011-08-25 15:18:46
平時都有做吓啲網上問卷調查,卒之儲夠積分可以換嘢,通常我都係換啲飲飲食食嘅現金券,可以免費食番餐,難得可以揀風月堂,我又未試過,所以就一於係佢喇,搵咗晚同太太去食,雖然手揸著$200現金券,但風月堂賣嘅餐都唔係種平民大眾化嘅價錢,結果需要補番$70先可以落樓。
風月堂分店唔多,揀奧海城係因為閒日依度唔係旺區,相對易換位,至少比起旺角同銅鑼灣嘅店舖無咁多人,而且都算就腳。當晚去到都唔使等,就安排到一個卡位,全店一室明亮潔白,白牆、白梳化椅,卡位以透明玻璃暗花相間,又有啲假樹裝飾,最難得係空間闊落,枱唔會拍到密質質。而卡位又特別寬闊,一般女士身形真係可以一排坐到三個架。每枱又有一樽小花點綴吓,無咁單調。
除咗多款散叫,仲有做套餐,包括夕食,即係Dinner set,同日式定食,即係Japanese set。前者有三款:扒牛柳伴帶子伴什菌汁配飯意或薯菜、煎香辣雞扒伴大蝦伴香辣汁配飯意或薯菜、煎鱈魚蜆肉野菜忌廉意粉,跟是日餐湯/羅宋湯/燒鮮菇芒果什菜沙律,仲有自選雪糕窩夫及餐飲;後者有
一人御前定食、牛肉稻庭烏冬定食、什菜稻庭烏冬定食、自選日式定食,跟餐包括埋麵豉湯、附物同生果。其實啲餐都計落幾豐富,賣百鬆啲,日本嘢食計都唔叫得貴啦,最後,我哋決定叫一個夕食,同一個自選日式定食。
夕食
- 小餐包配安佳牛油,而聽落個燒鮮菇芒果什菜沙律似乎有啲特色,就唔要湯而食沙律。個沙律其實好簡單,一堆沙律菜,有兩片燒鮮冬菇,再加啲芒果肉同芒果做嘅醬汁。味道清新,沙律菜夠爽脆,燒冬菇有菌香,芒果醬汁酸酸甜,頗醒胃。
- 主菜方面揀咗扒牛柳伴帶子伴什菌汁配薯菜,主角扒牛柳做得出色,厚切嘅牛柳燒得啱啱好,外層焦香,內裡仍然粉嫩,好夠肉汁。帶子大過個五蚊銀,不過就只得一粒,肉質都幾鮮甜柔軟,最驚就係食到啲擦紙膠帶子,無味又韌。但係薯菜就要大扣分,廚師將啲甘筍、翠玉瓜、茄子墊底,再放上炸薯條,最上面就係件燒牛柳,側邊放埋粒帶子,賣相就確係幾好睇、幾有層次咁,但就唔好用炸薯條囉,我覺得一係炸薯條放埋一邊,如果真係要疊高一層層嘅,不如改用薯蓉,因為依家啲薯條被啲肉汁、什菌汁浸腍晒,一來唔香口,二來嘥晒脆炸嘅口感。
- 甜品時間,自選雪糕窩夫要咗芝麻雪糕,窩夫係細格嘅格仔餅,原本個甜品應該好唔錯,但錯在時間之上,因為等咗好耐先送個甜品嚟,我見個侍應一手就四、五碟雪糕窩夫上枱,好大可能等單一齊做,所以我個雪糕夠冰凍,但件窩夫只係微暖,食落感覺唔係最新鮮嘅脆喇,更缺少咗冰火嘅滋味,可幸個芝麻雪糕帶有濃香芝麻味!
- 餐飲嘅咖啡就無乜好講,想講係牛奶係座暖咗嘅,另外亦欣賞佢啲杯碟,除咗個雪糕窩夫係用隻普通嘅白碟,其餘都會用啲帶有花同蘋果嘅圖案,睇起嚟會覺得有氣息啲。
自選日式定食
- 簡單嘅麵豉湯作開始,味道比較清淡,但因為湯中無夾雜加其他嘢,所以每啖都係清香麵豉味。
- 附物一小碟仔,有中華海草同味附八爪魚,味道不過不失咁啦。
- 主食可以單一選配或兩項選配,分別在於價錢啫,加多十幾蚊就有兩項選配,覺得划算啲。而款式選擇都幾多,共10款,如照燒牛肉卷、燒三文魚、蒲燒鰻魚、和風牛扒……等等。我哋嘅組合就係燒銀雪魚拼什錦串燒,配上珍珠米白飯一碗。燒銀雪魚一向係太太至愛,油香肉嫩,就係佢喜愛嘅原因,當然,加上眼前嘅銀雪魚又煎得外皮香脆,份量又唔少,佢就梗滿足啦。而什錦串燒都唔弱,共有2串,每串有鮮冬菇、和牛粒同原粒帶子,三樣嘢都各有特色,質素唔錯,只係和牛粒有少許韌,但整體仍然好有水準。所以,依個兩項選配嘅和食都幾抵。
- 生果亦無馬虎了事喎,雖然只係細細兜生果碗,但竟然有西瓜、奇異果、火龍果、士多啤梨、香橙5樣嘢,都有誠意。之但係,件橙去埋皮先放埋入去就比較好啲!
環境舒服,食物有水準,服務我就覺得差咗啲,因為個麵豉湯同碟附物係單獨咁上枱,個主食燒銀雪魚拼什錦串燒好耐好耐都未嚟,所以我都唔可以一次過成個日式定食影番張「合照」;此外,上面都講過個芝麻雪糕窩夫又係等咗好耐,我覺得需要改善吓上菜嘅配合同速度嘅。 |
|
|
多彩海鮮酒家
|
標題 : 中學死黨蛇宴開年飯 |
地址 : 石硤尾南昌街美彩樓 |
地區 : 石硤尾 |
|
現時分數:
|
日期 : 2011-08-22 10:46:39
拖咗半年嘅食評,本來一食完就好想快啲寫好佢,不過當時忙於搞去旅行嘢,放埋咗一邊,就係咁擺吓擺吓無晒火去寫。最近,同依班死黨又有飯局打鞭爐,重提番依餐蛇宴,講開大家都好想今年再搞番轉,所以,先「的」起心肝要寫埋佢。
其實,有班中學死黨,加部份波友,「枕住」都有出嚟食飯,一年都好幾次,不過次次都唔會齊人,所以舊年尾就諗住入秋搞大啲,包個房,整圍蛇宴,結果約嚟約去就要到今年二月先搞成,但係無減大家出席嘅熱誠。而揀嚟多彩,因為依度有我哋唔少嘅回憶,仲係中學年代,我哋大部份都係晌大坑東讀書,住晌深水埗一帶,晌偉智街打完波就去南昌食大排檔,大排檔拆咗之後,嗰時各都出嚟做嘢,就開始升格去多彩,週六食完食一齊腸英超,幾開心呀!雖然依家人大咗,各散東西,各有各忙,波亦無踼喇,睇波食飯就仲有嘅,乘機呻吓工作嘢,呻吓屋企嘢咁囉。故此,今晚齊晒人成圍枱,真係近年難得架。
綿繡燒味大拼盤
燒味包括有油雞、叉燒、分蹄、燒鵝、海蜇,晌度幫襯咗十幾廿年,佢嘅燒味都OK架,雖然唔及得一啲出名中菜館嘅出品,但食落有感情。
七彩炒鴕鳥柳
大堆頭製作,以紅椒、青椒、西芹爆炒鴕鳥絲,鴕鳥肉係近年新興,網上資料指鴕鳥肉含較多鐵質同蛋白質,較少脂肪同膽固醇,確實都幾好食,質感、肉味都似牛肉,係啖少少,不過炒得夠鑊氣,又夠晒大碟。
太史鮑絲燴五蛇羮
預咗兩大窩,咁先夠皮嘛!阿姐話蛇羮唔係佢哋酒樓嘅出品,係托附近蛇鋪交嚟,深水埗都有好多蛇鋪賣蛇羮,睇落就好足料。席上,阿姐原窩再翻熱,果然,非常足料,啖啖鮑絲、蛇肉,味道唔錯,湯底鮮甜,阿姐仲放低一大兜薄脆,驚死我哋唔夠分。我哋食完一窩,隔多陣至再食第二窩,一窩絕對夠分12-13碗。
流沙白花蛇丸
蛇肉同蝦膠打成丸,裡面再加鹹蛋黃蓉,然後黐啲米粉酥炸,蛇丸本身做得爽彈,流沙效果又OK喎,鹹鹹香香咁!
菜膽蛇汁龍崗雞
雖然係街坊酒樓,但餸菜賣相一樣做足,依個菜膽蛇汁龍崗雞,菜膽用上娃娃菜,砌好伴碟,不過個人覺得用上小棠菜夠綠就仲靚。龍崗雞斬好砌番成隻「雞樣」,加少少玻璃獻,成個菜就完成。雞肉入味而肉嫩,皮下脂肪又少,甚有水準。
豉汁蒸蟠龍鱔
依個蟠龍鱔做得出色,原條大黃鱔輕輕鎅開一截截,加配大量豆豉蒸,上枱後由阿姐切番散一件件。一來條鱔蒸得恰到好處,肉質柔嫩帶少少煙韌感;二來鱔肉滿有油香,係就係肥咗啲架啦,但咁先好食丫嘛;三來,豆豉蒸,絕對係中菜惹味嘅表表者。
蛇汁灼唐生菜
唐生菜加咗蛇汁灼,食唔出有咩特別,不過,生菜灼得爽脆,但賣相幾樣衰,一堆亂菜。
枝竹羊腩煲
天寒地凍,整煲羊腩煲就最合時,一大窩枝竹羊腩煲滾住食,咁就最正,枝竹索晒羊腩汁,份外香,而羊腩炆得夠晒諗,唔韌,帶少少羶。本來原先個菜單跟個臘味糯米飯,但識食嘅老死話轉窩白飯仲好啦,因為白飯撈腩汁食,仲滋味過食臘味糯米飯,又唔使嘥晒成兜腩汁,佢又有佢個道理喎,所以就嚟咗窩絲苗白飯喇。除咗撈腩汁,亦可以撈蟠龍鱔啲豉汁,同樣咁正!
蛇汁炆伊麵
同個蛇汁灼唐生菜一樣,雖然加咗蛇汁,食落同平時食嘅乾燒伊麵真係唔覺有咩分別,唯一可以講係個伊麵本身炒得幾好,唔太油膩。
多彩多數都係街坊生意,服務比較隨便啲,晌石硤尾都稱得上大酒樓一間,過時過節都例爆,嘢食都見得人,唔失禮,而且,價位唔貴,好似今晚圍菜,包茶芥加一,12罐汽水,送埋生果盤,全包價都係$1,980,食得成圍12個大男人都飽晒。 |
|
|
名豪海鮮酒家 Grandco Seafood Restaurant |
標題 : 細佬生日食套餐 |
地址 : 深水埗南昌街223-227號名都廣場1-3樓 |
地區 : 深水埗 |
|
現時分數:
|
日期 : 2011-08-18 10:29:54
細路生日,當然又要乘機搵埋家人食番餐,揀名豪,純粹地點就腳,就晌屋企人對面,否則就行落啲嘅多彩。最緊要地點方便,環境舒服,咁就已經OK,名豪已合格有餘。講到食物質素,佢唔係差,亦唔係好,完全屬於雀局小菜、街坊水準。不過,同我屋企人食飯有樣好,佢哋真係對食物無要求,要佢哋點菜慘過打靶,問佢哋食乜都係嗰句:「是但啦」,再問依樣好唔好,簡單嘅回覆:「無所謂」,故此,穩陣起見,甚少試新嘢,都係叫大路餸菜啱佢哋!
星期一至五,名豪有個四餸一湯晚飯精選套餐,賣$228,都幾OK喎!湯羮四揀一,燒味又係四揀一,海鮮類同樣四揀一,而精美小菜就晌30款裡面揀2款,所以,都叫四餸一湯,覺得都幾抵食。因為細佬生日,想大家食得豐富啲,就加多個蒸元貝,晚市三大優惠之一,半打計都係賣$38咋,白飯另計,再加埋茶芥$10位,酸菜$10,四百唔使,算實實際際咁啦。
粟米魚肚羮
例窩上,幾夠份量,足有6-7碗。雖然只係話加咗魚肚嘅粟米湯,但都唔馬虎,稀杰度適中,魚肚發得夠透,又無腥味,唔錯喎!
脆皮燒腩仔
都係例牌份量,斬得細細件,一啖一件,外皮脆卜卜,腩肉肥瘦相間,而且肥肉佔得唔多,甘香唔油膩,啱使佢哋。
豉汁蒸黃鱲倉
我估依家晌街市買條黃鱲倉都唔平,而豉汁蒸魚永遠都咁好食。魚肉稍為蒸得有少少實,但味道解甜搭番夠。
菠蘿生炒骨
精美小菜之一,貪佢醒胃兼好送飯,生炒骨酸得嚟唔嗆喉,而且外層粉漿又唔算厚,水準平穩之作。
鮑魚菇扒時蔬
指定動作,咁多肉,點都要搵番個「菜」嚟「鄧番勻」,依個勝在咁多「淨菜」中最清淡。鮑魚菇食落又幾有鮑魚口感,滿足吓自己扮食貴嘢。
金銀蒜絲蒸元貝
都睇出幾厚肉,落得重手嘅生熟蒜粒,的確惹味,底下嘅粉絲又索晒汁,$38真係抵到暈。
成個場嘅客都係街坊咁款,幾個小菜,邊食邊追劇集,同啲伙計打牙骹,吹吓水,好似當正晌自己屋企食飯咁,好一個街坊飯堂呀! |
|
|
Tony Roma's |
標題 : 相聚一刻 |
地址 : 銅鑼灣勿地臣街1號時代廣場食通天12樓1207室 |
地區 : 銅鑼灣 |
|
現時分數:
|
日期 : 2011-08-03 16:14:50
以前去外地旅行,認識咗個台灣人,不過依家都少咗聯絡,但咁啱佢同太太、一對仔過嚟香港旅行,雖然係自由行,由於佢哋已經安排好晒行程,所以叫我唔使特別陪佢哋,不過咁耐無見,食番餐就唔少得架喇!問咗佢哋喜好,都係就番兩個細路,想食啲惹味嘅嘢,所以,就揀嚟Tony Roma鋸吓扒,食吓燒肋骨!
星期六嘅晚上,好多客人,我哋遲到咗幾個字,都盡量等我哋嚟俾枱我哋,安排坐晌入門口左邊較入嘅馬蹄形座位,比較靜焗少少,方便傾偈!點菜就由我發辦,全部都係香口嘢,而且比較多肉,希望佢哋食得開心。
先嚟啲免費法包,配香草牛油,法包只係暖暖哋,包面脆但包身稍硬,未夠軟熟,而香草牛油軟滑帶有陣陣香草味,加番少少分。熱身完,好快就上其他菜式。不過,事後見啲細路好鍾意食啲法包,所以再麻煩啲店員嚟多一份,但係叫咗好幾次,三催四請先拎到嚟,大佬我哋都叫咗好幾樣嘢啦,唔係以為貪你啲免費法包啩!
燒雞凱撒沙律
凱撒沙律做底,加一塊烤雞胸。個凱撒沙律就幾好食,沙律菜夠凍又爽甜,灑滿芝士碎,沙律汁亦很有層次,唔係得個酸字。烤雞胸雖然大大件,燒得個樣幾靚,但都係嚡咗少少,不過,雞胸已切好一小件一小件咁,方便食用!
香脆三文魚春卷
其實無咩特別,只係以三文魚做餡嘅炸春卷,一客4件,但每件都幾大,況且餡料十足無欺場,啖啖三文魚肉,最精彩係跟春卷個醬,帶有濃厚嘅芝士香,再配伴碟嘅酸青蘋果條,伴住咁食令你覺得去去油膩。
燒肋骨配烤雞
嚟到有少少打個突,因為烤雞原來是一隻燒雞脾,仲係隻右脾,如果唔係有啲烤過嘅坑紋,仲以為俾咗隻鹵水雞脾添。燒豬肋骨成尺咁多,有8件之多,唔使多講,濃香惹味嘅燒烤醬,肉地鬆化嘅豬肋骨,兩者最合拍,大啖大啖咁食,果然好好味,保持上佳水準。至於隻燒雞脾都OK,幾入味,但同條肋骨比,就差咗兩皮。伴碟仲有麥記薯條同酸椰菜絲,前者同麥記食開無分別,後者酸香醒胃。
燒肋骨配牛扒
依個燒肋骨就揀咗搭牛扒,配菜要烚粟米同酸椰菜絲。件碳燒牛扒有少少過火,未至於韌,但可以仲好啲,不過就不得不讚佢肉味濃、肉汁多,配上洋蔥汁,幾正。配菜嘅烚粟米,當然唔及燒粟米香口,但依家烚嘅,食得出粟米很甜!
今晚幾樣嘢都好啱佢哋食,全部清晒,食到啲細路一咀都係油。原來佢哋嚟咗兩日幾,都未坐過叮叮同小輪,所以,就帶佢哋坐叮叮落中環,跟住坐天星過尖沙咀,睇埋IFC、灣仔會展、天星碼頭、文化中心……幾個沿路景點,算係帶佢哋逛過吓啦,哈哈! |
|
|
彩雲軒
|
標題 : 神枱生果盤.平平無奇一餐飯 |
地址 : 尖沙咀廣東道30號新港中心3樓A舖 |
地區 : 尖沙咀 |
|
現時分數:
|
日期 : 2011-08-01 09:55:25
約咗好耐,改期又改期嘅一餐舊同事飯局,仲要少吓一個,少吓又一個臨時話唔嚟,無奈,但其他肯出嚟都係有心人,所以飯局照搞。最後只得5個人,都係大枱變細枱,叫少啲餸啫,最緊要係大家咁耐無聚,聚一聚講吓近況維繫份友情。就大家方便,揀咗好彩集團旗下嘅彩雲軒,雖然好彩都搞咗幾十年,但感覺都係比較屋村啲,依家多咗幾間彩雲軒、彩晶軒,路線走高檔咗少少,舊鋪又翻新吓,睇吓佢嘅水準係點!
先講環境,一字長廳,空間感幾好,不過,排枱太密,完全背對背、枱貼枱咁滯,感覺唔係太舒服。幸好,依晚都係七乘幾滿,未至於周圍都係人,傾偈都唔使放盡喉嚨。服務方面,人手足,叫菜落單斟茶上菜都有服務員快手快腳搞掂。講到食物,我哋叫咗1個小食、1份燒味拼盤、2個熱盤、半份雲吞雞,連埋茶芥加一都係$530,尖咀區嚟講都好合理!
麻辣牛肚
牛肚睇樣唔似係柱侯又唔似係鹵水,本身味淡,但食落又幾爽彈喎,而面面放咗自家製麻辣醬,果然又麻又辣,小弟唔食辣,真係一件起,兩件止喇。
燒味拼盤
有叉燒、燒鴨、豉油雞同海蜇,OK啦,無驚喜亦唔差咁囉。
欖菜肉崧炒藕片
感覺炒得有啲唔夠火候,即係唔係好夠鑊氣。藕片雖然都算爽脆,但唔夠味,欖菜色澤比較白,因為一向見到嘅欖菜都好深色吓,而且,味亦較淡,落得份量又少,所以整體碟菜都無乜味。
葡汁海鮮焗南瓜
以葡汁做個海鮮,海鮮唔係用咩貴嘢,都係青衣柳、蝦、蟹柳、魷魚……等等,材料本身就唔係太期望。葡汁推得幾香,香料同椰奶味並重,互相都唔太搶。反而個南瓜一般,睇樣個南瓜已經透透哋身,瓜味唔濃,所以我哋都無乜刮啲瓜肉出嚟食。
砂鍋雲吞雞半份
全晚最有睇頭嘅餸菜,我都幾鍾意叫依道菜,因為又有湯飲,又有雲吞同雞食,平時其他湯水都好少食埋啲渣。湯頭幾鮮甜,鮮雞足半隻,食落又唔嚡,雲吞雖則大粒,但味道就普通咗,豬肉佔多湯裡仲有黃芽白。
柑?
食晚飯送生果盤,時下好多中菜館都有,不過,搞嘢在佢哋送上大柑5個,剛啱5個,仲要擺到品神咁嘅樣,我哋百無禁忌,所以都無所謂,如果有老人家晌度,實鬧鬼死呀。
|
|
|
金滿庭
|
標題 : 老細飯局 |
地址 : 銅鑼灣勿地臣街1號時代廣場食通天13樓1301舖 |
地區 : 銅鑼灣 |
|
現時分數:
|
日期 : 2011-07-26 16:46:47
同得老細食飯,自不然會食好嘢,依餐可謂富貴晏仔,因為只係食餐晏啫,都要每人$500落樓,事緣就唔多講,總之就食得好,食得豐富。全部菜由老細發辦,我哋一班卒仔嘅食乜都無所謂啦!
五福臨門大拼盤 $260
賣相幾雅緻,好似個全盒咁,五福臨門,就一次過試試依度5款嘅前菜,包括:涼拌青瓜(散叫價$34)、蔥油海蜇($68)、油炆筍($48)、油爆蝦($68)、鎮江肴肉($70),比散叫平廿零蚊,但散叫就可以揀番啲自己嘅心水喇!5款冷盤都甚有水準,款款都好啱食,各有特色,個人鍾意個油炆筍同油爆蝦,前者筍嫩炆得入味,鹹中帶甜;後者其實可熱食或冷食,蝦肉爽甜,帶有少少酒香!
火瞳翅(要預訂)$1820
依個價錢,夠我係平時同班朋友一圍枱食餐飯兩次咁滯。火瞳翅分咗一份或半份,我哋依個係半份,足15兩翅,係乜嘢翅就無問,但一梳梳好大梳,絕非流嘢,翅身粗壯且彈牙,咁大梳食,甚有咬口,半份火瞳翅都分到8-9碗。翅正湯都唔輸蝕,湯色清澈,但就火喉十足非常清甜。而火瞳(即雲腿最靚嘅其中一個部分)同時另碟上供食,仲一腿兩食,一碟係純腿肉拆絲,另一碟就皮連薄肉斬件上。
清炒河蝦仁 $120
以前食清炒蝦仁、龍井蝦仁啲蝦仁都好鬼細粒,但金滿庭賣嘅蝦仁係少有地咁大粒,簡單清炒,鮮甜蝦味得以細嚐,啲老細就係要食出依類要求。
奶油津白 $60
津白雖然只係平價菜,但經過廚師巧手,一樣成為好菜式,依個奶油津白我就覺得可以話係粗菜精做喇!津白本身都清甜,配以鮮奶為主所做嘅奶油汁獻,食落津白更滑更甜。如果灑多少少金華火腿碎碎仲靚仲好。
千張豆腐 $82
甚考刀工嘅千張豆腐,賣相一流,師傅將豆腐切得厚薄均一,一塊疊一塊環形鋪晌碟上,中間再放上爆炒過嘅瑤柱絲、蝦米、冬菇粒、蔥粒,豆腐滑溜,而配料惹味,兩者配合,有辣有滑,甚有得色!
椒鹽小黃魚 $32/條
依家啲小黃魚都唔可以再叫「小」喇,之前晌新城市廣場小南國食過,又係幾大條吓,依次晌金滿庭食嘅,都係幾大條吓。比起小南國,依度嘅小黃魚食落無咁甘香,幸好嘅係內裡仍然肉嫩。
八寶鴨(要預訂) $280
因為係一個做法幾繁複嘅菜,所以要預訂。鴨係去咗骨,內裡塞滿晒材料,大概有糯米、蓮子、松仁、栗子……等,先炸一炸再燜,鴨身酥軟唔肥膩,肉質咬落有嚼勁,味道鮮甜濃郁。而配料蓮子、栗子同樣燜得鬆化,層次豐富。
清蒸鰣魚(要預訂)$500
鰣魚、鮰魚、魛魚,被譽為長江三鮮,今次有幸見識三鮮之一「鰣魚」,鰣魚不單要預訂,仲要一條兩斤幾、三斤左右,賣到成$500條,都真係幾貴。食法一向係清蒸,因為鰣魚本身味道鮮甜,清蒸最好,簡單以金華火腿吊起鰣魚的鮮就夠晒喇,確實魚肉鮮嫩,油脂豐腴。不過,$500叫我食條魚就有啲唔捨得喇。仲有樣嘢唔到上菜都唔知,雖然叫咗一條鰣魚,但會分開兩碟上,一碟一邊咁,仲會上枱時經理先晌你面前起咗層魚皮。
雪菜肉絲炒年糕 $72
簡單一道上海炒年糕,重點放晌年糕身上,年糕炒得煙韌又唔太油,雪菜浸過唔太鹹,已過得關。最怕遇到啲年糕炒到又腍又爛,雪菜鹹到嗆喉,肉絲又無味嘅炒年糕。
招牌炒飯 $82
叫得「招牌」二字,應該有水準。招牌炒飯,睇落好似普通嘅炒飯,有蔥粒、蛋碎、帶子同一大撮蟹籽,不過水準在於炒功,飯粒分明,配料平均分佈飯中,食完碟底無油,唯一係既裝飾又係撈埋一齊食嘅蟹籽,晌上碟時放晌飯面好求其,偏埋一邊,否則連賣相都攞得更高分。
依餐飯食咗咁多嘢,仲好嘢連連,由衷一句:多謝老細啦! |
|
|
景逸軒
|
標題 : 扮西式,流到極 |
地址 : 都會道7號都會海逸酒店8樓 |
地區 : 紅磡 |
|
現時分數:
|
日期 : 2011-07-07 17:55:24
四月尾有個團購推出以$138價錢(另收取每位加一服務費$13.8,茶$10,芥$7.5),可以晌都會海逸酒店嘅景逸軒豪嘆、燕窩、花膠、鮑魚、龍蝦餐,原價$468,實在好吸引,有效期仲去到八月尾,所以一次過買4張,等到六月中作為賀姨仔、舅仔生日,我請客豪嘆番一餐!景逸軒實際係漢寶集團管理,因為開晌酒店內,格調比較高雅。
其實個套餐睇落幾好,前後共有6道菜,係一人份逐位上,而且其中由湯、主菜、其中一個熱盤、甜品都有得揀,各人可按喜好自選,雖然要晌訂枱時決定埋要揀咩,但都唔係太大問題。但未講啲餸菜好唔好食之前,先評佢個整體,點解個題目叫「扮西式,流到極」,因為無論晌環境、招呼、上菜流程都未有酒店內嘅餐廳水準,以西餐位上嘅形式更大有一段距離,講真,如果以佢所標嘅正價$468一位(未計茶芥加一),得罪講句,真係有啲搵笨喎。
環境 – 因為當晚有兩批人晌度擺酒,整個全海景宴會廳被間開頭尾作婚宴,淨番中間一截可擺約8枱嘅地方同一啲「走廊位」作堂食,感覺好委屈,嚟得依度食,價錢又唔係平,但個場間成咁,有啲得失客。我哋已經好啲,訂枱早6:30pm,去到叫做有得揀,後嚟嘅客真係走廊位都要坐,感覺唔多爽!
招呼 – 因為大部份枱用咗做酒席,時間尚早又未開席,可能係咁,有啲侍應應該係負責做酒席上菜,依家趁早過嚟幫手,招呼吓堂食嘅客,但似乎生手到極,刀叉點擺又唔知,啲菜上咗未又唔知。有個著黑色套裝嘅女部長或經理,淨係識對住啲侍應黑面,都無處理好個管理。
上菜 – 一塌糊塗囉!因為我哋係食套餐,有湯有冷盤、主菜、甜品,一個菜接一個菜,應該有一定次序,全部位上。上段提過個女部長(或經理),問咗一句係唔係主菜揀咗煎和牛,就夠膽死連個湯都未上,就問埋我個和牛要幾成熟,即刻煎開隔離枱嗰份,就順便煎埋我嗰份,我同佢講個湯都未嚟喎,佢就照煎。而其餘嘅主菜,亦係先後次序分開上,好亂。仲有,一道菜未完,又嚟一道菜,因為係一位上,堆到成枱都係嘢。都未夠亂,第五道菜,3個要豆腐,1個要貴花雞,豆腐食晒個雞都仲未到,搵人跟跟又跟跟,佢哋先入廚房追,等咗一陣,見個侍應一捧就係7、8碟雞出嚟,即係廚房儲單先做嘢啦,老派中菜陋習。你改唔到依啲陋習,就唔好扮西式,6道菜,逐位上啦。徒有西式賣點,完全無做西式服務嘅水準,講多個例子,人哋有水準嘅,問你飲咩湯之餘,仲記低咩個客要咩湯,佢哋仲衰到湯一嚟唔係問邊個飲邊款,而係就咁將4碗湯(共2款)放晌枱中間就算。
套餐內容方面:
第一道菜(湯類,每位3選 1)
-帶子海皇羹:湯中帶子大大粒,甚有睇頭,海皇羹做得鮮甜,湯身厚而不餬。
-蟹肉海皇燴花膠羹:蟹肉唔多,反而花膠落得狠,真係羹羹湯啖啖花膠粒。蟹肉少唔知係咪拆晒俾隔離做炸蟹拑!
-燕窩花膠海皇羹:我哋無人揀依個,無得評。
第二道菜(頭盤,指定)
-冰鎮鮑魚,每位一隻約7-8頭,鮮鮑魚唔知咩國藉,店子無標明,相信唔會係貴嘢。賣相0分,無他嘅,話冰鎮變成澤國嘅水浸,再求其墊炷菜晌底,舊鮑魚底下仲有少少冰碎,點知就晌隻碟上「sir嚟sir去」。件鮮鮑幾大件,已切件方便用刀叉食,有咬口,不過味淡,鮑味無乜,可能始終係鮮鮑,點芥辣提味,有啲無謂。
第三道菜(主菜,每位5選 1)
-堂前煎和牛(澳州):勁失望,似頭盤多過主菜,和牛薄且細,面積就如一集豉油碟大少少,感覺係好將貨就價,煎嘅火喉又唔得,我要五乘熟,食落近乎生嘅,只係熟咗肉面,唔好食到都無嘢再想講,睇相吧啦!
-芝士波士頓龍蝦配伊麵(半隻):我哋所揀嘅三款主菜中,依個龍蝦最有睇頭,又最有主菜樣。開邊波士頓龍蝦以芝士焗,龍蝦肉焗後仍爽身,蝦味十足,蝦鉗大大隻,啖啖肉。伊麵略嫌煮過咗火,稍稍腍身,但仍可接受,味道亦唔錯。
-金蒜粉絲蟶子皇或元貝(兩隻):無選
-法式煎石斑扒:初頭估佢何謂法式煎?睇樣塊石斑扒似係炸嘅,塊扒同樣好細塊,望張相同個蕃茄比一比你就幻想到有幾大,好彩嘅係整得幾脆嫩,伴碟嘅蕃茄亦鮮甜,重點係個醬汁,石斑扒同蕃茄都淋咗法式嘅文也汁嚟輕焗,依個汁係以牛油同埋檸檬汁煮成,所以香得嚟帶少少酸,配魚就好夾,令味道鮮味咗。
-頭抽煎焗海中蝦:無選
同為主菜,但份量好唔平衡,下面嘅瑤池貴花雞都有相同情況,依方面當然同成本有關,但酒樓亦要作出取捨。例如,既然和牛成本貴,你只可以俾得嗰一丁小塊,出嚟個效果又唔好睇,倒不如用其他食材代替。
第四道菜(指定)
-竹笙花野菌浸時蔬,本應係逐位上,但既然係指定菜式無得揀,所以酒樓都索性4人份成碟上,竹笙爽脆、野菌出奇地菇味濃郁、湯頭亦做得頗為鮮甜,既然幾方面都配合得咁好,點解仲用啲有苦澀味嘅小棠菜呢?
第五道菜(主菜,每位2選 1)
-翠塘海鮮豆腐:一流,我哋幾個都一致讚不絕口,因為底下係蒸蛋白作為「豆腐」,火喉拿捏好,超滑溜。翠塘海鮮,玻璃獻加海鮮粒淋晌「豆腐」之上,撈埋食,又滑又鮮活,高水準之作。
-瑤池貴花雞:好「雞」,係講個份量,一隻碟仔放上3件細細已斬好嘅雞件,無伴碟無裝飾,似個佐酒小食囉。以一道菜而言,感覺難免有啲寒酸!若果講味道,雞件係嫩滑無肥膏,帶鹹香,仲見到黐住少少瑤柱絲,瑤池一詞應該係指瑤柱浸雞嚟整。
第六道菜(甜品,每位3選 1)
-香芒凍布甸:布甸味道無驚喜,兼質感較削,唔合格,而個名應該加番「迷你」二字貼切啲囉,雖然做成魚形幾別緻,但確實細得可憐,依度又係另一個寒酸位。
-薑茶湯丸:正路好多,薑湯穩打穩紮,湯丸共4粒,全是芝麻餡,皮薄麻香。
-蜂蜜脆麻花:絕對稱得上好好食,脆麻花炸得鬆化香脆,醮少少蜂蜜,蜜香,輕盈,唔漏。真係唔明點解啲甜品質素有咁大落差,既然啲布甸咁唔得,就不如唔好賣,盞俾個客有唔好印象。假如咁啱啲客揀晒食布甸,仲以為佢哋啲甜品好差添呀!
總結係無論晌環境、招呼、食物安排、流程都未有酒店級食肆嘅水平,美味度就50/50,有彈有讚,但作為酒店內嘅食肆,消費也會偏高,顧客必定有所期望,故此,以今餐嘅食物計,個人覺得係唔合格,而且仲差一段頗大嘅距離。
|
|
|
八方雲集 Bafang Yunzi Dumpling |
標題 : 大腸蚵仔麵線搭黃金咖喱鍋貼 |
地址 : 太子通菜街171號 |
地區 : 太子 |
|
現時分數:
|
日期 : 2011-07-06 19:24:40
一班教會朋友,今期又想轉轉口味,唔晌太子食,走咗去遠啲近旺角嘅八方雲集食鍋貼,因為地方細細又枱逼逼,唔方便叫埋一齊食,所以各有各叫,各叫各食。睇咗一輪,扑鎚點10號餐,有細份嘅大腸蚵仔麵線,搭黃金咖喱鍋貼,飲豆漿,盛惠$29。
大腸蚵仔麵線
雖然叫做細份,但都唔係嘢少,況且食麵線係連湯飲,好似食碗仔翅咁,所以一個細份大腸蚵仔麵線都幾夠飽肚,再者,個麵線都算足料啦,無話得嗰一粒半舊蚵仔大腸。麵線煮得OK,唔會太過爛太過餬;大腸嘅處理都可以,至少清洗乾淨無朕怪味先,滷水都頗為入味;而蚵仔都幾大粒飽滿又完整,鮮味就一般,整體嚟講,算係唔錯喎。因為小弟唔好辣,所以無加啲辣菜脯,否則可能仲好味。
黃金咖喱鍋貼
嚟八方雲集,鍋貼係我嘅鐵膽,依次想食得醒神啲,所以揀以咖喱豬肉做餡嘅黃金咖喱鍋貼。食過好幾次八方雲集嘅鍋貼,水準都保持到,今次亦唔例外,鍋貼皮夠薄,咬落唔會一口厚粉,煎得底脆香口,如果控制到煎得無咁油就仲正;咖喱豬肉調味得唔錯,咖喱雖唔及印度、泰國嘅咖喱多層次嘅香,但都唔係無個性嘅死辣,而且辣度屬中和,叫做啱我口味!
晌太子、旺角區,$29食餐晏,有時快餐店都唔得啦,加上八方雲集晌味道嘅穩定性上都無話大起大跌,所以,如果唔係一定要試新嘢或要食得好好,佢都算食得過嘅小店! |
|
|
太興燒味餐廳 Tai Hing Roast Restaurant |
標題 : 銀行贊助免費早餐 |
地址 : 中環租庇利街12-13號萬安商業大廈地下A 及B舖 |
地區 : 中環 |
|
現時分數:
|
日期 : 2011-07-05 09:59:52
透過銀行信用卡推廣活動,換咗份太興嘅免費早餐,平日多數晌屋企食,今朝就早啲出門,去太興啦!免費早餐券係可以換乜嘢早餐都得,認真唔錯,無乜諸多限制。爽爽手就睇中佢個人氣早餐N3,係乜,就係火腿通粉拼德國香草腸,配鬆脆多士,加咖啡或茶。
火腿通粉 – 可能太早,客唔多,通粉有啲整定咗一段時間未去貨,所以有啲腍,火腿、湯底都係普普通通咁啦。
德國香草腸 - 唔似係普通貨色,無一般茶記啲腸太鹹嘅通病,隱約有朕香草味,肉質又唔會太削太霉,幾好喎。如果煎得帶少少燶面,腸衣相信仲香仲脆。
鬆脆多士 - 一整塊厚多士,烘得軟熟、鬆脆,但又出現茶記另一個通病,點解係都要俾舊未解好凍嘅牛油,「硬挖挖」叫人點搽,結果咪搽到塊多士面「熔熔爛爛」囉
熱奶茶,夠熱夠香,但唔算太滑,希望將來做得更好啦。 |
|
|
三井飽餅專門店
|
標題 : 鬆餅抵到暈 |
地址 : 黃大仙鳳凰新邨雙鳳街24號 |
地區 : 黃大仙 |
|
現時分數:
|
日期 : 2011-07-04 17:56:28
晌附近嘅百樂門燒味荼餐廳食完晏,同太太兩個人周圍逛,因為甚少嚟慈雲山,仲晌鳳德公園打個轉,大話西遊咁。但由上面毓華街行落去黃大仙港鐵站,經個依間三井,見啲鬆餅整得幾似模似樣,又好抵,就不如買啲返屋企下午茶!
提子鬆餅 $3
如果叫英式鬆餅或士乾(scone)就一講就易明係乜,$3真係幾抵,都幾大個吓,質感幾好,比一般士乾軟身同無咁乾,返到去我哋都係搽番果醬嚟食。
藍梅鬆餅 $4.5
依個就係美式鬆餅(muffin),雖然做得幾鬆身,但只有面面一撮仔藍梅醬,其實成個鬆餅無乜藍梅味,估計都係用色素溝粉漿焗,所以睇外觀先幾有藍梅鬆餅個樣。不過,$4.5一個街坊嘢,都唔會一早有太多期望啦!
|
|
|
荔苑茶餐廳
|
標題 : 垃圾下午茶餐之冰雕沙律 |
地址 : 美孚景荔徑8號盈暉臺家居城1樓116號舖 |
地區 : 美孚 |
|
現時分數:
|
日期 : 2011-06-29 09:53:30
返舊屋搬嘢,搞晏咗,所以就落去最近晌盈暉臺嘅荔苑食嘢,茶餐廳穩穩陣,同埋以前都有食過,,唔好又唔差嗰隻,又有下午茶時間,下午茶餐2:00am-5:00pm,但午市特價套餐都仲有做11:00am-5:00pm。
下午茶餐,分精美小食($18-$24)、薯條茶餐($22-$24)、即炒粉麵($30)、沙律茶餐($24),包茶啡,睇落都唔叫平,至少比起連鎖快餐店一個茶餐可以廿蚊唔使,相比之下佢就貴咗幾多啦!至於午市特價套餐,全部都係炒粉麵飯,賣$32,包例湯及茶啡。諗落,我就揀午市特價套餐,因為炒粉麵選擇多,成30款,又有湯飲,比起下午茶個即炒粉麵都係貴兩蚊;老婆唔太餓,要咗個什果沙律茶餐。
下午茶餐 - 什果沙律茶餐 $24
我稱佢為冰雕沙律,一啲都無誇張,啲什果結晒冰,究竟係唔係有人叫咗什果冰唔要,將啲什果冰倒落我兜沙律度呀?未食,碟底已經成灘水。仲有,所謂沙律,只係一pat撈沙律醬撈到過晒火嘅粟米粒,加幾片生菜,搭塊腍到霉、紅到發光嘅蕃茄晌面,兼且細碟到無譜。依碟「什果冰沙律」賣相驚嚇度可列入地獄之作,味道唔使我多講喇,睇相都幻想到有幾難食啦!結果,老婆咪差唔多凈飲杯杏霜,加埋食我嗰少少飯囉。
午市特價套餐 - 椒鹽豬扒飯 $32
比起個冰雕沙律,我個飯算正常好多,好彩啲飯又比得多,滔咗一碗仔俾老婆,我都仲夠食。不過,常食到嘅椒鹽豬扒,應該係乾身啲,佢個就加晒獻嚟炒,惹味但唔似椒鹽,似唔酸嘅咕嚕肉,而啲豬扒碎濕濕,好似啲頭頭尾尾唔好嘥用嚟炒。總之,都算入得口!本應有個例湯節瓜鱆魚煲肉排,問個伙計好耐都未嚟,佢話無晒咯喎,跟手指指牆加多一句,寫住送完即止架,原來牆上有個「是日精選午餐」,下面寫住是日例湯係乜,括住(送完即止),咁你唔早講!餐飲嘅奶茶,唔知係咪係食到一肚火,所以杯奶茶飲落,覺得寧捨唔香又唔滑。
依間嘢,入晒黑名單啦,話過唔再幫襯,就算打大風落黑雨都寧願行遠啲去美孚新村搵食呀! |
|
|
Da Dolce Gelato Italiano |
標題 : 生日蛋糕新主意 |
地址 : 太子彌敦道750號始創中心地下B舖 |
地區 : 太子 |
|
現時分數:
|
日期 : 2011-06-28 10:30:37
以前試過da dolce嘅Gelato意大利雪糕,今次轉轉口味試佢嘅蛋糕。其實,除雪糕,da dolce仲有賣甜品、蛋糕,只係賣成$238一磅嘅蛋糕(並非雪糕蛋糕,而係烘焙蛋糕),的確售價感覺有啲偏高。幸而有團購嘅「補貼」,依家$99就買到一磅,不過手續有啲麻煩,必先以團購嘅優惠券親身去換取da dolce烘焙蛋糕禮券,而訂蛋糕又要提早至少5日致電預訂,不過,平咗咁多都無所謂啦。睇番佢哋啲款式,比起平時食嚟食去都係嗰幾間連鎖餅店嘅出品,有三幾款又真係幾有新鮮感,例如:紅酒無花果慕士蛋糕、香檳熱情果慕士蛋糕、綠茶豆腐蛋糕等,既然有朋友生日,就一於試吓新嘢啦。
眾多款蛋糕中,揀咗款叫Last Dance嘅蛋糕,即係紅酒無花果慕士蛋糕,紅酒搭無花果,依個配合都真係非常少見,感覺可能幾特別。
先講賣相,蛋糕嘅造型雖然只不過係三角形,但比起常見嘅圓形或方形已顯出少許心思。其實,凈睇蛋糕外觀都睇出佢嘅做法唔複雜,底層係海綿蛋糕,中層係無花果慕士,面層係紅酒軟漿,做法無花巧,但食落味道確實有驚喜。無花果慕士打得細滑,食到濃郁無花果嘅味道,仲帶有無花果較獨有嘅甜香;配以紅酒軟漿,淡淡嘅酒香,入口嘅軟滑,幾夾個無花果慕士,如果慳皮啲用紅酒啫喱蓋面,一定大打折扣!最緊要係朋友試過都齊聲讚好。
|
|
|
滬江飯店 Wu Kong Shanghai Restaurant |
標題 : 愛恨交纏 |
地址 : 尖沙咀彌敦道27-33號良士大廈地庫 |
地區 : 尖沙咀 |
|
現時分數:
|
日期 : 2011-06-22 18:25:21
又係一年一度嘅生日飯,今次揀嚟滬江,因為太太想試好耐,姨仔、舅仔又無意見,所以一行四人訂枱食番餐。依家有水準嘅館子,逢星期五、六、日唔訂枱嘅話,未至於一枱難求,但可能有排等。好似今晚,成個場坐滿晒,我哋「專燈」揀食早啲(6:30pm),食完8:00pm鬆啲,大棚人向地庫入口等緊枱,真墟冚!
其實我自己都幾鍾意滬江,一來環境幾幽雅舒服,客群比較斯文啲,所以,比較靜局少少,就算坐滿人,都唔似一般中式酒樓咁嘈嘈閉;其次,服務一環又做得幾熨貼,茶式穩定有水準,價位以尖沙咀中高檔計,佢唔算貴。
今日賀小弟生日,自然由我發辦,點菜時盡量平衡各方「利益」,希望大家啱食,結果就係2個小食、2個點心、1個素菜、1個肉、加多1個墊肚嘅炒年糕,可能都有啲點多咗,所以都無位攝甜品。
五香牛肉
唔似一般常見色澤深沉,炆煮腍透嘅五香牛肉。單睇表面,似係白烚牛肉,凈食嘅話除咗牛肉就無乜其他味,所以佐料係一碟帶有好重花椒八角味嘅醬油。由於牛肉切得非常之薄,得嗰2mm厚,食落好柔軟,但咁嘅做法個人覺得麻麻。
蜇皮炒雞絲
依個小食盡見師傅刀功,蜇皮、雞絲都切得幼細一致,帶點麻油香,而蜇皮咬落爽脆,點少少醋,效果仲正,有種醇香嘅醋酸,和一和啲麻油,所以,依碟我哋清得最快,唯一明顯嘅問題係落油過好,食到碟底一灘油咁!
招牌小籠包
一客4件唔使你推我讓,包嘅手勢唔差,十多摺,皮夠薄;而肉餡香而不膩,湯汁多,筷子夾起湯汁真係晌個包內盪吓盪吓,絕對唔輸蝕比其他專做小籠包名店。
素鍋貼
同樣一客4件,賣相包得飽滿十足,鍋貼煎得底香皮脆,菜餡感覺清新,食得肉多,不妨試試依個素鍋貼。
豆腐餃子
嚟親都會預訂,豆腐片到薄一薄做餃子皮,又唔易夾爛喎,已見心思及手功啦,再者,本身味道真係好食,豆腐味濃,菜葉幼細,伴著個玻璃獻汁,味道更鮮甜,唔單調。
茶樹菇烤肉
係時令精選,唔係常設晌菜牌之中,一心諗住菇菌有益,點知出事,烤肉原來係紅燒豬肉,幾肥吓嘅五花腩,切件後以茶樹菇作配菜紅燒,完全體驗出上海菜濃油赤醬嘅神髓。不過,唔鍾意肥又唔鍾意太油嘅人,依道菜一睇個賣相就嚇死。雖然味道確係香甜惹味,但始終都係肉太肥、油太多,所以,出現滯銷添!有啲愛恨交纏嘅感覺,又想食,但又太肥脷。
津白肉絲炒年糕
屋企人一晌都鍾意食炒年糕,所以,就點依個代替粉麵飯。年糕份量頗多,反而津白、肉絲唔太多;年糕炒得軟糯,又掛滿晒醬汁,相對上面個茶樹菇,嚟得無咁油,多番啲津白感覺就更好喇! |
|
|
Paisano's Pizzeria & Sub Shop |
標題 : 唔該大碟啲啦 |
地址 : 中環擺花街9號 |
地區 : 中環 |
|
現時分數:
|
日期 : 2011-06-14 16:16:41
身為中環打工仔,食完晏自不然晌中環同圍盪吓,依間薄餅店知佢開咗好耐,因為行過擺花街,次次經過都被佢嘅24吋大薄餅吸引,真係好巨型,堪稱全城至大,而上環新開嘅Pizzeria Jacomax都有做超巨薄餅,最盡都係去到51cm(即係20吋),將來唔知會唔會有人整到成28、30吋呢?當日見人外賣24吋薄餅自取,個盒大到真係唔講得少。
卒之等到佢有團購,$59當$120使,無任何限制,餐牌上任何食品飲品均可享用,即刻買張睇門口,趁個星期六長週要返工,搵埋以前學整包嘅同學仔I,大家都係附近返工,走嚟一齊試試先!
我哋兩個人,當然食散件啦。其實佢哋啲薄餅原個買,分14、16、24吋,指定款式有7款;如果買件裝,就以24吋薄餅1開8嘅形式,價錢大概$35-$45,大大個薄餅放晒係鋪面個廚窗,約有4-5款揀,揀好之後佢都會入一入爐烘翻熱。而鋪位後半截就係個開放式廚房,晌等翻熱嘅時間,最佳娛樂咪就係睇師傅整薄餅、搓皮、飛餅底、落料,一覽無遺。平時星期一至五晏晝都幾抵食,因為有套餐賣,$35-$45,視乎揀薄餅、意粉定潛艇包,仲包埋杯嘢飲添!
招牌薄餅Paisano's Pizza $45
招牌薄餅就等同去Pizza Hut叫超級至尊,晌咁多款薄餅中配料最多款,有意式肉腸、辣肉腸、蘑菇、黑橄欖、洋蔥、水牛芝士,加埋秘製蕃茄醬(除咗拿波里風薄餅用香濃蒜蓉醬之外,其他都係用秘製蕃茄醬)。如果成個買,14吋賣$130、16吋賣$150、24吋賣$260,而件裝Paisano'sSlice都要盛惠$45,確實唔算平,餡料亦唔係話鋪到滿,不過,水牛芝士落得一啲都唔手軟,每啖都充滿香濃芝士味,批底係薄批類,但出嚟嘅效果唔係脆底,而係軟底,仲好軟熟添,幾特別。有樣嘢要向店方講講,既然咁大件薄餅,係咪要用番隻有咁上下大隻嘅紙碟呢?唔使等啲薄餅拖晒晌枱面,唔係太衛生丫嘛!
紐約風餡餅New York Calzone $45
即製特色餡餅共有3款:紐約、菠菜、意式肉腸/肉丸,或者自選兩款餡料,全部都賣$45一客。即叫即製、即焗,等候極度需時,佢話廿分鐘,我就覺得半粒鐘都嚟,所以趕時間就千祈唔好點餡餅。我哋唯有食住(薄餅)等,佢會俾個號碼牌仔過你,整好就會送嚟。
叫做餡餅可能唔夠傳神,唔知可唔可以叫佢做「薄餅包」呢,因為見佢整時,以薄餅皮為基礎,包餡,對摺,埋口,扭花邊,入爐。紐約風餡料有煙肉、洋蔥、水牛芝士、忌廉汁,一切開,啲溶透嘅芝士同忌廉汁卸晒出嚟,好澎湃咁,勁過啲流沙包呀,配料雖然唔多,但味道唔錯,衰在係個餡餅焗過籠,有啲燶底。
飲品
都係汽水、啤酒、咖啡,但又竟然提供紅酒、白酒喎。咖啡選擇都唔多,共5款,我就揀鮮奶咖啡($15),同學仔就要意大利泡沫咖啡($20)。我杯鮮奶咖啡雖唔係驚為天日,但飲落咖啡味沉香厚實,輕輕回甘;同學仔對杯泡沫咖啡嘅意見係,做得唔錯,泡沫打得輕身,咖啡香於口內遊走,細嚐出餘韻,聽落好似好高境界咁!
閒日午飯時間人多到衝鋒陷陣咁嘅局面,相反,晌星期六悠然得多,我哋仲揀咗落地庫最埋牆死角位張枱,貪騷擾少,雖然無景,又唔似starbucks有超舒服梳化凳,但兩個麻甩佬吹吓水,講吓工作嘢,講吓屋企嘢,減減壓人都鬆番啲啦!
|
|
|
生龍清湯腩
|
標題 : 何解人咁多? |
地址 : 荃灣城市中心二期G01號舖 |
地區 : 荃灣 |
|
現時分數:
|
日期 : 2011-06-10 19:08:42
成日見間嘢裡面外面都坐滿人,仲有三幾個晌度等位,心諗係咪真係咁好食呀?所以,終於搵日嚟試咗,可能有期望,食過之後感覺係比想像中差咗啲!環境逼,招呼又麻麻,廚房其中一個師傅仲不停咁爆粗,雖然你言論有自由,但唔符合公眾利益嘛,現場有細路,又有女士。真係試過就算,係唔明點解仲咁多人排啫。
西洋菜湯 $10
今餐最好,西洋菜夠嫩,份量勁多,滿到瀉咁滯,湯頭又清甜,簡簡單單一個西洋菜湯,無花巧,咁就已經夠討好!可能只係賣$10,都幾多客有叫。
健康野菌米線 $19
啱晒鍾意清淡嘅朋友,湯底都幾清淡,野菌有兩款菇:雞脾菇同冬菇,前者爽口清新,後者肉厚菇味濃,食菌絕對健康,米線不過不失。
蕃茄牛腩雲吞湯麵 $36
專賣清湯腩,以新鮮坑腩製作,仲話為配合唔同人口味,有腍啲、有肥、有瘦、有半肥瘦俾你揀。我就要咗半肥瘦坑腩,果然一舊坑腩一半係肥、一半係瘦,有舊仲係2/3係肥、1/3係瘦,所以,我諗佢都係大概揀俾客,邊有神心分得咁清。坑腩確係幾新鮮,好有肉味,不過,韌咗啲喎;雲吞有3粒,稍為細粒咗,但用料足數,幾夠蝦鮮味;麵條就真係普通,雖無梘水味,但就唔算爽;湯底就反而要讚一讚,蕃茄濃湯無呃秤,雖然唔似得勝香園嗰類濃到好似漿咁,但帶份清新酸香。 |
|
|
Pacific Coffee Company |
標題 : 輕怡午餐 |
地址 : 荔枝角寶輪街1號曼克頓山地下04-05號舖 |
地區 : 荔枝角 |
|
現時分數:
|
日期 : 2011-06-09 19:12:03
獲贈2張飲品券,,揀飲咩都得,所以搵咗個唔晒返工嘅星期六,嚟Pacific Coffee 度hea!
太太係朱古力粉絲,咖啡佢本人麻麻,既然有齋朱古力嘢飲,就必然成為首選,所以佢要咗朱古力樂園$29(Chocolate Paradise),即係熱朱古力,幾濃香朱古力味;我就算係掹車邊嘅焦糖粉絲,啱啱今日又天氣有啲熱,所以就揀咗焦糖旋風$33(Caramel Swirl Chillino),即係焦糖.咖啡.沙冰(註:個杯係私傢杯,咁啱都係Pacific Coffee嘅自攜杯啫),當然唔及飲熱啡般香濃,但夠冰凍,咖啡配上焦糖香,精神為之一震。再自費搭個個蛋批,加個凱撤包,咁就成為咗我哋一個輕怡午餐喇。
菠菜蘑菇蛋批$20(Spinach & Mushroom Quiche)
太太都幾鍾意食批,閒時遇到Pie & Tart都會買番一件嚟食。今次亦都揀咗個蛋批,睇樣都見佢幾吸引。點好食物之後,店員會先拎去翻熱,不過,等咗都大概有10-15min,都只係微微哋暖,而蛋心稍為有點實,蛋味尚可,而批底亦硬身咗少少,可能係雪得耐而翻熱效果唔理想,唯一可取係菠菜同蘑菇落唔少,填滿成個批心。
燒汁手撕豬肉凱撤包$29(BBQ Pulled Pork Kaiser)
係唔係手撕就唔多肯定,但燒汁豬肉就頗為惹味,豬肉唔嚡亦唔韌。凱撤包依款包都少見,小弟都係第一次食,但何謂凱撤包?外型漢堡包形,但面面烘得有點點燶印,應該個包面係加咗啲芝士先拎去焗製,包身極之鬆軟有彈性,確係唔錯!
依類咖啡店嘅另一賣點,就係環境好hea,寬闊嘅大梳化,有雜誌、有報紙睇,仲有幾台電腦可上網,不過我鍾意坐晌梳化刨報紙,老婆就話張梳化椅唔係太好「挨」喎,可能個挨背比較深;但係我就覺得幾OK喎,可能小弟無腰骨,成條死懶蛇hea晌張梳化度,「印印腳」,嘆住杯冰!
註:下面個每人消費係計晒所有嘢,實際我就梗係淨俾個蛋批同凱撤包錢啦。 |
|
|
鳴門魚湯麵亭
|
標題 : 祝君安康 |
地址 : 何文田勝利道4號 |
地區 : 何文田 |
|
現時分數:
|
日期 : 2011-06-08 22:03:42
店舖細得緊要,一眼睇晒,三十多個位左右,除咗對窗及對廚房一列吧位,其他都係二人或四人細枱仔,我哋兩個人坐二人枱叫咗3樣嘢,都緊緊夠擺;真係好逼,近乎背對背,膊頭撞膊頭,好老實,坐就坐得唔太舒服,亦唔方便坐我耐,因為等位者眾。可能環境細先天不足,所以服務幾好,作為後天搭番夠,店員時刻保持笑容之餘,說話有禮。
佢哋主打係個招牌鮟鱇魚湯,不過亦有好多石鍋系產品,樣樣滾熱辣。冷氣似乎唔係好夠,我食嗰晚天氣涼,感覺都OK,但如果大熱天時就真係唔知咩景。確實,無論個魚湯烏冬,抑或石鍋焗飯,都非常有水準,將來會翻叮,但就一定揀番個天冷嘅日子,食咗包你一身暖晒。仲有,無加一,依點有啲睇唔出,因為出面好多賣拉麵、烏冬嘅鋪頭都有收加一嘛!
石鍋招牌鮟鱇魚湯烏冬 $88
一上枱,完全感受到嗰股「氣」,熱力逼人得緊要,奶白色嘅魚湯,呷一口真係好正。魚湯,以鮟鱇魚皮、魚肉熬出嚟,鮮甜重魚味而唔腥,帶少少膠膠哋,但唔係漿口嗰隻;魚肉,肉質緊密唔鬆散,唔係嫩滑嗰類,但又無話「嚡烚烚」得柴皮,應該叫做有咬口啦;烏冬,稍為腍身咗,可能石鍋嘅熱力不斷咁逼熟啲烏冬,食得慢放得耐就越影響佢嘅質感。
黑豚肉石鍋芝士焗飯 $48
黑豚肉帶有脂肪得嚟,食落唔會一口肥膏,而豚肉已醃過再煮,鬆化入味,啖啖肉香。面面加咗大量芝士,好似溶岩傾瀉,溶入豚肉同飯中,自然味道更上一層樓,芝香滿到瀉。飯底亦出色喎,珍珠米飽滿有飯味,帶黏而不削身,扒飯都扒快咗。
炸芝士年糕 $28
其實有啲貪心,因為上面個烏冬同焗飯都好夠我哋兩公婆食,叫埋依個炸芝士年糕純粹貪口痕,賣$28得兩粒(不過就幾大粒吓),心想都覺得有啲貴。年糕裡面混有芝士,浸脆漿酥炸,一口咬落去,咔嚓外皮應聲脆開,甘香,又唔會一口油,第一個觀感已經幾討好;內餡,年糕軟糯糯,煙煙韌,混入嘅芝士溶透,芝香令年糕味道無咁寡。真係幾正,送冰凍汽水或啤酒,相信效果仲夾添!
|
|
|
美心西餅 Maxim's Cakes |
標題 : 夠正唔夠靚 |
地址 : 中環中環港鐵站E18號舖(鄰近F出口) |
地區 : 中環 |
|
現時分數:
|
日期 : 2011-05-27 16:59:00
趁同事生日,乘機試新蛋糕,見美心出咗隻Opera (法國千層),有迷你版,賣$88,我哋得4個人就啱晒啦,其實見佢出咗段時間,睇樣幾得,都好想試架啦,依次自不然把握機會啦。
雖然同正宗嘅Opera無論形狀、層次都好似,但當然唔一樣啦,唔知係咪咁,佢中文名叫「法國千層」,唔用慣常嘅「法式劇院蛋糕」,不過名字嘅嘢都無乜所謂,最緊要係食到一件用心製作嘅靚餅。
從網上睇番,Opera源於法國,四四方方嘅形狀代表歌劇院嘅舞台,多層次嘅味道代表跳躍嘅音符。小弟嗰時晌工聯會所學嘅做法(唔知正唔正宗),係用浸有咖啡糖水嘅杏仁海棉蛋糕,配以一層咖啡牛油忌廉(其實係打起嘅牛油加糖霜同咖啡水而成),再一層軟心朱古力漿(黑朱古力溝淡忌廉),一層疊一層,最面淋上鏡面朱古力,再用刀修番正四邊,咁個蛋糕就可以見人喇!好老實,Opera好考手工,整嘅過程都幾煩,小弟試過自己整,失敗告終,自始無再搞過,都係買番嚟食好啲!
依次試美心嘅法國千層,雖然係變奏版,真係得喎,朱古力脆脆做餅底,海棉蛋糕浸有咖啡糖水,棄用牛油忌廉,改配朱古力慕絲同咖啡忌廉,感覺輕怡好多,因為牛油忌廉真係肥得好緊要。照樣唔同餡料層層疊疊,質感同味道多層次嘅配塔,各質感都做出應有效果,海棉蛋糕微微濕潤而帶有咖啡香,朱古力慕絲濃香幼滑,最中層嘅咖啡忌廉雖然咖啡味唔係好重,但輕柔軟滑,而每層均均勻勻平鋪都唔不容易架。唯一要挑嘅係最面嘅鏡面朱古力,好多泡泡,做得唔夠幼細平滑!
|
|
|
金裝燉奶佬餐廳 Daniel's Restaurant |
標題 : 蝦蝦扒扒.造反有理 |
地址 : 美孚美孚新村5期蘭秀道6號地舖 |
地區 : 美孚 |
|
現時分數:
|
日期 : 2011-05-12 15:59:11
前排,金裝燉奶佬推出咗2個抗通漲套餐,一個係珍寶吉列蝦皇配野菌海鮮天使麵,包餐湯、飲品,賣$36(原價話係$49);另一個係鐵板帶子汁肉眼扒(配白飯、意粉或薯菜),包餐湯、飲品,賣$38(原價話係$51),咁嘅價本身已經平過啲連鎖快餐店。點知,Groupon晌四月做咗個團購,前者蝦皇收$26,後者肉眼扒收$28,平成咁都未止,仲要餐飲可揀特飲,怕你未夠盡興,再加送招牌蛋白燉奶,咁嘅組合,收咁嘅價,實行全民抗通漲,蝕住嚟做,雖然使用期限只得6日(4月16日至21日),但搵晚煮少餐飯出街食,仲係蝦蝦、扒扒,絕對造反有理啦!
依個團購一出,賣出咗成近三千個。屋企附近間燉奶佬,除咗新開張初期,都好似好耐未見過人龍喇!,時為7:30pm,雖然都有成約10個8個人等位,但都算幾快喎。如果你肯搭枱,仲快有得坐呀!由於係為團購券而嚟,坐低無需諗食乜,只係餐湯揀中定西,餐飲飲咩好。
餐湯
唔係紅湯白湯,而係中湯西湯俾你揀。我就要中湯,太太要西湯,中湯係青紅蘿蔔煲豬骨,大路嘅例湯,不過不失;西湯係餐湯羅宋湯,估唔道味道咁濃郁,酸酸辣辣,醒胃得很呀!西湯比中湯勝一籌。
珍寶吉列蝦皇配野菌海鮮天使麵
唔講得笑,隻蝦都真係足9吋長,無負珍寶之名,吉列脆炸,絕對香口,唔太油,係嫌佢層粉漿厚囉,咬落亦有蝦鮮味,都OK喎。天使麵比預期中煮得好,因為天使麵比較幼,所以晌外面食好多時都煮到爛,但今趟啲麵無過腍,仍有一定嘅彈性,醬汁就只係一般白汁,味淡薄,配以野菌、冬菇、雞脾菇、蟹柳同迷你帶子粒
鐵板帶子汁肉眼扒
肉眼扒要5乘熟,跟薯菜,配黑椒汁,兩者份量都唔少,不過啲帶子就迷你得緊要,差啲睇漏眼以為係薯仔粒。鐵板喳喳聲,黑椒汁帶嚟香噴噴既香味,肉眼扒夠晒腍滑,肉味就一般啦,切開仲帶丁點血水,5乘熟啱啱好,不過,稍鹹就變得味道大打折扣喇。薯仔粉香,蕃茄鮮甜,係對椰菜麻麻啫!
餐飲
今次同太太不約而同都係揀咗熱朱古力,原來係唂咕,比一般朱古力粉沖嘅嚟得香夾濃,略帶苦,正!以前曾經有朋友話,唂咕咪即係朱古力,其實應該係兩樣嘢,唂咕應係純可可豆而製成,朱古力就溝咗其他材料而成。
蛋白燉奶
有凍有熱揀,兩款都叫晒,可以比較一下有咩分別,原來真係好唔同,當然唔係凍熱之分啦。整碗蛋白燉奶無加任何蛋黃,只係蛋白同牛奶,凍嘅比較啞色少少,而且燉奶面又較皺,不過燉奶質感較挺身,可以大羹大羹咁食,仲有就奶味超濃;熱嘅就超白超滑,質感反而削身啲,不過入口好滑溜,一食就「sir」落喉嚨。凍熱都各有特色,都不愧為招牌甜品,單叫都要成$13碗架!
由於,整晚都好旺場,由我哋等位到食完走人,都維持到九乘幾滿,有啲招呼唔徹嘅情況出現,服務有啲甩甩漏漏咁,而且上餐速度奇快,餐湯、主菜、餐飲都差唔多近乎一齊到,效率果然驚人,慕求做多幾輪生意。好彩,個燉奶食晒個餐叫上佢先上,如果唔係一枱都係之餘,個熱蛋白燉奶可能攤凍晒,效果又唔同咗。成餐飯有好有唔好,其實都想掹車邊咁俾個「好食」佢,但考慮到主菜比較多唔理想嘅地方,都係俾住個OK佢先啦!
依家百物騰貴,食個晏仔都三幾十啦,何況晚餐,希望各大連鎖快餐店繼續造反,做多啲反通漲嘅抵食套餐,共渡時艱抗通漲,等大家荷包唔使日日抆抆緊,令星斗市民既享好嘢,又可慳番啲! |
|
|
金裝燉奶佬餐廳 Daniel's Restaurant |
標題 : 蝦蝦扒扒.造反有理 |
地址 : 美孚美孚新村5期蘭秀道6號地舖 |
地區 : 美孚 |
|
現時分數:
|
日期 : 2011-05-11 15:55:48
前排,金裝燉奶佬推出咗2個抗通漲套餐,一個係珍寶吉列蝦皇配野菌海鮮天使麵,包餐湯、飲品,賣$36(原價話係$49);另一個係鐵板帶子汁肉眼扒(配白飯、意粉或薯菜),包餐湯、飲品,賣$38(原價話係$51),咁嘅價本身已經平過啲連鎖快餐店。點知,Groupon晌四月做咗個團購,前者蝦皇收$26,後者肉眼扒收$28,平成咁都未止,仲要餐飲可揀特飲,怕你未夠盡興,再加送招牌蛋白燉奶,咁嘅組合,收咁嘅價,實行全民抗通漲,蝕住嚟做,雖然使用期限只得6日(4月16日至21日),但搵晚煮少餐飯出街食,仲係蝦蝦、扒扒,絕對造反有理啦!
依個團購一出,賣出咗成近三千個。屋企附近間燉奶佬,除咗新開張初期,都好似好耐未見過人龍喇!,時為7:30pm,雖然都有成約10個8個人等位,但都算幾快喎。如果你肯搭枱,仲快有得坐呀!由於係為團購券而嚟,坐低無需諗食乜,只係餐湯揀中定西,餐飲飲咩好。
餐湯
唔係紅湯白湯,而係中湯西湯俾你揀。我就要中湯,太太要西湯,中湯係青紅蘿蔔煲豬骨,大路嘅例湯,不過不失;西湯係餐湯羅宋湯,估唔道味道咁濃郁,酸酸辣辣,醒胃得很呀!西湯比中湯勝一籌。
珍寶吉列蝦皇配野菌海鮮天使麵
唔講得笑,隻蝦都真係足9吋長,無負珍寶之名,吉列脆炸,絕對香口,唔太油,係嫌佢層粉漿厚囉,咬落亦有蝦鮮味,都OK喎。天使麵比預期中煮得好,因為天使麵比較幼,所以晌外面食好多時都煮到爛,但今趟啲麵無過腍,仍有一定嘅彈性,醬汁就只係一般白汁,味淡薄,配以野菌、冬菇、雞脾菇、蟹柳同迷你帶子粒
鐵板帶子汁肉眼扒
肉眼扒要5乘熟,跟薯菜,配黑椒汁,兩者份量都唔少,不過啲帶子就迷你得緊要,差啲睇漏眼以為係薯仔粒。鐵板喳喳聲,黑椒汁帶嚟香噴噴既香味,肉眼扒夠晒腍滑,肉味就一般啦,切開仲帶丁點血水,5乘熟啱啱好,不過,稍鹹就變得味道大打折扣喇。薯仔粉香,蕃茄鮮甜,係對椰菜麻麻啫!
餐飲
今次同太太不約而同都係揀咗熱朱古力,原來係唂咕,比一般朱古力粉沖嘅嚟得香夾濃,略帶苦,正!以前曾經有朋友話,唂咕咪即係朱古力,其實應該係兩樣嘢,唂咕應係純可可豆而製成,朱古力就溝咗其他材料而成。
蛋白燉奶
有凍有熱揀,兩款都叫晒,可以比較一下有咩分別,原來真係好唔同,當然唔係凍熱之分啦。整碗蛋白燉奶無加任何蛋黃,只係蛋白同牛奶,凍嘅比較啞色少少,而且燉奶面又較皺,不過燉奶質感較挺身,可以大羹大羹咁食,仲有就奶味超濃;熱嘅就超白超滑,質感反而削身啲,不過入口好滑溜,一食就「sir」落喉嚨。凍熱都各有特色,都不愧為招牌甜品,單叫都要成$13碗架!
由於,整晚都好旺場,由我哋等位到食完走人,都維持到九乘幾滿,有啲招呼唔徹嘅情況出現,服務有啲甩甩漏漏咁,而且上餐速度奇快,餐湯、主菜、餐飲都差唔多近乎一齊到,效率果然驚人,慕求做多幾輪生意。好彩,個燉奶食晒個餐叫上佢先上,如果唔係一枱都係之餘,個熱蛋白燉奶可能攤凍晒,效果又唔同咗。
依家百物騰貴,食個晏仔都三幾十啦,何況晚餐,希望各大連鎖快餐店繼續造反,做多啲反通漲嘅抵食套餐,共渡時艱抗通漲,等大家荷包唔使日日抆抆緊,令星斗市民既享好嘢,又可慳番啲! |
|
|
Marco's Oyster Bar & Grill |
標題 : 花海後的意式晚餐 |
地址 : 佐敦吳松街169號聖地牙哥酒店地下 |
地區 : 佐敦 |
|
現時分數:
|
日期 : 2011-05-09 19:53:41
同太太、一位舊同事一行三人晌三月中尾去咗一趟雲南自由行,事隔半個多月,約出嚟食番餐之餘,又分享番吓旅行嘅感受同體驗。依次去雲南,唔係去麗江、大理、香格里拉等出晒名嘅景點,而係主打去羅平,少少冷門地方,睇睇油菜花海(有興趣可以睇睇小弟嘅開飯遊蹤)。
揀咗佐敦嘅Marco’s,除地點都就腳外,因為啱啱遇著有個2人餐嘅團購,再加少少嘢,就夠晒三個人食。嚟到Marco’s,一室藍光色調,感覺很海洋,加上有個菲藉結他手,邊彈邊行又邊唱,久唔久整首唔鹹唔淡阿倫嘅暴風女神,幾搞鬼。雖然係星期五晚,約八成幾滿,我哋被安排坐近牆寬敞嘅卡位,輕鬆自在。
團購嘅2人餐叫做「Ti Amo意式浪漫2人餐」(享樂價$199),Ti Amo就是意大利文「我愛您」嘅意思,雖然三個人食依個餐稱唔上有咩浪漫,不過,能搵到啱傾啱講啱一齊嘅旅遊腳,都係一件值得開心嘅事,豐富嘅套餐包括:
- 鵝肝多士、餐湯各2客
- 10吋意大利辣肉腸薄餅1客
- 8安士紐西蘭優質肉眼扒配飯或薯菜1份
- 朱古力心太軟加雪糕2份
- 餐飲2杯
需要俾10%服務費(實價計,即係$19.9)
另外,再加多一客扒雞凱撒沙律($58)同一客法式薯蓉焗田螺($38),最後補番$125,即係全餐夾埋每人都係$110,都好抵食吓,再者,食物質量都幾好(除咗個別做得有啲過鹹之外),朋友都讚唔錯,所以,依餐都算超值!
蘑菇忌廉湯
餐湯得2客,我哋自不然分甘同味。唔係茶記個種加幾片罐頭蘑菇又白雪雪嘅忌廉湯,而係用大量蘑菇打成嘅忌廉湯,色澤泥啡色,滑身而蘑菇味濃,果然真材實料。
鵝肝多士
依個晌有期望之下,落差比較大,個人就覺得麻麻。多士?只係一塊無乜點烘過既法包,再搽上鵝肝醬,但味唔濃,真係食之無味,棄之都唔算可惜。
法式薯蓉焗田螺
薯蓉打得幼滑,不過有兩大問題,一係超鹹,二係放得牛油太多,雖然主體田螺肉味幾好,但都極之需要改善吓。
扒雞凱撒沙律
比想像中好好多喎,有啲驚喜添。烤雞意外地嫩身又唔嚡,仲有成三件雞胸肉添。沙律菜亦都新鮮爽脆,食落索索聲,加埋車厘茄、烘麵包粒、芝士碎,所以整體味道確係唔錯。
意大利辣肉腸薄餅
直徑足10吋大嘅辣肉腸薄餅,熱辣辣送上,辣肉腸鋪滿批面又鹹香,係有少少偏鹹咗;而馬沙里拉芝士落得夠重手,咬落每啖都係多而又香又軟嘅芝士;批底屬於薄脆餅乾底,唔算話好薄,但就好脆口,個人貼士,一定要快食,仲熱嘅時候就咔嚓應聲而開,攤凍咗就變得腍晒又韌身。
紐西蘭優質肉眼扒
8安士重嘅肉眼扒無欺場喎,厚切、份量又足,無話團購將貨就價,抵讚!質素方面,要5乘就係5乘,無過火,外層燒得幾香脆,而且,好軟腍,肉味夠,係帶有根位多咗啲,有啲瑕疵。配薯菜,有啲特別,「薯」唔係炸薯條或薯角,初時睇以為薯蓉,又唔係,實際係以蛋黃醬加薯粒做,有啲似蛋沙律三文治個種感覺,比炸薯條健康好多之外,味道亦無咁單調;「菜」估唔到會係蘿蔔喎,比較少見,講笑咁講依碟變咗「蘿蔔牛腩」,因為我哋分享嚟食而將啲肉眼扒切粒。
朱古力心太軟加雪糕
果然係招牌,雖然個心太軟比一般正常較細,但係質素高,烘焗拿捏時間好,所以做到外層好薄,內裡朱古力流心澎湃咁流出,朱古力味又夠濃,正!反而個雲呢拿雪糕普通咗啲,咁都唔打緊,主要都係食個朱古力心太軟啫。配埋杯即磨咖啡,味道都不俗,終結今餐好享受。
|
|
|
點喜來 Bird and Basket |
標題 : 點心專門店唔易做 |
地址 : 太子砵蘭街369號基隆大廈地下B舖及1樓 |
地區 : 太子 |
|
現時分數:
|
日期 : 2011-05-09 12:46:08
同個朋友講起話依家去嘆茶食點心一盅兩件都唔一定要去酒樓,朋友都附和話係呀,「叮叮」咪得囉,超方便,但要兼顧埋有質素嘅,「叮叮」就要行埋一邊,想講嘅梗係點心專門店啦,突然間多咗好多依類點心店,講出名嘅首推摘咗星嘅「添好運」,但連深水埗分店都實在排隊排得太誇張喇,小弟一晌都唔多會為食一餐而要咁排法,所以近近哋走過去太子頭,搵嚟「點喜來」試試。一行四人,飯腳又係表哥表嫂搭表姪女,因為表姪女晌太子學英文,搵佢哋一家一齊食就啱晒路線圖。
雖然晌裝修上花咗心思,採用簡約中式設計,壁畫畫有喜鵲立於梅花上嘅圖案,配合番自家品牌圖案,感覺幾雅致,但可惜環境有啲逼,座位又有啲窄,唔算太舒服。佢哋晌張枱下面加咗掛勾俾客掛袋,似乎效果一般,細嘅袋就OK,好似小弟個背囊,掛咗真係頂晒腳,仲唔舒服,好彩我坐近窗,一排窗都有窗台,索性成個背囊擺上去。硬件麻麻,服務殷勤算係軟件方面做番足啲。
點心介紹,A4紙大細,前後兩面,35款點心,3款甜品,2款特別飲品,圖文並茂一眼睇晒,不過實際又唔止咁少嘢,要知有咩食就睇張點心紙,分門別類,印晒價錢,收茶錢,無加一,都好易計到數,埋單前自己計計數就唔怕收多錢。
因為小弟今勻一餐當兩餐,所以三個大人加個9歲細路,前後叫咗13樣嘢,都算大食呀!樣樣點心嚟到都新鮮熱辣,感受得到即叫即整,整體質素唔錯,不過唔會叫有大驚喜,所以俾個OK佢,有幾款點心特別想講吓個人食後感:
菠蘿叉燒餐包 $14
見係食家推介,即管點番客試試。食過都叫唔錯,叉燒餡入口焦香有肉汁,包身軟熟,而面面嘅「菠蘿皮」鬆脆香口。菠蘿叉燒餐包好似係80、90年代產物,有時真係唔可以唔向啲點心師傅致敬,由叉燒包變叉燒餐包,再變出菠蘿叉燒餐包……。
筍尖鮮蝦餃 $20
餃皮晶瑩,食起嚟感覺比較柔韌,無咁削身。飽滿嘅外形包足餡料,筍尖爽脆,蝦肉味鮮,但似乎所落嘅豬肉較肥,話就話令餡肉甘香而油潤,不過,感覺都係肥咗啲啲!
黃沙豬潤腸 $15
腸粉拉得都透薄而幾滑身,豬潤新鮮,生熟度啱啱好唔嚡,要趁熱,凍咗豬潤變得少少硬身唔好食。
QQ薑薯煎堆 $16
傳統蓮蓉做餡嘅煎堆過年經常食到,依轉就改用蕃薯蓉,我就幾鍾意,因為除咗本身都鍾意食蕃薯外,蕃薯蓉比蓮蓉無咁甜,雖然咬口QQ煙煙韌,不過叫得「薑薯」而唔夠薑味,我就覺得點都講唔通架喇。
黑糖馬拉糕 $12
自從興咗黑糖依家嘢,好多嘢食都以黑糖掛帥,黑糖馬拉糕更大行其道,都好少見傳統嘅普通馬拉糕。侍應話佢哋嘅馬拉糕係用台灣黑糖做,但論色,比一般黑糖馬拉糕無咁黝黑,講味,都算帶有少少蔗糖香,糕身邊位有啲實。
反沙奶皇包 $12
鍾意食奶皇包多過蓮蓉包,無咁甜無咁「漏」,而且,奶皇包,甚至流沙奶皇包都算食得多,但「反沙」嘅就應該第一次食喇,味道上佢有奶皇個種濃重嘅奶香,包身做得鬆軟,質感上就好有趣,好似煲紅豆煲到起沙咁,有種幼粒粒嘅感覺,但仍然係綿滑嘅,係無食流沙咁燙口。
三豆水晶糕 $12
其實佢甜品選擇唔多,有楊枝金露、三色桂花紅豆糕,同我哋揀嘅三豆水晶糕,大概係大菜糕加埋三角豆、紅腰豆、眉豆嘅糕點,豆煮得未腍透,三角豆同紅腰豆有少少實芯,所以唔合格,希望我依碟係個別事件。
其他無點講嘅,算係大大路路、中中等等:
薑蔥牛栢葉 $12
香煎蘿蔔糕 $14
師傅小籠包 $14
鮮蝦燒賣皇 $18
臘味糯米飯 $18
煎蛋牛肉飯 $19
如果「點喜來」仍要晌高手林立嘅點心專門店界別打出名堂,個人覺得真係要晌創意方面再多走幾步,否則都唔知佢點撐得起來! |
|
|
Elgin's |
標題 : 隱世滋味 |
地址 : 中環伊利近街9號 |
地區 : 中環 |
|
現時分數:
|
日期 : 2011-05-08 12:40:40
哈哈,小弟自己嘅生日飯(正日當晚去食),竟然係自己請自己。唔好以為小弟無人陪,只係以團購買咗兩套晚餐,扯埋老婆試試間新嘢之外,就當埋慶生日,費事煮啫!Elgin’s晌伊利近街9號,實查有啲僻,不過小弟晌中環做嘢,對依頭都算熟,只係晌公利蔗汁行過一條街就係,所以唔難搵!
雖然試新嘢有少少風險,但以$99個價,包括前菜或沙律、主菜、甜品及餐飲,全部自選,隨你喜歡,彈性幾大,值搏率高,所以計過度過不妨勇於一試。
晚上7:00到,門前一層台階位擺咗幾長小圓茶几,係俾人飲吓啤酒,睇吓街景,傾吓偈。至於裡面,近門口係用餐區,大概30個位左右,入啲係飲酒區嘅吧位。客人唔太多,但環境好夠氣氛,除咗超高樓底,裝修幾雅致,並配以極之柔和、而昏暗嘅壁燈,餐枱面就近乎靠晒枱上嘅小小蠟燭燈,氣氛浪漫,適合撐枱腳,但就不利我部傻瓜DC影相喇,ISO已經盡大,所以,相片質素較差,請見諒。
Elgin’s賣嘅菜無話主打邊個地方,中式、西式樣樣夾雜,睇睇餐牌就知,所謂中式梗係唔係整碟乾牛河俾你啦,都係中菜西做,賣相都係西化,講造型。
個套餐包一杯果汁,但竟然唔可以轉熱飲喎,就算成本最平嘅檸水都唔得,依個做法真係有啲奇,所以我哋要咗一杯西柚、一杯菠蘿,當係迎賓果汁,清新吓味蕾等食好嘢!
第一道菜(沙律或前菜)
沙律有3款選擇,而前菜就有7款選擇,可以晌沙律或前菜中任揀一款,因為見前菜比較有特色啲,所以我哋同樣揀前菜,我揀咗個蘆筍及紅椒三角卷($48),太太揀燻鴨卷伴梅子醬($58)。
- 蘆筍及紅椒三角卷(Asparagus and red bell pepper parcels):一客兩件,三角造型,驟眼睇落仲以為係咖喱角。其實係以酥皮紙包住蘆筍同紅燈籠椒焗,外層酥皮紙香脆,裡面嘅蘆筍好嫩,而燈籠椒爽,夾埋晒一次過咁咬落去,,口感幾特別。
- 燻鴨卷伴梅子醬(Smoked duck in tortilla wraps with plum sauce):以墨西哥卷包著生菜、紅椒、煙鴨胸肉,份量十足,大份到點止係前菜,直情當主食都不為過。點少少西梅汁,酸酸甜,令鴨胸肉嘅煙燻味更突出,配上生菜、甜椒,口感更清新。
第二道菜(主菜)
去到主菜,6揀1,價錢由$58到$148,幅度都幾大,但個團購套餐就無限你,平貴都可以揀,所以有幾款都想試,結果揀咗最貴嘅烤助排伴薯菜($148)同較平嘅胡椒蝦炒麵($78)
- 烤助排伴薯菜(Elgin’s Oven BBQ ribs / half slab with Asian slaw and potato wedges):首先無話係團購,就將貨就價,半份嘅烤助排十分夠秤,水準又不賴,外皮烤得香脆,難得師傅再加少少芝麻,有啲畫龍點睛之效,肉質、肉汁都做得唔錯,唔嚡,多汁,咁就夠晒滋味啦;伴菜仲有炸薯角、椰菜沙律。
- 胡椒蝦炒麵(Stir fried noodles with peppered shrimp):絕對係一個中菜西做嘅例子,炒麵唔係食開嘅中式炒麵,唔係幼麵,唔係伊麵,麵條似油麵,圓形而粗身,質感有啲煙韌,炒得唔油,配上豉油汁,配菜有青椒、紅椒、西蘭花、椰菜花,都幾特別。至於炒麵之上,放有三隻烤鳳尾中蝦,去晒殼方便食用,胡椒味唔算太厲害,所以仍食出蝦嘅鮮味,肉質都幾爽彈,所以,依個胡椒蝦炒麵都幾有驚喜!
第三道菜(甜品)
經過第一、二道菜後,都幾飽吓,不過,嚟到第三道菜-甜品,再飽我個肚都容得下。甜品選擇唔多,只有三款:朱古力軟心蛋糕、荔枝焦糖燉蛋、綠茶慕絲,都係賣$48,太太最唔好係慕絲,嫌忌廉多較肥,所以甜品好易揀。
- 朱古力軟心蛋糕(Warm chocolate cake):需時20min,原個焗杯上,賣相唔錯,但焗過籠,無軟心,變咗有少少似Brownie咁,當然無正式Brownie咁實淨,朱古力依然味濃,唔太甜!
- 荔枝焦糖燉蛋(Lychee crème brulee):燉蛋幾軟滑,只係荔枝味未夠出,好薄,而焦糖脆面都做得OK。
服務整體唔錯,一對男女侍應都好有禮(好似係菲藉),不過有少少生手,而仲有一個係經理阿Jack,都好好招呼,驚你唔明個套餐,都解釋得好詳盡,事後都有問我哋啲嘢啱唔啱食?仲解釋因為餐廳新開,想睇吓有咩改進,所以搞團購,宣傳以外,就希望多啲食客嚟俾啲意見,故此,都同阿Jack吹咗幾句!環顧今晚餐飯,我同太太都好滿意喇,係除咗個朱古力軟心勁失準,就算以正價都有興趣再光顧。
補充一下,下面嘅是次消費,是以正價計,等大家有個參考,因為團購都係做個一次半次,唔知第時仲有無,所以計番個正價好參考! |
|
|
Cowboy Seven |
標題 : 忙裡偷閒嘆咖啡 |
地址 : 尖沙咀彌敦道100號The ONE L411號舖 |
地區 : 尖沙咀 |
|
現時分數:
|
日期 : 2011-05-07 12:35:50
依家香港乜都鍾意縮寫,好似牛頭角下邨叫「牛下」,Cowboy Seven如果改個中文名,直譯故然叫牛仔七,恐怕有人聽咗以為同駱駝漆有關添,簡稱嘅話可以叫「牛七」。原來真係有樣嘢叫「牛七」,係中藥「牛膝」嘅別名,牛膝有「川牛膝」同「懷牛膝」之分,川牛膝偏活血通經絡,懷牛膝偏補肝腎強筋骨,性味、功效、主治……,總之都係幾好嘢嘅藥材。當然,真係改個中文名嘅話,「牛仔七號」或「七號牛仔」可取啲!
咁Cowboy Seven梗係唔係賣中藥啦,café小店,十零個座位,開晌上年九月先開幕嘅話題商場 The One之上,佈置幾有心思,木椅、木箱型茶几、格仔布坐墊,再者,一身格仔恤衫襯牛仔褲嘅店員,幾型格醒目,招呼態度都好有禮!由於café採開放式,鋪位黐住商場通道,加上啱啱晌扶手電梯口,所以會比較多人行嚟行去,或者令人覺得唔自在,所以,我哋揀面向鋪頭嘅左邊位(鋪位間開中間係整咖啡擺食物,一左一右兩邊係座位區),左邊位晌電梯口屈咗入去,少人行啲,而且,仲可以直擊到啲店員沖咖啡。
依度當然唔止賣咖啡,仲有朱古力類、茶類、樽裝果汁同一啲special drink,食物方面有三文治、鬆餅、牛角酥、切餅……等等,當一餐輕盈早餐或食晏都得,不過,下午茶就最好喇,Lucky Tea Set $40,一杯咖啡加配一件餅,城市人生活緊張,來去匆匆,晌度忙裡偷閒,嘆杯新鮮烘焙即磨咖啡,驅走倦意之餘,細味人生種種,悠然而生丫嘛。
Latte
雖然無乜點拉花,但奶味十足之餘,咖啡香亦徐徐滲出,入口質感柔滑。同店員閒談兩句,話咖啡係用蘇門答臘、新畿內亞咖啡豆調配而成,雖然講咗我知,我都係單以一個字嚟形容:香!我對咖啡嘅認識真係好皮毛,雖然都知每款咖啡豆有唔同嘅香味(aroma)、質感(body)、酸味(acidity),但閒時我都係飲三合一多,所以一杯香濃細滑嘅咖啡,對我就已經好足夠!
Mocha
太太嘅指定選擇,因為佢對咖啡唔算好,但又鍾意飲熱朱古力,所以Mocha最啱佢。濃縮咖啡做底,加牛奶同朱古力漿,最後加啲打起嘅忌廉,一杯Mocha就此誕生。依杯Mocha係一次過溝好晒,所以賣相普通,口感都同樣柔滑,但好似咖啡味稍重,朱古力味有而唔係咁出。
藍莓芝士蛋糕
蛋糕賣相沒有太多裝飾,就係叫人欣賞佢嘅真材實料。餅底係傳統牛油加消化餅餅底,實凈而滿牛油香;芝士餡做得好有水準,質感幼滑得嚟,帶著濃濃芝士味,一般卡夫忌廉芝士已一定做到咁嘅芝士味,係落魚膠同打忌廉芝士手勢好,先有咁滑嘅效果;面層嘅藍莓醬亦都好正,濃郁藍莓味配上啖啖果肉,無欺場喎!
朱古力松露蛋糕
其實個朱古力松露都好食,不過同個藍莓芝士相比,佢就變得不過不失!朱古力海綿蛋糕軟綿,中層嘅朱古力慕絲都做得滑溜,但係如果依兩層嘅朱古力味再做濃啲,就覺得更平衡,因為鋪面嘅朱古力漿同唂咕粉都係朱古力味濃郁,而下面嘅慕絲同海綿蛋糕感覺會變淡咗少少喇。 |
|
|
點喜來 Bird and Basket |
標題 : 點心專門店唔易做 |
地址 : 太子砵蘭街369號基隆大廈地下B舖及1樓 |
地區 : 太子 |
|
現時分數:
|
日期 : 2011-05-06 12:44:02
同個朋友講起話依家去嘆茶食點心一盅兩件都唔一定要去酒樓,朋友都附和話係呀,「叮叮」咪得囉,超方便,但要兼顧埋有質素嘅,「叮叮」就要行埋一邊,想講嘅梗係點心專門店啦,突然間多咗好多依類點心店,講出名嘅首推摘咗星嘅「添好運」,但連深水埗分店都實在排隊排得太誇張喇,小弟一晌都唔多會為食一餐而要咁排法,所以近近哋走過去太子頭,搵嚟「點喜來」試試。一行四人,飯腳又係表哥表嫂搭表姪女,因為表姪女晌太子學英文,搵佢哋一家一齊食就啱晒路線圖。
雖然晌裝修上花咗心思,採用簡約中式設計,壁畫畫有喜鵲立於梅花上嘅圖案,配合番自家品牌圖案,感覺幾雅致,但可惜環境有啲逼,座位又有啲窄,唔算太舒服。佢哋晌張枱下面加咗掛勾俾客掛袋,似乎效果一般,細嘅袋就OK,好似小弟個背囊,掛咗真係頂晒腳,仲唔舒服,好彩我坐近窗,一排窗都有窗台,索性成個背囊擺上去。硬件麻麻,服務殷勤算係軟件方面做番足啲。
點心介紹,A4紙大細,前後兩面,35款點心,3款甜品,2款特別飲品,圖文並茂一眼睇晒,不過實際又唔止咁少嘢,要知有咩食就睇張點心紙,分門別類,印晒價錢,收茶錢,無加一,都好易計到數,埋單前自己計計數就唔怕收多錢。
因為小弟今勻一餐當兩餐,所以三個大人加個9歲細路,前後叫咗13樣嘢,都算大食呀!樣樣點心嚟到都新鮮熱辣,感受得到即叫即整,整體質素唔錯,不過唔會叫有大驚喜,所以俾個OK佢,有幾款點心特別想講吓個人食後感:
菠蘿叉燒餐包 $14
見係食家推介,即管點番客試試。食過都叫唔錯,叉燒餡入口焦香有肉汁,包身軟熟,而面面嘅「菠蘿皮」鬆脆香口。菠蘿叉燒餐包好似係80、90年代產物,有時真係唔可以唔向啲點心師傅致敬,由叉燒包變叉燒餐包,再變出菠蘿叉燒餐包……。
筍尖鮮蝦餃 $20
餃皮晶瑩,食起嚟感覺比較柔韌,無咁削身。飽滿嘅外形包足餡料,筍尖爽脆,蝦肉味鮮,但似乎所落嘅豬肉較肥,話就話令餡肉甘香而油潤,不過,感覺都係肥咗啲啲!
黃沙豬潤腸 $15
腸粉拉得都透薄而幾滑身,豬潤新鮮,生熟度啱啱好唔嚡,要趁熱,凍咗豬潤變得少少硬身唔好食。
QQ薑薯煎堆 $16
傳統蓮蓉做餡嘅煎堆過年經常食到,依轉就改用蕃薯蓉,我就幾鍾意,因為除咗本身都鍾意食蕃薯外,蕃薯蓉比蓮蓉無咁甜,雖然咬口QQ煙煙韌,不過叫得「薑薯」而唔夠薑味,我就覺得點都講唔通架喇。
黑糖馬拉糕 $12
自從興咗黑糖依家嘢,好多嘢食都以黑糖掛帥,黑糖馬拉糕更大行其道,都好少見傳統嘅普通馬拉糕。侍應話佢哋嘅馬拉糕係用台灣黑糖做,但論色,比一般黑糖馬拉糕無咁黝黑,講味,都算帶有少少蔗糖香,糕身邊位有啲實。
反沙奶皇包 $12
鍾意食奶皇包多過蓮蓉包,無咁甜無咁「漏」,而且,奶皇包,甚至流沙奶皇包都算食得多,但「反沙」嘅就應該第一次食喇,味道上佢有奶皇個種濃重嘅奶香,包身做得鬆軟,質感上就好有趣,好似煲紅豆煲到起沙咁,有種幼粒粒嘅感覺,但仍然係綿滑嘅,係無食流沙咁燙口。
三豆水晶糕 $12
其實佢甜品選擇唔多,有楊枝金露、三色桂花紅豆糕,同我哋揀嘅三豆水晶糕,大概係大菜糕加埋三角豆、紅腰豆、眉豆嘅糕點,豆煮得未腍透,三角豆同紅腰豆有少少實芯,所以唔合格,希望我依碟係個別事件。
其他無點講嘅,算係大大路路、中中等等:
薑蔥牛栢葉 $12
香煎蘿蔔糕 $14
師傅小籠包 $14
鮮蝦燒賣皇 $18
臘味糯米飯 $18
煎蛋牛肉飯 $19
如果「點喜來」仍要晌高手林立嘅點心專門店界別打出名堂,個人覺得真係要晌創意方面再多走幾步,否則都唔知佢點撐得起來! |
|
|
柏景餐廳 Cafe on the Park |
標題 : 枱上黑鑽密密食 |
地址 : 尖沙咀廣東道33號中港城皇家太平洋酒店園景翼2樓 |
地區 : 尖沙咀 |
|
現時分數:
|
日期 : 2011-05-06 12:05:35
食自助餐,皇家太平洋酒店嘅柏景餐廳都算係我選擇之一,因為個場大,坐得寬鬆之餘,食物種類、款式都幾多。加上,今期所做嘅主題係「黑鑽‧盛饌」黑松露,俗稱「餐桌上的黑鑽石」,幾吸引吓,所以都好期待。當然,一個自助餐雖話都幾百蚊,但都好難預期好似啲高級餐廳,食啲松露菜式,黑松露係成片成片咁刨俾你。但係,帶有黑松露嘅菜式亦唔少,對鮮有食黑松露嘅我,一次過嚐試到咁多款,係個唔錯嘅體驗。
準時到場已見啲人開始搵食,未講食,先講坐,今次被安排坐晌近食物區(西湯、麵包、芝士拼盤後面),一眼望到晒大部份食物嘅補充,都算佔據先機,但更正係對住個大電視,仲播緊英超(由於依日無早場,只係重播英超賽事,都好丫)!
主題「黑松露」菜式:
大概有十多款,有啲無試就無寫,而咁多款、咁多類,都睇出廚師們都花咗好多心思。
1. 黑菌青豆帶子忌廉湯 – 點點黑點相信係黑松露喇,不過味就唔太覺,但係忌廉湯本身打得細滑,而且幾有青豆味,撈撈底都有幾多細細粒帶子肉。
2. 即撈黑松露醬海鮮凱撒沙律 – 羅馬生菜、炸煙肉粒、麵包粒、巴馬臣芝士,一組凱撒沙律底,再按自己喜好加海鮮配料如蝦、魷魚,最後淋上個黑松露沙律醬,唔好諗住黑松露味好出,只係隱約覺得個沙律醬多咗啲層次。
3. 黑菌燒賣 – 依個燒賣最能食出黑松露獨特幽香,因為每粒燒賣,上面都放咗一撮黑松露醬。
4. 黑菌水蟹粥 – 粥底幾綿又帶啲鮮香,跟個青豆忌廉湯一樣,黑點就係黑松露吧。
5. 鵝肝黑菌茸蒸蛋白 - 黑菌茸就放晌蛋白裡面同蒸,而鵝肝薄薄一小粒放晌面,蒸蛋白好滑溜,慢慢嗒先嚐到一朕油潤同香味。
6. 蒜香黑松露醬炒薯仔 - 蒜香重過黑松露味,依個少少有姿勢無實際嘅炒薯仔。
7. 燴牛胸伴黑松露油 - 牛胸燴得夠晒腍,好柔軟,伴咗黑松露油,多咗朕獨特松露香,唔錯。
8. 燒羊肩伴黑菌燒汁 - 燒羊肩伴黑菌燒汁,其實同個燴牛胸伴黑松露油差唔多,只係牛胸變咗羊肩,醬汁黑菌加燒汁更芳香,羊肩羶香濃郁,不過肉質帶點韌勁。
9. 扒虎蝦配黑菌汁 – 每位客人都特別送上一客兩件嘅扒虎蝦,「專燈」拎埋隻凍甜蝦拍住嚟影相,真係蚊脾同牛脾,虎蝦燒得好香,又啖啖肉,真係食得爽呀!而且,個黑菌忌廉汁幾香,落黑松露醬相對重手!
10. 黑菌朱古力慕絲 – 唯一一個以黑松露入饌嘅甜品,以往食嘅松露朱古力都係有松露之名、無松露之實,今之就真係食有松露嘅朱古力喇。朱古力慕絲做得幼滑味濃,而加咗黑松露醬上面,又唔覺個慕絲怪喎,味道都幾特別。
個人推介嘅食物:
1. 蘋果燉雞湯 - 燉湯絕對係柏景招牌,唔係度度自助餐都有供應燉湯,原盅燉,味濃料足,正!老婆仲要添飲。
2. 阿拉斯加雪花蟹腳 – 海鮮類無生蠔,雪花蟹腳自然成為主打,蟹腳已烚熟食得安心,殼軟一剪就開,大啖大啖蟹肉,鹹鮮又實在。
3. 加拿大藍青口 – 幾大隻,肉質同樣鮮甜,落少少檸汁提提鮮就夠。
4. 串燒大頭蝦 – 不可不試,大頭蝦比虎蝦細隻啲,蝦肉都幾彈牙,但重點係蝦頭之內嘅橙紅蝦膏,甘香油飴。
5. 香草燒羊架 – 重羊味得嚟又唔太羶,肉質非常鬆軟,外層又燒得香脆,再配埋芥辣,我都忍唔住整多一枝!
6. 即制意大利飯 – 即場煮意粉就見得多,煮意大利飯就第一次,最吸引係師傅旁邊舊巨型芝士,邊用邊刮。面前有多款配料,你鍾意點配都得,不過一個人食一份似乎太「漏」,或者好似我咁,有時見師傅煮緊「大鑊飯」,可以問佢要少少嚟試都得。
7. 燒牛肉西冷 – 生熟度啱啱,中間位仲略帶粉紅,質感唔錯,有肉味,又冧滑,個人鍾意配燒汁。
8. 芝士蛋糕 – 係美式芝士餅,切到四四方方,芝士味濃得嚟餅身唔死實,面面酸忌廉甜酸有緻。
9. 即做班戟 – 妹妹師傅仔整班戟手勢好熟練,三兩吓就搞掂,皮薄香軟。最難得餡料唔係大路桃肉,有芒果同車厘子果肉,我就梗係揀後者啦,仲要求少忌廉,自己加伴HD咖啡雪糕,一凍一熱,超正!係最可惜掛住影相,擺耐咗,個雪糕都溶溶哋,影響個賣相!
不妨一試嘅食物:
1. 翡翠螺 – 幾鮮甜,厚肉。
2. 預制沙律 – 共有8款,其中一款似係希臘沙律,味道清新,其他幾款都各具特色。
3. 烤南瓜、粟米 - 南瓜同粟米本身已經好夠甜,所以烤咗之後再多陣烤燒香。
4. 梳乎厘 – 雖然只係原味,但因為即做(要等5min),食落好輕身,好鬆軟。
5. 紅豆綠茶卷 - 紅豆清甜,綠茶瑞士卷好香綠茶味,係稍嫌餅身開始有啲乾,可能擺耐咗。
6. 朱古力麵包布甸 - 麵包布甸充滿蛋香,又有朱古力味,加上面面灑上唔少杏仁片,好味。
覺得麻麻嘅食物:
Tiramisu – Mascarpone芝士打得柔滑,不過,係無咖啡酒浸手指餅版本,所以,味道、層次單薄。
冰板炒雪糕 – 好多配料揀,不過係自己衰貪心,揀得太多料,料多過雪糕,成兜嘢我個「趙」字。
此外,仲有自助沙律吧,車厘茄超甜,沙律菜好新鮮爽脆;壽司、魚生,因為見無乜特別款式,都係大路貨,所以無試過;凍海鮮仲有瀨尿蝦同凍蜆,前者出咗幾輪就無晒,我都未有機會試,之後改出凍甜蝦;其他點心、熱盤仲包括有蝦餃、南乳豬手、蒸魚、咖喱牛肉、炒時蔬、生炒骨……之類;去到甜品方面,除上面提過嘅有啲啲特別外,其他都比較普通,如果對食甜品有要求嘅人,可能唔係太睇上眼,而雪糕櫃有HD、Dreyer's、雀巢,全部細杯裝,多選擇又方便揀;茶啡自斟,可以不停飲!
整體嚟講,加插咗黑松露做主題,新鮮感同高檔感強咗,折咗之後大概三百鬆啲,以依家食番有咁上下嘅自助餐計,價錢算幾吸引,就啱慶祝吓特別日子嚟豪一豪,非常諗得過。雖然依個「黑鑽‧盛饌」黑松露自助餐只係做到4月,而5月主題好似換咗「蝦蟹鮮味配」海鮮自助餐,但係以柏景質素應該都OK嘅! |
|
|
美心MX Maxim's MX |
標題 : 歐陸香腸掂喎 |
地址 : 美孚美孚新村5期地下N10-N12號舖 |
地區 : 美孚 |
|
現時分數:
|
日期 : 2011-04-28 10:16:06
好老實,為人慳慳哋,都好少出街食早餐,一係就自家煲嘅十穀粥,一係就自家製嘅三文治或多士。不過辛勞咗成個星期,難得又短週,老婆話出街食,講咗小弟係「孤寒人」,所以咪揀咗有優惠券嘅美心囉,哈哈!
本來都無諗住快餐店都寫食評,因為好似無咩好寫,寫咗都好似無乜參考價值咁,不過今朝依個歐陸早餐又有少少驚喜,所以都寫低佢,當係生活日誌!
歐陸香腸早餐 $21
包括有歐陸香腸、豬肉漢堡扒、炒煙肉薯仔,厚多士(可揀蘿蔔糕?!),配餐飲。兩條歐陸豬肉腸,無過鹹,夠肉味,煎得腸衣又幾脆喎,確係幾好食;突然令我想返起,依家超市無咗樂奇牌雞肉腸,街市凍肉鋪都未必一定有,得番隻廚師牌雞肉腸,但好鬼鹹,唔好食,唔知點解仲要賣!豬肉漢堡扒,幾似麥記塊豬柳,但好食啲,無咁乾身;炒煙肉薯仔,厚多士,無咩好評價,都係一般貨色。反而杯奶茶可以講兩句,成日標榜「美心MX香港地奶茶選用黑白淡奶,細滑具奶香;嚴選捷榮高山錫蘭紅茶,茶味甘醇濃郁;以完美比例及溫度沖調,香濃幼滑,令人舌尖留韻。」我又唔覺佢好滑喎!
日日豐粥早餐 $20
粥麵早餐,有北菇鹹雞絲粥同菜乾豬骨粥可揀,配豉油皇炒麵,跟餐飲。太太要咗北菇鹹雞絲粥,好一般,粥底唔夠綿,最敗筆係唔夠味兼無乜料,冬菇、鹹雞絲、粥底好似各有各咁,食粥都係行返去海皇好啲,隔離「好滿粥」比較貴又未有咁早開檔。至於個豉油皇炒麵,夠晒豉油香味,麵條唔油帶少少爽身,OK喎。
|
|
|
一壽司 Sushi One |
標題 : 食嘢有定時 |
地址 : 尖沙咀金馬倫道48號地下 |
地區 : 尖沙咀 |
|
現時分數:
|
日期 : 2011-04-26 15:57:45
一壽司,論水準一定唔係名列前茅,論價位唔係靠平抵食一類,唯一話題性係佢個招牌超大魚缸,驟眼望落去足有六、七十呎長,養咗好多珊瑚同魚,確係幾養眼,雖然小弟唔係養魚迷,但食吓壽司,又望吓啲魚,感覺都幾舒服!
其實時間都唔早,星期六,12:30pm,但成個場無乜人,係過咗1:00pm有啲寫字樓收工,先多啲客,不過直到我哋食完為止,頂多都係五乘滿。我哋鍾意揀坐迴轉位,睇住條迴轉帶有咩好嘢出,而且又見到後面師傅晌度整壽司,重點係睇到佢哋整食物時夠唔夠衛生丫嘛,今次就見到個師傅雖然有戴口罩,不過就拉低咗落個鼻以下。另外,略嫌啲迴轉位拍得太逼,一個位貼一個位,我同老婆(或其他朋友)坐就話啫,如果嚟咗個有番咁上下身形,又或者係個啱啱趕過嚟而大汗疊細汗嘅客,感覺就令人唔太舒服啦!此外,其他服務都唔錯,員工勤快,每個位又有兩隻小碟讓客人可選擇豉油、芥辣分開落。
所謂不時不食,既然見到佢有個季節推介,當然要捧捧場依個季節限定啦,一共有9款有壽司、有魚生、有吸物……,我哋就憑感覺揀咗3款,然後再晌迴轉帶精挑2款,加多個小食同一碗湯麵埋齋,就夠晒皮喇!
蟹棒天婦羅壽司$18(季節推介)
依個真係要推介,蟹棒壽司晌迴轉帶都有出,況且都係大路嘢,以前都有食過,不過今回只有落單叫,唔會出現晌迴轉帶,因為條蟹棒炸後才整壽司,即叫即做先「新鮮」。蟹棒以天婦羅形式輕炸,粉漿微薄,睇落條蟹棒好似冚咗層紗咁,咬落多咗朕「脆皮」。面面嘅芥辣醬經調校,有芥辣之味,無芥辣之狠,較易入口,唔怕辣辣壽司邊個食,無人食!
火灸芝士帆立貝壽司$30(季節推介)
透明方形玻璃碟盛上,帆立貝夠晒大,壽司又輕灸過,賣相的確幾有睇頭。不過,條芝士就「求其」啲,好似片裝卡夫芝士切咗兩細條,火灸過都係一舊舊,幸好件帆立貝幾鮮味又大啖肉!
北海道豆乳立魚吸物$28(季節推介)
點依個係因為可以當湯飲,確實,豆乳色澤奶白,豆味勁濃郁,係覺得佢杰身咗啲,而且質感有啲起粒,如果做得再滑溜啲就無得頂喇。配料有冬菇、昆布、立魚同蔥花,雖然我覺得佢哋係配角,但用料都唔太「求其」。
吞拿魚卷$14
純粹過吓口癮所以先攞嘅卷物,吞拿魚反卷,外鋪蟹籽,色澤搶眼,味道OK啦,吞拿魚質素都唔差,係中間嘅紫菜有啲腍。
帆立貝壽司$26
見之前個火灸芝士帆立貝壽司好食,所以晌迴轉帶見有,再追加多一客啫!
日本南瓜甜蕃薯天婦羅$22
食咗咁多壽司,都想點個炸嘢嚟衝擊吓味蕾,就選定南瓜、蕃薯天婦羅,因為南瓜、蕃薯一晌係我至愛,要是貨靚,南瓜同蕃薯都有種獨有嘅清甜,所以燒南瓜、煨蕃薯係BBQ嘅難兄難弟。今趟嘅天婦羅南瓜、蕃薯,炸漿都做得夠薄,要讚係無乜剩油,應該係油溫控制得好,而南瓜同蕃薯味道粉甜。
豚肉拉麵配秘製豬骨湯$59
試咗佢幾類唔同食品,諗諗吓就不如睇吓佢啲拉麵又點!枱頭有個獨立拉麵介紹,得3款:野菜什菌拉麵$55、豚肉拉麵$59、豬軟骨拉麵$59,都係配秘製豬骨湯。前者我覺得比軟寡,後者太太唔鍾意食豬軟骨,所以晌篩選下揀咗豚肉拉麵配秘製豬骨湯。整體嚟講OK,湯頭豬骨味幾香,當然唔會好似豚王個啲濃到漿口;豚肉共有3片,唔肥唔瘦,但亦唔見肉質好滑溜;鹵蛋就比較失色,無溏心之餘,又較為實肉;不過,大量粟米粒,又加多條蟹柳,麵條哎落帶韌勁,都算唔錯啦!
甜品只有綠茶雪糕、芝麻雪糕、HD雪糕,所以甜品就留肚無食。
|
|
|
龍島 Lucullus |
標題 : 經典朱古力軟心蛋糕 |
地址 : 中環港鐵中環站E14舖 (近E / F出口) |
地區 : 中環 |
|
現時分數:
|
日期 : 2011-04-22 18:39:04
平時同事間請食蛋糕唔係美心,就聖安娜或東海堂,今次同事呆兄收到封大利事,二話不說靜靜雞晌龍島買咗盒件裝蛋糕返嚟請大家食,真係多謝晒呆兄喇!
呆兄精心揀咗4款件裝蛋糕,分別有朱古力軟心件裝蛋糕、芒果千層件裝蛋糕、比利時純朱古力軟芝士件裝蛋糕、藍莓焗芝士件裝蛋糕,款款都係$24。近年好多朱古力過江龍相繼在港搶灘,老牌本土朱古力品牌「龍島」依然頂得住,相信實力都相當,話說「龍島」都應該有成30多年歷史,發展至今,晌佢鋪頭都見佢推出唔少產品,朱古力、蛋糕、曲奇及其他烘焙產品。價格屬中上,所以$24一件件裝蛋糕,價位都差唔多架啦!
小弟揀咗朱古力軟心蛋糕,佢都應該屬於龍島朱古力蛋糕嘅經典之作,一層朱古力海綿蛋糕,疊一層朱古力軟心,來來回回蛋糕、軟心、蛋糕、軟心共6層,講就係咁簡單,食落就見識到佢嘅經典。朱古力海綿蛋糕鬆軟,而朱古力軟心係一層柔軟嘅純朱古力,因為唔係慕絲嚟,唔好諗住係好滑流個隻,口感大概似係雪凍嘅朱古力漿咁,初時望落去仲以為係硬實實,原來係錯覺!味道就朱古力味頗香濃,唔太甜;翻睇佢個網頁,都相信佢所講:「我們的朱古力及蛋糕大師選用最優質的比利時朱古力及食材……皇牌產品朱古力蛋糕及芝士蛋糕用上最優質的食材每天新鮮製作……」,要評分就好食與一般之間,講唔上好驚喜,但又確係唔錯,所以,賣$24,絕對試得過。
其他三款未有試,亦無問食咗嘅同事,抱歉,未有食評意見! |
|
|
彬記粥麵小廚
|
標題 : 特價飯餐唔係好特價 |
地址 : 美孚美孚新村百老匯街79號商場地下96號舖 |
地區 : 美孚 |
|
現時分數:
|
日期 : 2011-04-14 14:47:35
玩咗成日,搞到晏晒,返番嚟美孚,平平哋搵檔快靚正嘅醫醫肚,所以諗起瑟縮晌美孚新村四期商場內嘅彬記,位置少少偏,區外人未必易搵。
雖然都已經成夜晚9:00,竟然要等一陣先有位。一坐低靠牆望,就係睇睇是日特價飯有咩揀,雖然叫「午市特價飯」,但晚市照有供應,當然收貴幾蚊,之不過,雖則話特價飯,其實三十零蚊都唔算咩特價,穿過商場對面間大家樂都係咁上下啫。因為幾肚餓,揀咗個菜遠什會飯($34),屬於老餅啲嘅碟頭飯,感覺依家都少酒樓、茶餐廳有做,後生仔女都唔多會叫依款飯啦。什會有咩?都係豬潤、豬肚、粉腸、幾粒蝦仁咁啦,味道一般般,勝在夠大碟,兼且包例湯,依晚係佛手瓜煲唐排,大大碗同老婆兩份飲,湯味都係一般,唔係好老火,叫比滾湯好少少。
老婆唔想食太飽,所以揀粉麵,咁話晒彬記打正旗號專賣粥麵,粉麵應該好啲嘅。再者,見佢枱上有個推介餐牌「鯊魚骨湯底」自選湯麵,好似有啲料到,所以就點咗一碗汕頭手打魚蛋米($23),老實一句,湯底色澤較清,味道偏淡,鍾意豬骨湯、牛骨湯味濃嘅,鯊魚骨湯就唔啱你口味。而魚蛋同魚片都算爽口,惜魚味唔算濃,整體不過不失。
|
|
|
翠河餐廳 Green River Restaurant |
標題 : 借避風塘過橋嘅牛河 |
地址 : 荃灣楊屋道18號荃新天地二期UG89-UG90號舖 |
地區 : 荃灣 |
|
現時分數:
|
日期 : 2011-04-12 15:05:21
因為同屋企人買咗飛晌UA睇戲,所以先過咗嚟荃新天地II期,其實I期比較多去,因為由西鐵站行返過嚟荃灣,好多時都經過I期,而且I期比較大,又多鋪頭同食肆,好行啲!
由於完咗教會,過埋嚟都差唔多近兩點,距開場都係一個鐘鬆啲,所以就搵咗「翠河」落腳,茶餐廳格局,貪佢出嘢夠快,唔怕耽誤時間。估唔到,依個鐘數仲有啲旺,我哋都排咗10分鐘隊添,唔通真係咁好食?!午市套餐包飲品,全部劃一價$32,唔算貴,其他仲有啲炒粉麵,唔過$40,環境乾淨企理,枱凳又唔係拍得好逼,樓底又高,都OK喎,比起好多茶記坐得舒服!
窩蛋牛肉意(午餐)$32
窩蛋系嘅碟頭飯好耐無食,記得細細個時,快餐店 / 茶記都無依家咁多選擇,窩蛋免牛飯晌個時都幾熱門。依次專燈叫,都係食番兒時回憶。講番個意粉,食得出絕對就咁白烚,無味,兼且有丁點乾;肉醬感覺都係一般,都係單調嘅蕃茄、茄膏味,我諗加多少少洋蔥、蒜粒、香料提提味,味道層次好啲;不過,將濕潤嘅「窩蛋」跟肉醬、意粉撈勻之後,就係化學反應產生之時,味道不再單一,掛滿醬嘅意粉也變得柔潤得多。
焗南瓜汁石斑飯(午餐)$32
兩大塊青衣柳,其實雪藏貨式,都無乜美味可言。重點放晌個南瓜汁身上,以往多數都係白汁或茄汁,依個焗石斑飯就改用南瓜汁,取其南瓜味濃,賣相橙黃,再配蛋炒飯底,都算唔錯。
避風塘炒牛河 $38
見個名好似好架勢,所以叫一碟見識吓,不過嚟到見個樣流流哋。基本上係普通嘅乾牛河,再晌面加撮炸蒜粒,就取名為避風塘炒牛河,我仲以為係用炸蒜粒嚟炒牛河添,叫得避風塘通常都係以大量金蒜嚟炒架嘛,估唔到佢咁慳皮「求其」,灑啲蒜粒扮避風塘,所以係無避風塘風味可言。還好,無炒到一碟都係油,撇除「避風塘」個字,個牛河都OK嘅。
公司三文治 $30
又係貪得意想試試個公司治,晌網上八一八先知「公司三文治」係香港嘅餐廳叫法,原文應該係Club Sandwich,個Club字當然唔係指「公司」啦,好似源自美國一家賭錢嘅「俱樂部」,晌俱樂部賭得錢嘅都比較有錢,吃厭普通三文治就搞搞新意思,結果餐廳就製造出材料豐富、價錢亦高幾皮嘅公司三文治。標準嘅公司三文治係晌三塊麵包夾兩層餡料,再對角切成四件。依家唔使好有錢都食到公司三文治,當然係平民版啦,翠河嘅公司三文治絕對體驗到茶記用料:芝士、蕃茄、雞蛋、火腿同餐肉,大堆頭都幾豐富架,味道?等於同一時間食咗幾款普通嘅三文治。
|
|
|
住家菜 Home feel |
標題 : 免費窩心壽包 |
地址 : 尖沙咀麼地道68號帝國中心UG50-57號舖 |
地區 : 尖沙咀 |
|
現時分數:
|
日期 : 2011-04-07 14:56:38
又係一餐老朋友聚聚舊、慶生日嘅飯局,當中多數都係講健康之人,再者,又要地點方便就腳,度咗幾個地方,最後選上住家菜,除咗以前自己都試過,覺我唔錯外,都係基於食評偏向好評多,穩穩陣陣咁,希望一眾老友食得開心又啱合味!
免得到時等位,預早一星期前訂位,兼訂定阿麻雞同南瓜排骨盅,因為都算係招牌菜,較搶手,訂定穩陣。仲有,訂位時問個侍應,因有朋友生日,有無壽包供應,有嘅話諗住留半打賀賀壽星仔女,佢哋飯後送糖水我都知架啦,點知佢話可以安排埋壽包,仲要係免費添,真係無諗過咁窩心!
閒日7:30pm去到,竟然坐滿,都要等10min添,我哋一共6個人,留咗阿麻雞同南瓜排骨盅,再叫多一個住家老火湯、兩個餸同一個竹筒飯,加埋糖水、壽包,應該差唔多夠皮!
住家老火湯 $45
原瓦煲上,一煲夠分7、8碗,今晚係木瓜雪耳煲豬骨,雖然無話湯渣另上,但晌煲內都撈到唔少雪耳、豬骨,足料證明;大部份城市人都唔多湯水,雖然感覺唔及屋企煲嘅咁濃湯味,但依個都算係住家靚湯嘅替代品,至少飲落無味精,唔渴喉。
阿嫲雞 $95(半隻)
聞說係老闆嘅嫲嫲做沙薑雞嘅私房做法,步驟幾繁複,點做就唔知,唯一知佢係好似以飯煲焗成,所以做法比較健康,而且,食落隻雞唔肥,但入味而且肉滑,唯一唔OK係鹹咗同雞味唔強,否則就無我挑剔喇!仲有,鐘意佢隻碟,真正「公雞」碟,不過崩晒就唔係咁好睇。
南瓜排骨盅 $80
招牌始終都係招牌,見好幾枱都有點,果然係人氣。大大個南瓜,去囊、去籽、去晒皮,色澤鮮橙,盛滿蒜蓉磨豉炒好嘅排骨,南瓜盅下底再配上翠綠嘅西蘭花,單講賣相已夠搶。排骨惹味又夠腍,獻汁夠多,所以,我哋除叫了個竹筒飯外,再追加兩碗白飯嚟送汁;南瓜蒸得亦夠腍,都未使用把刀,用匙羮一軋即開,我幾鍾意食南瓜,加上南瓜屬瓜味濃嘅一類,所以連個瓜蓋都唔放過,哈哈!
柱貝魚湯雜菜煲 $48
奶白嘅魚湯竟然好味過個住家老火湯喎,一來魚湯夠魚味又唔腥,二來係帶有淡淡瑤柱嘅鹹香,意料之外就令到個感覺變得唔普通喇。雜菜分別有:西蘭花、紹菜、白菜仔,加埋粉絲、蝦乾同蘑菇,啲菜唔覺話特別鮮甜,叫做一餐飯總要有啲菜平衡吓,補充多啲纖維素,清淡少油都幾好。
老少平安 $48
除咗個雜菜煲,散叫得依味,可見我哋盡量食得幾清淡!老少平安,非常之家常菜,材料簡單,主要就只有豆腐、鯪魚肉。做法亦簡單,板豆腐攪爛,加蛋白、鯪魚肉,蒸10min搞掂。豆腐營養價值高唔使講,魚肉又打得彈牙,配上蔥粒、麻油添色添香,要健康其實就係咁簡單。
鮑魚雞粒竹筒飯 $62
以前嚟食過依個竹筒飯,好鍾意,所以今次都翻點。賣$62客,唔好以為雞粒多過鮑魚粒,飯裡面唔係寥寥可數三幾粒,實情係有唔少,不過係「鮑魚菇」粒,唔好見人哋寫鮑魚就對號入座,到時搵唔到鮑魚粒就一味投訴投訴。飯底炒得夠乾身,飯粒分明,連同雞粒、鮑魚菇粒、雞蛋,炒得幾香,又唔油。個竹筒,覺得裝飾多過實際,始終用咗咁多輪,真係寫唔出會有咩竹筒香,不過,賣相點都比就咁普通一隻白碟上好睇呀嘛,心理上都會不其然覺得好食啲架喎!
糖水
是日糖水係腐竹薏米,同枱有朋友唔鍾意食薏米,可惜係無得揀,只有食與唔食。見佢都有啲誠意,腐竹煲到化晒,糖水好香腐竹味,不過只加薏米,我就覺得「寡」咗啲,如果有三幾粒白果,再加啲蛋花,好睇之餘,味道會好啲。不過,係免費送嘅,我亦唔可以要求多多啦!
壽包
雖然係窩心免費送,睇佢有少少甩皮估佢可能係來貨嘢,但質素又唔係差喎!首先個樣都似模似樣,個個十足壽桃咁,包身都算鬆軟,少少黐牙,蓮蓉唔太甜就啱大眾口味,都係個句,免費送嘅,都係唔可以要求太多嘅!不過,有一點值得一提,係個侍應提定我,叫我預早通知佢壽包幾時出,因為要預時間蒸番,所以啲包一嚟熱氣騰騰,至少令人感覺新鮮。
整體嚟講,住家菜真係做到無味精、清淡少油、住家餸菜,而服務幾殷勤,餸菜選擇不少(驟眼一望張點菜紙都有成百多款),大部份都係賣$50-$70左右,價錢合理,又唔似一般中菜館又茶又芥,未見官先打八十,仲送埋糖水、壽包,加番一都係覺抵食嘅,會再幫襯嘅館子! |
|
|
小南國 Shanghai Xiao Nan Guo |
標題 : 闔家歡.冬大過年 |
地址 : 沙田新城市廣場一期7樓709號舖 |
地區 : 沙田 |
|
現時分數:
|
日期 : 2011-03-14 12:17:56
好耐無入嚟新城市廣場依邊食飯喇,就番其中一家,所以入咗嚟。趁著做冬,又可以一家人圍埋食番餐好嘅,今次揀小南國,無非都係貪佢水準穩定有質素,而且又有個闔家歡超值精選八人餐(原價$1,728,折實$1,488,唔包茶芥),人數啱晒,菜單又有佢哋嘅幾款招牌菜,符合晒我哋嘅要求!
小南國在港亦紮根多年,走嘅係中高檔路線,所以裝修、服務、食物質素都一向屬佳品,晌度食飯幾穩打穩紮。加上今晚主打都係嚟做冬,爆場都係定律,分兩輪都係飲食業搵錢嘅自然做法,早啲食早啲走啫,返到屋企都唔使搞咁夜。
一室象牙白主調,帶有通花嘅天花,晶瑩剔透波波水晶燈,都令環境雅緻不俗套。未上菜,先嚟一人一杯清潤雪梨水,晌依個冬日添添滋潤,總好過次次都係啤酒汽水,如果有得添飲就仲正!
前菜五小碟
5款冷盤前菜碟碟都做得幾骨子,加少少伴碟,觀感已好唔同,包括有:花雕醉雞、金瓜絲海蜇、涼拌茄子、四喜烤夫、糖醋小排骨,各具特色,5款都做得好食。
- 醉雞帶微微酒香,唔會蓋過雞鮮味,皮爽又肉滑。
- 金瓜即係南瓜,金瓜同海蜇都切成幼絲,望住絲嘅幼而修長,都睇出師傅刀功上乘。金瓜絲同海蜇絲都做到質感脆身,添少許麻油撈撈,不其然夾完一炷又一炷。
- 茄子切得長短勻一,又索足醬汁,加埋瓜身水份,咬落去汁液豐盈,軟腍度又適中。
- 烤夫(正寫為「烤麩」),好似海棉吸收晒醬汁,夠晒入味,甜中帶鹹,四喜通常指用金針、木耳、鮮冬筍、香菇,依個就用咗金針、木耳、毛豆,頂多只可叫三喜喎!
- 小排骨,排骨的的骰骰,主要食個糖醋汁,甜酸得嚟唔嗆喉。
清炒河蝦仁
可能你會嫌佢個賣相清得緊要,但神髓在於此。蝦仁雖然比較細粒,但炒得粒粒晶瑩,挑晒腸,誇張少少真係白裡透紅,既然清炒就係食佢河鮮味,所以雖有醋佐點,但都入口齋食,味道鮮甜清爽,再搞多啲「花臣嘢」,就破壞佢清炒之名。
砂窩雲吞雞
滔起位上,每位兩粒雲吞加棵小棠菜,湯頭色深鮮甜有雞鮮味,唔油膩;雲吞以鮮蝦豬肉為本,包得大大粒,穩打穩紥。雞肉另碟上,雖然隻雞係用作滾湯膽,但比預期中唔算點嚡,點點豉油我都食咗唔少。
椒鹽小黃魚
記得以前都係晌小南國食嘅小黃魚無依家咁大條,所以,叫小黃魚都唔多貼切。八人餐,一大碟共八條,唔使分,依然出色嘅小黃魚,就係皮脆肉嫩,師傅日日都唔知要炸幾多條,相信失手都機會細囉!
蟹粉燴魚肚
今餐無鮑參翅,有個肚(花膠),都幾好喎。魚肚我就視佢為高檔豬皮,依句都係講笑啫,兩者價錢差好遠,以前聽朋友講,有啲無良酒樓真係豬皮扮魚肚架。魚肚本身無乜味,重點在於佢嘅滋補價值,所以要搵啲相對味濃嘅汁醬嚟扣或燴。依碟魚肚燴得夠腍,咬落少少爽口,唔腥唔潺,配合蟹粉,無疑令個魚肚更貴氣,但足量嘅蟹粉令每啖更滋味。(題外話:原來豬皮本身都有好處,就係加速傷口埋口,不過食得多會吸收過量膽固醇。)
元蹄伴棠菜
期待嘅菜式,因為真係好難得食元蹄,平時散叫唔會點依道菜,通常啲人都話怕肥。難得係個餐嘅指定菜式,可以食過痛快。元蹄紅燒,醬汁非常濃稠,成隻元蹄都掛晒汁,一刀切開,清楚見到表皮、皮下脂肪、蹄肉。表皮軟腍,好似食緊肉凍咁;脂肪望落去就一定覺得肥,但食落唔算油;蹄肉被啲肥膏包住嚟炆,自然夠晒腍滑,所以就被大家搶得快,此外因為係全肉,無乜肥膏,點點醬汁就好好味。
上湯時蔬
其實都唔係點上湯,反而係一個加咗蛋白嘅厚「獻」,時蔬主要用菜心,加咗啲茶樹菇做點綴,只係為個套餐平衡吓,而作出嘅清菜間場,菜心鮮嫩,都OK嘅。
灌湯生煎包
通常套餐,總係臨尾安排粥粉麵飯,勢要客人飽到捧住個肚走,但今次個餐係以灌湯生煎包代替往常嘅傻麵,仲得我歡心,因為上面都食咗唔少嘢啦,真係飽得九乘十乘,來個灌湯生煎包倒有點特色。包底煎得香脆,包身鬆軟,豬肉餡亦醃得夠味且打得鬆化,唯「灌湯」有點不足。
桂花拉糕
拉糕亦即係上海年糕,係上海傳統食完年夜飯嘅飯後甜品,與「拉高」諧音,希望新一年晌財富同地位可以「拉高」「拉高」云云。蒸好嘅拉糕,加啲桂花糖,入口軟綿煙韌黏牙,雖未至於齒頰留香,但桂花糖唔太甜帶有清香。
冬又好,團年又好,闔家歡.開開心心食一餐,咁就已經好好! |
|
|
Pacific Coffee Company |
標題 : 慕斯里曲奇 |
地址 : 沙田新城市廣場一期6樓609號舖 |
地區 : 沙田 |
|
現時分數:
|
日期 : 2011-03-11 11:22:57
成日聽人講碌卡係先使未來錢,好易搞到債台高築,唔碌卡一樣可以問人借錢,依家銀行啲預先批核,多到得人驚,三幾日一個電話打嚟問你有無需要筆備用現金使吓,借啲錢嚟去吓旅行之類,同佢講唔使還咪借囉,一係就借夠三百萬俾我買番層樓,咁就收線!其實學習善用信用卡,唔好被佢控制你,隨時為自己帶來好多口福嘅。依家啲信用卡公司好興同啲大商場合作,搞推廣,有時都幾吸引,反正有啲嘢都計劃咗要買,在乎晌邊度買啫。相反,如果為咗啲獎金獎品去搏命碌,咁就戇居啦!
花旗早半年前晌新城市廣場搞嘅推廣,抽中咗Pacific Coffee嘅贈券,包一件曲奇及一杯咖啡,都值$50架,唯一衰係要指定新城市嘅Pacific Coffee,所以拖到最後限期入開嚟食飯先到此tea吓!
曲奇就揀咗Muesli Cookie,屬美式曲奇,大大塊,面積大過一般成年人嘅手掌少少,質感就軟軟腍腍,勁牛油香,亦都勁油膩。其實咩叫Muesli(慕斯里),即係以穀物、堅果、乾果等混合而整成嘅嘢,所以個配搭可以好多變,但整曲奇大路嘅都係燕麥片、小麥胚芽、葵花籽、南瓜籽、碎腰果、碎杏仁、提子乾、杏葡乾……等等,通常都係用2-3款左右,太多太雜食唔出味道。而依度嘅Muesli Cookie主要係用上燕麥同提子乾,燕麥就好食得出,因為咬落有種煙韌細小嘅穀物塊就係喇,相反,提子乾可能落得唔多,唔係好食到有,相信加重啲提子乾會好食啲,因為提子乾味道獨特,令件曲奇整體個味道唔會咁單一。
咖啡選取Mocha莫卡咖啡,因為太太鍾意,佢對咖啡唔算好,但又鍾意飲熱朱古力,所以就揀咗佢。莫卡其實係濃縮咖啡做底,加牛奶同朱古力漿,最後加啲打起嘅忌廉。依杯Mocha加完忌廉,再唧少少朱古力漿,賣相故然好睇好多,加咗忌廉亦自然令到杯嘢柔滑啲,咖啡味同朱古力味都幾平衡,唔會太側重某一邊味道。一件曲奇、一杯咖啡,都係令人感到輕鬆悠閒嘅下午茶配搭! |
|
|
Archie B's |
標題 : 原子漢堡唔曉爆 |
地址 : 中環士丹頓街9號LG/F |
地區 : 中環 |
|
現時分數:
|
日期 : 2011-03-10 10:36:01
經常晌上半山電梯嘟八達通慳兩雞,順道都會逛吓Soho,好幾年之前已發現依家紐約風小店,佢又唔止賣漢堡包,仲有熱狗、特製三文治、沙律、小食同湯,不過當其時見佢個價位,食個漢堡都話幾十蚊,食慣麥記大嘅我自然覺得唔多抵,所以雖然晌中環打工都打咗10年,但都一直無幫襯。不過,近年對食漢堡個心態都變咗,雖然一晌係啲美國餐廳都有賣開成百蚊個嘅漢堡,但因為依家出咗好多漢堡專門店,成行成市,製造高質量或有自家特色嘅漢堡包,用料靚咗,價錢當然唔平得去邊,故此感覺係食漢堡係享受多過單單要飽肚。
見團購網站推出以$59就可以享受原價$120嘅美食,唔使多諗就已經第一時間入貨啦!揀好個星期六收工後,等埋老婆齊齊試。
見櫃位頭上個餐牌,選擇繁多,但係就光撐撐,字又細,花多眼亂,都費事再望。望住側牆粉筆字嘅Today’s Special,精簡精揀,$60份,有3款漢堡選擇,served with fries and soft drink,係奇怪在10% service charge (for dine in only),睇唔到佢有咩服務俾顧客可言,買嘢又係個客排隊晌櫃位買,至多都係等佢整好後佢拎俾你,斟茶遞水嘅「售後服務」更加唔會有,因為佢都係似個快餐形式經營,唯一可以講係人哋花咗錢晌裝修度,你堂食就享用緊佢個環境,佢啲裝修,10%服務費就似係個「留位」費喇,哈哈!所以,依個10%有啲搵笨,好彩其他漢堡專門店無學佢咁啫,真係食快餐都收服務費!手揸$120團購券,啱啱好叫兩份,唔使煩,不過因為「服務費」要補番少少。
3款漢堡選擇包括:Atomic blue cheese burger, Mushroom gravy chicken burger (grilled), Great chili chicken burger (fried)。我哋揀咗頭兩者,嘢飲要Coke Zero同Ginger Ale,本來天氣有啲寒,太太想飲熱嘢,可是依度係無供應嘅,全部都係現成嘅罐裝、膠樽裝、玻璃支裝飲品。
Atomic blue cheese burger
個漢堡當然同原子無關啦,更加唔曉爆炸啦,後來上網翻查,有以下一句:「atomic blue is a first of its kind dipping sauce that combines a blend of spices with blue cheese to create a totally new and unique flavor」,假如此話當真,咁atomic blue cheese簡單嚟講應該係啲加咗香料嘅藍芝士。不過,食嘅時候真係唔單只唔覺佢有咩其他香料晌度,更唔覺依塊係藍芝士,因為藍芝士係以羊奶加霉菌之類熟成,象牙白嘅芝士佈滿大理石模樣嘅藍藍綠綠色花紋,但眼前所見就似係一塊普通芝士,唯一似藍芝士就係味道同樣偏鹹。但撇除係唔係藍芝士個問題,其實個漢堡幾高質,首先成個漢堡大大個,楂上手甚有份量,視覺上幾有睇頭;包身鬆軟有彈性亦好重要;牛肉肉味濃兼打得有韌性而不鬆散,再者煎煮時保存到肉汁,唔會「乾爭爭」,食起嚟感受到滿口滋味;最後,以大塊生菜兜底,配上蕃茄同熱醬汁,既係聰明做法,亦增添味道同口感層次。另外搭條開半嘅酸青瓜,放晌包外,好似Triple O’s咁,就咁齋食又得,放埋入包內一齊食都得。至於薯條,感覺同麥記分嘅別唔大,係大條過佢!
Mushroom gravy chicken burger
依個蘑菇汁雞肉漢堡就差啲,主打嘅雞塊嚡都不得了,嚴重失分嘅一環,所以雞塊嘅上面個蘑菇汁加埋芝士點好,都拉唔番啲失分。而雞塊嘅下面同個藍芝士牛肉漢堡一樣,以生菜、蕃茄、熱醬汁為基礎。
確實一大個籃,漢堡加薯條,外國人份量,清晒成籃嘢,非常之飽。個人覺得,以咁嘅價位,屬平穩,唔算有太大驚喜。 |
|
|
Archie B's |
標題 : 原子漢堡唔曉爆 |
地址 : 中環士丹頓街9號LG/F |
地區 : 中環 |
|
現時分數:
|
日期 : 2011-03-10 10:30:54
經常晌上半山電梯嘟八達通慳兩雞,順道都會逛吓Soho,好幾年之前已發現依家紐約風小店,佢又唔止賣漢堡包,仲有熱狗、特製三文治、沙律、小食同湯,不過當其時見佢個價位,食個漢堡都話幾十蚊,食慣麥記大嘅我自然覺得唔多抵,所以雖然晌中環打工都打咗10年,但都一直無幫襯。不過,近年對食漢堡個心態都變咗,雖然一晌係啲美國餐廳都有賣開成百蚊個嘅漢堡,但因為依家出咗好多漢堡專門店,成行成市,製造高質量或有自家特色嘅漢堡包,用料靚咗,價錢當然唔平得去邊,故此感覺係食漢堡係享受多過單單要飽肚。
見團購網站推出以$59就可以享受原價$120嘅美食,唔使多諗就已經第一時間入貨啦!揀好個星期六收工後,等埋老婆齊齊試。
見櫃位頭上個餐牌,選擇繁多,但係就光撐撐,字又細,花多眼亂,都費事再望。望住側牆粉筆字嘅Today’s Special,精簡精揀,$60份,有3款漢堡選擇,served with fries and soft drink,係奇怪在10% service charge (for dine in only),睇唔到佢有咩服務俾顧客可言,買嘢又係個客排隊晌櫃位買,至多都係等佢整好後佢拎俾你,斟茶遞水嘅「售後服務」更加唔會有,因為佢都係似個快餐形式經營,唯一可以講係人哋花咗錢晌裝修度,你堂食就享用緊佢個環境,佢啲裝修,10%服務費就似係個「留位」費喇,哈哈!所以,依個10%有啲搵笨,好彩其他漢堡專門店無學佢咁啫,真係食快餐都收服務費!手揸$120團購券,啱啱好叫兩份,唔使煩,不過因為「服務費」要補番少少。
3款漢堡選擇包括:Atomic blue cheese burger, Mushroom gravy chicken burger (grilled), Great chili chicken burger (fried)。我哋揀咗頭兩者,嘢飲要Coke Zero同Ginger Ale,本來天氣有啲寒,太太想飲熱嘢,可是依度係無供應嘅,全部都係現成嘅罐裝、膠樽裝、玻璃支裝飲品。
Atomic blue cheese burger
個漢堡當然同原子無關啦,更加唔曉爆炸啦,後來上網翻查,有以下一句:「atomic blue is a first of its kind dipping sauce that combines a blend of spices with blue cheese to create a totally new and unique flavor」,假如此話當真,咁atomic blue cheese簡單嚟講應該係啲加咗香料嘅藍芝士。不過,食嘅時候真係唔單只唔覺佢有咩其他香料晌度,更唔覺依塊係藍芝士,因為藍芝士係以羊奶加霉菌之類熟成,象牙白嘅芝士佈滿大理石模樣嘅藍藍綠綠色花紋,但眼前所見就似係一塊普通芝士,唯一似藍芝士就係味道同樣偏鹹。但撇除係唔係藍芝士個問題,其實個漢堡幾高質,首先成個漢堡大大個,楂上手甚有份量,視覺上幾有睇頭;包身鬆軟有彈性亦好重要;牛肉肉味濃兼打得有韌性而不鬆散,再者煎煮時保存到肉汁,唔會「乾爭爭」,食起嚟感受到滿口滋味;最後,以大塊生菜兜底,配上蕃茄同熱醬汁,既係聰明做法,亦增添味道同口感層次。另外搭條開半嘅酸青瓜,放晌包外,好似Triple O’s咁,就咁齋食又得,放埋入包內一齊食都得。至於薯條,感覺同麥記分嘅別唔大,係大條過佢!
Mushroom gravy chicken burger
依個蘑菇汁雞肉漢堡就差啲,主打嘅雞塊嚡都不得了,嚴重失分嘅一環,所以雞塊嘅上面個蘑菇汁加埋芝士點好,都拉唔番啲失分。而雞塊嘅下面同個藍芝士牛肉漢堡一樣,以生菜、蕃茄、熱醬汁為基礎。
確實一大個籃,漢堡加薯條,外國人份量,清晒成籃嘢,非常之飽。個人覺得,以咁嘅價位,屬平穩,唔算有太大驚喜。 |
|
|
順德了能菜
|
標題 : 功夫平穩的順德菜 |
地址 : 美孚美孚新村6期恆柏道2-8號地下 |
地區 : 美孚 |
|
現時分數:
|
日期 : 2011-03-08 09:54:01
順德魚塘事業蓬勃,稱得上魚米之鄉,河鮮店更開到好似雨後春筍咁多,有名啲嘅好似順德公、肇順名匯,叫做大放異彩,當然除咗河鮮,順德都有唔少出色嘅菜式及花功夫嘅手工菜,鳳城自然係代表之一。其實順德都算得天獨厚,既為魚米之鄉,屬富庶之地,不過印象中佢又好少出飽參翅肚、山珍海錯等嘅貴價菜式,都係尋常用料、平凡食材,反而着重技巧同味道。
每隔個星期都有與一班教會朋友查考聖經,但每次都係各自搞掂餐飯先一齊查經,甚少同枱食飯,有嘅都係晌某組員屋企隨便一餐,今次就啱其中一位組員生日,就決定出外食番餐好嘅。
美孚都有好幾間中菜館,不過稍有特色啲嘅,其中就係依間食順德茶嘅,雖則掛住個「順德」字號,但都唔係百份百賣晒順德菜。對區外人嚟講,位置有點吊腳,因為晌美孚新村內街,但查實唔難搵。店舖屬小館子,唔係豪裝,又唔係好街坊,都算叫得做幾骨子,藤椅,中式小吊燈,感覺幾舒服,可能因為今晚係星期四,客人唔太多,約6乘滿左右,所以坐得比較鬆動,但驟眼所見,如果坐滿,真係有啲地方連出入都唔方便,吓吓都要「唔該借借」。
睇睇菜牌有咩食,有2人4人套餐,因有6個人,我哋就揀咗個4人套餐$398(9:00pm仲有得平,賣$338添),一個羮搭四個餸,加碟炒飯;另外仲有個總廚捱介,順德出名嘅話梅豬手、大盆魚就晌度見到。茶位$8位,小食$8,另收加一就唔少得啦!
生折魚茸羮(套餐)
樣就平平無奇,個湯羮都係冬菇絲、韮王、蛋白,普通嘢,食落就知唔同,因為生折魚茸,啱晒想食魚又怕骨嘅人,味道清淡得嚟帶有魚嘅鮮甜,都叫得做粗菜精做。
好味檀香骨(套餐)
一大個瓦煲上菜,熱度一路保持住。檀香骨,個名好似好特別,但覺得只係洋蔥生啫大肋排,啫啫雞煲食得多,啫啫肋排都唔錯,何況肋排肉地厚,啖啖肉。
豉汁蒸黃骨魚(套餐)
套餐一碟上兩條,少見識無食過依款魚,樣有啲似迷你版鯇魚,嬌小無鱗,肉質比較彈身,質感有啲似食黃蟮,豉汁蒸所以食落惹味,師傅講生啫或者用嚟蒸都合適。
天湯魚腐浸時蔬(套餐)
時蔬用咗生菜,脆嫩無話腍晒。個菜好味在於以魚湯浸,魚湯又做得夠濃郁魚味而唔腥,加咗魚腐就叫畫龍點睛啦,唔係齋生菜咁寡,仲有好多蒜子吊味。
順德銅盤焗污糟雞(套餐)
銅盤錫紙冚住焗,鎅開錫紙熱氣騰騰,雞肉嫩滑,可惜過鹹咗少少,而且比較油,仲有雞肉好似帶有黃薑味,感覺有少少怪。一般污糟雞都會用榨菜或者大頭菜,加蔥頭同蒸,不過依度嘅污糟雞前兩者都無,只係加咗蔥頭。
客家炒飯(套餐)
雖然係順德菜館,但套餐竟然有個叫客家炒飯。個炒飯無乜睇頭,只係以金華火腿粒、蔥粒,菜埂片同紫菜碎炒個飯,味道一般,稍淡添,只可以咁講:好過只係食白飯。
金銀蛋菠菜(散叫)$58
有別於平時食嘅樣,皮蛋就切角,但鹹蛋唔係原隻切粒,蛋黃、蛋白分開整,所以見蛋黃係粒粒,蛋白係蛋花狀,菠菜嫩綠,同樣加咗好多蒜子。
話梅豬手(散叫)$52
話梅味濃重,酸咪咪開胃醒神,但唔係一味死酸,嗒落有朕甜味滲出,感覺到多少話梅都唔係用太平價貨。而豬手炆得皮軟肉腍,膠質感重而唔膩,幾好喎!
黃金糕(送嘅)
似模似樣,煙煙韌,但唔知係咪因為枱枱有份,做定晌度好耐,有啲乾,而且唔係太有椰汁香!如果送順德馳名經典小食白糖糕,咁就正喇,因為好耐無食,想返起深水埗坤記,仲有佢嘅九層芝麻糕添!
始終因為今晚客唔多,坐得唔太逼,招呼又到位,食物整體都唔錯,都值得再嚟。 |
|
|
龍島 Lucullus |
標題 : Hazelnut Milk Chocolate |
地址 : 中環港鐵中環站E14舖 (近E / F出口) |
地區 : 中環 |
|
現時分數:
|
日期 : 2011-03-07 12:26:58
雖然送咗蛋糕,但情人節多少都要整份朱古力嚟增加多少少氣氛嘅,針對情人節出嘅朱古力靚得嚟只係在於花巧多啲,而且價錢就一定會偏貴架啦,我都係較實際嘅人,所以晌龍島揀咗罐榛子牛奶朱古力(Hazelnut Milk Chocolate)送俾老婆,$98罐,重200g,裡面分兩小包,一小包都有好多粒,大概都成廿多粒左右,咁佢都覺得咁樣「襟」食啲!
其實粒朱古力好簡單,顧名思義,咪就係牛奶朱古力包住榛子果仁,不過,勝在牛奶朱古力香滑,榛子香脆,送禮都在乎心意,況且罐嘢都差唔多成舊水,唔通送排吉百利咩,唔係話吉百利唔好食,我哋簡中都有買嚟食,尤其提子果仁,只係特別日子唔好太平常,試吓其他啫!
|
|
|
喜。乳酪 Hey Yo!! |
標題 : 情人節蛋糕對對碰(二) |
地址 : 旺角亞皆老街8號朗豪坊地庫2層B2-01舖 |
地區 : 旺角 |
|
現時分數:
|
日期 : 2011-03-07 12:13:23
晌聖安娜一文講過同老婆錯亂咁搞出個情人節蛋糕對對碰事件,我就買咗個聖安娜嘅情人節蛋糕「心心相對」(士多啤梨芝士軟心蛋糕),佢就買咗個伯伯加奴嘅Cotton Soft Cheese Cake。
咁究竟個Cotton Soft Cheese Cake係乜嘢?有啲鋪頭會叫佢做Cotton Soft Japanese Cheese Cake,其實咪就係日式芝士餅,即係以前田中家買到排晒隊嗰隻。唔貴,都係$39.8一個。
不過,依個Cotton Soft Cheese Cake晌包裝上幾靚,個餅造型係橢圓形,透明膠盒,綑上一張招紙,印住蛋糕個名,再綁上紅絲帶,感覺雅緻好多。咁內涵又點,質感濕潤、軟綿,芝士味突出,相比起以前田中家嘅實凈少少,當然唔似紐約芝士餅嗰種咁實咁濃啦!加上係老婆送嘅,點都秤高少少嘅! |
|
|
聖安娜餅屋 Saint Honore Cake Shop |
標題 : 情人節蛋糕對對碰(一) |
地址 : 中環皇后大道中138號威享大廈地下1號舖 |
地區 : 中環 |
|
現時分數:
|
日期 : 2011-03-07 11:38:18
今年聖安娜嘅情人節蛋糕名為「心心相對」,望落去個樣有啲假,似裝飾用嘅感覺,衰啲講句好似蠟做咁,查實佢係一個士多啤梨芝士軟心蛋糕,只不過個粉紅底色唔太自然,先覺得佢有啲假啫!
情人節當日兩公婆晌屋企煮飯仔,因為唔係好想晌出面被逼食貴價餐。飯後係甜品時間,我嘅預備就係依個「心心相對」,老婆以為我無準備,哈哈,佢又晌伯伯加奴買咗個Cotton Soft Cheese Cake嚟慶祝,結果情人節蛋糕對對碰,慶祝蛋糕打孖上,雖然兩個蛋糕都唔係話成磅裝嗰啲咁大個,但始終都係兩個,只好各食一半,剩番嘅明天再繼續。
個「心心相對」,由底而上係海綿蛋糕、士多啤梨慕絲、士多啤梨果肉、芝士軟心,跟住再一朕蛋糕、慕絲,面面放啲裝飾。其實味道唔錯,保持到聖安娜嘅質素,海綿蛋糕鬆軟,士多啤梨慕絲幼滑,芝士軟心香軟但芝味唔濃,而且士多啤梨果肉有啲酸,唔夠靚,要扣扣分。
至於個Cotton Soft Cheese Cake係點,見另文喇!除蛋糕,仲有送咗罐龍島嘅榛子牛奶朱古力俾老婆,雖然無出街食,佢都開心嘅! |
|
|
牛車水餐廳
|
標題 : 舅仔飯堂 |
地址 : 美孚美孚新村萬事達廣場1樓 |
地區 : 美孚 |
|
現時分數:
|
日期 : 2011-03-01 18:11:50
通常星期日我哋倆公婆都盡量晌屋企煮飯食,因為有多啲時間準備,唔似平日要返工比較趕。但今次就因為晏晝都各有各忙,咁就費事煮啦,搵埋舅仔一行三人出街食!本來諗住去食點心專門店,但好似唔太就腳,最後費事煩走返美孚搞掂算。
揀咗牛車水,都係因為依間嘢係舅仔嘅飯堂,美孚查實都有好多茶餐廳,但佢就稍為情有獨鍾依間。
美孚幾實都有唔少選擇,不過星期日嘅話就好多好食嘅都人滿之患,唔爆嘅有可能唔好食,又或者係一般,牛車水就屬後者,對我嚟講,佢唔係太差,亦講唔上好食。
依晚,星期日,黃金時間,都係7乘幾滿,除咗味道,普羅大眾當然好考慮個價錢,反觀隔幾個鋪位嘅大家樂就爆晒,始終人哋都係平啲。牛車水食晚飯個價位就$50位左右,不過,老婆唔算大食之人,我就多有多食,少有少食,舅仔牛高馬大都只係稍為叫食多少少,所以,叫兩個小菜搞掂。
佢依度有幾款晚市套餐,其中一款叫「自選小菜二人套餐」,任揀兩款精選小菜或煲仔菜,配例湯或湯羮(粟米雞茸湯、海鮮豆腐羮、牛肉羮),加白飯兩碗同熱飲兩杯,賣$102(另加一)。本來打算就依個二人餐扑鎚,不過幾款湯羮佢哋都唔太啱,如果飲例湯,不如散叫小菜,因為每款精選小菜或煲仔菜,都送例湯、白飯同熱飲,價錢範圍晌$46-$50,散叫兩個都唔使一舊水,有時真係「套餐平過散叫」都唔係必然道理!
老火例湯
青紅蘿蔔粟米煲豬骨,都唔算行貨,飲落湯味算OK,唔會淡戊戊,至緊要佢無落味精啫,始終例湯唔會太要求。係唯獨是份量甚多,用成五吋直徑闊口西湯碗裝,所以,一碗例湯相等於平時屋企飯碗兩碗咁。
鮑片海鮮雜菜煲 $46
雖然叫做又鮑片、又海鮮,但賣得咁嘅價,真係唔好期望有咩靚料。叫得鮑片海鮮,佢無吹水,真係俾足,之不過鮑片薄薄兩片,魷魚、蝦仁、帶子、竹笙樣樣少少,大量白菜仔、菜心墊墊底。因為湯底好淡,無乜味,連帶啲海鮮都感覺太清太寡,好似白烚,整體嚟講普通!
椒鹽鮮魷 $50
鮮魷鮮味軟熟,係粉漿稍稍厚咗啲,但個人嚟講可接受,唔會一咬成舊粉咁。鹽味就夠晒秤,辣椒就嫌佢唔夠喎,食落辣味似有還無咁,所以未夠惹味,好彩佢就夠晒熱辣辣。
依度嘅白飯亦相對大碗,而且滔得幾滿,所以,兩碗白飯夠晒我哋三個人食,故此都見好幾枱一家三口,或兩女一男都係叫個二人餐就搞掂! |
|
|
Ocio 窩夫專門店 Ocio Waffle |
標題 : 唔係紅豆窩夫?係窩夫,豆沙另上! |
地址 : 旺角廣華街1號仁安大厦地下14D舖 |
地區 : 旺角 |
|
現時分數:
|
日期 : 2011-02-23 17:04:02
一般食肆搞團購,都係當宣傳,想短期內提高自己店舖嘅知名度,所以某程度我都相信佢哋會盡量俾出啲好嘢,等大家食過後有口皆碑,做好個名,爭取更多客源,但凡事總有例外。
對窩夫唔算特別好,反而鍾情傳統嘅格仔餅,我都係因團購關係,所以一試奧斯嘅產品,佢晌某食評網站做團購,當時嘅宣傳係咁樣寫:
- 甜魔召集!$15平嘆Ocio窩夫連雪糕(7種口味任你揀)
- Ocio Waffle所用之素材經過嚴格挑選,絕不含任何人造香料,色素和牛油,保證絕對新鮮和低脂。享用時配以新鮮果醬和雪糕食用,口感倍覺清新特別,絕對是新世代健康食品的不二之選!
- 味道可選:經典原味,綠茶味,全麥味,椰子味,紅豆味,朱古力脆脆48% 及朱古力脆脆58% (原價$19-$33)
小弟係趕在到期日前去食,是晚平日,客唔多,不過都要等一陣,話晒都即整嘛,原本團購係話有7種味道可揀,但依晚去到,佢已「張貼」通告只有4款。話原價值$19-$33,除非佢有供應白朱古力味同雜莓,否則,以佢所提供嗰7種味道,最貴都係綠茶味($30),其他都係廿幾蚊,加$1多個雪糕球,頂多叫去到原價$31,雖然只係幾蚊雞之差,但對依間嘢做生意嘅態度有所保留。
結果,得嗰4款選擇後,小弟揀咗紅豆窩夫配朱古力雪糕,外賣拎走食!以原價計,$24,依家團購價,就$15,叫做63折,確係平咗一截。不過,質素方面,個人覺得未對辦。
平心而論,佢哋確係做得脆口,外脆內軟,梗係啦,塊窩夫做到紙咁薄,咁講或許有少少誇張,唔好見佢出爐時件窩夫咁大件,但同我哋平時食開格仔餅嘅厚度,尤其格仔凹位部份,個夾陣真係好薄,格仔嘅格邊就厚番啲。對我嚟講,當一餐真係唔掂,佢做一份窩夫嘅粉漿我估都係格仔餅1/4嘅份量。賣相幾好,大件窩夫切細後,淋上朱古力漿,再灑少少糖霜。味道,唔算太有蛋香,更重要係,我依個係紅豆窩夫,究竟紅豆晌邊?就係晌個盒嘅死角位,兜雪糕遮住嗰一小撮「豆沙」,好寒酸之餘,佢係一撮硬實實嘅豆沙,用嚟整豆沙湯圓或者豆沙包嘅豆沙喎。可能我一心以為係類似以前麥記嘅紅豆新地咁,帶有粒粒紅豆嘅紅豆漿淋晌窩夫上面度,又或以紅豆做餡,夾晌窩夫裡面,但食晒成盒都唔覺有,依家個感覺有好大落差。返嚟睇番一啲食評網站食家們嘅食評,發現有人寫過晌佢嘅紅豆窩夫裡面係有夾紅豆餡,雖然好少,但確係有相為証,唔通太多團購客,佢哋越嚟越求其,越嚟越將貨就價?係某食評網站,我見近排嘅食評都係俾佢OK同喊面多,真係有每況愈下嘅情況。唔好話正價要$24我唔會幫襯,就算以$15嘅團購價,我都唔係太情願,因為$15差唔多夠買一底格仔餅咁滯,始終我都係鍾意又甜又香嘅格仔餅。
寫到依度,個朱古力雪糕都唔想多寫,反正無嘢好講!希望佢哋認真番啲,團購客又好,散客又好,好好對待每個客人,如果唔係真係風光一時,曇彈花一現。 |
|
|
金寶越南牛肉粉 Cambo Cafeteria |
標題 : 跟餐抵食 |
地址 : 旺角亞皆老街8號朗豪坊L4A – F5舖 |
地區 : 旺角 |
|
現時分數:
|
日期 : 2011-02-19 12:52:59
同太太晌朗豪坊UA睇完場7:30pm要搵食,不假思索,就朗豪坊個美食廣場,就腳又唔使周圍搵,其實有幾間都想試,Pepper Lunch、上上拉麵小籠包、咖喱工房都係考慮之列,但到最後結果睇中咗金寶,都係因為見佢係九龍城知名泰菜館之一「金寶泰國菜館」嘅分線,有一定嘅信心,而且,泰越菜都好啱食,價位又唔算高,即管投佢一票!因為可能閒日兼成9:30pm,所以個場唔算好多人,好易搵位。
睇落張餐單紙,圖文並戊,幾多選擇,不過第一眼就揀上咗個大蝦菠蘿焗飯,因為賣相幾吸引之餘,心裡盤算,一般菠蘿焗飯份量都唔細,再加啲小食就夠晒我哋兩公婆喇。再者,幫襯佢買各款飯類、湯粉、撈濛,可以用優惠價買任何小食,仲無限買幾多款,所以,我哋就仲要多個香茅雞翼同越式春卷。
大蝦菠蘿焗飯(跟湯)$65
真係無作假喎,同張相嘅賣相一樣,炒飯真係鋪到滿一滿,飯面放咗三隻大蝦,仲插住兩支香茅枝。
相信唔同鋪、唔同大廚做嘅菠蘿焗飯都會用唔同配料炒,至於金寶,菠蘿開半刮出果肉炒飯,仲有用咗什菜粒、紅腸、火腿、雞蛋同「臘腸」,係疑似臘腸嘅腸肉,但就無咁肥,以黃咖喱粉兜炒,所以,飯粒色澤帶啞黃,入口除有菠蘿香,仲有朕淡淡咖喱味,而且飯粒炒得夠乾身,面面再鋪上啲豬肉鬆。三隻煎大蝦,話大唔大,話細唔細咁啦,蝦肉甜美,已經去咗中間嗰截蝦殼,方便食用。最鍾意係佢載住個焗飯隻碟,初時以為鋪咗塊蕉葉,原來隻碟嘅花紋就係塊蕉葉,真鬼馬!
個飯跟埋一碗湯,是日係冬瓜清湯,載住兩舊大冬瓜,沒其他,湯味OK啦,反正都係只當佢一碗例湯。
香茅雞翼 $12
一客兩隻雞全翼,散叫要成$24,真係有啲貴,不過餐價就$12,都叫食得過,但好老實講句,以food court價位,真係相信都好少人會用$24食兩隻雞翼,佢標到咁高,但跟其他主食就平成半賣俾你,令人覺得超抵,都係市場引客嘅心理策略,至少都引到我買。講番質素,雞翼炸得有啲過火,稍為燶同乾身,最失策係香茅味明顯唔夠,要改善。
越式春卷 $13
同張相一樣,係有6件越式春卷,同一策略散叫要$26,餐價就$13,都係半價。一來可能我哋比較夜食,都叫做近佢哋閂鋪時間,啲食物都放咗段時間;二來,佢哋係中央廚房製作,雖話可以保持所有分店食物質素嘅一致性同穩定性,但相反,樣樣都係中央廚房搞好晒先嚟,都已經係一大朝早嘅事。故此,我哋依碟春卷真係唔多合格,外皮較韌,咬嗰吓已經影響晒個口感,味道叫做還可以,而伴碟嘅青瓜就乾到硬,唔可以因為諗住多數客都唔食件青瓜就求期對待,有時啲細眉細眼嘢啲客係會記住。正如你話凡惠顧加$1先有杯中國熱茶,我都有要咗一杯熱茶,張單都有打住,不過就顯示為$0,無收過,依啲小事小弟都記在心。 |
|
|
譚仔雲南米線
|
標題 : 空無一人譚仔米線做早餐 |
地址 : 尖沙咀寶勒巷29號地下 |
地區 : 尖沙咀 |
|
現時分數:
|
日期 : 2011-02-18 12:43:40
因為返教會第三堂12:00pm,今日又晏咗起身,所以,索性來個late breakfast,食完先返啱啱好。地點揀咗路經嘅譚仔,咁早都怕未開,不過原來都係啱啱開檔,裡面空無一人,同平時嘅「盛況」差天拱地,班樓面阿姐仲係「頭圍用膳」未完,不過,見我倆公婆入嚟,都走過嚟招呼招呼。
始終早餐,各自食一碗米線好似多得滯,所以就叫一個過橋米線套餐$41兩份食。話叫套餐,唔好諗住包嘢飲,想飲嘅冷熱都係加$6,所以套餐(佢仲要將「套餐」二字紅色咗)之名實在搵笨。
過橋米線「套餐」,包成17款餸料,有魚蛋、牛丸、墨魚丸、竹笙、牛肉、雞肉、豬肉、腩肉、火腿、豬潤、芽菜、韭菜、腐皮、生菜、豆卜,而炸醬、酸菜另碟仔上,唔嗜辣所以要清湯底。唔好見有17款料,以為好多,丸類得嗰一粒,懶恩愛要同老婆一人一半先有得試;肉片類每樣咪得嗰一兩片,或兩三片;豆卜低成本嘢咪俾兩大舊你囉;芽菜、韭菜、腐皮都稱唔上餸料,通常食咩米線都有,只係撒上一撮咁,叫配料還可以;炸醬、酸菜叫俾得大方啲;成碗嘢唯一多嘅,咪係米線囉,好彩啲米線都OK,食落有韌性。清湯底,佢形容為鮮甜味美,小弟就覺我好一般,而咁多款餸料,亦係好一般,啲肉無乜味,白烚咁,真係後悔無叫酸辣湯底,至少有啲味!依個過橋米線,唔係話好差,只係普通至極,頂多叫佢做大大碗什錦車仔米線,無晒過橋米線嘅精髓。過橋米線滋味鮮美,在於食法特別,以湯、肉片、米線再加上配料做成,湯滾油厚,當然依家講健康,亦難跟足油厚,所以,覺得佢無謂向「過橋米線」個名抽水! |
|
|
客家好棧 Hak Ka Hut |
標題 : 抵食,但未有客家特色 |
地址 : 尖沙咀彌敦道26號東企業廣場3樓 |
地區 : 尖沙咀 |
|
現時分數:
|
日期 : 2011-02-17 14:23:48
稻香系,好多時都以平、抵食見稱,所以有時一大班人想搞飯局,又想平,唔想去泉章居等位,不如去稻香系嘅菜館啦,今趟再揀客家好棧,主要原因都係就腳,食完方便大家搭車走,荃灣線,西鐵線,東鐵線都得。
訂咗枱,一嚟就有位,因為個場都係約八乘幾滿。由於我哋有6個人,所以未嚟之前已經諗定食佢個套餐,要半圍,都係$468(一至四嘅價),1湯7菜1飯,包埋甜品同罐裝汽水,仲要免茶芥加一,不過,見佢有個推介「酥皮原味雞」,問個餐可唔可以轉,個侍應話無問題,不過要補$100,咁貴?原因係半席套餐嘅雞菜式係半隻,但原味雞一定要係成隻上,所以先要補咁多,經商量後,大家覺得改咗為起每人都唔使$100,就即管試吓見識吓。
客家老火湯
廣東人都係慣咗先飲湯,一大瓦煲粟米蘿蔔煲豬展,雖然普通,況且亦唔多係客家湯水,但都算係老火湯,幾甜,而且點只夠6個人飲呀!
紫菜鳳凰卷
用紫菜捲住煎蛋皮及甘筍條,再酥炸,然後斜切小件,賣相幾靚,而外層炸得香脆,紫菜、煎蛋、甘筍嘅配搭都OK,最鍾意反而係伴伴碟嘅麻醬粉皮,一涼一熱,減減個熱氣感。
風味炒鮮蝦仁
風味炒,即係咩風味?客家菜有個出名嘅梅菜扣肉,無咗扣肉,換咗蝦仁用梅菜炒,梅菜鹹香,都幾惹味,不過配蝦仁就唔算太夾,好彩啲蝦仁都爽口。
冶味碧綠雪花蚌
冶味來自豉椒炒,碧綠就係翠玉瓜,炒雪花蚌,整體嚟講確係唔錯,翠玉瓜炒得脆身,無過腍,而雪花蚌有咬口,唔韌,豉椒炒始終都夠冶味嘅!
酥皮原味雞
原來個套餐係薑蔥霸王雞,即係普通嘅薑蔥豉油雞,依家轉咗酥皮原味雞,一大個瓷湯碗用酥皮包住上枱,酥皮揭開就見到湯碗裡就載住成隻雞,以一啲藥材如紅棗、杞子…等,用酥皮包住同焗,所以叫原味雞,保持原汁原味。侍應除將塊酥皮剪成細細件另碟上外,亦會將成隻雞剪件,方便食用。雞肉嫩滑,藥味唔重,要挑剔係隻雞剪完之後個賣相唔好,而且,塊酥皮除當包凈食外,唔知點好,唯有自己拆肉搵酥皮包住嚟食!
艇家潮煮鮮蔬
即係魚湯浸時蔬,不過就豐富啲,加咗蝦乾、腐皮、竹笙,成晚較清淡嘅一道菜,清清哋都幾好丫,而且食完晒啲餸料,個魚湯可以當湯飲,都幾鮮甜喎。
兩味蒸鮮河魽
條魽魚估唔到半圍都俾咁大條,擺出嚟都成呎長,何謂兩味蒸,一邊用辣椒,另一邊用蒜蓉,清甜唔腥,肉質都幾嫩滑,不過辣椒蒸得個辣字,都係鍾意蒜蓉蒸,香味啲。
無錫豬軟骨
無錫骨係上海嘅海派菜,即係上海菜我嚟融和咗無錫風味,所以,睇樣都係濃酒赤醬款,不過,今勻改用豬軟骨,以石窩盛上,夠晒滾熱辣,味道甜甜哋帶少少酒香,豬軟骨肉質鬆化。
福建炒飯
原菜單係寫住「好棧八寶飯」,但唔知點解嚟咗個福建炒飯,侍應無解釋,而我哋對飯類又無乜所謂,八寶飯又好,炒飯又好,睇見佢個福建炒飯炒得唔錯,又蝦又帶子,所以照單全收,無謂煩,不過係覺得搞嘢啲啫。仲搞嘢嘅係,我哋無人試過啲飯,唔知好唔好食,係兩男四女食完上面七道菜,真係再食唔落碟飯,與其係咁,所以其中一位朋友全盒打包,拎走當聽日晏晝飯食。
合時糕點
臨尾話有合時糕點,唓,原來係中式糖水,不過有得俾你揀,要黑嘅就芝麻糊,要白嘅就杏仁茶,質素OK啦,至少個芝麻糊唔會杰到一撻撻,個杏仁茶唔會淡無味,都收貨架啦,好過唔知乜糕物糕唔啱食丫。
不過有啲奇,客家菜嘅風格好似係食粗、食野、食雜,味道方面偏向油、香、鹹、濃嘅風格,但上述菜式未能突顯客家菜風格,不過,客家菜量多、實在、不求賣相,依方面就倒相似喇!所以,個飯無食過成碟打包走,其他菜式都係大家幫幫手,一人食啲清埋去,唔好嘥嘢。雖然食物唔錯,又抵食,但未見有客家特色,所以只好俾個OK佢! |
|
|
又一間餐室 Mo-Ikken Cafe |
標題 : 型格「茶餐廳」 |
地址 : 荔枝角寶輪街1號曼克頓山商場G08舖 |
地區 : 荔枝角 |
|
現時分數:
|
日期 : 2011-02-15 16:49:15
依晚無事忙,老婆又要上英文班,得一支公,所以搵咗住晌同區嘅老友阿志同佢老婆C小姐一齊食餐晚飯,地點佢哋揀,最後決定去左曼克頓山下面嘅又一間,唔好睇佢裝修格局成間西餐廳咁,佢自稱為餐室-Cafe,一室簡約得哩幾型格,白色磚牆,襯細細格黑地磚,再配紅色梳化椅,但係,佢買嘅嘢又唔凈係西式菜,晚市套餐,有分中式西式$49-$88,配餐湯或沙律,加杯啡茶;有個晚餐叫家常便飯$58-$68,小炒配老火湯、白飯、餐飲;仲見有個招牌海南雞飯$55,同埋一啲和風特餐$78……,所以,算得上係間型格「茶餐廳」。
酸忌廉牛柳燴意粉 $58
小弟揀咗西式晚市套餐,要沙律,飲奶茶。個沙律睇落幾有誠意,唔係就咁一「pat」雜果沙律,幾款沙律菜,再墊上蜜桃、紅腰豆、車厘茄,味道幾清新。
酸忌廉牛柳燴意粉,賣相普通,好似平時茶餐廳叫嗰碟乾牛意咁,因為係燴意粉,所以無話油淋淋。味道都屬於一般,因為酸忌廉味唔突出,牛柳絲有丁點韌,唯一可取係燴意粉做到恰到好處,無過腍情況。
奶茶,可能係錯覺,都係茶餐廳好飲啲!
滑蛋蝦仁炒河 $58
C小姐要中式晚市套餐,要西湯,飲華田。中飯西湯,無所謂,至緊要係啱自己心水。羅宋湯,雖然湯料唔多,但味道濃郁,而且,大大個斜口湯碗上,夠別緻,再伴一小塊蒜蓉法包,值得加分。
滑蛋蝦仁炒河,有驚喜,賣相令人更想食,因為滑蛋望落已見炒得非常嫩滑,蝦仁唔係蝦毛仔,隻隻都大大粒,而個河粉都炒得OK,唔會太黐黐實一舊舊咁。味道方面,只係試食咗一啖,感覺唔錯,滑蛋有蛋香,而且確係滑溜,蝦仁亦爽口,河粉無試!
泡沫華田,另一個驚喜,以整泡沫咖啡手法嚟整華田,確係妙絕,雖然都係試咗一啖,但真係比平時飲嘅華田滑好多,感覺華田嘅質感好似輕身咗。
招牌海南雞飯套餐 $55
老友阿志揀咗海南雞,配老火例湯、油菜、雞油飯。依個就無試喇,因為感覺都係一般海南雞飯咁,份量幾足,大大份海南雞,老友話外薄肉嫩,脂肪唔多;雞飯都OK,有少許雞湯味,唔算油;不過,配薑蓉、蠔油、醋,比起傳統嘅薑蓉、黑豉油、辣椒醬,就變咗地道化啲! |
|
|
鴻星海鮮酒家 Super Star Seafood Restaurant |
標題 : 大開殺蟹 |
地址 : 灣仔港灣道8號瑞安中心1樓 |
地區 : 灣仔 |
|
現時分數:
|
日期 : 2011-02-12 13:18:01
有幸以後補身份出度一個試食活動,大拆大閘蟹之餘,仲試咗多款以蟹入饌嘅菜式,耗蟹量之多,可想而知,所以依餐金秋蟹宴,真係大開殺蟹,再者,菜單內容豐富,真係好吸引,兼且非常之期待。
酒家安排了一間貴賓房俾我哋依班試食兵團,坐得舒服唔在講,因為當中好多食家都係拆大閘蟹生手,小弟都係,晌房點拆得肉酸都唔怕失禮,但係,有酒家嘅公關同一啲熟手嘅食家教路,學識咗唔少嘢。此外,一大班人講吓飲食心得、飲食趣事、近排去咗邊度試咗好嘢……等等,真係過得快時,又開心!
川滬小碟 - 川湘麻貢菜、本幫肴肉
主角未出場,梗係先試試啲前菜啦!一碟兩味,一邊係川湘麻貢菜,另一邊係本幫肴肉。後者,好多時都叫鎮江肴肉,以「本幫」命名,相信係名字有別,其實 「本幫」義指上海土生土長演變嘅菜肴,而外幫菜就區分咗外地移民帶來嘅飲食菜色,因為上海開埠之初,晌社會經濟急步下,洐生出唔同嘅所謂菜幫。而依個肴肉做出哩個樣雖未致於晶瑩剔透咁誇,但就賣相有層次,同上次晌新世紀嘅湘川滬唔同,豬蹄肉無切得咁碎,但同樣都係入味有咬口。後者貢菜,少接觸,晌蔬菜統營處個網頁有相有介紹:貢菜屬於綠葉類蔬菜,食用價值高,食落少少滑潺潺感、爽口,味道酸辣麻香。同場加映嘅「豆柳」,同貢菜撈埋一齊,見個樣條條幼過尾指嘅豆乾鎅晒花咁巧手,仲想讚一讚師傅刀功,但公關小姐話係來貨嘅,無緊要,都係好嘢嚟!
蟹粉小籠湯包
未入正題,試蟹粉先。果然係小籠湯包,一咬湯汁瀉晒出嚟,皮薄就基本功啦,而蟹粉唔算落好多,但都嗒出蟹肉同蟹膏鮮甜甘香味,最重要都係要趁熱食。
江蘇大閘蟹
卒之輪到主角上場,江蘇都包好多地方,出名嘅陽澄湖、太湖,比較少聽嘅圄城湖,公關話佢哋嘅大閘蟹無話指定邊度嚟,總之睇貨源靚唔靚。先試大閘蟹公,一上枱個個食家嘩嘩聲,一大長碟放咗16隻大閘蟹公,約5兩重一隻,場面何其壯觀。蟹公以食蟹肉為主,膏較少,隻隻上枱時熱辣辣,又較剪、又蟹簽,若非有高人教路點拆,真係有排搞,但查實都用咗唔少時間先幹掉一隻蟹公。5兩重確實都已經幾多蟹肉,仲要一次食兩隻,肉質結實鮮甜,用蟹匙點啲醋伴食就更正。
跟住再上嘅係蟹乸,約3兩重一隻,所以同先前嘅蟹公一比,除蟹殼細啲外,最明顯係對蟹鉗嘅大細,差一截。蟹乸則以食膏為主,肉為次,所以當一眾食家掰開蟹蓋同蟹身時,又再一次嘩嘩聲,蟹膏多到爆,色澤金黃,豐腴甘香。拆3隻蟹,都用咗近成個鐘,不過如此見識都係值得。
廿年花彫皇.潽洱薑茶
食蟹期間,酒家預備咗廿年陳嘅花彫皇俾大家驅驅寒,因為大閘蟹都係比較寒涼嘅嘢食,小弟唔好酒,都飲少少當見識。反而窩心嘅係,佢哋仲安排咗潽洱薑茶俾唔飲得酒嘅人,茶香薑味濃,飲咗真係幾暖胃!
杏汁玉帶羹
再嚟係個湯羹,係一個好有心思嘅湯羹,生磨杏汁,配蛋白撞花為玉,加上帶子片,集杏香、蛋白滑溜、帶子鮮味於一身。作為之前飽拆大閘蟹,同之後多款油泡、焗釀菜式嘅間場,晌鋪排上睇出花過心思。況且,杏汁有潤肺功效,秋天時節飲飲就最好不過!
蟹粉泡溜大蝦球
泡,新鮮大蝦仁先以油泡;溜,再以蟹粉上獻。泡油之後嘅大蝦球水份迅速鎖住,有肉汁又彈牙,大隻又有睇頭。配以翠肉瓜同炒,令色彩無咁單一,再加上以蟹粉為主嘅獻汁,味道層次更豐富,鮮蝦味以外,多朕蟹肉蟹膏鮮香,咁嘅製作點會唔好食丫?
焗釀蟹粉蓋
全晚小弟最欣賞,亦係最鍾意嘅菜式。將蟹肉、蟹粉、洋蔥粒、蘑菇粒、瘦肉粒、肥肉粒、釀入蟹蓋,再鋪上麵包糠拎去焗!賣相有趣,反晒肚嘅蟹蓋,餡料釀得飽滿,鋪上麵包糠,仲以為咩嘢炸大包添。鍾意佢嘅原因係口感、層次豐富,多款食材配搭,香、鮮、甜,又唔肥膩,就算加咗肥豬肉粒,因為只係想令餡料食起嚟無咁乾身,所以份量唔多。
竹籠飄香飯
以臘腸、蝦米多款材料,底墊荷葉放在竹籠蒸煮嘅糯米飯,由於,之前嘅多道菜式,大家都食得好飽吓,所以,都認定佢係作為最尾墊飽肚用,只係淺嚐就算!其實,個飯幾香,因為又臘味,又荷葉蒸。
果盤
最後以果盤為今餐作結,實在很圓滿。(因為試食,係免費,但酒家話若計零售價,每位計$400) |
|
|
元氣壽司 Genki Sushi |
標題 : 食盡佢都唔會傷元氣 |
地址 : 旺角彌敦道742-744號道亨銀行大廈地庫 |
地區 : 旺角 |
|
現時分數:
|
日期 : 2011-02-10 17:47:43
星期日,專燈搵埋表哥表嫂,同佢個勁鍾意食壽司嘅女嚟元氣食晏,仲講到明等我請客之餘,仲可以盡情咁食,因為用信用卡積分換咗$300元氣現金券,所以就一於食盡佢,唔驚傷元氣。不過,因為表嫂同表姪女唔食生嘢,所以佢哋兩個揀親都唔係貴嘢,就算我同表哥都食得魚生或貝類,都唔係樣樣叫貴嘢,主要都係試吓新嘢外,就揀番自己心水嘢食,最後仲要點埋幾款甜品先砌夠數。
一嚟到就安排咗個角落迴轉吧位,表姪女最鍾意揀吧位,可以自己郁手揀食乜,兼且睇住面前嘅壽司唔停咁郁。此外,佢哋仲做緊「關西祭」嘅新登場,當然又有興趣試吓啦!
表姪女同佢媽咪嘅心水壽司選擇有:玉子$9、黑糖腐皮$9、皇帝蟹柳$13、厚燒玉子$9、太卷$13、粟米軍艦$9,全部係熟料,佢哋對黑糖腐皮、皇帝蟹柳、厚燒玉子三款壽司嘅評價較高,其實不外乎係覺得好味,所以,我都有另外再點其中嘅黑糖腐皮壽司同厚燒玉子三款壽司嚟試試,確係唔錯。前者,比一般嘅腐皮壽司多咗朕黑糖香,但唔會過甜而冚咗啲腐皮嘅豆味;後者係一舊厚玉子,中間夾住一小舊飯糰,蛋變咗做主角,好食係因為蛋味夠濃,味道帶甜。
我同表哥嘅選擇就有:關西祭嘅關西箱押壽司$18(醋鯖魚、煙三文魚、穴子)、海老三味壽司$20(生海蝦、熟蝦、赤蝦黃金燒)、酒煮凡立貝壽司$16、特大凡立貝壽司$26、吉列豬扒手卷$13。係咪幾豐富呢?先講箱押壽司,眾所周知,同手握壽司截然不同,箱押壽司係以木箱壓製而成,造型長長方方,表姪女第一次見,覺得佢好得意,同表哥各人一碟,盡試晒3款,味道唔錯,醋鯖魚都算鮮、煙三文魚帶煙燻鹹味、穴子(鰻魚)略嫌唔夠肥,而押製力度OK,壽司飯唔會死死實實。海老三味壽司,一次過試到三款唔同做法嘅蝦壽司。我試咗生海蝦,表哥就試咗熟蝦同赤蝦黃金燒,大家都覺得幾好,有蝦鮮味,尤其個赤蝦黃金燒,火炙後有少少炭火嘅錯覺香。其次,特大凡立貝壽司就幾有睇頭,怪不之得賣$26一客,件凡立貝的確幾大,起雙飛後大過舊飯糰,冚過晒,重點係頗為鮮甜,色澤令身,又夠厚肉,肉質柔滑。相反,個酒煮凡立貝壽司就相形見拙,煮過後有啲縮埋一著,色澤啞黃唔係太好睇,酒味很薄係另一個問題。吉列豬扒手卷,因為係吉列,唔可以一早炸定晒先,係即叫即做,要等15min,不過奇怪在嚟到件手卷又唔係熱到辣口嗰隻,而外形唔係常見嘅倒圓錐形,而係長條形,撕開包裝就用「豬扒飯」捲住包裝紙內嘅紫菜,邊捲邊拉,表姪女好熟手幫我哋捲,佢仲捲得好開心好同成功感,因為已拌咗醬油,食落幾好味。
再加個八爪魚燒$18(關西祭推廣食物)一齊食,一客4件,啱啱好夠一人一件。啲八爪魚燒睇落好大粒,圓潤飽滿,外層金黃,灑上蔥花同木魚碎,表姪女就最鍾意睇住啲木魚碎左搖右擺,覺得好得意,不過食落好流,裡面得手指尾指甲大細嘅八爪魚粒,好細粒,其次就係一舊粉漿,做唔到外脆內滑嘅口感!
最後點咗3款甜品,三色大福$13(關西祭推廣食物)、日式芝士蛋糕$13同泡芙$13。三色大福,即係三色草餅,包括:原味、朱古力味及綠茶味,唔同味道在於糯米粉做嘅外皮,而全部都係豆沙餡。我只係試咗個朱古力味,OK嘅,因為至少豆沙餡幾香紅豆味,而且都算軟滑,外皮亦夠煙韌。日式芝士蛋糕,可能無乜人點,好似晌冰箱拎出嚟咁,好冰好硬,佢哋已經係落單10min後先拎出嚟,真係失望!泡芙都係,凍都震,完全未解凍,所以打包走,我就無試到!如果啲甜品未預備好,解唔徹凍,就應該同啲客講,唔好夾硬照出,咪盞做衰啲品質。
最後食咗$314,補番$14,如果知啲甜品咁差,就索性叫少個,$14都慳番! |
|
|
元氣壽司 Genki Sushi |
標題 : 食盡佢都唔會傷元氣 |
地址 : 旺角彌敦道742-744號道亨銀行大廈地庫 |
地區 : 旺角 |
|
現時分數:
|
日期 : 2011-02-10 17:03:40
星期日,專燈搵埋表哥表嫂,同佢個勁鍾意食壽司嘅女嚟元氣食晏,仲講到明等我請客之餘,仲可以盡情咁食,因為用信用卡積分換咗$300元氣現金券,所以就一於食盡佢,唔驚傷元氣。不過,因為表嫂同表姪女唔食生嘢,所以佢哋兩個揀親都唔係貴嘢,就算我同表哥都食得魚生或貝類,都唔係樣樣叫貴嘢,主要都係試吓新嘢外,就揀番自己心水嘢食,最後仲要點埋幾款甜品先砌夠數。
一嚟到就安排咗個角落迴轉吧位,表姪女最鍾意揀吧位,可以自己郁手揀食乜,兼且睇住面前嘅壽司唔停咁郁。此外,佢哋仲做緊「關西祭」嘅新登場,當然又有興趣試吓啦!
表姪女同佢媽咪嘅心水壽司選擇有:玉子$9、黑糖腐皮$9、皇帝蟹柳$13、厚燒玉子$9、太卷$13、粟米軍艦$9,全部係熟料,佢哋對黑糖腐皮、皇帝蟹柳、厚燒玉子三款壽司嘅評價較高,其實不外乎係覺得好味,所以,我都有另外再點其中嘅黑糖腐皮壽司同厚燒玉子三款壽司嚟試試,確係唔錯。前者,比一般嘅腐皮壽司多咗朕黑糖香,但唔會過甜而冚咗啲腐皮嘅豆味;後者係一舊厚玉子,中間夾住一小舊飯糰,蛋變咗做主角,好食係因為蛋味夠濃,味道帶甜。
我同表哥嘅選擇就有:關西祭嘅關西箱押壽司$18(醋鯖魚、煙三文魚、穴子)、海老三味壽司$20(生海蝦、熟蝦、赤蝦黃金燒)、酒煮凡立貝壽司$16、特大凡立貝壽司$26、吉列豬扒手卷$13。係咪幾豐富呢?先講箱押壽司,眾所周知,同手握壽司截然不同,箱押壽司係以木箱壓製而成,造型長長方方,表姪女第一次見,覺得佢好得意,同表哥各人一碟,盡試晒3款,味道唔錯,醋鯖魚都算鮮、煙三文魚帶煙燻鹹味、穴子(鰻魚)略嫌唔夠肥,而押製力度OK,壽司飯唔會死死實實。海老三味壽司,一次過試到三款唔同做法嘅蝦壽司。我試咗生海蝦,表哥就試咗熟蝦同赤蝦黃金燒,大家都覺得幾好,有蝦鮮味,尤其個赤蝦黃金燒,火炙後有少少炭火嘅錯覺香。其次,特大凡立貝壽司就幾有睇頭,怪不之得賣$26一客,件凡立貝的確幾大,起雙飛後大過舊飯糰,冚過晒,重點係頗為鮮甜,色澤令身,又夠厚肉,肉質柔滑。相反,個酒煮凡立貝壽司就相形見拙,煮過後有啲縮埋一著,色澤啞黃唔係太好睇,酒味很薄係另一個問題。吉列豬扒手卷,因為係吉列,唔可以一早炸定晒先,係即叫即做,要等15min,不過奇怪在嚟到件手卷又唔係熱到辣口嗰隻,而外形唔係常見嘅倒圓錐形,而係長條形,撕開包裝就用「豬扒飯」捲住包裝紙內嘅紫菜,邊捲邊拉,表姪女好熟手幫我哋捲,佢仲捲得好開心好同成功感,因為已拌咗醬油,食落幾好味。
再加個八爪魚燒$18(關西祭推廣食物)一齊食,一客4件,啱啱好夠一人一件。啲八爪魚燒睇落好大粒,圓潤飽滿,外層金黃,灑上蔥花同木魚碎,表姪女就最鍾意睇住啲木魚碎左搖右擺,覺得好得意,不過食落好流,裡面得手指尾指甲大細嘅八爪魚粒,好細粒,其次就係一舊粉漿,做唔到外脆內滑嘅口感!
最後點咗3款甜品,三色大福$13(關西祭推廣食物)、日式芝士蛋糕$13同泡芙$13。三色大福,即係三色草餅,包括:原味、朱古力味及綠茶味,唔同味道在於糯米粉做嘅外皮,而全部都係豆沙餡。我只係試咗個朱古力味,OK嘅,因為至少豆沙餡幾香紅豆味,而且都算軟滑,外皮亦夠煙韌。日式芝士蛋糕,可能無乜人點,好似晌冰箱拎出嚟咁,好冰好硬,佢哋已經係落單10min後先拎出嚟,真係失望!泡芙都係,凍都震,完全未解凍,所以打包走,我就無試到!如果啲甜品未預備好,解唔徹凍,就應該同啲客講,唔好夾硬照出,咪盞做衰啲品質。
最後食咗$314,補番$14,如果知啲甜品咁差,就索性叫少個,$14都慳番! |
|
|
假日美食店 Delicatessen Corner |
標題 : 豪邁不羈中見細緻 |
地址 : 尖沙咀彌敦道50號金域假日酒店低層1樓 |
地區 : 尖沙咀 |
|
現時分數:
|
日期 : 2011-02-08 18:15:50
聞名已久,終可一試,本來係補祝太太生日嘅,臨時拉多一對夫婦朋友,高慶啲之餘,咁就可試多啲嘢。雖然佢係間德國餐廳,但除咗一系列凍櫃賣德國腸、德國食品,以及一啲蛋糕之外,唯一令人覺得佢係間德國餐廳就係中間嘅巨型啤酒桶,唔係裝飾,真係用嚟斟啤酒,此外,環境格局同一般西餐廳唔係太大分別,深色木凳木枱,未算太有歐洲氣息。今晚係星期五晚,坐滿人,都幾逼夾架。雖然,環境唔覺係酒店嘅星級,但佢哋嘅服務絕對係酒店級質素,除咗斟茶遞水基本招呼禮貌做足之外,點菜時對餐牌唔明,有問必答,唔會盲摸摸話唔識,最難忘係上菜時一次過,餐湯一次過上晒,主菜亦係一次過一齊上晒,唔會逐個逐個嚟,而且,飲完湯上主菜,間隔個時間都OK,唔會湯未飲完就嚟主菜,亦無話飲完湯遲遲未見主菜到,依啲細心位都值得加分!
晚餐包餐湯、主菜、自選蛋糕或沙律、餐飲,價錢$188 / $228(視乎揀咩主菜)。因為晚餐得兩款主菜揀,所以我哋除了叫咗兩個晚餐,試齊兩款主菜,另外加多兩個餐湯同兩個主菜,晚餐嘅蛋糕就一齊分享,好彩朋友以前都嚟過食,一早教路預留蛋糕先,雖然佢個餅櫃都有成十多款,但係每款得嗰幾件,唔預留就可能食唔到心水嘅蛋糕!另外,晌報紙剪咗75折優惠券,埋單$700多少少,食得好飽好滿足,事後仲覺得除兩個晚餐外,額外叫多一個主菜就夠晒添!
麵包籃
點好餐後,侍應手拿一大方籃麵包走過嚟,無細望,印象中應該有5款,全係歐陸麵包,其實心裡就想試晒,不過如果係咁就食包飽,唔使再食其他嘢喇,之但係我都揀咗其中3款:核桃、芝麻幼麥同罌粟籽,三款質感都好唔同,核桃最粗嚡,但麥味較香;芝麻幼麥質感就細緻啲,麵包皮就煙韌啲;而罌粟籽包身柔軟,其實啲罌粟籽本身無乜味,只係令個包有趣啲同有脆啲!
餐湯
晚餐餐湯係指定嘅Minestrone,即係意大利雜菜湯,材料幾豐富,有甘筍、洋蔥 、西芹…等,色澤深紅,味道濃郁,絕對真材實料。
散叫嘅有馬鈴薯湯伴德式麵包粒 $58,屬忌廉湯一種,湯裡放有麵包粒,而湯打得好幼滑,最重要係勁重薯仔味,湯不可貌相,的確唔錯。
仲有一個散叫湯,白菌忌廉湯 $58,個名超普通,但唔好攞茶餐廳嘅白湯嚟同佢比,蚊脾牛脾無得比,除咗見到成個湯都係碎粒粒嘅磨菇外,個湯嘅磨菇味一樣咁濃,咁先叫得上白菌湯。茶餐廳嗰啲係雞湯加「麵撈」,再放幾片磨菇,係白菌 + 忌廉湯啫!
主菜方面,晚餐可揀嘅有扒芝士腸配薯蓉及酸椰菜 $188同香煎三文魚柳配橄欖油醋汁伴扁意粉及炒什菜 $228,另外再散叫咗嘅有德國鹹豬手伴酸椰菜薯仔 $168同巴伐利亞式煮牛仔腸 $138。
扒芝士腸配薯蓉及酸椰菜
芝士腸共兩條,每條約五至六吋長,墊有酸椰菜,伴一大份薯蓉,德國豪邁不羈型格,唔會話將啲薯蓉唧靚啲上碟,就咁一Pat就係一Pat。芝士腸煎得香脆,切開確有幾多芝士流出嚟,可以伴芥末食;薯蓉我哋分開四份後,每份都依然唔少,唔係得一啖半啖咁,薯蓉做得幾滑,帶少少牛油香味。
香煎三文魚柳配橄欖油醋汁伴扁意粉及炒什菜
三文魚約比一隻手掌大啲,做法簡單,煎香後伴上橄欖同油醋汁,而扁意粉以橄欖油同香草輕炒過,再加啲炒甘筍、翠玉瓜同邊豆。三文魚都算油潤甘香,扁意粉亦煮得啱啱好,屬不錯之作!
德國鹹豬手伴酸椰菜薯仔
鹹豬手可以揀燒或者烚,圓形鐵板上,墊咗好多酸椰菜晌底,加多一個烚薯仔,一開四,賣相絕對係粗疏。燒嘅都試過好幾次,所以今次改食烚嘅,食其原味。感覺唔算太鹹,幾適中,外皮雖然無咗卜卜脆嘅感覺,但咬落啜啜哋口又幾有趣,而且又無想像中咁肥,伴住酸椰菜嚟食,感覺仲好;肉質方面,亦已經煮腍晒,鬆軟有肉味。
巴伐利亞式煮牛仔腸
同樣以圓形鐵板上枱,兩條大牛仔腸,加一個手掌大細嘅鹹麵包圈,伴以蜜糖芥末汁,賣相同樣「求其」,貫徹德國嘢食嘅風格,但味道唔錯。據朋友講係德國最南部嘅做法,以牛仔肉造成,脂肪較少,無一般豬肉腸咁油膩,而肉香帶鹹,鹹中又帶有香草味,配住啲蜜糖芥茉汁同食,非常滋味。如果對依個牛仔腸有興趣,不妨晌凍櫃買一包走,都係兩條裝一包,好似四、五十左右,比起堂食平成半有多啦!至於個麵包圈,德國傳統送啤酒食品,以麥粉炮製,咬起嚟十分韌凈,帶鹹,有趣但唔覺好食!
以上幾款主菜,都係用咗薯蓉、烚薯仔、鹹麵包圈做伴菜,都係飽肚嘢,加上之前麵包籃嘅自由選擇,所以,真係三個主菜都夠我哋四個人食丫。
甜品
我哋無要雜果沙律,兩個晚餐都係揀自選蛋糕,分別要咗松露朱古力蛋糕同蘋果卷伴雲喱拿醬。
松露朱古力蛋糕,高質素,因為無論朱古力蛋糕層,抑或松露朱古力餡層,都夠香濃,又唔算太甜膩,而且,松露朱古力餡層亦做得柔軟可口。
蘋果卷,用酥皮捲住蘋果肉、提子乾,再以玉桂調味,焗好後凍食。蘋果好甜,而且果肉切得比較幼細,朕朕玉桂香,配襯埋杯新鮮即磨咖啡,嘆住食件個甜品,確係幾正。可惜,個雲喱拿醬雖然用原條雲喱拿做,但個醬「杰」到好似煉奶咁喎。
幾個人傾吓傾吓都成10點,講吓工作,講吓樓市,開開心心咁就渡過咗幾個鐘喇!
|
|
|
東海堂 Arome Bakery |
標題 : Madam請飲餅 |
地址 : 中環德輔道中21-23號歐陸貿易中心地下Z2號舖 |
地區 : 中環 |
|
現時分數:
|
日期 : 2011-02-08 17:43:01
老細落咗嚟寫字樓走個圈,失驚無神擺低幾十蚊,話請同事食西餅喎,同事T揸fit,梗係唔會買幾蚊件嗰啲啦,所以,走咗去東海堂買,因為話平時人哋結婚收嘅餅卡,唔係美心就聖安娜,好少有東海堂,所以就趁機試吓囉!
買咗三款返嚟:士多啤梨、咖啡、芒果,幾款都係蛋糕加慕絲做成。講外型,士多啤梨做得精緻啲,一層蛋糕一層士多啤梨慕絲,再另外一層蛋糕一層慕絲疊上去,面層又燒咗朕網紋,仲加咗半粒士多啤梨做裝飾,味道就中規中矩啦;我反而鍾意件咖啡,朱古力蛋糕加上咖啡慕絲,而慕絲內又有啲咖啡果凍,鍾意佢主要因為咖啡慕絲幾夠咖啡香味,同埋夠滑身;至於個芒果就失色咗啲,其實芒果做嘅甜品一向都係大熱,海綿蛋糕底,中層係芒果慕絲,上層係芒果粒加芒果醬,應該會係幾好食,點解會話依個芒果慕絲蛋糕失色,可能魚膠重手咗,芒果慕絲有啲「緊」,唔夠柔滑,綜觀其他兩款慕絲餡都唔係咁,相信都係個別事件! |
|
|
Haagen-Dazs |
標題 : 將冰山劈開 |
地址 : 沙田新城市廣場一期2樓201-202 |
地區 : 沙田 |
|
現時分數:
|
日期 : 2011-02-05 18:20:08
我都幾鍾意食雪糕,夏天就唔在講啦,冬天有時都會食。唔會刻意要食咩品牌,家常嘅就多數買Dreyer's家庭裝(887ml),因為除咗有幾款口味好啱食之外,質感都幾幼滑,奶味唔太重,有時加鮮奶自家打制奶昔,盛夏妙飲,其次貪佢嘅價錢比較實惠啲!至於另一坊間大品牌,Haagen Dazs,甚少幫襯,雖然口味甚多,但又唔係話食落好味都不得了嗰種感覺,只係乘著偶有優惠先會去食!
而雪糕蛋糕就更加絕無幫襯,因為以前有朋友生日,佢哋以雪糕蛋糕嚟慶祝,已經試過好幾次,效果唔及就咁買一球球嘅散裝好食,原因係個蛋糕雪得死實,亦都係有此必要雪住佢,雖然教咗你預早幾小時拎出哩攤,但一個1lb裝嘅雪糕蛋糕其實都幾厚身,面面位解凍OK,其實中心位仲有啲硬,如果中心位解凍OK,就輪到面面位溶溶哋,食唔出成舊雪糕嘅幼滑!
今次都係親友生日,買咗個HD雪糕蛋糕慶祝慶祝,雖然未係情人節,但因為生日主角係夫婦,所以送上一個水果系列嘅「心花怒放」,即係心形嘅士多啤梨雪糕蛋糕,1lb裝$278,內餡自然係士多啤梨雪糕,再鋪一層士多啤梨糖漿,加上「冰鮮」士多啤梨點綴,外型賣相非常討好!而雪糕內都仲有士多啤梨果肉,不過唔多。一如以往經驗,雪糕硬到斬崩刀,大隻舅父切完都叫手軟;硬度十足嘅雪糕,唔係食,係咬;士多啤梨咬落似食緊冰粒,點甜都被個冰感撼低晒,所以我唔太覺得食雪糕蛋糕是一種享受,只係一種追逐名牌感同貴氣感!有得揀,我就寧願用$278買7-8盒Dreyer's家庭裝心水口味返屋企勁嘆,自製七星連珠或八星報喜仲好,爽呀! |
|
|
Caffe Habitu |
標題 : 爆場只因團購到期 |
地址 : 尖沙咀彌敦道100號The ONE6樓608號舖 |
地區 : 尖沙咀 |
|
現時分數:
|
日期 : 2011-02-04 10:35:42
嚟caffe嘅人多數都係飲吓咖啡,同朋友hea吓傾吓偈,有時就食啲三文治當午餐,或者揀件心水蛋糕tea一tea,一般哩講caffe晌閒日都好少爆場,尤其夜晚添!不過,今晚例外,7:30pm開始,人流不絕,仲要排長龍等買嘢,8:00pm未夠,內外位置都差唔多座無虛席,唔好以為間嘢有咩大平賣或者做緊超著數優惠,原因係大家都係揸住團購張單嚟,今日係最後限期,所以唔可以蝕底點都要嚟!以$69就可以有$140嘅價值,感覺幾抵,雖然睇翻佢哋嘅飲品同食物嘅價錢,$140其實唔算買到好多嘢食,但計計數都可以俾你點到唔少嘢!
佢有個全日套餐(All Day Set Menu),包括意粉(6款,每款單叫$68)、薄餅(6款,每款單叫$82)、意式燴飯(3款,每款單叫$78)、三文治(7款,每款單叫$38),可單叫,亦可加錢轉套餐,仲可以再加錢額外加配小食、杯裝甜品或精緻蛋糕。
同太太商量過後,最後點選出我哋嘅晚餐:
濃香煙肉忌廉意粉$68,佢寫住全城最佳(Best in Town),膽粗粗一試,配8安士小杯咖啡及12安士餐湯,全套就$98,即係加$30多個咖啡同餐湯(如果凈加小杯咖啡就$86,凈加餐湯就$88)。餐湯無得揀,是晚係甘筍薑忌廉湯;而咖啡就晌3款經典咖啡系列中揀1,叫話經典咖啡系列,即係最普通常見嗰啲,我要咗Mocha朱古力咖啡。先講個意粉,個意粉做得幾好,第一個好係煮得咬口煙韌;第二個好係醬汁唔會好水,瀉晒晌碟底,稀杰度適中,全掛晒晌意粉度;第三個好係煙肉唔係太肥,肉比肥膏約4:1,有啲質差嘅真係膏多過肉,嗰啲邊算係煙肉呀,煙肥膏啦,用哩炸豬油就啱啲!至於個甘筍薑忌廉湯好一般,第一個一般係甘筍味好薄,個色就幾似模似樣,但就甘筍味唔濃,反而薑味突出啲;第二個一般係質感唔滑,較粗嚡。輪到杯Mocha朱古力咖啡,香滑,朱古力味夠濃夠出,可惜係小杯裝囉,唔夠喉!
煙三文魚雞蛋牛角三文治 $38,聽朋友講佢啲包做得幾好,加上餐牌上另一個全城最佳,就係佢喇,所以就揀咗佢!(配小杯咖啡就$58,凈加餐湯就$60,若加咖啡及餐湯全套就$76。不過有啲唔明佢點定價,上面個意粉配咖啡及餐湯就加多$30,但個三文治配咖啡及餐湯卻係要加多$38,薄餅同意式燴飯要加嘅錢都係唔同?)牛角包做到圓形,方便做成三文治,而且幾大個,餡料蛋沙律好多,多到瀉出嚟,煙三文魚就約三兩片左右,味道幾好,中間又夾雜咗少少蕃茄粒,另外墊咗啲生菜,令人覺得更輕怡;因為用上牛角包,食落多份牛油香及鬆脆感,不過如果個包身有啲暖口感可能仲正。
曲奇妙趣芝士蛋糕 $35,佢有一系列精緻蛋糕,原本個價就$35件,依家食嘢可以另加$20配選一件,都好多選擇,最終揀咗曲奇妙趣芝士,可以晌點餐時預留,等臨尾先出去拎就唔怕被人要咗!曲奇妙趣芝士,其實係Oreo代替麥維他做餅底,而忌廉芝士再加上Oreo餅碎做餡,芝士味道十足,又嗒到微微朱古力味,唔係話好驚喜嘅甜品,但絕對係用料十足。
今餐實價就$156,所以補番$16就搞掂。之前晌團購網係咁樣介紹caffe HABITU:「追求生活品味的意式咖啡店,抱著意大利人對生活及飲食的那份熱情,提供高水準的餐飲選擇及周全貼心的服務,讓顧客充分感受到獨特的意式情懷。」,前部份都幾認同,一室黑白格仔地板、實木傢俬、柔和嘅燈光色調,洋溢著簡約獨特嘅歐陸風味,而食物質素都感受得出用料不賴、精心炮製。不過周全貼心嘅服務一環,真係晌今晚有啲失色,可能一下子好多團購客焗趕今晚先嚟幫襯,最慘係個個都座底揸住$140以上嚟食,絕少只係嚟齋飲咖啡,佢哋人手根本應付唔到,我算好啲,7:00pm去到人未係咁多,都係得兩個客排我前面點緊嘢,但係,由開始拎咗杯咖啡,等咗十幾分鐘先有個湯,又要等廿分鐘先再嚟個意粉,跟住問完又問,結果係再等廿分鐘先到個包,晌個包未到之前,我哋都唔等住拎咗件蛋糕食住先。所以,依餐飯雖然都只係食個意粉、三文治,飲吓例湯,嘆杯咖啡,就7:00pm食到8:30pm。除咗佢本身人手唔夠之外,另一個出菜問題係儲單囉,同一款菜一出出幾碟,可能少人點三文治,所以就拖到有幾張單先做,如果唔係嘅話,點會一個煙三文魚雞蛋牛角三文治,只係10min左右整得掂嘅包要等成大半個鐘丫,除非你話我知個牛角包係落單後即做即焗啦! |
|
|
和味館 Yum Asian Restaurant |
標題 : 鑊嘢館 |
地址 : 尖沙咀金馬倫道2-4A號利達行4樓 |
地區 : 尖沙咀 |
|
現時分數:
|
日期 : 2010-12-31 11:54:15
前身係「花滿樓京川滬菜」,都幫襯過,嗰次嘅經驗都幾好,食評俾咗個笑臉佢,除咗尖沙咀,佢仲晌中環擺花街同旺角兆萬中心有分店,但都先後執晒笠,估唔到跟住都係晌同鋪位開番3間「和味館」,如果都係同一個老細,同一批人做番,今次晌和味館嘅經驗真係令小弟好失望,評分大插水囉!
本來一大班親戚約食飯做冬,咁啱其中一家出門去旅行,所以延期改食飯慶祝聖誕,揀咗26/12晚,早一個星期前訂枱28人,都擔心坐位安排,好在佢哋有圓枱,不過晌露台,咁啱聖誕幾日都幾凍,我哋又有幾個細路,擔心外面位置比較凍,所以都早少少去睇睇個場,因為有簷縫,又拉咗透明膠幕,大家都覺得OK,唯一唔得係燈光,好聽啲叫有情調,實際一句就好陰暗,我哋分咗3張圓枱,最入嗰張晌尾尾死位,真係有啲黑,要改善吓!
講到食,就係因為佢多選擇先揀佢,本來日式放題親戚都唔好(主要係唔好生嘢),但仲有埋泰式、越式同中式,抵過晌酒店食Buffet先諗得過,6:30pm前大人收$168,但有八折,另收加一(6:30pm後大人收$188,睇人數多少另有折),小童就全晚$98。去到仲見有埋火鍋,不過唔食都得,啲料好「雞」,我估相信因為天氣凍先至「同場加映」,選擇少,質素麻麻。至於其他嘅,我就覺得日式唔得,尤其魚生同天婦羅,前者好似未解凍好咁,啲八爪魚同北寄貝都好韌;後者就差唔多同凈係食舊粉無分別。而中泰越都係有好有唔好啦,整體只係一般;而飲品相信汽水同鹹檸七最飲得過,其他都唔OK,椰汁紅豆冰,無味豆有啲硬;荔枝蜂蜜特飲,唔好以為有荔枝肉,應該係用荔枝蜜溝石榴糖水,怪味;甜品比起一般日式放題多選擇,好似有芝士餅、芒果布甸、木糠布甸等,質素唔差喎,算係咁啦!如果要講好食,都唔係無,好似鰻魚炒飯,真係幾得,仲有雞絲粉皮、串燒雞翼、串燒冬菇、燒金菇牛肉卷、越南蔗蝦、芝麻海鮮條、泰式蝦餅。
成晚最鑊嘢係啲服務,勉強幫佢搵個原因,都係懶客多,爆晒場,我哋走時外面仲有好多人等位,不過,唔係借口囉,根本無論樓面、廚房都唔夠人手,行政、流程樣樣都咁亂。如果唔計依一環,我都俾個OK佢,但計埋服務,好老實講句,真係3個喊都俾得落手。唔係直覺,係成晚咁多事例嘅經歷:
1. 一開始點嘅壽司,可以係全晚最尾先嚟,初頭仲以為係漏單添,估佢係啲新單一路疊上去,舊單就積係底,無處理。奇又奇在依個情況只係發生晌壽司度,其他食物又無喎!咁漏單都預咗,情況一般,不過上嘢好慢,有時點咗嘅嘢等好耐都未有。催咗都係咁!
2. 最後嘅半個鐘前,要last order,我哋嘅最後一擊係叫甜品,結果7:30pm落單,8:00pm都只係嚟兩碗紫米露,同個侍應講話要我哋交枱,但大部份甜品又無嚟過,咁佢先一口氣執十款八款嚟,但場面真係好亂!所以連一張甜品相都無影!
3. 因為有小朋友生日,預留咗兩個蛋糕,電話講過要芒果同士多啤梨,嚟到又同個疑似副經理嘅女士再講,結果送嚟嘅係芒果同黑森林。同樣7:30pm叫佢拎得出嚟,7:45pm見未到,問番之前叫佢可以上蛋糕嘅侍應,佢既然反問番我個蛋糕仲未嚟呀,明顯又係將件事交咗俾另一個同事。
4. 佢哋唔會有一兩個侍應專責番露台位嘅食客,所以,有漏有錯,根本無人理,同送菜嘅侍應講,佢都係有啲敷衍問你漏咩,但未聽完就走咗去。
5. 餐飯搞到8:15pm,叫埋單,仲亂,個女侍應一走過嚟就話張單四千幾蚊,一睇就計晒我哋28個大人。我話我哋依度得27個人,仲有幾個係細路,佢就話我哋訂位時講28個人,大姐,真係無嘢丫嘛,食放題又好,食buffet又好,都會同個客晌中段時間對一對人數架啦。唔通我訂位時講24個人,依家你會收我24個人嘅錢咩?一輪擾攘,佢要數人,OK,我叫番晒我啲親戚坐定定俾你數,當中幾個細路,仲要捉出門口度尺,睇吓收大人定細路價。跟住係個男侍應拎張單嚟,係就係收27個人錢,但都係計晒大人,唉,係唔係咁都搏我大霧呀?又要同佢講番個情況一輪!最後,輪到個著西裝嘅經理嚟,仲搞笑,係計咗兩個細路,但又計番28個人,真係吹啤啤,不過依個經理可能話得事,而且佢又唔清楚之前發生咩事,佢凈係問我一句,幾多十人幾多細路,就即係入去改過張單。之前都唔知係個收銀定侍應玩嘢?你埋單埋到咁亂,搞咗15min,咪又係要外面嘅客係度等!
仲有其他激氣嘢,不過以上5件已經夠晒頂癮,亦係自己飲飲食食以哩以服務計最經典喇! |
|
|
和味館 Yum Asian Restaurant |
標題 : 鑊嘢館 |
地址 : 尖沙咀金馬倫道2-4A號利達行4樓 |
地區 : 尖沙咀 |
|
現時分數:
|
日期 : 2010-12-31 11:49:48
前身係「花滿樓京川滬菜」,都幫襯過,嗰次嘅經驗都幾好,食評俾咗個笑臉佢,除咗尖沙咀,佢仲晌中環擺花街同旺角兆萬中心有分店,但都先後執晒笠,估唔到跟住都係晌同鋪位開番3間「和味館」,如果都係同一個老細,同一批人做番,今次晌和味館嘅經驗真係令小弟好失望,評分大插水囉!
本來一大班親戚約食飯做冬,咁啱其中一家出門去旅行,所以延期改食飯慶祝聖誕,揀咗26/12晚,早一個星期前訂枱28人,都擔心坐位安排,好在佢哋有圓枱,不過晌露台,咁啱聖誕幾日都幾凍,我哋又有幾個細路,擔心外面位置比較凍,所以都早少少去睇睇個場,因為有簷縫,又拉咗透明膠幕,大家都覺得OK,唯一唔得係燈光,好聽啲叫有情調,實際一句就好陰暗,我哋分咗3張圓枱,最入嗰張晌尾尾死位,真係有啲黑,要改善吓!
講到食,就係因為佢多選擇先揀佢,本來日式放題親戚都唔好(主要係唔好生嘢),但仲有埋泰式、越式同中式,抵過晌酒店食Buffet先諗得過,6:30pm前大人收$168,但有八折,另收加一(6:30pm後大人收$188,睇人數多少另有折),小童就全晚$98。去到仲見有埋火鍋,不過唔食都得,啲料好「雞」,我估相信因為天氣凍先至「同場加映」,選擇少,質素麻麻。至於其他嘅,我就覺得日式唔得,尤其魚生同天婦羅,前者好似未解凍好咁,啲八爪魚同北寄貝都好韌;後者就差唔多同凈係食舊粉無分別。而中泰越都係有好有唔好啦,整體只係一般;而飲品相信汽水同鹹檸七最飲得過,其他都唔OK,椰汁紅豆冰,無味豆有啲硬;荔枝蜂蜜特飲,唔好以為有荔枝肉,應該係用荔枝蜜溝石榴糖水,怪味;甜品比起一般日式放題多選擇,好似有芝士餅、芒果布甸、木糠布甸等,質素唔差喎,算係咁啦!如果要講好食,都唔係無,好似鰻魚炒飯,真係幾得,仲有雞絲粉皮、串燒雞翼、串燒冬菇、燒金菇牛肉卷、越南蔗蝦、芝麻海鮮條、泰式蝦餅。
成晚最鑊嘢係啲服務,勉強幫佢搵個原因,都係懶客多,爆晒場,我哋走時外面仲有好多人等位,不過,唔係借口囉,根本無論樓面、廚房都唔夠人手,行政、流程樣樣都咁亂。如果唔計依一環,我都俾個OK佢,但計埋服務,好老實講句,真係3個喊都俾得落手。唔係直覺,係成晚咁多事例嘅經歷:
1. 一開始點嘅壽司,可以係全晚最尾先嚟,初頭仲以為係漏單添,估佢係啲新單一路疊上去,舊單就積係底,無處理。奇又奇在依個情況只係發生晌壽司度,其他食物又無喎!咁漏單都預咗,情況一般,不過上嘢好慢,有時點咗嘅嘢等好耐都未有。催咗都係咁!
2. 最後嘅半個鐘前,要last order,我哋嘅最後一擊係叫甜品,結果7:30pm落單,8:00pm都只係嚟兩碗紫米露,同個侍應講話要我哋交枱,但大部份甜品又無嚟過,咁佢先一口氣執十款八款嚟,但場面真係好亂!所以連一張甜品相都無影!
3. 因為有小朋友生日,預留咗兩個蛋糕,電話講過要芒果同士多啤梨,嚟到又同個疑似副經理嘅女士再講,結果送嚟嘅係芒果同黑森林。同樣7:30pm叫佢拎得出嚟,7:45pm見未到,問番之前叫佢可以上蛋糕嘅侍應,佢既然反問番我個蛋糕仲未嚟呀,明顯又係將件事交咗俾另一個同事。
4. 佢哋唔會有一兩個侍應專責番露台位嘅食客,所以,有漏有錯,根本無人理,同送菜嘅侍應講,佢都係有啲敷衍問你漏咩,但未聽完就走咗去。
5. 餐飯搞到8:15pm,叫埋單,仲亂,個女侍應一走過嚟就話張單四千幾蚊,一睇就計晒我哋28個大人。我話我哋依度得27個人,仲有幾個係細路,佢就話我哋訂位時講28個人,大姐,真係無嘢丫嘛,食放題又好,食buffet又好,都會同個客晌中段時間對一對人數架啦。唔通我訂位時講24個人,依家你會收我24個人嘅錢咩?一輪擾攘,佢要數人,OK,我叫番晒我啲親戚坐定定俾你數,當中幾個細路,仲要捉出門口度尺,睇吓收大人定細路價。跟住係個男侍應拎張單嚟,係就係收27個人錢,但都係計晒大人,唉,係唔係咁都搏我大霧呀?又要同佢講番個情況一輪!最後,輪到個著西裝嘅經理嚟,仲搞笑,係計咗兩個細路,但又計番28個人,真係吹啤啤,不過依個經理可能話得事,而且佢又唔清楚之前發生咩事,佢凈係問我一句,幾多十人幾多細路,就即係入去改過張單。之前都唔知係個收銀定侍應玩嘢?你埋單埋到咁亂,搞咗15min,咪又係要外面嘅客係度等!
仲有其他激氣嘢,不過以上5件已經夠晒頂癮,亦係自己飲飲食食以哩以服務計最經典喇! |
|
|
鳴門魚市場居酒屋 Naruto Uo Ichiba Izakaya |
標題 : 份量偏細 |
地址 : 荃灣楊屋道1號荃新天地一期UG37號舖 |
地區 : 荃灣 |
|
現時分數:
|
日期 : 2010-12-09 18:04:54
因為有一張烏冬贈券,話價值$58,所以咁短期內再嚟幫襯鳴門一次,諗住唔好嘥張贈券丫嘛!荃新天地俾我嘅感覺係旺星期六、日,平日嚟都幾靜吓,由於依次志在用咗張贈券,所以只係平平哋食個晏,定食一般四、五十就有交易,貴啲嘅就七、八十,由於都有個免費烏冬,而太太又鍾意食燒銀雪魚,所以揀咗個貴嘅「汁燒銀雪魚定食」$78,再加埋個「溫泉玉子冷稻庭烏冬」$58,諗住都夠,點知……係唔太夠!
汁燒銀雪魚定食
個定食好快就到,包埋味噌湯、沙律、白飯同餐飲。味噌湯麵豉味頗濃,算係有個好開始;而沙律只係普通貨色,沙律菜、蕃茄粒配啲日本油醋;白飯,日本珍珠米,飯粒軟熟而帶少少粘糯,有米飯香,幾對胃口。講到主菜汁燒銀雪魚,睇賣相燒得甘香幾靚,食落魚油十足,肉質細嫩,但舊魚嘅尺碼真係有啲細,得一件,夾幾啖就食晒,送飯勉強夠。
溫泉玉子冷稻庭烏冬
個烏冬唔知點解等咗好耐,同老婆一齊食住個銀雪魚邊食邊等,有少少尷尬,因為差唔多個定食都食完,個烏冬都未到,搞到好似兩個人慳到要叫一個餐兩份食!結果,都係食完晒個定食,個烏冬先到,唉,估唔到仲要係咁細碗添,出乎意料之外,又係得幾啖咮咮聲食鬼完嘅份量,唔知佢正常嘅份量都係咁丫?定因為我哋係免費贈食先咁細?話雖如此,個烏冬確實幾有水準,表面滑溜非常,咬落帶啲煙韌有咬口,食到咮咮聲,配上冷麵汁,味道恰好無過鹹,而溫泉蛋都好得,蛋黃盪吓盪吓半生熟咁,篤穿蛋汁湧流,蛋味又濃。不過,若以$58個價心理總覺有啲貴,烏冬加蛋咋喎,如果識欣賞,你又會覺得值!食嘢就係咁,貴唔貴,同值唔值,係兩件事。
題外話,定食嘅餐飲熱柚子蜜,漏單,追完再追先有,所以,服務方面同出菜嘅時間有需要改善吓。本應依餐加埋一要$150,但個烏冬唔使錢,連加一都無收,只計個定食,實收$86!
|
|
|
華記食店
|
標題 : 原煲煲仔飯外賣 |
地址 : 中環士他花利街10號地下 |
地區 : 中環 |
|
現時分數:
|
日期 : 2010-11-22 10:03:31
有時我哋會叫外賣返公司食,始終中環食晏時段,好似蟻「嬲」蜜糖成街都好多人,所以,叫外賣一來唔使行出行入又要同人逼,慳番啲時間;二來比外面食平啲,就算快餐店都要三十蚊落樓,茶餐廳唔得添啦。我哋會試吓唔同外賣店,不過,若果係星期四或五,我哋首選會幫襯華記,無他嘅,一個貪字囉,逢星期四、五,佢哋嘅外賣會送糖水,每個星期嘅外賣紙都會寫住送乜嘢,有時腐竹蛋、有時喳喳,今次係蕃薯糖水!
華記除一般炒粉飯麵,湯粉麵外,另一抵食強項係3餸飯,每星期更新一次外賣紙,而每日有8款餸菜,雞牛豬,有魚有菜,任揀3款,包一個例湯,都係賣$25,送埋上嚟,你仲想點!難得質素唔差,只係偶爾有失手,一大盒飯,餸菜就用另一個3格分開嘅發泡膠盒裝,絕對唔係撈埋一齊,不過就真係唔環保。
趁秋高氣爽,同事都話不如食煲仔飯,無問題,華記都有,仲要係原煲煲仔飯送過嚟,服未!16款煲仔飯,每個$38,不過11:00am前落單收$30,我哋貪盡嘅梗係11:00am前落單啦,但係,唔好以為早落單就早送嚟,我哋啲煲仔飯結果成12:40pm先到,好彩都差唔多係我哋食飯時間。
每個煲仔飯都個別以報紙包好送嚟,盡量保溫,我相信佢哋都係一早收訂單,整好後都係集齊同一條街先送,所以個飯食落其實唔算好熱辣辣,但又未至於攤暖晒,仲有一定溫度,當然「新鮮度」唔及煮好即食啦!分別叫咗北菇田雞煲仔飯、排骨雞臘腸煲仔飯、鴛鴦腸排骨煲仔飯,但我揀嘅田雞竟然偷龍轉鳳變咗滑雞,好失望,就係因為平時好少食田雞,自己屋企又好少整先叫田雞,點知佢嚟錯個北菇滑雞煲仔飯俾好,唉,焗住逆來順受,如果唔係,再等番個田雞我諗要當下午茶喇。淋上甜豉油,撈勻兜飯,都確係滋味,飯粒鬆軟唔粘,煲底有少少飯焦,雞件唔肥的確嫩滑,但份量似乎偏少。至於同事嘅煲仔飯,佢哋都話OK,但無乜特別評語!不過,今之最唔得係個蕃薯糖水,蕃薯夠粉滿蕃薯味,糖水夠薑味,但竟然係凍嘅,都唔知預早裝起幾耐?真係叮番先好食呀!
|
|
|
品香樓中西風味餐廳
|
標題 : 個性小炒 |
地址 : 石硤尾南山村南豐樓平台商場204號 |
地區 : 石硤尾 |
|
現時分數:
|
日期 : 2010-11-22 09:56:41
一心一意嚟品香試佢嘅招牌嘢,不過,有少少失望咁啦,可能期望大咗啩!佢係茶餐廳格局,左右兩排卡位,中間放圓枱,雖然唔算地踎嘅,但地方就稍為比較逼狹。7:30pm都未係好多人,但到咗8:00pm眨吓眼就差唔多爆晒場!叫咗4個菜:生沙龍鳳球(見都好多食評讚,所以一心一意走嚟試吓佢),仲有鍋貼小棠菜、西蘭花花枝帶子同琵琶豆腐,加埋個食晚飯就會送嘅例湯(但阿姐話送完就無喎)!
生沙龍鳳球
係將雞翼起骨,泡泡油加沙律醬兜炒,夏天食就幾好,酸酸哋夠醒胃,可以扒多兩碗飯添,而且大啖大啖肉,食得爽,頗出色!
鍋貼小棠菜
比想像之中無咁正,用蝦膠加埋刴碎嘅小棠菜做餡,搓壓扁成一大塊再沾上粉漿,然後底部加塊紫菜脆炸。咬落較為油膩,而且,蝦膠唔多彈牙,雖然有特色,但唔算好好食!
西蘭花花枝帶子,琵琶豆腐
算做得有水準嘅小菜,不過無乜驚喜。份量OK,所以,以咁嘅環境同服務,價錢都算係可以!
唯一出問題係計錯數,叫咗4個餸,加3碗靚仔,加埋一,收我成三百幾,查一查單原來計多咗1個餸同1碟通菜,認真誇張,都唔知有心定無意啦,但老闆二話不說say sorry之外,即刻重新計過張單,唔會向你問長問短,駁來駁去計錯個兩個菜係有叫定無叫,算加番啲印象分,所以,食乜都好,真係要睇單架,穩陣啲最好拎埋張底單走添! |
|
|
新明發食家
|
標題 : 主打盅頭飯? |
地址 : 荃灣川龍街68號 |
地區 : 荃灣 |
|
現時分數:
|
日期 : 2010-11-20 11:58:32
又係星期日晏晝搵食時間,之前幾次經過新明發,見佢在鋪外架起好幾個蒸籠,有人排隊買外賣,上面黃底紅字寫住「馳名盅頭飯」,都有啲興趣一試佢嘅蒸飯,係咪咁馳名。
茶餐廳格局,食物包羅萬有,牆上貼咗好多推介同唔同嘅套餐,平貴都有,賣潮式粉麵,又有中式點心,唔少得梗係仲有盅頭飯,一貫茶餐廳嘅多元化。兩公婆,要咗個一個粉麵餐同一個盅頭飯,覺得都夠食。
粉麵餐
一碗粉麵加杯餐茶,都係$22,中位價。揀咗柱侯牛腩河配醒神奶茶,碗就大大隻,牛腩同河粉就只係一般粉麵鋪正常份量,牛腩炆得鬆軟入味,牛味濃,不過賣嘅係肥腩,舊舊腩都黐住舊肥膏;河粉就比較幼身而滑溜,湯底未見好有特色,況且加咗腩汁就主要都係腩味。
盅頭飯
盅頭飯有5款:豉椒排骨、鳳爪排骨、鱆魚肉餅、鹹魚肉餅、北菇滿滑雞,款款$18,要嘢飲加$6,快餐店以外另一個好選擇,難怪現場所見都幾多街坊食盅頭飯。本來叫鱆魚肉餅,點知啱啱賣晒蒸緊新嘅,要等15min,所以轉食鳳爪排骨。鳳爪排骨都夠味,尤其排骨幾腍滑,唔嚡唔韌,飯粒軟熟得嚟唔粘,落水份量啱啱好。平時唔想煮,外賣買盒返屋企食都好,仲平啲添,$16!
|
|
|
大阪王將
|
標題 : 大話王將,指鹿為馬 |
地址 : 荃灣楊屋道1號荃新天地地下29號舖 |
地區 : 荃灣 |
|
現時分數:
|
日期 : 2010-11-19 16:20:09
老婆鍾意食餃子,所以一心嚟試,見佢又似幾多人幫襯,故投佢信心一票。其實佢嘅套餐唔多,印象中好似大概7、8款左右,一客元祖餃子搭唔同嘅飯麵或烏冬,但唔包餐飲,要飲就要加錢,套餐$40-$48左右。咁佢仲有一款自選套餐,6樣嘢裡邊任揀2款,再加杯餐飲,都係賣$38。結果係,我哋每類套餐各叫一款,晌收銀度落單揸飛仔埋位等送嚟。
狐狸烏冬套餐
有一碗湯烏冬及一客6隻嘅元祖餃子,碗大大但烏冬唔算好多,而餸料就得一塊「薄次次」既甜油豆腐皮,油豆腐皮有一隻手掌大細,薄得可憐,真係兩啖吞晒落肚,加多兩片仔日式魚蛋,湯底清而無味,認真唔抵食,唯一安慰最好食咪得啲烏冬囉,滑溜有咬口而無酸味,仲有似係手切,形狀見方兼不規則,可惜份量少。而元祖餃子睇樣煎得幾靚,但食落麻麻哋,雖然都睇住佢係現場即包嘅餃子,有一定程度新鮮,菜肉餡,奈何因為啲餡好削身,肉攪得過碎,仲有比較油!
自選套餐
基本上6樣嘢有:汁燒棒棒雞、王將炸雞、吉列薯餅、元祖餃子、迷你大阪風炸麵、炸雞軟骨,我哋唔想食炸嘢,所以要汁燒棒棒雞搭餃子,張單都打得清清楚楚,絕無嗌錯。一嚟,唔似汁燒棒棒雞喎,應該嚟錯個王將炸雞,所以問清楚,個阿姐問我攞單睇,見寫住汁燒棒棒雞,就指住碟王將炸雞話依個咪係汁燒棒棒雞囉,改咗唔係用棒,用牙簽啫,真係吹漲!汁燒棒棒雞,王將炸雞,佢出面大大張海報都印住啦,根本兩樣完全唔同嘅嘢哩,點會搞得錯架。可能廚房無晒棒棒雞,因為我都唔見仲有邊枱有點依樣嘢,所以,廚房就想用王將炸雞代替,而王將炸雞本來一客係得三件啫,我哋依碟錯版就有成6件咁多,有相為証架,搏一搏見俾多一倍個客唔出聲算數,但個收銀、侍應又無同啲客解釋,所以變得送餐嘅阿姐會咁樣解釋,真搞笑!我哋咁諗住算喇,既來之則安之,咪試下囉,點知雞無雞味,仲好似無醃過,係直頭無味,靠點餃子醬汁哩提味。
餐飲要玄米茶,因為想飲熱嘢啫,但嚟個兩杯可以話肯定唔係玄米茶囉,成個Lipton綠茶茶包。玄米茶、綠茶,根本又係兩樣嘢喎,佢哋真係無嘢呀嘛!玄米茶係種晌茶葉裡加入炒過嘅玄米再烘培而成嘅茶葉,味道好唔同,佢哋真係亂咁哩嘅,都唔當你係客,佢哋鍾意改就改,又唔抵食,一定無下次囉!如果唔係抵制「太刻薄」,我過咗隔離食一哥焗豬啦。小弟寫食評都極少俾得太差,佢都真係要我出手俾!
|
|
|
板前壽司 Itamai Sushi |
標題 : 聞名不如見個面 |
地址 : 荃灣惠荃道22-66號綠楊坊2樓S27號舖 |
地區 : 荃灣 |
|
現時分數:
|
日期 : 2010-11-18 15:36:33
依篇係一篇遺忘咗的食評,無係依度上載過,但都覺板前唔錯,都即管補番,可能參考價值唔大,都志在與大家分享吓。以前成日見板前排晒長龍,啲報紙雜誌成日講,但依家好似不及初出道時那麼有人氣,尤其一啲繁忙時段,都仲要等吓位,只係無從前咁誇張。我就揀啱個好時辰唔使等,專燈揀星期日點幾鐘,過咗飯市嘅黃金時段,仲要係荃灣哩間,搏佢少啲人排,果然,都唔使點等就有得入去食!
一坐低,睇住個餐牌真係花多眼亂,好多款式,總之見個樣好,材料又幾特別就試吓,魚生、壽司、軍艦、手卷樣樣都點啲。整體哩講,質素確係唔錯,壽司飯粒分明,魚生亦夠新鮮,坐晌廻轉bar位,大部分時間都係自己顧自己,無乜服務唔服務,除咗寫紙點嘢食外!
食咗咁多嘢,印象較為深刻有甜蝦牛乳白湯、蟹籽凡立貝壽司、三文魚同立魚刺身、板前特卷(板前創作料理)。
1. 甜蝦牛乳白湯 – 香濃兼質感細緻幼滑,嗒到牛乳奶香味,甜蝦雖細,但不乏鮮味。
2. 蟹籽凡立貝壽司 – 凡立貝夠晒大粒甚有睇頭,重點係夠鮮味,加少少蟹籽同蕃茜一橙一綠點綴吓,賣相唔同靚仔晒!可惜,依家無再做哩款壽司。
3. 火灸鰻魚壽司 - 鰻魚大大件,足有舊壽司飯嘅一倍長,蒲燒過之後,充滿汁醬香,鰻魚又油潤,認真唔錯。
4. 蟹捧壽司 - 蟹捧同樣算幾大件,蟹味十足,質感唔削,面面再唧咗奇妙醬令味道唔單一。
5. 三文魚同立魚刺身 – 一客5-6片左右,薄切,雖份量不多,但鮮味最重要,簡單一句,魚生夠新鮮就咩魚都好食!三文魚食出油脂香味,立魚則口感帶爽甜,正係各有特色,同樣出色。
6. 板前特卷 - 以壽司反卷做基礎,外圍加咗木魚碎,面面放有海膽同三文魚籽,無論外觀同味道都一流,因為海膽落得唔少又夠晒新鮮,三文魚籽卜卜脆能增添口感。(依家無出哩個特卷)
午市,三個人食咗$360,以食日本嘢兼質素幾好計,價錢唔算貴,屬中等檔次消費! |
|
|
椰林閣餐廳 Yeh Lam Kok Restaurant |
標題 : 懷念港式西餐的餐包、紅湯 |
地址 : 美孚美孚新村4期美孚廣場212-216號舖 |
地區 : 美孚 |
|
現時分數:
|
日期 : 2010-11-17 11:22:48
平時星期日比較清閒,時間多啲就可以玩吓煮飯仔,晌屋企食。但今晚兩公婆都懶得煮,索性出街食。其實美孚區都幾多食肆,不過稱得上有名氣又好食嘅,都真係唔多。有幾間晌星期日都好爆場,不外乎都只係街坊生意,如果你唔係住晌美孚嘅,都唔多會入村搵食!突然間今晚兩個都不約而同想鋸吓扒,故此,就決定去椰林閣,食食港式西餐,咪睇小佢,雖然佢嘅嘢唔係好食到飛起,但事實又幾多街坊幫襯!
除咗指定嘅10款晚市套餐($59-$70)之外,正正做緊「秋日情濃套餐」($68),睇番有咩選擇,共3款,不過都係虛有其名,同「秋日」、「情濃」無乜關係,都係一年四季都會食到嘅菜式,絕無季節限定,都係搞搞噱頭咁。
點好餐後,先嚟港式西餐餐包,雖然只係個普通餐包一個,但夠熱又超軟熟,多少睇出有啲誠意,唔一定要咩意大利香草包呀,稞麥包之類,仲要點埋黑醋、橄欖油先叫好嘢。簡簡單單軟熟餐包配牛油,都可以係平凡是福,回想番以前細個時据扒嘅滋味,咪又係簡簡單單。跟包嘅餐湯,羅宋湯,雖然係俄羅斯名菜,不過都變為港式西餐嘅紅湯代表,可以講係另一港式西餐嘅文化遺產,大量蔬菜餚煮,辣中帶酸有肉味,唔馬虎喎!
講明鋸扒,我就要咗秋日情濃套餐嘅「鐵板香草牛肋條伴德國黑椒腸配黑椒汁」跟飯,鐵板上枱感受到熱氣騰騰,淋上黑椒汁未有嗞嗞作晌,感覺都係差啲,失咗個「聲」勢。份量實在大堆頭,牛肋條有成4、5條左右,條條有番咁上下大細,雖則叫香草牛肋條,但都被黑椒汁遮晒,唔覺邊隻香草味,而牛肋條肉質軟腍,還配上大量燈籠椒同洋蔥,惹味非常。德國黑椒腸,大大條一開二,食落未見好有特色,係腸肉無普通腸仔咁削身,唔似話溝好多粉做嘅腸。跟飯雖然唔係凈白飯,係整色整水嘅炒飯底,但都係無乜味,另外,個鐵板最大缺點係師傅做個汁過鹹!
太太唔鋸扒,就揀咗晚市套餐嘅「脆皮德國鹹豬手」。隻德國鹹豬手果然好巨型,味道帶點鹹香,皮下脂肪膠質重,帶點柔韌,可惜個外皮做得未係夠脆,伴薯菜,但唔係用懷舊嘅波浪紋薯條添。我哋兩公婆兩個主菜分享一齊食,清得個鐵板哩,鹹豬手就凈番唔少,實在啲嘢食夠晒大份。
即磨咖啡,熱朱古力,兩杯都咁正,前者香滑醇厚,無酸澀味,連牛奶都係暖過先嘅;後者,香濃唂咕味,比普通朱古力粉開嘅好啲。
因為食得好飽吓,件鹹豬手都食唔晒,打包拎走,攞番去煲粥唔好嘥,所以,佢哋有個甜品優惠,食套餐加$12就可以試到一件藍梅芝士餅,好可惜,今期食得好飽,唯有下次先再搵機會試。 |
|
|
滬江飯店 Wu Kong Shanghai Restaurant |
標題 : 見識豆腐做餃子 |
地址 : 尖沙咀彌敦道27-33號良士大廈地庫 |
地區 : 尖沙咀 |
|
現時分數:
|
日期 : 2010-11-16 16:50:59
之前去泰豊廔食北京填鴨,今趟又食鴨,不過就係片皮鴨。其中一班教會弟兄耐無見,約定搞個飯局出嚟見見,有食有講,我就一定到啦,佢哋揀咗嚟滬江,我都好耐無嚟過依度,仲可以比較吓佢同泰豊廔嘅北京填鴨!
片皮鴨
要預訂,大大隻燒鴨,嚟到香噴噴,燒得好靚,有光澤,食味又覺得兩家差唔多,一樣甘腴好味,主要都係片鴨形式較唔同,泰豊廔會大塊肉連皮咁片,為之北京填鴨,食落多咗朕鴨肉燥香;而滬江賣嘅係片皮鴨,就主要片皮,只黐住少少肉,同埋依度嘅鴨睇落食落都覺得無咁肥,食落夠甘香,而且,片完皮後,成個鴨殼會俾番個客,拎返去煲粥或煲湯都好!仲有就係佢哋塊餅皮大塊而薄身啲,貪心嘅話可以放多一兩塊燒鴨皮添。
醉香乳鴿
除咗片皮鴨,去之前睇過吓各路食家嘅食評,揀咗2個心水菜:醉香乳鴿同豆腐餃子。真係好嘢哩,個醉香乳鴿同食開嘅醉雞其實都係一樣,冷盤菜式,因為乳鴿關係,比醉雞感覺肉更嫩,而且皮又爽,添上點點酒香,確實係幾好嘅冷盤菜,誇張少少講句依道菜係一餐飯打頭陣嘅醒神菜。
豆腐餃子
同樣無介紹錯,味道屬於清淡菜,相對濃油赤醬嘅上海菜,依味餸算係成晚餐飯嘅一道清泉,其實味道唔係話有咩好特別,食佢就係想食師傅嘅刀功,餡料係刴到非常幼細嘅菜葉,用哩做皮嘅豆腐就片到好薄好薄,但又唔會話好易夾爛,包成一件件三角形餃子狀,再疊好成一個大包咁款至上碟,淋上清湯獻,賣相又掂!
其他仲有點咗小籠包、炒蟮糊、乾煸四季豆、糖醋魚塊,雖然唔會「嘩」一聲咁有驚喜,但頗有水準,叫咗7個餸,8個大男人,食七咁食,無嘢剩,份量叫得啱啱好,飽晒!仲有,加上哩度環境確實好過泰豊廔嘅,格調高檔好多,較靜局,傾咗成晚偈,感覺真好!位位$120,認真抵。
|
|
|
石崗咖喱屋
|
標題 : 濕地公園後的咖喱大餐 |
地址 : 元朗阜財街14號地下7號 |
地區 : 元朗 |
|
現時分數:
|
日期 : 2010-11-15 18:35:35
去完濕地公園,走過嚟元朗搵食,我哋哩啲市區人,元朗、天水圍、屯門真係好少入去,今勻嚟到咁北嘅元朗,都知道依區都有好多好嘢食,睇書仔介紹真係眼花撩亂,費事嚟到先搵,所以一早鎖定目標嚟石崗!亦都懶得諗,坐低就篤手指揀咗個二人餐,有齊小食、鐵板烤羊膝、咖喱牛肉(或豬、雞)、咖喱什菜配白飯、又有烤麥缾、鮮果沙律、同埋汽水或紅酒,真係好抵食,份量十足,根本兩個人就食唔晒,所以落單時已叫佢哋個飯俾半份我哋就得喇,點知佢都仲係哩咗成份,即係一大碟,真激死!加上哩日係週日,好多人坐到爆,我哋都係安排坐晌走廊二人位,都 OK嘅,係比較多人行出行入,不過反而靜局啲,無出面咁嘈添!
小食
有印式春卷同雞件,各兩件。春卷無乜特色,雞件就用多種香料醃過,所以味道特別啲,不過講出色,反而係嗰兩兜醬汁:燒汁、乳酪汁,一黑一白,燒汁味濃,乳酪汁酸香,好有個性!
鐵板烤羊膝
上枱時熱辣辣,大大件羊膝有兩件,呎吋就比雞脾大一個呎碼咁,一人揸住一隻哩食,夠豪爽呀!多層次嘅香料味,味道複雜唔會齋得個辣字,羊膝肉質軟腍,卻帶少少羶,真係好食!
咖喱牛肉
牛肉用咗腩位,不過就做得無咁好,因為韌咗啲未夠鬆化,好彩個咖喱汁膽做得惹味,少少辛辣,咖喱汁用烤麥餅醮啲哩食又得,用哩撈飯食都得,得咗,真係好得!烤麥餅,好有一種原始簡單嘅味道,烘得少少鹹鹹香香,質感比麵包柔韌,醮多啲咖喱都唔怕變溶溶爛爛。
咖喱什菜
時菜有薯仔、蜜糖豆、椰菜花,唔會話煮到腍晒,幾款菜都好甜,又因為啲咖喱正,所以都覺得個咖喱什菜一樣好食。
巴基斯坦芒果
本來有個鮮果沙律,點知改咗巴基斯坦芒果(佢哋一箱箱擺晌門口度有得散買),食落充滿芒果果香,芒果味超濃郁,仲好甜,可惜得嗰4件仔。所以見佢有巴基斯坦鮮芒果汁散賣,好似$20杯,就叫咗杯哩試吓,大大杯,又夠冰凍,食完咁多辣嘢降降溫先,個鮮芒果汁一樣都係咁濃郁芒果香,甜得哩又唔會好似糖水咁假,絕對飲得過。 |
|
|
千両 Sen Ryo |
標題 : 牛肉刺身真得嗎? |
地址 : 尖沙咀廣東道28號新太陽廣場地庫B06B號舖 |
地區 : 尖沙咀 |
|
現時分數:
|
日期 : 2010-11-15 11:31:17
千兩嘅迴轉壽司標榜碟底有晶片,有電子監控,避免壽司長時間放在迴轉帶上而變得唔新鮮,不過,今日星期六1:30pm去食,佢嘅做法比碟底有晶片更新鮮,就係直情無乜點放壽司上迴轉帶度,只係得嗰三幾碟咁大把,樣樣都要落單叫,唔知係咪因為客少,所以費事放咁多壽司上迴轉帶度啩,都無所謂嘅,至緊要啲嘢食夠新鮮啫!
今日兩公婆幾好胃口,點咗幾多嘢,包括:牛膀脆片、炙燒牛肉刺身、軟殼蟹手卷、炸蝦卷、加州卷、梅子紫蘇卷、吞拿魚醬油漬壽司、千兩特制厚燒甜蛋、南瓜同紅豆雪糕。
牛膀脆片
牛膀脆片係植物嗰隻牛膀,刨薄片脆炸,食落唔算油膩,又好脆口,幾有趣,可當餐前小食!
炙燒牛肉刺身
魚生食得多,生牛肉就比較少,今次見個炙燒牛肉刺身都係捱介,一於試一試,雖然話係炙燒,個人覺得同食生牛肉分別唔太大,因為見佢都係將外層燒一燒,切開內裡都仲係「生勾勾」一片一片咁,加啲蔥絲,點啲醬油,放入口,感覺唔錯,啲肉食落好嫩,又好夠肉味,只係唔會話好似「茹毛飲血」嗰種生法,唔會有血水滲出。唔怕食生嘢嘅人不妨試一試!
軟殼蟹手卷、炸蝦卷、加州卷、梅子紫蘇卷
幾款手卷同壽司卷,以炸蝦卷最得歡心,因為一來佢又係香口嘢,二來將壽司飯包住紫菜,再包住炸蝦,面面再放上蟹籽,賣相又靚仔,味道又正。其餘嘅,唔係差,味道OK嘅,但就唔算太突出!
吞拿魚醬油漬壽司
唯一叫嘅壽司,志在食吓吞拿魚,而吞拿魚用醬油先漬過,色澤較平時深,味道就多咗份醬油鹹香,不過都係唔漬好啲。
千兩特制厚燒甜蛋
一睇橫切面就見到佢係一層層咁整,無欺場,而蛋味OK,但甜味又唔係覺佢好有,不過都算軟熟,唔會死實咁硬,應該都係新鮮做而無話放咗好耐!
南瓜同紅豆雪糕
嗰雪糕有丁點兒失望,只因為一廂惰願諗住係一片南瓜,中間填滿南瓜雪糕嗰隻款,唔係就咁一般雪糕球咁樣,雖然賣相唔係心目中嗰樣,但味道無失望,南瓜味道好出,而紅豆雪糕又好正,紅豆味濃,奶味又足,雪糕本身又軟滑!
可能今日客人真係比較少,所以啲招呼都好到位! |
|
|
泰豐廔
|
標題 : 老店,人情味濃! |
地址 : 尖沙咀漆咸道29-31號溫莎大廈 |
地區 : 尖沙咀 |
|
現時分數:
|
日期 : 2010-11-14 00:01:39
依間老店又真係想嚟食好耐,好耐以前又睇過雜誌介紹,話幾做到地道風味,齊人一於訂枱食番餐!D人成日話佢格局地踎,咁講又刻薄D,算係老式酒家,一路都無乜裝修,變得殘殘舊舊咁,咁樣咪有種老店懷舊味道啦。
嚟得泰豊廔,都係食番佢個北京填鴨餐,有唔同價錢,主要係就番人多定人少,人少咪食個4-5人餐,多啲嘅咪6-8人餐,再多啲嘅咪揀10-12人餐囉。臨時一個老友甩底,得番4個人,所以都係決定叫個4-5人餐,查實6個人都夠食,因為佢啲份量好似大排檔咁大碟頭!
三絲伴粉皮
先嚟個冷盤前菜,雖然只係一道前菜,一樣大大碟,食到你夠。三絲有雞絲、火鴨絲同火腿絲,仲有圍碟私人醒嘅青瓜絲,所以都唔只係三絲,不過無理由叫「四絲」,個諧音唔多好聽。每隻絲都切得好幼細,算係少少功夫菜,粉皮墊底,配芝麻醬汁,雖無大驚喜,但麻香醒神!
北京填鴨
主角上場,大大隻滾熱辣,燒得甘香亮澤,單點散叫差唔多成三舊水,所以叫套餐真係抵食好多。全隻鴨擺晌你面前片皮起肉,因為係北京填鴨,所以切法係皮連大大舊鴨肉,如果係片皮鴨嘅話就主要起皮唔跟肉。再加啲京蔥,搵塊薄餅皮夾住嚟食,一啖啃落去,爆晒汁,鴨油豐腴,正!不過始終係皮連肉,中間大大舊肥膏,膽固醇自己高開。
賽螃蟹
做得出色,蛋白炒得嫩滑清甜,而醋香又陳厚,唔會有嗆喉或者過酸嘅感覺。
京燒排骨
有啲似酥炸排骨之類,表面睇樣平平無奇,但肉質好鬆軟,話佢好食係因為重點晌個伴食嘅醬度,將件排骨醮一醮個醬,味道唔同晒,文筆所限,唔識形容個味道,只係覺得點咗個濃醬件排骨變得好有個性!
鴨架冬瓜湯
鹹鹹香香,覺得唔錯。同枱老友好欣賞,飲完添飲再添飲!唔使驚,一大湯碗,至少可能每人飲兩碗。
菜肉水餃
全部做到大大隻,不過就始終北方做法,比較皮厚,食味都OK,勝在好頂肚。
高力豆沙
唔同出面啲高檔酒樓咁縮骨,套餐份量真係跟足人頭數,4-5人餐就可能俾番5粒你,計住計住。散叫我就唔知俾幾多粒,但依家佢就嚟一大碟,個個差唔多拳頭咁大,一碟放滿晒足8粒,而且炸得包身鬆軟有蛋味,豆沙又足又香甜,所以貪心啲食番兩個先!
好老實講,份量真係好十足!至於服務,一樣有驚喜,唔好見佢係老店,啲伙計又上晒年紀,以為會好招積好大支嘢咁,錯晒!佢哋啲服務態度做足一百分,唔比時下啲高檔食肆差,又幾好傾,問親嘢又好客客氣氣,點菜時個阿姐知我哋會叫填鴨,就建議叫套餐,因為鴨嘅大細套餐同散叫都一樣,只係加多二百就多咗5個餸同個甜品,超晒值!咁睇番個套餐,啲嘢啱食之餘,又確實好抵。最後,大家都好努力咁食,但份量太多,4個人真係食唔晒,咁打包剩番嘅填鴨,有成盒咁多可以拎走,重點係個阿姐主動話另外載番盒醬俾我哋,你話咁嘅服務態度幾得丫!仲有,佢哋又大大方方唔收茶芥添,不過要加一,至於加一服務費,吃得D客開心,又何止加一丫!
|
|
|
湘川滬 China Land Restaurant |
標題 : 知已相聚六人餐 |
地址 : 旺角太子道西193號新世紀廣場7樓709-712號舖 |
地區 : 旺角 |
|
現時分數:
|
日期 : 2010-11-12 16:21:04
旺角新世紀廣場,不時都咁旺,連帶食肆都收旺場,加上今晚依餐飯局食於星期六,我哋除一早訂位就仲揀得食早少少。其實,刻意揀哩新世紀廣場都有其原因,因為依個商場有育嬰設施,我哋有兩個媽咪級朋友,兩個B仲係手抱咁細,要換片食奶梗係有個育嬰廁所方便好多啦!
左篩右篩之後,搵咗湘川滬,因為有朋友食過讚好,就算星期六、日一樣有好多推廣或優惠,價錢都算相宜。好似依晚有個「抵食加送」優惠,$98一客朝陽松小魚,就加多$10 / $18送多一款酸豆角肉末跟薄餅 / 湘西土匪雞,另外又有啲超抵食孖寶,一個冷盤小食搭一個餸菜,都係收$68。本來我哋都打算散叫再加啲優惠嘢,但大家嫌煩費事諗,叫咗個「知已相聚(6人餐)」$580,茶芥加一另計,埋單八百大洋,但都夠我哋8個大人食喎!而地方都幾大,但枱都有番咁多張,一貫酒樓凳背貼凳背,唔算太嘈,服務都幾好,上菜收嘢都好小心,上菜仲超快添,可能叫套餐關係吧!但食完又無話催你趕埋單,始終今晚得八乘幾滿。個套餐送糖水,雖然係6人餐,但糖水都人頭數咁俾,阿姐笑住口仲問夠數未,唔夠再攞,哈哈!
湘川滬,顧名思義,係賣湖南、四川、上海菜。四川同湖南菜均以香辣馳名,四川菜麻辣香燙,湖南菜酸辣香鮮,至於上海菜,不用多講,好多人都知係濃油赤醬。湖南菜就少接觸,可能自己食咗都唔知,川菜因為工作關係,有時要走訪重慶,所以都有食,況且依家香港川菜都普及咗,上海菜就有更多接觸啦。可惜,個套餐佔絕大部份係上海菜式,想一試湖南菜就要另覓機會喇。
鎮江肴肉
冷盤小食之一,做法繁複,但賣相精緻,豬蹄肉同鹵凍比例係九一之比,豬蹄肉佔多,而豬蹄肉壓得比較緊密,同上一次晌上海婆婆食嘅唔同,但同樣都係肉香不膩,點點鎮江醋,別有風味。美中不足真係只得6舊!
黑醋雲耳
冷盤小食之二,唔肯定係唔係湖南冷盤,因為唔似川又唔似滬。雖則係小食,但份量卻係唔少。雲耳做得爽脆有咬口,黑醋嘅酸香,加埋少少辣椒嘅提味,令雲耳本身無味而變得有趣。
蒜香拍小黃瓜
冷盤小食之三,常見上海冷盤,小黃瓜半切半拍,見瓜邊削直係刀切嘅痕跡,瓜身爆開就係刀拍嘅效果,有人話要拍打會好食啲,的確瓜身爆開令蒜蓉天入味。青瓜嘅清新、爽脆,夾埋蒜香,確係唔錯嘅涼拌小食。
砂鍋雲吞雞
幾鍾意嘅上海菜之一,因為有湯飲,又有雞同雲吞食。個雞湯湯頭都幾甜,雲吞又好足料,係另碟上嘅雞肉就嚡咗啲,所以大家都無乜點食!
宮保鮮蝦仁
輪到川菜出場,宮保雞丁就食得多,依次就貴氣少少,係宮保蝦仁,但碟菜上枱唔對路,啲蝦大粒到直情係蝦球啦,蝦仁嘅話通常都諗住係細粒啲嘛。而且蝦肉本身幾鮮甜,果然係用鮮蝦整,真係俾咗啲驚喜。味道亦調校得唔錯,辣中帶微酸,係唯一可能就少少港人口味,辣度唔算好犀利。
朝陽松子魚
賣相普通,做唔出松子魚嘅形態,松子紋唔突出,睇落就只係一條醮咗粉漿炸好嘅魚柳,平放晌魚形嘅瓷碟上,再加上艷紅嘅獻汁,有啲失色,而且粉漿稍為厚身。還好嘅係條魚都嫩滑,酸酸甜甜嘅獻汁又拉番高少少分。
京蔥牛肉
京蔥比較粗大,最主要係蔥味較濃,香氣比較獨特,唔受得嘅人更係覺得佢臭臭哋,鍾意嘅人就鍾意佢朕原始而帶有草青嘅味!牛肉炒得軟腍,京蔥落得豪爽,撈飯食真係一流。
清炒田園時蔬
真係清炒,相信只得少少鹽吊味,田園時蔬依趟係唐生菜,色澤翠綠,炒得OK無話太過腍,一餐飯總要有碟「菜」先似樣嘅。
天津狗不理包
天津風味小食嘅代表,原來都有成150年歷史。正宗嘅狗不理包子,選料精細,製作講究,外形美觀,有明確嘅規格標準,包子褶花勻均,每個唔少於15褶,包子皮又要半發酵,而食落肉餡鬆散,油水汪汪,鮮而不膩。咁講番依個狗不理先,睇落都夠15褶以上,不過手功就唔叫得精巧,少少粗疏,三七肥瘦嘅鮮豬肉餡料我估都差唔多,因為咬落唔太肥,唯肉餡有啲實同埋包身食落稍為黐牙,不過整體確係唔錯。
精選甜品
都唔係咩精選特色甜品,只係南瓜露,南瓜煲到溶透,都搵唔到一絲絲南瓜,但南瓜味就頗為濃郁,只係未夠滑溜!
食吓傾吓,兩隻B見自己無份食又喊吓,咁又一晚喇。 |
|
|
Connections |
標題 : 無心思,Afternoon Tea! |
地址 : 銅鑼灣禮頓道8號香港銅鑼灣皇冠假日酒店地下 |
地區 : 銅鑼灣 |
|
現時分數:
|
日期 : 2010-11-10 19:14:42
原來皇冠假日酒店都已經咗成年多少少,雖位處晌銅鑼灣,但都屬邊皮位置,隔離就已經係電車路嘅跑馬地入口位,位置感覺上有啲隔涉,總之打叮叮過哩方便啲。Connections其實係酒店嘅Lobby Lounge,超高樓底,一室啡木色系,枱與枱之間又幾闊落,配以唔同大細嘅梳化凳,感覺令人幾放鬆,唔會有種局促嘅感覺,傾起偈哩唔會太受騷擾。不過,晌天花或玻璃窗吊掛住嘅奇異海報,以及牆上嘅藝術掛飾,陪襯現場柔和嘅氣氛,真係搵唔到當中嘅connection,依樣有啲奇!
依個Tea Set中文名為「特色下午茶套餐」,每日3:00-6:00pm有供應,每位$138,兩位用就$228,酒店服務要加一就唔使講啦,而服務算係妥貼,侍應都好有禮貌。個Afternoon Tea Set用傳統的三層架,唔似啲新酒店晌個層架度搞花款,感覺平凡輸咗個頭威。而食物都同樣覺得無乜花心思,最上層係三文治同英式士乾Scone,中層係奶凍同雪糕,最下層係東南亞串燒同炸春卷。
上層
- 煙三文魚三文治,三文治用普通嘅白麵包,煙三文魚亦唔見得好味非凡,份三文治切成長條形,最弊係疊到好似打風咁斜埋一邊,俾人覺得唔夠專業囉。
- 芝士火腿三文治,依個三文治就用咗麥包,睇樣食落都覺係嘉頓貨色,因為我自己都好多時食嘉頓麥包。芝士、火腿同樣都係普通質素,咁樣已經攞唔得高分,仲要切到啲火腿甩甩漏漏,真係好唔認真,要扣分啦!
- 提子Scone,三者中比較好啲喇,不過,都係實咗啲唔夠鬆身。其實Scone質感幾得意,唔係講軟熟,係講嗰種粗粗嚡實在感,個餐提供果醬,又提供牛油忌廉伴食,搽邊樣都好味。
中層
- 芒果粒粒椰子奶凍,椰子奶凍做得幾好,奶味夠重又夠挺實唔削身,否則就變咗似慕絲而唔係奶凍。芒果粒粒都幾多,但係好似配椰子味就差少少。
- 朱古力雪糕,雪糕本身幾幼滑,朱古力又幾濃,裡面仲有好多朱古力片片,但係,唔知係雪得唔夠凍定點,攞到哩已有溶溶哋嘅跡象,攤多陣直頭想變朱古力奶。雖然侍應都細心同我哋講食個雪糕先,但都唔係溶得咁快丫嘛!
下層
- 沙嗲雞肉串燒,一客兩條,不過不失,雖然燒得幾香,再加埋帶有花生同椰香嘅沙嗲醬,可惜唔夠熱辣辣,可能我哋又唔係第一時間食,感覺差啲。
- 依個炸春卷就最有驚喜,一心以為係豬肉呀、甘筍絲呀……之類,因為以上幾款嘢都覺得好一般,原係係朱古力漿,簡直係心太軟炸春卷版囉,根本就唔係小食,當正係甜品添啦。話說回頭,除咗因為內餡係朱古力,此外,其實就無咩特別喇!啲春卷擺耐咗,層外皮都已經唔脆。
飲品要咗凍mocha,其實有啲後悔,唔係佢唔好飲,係個餐幾樣都係朱古力,尤其臨尾個炸春卷,所以,飲其他嘢自己覺得平衡啲!始終唔係朱古力主題下午茶嘛。 |
|
|
松屋日本料理 Matsuya Japanese Restaurant |
標題 : 再戰松屋 |
地址 : 銅鑼灣駱克道491-449號京都廣場3樓 |
地區 : 銅鑼灣 |
|
現時分數:
|
日期 : 2010-11-09 12:41:32
事隔年半,再戰松屋,上次同教會朋友慶生日,依次就拉埋同事當慰勞,早排做到死死吓,點都要大食一餐嘅。依家嘅日式放題開到成行成市,價錢大家都差唔多,而晌旺區開到好似梗有一間晌左近,印象中松屋都算係早一批搞放題嘅日本餐廳。本來都唔係揀佢,想試其他未去過嘅日式放題,不過好多都係分上、下兩場,早場就早得滯未收工,晏場又晏得滯中間時間又唔想hea住,結果揀松屋因為佢有好多時段揀,比較就到我哋,我哋就由7:30pm食到10:00pm,兩個半鐘夠晒啦!
去到人氣依然咁旺,訂咗位都要等10min。睇番食物種類,都係嗰3張食物紙,好似無乜點改過, 70多款食物包括7款刺身、13款壽司、6款手卷、24款串燒、5款沙律小食、6款飯麵烏冬、11款揚物及天婦羅、同埋6款日式料理。飲品方面,共有14 種,飲清酒就要另外俾錢喇。一坐落就進行第一輪大手掃貨,其後就再睇大家嘅戰鬥力進行幾輪散打策略啦,邊食邊傾真係差唔多食到10:00pm先走,成晚漏單嘅情況唔多,侍應收碟、執拾、落單、跟單都OK,招呼都唔錯,又無話催埋單,始終係閒日差唔多近10:00pm,都無乜新客到!
今晚戰績都算唔錯,三個人食咗唔少嘢,係手卷同飯麵烏冬無幫襯,因為食咗佢哋真係唔再食得幾多嘢;而刺身同串燒應該成為今晚主打喇,一來屬貴價少少嘅嘢,二來算係無咁易飽肚嘅嘢。
刺身:三文魚、吞那魚、立魚、魷魚、鮑片。
前後都叫咗三輪,可想而知我哋食得幾落力!老實講,刺身唔算好標青,感覺都新鮮,無霉無怪味,只係唔係好高質,而每次點嘅份量都俾到足,無話見貴價嘢就從中抽水俾少啲你。
壽司:瀨尿蝦,芒果炸蝦卷。
都係貪口爽而叫,前者過口癮食吓瀨尿蝦,話晒唔使自己去殼咁麻煩,不過味道一般;後者,就睇吓芒果夾炸蝦效果係點,算叫OK嘅,多啲芒果,炸蝦又大隻啲,效果就出啲。
小食:八爪魚,螺肉,凍豆腐。
凍豆腐較為好食,滑溜,而八爪魚同螺肉似來貨嘢,黐住嘅醬一pat pat咁,感覺嘛嘛。
串燒:大蔥鴨肉串、串燒蝦、汁燒牛頸脊、串燒雞軟骨、冬菇、照燒雞串、羊扒、粟米、蕃薯、翠玉瓜、八爪魚丸。
叫咗好多串燒,有好有唔好啦。覺得好嘅:大蔥鴨肉串,鴨肉少少燥味,但配咗大蔥一齊食,效果唔同晒;汁燒牛頸脊,牛頸脊腍身有肉味;羊扒,唔點羶喎,同樣軟腍,仲大啖大啖肉;粟米,其實燒過嘅粟米特別甜,因為水份被蒸發啲,裡面嘅糖份濃度就自己高咗,除非個粟米本身質素好差啦!反而有啲失望係蕃薯同八爪魚丸,因為紫心蕃薯有啲所謂「臣臣哋」,而八爪魚丸比較溝粉好咗。其他幾樣都OK唔錯!
揚物:炸蠔、炸芝麻雞翼、炸芝士海鮮卷。
炸蠔好奀,好彩一次過叫5隻,因為啲蠔唔夠肥美,所以食一轉就無再添食,5隻都叫多咗;炸芝麻雞翼,依個掂喎,雞翼大大隻之餘,好入味,外皮又炸得甘脆,正;點知又被個炸芝士海鮮卷拉番落深谷,外面絲網春卷皮,包住中間一條白色唔知係乜,腍又唔係好腍,又有啲韌,唔知邊忽似芝士,更唔好講係食唔到有咩海鮮,我哋三個細心研究過都講唔出係乜,放棄吧啦!
天婦羅:蝦天婦羅。天婦羅本身有5款,其他嘅仲有沙追魚、蕃薯、茄子、南瓜,但依趟精揀蝦天婦羅,叫得唔少添,可惜粉漿有少少厚,而蝦比較細隻,無咗大啖大啖蝦肉嗰種滋味。
其他日式料理:金菇肥牛卷、鹽燒秋刀魚、燒鯖魚。
幾款都只係中規中矩,肥牛紥住大大束金菇,慌死怕你投訴話佢少。秋刀魚有少許腥味,但其實燒得幾靚,反而燒鯖魚就正啲,雖然一客一小件,但淺嚐細味都唔錯。
雪糕同以前一樣都係得4款,味道都無改:芝麻、綠茶、紅豆、朱古力,唔使講,一次過試晒啦,係每人都要晒4款,咁先夠喉丫嘛!始終都係芝麻同紅豆最搶鏡,味道最濃郁又無咁假。今晚食咁多炸嘢同串燒,所以,同上次一樣,飲咗唔少嘢,好彩小弟個胃都算幾強,4杯凍嘢仲杯杯唔同,又凍甘桔檸檬蜂蜜、凍蘋果綠茶、凍紫蘇梅、Mountain Dew,溝溝埋埋都無事。哈哈! |
|
|
北京人家
|
標題 : 人家裡的平淡一餐 |
地址 : 荃灣楊屋道1號荃新天地上層地下43及81號舖 |
地區 : 荃灣 |
|
現時分數:
|
日期 : 2010-11-05 17:27:34
為慶祝太太生日,所以搵埋姨仔舅仔一齊食番餐,就番大圍人揀中菜,一於試吓北京人家,美心系,諗住水準有保證。但好得意,一心諗住佢係賣京菜,但發覺又唔係喎,好似燻魚、小籠包、乾鍋、鍋巴…等,以小弟淺薄見識都知唔係京菜,所以,依戶北京人家係乜都食!
美心即係美心,裝潢、服務做得非常到位。一字長形大堂,一室金黃,連天花的大吊燈燈罩也要加個金色通花裝飾,多少要反映一種北京大戶人家嘅氣派,環境叫得優雅舒適;相對,泰豐廔稍為地踎啲嘅格局,就好似有種老胡同嘅感覺。而服務則係一貫美心嘅勤快、有禮,好似其中一個餸哩錯,二話不說同你即換,唔會同你糾纏邊個啱邊個錯。
望江樓陳皮燻魚 $55
望江樓係成都嘅景點,燻魚眾所周知係上海菜出名嘅前菜,兩者大纜都扯唔埋,但個菜名就係改成咁,真係唔知有乜意思!斷估唔係成都出產嘅陳皮啩,係都係新會陳皮靚啦。之不過,個燻魚燻得幾香,魚肉又幾夠紮實,唔好理個名合唔合邏輯,都係唔錯嘅冷盤前菜。
蘭庭灌湯小籠包 $24
舅仔必點嘅嘢食,去到邊度有賣小籠包佢都例叫,算不上小籠包達人,但都叫得閱包無數,佢對北京人家嘅小籠包評語係好一般,因為皮較厚,叫得做灌湯但湯汁算唔上好多。但對我哩講,又好唔錯喎,餡肉味鮮,湯汁查實都唔少,係舅仔要求高啫。
西洋菜肉水餃 $52
太太對水餃有種情意結,所以哩到依度都點番個水餃,一客8件,無論外皮,餡料都係只覺普通,連老婆都話嘥咗一個餸菜嘅配額,食嘢就係咁,唔試有時真係唔知好唔好食。
雲南小瓜山珍菌 $60
雲南出菌就非常出名,但京菜館整個雲南菜感覺又有啲搞嘢。叫呢個餸係想睇吓咩叫做小瓜,迷底好快揭盅,就係翠肉瓜。再配以冬菇、茶樹菇、雞脾菇,蠔油獻炒成,個名用山珍菌,係唔係野生食用菌就不得而知,但就算一般菌類都營養價值高,況且,依個菜炒得唔油膩,比傳統的「厚獻」好得多,味道普通得哩屬健康之選。
酸菜牛肉乾鍋 $60
之前哩錯咗個「麻辣牛雜乾鍋」,上枱一股麻辣香已知唔對路,仲加埋牛肚又牛膀,就知哩錯,都唔知係個侍應聽錯定我口快講錯,總之,侍應都好爽手換過碟啱嘅哩。乾鍋係乜?乾鍋好似係湖南家常菜,用鐵鍋盛載滾燙熱菜上枱,仲一邊加熱一邊食。雖然依個酸菜牛肉乾鍋唔係邊熱邊食,但鐵鍋耐熱,餸菜都唔會快凍,似煲仔菜。加咗西芹,洋蔥,辣椒做配料,好惹味,牛肉份量唔少,又夠晒腍滑,不過既然叫得酸菜,都算主角之一,但似乎份量少咗啲,酸菜味唔夠突出,而且比較油膩。
映山紅茄汁蝦仁鍋巴 $72
個名就改得好有意景,映山紅,不過個菜就普通啲。茄汁色澤、味道都對板,唔太酸,又有濃郁茄味,夠稀身,同埋好大兜,大兜到直情可以當湯咁飲。蝦仁都幾大隻,唔算好多,質素唔叫得好好亦唔叫得上差,鍋巴都同樣得好少,而且認為做得唔夠香脆,鍋巴應該屬川菜,所以食吓食吓食其他外省菜多過京菜!鍋巴食晒,仲剩番好多汁底,唔好嘥之下真係當咗湯咁飲,又OK喎,一餸兩食,問你死未!
晌處食完一餐,雖處華麗之地,除菜名幽雅有意景外,菜式就甚覺平平無奇,感覺就似係去咗睇完幻彩詠香江咁,原來係咁咋!
|
|
|
大丸迴轉壽司
|
標題 : 一定要揀迴轉位 |
地址 : 深水埗元州街18G號富匯居1樓 |
地區 : 深水埗 |
|
現時分數:
|
日期 : 2010-10-28 09:27:19
返完教會走咗過哩深水埗,原因為幫公司落黃金買代用墨(苦差一件),所以,就順道搵咗住依區嘅表哥表嫂同埋見到我個惡樣先乖嘅表姪女食晏,因為表姪女都幾鍾意食壽司,以往好多時同佢哋一齊嘅話都會去黃金對面嘅金太郎,但見北河街附近開咗檔新嘢「大丸」,今次就改改哩依間新嘢試試。
我都係石硤尾大,對深水埗區景物都有份感情。大丸晌幢新樓「富匯居」嘅一樓,佢前身係戰前舊樓,地鋪係「統一大葯行」,望落去好有歷史,轉眼就變咗,唔拆嘅話依家都可能成為古蹟呀!上到去,地方比想像中細,不過純白色人造石枱面,配粉紅色皮梳化椅,就確係幾搶眼。覺得最好坐會係近窗一排二人位,因為大大隻玻璃窗可以望晒成條元州街街景,感覺開揚;另一排近窗嘅四人卡位就比較窄,可能會無咁舒服;仲有一個「騎呢」死角U形五人位,望落有啲夾硬砌出哩。點都好,心水就係一定要揀坐迴轉壽司位,點解,下文自有分曉。
大丸有咩食,簡單,一張半A4紙餐牌打晒出哩,49款壽司(每客兩件,價錢分別為$8、$12、$16、$20)、31款手卷(每件價錢分別為$8、$12、$16)、14款刺身、14款煎炸煮物、7款沙律小食,無咗拉麵烏冬…等飽肚嘢。唔好見佢有成幾十款壽司,好多都係大路嘢,唔算有睇頭,而且,以上講過咁多款嘢,隨時有部份材料無供應,七除八扣結果你就會覺得無乜嘢食。但係,坐落你又發覺唔係咁,原來佢哋一星期幾日飛機時令貨返,餐牌唔會寫出哩,但晌迴轉帶除時見到有新鮮嘢,加上總廚旭哥,鬼主意甚多,得閒又搞吓創作壽司咁,所以揀坐迴轉壽司位有著數,第一時間睇到好嘢,選擇多好多!
小食、刺身
八爪魚醋物,一小兜賣$20;而三文魚刺身,一客四件厚切賣$42,兩者都覺得有啲貴。三文魚肥美鮮甜,確係幾正,只係嫌個價有啲高;但八爪魚黐住一「pat」漿咁,真係唔太值!
壽司
壽司多以海產類為主材料,而且飯糰握得小巧精細,我估係屬於江戶前壽司,即係飯較少而以海產為主!迴轉帶後就見到晒師傅晌度手握壽司,飯粒鬆軟但唔散,分別點咗海膽$20、蟹柳$8、雞蛋$8、熟蝦$8、鮑魚$8、腐皮$8、槍魷魚鬚$16共7款,因為怕生嘢唔安全,所以熟料嘅壽司係叫俾表嫂同表姪女食,我同表哥就食生料嘅。整體不過不失,就算只賣$8客嘅鮑魚壽司,都唔太失禮,咬落柔韌有鮑魚味;而海膽壽司賣$20一客,唔算貴,因為海膽份量幾多,而且幾鮮,無話有腥有怪味,質感幾軟滑!
手卷
叫咗5款:加州$12、雞蛋$8、青瓜$8、鰻魚$8、鐵火$12(即係吞拿魚),手卷嘅份量相對比較細件,餡料也比較少,不過大部份賣嗰$8、$12,都唔好預堆滿晒餡料啩。手卷本身質素都唔錯,因為紫菜脆身,一咬就開,最怕腍晒嘅紫菜,仲要用哩包手卷,好似食柴皮咬都咬唔開;此外,飯粒同樣鬆軟,當然,多啲餡食落口感更豐富啦。
壽司卷
餐牌無寫有壽司卷賣,全部晌迴轉帶出品,我哋揀咗三款反卷哩試試,包括加州卷(蟹柳雞青瓜蟹籽反卷)、加州卷黃色蟹籽版(材料一樣但用金色蟹籽做反卷)同炸雞青瓜芝麻反卷。依度有好多唔同色嘅蟹籽,總廚話佢哋一般存有6隻色嘅蟹籽,主要做壽司或壽司卷,令賣相變化多咗好睇咗。三款壽司卷中,前兩者比較大路,加州卷常見,另一款只係用咗另一隻色嘅蟹籽,最得我歡心係炸雞青瓜芝麻反卷,我唔知佢有無獨有名稱,只好咁樣叫住先,炸雞唔油膩而惹味,青瓜爽脆又令炸雞唔覺肥,以芝麻代替蟹籽,多份麻香,師傅仔仲要刻意將反卷切到唔同高矮,造型更立體,唔似傳統壽司卷咁死板呆滯!師傅大可考慮下次用埋黑芝麻,突出黑白色感。
創作壽司
本來大家都食到飽飽,但見到有個創作壽司咁棧鬼,又咁啱表姪女就快生日,所以都揀咗依個層層疊迷你生日蛋糕壽司,用黑碟裝屬最貴嘅壽司$35。一層壽司飯加一層蟹籽,共4層,用4隻唔同色嘅蟹籽(橙、黑、黃、綠)隔住,面面再放上吞拿魚同三文魚,加多少少大粒魚籽,賣相真係好搶眼,幾特別,當然味道都同食一般壽司無太大驚喜,不過在乎慶祝吓小妹妹生日。仲有多款創作壽司晌迴轉帶出哩,食就無食,不過影低幾款,都係自己少見嘅!
臨尾又同阿經理Wong Sir搭訕咗幾句,佢見啱傾啱講,本應我哋起錨走人,都被佢叫住,原來佢私人醒,請我哋試咗個魚皮漬物,又係餐牌無,總廚旭哥癮起嘅傑作,個樣有啲似灼魚皮,不過就大概係用咗日本醬油、味醂去煮。又真係幾好食,塊魚皮少少厚身,但咬落好爽,又帶少少煙韌,絕對無腥味,幾掂嘅冷盤小食,唔知標價會係幾錢?仲有,可能都開咗唔太耐,有啲侍應好似生手咗啲。
|
|
|
唯一麵家
|
標題 : 唔係唯一 |
地址 : 尖沙咀厚福街10號地下 |
地區 : 尖沙咀 |
|
現時分數:
|
日期 : 2010-10-23 12:06:34
唯一好多時係我同太太晌尖沙咀平靚正嘅飯堂選擇,老實講,佢唔係我唯一嘅選擇,因為地方唔好坐之餘,尤其啲二人卡位好細張枱,另外成日有種好似被人催埋單嘅感覺,仲有啲服務應真麻麻;之不過食物質素有保證,價錢又合理,否則一早就唔再幫襯啦!是日加埋舅仔三個人,所以叫多少少嘢一齊食。
餈飯
唔好睇佢細細舊,好錘手,如假包換嘅「真材實料」。「真材」:軟軟糯糯嘅糯米飯,包住有榨菜、油炸鬼、肉鬆做嘅餡,長條形嘅餈飯中間切開,望落真係差唔多餡多過飯;「實料」,就因為整舊餈飯壓到實一實,餡料同糯米飯緊扣一起,食落有種實在感。榨菜嘅鹹味就係成舊餈飯嘅調味劑,唔使再花巧,飽肚好食!
酸辣湯
一大碗,夠兩至三個人分,材料十足,有豆腐、木耳絲、竹筍絲、冬落絲、素肉絲、蛋花,至緊要做到夠酸夠辣,刺激醒胃,咁至係酸辣湯架嘛,而且稀杰度啱啱好,稀少少都OK,最怕啲湯羹太糊,等同灌膠水。
雲吞麵、水餃麵
個樣簡直孖生兄弟,哩到都分唔到邊碗係雲吞麵,邊碗係水餃麵,因為皮係用麵粉自家手搓嘅上海雲吞皮,較厚身,唔係講皮薄,唔會睇到內餡,食質感,食過先知,同廣東麵檔嘅雲吞皮係兩樣嘢,無得比較嘅。份量勝在大粒餡多,味道就一般啦,而麵質因係賣上海麵關係,較粗身少少帶柔韌,一把雪菜跟麵上,成碗一個人食都幾飽肚。
牛肉餡餅
都可以話至愛,因為餡餅以生煎整成,底面香脆,如果個麵粉皮能再做得薄多少少,脆口感仲好仲強。調好味嘅牛肉加上大量蔥粒做餡,肉汁充沛,蔥粒令個餡餅嘅味道唔會太「寡」,同樣,餡料十足絕無呃秤,好食兼抵食!
|
|
|
金泰河 Patong Thai |
標題 : 泰式扎肉炒河粉三宗罪 |
地址 : 九龍塘達之路80號又一城L2層25號舖 |
地區 : 九龍塘 |
|
現時分數:
|
日期 : 2010-10-18 14:56:36
晌又一城,下午茶時段,無諗過要食乜,只為填飽個肚,想食嘢又平又快手食完就即走,過咗頂層嘅food court,亦好隨意咁揀咗金泰河,叫做食泰式嘢,有下午茶餐供應,共4款:
泰式扎肉炒河粉 $18
泰式魚蛋或牛丸湯河粉 $18
綠咖喱雞湯河粉 $20
紅咖喱牛肉湯河粉 $20
送埋咖啡或茶(轉泰式冰飲加$9)
叫咗泰式扎肉炒河粉同紅咖喱牛肉湯河粉,加杯奶茶同檸水!本應咁嘅價錢都唔會期望乜嘢,仲要晌又一城添,但個炒河粉實在行貨到極,相反個紅咖喱又意外地OK喎。
泰式扎肉炒河粉
罪證1:趕時間首選,超快,你俾「飛仔」佢,佢即係做到碟泰式扎肉炒河粉俾你,無他嘅,河粉一早炒好一大盆,睇住佢晌個櫃位後面夾上哩,所以唔夠熱,僅僅仲叫有丁點暖。
罪證2:附加扎肉尋寶遊戲,因為大盆炒嘅關係,扎肉份量可能多,可能少,睇吓夾俾你嗰炷河粉嘅彩數,小弟差啲中空寶呀!
罪證3:炒得求期,啲河粉好多黐埋一齊,一舊舊,所以唔上色。除咗多咗少少蛋碎,都唔係好感覺到係泰式,似港式乾牛河多啲。
紅咖喱牛肉湯河粉
依個等咗10分鐘,雖然啲紅咖喱牛肉一定係煮定架啦,但至少個湯河粉都係叫先煮啦,都無可能煮定一碗碗等客叫,所以,食起上哩熱騰騰,感覺好好多。再者,個紅咖喱又幾香幾醒胃,唔係得個樣,牛肉腍滑份量又十足,賣$20跟埋餐飲真係好過食隔離嘅麥記架!真係依個湯河粉令我俾個OK佢架咋,如果唔係俾硬好難食佢啦,所以,揀湯河粉穩陣,揀炒河粉死硬。 |
|
|
米桶越南餐廳 Rice Pot Vietnamese Restaurant |
標題 : 越南回憶.生日飯 |
地址 : 長沙灣元洲街162-168號天悅廣場地下A5號舖 |
地區 : 長沙灣 |
|
現時分數:
|
日期 : 2010-10-16 10:39:08
一年一度細妹生日飯,就番細佬妹,所以過返哩深水埗搵食,今次唔揀中菜,揀咗米桶改試越南嘢,因為佢哋唔似我,少出街食,亦少周圍試嘢食。
是晚係中秋前嘅星期日,好多人會提前做節,路經好多中菜館都好爆。事前訂咗枱,7:00pm準時到,但就嚇咗我一跳,唔係人多到無泡,相反係人少到你唔信,入門口右手邊係卡位,大概有5排左右,4枱有人坐,最尾第5枱就安排咗俾我哋;左手邊係可加可減嘅2、4、6枱,大概有40、50個位,全部都吉嘅,雖然啲人多數揀酒樓食飯做節,但依刻始終係飯市,都無乜理由咁空了了架。隨後嗰一個鐘都陸續有客,最終都有8乘幾滿,真係以為佢差得咁緊要,恐怕都同做節有關吧!
話說回頭,我又幾鍾意佢啲裝修喎,應該叫順眼囉,一室青青綠綠,感覺光潔清爽,兩邊牆又鑲嵌咗好多越南景物嘅畫,有山水、有人物,因為舊年自由行去過一次河內同下龍灣,所以對牆上嘅景緻有份親身感,令我同太太又講番去越南嘅事物,想番起好多第一次嘅體驗,雖然越南幾落後,但當地人一般都好友善。咁晌米桶,啲侍應都好友善有禮,大多數都係後生仔女,做嘢都幾勤快。
小拼盤 $48
都係常見嘅越式小食,有越南絲網春卷、越南蒸粉包、蝦片牛肉、扎肉、炸章魚餅,不過炸章魚餅自己就少見啲,當然有蝦餅就仲正啦,可能個碟大大,睇落份量唔算多。越南蒸粉包同個蝦片牛肉比較出色,蒸粉包外皮好薄有米香,餡料又多,包到四四方方,賣相幾討好;而蝦片牛肉,就大塊蝦片之上放咗撮檬粉,再加啲炸牛肉碎,撒多少少蔥粒晌面,味道同口感都變得唔單調喇!
蒜蓉牛油雞翼 $10
依個招牌菜,又係做緊優惠,堂食三個人起,就可以用 $10換一客三隻雞翼,雞翼係雞全翼,認真超抵食,直頭成本價傾銷。其實個雞翼話難唔難,話易唔易整,雞翼醃好上粉炸至金黃,瀝乾油回鑊加牛油、蒜茸中火兜勻搞掂,牛油易燶大火就出事,所以$10三隻蝕賣價。味道唔錯,有牛油香,但蒜茸味覺得唔夠,可以再重手啲。外皮香脆,證明快炸快炒,如果唔係好易腍番晒。
火車頭湯河粉 $42
真係唔同鋪做嘅火車頭都唔同,米桶嘅火車頭湯河粉就似乎簡單啲,餸料只係得生牛肉同黑椒牛丸,份量亦唔多,另附送香葉、芽菜、青檸、辣椒做佐料;湯色呈淡啡色,帶有肉香;而河粉同廣式麵檔食嘅差唔多,但賣成$42一碗就唔係咁抵食!反而分別叫兩碗越南湯河仲抵,因為晚市優惠每碗$26,好幾款湯河仲係雙拼添,例如:生熟牛肉、牛丸栢葉、扎肉雞絲,比凈叫一個火車頭多十蚊雞之嘛!
咖喱牛腩煲跟薄餅 $65.追加蒜茸包 $18
咖喱煲系列都有好多選擇,雞牛羊,仲有牛尾、班腩,可配白飯、薄餅 、蒜茸包。一個咖喱牛腩煲都唔少嘢,牛腩多,咖喱汁就仲多,所以食完薄餅之後,就追加一客蒜茸包(5件),唔好嘥啲咖喱汁,反正食得落。牛腩炆得好腍好鬆軟,仲墊咗啲芽菜伴住哩食,咖喱汁香得哩唔算辣,椰奶味稍重,又唔及印度咖喱嗰類有多種香料味,但都算唔錯。
馬拉盞炒通菜 $38
鍾意蝦醬嘅鹹香惹味,順理成章就揀咗馬拉盞炒通菜,馬拉盞可以話係東南亞人常用嘅蝦醬,名稱有別,實質大同小異,都係小蝦用粗鹽醃,再曬再發酵細磨而成嘅醬。炒通菜確實好夾,可能去親大排當好多時都會叫蝦醬通菜牛,食開有少少慣性。
紅豆冰、青檸梳打、大樹菠蘿冰 $9
晚市優惠,好多特飲都係$9,所以我哋都叫咗幾杯哩飲吓。細佬嘅紅豆冰唔係好OK,佢話啲豆未腍透;細妹嘅青檸梳打OK嘅,有汽梳打水加兩片青檸,感覺話似飲檸七;我嘅大樹菠蘿冰色澤幾搶眼,石榴糖水加大樹菠蘿,不過,都知係罐頭貨,所以質感差少少,都叫做還可以。仲有十幾款特飲,好似三色冰、越南青檸茶,不過如果想試越南嘅滴餾咖啡,就要$25喇!
4個人又飲又食,試咗唔少嘢,加埋一,三百蚊都唔使,質量都OK,況且環境、招呼又唔錯,食得過!仲有好多特價嘢未試,好似單張所介紹嘅「家鄉魚湯系列,採用越式獨特秘製嘅香濃湯底」,遲吓可以再哩。 |
|
|
Mezz Floor |
標題 : 首推下午茶自助餐 |
地址 : 灣仔港灣道4號灣景國際酒店閣樓 |
地區 : 灣仔 |
|
現時分數:
|
日期 : 2010-10-13 18:54:28
灣仔嘅灣景國際酒店,屬中華基督教青年會(the Chinese YMCA of HK),但原來佢同尖沙咀文化中心對面嘅香港基督教青年會(the YMCA of HK)又唔同喎,唔好見YMCA就以為同一個機構,雖然同屬一個母會,但各有各做,所以前者簡稱叫中青,後者就叫港青,除咗個名唔同之外,佢哋個標誌都唔同,大家不妨留意吓(提示:顏色方面唔同)。
灣景國際酒店嘅灣景廳,一向有做自助午餐同晚餐,收費意向係中下價錢,久唔久晌報紙見佢哋賣廣告,一個大人二舊水唔使(自助晚餐),好抵食吓,不過,睇番食評都知,質素只係一般般,如果係講食好嘢嘅人,點平依度都唔啱你;相反,想試吓自助餐,要求又唔多,仲想慳啲,依度都算係一個選擇。最近佢晌閣樓嗰層Mezz Floor,開闢咗條新戰線,原本Mezz Floor算係提供午餐、輕食、或者Happy Hour嘅輕鬆聚腳點,俾人hea吓嘅地方,最近晌八月開始就試搞埋「假日下午茶自助餐」(星期六、日、公眾假期,3:15pm – 5:30pm),定價$98位,以目前大部分下午茶自助餐計,以咁嘅價真係超抵,但係咪超值,咁就要睇有咩好食!事緣8月初從一個飲食網站知道佢首推下午茶自助餐,並且推出限定優惠,經該飲食網站訂位買一送一之餘,仲係實價$98兩位,無加一,平均一個人唔使$50,飲杯咖啡食件餅都差唔多啦,所以二話不說即訂位,都要排到8月尾個星期六先有位。
未去過,唔知咩環境,所以早少少到,侍應亦安排入座,一到3:15pm就提示大家可以出去攞嘢食。雖然間餐廳唔大,靠牆一邊用咗擺食物,粗略估計大概放咗50-60個位左右,所以又唔算好逼,裝修簡單,啡白配襯,無景附送,係招呼方便特別落力有禮。擺食物嘅長枱一眼望晒,老實講,選擇唔算多。
沙律吧
配料只有沙律菜、青瓜片、甘筍絲、蕃茄,而醬汁得兩款:千島汁同油醋汁,所以以量計,算得係基本以下,若以質素計,好彩沙律菜新鮮夠凍食落爽脆,其他就一般一般。佢仲有西瓜同哈蜜瓜供應,所以,將個沙律加啲生果就感覺豐富啲,否則,沙律一環就變得只係應酬吓食客而矣!
壽司、冷麵
壽司,睇落已經覺得唔係好掂,啲飯望落係機啤出哩,四四正正起晒角,得蛋同蟹柳,仲要用條紫菜捲住佢,件件好似倒模嘅一模一樣。仲有壽司卷同反卷,同樣望落覺得質素麻麻,索性放棄無試!反而,蕎麥冷麵有啲驚喜,幾好食。
精選三文治
一共有三款:牛油火腿牛角包、酸青瓜鹹牛肉法包、芝士辣粉法包,全部做得的的骰骰細細件,尤以酸青瓜鹹牛肉法包做得比較出色,全因酸青瓜搭鹹牛肉哩個好配合;當然芝士辣粉法包都幾得意,朕朕芝士味之下有啲啲辣味,感覺幾有趣。
小食、飯麵
同樣,選擇唔多,包括豉油雞中翼、茄汁香腸、燒賣、碗仔翅、生菜魚肉、炒飯、即煮雲吞生麵(或米粉),全部都稱得上係普通嘢,不過豉油雞中翼做得好濃好入味,加碗魚肉碗仔翅,因見個炒飯普通得好緊要,所以搵師傅整碗雲吞麵,雲吞大大粒餡料十足蝦又鮮,麵條都幾爽口。可能因個飯唔係好掂,所以都唔少人等整雲吞麵!
精緻甜品
之前食嘅嘢都普普通通,估佢唔到嘅係甜品又有番少少水準喎,而且款式也較多。前前後後出咗有10款嘢,另外仲有即整班戟同杯裝雪糕添。小弟覺我好食嘅計有吉士泡夫、紅莓芝士餅、芒果芝士餅、三重奏朱古力蛋糕、藍莓慕絲蛋糕、朱古力慕絲蛋糕,尤其個吉士泡夫同三重奏朱古力蛋糕,前者吉士打得幼滑有蛋香,泡夫焗得夠脆;後者底層朱古力蛋糕鬆軟,中層朱古力慕絲幼滑,面層黑朱古力漿味道濃郁。雪糕係Haagen-Dazs品牌,不過只得雲喱拿一隻味,未能盡興,我只食咗一杯,就係加落個即做班戟度一齊食,一凍一熱。甜品都比較受歡迎,尤其個雪糕,可能啲人想回本,唯有盡情食過夠本啦!哈哈!
茶啡自助,無限量添飲。因為地方所限,可放食物嘅種類唔多,但係,補充就做我好快,師傅成日出出入入,未清晒就添加,可能佢哋都知道自己嘅款式較少。不過,我又唔明,既然係咁,可以係補充時轉吓款,咁客人就覺得有唔少嘢食,但成個晏晝,都只係補充番原有嘅款式,無新嘢加過。故此,好似我哋早前買一送一兼實價唔加一,真係抵食又超值啦!但如果以$98依個價位,只係食以上嘅嘢,感覺有啲貴,始終大部份都只係普通嘢!唯一係依家做緊三送一,即係四個人去食,俾三個人錢,拉勻平均$80左右;或者個別信用卡簽帳,就$88位,仲免加一,都勉強可以考慮吓! |
|
|
喜。乳酪 Hey Yo!! |
標題 : 麵後甜品幾滿意 |
地址 : 荃灣大壩街4-30號荃灣廣場地下131號舖 |
地區 : 荃灣 |
|
現時分數:
|
日期 : 2010-10-09 18:11:11
晌路德圍食完麵棧,打算行去荃灣西站搭西鐵返美孚,順路經過荃灣廣場,醒起早前用信用卡積分換咗啲PPG雪糕劵,梗係趁機用埋去啦,唔係嘅話擺吓擺吓又過期!
雪糕劵只可換120ml意大利低脂雪糕一杯,服務員妹妹仔話加$5可轉華夫筒,而華夫筒又係新鮮做,咁就幾大都轉啦!我要焦糖咖啡,老婆要紅紅綠綠(綠茶雪糕夾紅豆粒),兩個華夫筒,唔該!
伯伯加奴專賣Gelato意大利雪糕,官方網頁話用新鮮牛奶製造,脂肪含量只有6%-11%,屬低脂、低卡路里;而空氣含量又極低25%-30%,因此口感變得特別幼滑、香濃。係唔係低脂、低卡路里就食唔出嘅,不過,幼滑、香濃我就要俾個「讚」喇,我嘅焦糖咖啡真係一流,因為本身有時飲咖啡都鍾意揀焦糖咖啡,所以口味一定啱晒自己,雪糕嘅咖啡味好濃,又滲出焦糖獨有嘅蔗甜味,同埋真係好軟滑,無吹水;老婆嘅紅豆粒綠茶雪糕 ,都好掂,綠茶味同樣咁濃咁出,食落啲紅豆都幾大粒,而且好香紅豆味,唔知會唔會係十勝紅豆,無細問詳細,不過覺得係靚料。妹妹仔裝得個雪糕大大球,兩個都係,冚過晒個華夫筒,幾足秤,而個華夫筒又確係幾脆,仲插住兩條朱古力蛋卷,依個麵後甜品幾滿意!下次再試吓佢其他甜品、蛋糕嘅手勢先! |
|
|
麵棧
|
標題 : 再棧過 |
地址 : 荃灣路德圍12號 |
地區 : 荃灣 |
|
現時分數:
|
日期 : 2010-10-09 14:45:44
隔咗段時間,又哩再戰麵棧。始終多晌荃灣區出沒,去到路德圍嘅,都係得個幾檔心水,麵棧係其中之一,更加係老婆至愛,問佢點解,佢話無解!其實成三十蚊食碗麵,感覺上真係唔平,幸好,無論麵條同餸料都有一定質素,之不過,講食麵,雖則係心水,晌個區佢又未到係我首選!
蜜味醉雞腿麵 $28
以蜜味為主,甜得好似食豉油雞咁,隱約帶點酒醉香,鍾意食濃味嘅人啱晒;大大隻雞脾斬件另碟上。而麵條配有雪菜、紹菜,跟清雞湯,一樣係咁大碗,麵條仍然保持水準,入口煙韌有咬口,果然維持山東麵本色,不愧係店主手打製成,誠意表現!
蕃茄牛肉麵 $28
係咪應該叫佢做撈麵準確啲呢?因為蕃茄牛肉淋晌麵條上,而清湯用碗仔盛上。蕃茄牛肉好似阿媽煮家常菜個種蕃茄牛肉咁,牛肉煎一煎同蕃茄蓉同煮,蕃茄味幾鮮濃,感覺覺得未去到勝香園或星座冰室個種程度。不過,因為太似住家餸,平時自己晌屋企都有煮依味菜,所以反而無特別、又無驚喜!至於麵條以蕃茄汁哩撈勻食,都OK。
生煎各式餃子 $20
一客有6隻,包括韮菜、蘿蔔、芹菜3款餃子各兩隻,皮都幾薄幾通透,且飽滿非常,所以都見到啲餡料;菜肉餡雖然稱唔上會爆汁,但鬆軟汁多,無話又乾又實;餃子底煎得幾香脆,但係今趟食就略嫌油咗啲,仍然唔錯。
裝修簡樸,街坊格局,食完就走,永無齋坐,所以環境點樣無所謂,企企理理就夠。
|
|
|
麵留香
|
標題 : 為食魚片頭 |
地址 : 太子花園街215號地下 |
地區 : 太子 |
|
現時分數:
|
日期 : 2010-10-07 18:25:16
依段花園街,搵食話咁易,因為短短50米左右一截嘅街仔,數埋十幾間食店,平貴、中西日、麵店、茶餐廳乜都有,實在多選擇,最後揀上麵留香都係為咗食佢嘅魚片頭。粉麵套餐,款款$24,任揀一款粉麵,配油菜或茶啡,我哋一行三個人坐低都唔使睇餐牌喇,三個都要魚片頭,係諗吓食粉定食麵啫!再加多個炸魚皮同腐乳通菜。
小弟揀食魚片頭河,我諗唔使講乜嘢係魚片頭,依家應該好多人都知係乜嘢。一碗有4粒魚片頭,大大粒,魚肉打得爽彈且魚味濃,不過望落仲係比較白凈,咬落就認為佢炸得未夠金香,食魚片頭都係想食佢層外皮,所以依次未能盡興。而河粉屬幼身類,食落好滑溜。湯底唔算好濃味,但呷起哩清甜唔錯,問阿姐,佢話湯底用豬骨同魚哩熬!幾鍾意個茶杯,印咗捷榮個嘜頭,平時間常都有沖捷榮啲三合一咖啡,但今趟杯奶茶,好香茶味,可惜唔算好滑!
炸魚皮,一碟都有幾多,載到滿,我就鍾意就咁食,咬落「咯咯脆」,新鮮嘅表現,否則擺咗成日仲唔過晒氣腍晒咩,而且又無「油膉」味;有啲人就會浸落啲清湯度,話怕熱氣浸一浸清湯心理上好過啲,但就無晒炸嘢嗰種脆口感。老實講,個人覺得炸魚皮其實無乜味道,但又真係幾鍾意食。 |
|
|
上海飯店
|
標題 : 點都得,但唔炒得 |
地址 : 美孚美孚新村3期百老匯街45號平台151C舖 |
地區 : 美孚 |
|
現時分數:
|
日期 : 2010-10-06 18:20:18
有親友哩港玩,佢哋食慣中餐,所以就揀咗上海飯店,始終上海菜都有啲特色,尤其上海點心!所以,雖然係食晚飯,但真係叫點心多過小菜小炒。
先講點心,真係幾得:
小籠包 $24 - 通常一客4個,但佢就一客有5個,我哋又5個人,啱啱好夠分唔使愁。小籠包皮薄,肥豬肉唔多,但餡肉依然打得鬆化且汁多,調味又夠,所以,大家都讚夠水準。再點少少醋,肉味就更加覺得鮮香!
生煎包 $22 - 不過一客4件,舅仔自我犧牲,無食!漲卜卜包身軟熟唔黐牙,咬開真係感到新鮮熱辣,而且包底煎得香脆,肉餡同樣鬆化多汁,唔乾唔嚡。
素菜蒸餃 $24 - 又係一客5個,4款點心以依個蒸餃較為普通,雖則皮薄透到裡面嘅素菜餡,餡料以白菜為主,兼且琢得幼細,但稍為覺得味道有點單調,要點啲醬油或醋先至好食。
鮮肉窩貼 $22 - 得4件,輪到我犧牲!以上幾款都有水準,窩貼都唔失禮,雖然無食,但其他人都話好,佢哋都覺得窩貼煎得香口,肉餡確係新鮮有肉鮮味。
炒嘢方面,認真唔得:
銀芽鱔糊 $70 - 味道已經帶出上海菜嘅濃油赤醬嘅效果,銀芽炒得算OK,熱騰騰但無晒爽脆口感;鱔糊唔算肥美,不過就炒得幾夠滑身,可惜份量真係少得可憐,除咗個鱔糊質素較對辦少少之外,其他幾樣都唔係咁好!
雜菌湯麵 $29 - 一碗上海清湯麵,加一碟炒雜菌,麵比較腍,雜菌獻汁太多,中規中矩。
上海炒年糕 $40 - 樣又麻麻,味道又麻麻,年糕稍為有啲硬而唔係煙韌,配料亦好似好求其咁,濕濕碎碎,同樣,份量都係偏細。
椒絲腐乳通菜 $40 - 腐乳味就有喇,係辣椒味近乎零,令人覺得馬虎咗,幸好通菜鮮嫩唔老,唔係就死得。
不過有個場景好搞嘢,肥肥哋嘅老細,企晌收銀位附近,周時左望右望,查實係晌度QC緊,一見啲伙計出菜有問題就叫拎返入廚房做過,成晚都見過好多次係咁。我哋碟通菜都有被佢打回頭,話點解咁細碟,不過,轉頭炒出哩個碟同之前嘅又差唔多份量,其實原先個碟我一眼望過去都唔算少,所以,你話幾搞嘢丫!服務招呼都幾好,係環境有少少逼夾。上海飯店算係做街坊生意多,見到好多客都會同老細打招呼,吹兩句,區外客較少,而且,星期一至五全日唔收加一,晌六、日、假期晚市先至收加一,茶位都係$2個,擺明唔係靠依啲陰濕數搵錢,中式食肆都少有。整體價錢合理,係覺得個銀芽鱔糊好唔抵,碟仔細細得個幾炷仔!
|
|
|
川粵米線大王
|
標題 : 追思會前速食 |
地址 : 紅磡機利士南路21號地下 |
地區 : 紅磡 |
|
現時分數:
|
日期 : 2010-10-05 10:10:05
甚少留下足跡晌紅磡,過親哩都係去大酒店兜個轉!今晚,雨大大,要出席朋友媽咪嘅追思會,開始時間晌8:00pm,所以約好個老死一齊食完先去,老死介紹去川粵,原因有二:有啲人氣、夠晒就腳!不過自己有啲搞錯,「盲蹤蹤」去咗舊鋪,諗住會係哩間,原來老死心想嘅係「新店」,好彩兩者都係隔條街啫,當然「新店」仲近大酒店,就係惠康隔離,行過去都唔使5分鐘,絕對唔怕遲到!
因為晌舊鋪過哩,見到個邊人山人海,仲有人等緊位。相反,新鋪都人多,但就未至於人頭湧湧,都係七乘幾滿,而環境、裝修都比舊店好,大家都係同一個老細,出品應該同源,真係唔知點解食客人數差一截,唔通真係新不如舊,定抑或啲人食開有感情?我就無食過舊鋪,所以比較唔到,有機會走過去試吓,睇吓係真唔係真。
為求快靚正,點咗個肉碎豬腩米線$24,加多$6要杯凍奶茶。例牌大大碗米線,豬腩肉亦都唔少,因為唔好辣,揀咗酸辣,所以辣度溫和,唔使靠杯凍奶茶救火,志在消消暑氣,湯底帶少少酸味,令人感覺開胃啲,幾啱我胃口。豬腩肉唔算肥,都算炆得入味,肉質雖未志咬落鬆化,但唔韌唔嚡我OK架喇!
老死揀咗口水雞米線$26,口水雞同米線係分開上,雞件浸在辣油上,比起將口水雞同米線放在一齊視覺好好多。為咗試吓個口水雞嘅味道,我都黐咗兩舊哩食,唔好見佢啲「辣油」泛光,查實都唔係點辣,帶點點麻,絕對唔使搵凍飲哩救火,我覺得比溫和辣少少,但啲雞肉就好嫩喇。故此,我都覺得個口水雞米線幾唔錯喎!飲埋嘢,都係三十鬆啲,好過晌火車站食美心啦,晌個邊食多算仲貴! |
|
|
鳴門魚市場居酒屋 Naruto Uo Ichiba Izakaya |
標題 : 秋刀之顛 |
地址 : 荃灣楊屋道1號荃新天地一期UG37號舖 |
地區 : 荃灣 |
|
現時分數:
|
日期 : 2010-09-30 17:33:35
食嘢更係揀食材最好狀態啦,不時不食丫嘛,依趟晌鳴門出席咗個秋刀全魚宴試食會,不單只食到好嘢,仲有學到好多嘢,因為負責人蔡生同大廚明哥不時走過哩教我哋嘢,點睇好唔好食,煮法有咩特別……。秋刀魚盛產晌太平洋北部,其實一年四季都有,不過佢本身肉質較粗糙、幼骨又多、腥味較重,但一去到每年9月到11月盛夏至初秋依段時間,為準備迎接冬季來臨,需要儲存大量養分晌體內,就係秋刀肉質最肥美嘅當造期,魚身變得油脂豐厚,肉質軟滑,鮮甜而不腥,大自然就係咁神奇!題外話,因為魚肚位一片銀光,身型修長得似把利刀,而且只有秋季最正,所以叫佢做秋刀!上網睇番資料,原來秋刀營養價值幾高,含豐富蛋白質,容易消化及被人體吸收,仲有含大量不飽和脂肪酸,甚麼DHA及EPA我都唔多識嘅東東,話有效預防心臟病及腦血管等疾病,聽落總之有益就OK啦!
師傅話一般秋刀魚料理多數都係用炭燒或蒲燒嘅方式,然後配上白飯和味噌湯哩食。但今次搞得秋刀全魚宴,點可以凈係得個燒字,用咗唔同方法哩炮製,有啲皆屬驚喜菜式!仲有,有啲菜式係特製,專為今晚而設,連餐牌都無,聽到都好想快啲有得食。未食前,負責人蔡生仲整多一個驚喜俾我哋,就係拎出自家釀製梅酒共諸同好,大家即時鼓掌,咁嘅安排,點唔叫大家開懷!
自家釀製梅酒
師傅嘅配方係1斤鮮梅(唔晒話一定靚到要用和歌山紀州梅咁緊要,最重要新鮮唔太差已足夠)、1斤燒灼(酒精濃度隨個人喜好)、1斤黃冰糖,加埋晒浸製最少5個月!色澤金黃,清澈透光,加啲冰塊,飲落幾順喉,酒精度唔高,帶有酸梅香,未食嘢前,大家舉杯淺嚐,真係一種享受。
火焰秋刀魚水菜黑酢沙律
第一道菜點都要開開大家個胃,依個沙律好醒胃,材料有火灸過嘅秋刀魚、日本水菜、車厘茄、魚子,並以黑酢醋為醬汁,食落酸咪咪,醬汁撈得夠「勻巡」,保證啖啖沙律菜有醋汁味,而火灸秋刀魚,帶有少少焦香味,但肉質好嫩滑!
秋刀魚南蠻漬
南蠻漬係指一個做法,通常指用醋浸醃食物。依道菜嘅做法,係將秋刀魚切件後就先炸後浸,伴上蔥絲同醃過嘅蘿蔔同甘筍絲,因為已經被醋浸透,少咗份油膩感,夾著少許伴菜食,味道多咗啲層次,不過如果你係唔鍾意食個啲浸腍晒外皮嘅炸嘢,依個南蠻漬你可能覺得唔OK!
秋刀魚刺身、季節刺身盛盒
學大廚話齋,新鮮捕獲嘅秋刀魚,其實最好食法係做成刺身同壽司,配上少許薑蓉入口美極。先試一個刺身盛盒,分別有主角秋刀、三文、油甘、鰹魚、牡丹蝦。食刺身真係最能夠體驗海產個種鮮味,因為夠晒新鮮,5樣刺身都咁正,肉質鮮美濃郁,魚脂豐盈。秋刀一啲都唔腥,好肥美,師傅仲要晌表皮鎅晒花,真係唔止好食,仲賞心悅目添;三文、油甘比較多機會接觸到,但另一款鰹魚係第一次食,相對係魚味最濃嘅刺身;牡丹蝦去走晒蝦身嘅殼,大啖咬落去,簡簡單單嘅鮮蝦味,但帶俾人有種回味無窮嘅感覺!隨盛盒伴上蔥粒,薑蓉同日本芥辣,想刺身搭配邊樣都可以悉隨尊便。
岩鹽燒秋刀魚壽司、貝類壽司盛盒
刺身做得出色,咁壽司又如何。日本秋田小町米做嘅壽司飯,質感方面個人覺得稍為有點黏,但手握嘅效果好好,鬆緊有緻,唔會硬崩崩,而且體積適中,一口一舊得哩唔會塞住晒,非常唔錯。4款壽司包括有;帶子、北寄貝、秋刀同吞拿魚卷,每款都質素甚佳,一口一片自家醃製嘅子薑,清清味蕾,一口一舊壽司,確是味美!
海鹽燒秋刀魚配梅鹽
唔開肚原條鹽燒,做法簡單,亦能帶出魚嘅鮮味。外皮焦香,做到外脆肉嫩,嗒到點點鹽香,而且魚肉夾雜住油脂,入口同樣滋味,雖然食落骨多,但都係軟骨,還是安全。如果唔怕再鹹少少,點一點啲梅子鹽先食,多咗份酸梅味,感覺又唔同咗,食起上哩清新啲。師傅話內臟都可以食,但味道會苦澀,所以最好滴幾滴檸檬汁,效果會好唔同,緩和咗朕異味,都OK喎!
天婦羅秋刀魚蕃茄梅子卷
值得俾多一個讚佢嘅秋刀魚菜式,因為製法花心思,配搭出色,賣相又好!先將秋刀起肉,包住車厘茄再醮上粉漿拎去炸,面面加丁點梅子醬,再放條炸麵條做裝飾,咁就搞掂。雖然係天婦羅,一啲油膩感都無,一來炸功了得,炸完嘅秋刀魚卷本身無乜油,二來中間嘅車厘茄同卷面嘅梅子醬所發揮嘅作用。秋刀魚卷好脆口,一咬到中間車厘茄就爆汁,迅間滋潤番個口腔,真係好食!但一客4件,4個食家分,無得「安哥」,心想有點可惜!
秋刀魚土窩飯
唯一大路啲嘅菜式,土窩飯就好似我哋廣東人嘅煲仔飯,不過就唔會見到有飯焦喇!整體個飯都OK,除咗飯粒分明,又無話乾爭爭之外,秋刀嘅魚油多少都滲透入咗啲飯度,增添食味。
牛乳布甸
賣相雖然簡單,只係加咗幾粒珍珠提子,但論質素就一啲都唔簡單。北海道牛乳,牛奶味非常之濃郁,布甸口感幼滑,搯上手布甸震震吓,可見幾滑溜。冰涼嘅牛乳布甸,真係窩心甜品!
食晒咁多道菜,真係好滿足,不過同明哥傾開,有個壞消息,因為今個造期嘅秋刀漁獲唔係咁理想,來貨價較上年貴一截,舊年一條新鮮秋刀零售賣只係五、六十,今年要去到一百鬆啲,所以,除刺身繼續供應外,其他食法就唔做,因為成本問題要賣貴啲,但食客就會覺得唔抵食,所以索性唔做!希望價格回落,大家可以有機一試秋刀嘅唔同食法。
環境方面雖則話居酒屋,和風味裝修唔算好重,但勝在枱凳都比預期寬敞,唯一唔好就係所有凳都無靠背,無腰骨嘅人就最好揀有牆「俟」個一邊哩坐喇,嘻嘻!此外,係晌牆上貼有好多魚類、貝殼類嘅介紹海報,仲有中日文對照嘅食物名稱,當然較為引人聚焦嘅地方就係廚房前嘅魚缸同冰鎮住嘅新鮮日本海魚啦。服務都到位,全晚換咗三次碟,都係適當嘅時候哩換,好似食完沙律、南蠻漬、刺身後換第一次碟,等你跟住食壽司時個碟唔會濕漉漉;再食埋鹽燒秋刀同天婦羅秋刀,就換過隻碟俾你食個土窩飯! |
|
|
Monster Burger |
標題 : 打怪獸 |
地址 : 中環士丹利道 21 號皇后中心1樓3號店 |
地區 : 中環 |
|
現時分數:
|
日期 : 2010-09-28 17:09:11
聞名不如見個面,晌中環做嘢咁多年,睇住佢開但都無幫襯過,一來公司包伙食極少出街食晏,二來收工一係返屋企食住家飯、一係就有飯局。今趟收工有事趕入南丫島,所以就乘機試吓佢嘅一吋手打牛肉漢堡,打包隻怪獸上船食。
果然新鮮即做,製作需時,差啲搞到趕唔到船添!牛肉漢堡套餐,除漢堡外,都好似一般漢堡包店咁,仲包有一客炸薯條(可免費轉沙律)同細汽水(加$3可轉大汽水,有啲後悔無轉大,因為趕船跑到少少氣咳,出晒汗,所以上到船乜都唔好講灌灌可樂先)。炸薯條同汽水真係無乜嘢好講,薯條炸起隔咗成十幾廿分鐘後先食(因為上咗船先食),點好都過晒氣;汽水係可口可樂品牌,唔會晌度買會特別啲啩。所以重點講番個一吋手打牛肉漢堡,包身鬆軟有彈性,唔會一壓就扁,面積睇就唔算好大個,同一般晌麥記見到嘅差唔多呎吋,但就比較高身啲;漢堡扒店方標明以美國靚牛肉手打,講味確係幾濃牛肉味,質感又確幾鬆軟多汁,不過,底面都有啲煎燶,唔知係咪怕中心位唔夠熟而需要煎耐啲,依個就係一吋厚嘅漢堡扒要問對嘅問題;配以獨家醬汁,超大塊蕃茄同生菜,依部份未見咩特別,所謂獨家醬汁,橫睇掂睇都似係沙律醬加咗少少調味。以$45一個漢堡包餐確係唔平,不過,想試吓一個成吋厚嘅漢堡牛扒質感同味道係點,都可以不妨一試! |
|
|
江戶前
|
標題 : 乜都有日式茶餐廳 |
地址 : 荃灣大河道21號1樓 |
地區 : 荃灣 |
|
現時分數:
|
日期 : 2010-09-25 21:05:14
時下好多新開嘅食肆都做得好專門,尤其和食,好似燒鳥店、爐端燒、燒肉店…,總會一眼望埋去就知係打正旗號嘅專門店,俾人覺得夠精、夠專業。相反,另一類就好似江戶前咁,乜鬼都有,套餐又得,散叫又得,打開餐牌圖文並茂差唔多過百款嘢俾你揀,好似午餐定食咁都成三十幾款,平均三、四十蚊,包湯(或壽司)包嘢飲,如果唔係有啲和風裝修,搭啲日文歡迎詞,同去咗茶餐廳無分別。唯一好啲係佢個場比較闊落,卡位都好寬闊,不過唔知點解佢啲凳面係軟墊面,而凳背係木架,唔係咁好「俟」。
揀定食就最實惠,一行4人商量後就決定要3個定食,再加2個小食,因為見佢推介小食人氣5強,都好似幾吸引,就俾俾面,揀其中2個試試,睇吓係咪咁人氣先,還是得個吹字。
鐵板帶子 $36
係小食人氣第2強,而第1強係七味炸雞軟骨,因為太熱氣兼且雞軟骨大多數人唔好,所以踢佢出局。一客有4粒帶子,係原粒連埋裙邊唔係假嘢,粒粒都大大隻,鐵板煎香,唔算好彈牙,但味道唔錯,咬落果然厚肉。
自家制可樂餅 $33
小食人氣第3強,一客只有2件,不過一樣好大件,圖片說明就話係蟹肉加瀨尿蝦肉做,但唔係好食得出有蝦肉味,蟹肉就倒有少許。面頭淋上自家制醬汁,要好細心細心咁嗒,先叫嗒到啲可樂味,實在比較弱,而且件炸餅大大,醬汁就少得丁點。
咖喱牛肉撈拉麵(定食) $38
大圓碟分半,一邊係拉麵,另一邊係咖喱牛肉,等你自己撈。唔好以為依個撈拉麵係港人發明,日本都有撈拉麵,不過都係以湯拉麵為主。言歸正傳,個撈拉麵本身唔算好有特色,只係想一試依度嘅咖喱得唔得,咖喱香中帶微甜,做得都對辦,牛肉夠腍,拉麵爽身帶少少韌勁,撈埋咖喱汁大炷大炷咁食,無牛肉齋食都正喎!
豬軟骨手打烏冬(定食) $31
豬軟骨炆得入味,肉質夠腍,軟骨爽脆,可惜個鹵蛋唔掂,色澤白潺潺之餘,仲要蛋黃硬實,一啲都無糖心效果,烏冬手唔手打小弟就唔係好能夠分得出,不過,質素應該OK,因為食落幾滑溜,唔會有酸味,至少唔似平價一包包嘅全熟烏冬!配上濃香豬骨湯底,如果唔係個鹵蛋,都值我俾個讚佢。
手握壽司 + 餐飲
以上個拉麵、烏冬定食,每款都送2件壽司同一杯餐飲。壽司雖然無得揀,但起碼都唔係俾啲最平嘢你,我哋4件壽司:2件甜蝦加2件油甘魚。江戶前即係指東京灣前,個度海產豐富,在江戶時代就有人將新鮮撈獲嘅魚類用哩做手握壽司,而且江戶前壽司應該係飯較少,每件都握得小巧精緻。但以上個4件壽司,都係用上海鮮做料,但飯糰就稍為大舊咗,都知江戶前係間鋪名,佢都無話自己賣正宗江戶前壽司,好彩飯唔死實,確係手握唔係機啤,甜蝦同油甘魚不過不失啦;餐飲方面揀咗杯薄荷綠茶同荔枝綠茶,前者朋友話個味怪怪,唔係好夾,我飲後者,味道夾啲兼且有啲荔枝肉食吓,雖然都知佢係罐頭貨!
雞肉蛋飯(定食) $34
因為係飯餐定食,所以就唔係加送壽司,而係配麵豉湯同餐飲。大大碗飯,份量超十足,珍珠米煮得幾軟熟,粒粒飽滿,食落唔黐牙;一大塊雞扒放面,再加隻生雞蛋,食完個拉麵同烏冬先哩食個飯,啲蛋白就熟晒,而蛋黃就差唔多去到半生熟狀態,唔太生,半凝咁款,撈均個飯哩食,飯粒添咗蛋香,確係唔同晒,雖然只係普通雞扒蛋飯,食法唔同可以倍添趣味,而雞扒煎得亦香口,幾有肉汁,至少唔嚡先!
整體水準OK嘅,價錢大眾化,而且食物款式夠晒多,所以,假日食晏時間,都過咗1:30pm仲有八乘幾人,足見佢有一定吸引戶,志在薄利多銷。最後,食$20又送$2現金券,好似依餐就送返$18現金券(2個月限期),雖則唔算多錢,但若果一支公哩個下午茶,真係補番少少就可以拍拍「囉柚」走!
|
|
|
牛陣 Gyu Jin |
標題 : 最牛極速雜菜煲 |
地址 : 尖沙咀彌敦道63號 iSQUARE 7樓706號 |
地區 : 尖沙咀 |
|
現時分數:
|
日期 : 2010-09-23 19:28:02
太太與同事哩牛陣試過讚好,佢又想介紹我試吓,卒之搵咗個星期六晏晝拉埋我哩!未食前已知哩間嘢嘅賣點,60分鐘任食,套餐有唔同價錢,取決於揀咩牛哩食,其他配料就任拎任食。未埋位,已定好晒搵食策略:
- 得個60分鐘,當正平時得一個鐘食晏時間咁,發揮香港人乜都要快嘅精神,所以一坐低就已定好要咩套餐,唔嘥時間左度右度。
- 收得咁嘅價錢任食,都無諗住會有咩貴嘢食,所以索性揀個最平套餐$58(包一碟牛肉)。
- 咁短時間仲烚吓烚吓,又要出去拎,擺明唔合經濟效益,所以極速雜菜煲,一堆配料過,滾起即食啦。
我落單時快,侍應上湯底亦快,最平嘅套餐係清湯底,果然好清,就如清水加少少醬油添啲色咁,無乜味,唔係大問題,預咗,反正烚吓烚吓烚完之後,個湯仲濃過淑儀姐嘅濃湯寶,況且都無打算飲個湯,因為有好嘢做甜品。
等緊個湯滾起時,兩公婆輪流出去拎配料,近門口嘅長形火鍋配料枱上,用竹筲箕一款一款咁擺放好各種配料,一共廿幾款,都係大路平價嘢,蔬菜類嘅有:幾種青菜、菇菌、豆腐、豆卜、粟米、芋頭、蘿蔔、南瓜…等;肉類嘅有:魚蛋、貢丸、魚柳、魷魚、香腸…等;粉麵類嘅有:烏冬、拉麵、粉絲,仲有煲牛肉炒飯添;加埋幾款任溝醬料、醬油,簡簡單單嘅一餐火鍋午餐,都算齊全啦。咁加埋HD雪糕做餐後甜品,仲想點先?!配料枱下面放好晒大圓碟,好似平時食自助餐咁,自己埋哩睇,埋哩揀。老實講,雖然個店名、個商標、個裝修有啲和風味道,但食材方面除咗和牛、烏冬、拉麵之外,都係比較港式,如期擺啲香賜,不如放啲獅子狗魚蛋啦,哈哈!
隨後個主打牛肉片都上埋枱,一碟有9片,大片得哩好薄,正式一人份量,肉色鮮紅,一般打鞭爐肥牛質素,俾$58唔會咁癲以為有晒雪花紋嘅和牛啩!所以,無期望就唔會有失望,反正啲肥牛都幾好,灼一灼放入口,肉質都好軟滑。
雖然個電磁爐校到最大火,但放咗小部份蔬菜同肉丸入去,就好似等食杯麵咁,扱好蓋等多陣先有得食!滾起,有得食,我哋兩個食完頭一輪兩大碟配料加兩碟限定牛肉之後,老婆話夠晒皮,我就哩多一碟菜、魚柳加腸,一樣放晒入個煲度雜菜煲,快靚正,食埋依輪都差不多去到近尾聲食雪糕時間。整體哩講,啲蔬菜都幾新鮮,幾清甜,肉類就貢丸同啲魷魚幾好。個炒飯我無試,反而對個拉麵有興趣啲,拉麵獨立包裝,衛生之餘,食落幾有質素,爽口,有麵香。最後加多兩球HD雪糕,不過雪得好硬,好彩食得夠飽,夠氣夠力!咁嘅價,食咗咁多嘢,確係抵食!
|
|
|
三德素食館
|
標題 : 隨緣一試 |
地址 : 彌敦道233號佐敦薈4樓 |
地區 : 佐敦 |
|
現時分數:
|
日期 : 2010-09-20 14:55:34
又隔咗一段日子,係時候約食齋嘅舅母出哩聚一聚。今次搵咗三德哩試一試,雖然前排三德出事見過報,但舅母話佢嘅齋菜都OK,搏佢上次出事係個別例子,今之又即管隨緣一試!
因為舅母食嘢隨緣,乜都無所謂,所以任得小弟發板,打開餐牌眼花撩亂,老實講,食齋我都唔算有咩心得,再者,我都係唔太要求嘅人,所以見到有個套餐餐牌,即刻拎上手睇睇。特價自選套餐,有二($142)、四($278)、六人餐($388),全部都包一個湯、羮或素翅,再晌指定小菜中揀兩個、四個或五個小菜,另外加送糖水,不過送完即止,仲有收番茶芥$6位,小食$12碟同加一。我哋有七個人,所以叫咗個六人餐,再加多一個炒飯,非常夠食!套餐即係套餐,上菜上得非常快,先哩湯,但個湯未滔完,其他餸都陸續咁上晒。
上海酸辣湯 – 真係有酸辣湯嘅神髓喎,除咗用素肉絲代替豬肉絲,當然唔會有雞紅或豬紅啦,其他都係素食材料,所以,同平時晌上海鋪飲嘅感覺差唔多。
五柳仙斑 – 外層炸得酥香,裡面嘅芋頭夠粉夠軟糯,唔會有粒粒,難得炸完唔太油,成條「仙斑」切晒件,點啲五柳酸醬食,外皮加芋泥自然溶係口中,酸醬減低油膩感,雖未稱得上絕配,但絕對做得唔錯。
菜遠羅漢齋豆腐 – 典型大堆頭齋菜,有冬菇、珍珠筍、金針、木耳、白菌片、枝竹…等,加埋豆腐,同菜芯墊底,唔好見佢有打獻汁,其實味道極之清淡,真係好「齋」,但食齋菜就係要有咁嘅心態,欣賞吓蔬菜嘅原味。
欖菜雞蓉四季豆 – 全晚最唔素,而又最惹味嘅一個餸,只因為啲欖菜囉。欖菜味道鹹鹹香香,最適合配淡味食材,四季豆就好似佢嘅襟兄弟咁,通常見啲菜館用欖菜炒就炒四季豆,不過依次唔係搭肉碎,用咗素雞肉粒,同樣香濃好味。
沙嗲獅子球什菜煲 – 沙嗲味道較為單薄,始終係食齋,唔加得五辛(蔥、蒜、洋蔥、韭及興渠),所以都接受嘅,唔可以話吓吓都要同出面其他食肆比,咁樣不如唔好哩依度!獅子球,素肉丸,質感都做得幾似肉,當然無肉味啦,哈哈,加上粉絲、什菜一大煲,都算好食!
鑊仔錦丸鮮竹浸菜苗 – 唔知咩叫做錦丸,又係鑊仔上,所以貪得意叫哩見識吓,唓,啲錦丸同個獅子球一模一樣嘅,味道同口感都一樣,根本就同一樣嘢哩。湯底就好清,烚菜水,無乜味,好彩啲鮮腐竹夠豆味,不過都覺得依個餸都係叫錯架喇。
松子炒飯 – 都有水準,飯粒炒得乾身分明唔太油;配料都多,除松子,仲有豆腐粒、菜度、欖菜碎,但收成$58碟,都係食鋪租。
三德唔好諗住佢係齋菜館會清靜啲,其實佢就好似一般中菜館咁,環境都比較嘈,至於服務都幾勤快,啲阿姐都算幾有禮貌! |
|
|
Harlan's |
標題 : 飲食就是一種體驗 |
地址 : 尖沙咀彌敦道100號 The One 19樓 |
地區 : 尖沙咀 |
|
現時分數:
|
日期 : 2010-09-16 16:44:20
舒適環境、270˚夜景、細心服務、高級食材、精緻賣相、做法多變,就差不多等於我晌Harlan’s嘅體驗!好好彩咁出席咗一個飯局,唔係試食會,算係一個答謝晚宴,有幸一試(體會)晌Harlan’s嘅飲食!
先講環境,踏出升降機門,一室淺啡色系,配合柔和燈光同枱上嘅蠟燭光,而且餐廳本身高樓底,加埋落地大玻璃,空間感強,令人覺得好輕鬆,又唔係個類裝修到好派頭,感覺自在不拘緊!再者,她身處The One嘅19樓,室外空中天庭位擺咗唔少藤梳化椅同高腳枱凳,進餐或飲嘢都得,附送埋270˚璀璨夜景,就算近排比較熱,晌室內食完飯,出哩打個轉都令人心情開朗晒,香港夜景咁靚,世界各地唔係度度都有!
貴為高級食肆,服務自有水準,但都不得不讚一讚。雖然廚師負責煮,但面對住啲食物,侍應都有問必答,唔會口啞啞,基本嘢佢哋都答到。除服務,餐桌禮儀都有跟足,每道菜上枱都必定係先女後男,唔會求其就手就上先,而且,一上就齊齊上,唔會先後差得太耐時間,咁樣大家就可以同時品嚐兼對菜式「評頭品足」一番。其他細心位,如每款熱盤嘅碟都一定暖熱才放上食物,保証每道菜到你面前都熱辣辣,唔好攤凍晒。
四式麵包籃
先上枱嘅係一籃子麵包,全部都係自家焗制,共有四款,展現不同口感,款款造型小巧,再配上牛油同白豆蓉醬,任君揀。要試就梗要試晒四款啦,歐陸小麥包,口感夠實凈而重麥味,覺得配白豆蓉醬幾好食,白豆蓉醬用白豆打蓉再加橄欖油同蒜蓉做成;牛油麵包條,較軟綿並勁重牛油香,齋食已夠晒,唔好搞咁多嘢,因為係四款之中至鍾意,添食再添食,真係想打包添呀;鬆餅麵包、質感有啲介乎鬆餅與麵包之間,所以我先叫佢做鬆餅麵包,都屬重牛油嘅一種,如果有果醬我會配果醬囉;芝麻脆片,好薄好薄,一咬「咔嚓」勁脆,無當佢係麵包,直頭當佢係小食!
Slow Cooked & Dill Marinated Scottish Salmon, Herring Caviar, Garden Greens and Honey Mustard Dressing
第一道前菜,主角係蘇格蘭三文魚,牠一向都係三文魚界嘅資優貨式,大廚刻意用上兩種做法:一款係慢煮三文魚,再配上希靈魚籽,低溫慢煮可令三文魚發揮得最好,因為油脂流失比烤焗少,又唔怕過火使肉質變嚡,咁不如食魚生啦,又唔同喎,魚生係凍嘅,你話啲油脂會點喇?由於係低溫慢煮,三文魚肉只係微微哋暖,咬落好柔嫩,魚油充斥口腔,加上希靈魚籽,有點點鹹鮮,口感過癮,正,但可惜得一件!另一款係用刁草醃製三文魚,帶香草味嘅三文魚同樣好食,香草味濃,不得不將魚嘅魚味同鮮味突顯出哩,當然要條魚有質素先得,否則就突出咗嘅係腥味,因為咁食法算比較常見常食,驚喜自然無咁大。此外,兩款三文魚中間夾著火箭菜做嘅沙律,同埋最底下一抹橙黃色嘅蜜糖芥茉醬,令成道菜個賣相好搶眼,不過,個蜜糖芥茉醬好似效果唔係好突出,裝飾大過提升味道之用。
Grilled Piemonte Pork Sausage, Scramble Egg, Herb Salad, Shaved Truffles
第二道前菜,睇個名整個組合好有趣味,有腸有炒蛋,像早餐,但又加上矜貴嘅松露,好期待總廚嘅魔法想點搞!同樣貫徹著賣相精緻,先前嘅三文魚就一字排開,今趟個肉腸就以塔形出場。最底層係炒蛋,總廚真係施咗魔法咁,睇樣都見個蛋炒得好嫩,表面仲有少少流質,食落果然好滑,好軟熟,但火喉就佩服廚師們拿捏得準繩,因為炒蛋炒得軟滑,不過又夠力承托第二層嘅肉腸,唔會凹晒或塌晒;講到肉腸,Nelson介紹依個豬肉腸係由意大利西北部Piemonte(皮埃蒙特)直接空運過哩,好似甚有來頭咁,不過與其叫肉腸,不如叫漢堡扒,佢真係好似一件厚切嘅漢堡扒,可惜無機會睇一睇佢嘅真身。肉腸本身肉味好濃,又夠肉汁,以烤燒方式哩做,加上少少燶邊位,好香口,係個人覺得鹹咗啲。最面層,係兩片薄松露片,令個菜多咗變化嘅魔法二,切少少夾豬肉腸食又得,夾炒蛋食都得,得咗,多咗朕松露獨有香味,確係幾特別!至於所謂香草沙律,都只係疏落咁散係碟邊嘅點綴!
Hand Crafted Garganelli, Wild Mushrooms, Spinach, Foie Gras and Pecorino Cheese
試咗兩個前菜,跟住上嘅係意粉,晌Harlan’s就算意粉都有心思過人。Garganelli手捲通粉,自己第一次見,外形己見花咗心思,精緻嘅坑紋一眼睇得出,煮出哩個口感啱小弟口味,咬落有種煙韌感,又無話一舊粉咁,而且表面嘅坑紋增加醬汁嘅吸收力,食落更好味,份量雖然細細碟,但夠晒數,因為之後仲有主菜同甜品。而醬汁非常濃郁,野菌同芝士,出哩嘅醬汁自然重味,醬汁還帶著少少煎鵝肝嘅油香,配意粉就非常好;食鵝肝小弟就唔係好有研究,煎得表層香脆微焦,內層滑溜入口即溶已滿足非常,當然我眼前依件鵝肝都達到自己嘅標準啦!
4-Hours Roasted French Chicken Breast, Chicken Roulade, Celeriac Puree, and Pancetta Pepper Sauce
輪到主菜出場,主打雞肉,仲係一雞兩味,又係廚師搞吓花臣之作。四粒鐘慢烤法國雞胸肉,墊底伴上豆蓉,雖然係烤製,除表皮有啲焦香外,比起平時食嘅烤雞,肉質滑好多,而且味道相對較清淡,相信調味亦唔多,確係一種較為健康嘅食法。另一款,做法同前者就兩極化啲,以煎雞卷,配搭由意大利煙肉、黑椒、芹菜所做嘅醬汁,再伴以幾片煎過嘅翠肉瓜墊底,食落味道集濃香於一身,濃郁嘅醬汁,香口嘅雞肉。一淡一濃,就正在挑戰著味蕾嘅接受力!
Dessert Surprise
果然有啲驚喜,第一驚喜係一客有三款甜品,絕對唔係隨意搵件甜品撐場;第二驚喜係三款甜品都好唔同,無論造型同用料;第三驚喜係個別甜品嘅配搭特別。
先試個雪糕,因為怕佢溶。無花果味,煲湯飲就試得多,雪糕都係第一次食,咁就已經有驚喜啦,味道帶清甜,奶味唔算好重,質感幼滑。底部同周邊加咗少少金寶碎粒粒,襯住個雪糕哩食,幾有趣!
順序跟住食個拿破崙,同平時常見嘅拿破崙都幾大分別,平時多數見都係做三層,中間兩層餡,酥皮又比較薄身。但依個有小小破格,上下兩層「厚」酥皮,只得中間一層就係芒果粒加吉士,酥皮雖然厚,但依然鬆化滿牛油香,芒果粒香甜,吉士又打得幼滑,好滿足!
最後至食嘅係個「黑三角」,睇款都估係味道最濃嘅一個,果然,黑朱古力慕絲,朱古力味濃帶點甘苦,而表層加上一薄輕紗嘅境面黑朱古力漿,細膩滑溜,為咗令人唔好覺得件餅太「漏」,驚喜係中間加咗熱情果蓉,初時還以為是香蕉蓉,因為朱古力蛋糕搭香蕉蓉都係常見手法,但熱情果出哩嘅效果一樣唔錯,佢嘅酸中和番朱古力嘅甜,又令兩者嘅味道好突出,正!真係好食!
Graffeo Famous Coffee or Cha
食住甜品,點可以少咗杯咖啡配襯,小弟揀咗Mocha,多少都係因為鍾意朱古力!咖啡味與朱古力味都好平衡,唔會邊大邊細,所以,就算只係食住甜品嘆住杯Mocha,都好享受!
總括成晚餐飯,都好滿意,只係晌VIP房擠擁十多人,感覺有點逼狹,雖然公關小姐好抱歉咁解釋過,本來有另一個大啲嘅VIP房,不過進行緊裝修。老實講,自己都係首次去依類咁高檔次、咁高消費嘅食店,食一餐晚飯昺閒哋都五、六落樓,真係有啲唔捨得,但相信有機會會再哩,因為佢有提供平平哋嘅午餐,賣$168(Pasta course/ Main Course + Dessert + Coffee/Cha),再貴啲嘅有$198同$278,可以作為體驗嘅入門初階版! |
|
|
小樽甜品屋
|
標題 : 貌不驚人石榴露 |
地址 : 荃灣荃興徑2-8號昌泰大樓7A地下 |
地區 : 荃灣 |
|
現時分數:
|
日期 : 2010-09-15 18:13:54
晌金不換食完飯,因為佢甜品選擇唔多,所以我哋過咗荃灣市中心再食過甜品,本打算食松記,見太多人,轉戰小樽甜品屋,以前都食過覺我佢嘅甜品都OK,所以不妨再試!我哋各有所好,結果就分別叫咗7款嘢。
蕃薯雪糕石榴露($20)
我試嘅係雪糕石榴露,雪糕有幾款可以揀,我就要蕃薯味,少食丫嘛。奶黃色嘅石榴露,加一球蕃薯味雪糕,個樣就唔突出架喇,但食落口真係估佢唔到其貌不揚,石榴味咁清又咁重手,好得,加上夠晒凍,確係消暑妙品,再配埋蕃薯味雪糕,好似咬緊舊雪凍嘅蕃薯咁,真係意外哋好食!
熱芒果紫米露($20)
老婆傳統少少,要個熱芒果紫米露,紫米露加咗椰奶,而芒果肉加上芒果汁就另碟上,都係溝埋一齊哩食,芒果肉熟透所以好香甜,不過紫米露就一般般,雖然唔太甜,個人就覺得質感比較糊。
其他係朋友反映嘅意見:
芒果石榴露($22)- 石榴露,朋友A都讚,石榴味清得哩夠濃郁,加片芒果肉同食,幾正!
十勝杯(牌價$24,推廣價$20)- 重點係北海道十勝紅豆,加埋雪糕兩球(任擇兩款)、火龍果、椰果,插多兩條蛋卷。朋友C有啲呻笨,個十勝杯應該叫雜果雪糕杯囉,得個一小撮紅豆,少得可憐,被個「十勝紅豆」氹咗落搭。
木瓜燉鮮奶($17)- 朋友S話抵食,原個夏威夷木瓜做,木瓜肉清甜,挖乾挖凈哩食都有幾多瓜肉,燉鮮奶個部分都OK,幾滑身!
芝麻糊豆腐花($18)- 小妹妹L搞到個豆腐花好樣衰,味道唔知,小妹妹無表態,只係發老脾怨我哋好話佢搞到碗嘢咁醜樣,好似坑渠豆花咁。
芝麻糊加湯圓($21)- 另一個朋友A話芝麻糊幼細夠滑,芝麻味幾香,確係唔錯!
依家嘅甜品鋪都想啲客流快上快落,坐得逼逼夾夾都預咗喇,所以我都未所謂,如果唔係天氣熱又有啲雨,我都揀坐出面露天位,闊落啲,空廣啲!整體味道都幾好,但制作速度就好有問題,最早上枱同最遲上枱嘅甜品竟然相差近15分鐘,我同個朋友食完個石榴露好耐,個芝麻糊加湯圓先最遲上,連個木瓜燉鮮奶都快過個碗芝麻糊,真係唔知係啲黑芝麻未磨好?定抑或買緊糯米粉搓湯圓皮?耐人尋味!
|
|
|
金不換泰國餐廳 Sweet Basil Thai Cuisine |
標題 : 友情廿載金不換 |
地址 : 荃灣大壩街4-30號荃灣廣場B111-113舖 |
地區 : 荃灣 |
|
現時分數:
|
日期 : 2010-09-15 17:31:16
同相識超過廿載嘅兩個家庭,食飯慶祝其中一位阿太生日,廿多年友情話短唔短,話長唔長,以前大家各住不同地區,估唔到搬吓搬吓依家成為同區街坊,回頭一想,人生可能好多嘢都可以用錢買,但深厚情誼就真係金不換!今次揀哩金不換食生日飯,就唔關佢個名事,我就只係借題發揮啫,其實目標地點定咗荃灣廣場,篩選幾個選擇後,大家想食吓泰國嘢,就訂咗金不換喇!
正門入口處擺放咗一大盆浮水鮮花,非常養眼,令人感覺平和,絕對好過一大座神神佛佛。因為食店座落商場地庫之內,可採用半開放式設計,加上高樓底、深啡色系型格裝修、柔和燈光、牆上泰國手工藝畫作,一眼可以睇晒成個餐廳環境,有別九龍城傳統常見嘅泰國餐廳!
主餐牌都幾多選擇,此外,佢仲有個廚師推介小餐牌,裡面有8款推介,我哋都試咗其中2款。
柚子沙律 $65
泰國入口嘅西施柚起粒,加埋魚露同椰汁撈勻整成,面面再灑啲疑似魚乾仔,嗒落其實係炸椰絲。一客柚子沙律都幾大碟,擺得幾高,而西施柚比想像中大粒,多汁但佢本身唔算甜,但加咗魚露、椰汁就變得酸酸甜甜,又有朕椰香,依排日日都咁熱,點柚子沙律作為開胃頭盤,最好不過!如果再雪凍少少,我覺得帶啲冰涼感,仲正!
大拼盤 $138
「大」故然指個拼盤大,另一個意思係啲小食件頭大,其實佢得4款嘢:蝦餅、春卷、魚餅、香葉包雞,都係泰式出名嘅小食,點大法?好似魚餅,有成個手掌咁大(唔計手指部份),而每款有3件,每件都一開二,碟中間配上酸椰菜,再跟兩款醬汁:魚露同泰式甜酸汁。
蝦餅 – 冬甩形,比較有趣。炸得一身金黃,餅身彈牙有重重蝦味,証明用料十足。
春卷 – 香脆非常,咬落「唃唃聲」,春卷皮碎散落一碗都係;仲有,內餡用料豐富。
魚餅 – 蝦餅出色,魚餅同樣好有水準,全件手打魚肉,肉質咬落實凈而有彈性,所以唔覺係溝粉。
香葉包雞 – 雞件炸得好惹味,通常係用班蘭葉包裹醃好嘅雞肉哩烤或炸,講真,我都唔知班蘭葉嘅真身係點,又唔知佢係乜味,所以我唔知依個香葉包雞係咪用緊班蘭葉,總之食落都細嚐到雞肉有朕朕葉香,對我哩講咁都已經好夠!
青檸汁燒魷魚(廚師推介)$82
咁多個餸比較辣嘅一個,餐牌都俾咗一隻辣椒仔佢,不過食落辣得哩一陣風,唔會好持久咁辣到你要灌水,就係加咗青檸汁哩個「中和劑」,清爽嘅青檸酸香,真係令個燒魷魚易入口咗,況且魷魚好軟熟,配上大量蒜粒、蔥粒、紅辣粒,味道複雜多變。仲有,唔好錯過伴碟嘅苦瓜,爽脆,味甘,但唔太苦!
清炒椰菜苗 $55
椰菜就食得多,椰菜苗我自己第一次食,其實椰菜苗晌泰菜都應該幾普及,不過小弟少食泰菜少接觸!第一次試椰菜苗,感覺幾好,味道有啲青澀,口感爽脆得哩又有咬口,幾得意!
海鮮蛋包飯 $80
賣相普通,只係加幾片青瓜同一大片蕃茄,蛋面仲有啲穿,之不過,勝在「內涵」大堆頭。其實佢個蛋皮都做得幾夠薄,而裡面嘅海鮮炒飯都OK,料就覺得一般啲,蟹柳、魷魚、蝦,係望落個蛋包飯好漲好大個。
豬頸肉炒金邊粉 $65
咁多道菜,賣相最肉酸,上到枱哩好似炒垃圾咁,似乎佢哋嘅炒粉飯面都唔係好講賣相。要評價個炒金邊粉都唔係好多嘢可講,金邊粉炒得唔會黐埋一齊,而且唔油,算係咁啦。
咖喱海鮮焗釀南瓜(廚師推介)$138
唔好話佢係廚師推介,我都推介,唔好理佢個樣哩到「黑炆炆」(南瓜個部份),好樣衰咁,但可以代佢講句:「我很醜,但我很溫柔!」首先,咖喱海鮮同南瓜兩樣都係我鍾意食嘅嘢哩,夾埋一齊梗係更啱胃口啦。先講南瓜,要焗到佢咁燶咁醜,裡面嘅瓜肉至夠熟夠焾,入口至咁柔軟,咁溫柔,再者,瓜味濃郁亦記一功;泰式咖喱不嬲都有其獨特香味,用哩煮海鮮本身已經好正,仲要海鮮用料不懶,有鮮蝦、蟹肉、蜆肉、魷魚,比起海鮮蛋包飯用嘅海鮮用料高層次好多,咁都未算,咖喱海鮮以焗釀形式整個南瓜,釀得嘅唔會得個少少料,軋開個南瓜真係好多餡,食得好滿足,所以我都認為值得推介!
味道方面,大家都好滿意今餐餸菜,拉勻價錢都唔算貴,食咗咁多嘢,加埋一都係$685,7個人分!而整晚招呼我哋都覺得幾好,侍應相信全是泰國人,因為睇住個小姐落單,全部寫蟲仔(泰文),好奇之下問佢可唔可以被我影低佢張手寫單,可惜,佢死都唔肯,好怕醜話佢手字唔靚喎,查實我又邊咩睇泰文,更何況點知靚唔靚,不過佢唔肯我又無符,但佢哋講廣東話又真係好正!最後就有件「趣事」發生,話說食到尾,同枱老友都食到飽飽,剩番我仲食緊。雖然外面有人等位,但佢哋就無催埋單,亦只係收拾枱面時問過一次要唔要甜品,咁侍應就幫我哋收咗啲嘢走,執凈番啲水杯等我哋繼續坐繼續傾。而最趣怪嘅場面就係依個時間出現,成張枱執剩我套餐具同我面前嘅金邊粉,我就好似叫咗個碟頭飯咁,仲要係搭枱個隻,哈哈! |
|
|
金不換泰國餐廳 Sweet Basil Thai Cuisine |
標題 : 友情廿載金不換 |
地址 : 荃灣大壩街4-30號荃灣廣場B111-113舖 |
地區 : 荃灣 |
|
現時分數:
|
日期 : 2010-09-15 17:29:35
同相識超過廿載嘅兩個家庭,食飯慶祝其中一位阿太生日,廿多年友情話短唔短,話長唔長,以前大家各住不同地區,估唔到搬吓搬吓依家成為同區街坊,回頭一想,人生可能好多嘢都可以用錢買,但深厚情誼就真係金不換!今次揀哩金不換食生日飯,就唔關佢個名事,我就只係借題發揮啫,其實目標地點定咗荃灣廣場,篩選幾個選擇後,大家想食吓泰國嘢,就訂咗金不換喇!
正門入口處擺放咗一大盆浮水鮮花,非常養眼,令人感覺平和,絕對好過一大座神神佛佛。因為食店座落商場地庫之內,可採用半開放式設計,加上高樓底、深啡色系型格裝修、柔和燈光、牆上泰國手工藝畫作,一眼可以睇晒成個餐廳環境,有別九龍城傳統常見嘅泰國餐廳!
主餐牌都幾多選擇,此外,佢仲有個廚師推介小餐牌,裡面有8款推介,我哋都試咗其中2款。
柚子沙律 $65
泰國入口嘅西施柚起粒,加埋魚露同椰汁撈勻整成,面面再灑啲疑似魚乾仔,嗒落其實係炸椰絲。一客柚子沙律都幾大碟,擺得幾高,而西施柚比想像中大粒,多汁但佢本身唔算甜,但加咗魚露、椰汁就變得酸酸甜甜,又有朕椰香,依排日日都咁熱,點柚子沙律作為開胃頭盤,最好不過!如果再雪凍少少,我覺得帶啲冰涼感,仲正!
大拼盤 $138
「大」故然指個拼盤大,另一個意思係啲小食件頭大,其實佢得4款嘢:蝦餅、春卷、魚餅、香葉包雞,都係泰式出名嘅小食,點大法?好似魚餅,有成個手掌咁大(唔計手指部份),而每款有3件,每件都一開二,碟中間配上酸椰菜,再跟兩款醬汁:魚露同泰式甜酸汁。
蝦餅 – 冬甩形,比較有趣。炸得一身金黃,餅身彈牙有重重蝦味,証明用料十足。
春卷 – 香脆非常,咬落「唃唃聲」,春卷皮碎散落一碗都係;仲有,內餡用料豐富。
魚餅 – 蝦餅出色,魚餅同樣好有水準,全件手打魚肉,肉質咬落實凈而有彈性,所以唔覺係溝粉。
香葉包雞 – 雞件炸得好惹味,通常係用班蘭葉包裹醃好嘅雞肉哩烤或炸,講真,我都唔知班蘭葉嘅真身係點,又唔知佢係乜味,所以我唔知依個香葉包雞係咪用緊班蘭葉,總之食落都細嚐到雞肉有朕朕葉香,對我哩講咁都已經好夠!
青檸汁燒魷魚(廚師推介)$82
咁多個餸比較辣嘅一個,餐牌都俾咗一隻辣椒仔佢,不過食落辣得哩一陣風,唔會好持久咁辣到你要灌水,就係加咗青檸汁哩個「中和劑」,清爽嘅青檸酸香,真係令個燒魷魚易入口咗,況且魷魚好軟熟,配上大量蒜粒、蔥粒、紅辣粒,味道複雜多變。仲有,唔好錯過伴碟嘅苦瓜,爽脆,味甘,但唔太苦!
清炒椰菜苗 $55
椰菜就食得多,椰菜苗我自己第一次食,其實椰菜苗晌泰菜都應該幾普及,不過小弟少食泰菜少接觸!第一次試椰菜苗,感覺幾好,味道有啲青澀,口感爽脆得哩又有咬口,幾得意!
海鮮蛋包飯 $80
賣相普通,只係加幾片青瓜同一大片蕃茄,蛋面仲有啲穿,之不過,勝在「內涵」大堆頭。其實佢個蛋皮都做得幾夠薄,而裡面嘅海鮮炒飯都OK,料就覺得一般啲,蟹柳、魷魚、蝦,係望落個蛋包飯好漲好大個。
豬頸肉炒金邊粉 $65
咁多道菜,賣相最肉酸,上到枱哩好似炒垃圾咁,似乎佢哋嘅炒粉飯面都唔係好講賣相。要評價個炒金邊粉都唔係好多嘢可講,金邊粉炒得唔會黐埋一齊,而且唔油,算係咁啦。
咖喱海鮮焗釀南瓜(廚師推介)$138
唔好話佢係廚師推介,我都推介,唔好理佢個樣哩到「黑炆炆」(南瓜個部份),好樣衰咁,但可以代佢講句:「我很醜,但我很溫柔!」首先,咖喱海鮮同南瓜兩樣都係我鍾意食嘅嘢哩,夾埋一齊梗係更啱胃口啦。先講南瓜,要焗到佢咁燶咁醜,裡面嘅瓜肉至夠熟夠焾,入口至咁柔軟,咁溫柔,再者,瓜味濃郁亦記一功;泰式咖喱不嬲都有其獨特香味,用哩煮海鮮本身已經好正,仲要海鮮用料不懶,有鮮蝦、蟹肉、蜆肉、魷魚,比起海鮮蛋包飯用嘅海鮮用料高層次好多,咁都未算,咖喱海鮮以焗釀形式整個南瓜,釀得嘅唔會得個少少料,軋開個南瓜真係好多餡,食得好滿足,所以我都認為值得推介!
味道方面,大家都好滿意今餐餸菜,拉勻價錢都唔算貴,食咗咁多嘢,加埋一都係$685,7個人分!而整晚招呼我哋都覺得幾好,侍應相信全是泰國人,因為睇住個小姐落單,全部寫蟲仔(泰文),好奇之下問佢可唔可以被我影低佢張手寫單,可惜,佢死都唔肯,好怕醜話佢手字唔靚喎,查實我又邊咩睇泰文,更何況點知靚唔靚,不過佢唔肯我又無符,但佢哋講廣東話又真係好正!最後就有件「趣事」發生,話說食到尾,同枱老友都食到飽飽,剩番我仲食緊。雖然外面有人等位,但佢哋就無催埋單,亦只係收拾枱面時問過一次要唔要甜品,咁侍應就幫我哋收咗啲嘢走,執凈番啲水杯等我哋繼續坐繼續傾。而最趣怪嘅場面就係依個時間出現,成張枱執剩我套餐具同我面前嘅金邊粉,我就好似叫咗個碟頭飯咁,仲要係搭枱個隻,哈哈! |
|
|
一鍋館 HIPOT |
標題 : 硬銷六人餐,我哋又受喎 |
地址 : 觀塘觀塘道418號創紀之城五期(apm)6樓3號舖 |
地區 : 觀塘 |
|
現時分數:
|
日期 : 2010-08-27 17:04:01
離開對上一份工,已係十年多前嘅事,依班舊同事都幾年無見,卒之約到聚一聚食番餐,實在難得!地點,就佢哋所以揀觀塘區,食乜,佢哋話晒事,所以哩咗APM嘅Hipot,稻香系嘅副線火鍋品牌,可能星期五關係,人頭湧湧,雖然訂咗枱,都要等一陣(十分鐘左右),無所謂,反正我哋未人齊,佢哋限時兩個鐘(差唔多人齊至入,食盡兩個鐘),不過,依個條件好流,我哋未夠7:30pm已入座,過咗9:30pm佢哋都無理我哋,只係幫我哋執執枱面清清場,由得我哋繼續斟嘢飲,齋坐吹水。
因為稻香系副線,又出買大包個招,免茶免芥免加一,慳番唔少。依度唔係任點任食,逐樣計,火鍋湯底有7款,單鍋(即係細鍋,一人一爐個隻):$19-$23;大鍋:$48-$50。配料都好多選擇,精選推介,即係貴價嘢,例如:帶子、活魚片、美國原裝桶蠔:$42-$98;其他配料多達70款,都係$18-$42;仲有刺身供應,散叫或拼盤都得,散叫都係$18-$38,拼盤就分幾個價錢$68-$148,視乎刺身種類同數量;另外,加$12可任飲汽水、果茶同糖水,不過,如果要任飲,就要全枱計數,唔可以有啲人要,又有啲人唔要任飲。
我哋七大一細,最初都諗住散叫,但坐落無耐,有個經理見我哋有成8個人,就推銷佢哋個六人餐,賣$988,本來預訂減收$200,依家特價照減$200,仲加送依樣個樣,我哋都不為所動。跟住有個阿姐哩,又再次推介上述六人餐,送嘅嘢仲比之前個經理講得多啲,感覺好似去咗兜售會藉嘅地方,不停游說,唔買唔準走咁,哈哈,聽完佢講,舊同事發揮會計本色,左計右計,發覺幾抵有得諗,結果決定食佢個六人餐,實價$788,揸DBS埋單有88折,折實埋單價$693.50,七個大人計,每人當收一舊,食得好飽,飲得好漲(打鞭爐特別口渴,所以小弟一人砌低咗4杯嘢飲,哈哈,飲嘢都翻本呀)!
講番個六人前豐料餐,包以下咁多樣嘢:
1. 安格斯肥牛兩碟,加送黑豚肉三碟。安格斯肥牛每碟散叫要成$88,而且每碟唔係好多,得8大片,份量少得可憐,至於黑豚肉每碟都只係9片,所以佢唔送多三碟黑豚肉真係唔夠食。安格斯肥牛,唔似和牛咁油花分佈均勻,但牛味幾唔錯,淥兩淥就食,口感幾嫩滑;黑豚肉,相對一般豬肉脂肪低,但肉質依然鬆軟,淥熟後食落同樣腍滑。
2. 珍寶盛盆,即係一大盆海鮮,有青口、北寄貝、赤貝肉同螺片,都算幾有睇頭。螺片快手灼一灼就食,幾爽口,淥耐咗就韌過柴皮;而北寄貝、赤貝肉做刺身幾好,打鞭爐就唔太理想,好易韌。
3. 原條鱆紅起片半條,講明依晚無鱆紅魚,改送兩條新鮮活魚或兩份三文魚刺身,我哋要一條活魚(鮪魚)起片,另加一份三文魚刺身。鮪魚幾新鮮,好嫩,係有少少細軟骨,小朋友食就要小心啲,最正係淥完晒啲魚片,我哋將成條魚殼放入個湯度再淆,個湯燥就燥咗啲,但好夠味;三文魚刺身一客有12片,算不上好肥美,但色澤、質素都過得去。
4. 田園大碗蔬,有咩菜我諗都係隨師傅仔執,但計有都成6-7款,好似粟米、白菜仔、南瓜、鮮冬菇、紅蘿蔔……等,基本上都算夠數。
5. 精選火窩生料$48元以下6款,佢哋就送多4款,即係一共有10款。我哋梗係盡揀啲貴價少少架啦,有帶子、象拔蚌、原隻鮮魷、海蝦、花枝片、黃金蝦丸、墨魚丸、豬潤……等,老實講,質素中規中矩,係嫌每兜份量偏細,好似花枝片咁,散叫$42兜,得個6、7片;豬潤散叫$38兜,數落大概10片鬆啲,底下墊滿生菜嘅!
6. 自選湯底大窩,揀咗金粟豬骨鍋,無咩原因,都係隨意揀!
7. 包埋任斟嘢飲,嘢飲都幾多選擇,汽水係可口可樂系,果茶就有芒果汁、酸梅湯、桃橙汁、檸茶,仲有沙冰,糖水只係獨沽一味:養顏芝麻糊。雖然係六人餐,預包六個人任飲,但我哋有8個人,都無額外收番2個任飲,算唔話得,幾大方無同我哋計!
對住嘢飲區嘅另一邊,就係醬料區,大概10款左右醬料任你溝、任你混,如豆板醬、生熟蒜、沙茶醬、蔥花……等等。我就好認真咁自家混醬喇!環境OK,有卡位,又有大大細細圓枱,裝修簡約啲,銀黑配襯。服務幾好,侍應幾有禮貌同笑容,一貫稻香風格。不過,時近中秋,有侍應走過哩兜售稻香月餅,在未有得食之前,一個哩完隔十幾分鐘又哩一個,大讚話抵買,咁我見個價錢確係幾抵,可惜此刻對月餅興趣又唔係太大,力婉佢哋「好意」,係感覺有啲煩!
|
|
|
Tony Roma's |
標題 : 燒豬肋骨,正! |
地址 : 銅鑼灣勿地臣街1號時代廣場食通天12樓1207室 |
地區 : 銅鑼灣 |
|
現時分數:
|
日期 : 2010-08-26 18:16:56
適逢有張$100優惠券,唔用好似好嘥,捉埋同事同老婆去嘆番餐。星期一晚,人唔太多,安排坐卡位,鬼佬size,我哋幾個坐落就變得非常闊落!服務都幾熨貼同細心!
點嘢食先,前菜小食要咗個烤薯皮($48)、嘉露蓮甜心雞翼($48),而沙律要泰式香辣花生雞肉沙律($98),至於招牌燒肋骨諗嚟諗去,卒之揀咗個燒鳳尾蝦配豬肋骨($188),折咗都係三百二,而且,美式餐廳,份量好大吓,三個人都食唔晒,搞到無試甜品添,留番下次,況且味道唔錯,尤其個燒肋骨,所以都算抵食!
講番食,先哩個免費任添嘅法包,配軟牛油同香草牛油,嚟之前都有睇其他食家讚哩個餐前包點好,不過,親身試咗,又唔係話正得咁緊要,個包上枱時都已經唔暖,雖然包面夠脆口,但包身有少少硬,唔係好軟熟,而香草牛油都只不過好咗陣香草味,個人哩講都係鍾意Outback嘅黑糖麵包,朕朕黑糖幽香,包身又香又軟!
烤薯皮.嘉露蓮甜心雞翼
小弟都好鍾意食烤薯皮,不過,今勻失望少少,因為個薯皮烤得較乾身同埋個底有啲燶,少少變咗柴皮,否則加埋面面嘅煙肉碎同車打芝士,再點一點酸忌廉中和番啲油膩感嚟一齊食,無得頂嘅小食。而另一款小食,嘉露蓮甜心雞翼,一客六件珍寶雞翼,都唔係隻隻都咁大,好彩個蜜糖烤醬令啲雞翼幾惹味,配埋隻有芝士味嘅醬汁,都OK喎。
泰式香辣花生雞肉沙律
沙律菜墊底,所謂泰式就係用咗辣椒同花生做個汁,食落辣辣哋,又有花生香,唔算有太大驚喜。加埋大大件烤雞胸肉,份量確實頗大碟,當然鬼佬做嘅雞胸唔好諗住好嫩滑啦,哩個沙律啱啲食肉獸多啲。
燒鳳尾蝦配豬肋骨
輪到招牌喇!串燒大蝦、洋蔥、紅椒OK;伴碟嘅酸椰菜絲好醒胃;煙肉焗薯好正(補償番之前個烤薯皮嘅失準);燒豬肋骨唔使多講,濃香惹味嘅燒烤醬,肉地鬆化嘅豬肋骨,大啖大啖咁食,果然好享受,好味!所以,都係個燒豬肋骨至正,至有水準。
|
|
|
麵棧
|
標題 : 山東麵 |
地址 : 荃灣路德圍12號 |
地區 : 荃灣 |
|
現時分數:
|
日期 : 2010-08-25 18:11:11
平日廣東生麵、雲南米線都食得多,今趟走訪哩試山東麵,又確係唔錯,唔同麵有唔同嘅特色,佢哋自家拉嘅山東麵,唔係講爽口彈牙,而係講咬勁,食落真係有股咬勁,啲麵浸耐咗都仲未變腍,一樣都咁煙韌,可以慢慢細嚼,唔使急!湯底亦唔好錯過,飲落有雞湯鮮味,唔會「淡茂茂」,但又唔係味精水咁,飲完令人好涸喉!叫咗個秘制羊肉麵($32)同一個凈菜肉餃($28)。
秘制羊肉,初時以為個羊肉會係一片片,原來係羊腩,炆得夠腍夠入味,充滿南乳香,不過奇就奇在有羊肉嘅味,但無羊肉嘅羶,啱晒D怕羶又想食羊嘅人喇,相反,好似我哩種鍾意食羶味嘅,就一定覺得未夠喉啦!啲麵除咗有咬口,唔係得朕粉,仲有少少鹹味,兼且幾大份量,所以我哋先叫一碗麵,另外個碗要凈菜肉餃。
而個菜肉餃水準非常高,菜肉餃除咗大大粒之外,皮薄唔在講,菜與肉切得極之微碎幼細,最緊要係兩者比例又啱啱好,唔會話為慳成本亂落肥豬肉充撐場面,夠健康,所以真啱食! |
|
|
Amaroni's Little Italy |
標題 : 待客態度依然故我 |
地址 : 九龍塘達之路80號又一城LG1-32 |
地區 : 九龍塘 |
|
現時分數:
|
日期 : 2010-08-25 17:25:11
初初開嘅時候,都幾鍾意晌度同朋友食飯,尤其幫朋友慶祝生日,但無再哩起碼都七、八年,因為好唔鍾意佢哋嘅態度,自持晚晚爆場,訂枱都要成星期,依個唔係問題,但俾我感覺佢哋好似不可一世咁!今晚再哩食,絕對唔係我揀,只係太太有個朋友多謝佢嘅幫忙,想請番佢食飯,我就掹車邊黐食啫,而地點只係話晌又一城,食意大利嘢,我心想唔會咁邪係Amaroni's嘛,結果正是!講真個句,小弟覺得依度嘅嘢食唔差,價錢貴得哩又夠番晒大份,而且裝修環境確實又有氣氛,只係侍應態度認真麻麻,一副不肖的咀臉,如果晌大排檔、一般茶記,我接受到喎,但話晒晌度都為起一個人$150-$200落樓,中高檔意大利餐廳,就未免那過喇!
是晚4個人,因為作主嘅朋友稍稍遲到,又要準時交枱,所以我哋餐牌快睇、嘢食快叫,爭取時間慢慢嘆!好快就決定到想食咩,一客沙律,一客意粉同一個薄餅,其實都好飽,臨尾都仲要點多一客甜品作結。
麵包籃配限量橄欖油同黑醋
麵包籃只得兩款包,一款薄脆形唔識係乜,都好香脆,但只可齋食,因為係好難先點到啲黑醋橄欖油;另一款係意大利香草包(Focaccia),晌意大利餐廳常見嘅其中一種包款,包身鬆軟但唔熱又唔暖,而且絕對唔夠香草味,睇包身已知,望落見得好少香草,可能諗住啲客點黑醋同橄欖油就夠,但我覺得係另一回事!
凱撒沙律(Caesar Salad)
都幾對板,羅馬生菜好爽,又夠凍,醬汁撈得啲生菜夠「暈循」,而蒜茸麵包粒烤得香脆,配埋巴馬臣芝士,就係一個晌食物中好嘅化學反應,更難得係佢成盅巴馬臣芝士擺晌枱面,任你用,唔似啲橄欖油同黑醋倒咗少少俾你就算。
白酒蜆肉闊麵(Linguine with Clams and White Wine Sauce)
佢嘅蜆肉係唔帶殼嘅凈肉,食得方便,不過蜆肉就唔算多,我估係雪藏貨居多,因為有好多蜆肉都碎濕濕咁,但味道又唔會話腥,仲有少少甜味添,所以感覺上有啲疑惑;白酒汁,汁底都做得滑溜且香,只係食落略嫌酒味都唔係好突出,相反,個闊麵煮得有水準,生熟程度啱啱好,柔軟得哩咬落有少少煙韌咬口。
經典口味薄餅(Classic - sausage, peppers, onions & mushrooms)
薄餅屬於厚批,幾鬆軟,而材料十足,有肉粒(唔見有肉腸喎)、青椒、紅椒、洋蔥、蘑菇、香葉,絕對係傳統口味無花巧,但最大賣點係佢個呎吋,table size,果然犀利,驟眼咁睇足有1呎x呎半咁大,呈長方形,幾有睇頭!但其實整體味道一般,唔會有咩特別。
意大利芝士餅(Tiramisu)
頂埋個薄餅都有少少去到今日嘅極限,但太太個朋友極力推介,仲講到明係為食依個甜品而哩,咁我點都奉陪到底啦!個意大利芝士餅做得真係好有水準,手指餅餅底沾滿咖啡酒,唔會有浸唔透情況出現,咖啡同冧酒比例恰到好處,唔會有一方太搶味。意大利軟芝士(Mascarpone)打得幼滑,食起上哩好軟熟。面層薄薄嘅唂咕粉,就係一層神奇面紗,令意大利芝士餅味道複雜而有個性!不過,唔知點解要晌側邊加「pat」忌廉,一來溶溶哋賣相又唔係靚咗,二來斷估唔會再將Tiramisu點忌廉哩食啩!
但未哩個意大利芝士餅之前,發生咗今次黑面嘅小插曲:話說你同餐廳講,有朋友生日,佢哋都會送一客麵包布甸作生日蛋糕,因為耐無哩,都想知吓仲有無有咁嘅「優惠」,所以我就問一問咗位侍應小姐,隨後我仲加多句:「唔需要,都係知吓啫」,然後點埋個意大利芝士餅。殊不知,等咗一陣,個小姐拎住個麵包布甸企晌我哋枱邊,好冷咁問咗一句:「邊位生日?」,我話我哋無人生日,求先都只係問一問仲係咪有送麵包布甸依個優惠,無諗住要嘅,即時四川大師上咗身,變臉黑晒面,仲見到佢「咀藐藐」,跟住轉身走咗去,雖然佢無出咩聲,但令人感覺唔好,好似以為我哋玩佢咁。我就好肯定同佢講過話只係知吓仲有無依個優惠,可能佢哋有咗職業病,一聽有人問依樣嘢就即時送上麵包布甸,相信都只不過係溝通上斷咗線,但就唔多好晌啲客面前黑面兼藐咀,仲有,唔好成日走過哩問仲要唔要甜品囉,如果你出面仲有大棚客晌度等位,夠鐘我哋自然會埋單,唔會阻你做生意嘅!
|
|
|
翠華餐廳
|
標題 : 慕名而嚟 |
地址 : 荃灣兆和街28-30號 |
地區 : 荃灣 |
|
現時分數:
|
日期 : 2010-08-24 12:30:10
茶餐廳真係香港人飲食嘅一部份,食物質素唔錯,又多選擇,價錢又大眾化,不過翠華就特別咗少少,就係特別「貴」,所以一直都未有試過就係嫌佢貴。之前都睇過佢嘅報導、雜誌介紹,都係要親身試一試,所以舅仔昌少提議去翠華,無異議啦!
雖然差唔多成夜晚9點,都仲係幾多人,要搭枱,無所謂,打開餐牌,價錢又確實幾貴,比一般茶餐廳貴2-3乘左右,又望一望裝修,燈火通明,比一般茶餐廳裝修高檔D,唔通貴在裝修?(講笑!)
叫咗3個碟頭飯:鐵板川椒明蝦球兩面黃($65),係店內貼晒廣告嘅勁推介,所以要試;勝瓜魚湯什錦泡飯($42)同瑞士汁牛肉炒河($52)。
鐵板川椒明蝦球兩面黃 – 真係幾得,鮮蝦球大大隻有睇頭,絕對唔係用哩炒飯D蝦仁仔。最出色係個兩面黃,個炒麵兩面都煎得好香脆,但又唔會好似平時乜乜炒麵咁炒到油淋淋。唯一要彈係佢既然叫得川椒,就要有番佢個風格,但有形無實,見到大大粒川椒,不過半點辣味都無!有啲奇!
勝瓜魚湯什錦泡飯 - 清清哋,魚湯夠濃,材料OK,雖然無乜驚喜,但勝在啱口味!
瑞士汁牛肉炒河 - 賣相唔得,個汁唔得!瑞士汁個「獻」好杰,成pat膠水咁,味道上唔甜又唔酸,唔似瑞士汁,似蠔油獻多D(當然唔係啦,都無蠔味),所以真係唔知係乜!牛肉同河粉做得點好,個汁搞成咁都無用啦。
都知佢貴在用料靚,但食過之後,好壞參半啦,多多少少都有D失望架!順帶一提,招呼我哋個阿姐都幾有禮貌,但擰轉頭對住番其他伙計又爆晒粗,仲要係大大聲個隻,幾揚添,地踎茶餐廳就見怪不怪,但以翠華咁嘅檔次唔知算唔算搞嘢咗D!之不過,埋單方面就真係一讚,夠現代化,一掃張單嘅條碼,就印好張收據,有晒食乜嘢嘅明細資料,計好晒總數,絕對勻真!
|
|
|
小巴黎越南餐廳
|
標題 : 小巴黎,無以前咁巴巴閉 |
地址 : 荃灣青山道144-172號荃豐中心A80-89號 |
地區 : 荃灣 |
|
現時分數:
|
日期 : 2010-08-22 17:49:22
我都好耐無幫襯過小巴黎,所以就試番吓佢喇,雖然佢嘅食評多喊少笑,但仍然有番咁上下多人幫襯,除左價錢算抵之外,佢晌荃灣都叫薄有名氣,雖然唔算幾十年老字號,但佢盤據荃灣都有十年八年(晌唔同地方:荃昌、路德圍),都仲叫有啲擁躉嘅。不過,雖則話後生一班可能至緊要又平又抵,但佢哋又會係鍾意貪新鮮嘅一群,而且又好識上網睇食評,仲係咁多喊,如果長此下去,質素仲係咁低,都係做得唔長!
講番今次食咗乜,確實唔貴,4個人,5樣嘢,食到飽晒,都係兩舊水,算經濟喇啩!什錦拼盤、蝦仁豬肉手卷、南乳碎炸雞、馬拉盞炒通菜、越式濕炒檬,份量、味道都仲算對板,水準我都覺得OK!
什錦拼盤 – 個拼盤份量我覺得就細咗啲,每樣兩件,但就得4款:有越式炸春卷、粉卷、香茅雞翼同炸豬肉餅,味道不錯,但賣相就好差,成碟嘢好似打完風先拎過哩,唔知係師傅定侍應嘅問題喇,總之,啲嘢食就放得「立亂」啲啦!
蝦仁豬肉手卷 - 唔係日本嘢,越南都有手卷,當然同日式手卷係兩樣嘢啦!賣相幾靚仔,半透明好薄嘅粉皮包住生菜、大蝦仁、炒豬肉碎同其他配料,好味,幾清新!
南乳碎炸雞 - 南乳味香濃,啲雞件唔會炸到油淋淋,不過一客唔係好多件,成五十蚊一客好似貴咗啲。
馬拉盞炒通菜 -唔係死鹹,鹹香惹味,通菜炒得夠爽口,咬落索索聲!
越式濕炒檬 - 點都要叫個炒粉飯麵墊墊肚嘅,依個濕炒檬唔錯,面面有牛肉同肉片,有啲似港式嘅濕炒牛河,連味道都有啲似,所以我又唔係好知何謂越式?
|
|
|
雄記粉麵
|
標題 : 都係要食番老本 |
地址 : 荃灣荃興徑19號荃發大廈17號舖 |
地區 : 荃灣 |
|
現時分數:
|
日期 : 2010-08-21 10:53:25
係荃灣路德圍、荃興徑個頭走個圈,食肆多到再多兩隻手都數唔晒,近年仲越哩越多食店進駐,有台灣、有泰國、有中有西,食麵嘅都有好幾間,仲各有賣點,相信競爭都幾大。而老牌麵店「雄記」依然頂得住,佢哋嘅招牌牛腩、魚蛋、特色春卷見晒報,好多食評都讚好。
今次幫襯,無試佢嘅招牌嘢喇,因為之前都有試過,確係唔錯,反而有啲興趣試吓佢其他嘢,睇吓佢啲粉麵做得夠唔夠全面!揀咗個腩肉米線試試……唔,中肯講句,OK嘅,不過不失,有齊雲南米線嘅形,即係有齊所有配料,如芽菜、酸菜、腐皮……等等,但無咗個實,味道(尤其個湯),似牛腩麵多D!個人覺得譚仔、南記啱自己口味啲,唔係話佢唔好食,只不過牛腩麵檔起家,加埋做雲南米線,感覺同一個碗,只係牛腩變咗豬腩肉,幼麵變咗米線啫,湯底都係個一煲!
另外仲叫咗個金錢肚米粉,啲金錢肚確實幾爽!故此,再幫襯都係揀番佢啲老本夠穩陣。 |
|
|
泉章居
|
標題 : 大棚人嘅抵食心水 |
地址 : 銅鑼灣銅鑼灣廣場1期7-8樓 |
地區 : 銅鑼灣 |
|
現時分數:
|
日期 : 2010-08-21 10:51:55
人多想食得好,又唔想太貴,就諗起泉章居!好似我哋大棚人8大2細,點咗6個菜(有東江鹽焗雞、脆皮炸大腸拼春卷、椒鹽魷魚鬚、煎炆釀豆腐、雲腿扒菜胆、蜜灸叉燒),加多個魚湯米線,連茶芥加一,都係七百幾,難得碟頭份量唔細,味道又唔錯,抵食啦!
有幾道菜都值得推介吓,招牌菜「東江鹽焗雞」的確做得出色,雞皮爽口,皮下脂肪唔多,雞肉嫩滑且有鹽焗嘅鹹香,唯一失色係今次過咗少少火位,鹹咗D!
另一道菜「脆皮炸大腸拼春卷」(套餐只有脆皮炸大腸揀,無得拼春卷,要試就要散叫),推介主因係,炸豬大腸依家係街邊都少見咗,就算有都係連皮送多大大pat肥膏俾你嘅炸大腸,好味就好味,但唔太健康。而泉章居哩個炸大腸就食落去會安心D,因為豬大腸內嘅肥膏一D都無得留低,食起上哩無咁肥,然而外皮依然炸得非常脆口,記得趁熱食,唔好慢慢嘆;而春卷唔係平時酒樓點心個隻,係用腐皮哩包嘅,一層層好鬆化,餡料十足,一樣好食!
仲有一佢個「魚湯米線」,表面平平無奇,睇落乜料都無,賣成六十蚊一窩,但食落就知平凡中嘅不平凡,就係個魚湯不平凡,奶白色魚湯好濃魚鮮味,但一D都唔腥。米線就無話有咩特別,OK啦!
至於其他餸菜就不過不失,係個「椒鹽魷魚鬚」水準之下,一來外層嘅脆漿不平均又厚身,二來椒鹽味好薄,食落較淡口,無咗椒鹽個種惹味。閒日哩有糖水送,可惜今次同屋企人晌星期日哩幫襯,不過,齊齊整整一家人,總之食得開心! |
|
|
Triple O's |
標題 : 不外如是喎 |
地址 : 中環干諾道中8號交易廣場富臨閣1樓平台10號鋪 |
地區 : 中環 |
|
現時分數:
|
日期 : 2010-08-21 10:49:36
加拿大過江龍,成日都聽人講Triple O嘅漢堡包好好食,好正咁,今日就專燈走去試,食晏時段,真係超多人!
叫咗個Mushroom Burger,散叫要$46,套餐要$68(多個薯條加杯汽水),因為買返去公司食,所以慳番啲無要套餐,返去自己沖杯咖啡哩嘆!個包真係幾大個,不過唔係好鬆軟,中間塊牛肉未係想像中咁正,肉味夠濃但有少少乾身,底下嘅蘑菇亦碎濕濕咁,好易食到跌晒落哩,雖然個包嘅配料主打係蘑菇,但如果你想加番生菜同蕃茄,係可以同佢哋講聲,而所謂Triple O sauce唔覺有咩特別喎,至於放面塊酸青瓜,佢哋原意係怕有啲人唔鍾意食而要揀番出哩,於是就放上面,等食嘅人自己加番入去,真係多此一舉,不如落單時問客要唔要加酸青瓜好過啦,仲環保啲。總結一句,成個包不外如是,覺得名大過實,試過一次就夠! |
|
|
六榕仙館
|
標題 : 實力老牌齋菜 |
地址 : 佐敦道38號地下 |
地區 : 佐敦 |
|
現時分數:
|
日期 : 2010-08-21 10:46:42
六榕仙館係佐敦老牌齋菜館,平時小弟少食素,一年食個幾次,都係就番食齋嘅舅母一齊,今次揀六榕都係佢介紹先識去。入到去幾有一種舊式茶居嘅味道,仲有個上層嘅閣樓,環境乾淨企理,又靜靜局,幾啱食客閒話家常!最重要就係閣樓無乜神神佛佛嘢,凈係有個又大又圓白底紅色嘅壽字,包咗上面好閣樓整幾圍賀生日都幾搞鬼!
六榕嘅齋菜價錢都幾實惠,尤其套餐,有2人套餐(1湯羹2餸)、3人套餐(1湯羹3餸),雖然仲有4人、6人、12人套餐,但食乜定晒,唔似2人同3人套餐咁有彈性,可以自由揀飲咩湯羹食咩餸咁好。我哋5個人,叫咗個3人餐,湯羹揀咗綿繡三絲翅,而小菜就要時菜鮮草菇、菠蘿咕嚕肉同葡汁南瓜燴鴨脯,另外再加多個桂花炒翅同松子香春炒飯,夠晒。
綿繡三絲翅 - 都幾大份量,足足分咗5大碗,剛啱一人一碗唔使爭,而且味道幾夠,材料幾足,不過都係D 菇菌粉絲。
菠蘿咕嚕肉 - 咁多道菜比較普通嘅一個,賣相都幾似嘅,甜酸味道都出色,但素肉始終係素肉,少咗份肉香。
葡汁南瓜燴鴨脯 - 葡汁都夠香濃,而南瓜又甜,所以鴨脯在我哩講,都變咗係配角,志在一試素鴨脯,哈哈!
桂花炒翅 - 哩得依度食素菜,都預咗清淡D,但估唔到又唔係完全係咁,好似依個炒翅,無論賣相同味道都有驚喜,D素翅幾爽口,加埋素火腿同蛋白炒,幾好食,係略嫌桂花味唔夠!
松子香春炒飯 - 至於個炒飯亦都係另一個驚喜,因為炒飯加咗紫菜碎一齊炒,而松子仁又令個飯咬口咗好多,D荷豆都好清甜,飯身又唔油!
最後,晚市有糖水送,紅豆沙,不過反而好一般添!
|
|
|
山東餃子館
|
標題 : 健康餃子特色麵 |
地址 : 長沙灣青山道252-256號地下A舖 |
地區 : 長沙灣 |
|
現時分數:
|
日期 : 2010-08-21 10:42:44
去完高登,梗係晌埋深水埗搵食啦,咁近城隍廟,大把好籤,依家成條福華街直頭變咗食街咁,選擇多到不得了,平又有,貴又有,茶記、越式、泰式、西餐、麵食、糖水……一應俱全,所以好多人都會哩依條街搵食,不過好多好食嘅鋪頭都好多人,例如維記、大家食。故此,今趟走上一條街「元州街」搵食,因為有檔健康餃子店「山東餃子館」,不妨試試,其實山東餃子館在深水埗都有好幾間分店,如元州街、青山道、東京街,佢嘅餃子種類都幾多:白菜馬蹄鮮肉、茴香鮮肉、蕃薯苗鮮肉、京蔥羊肉水餃、香芹鮮肉……;麵條選擇除上海麵,其他也好有特色:菠菜麵、南瓜麵、蕃薯粉……。
今次嗌咗佢嘅蕃茄鮮肉水餃南瓜麵同羊肉串,個蕃茄鮮肉水餃食落都幾清新,唔肥膩,皮唔厚,橙橙哋色嘅南瓜麵都OK,唔算好爽滑,不過南瓜味就唔係好覺,純粹感覺健康啲。老闆標明不含鹼水,水餃肥肉又唔多,真係感覺幾健康,都係$20碗,算幾實惠!反而個羊肉串$9就麻麻,味道聞落就好香,少少辣幾惹味,唔羶,不過肉就韌咗啲,要扣分喇!
|
|
|
桐燒
|
標題 : 盛宴 |
地址 : 銅鑼灣告士打道228號世貿中心13樓1302舖 |
地區 : 銅鑼灣 |
|
現時分數:
|
日期 : 2010-08-21 10:37:32
食完哩餐,9/8就要動身上重慶山區(工作關係)刻苦一星期,所以哩次和食.燒肉盛宴,等小弟嘆餐飽可以安心上路!符符碌碌,參加咗另一個網站所搞嘅試食會,豪嘆和食及日式燒肉。主辦單位安排咗個一室銀、灰、黑配襯嘅貴賓房,都幾型格,不過就無咗和風嘅氣氛,而成個房鬆鬆動動都可以坐上12-14人,空間感十足。今次試食菜式甚為豐富:
1. 橫濱麗人
Drink Menu有多款非酒精特飲,都係以一堆日本地名而命名,如沖繩海濱、淺草少年…,大會就在飯前安排咗一人一杯迎賓特飲「橫濱麗人」,賣相幾好,橙黃色主系,最下面一抹艷紅,我反而覺得叫沖繩黃昏仲有多少少意境!味道幾OK架,因為除咗炎夏嘆杯凍飲外,飯前一杯酸酸甜雜果汁醒醒胃,準備迎接豐富和食。但晌度有個疑問,睇住個餐牌寫橫濱麗人係由新鮮士多啤梨、菠蘿、橙組成,但觀其貌嚐其味,點都覺得最底下個層係士多啤梨糖漿!?
2. 麻醬蒟蒻海鮮沙律
配襯沙律菜嘅材料有車厘茄、蒟蒻、魚子、熟蝦、蟹肉、魷魚圈,其實單睇材料都幾有賣點,尤其用上蒟蒻做沙律,我都係第一次食。蒟蒻本身含豐富纖維素,熱量又低,因有膨脹力,進食後易有飽肚感,常做幫助減肥嘅食物,所以做沙律都適合,不過,要解決佢嘅味淡問題,日本人會用佢哩做刺身點味噌醬哩食;但今趟個芝麻醬就似乎做唔到應有效果,可能係佢個醬汁做得較薄身,除少部份沙律菜掛汁外,大部份醬汁溜晒落底,而所有海鮮材料都係後加放上面,所以,突出唔到和式風味。我反而比較覺得係師傅將醬汁撈沙律菜同蒟蒻時,做得「拿西」咗啲,只係「求期」淋一淋上去就算,因為如果醬汁、沙律菜、蒟蒻撈多幾吓,夠勻嘅話,就算唔掛汁都食落有醬汁味。仲有,個沙律跟得一隻叉,如果醒目嘅俾多隻羹,咁就好使D!
3. 創作壽司盛合
賣相甚有睇頭,以牡丹蝦伴墨魚籽壽司為首,半彎長形瓦碟載著9件壽司,其他仲有:芝士鰻魚伴魚籽、劍魚腩、拖羅伴魚籽、油甘魚、拖羅、魷魚伴青瓜片及墨魚籽、凡立貝、三文魚伴魚籽及金箔。因為講明係創作壽司,創意行頭,所以,賣相造型我都覺得好唔錯,尤其個魷魚壽司,但好睇唔好食係美中不足之處。9件壽司4個人分,我就只係試咗芝士鰻魚伴魚籽壽司、方形拖羅壽司,首先珍珠米煮得爛,已經有種出師未捷身先死嘅感覺,再者,其實鰻魚OK,但就算加片芝士覺得都無特別,雖然灸燒過,但凍咗都係變返普通片裝芝士,無咗芝士烘軟溶溶哋嘅感覺;另一個拖羅壽司,做到立方體,創意係覺得自己食咗件double拖羅壽司囉,一件壽司飯搭兩片拖羅。
4. 韓國秘製汁燒牛肋骨
輪到另一主打「燒肉」出場,先上牛肋骨,係用上美國安格斯牛肋骨最厚肉嘅部份,薄切再卷番埋,一客三件咁上枱,而韓式同日式燒肉嘅分別,在於前者以濃味醬汁醃肉奉上,而後者就以食原味為主,唔會多醃。而今次依個牛肋骨,係韓式做法,即係勁醃,不過就改用日本醬汁哩醃,分別有味醂、清酒、日本醬油,老實講,醃完個味都分唔出係韓定日,總之醬汁味道濃郁,正。為方便食用,侍應幫我哋將大大件嘅牛肋骨一開三或四,再哩網燒,好快有得食!肉味濃,但口感較韌,真係食到小弟咬牙切齒咁滯。
5. 澳洲黑毛和牛野菜盛
繼續燒燒燒!牛肋骨仲未燒完,再哩一份日式盛合,有澳洲M9級黑毛和牛肩胛肉、牛舌、本地鮮雞雞件、幾款日本野菜(冬菇、茄子、蕃薯、南瓜)。因為依輪係日式,食材完全無調味,所以大廚特別炮製一款點燒肉嘅醬汁,成份除日本醬油,還加入咗菠蘿汁、雪梨汁,若嫌味道會複雜,亦準備好即磨原粒黑椒同海鹽俾大家,悉隨尊便!M9級即係M9級,澳洲和牛齋睇樣油花密而分佈平均,略略放上網燒,轉色亦返再燒,唔點醬汁,加啲黑椒、海鹽,肉質柔軟又有油香,可惜每人分得唔多件;牛舌亦都唔錯,小弟都幾鍾意食牛舌,貪佢軟軟腍腍又有種韌勁,平時多數食燴牛脷嘅多,今次食燒嘅,一樣咁正,因為更香,少少濃位更有種碳火味,溫馨提示,多吃無益;雞件,味道普通,只屬不妨一試嘅選擇;日本野菜,食完肉食番多啲菜梗係好事,但4款野菜每款一件,認真唔夠大方,好彩我都配給到想食嘅燒南瓜,燒軟嘅南瓜特別粉香,南瓜味夠晒重,好味!
6. 牛油蘆筍炒野菌
話完唔夠菜食,就即上依客蘆筍炒野菌,簡單嘅一道菜,欣賞佢用鐵板上,保持熱辣。蘆筍炒得爽嫩,咬落無渣;野菌有茶樹菇同雞脾菇,都屬於較爽口嘅菇類,配牛油炒夠香味,如果改用橄欖油炒就更健康喇!
7. 雜錦天婦羅
話雜錦,不如叫海老天婦羅(因為全是炸蝦),另加多一件冬菇天婦羅伴碟。睇樣,有少少感到唔對板,因為粉漿望落好似好厚,完全遮蓋晒蝦身嘅肉息,無晒個種透薄感,尤其下端近頭位,粉漿最厚,成舊舊粉咁!咬落,外層「咔嚓」應聲裂開,証明仍夠脆口,係厚身咗,相信係即做,但唔知點解好似又唔係即哩,食落少咗熱辣辣嘅狀態,還好,蝦本身都幾大隻,啖啖蝦肉,又夠蝦味。
8. 野菜稻庭烏冬
烏冬都係日本名物,平時對食烏冬都無太大要求,亦好少去烏冬專門店度食,今日算係一試稻庭烏冬嘅真味!記得以前睇過雜誌介紹,烏冬分兩大類:讚歧、稻庭,前者麵條粗而方,價錢大眾化,有分新鮮即製、半熟(急凍)、全熟、乾烏冬;後者麵條扁而幼,昔為貴族美食,當然依家都算大眾化咗,一般都係一包包嘅乾烏冬(想詳細瞭解烏冬世界,可睇番飲食男女No.739,25/09/2009)。桐燒聲稱係用急凍稻庭烏冬,但回顧番以上資料,如果係急凍嘅,好似無乜理由係稻庭烏冬,況且,烏冬樣貌都似粗方多過扁幼,所以稍為覺得似係讚歧烏冬。姑勿論係邊隻,烏冬質感彈牙唔糊口,帶有少少韌勁,唔會一夾就斷,仲有食落滑不溜口!以石鍋上,長時間保持熱度,烏冬浸耐咗都無出現腍爛情況,果然質高呀!配菜只有冬菇同日本水菜,擺明係食烏冬為主,所以懶理配菜,只因水菜第一次接觸,小試一撮,爽甜清脆。
9. 海膽石燒飯
去到尾聲,仲有兩個飯,足以填滿肚內所有空位。先哩海膽石燒飯,珍珠米上有菠菜、甘筍、大豆芽、冬菇為伴,最上面就放有兩大片大連馬糞海膽。對海膽唔算好有興趣,可能將石燒鍋內所有材料撈均就咁食,所以覺得海膽味變得唔係好出,同埋想食飯焦嘅人有啲失望,因飯焦唔多,但今勻啲珍珠米比食壽司時嘅珍珠米好好多,飯粒粘粘又煙韌,其他配菜,都OK啦!
10. 蘆筍和牛石燒炒飯
我就為佢改名叫環保和牛炒飯,因為經理話啲和牛粒係晌做燒肉時,頭頭尾尾下欄位剩番落哩,用得唔好嘥,就用晒哩做依個炒飯喇;而飯則用泰國香米,有飯味兼較爽身,比珍珠米適合做炒飯,仲有埋蘆筍粒、甘筍粒,炒完落石鍋就上枱。飯粒確係炒得分明爽口,和牛粒亦唔少,充滿油香,不過都係好肥吓,不宜多食!
11. 日本雪糕
一起手侍應拎咗好多杯芝麻雪糕哩,以為指定甜品無得揀,唓,原來仲有綠茶味,結果有啲食家心繫綠茶雪糕,奈何芝麻雪糕已在口裡,我就無所謂,試咗芝麻雪糕,都覺得幾香濃,重奶味,仲見到幼細黑芝麻粒粒。算係飽餐後再帶哩點點涼快感!
桐燒在08年初開業,在今次試食會之前,桐燒已累積咗40多個食評,有一定參考價值。而以笑、OK、喊嘅評分分佈為22 vs 11 vs 8,雖然笑嘅多,但亦唔好忽略有11個只係話OK,仲要有8個叫喊添!若以車呔人推介餐廳哩講,我就覺得未夠名正言順喇,如要保持「推介餐廳」之銜,實在要好好改善現在嘅問題,如想摘星,就要更加努力啲,在服務、食材質素加大力度提升!否則,只不過係一間你有人有、人有你無嘅日式燒肉店。 |
|
|
Subway |
標題 : 意大利特製潛艇堡 |
地址 : 中環蘇豪荷李活道30號上層B舖 |
地區 : 中環 |
|
現時分數:
|
日期 : 2010-08-15 00:06:31
有時趕時間都會食吓漢堡包,依家漢堡包店開到成行成市,平嘅有,貴嘅又有,反而將另一款經典快餐食物熱狗遺忘咗。咁啱今日餐晏食公司嘅,自然比自己出錢食得豪少少,一於哩Subway,我就鍾情佢哋嘅美式潛艇,款式夠多,成呎長潛艇夾著豐富餡料,一個人食晒成隻超滿足!最正係包款(如小麥、蜂蜜燕麥…)、配菜(如芝士、橄欖、辣椒、青椒、洋蔥、酸瓜…)同醬汁(如紅酒汁、蜜糖芥辣、燒烤醬、蛋黃醬…)都任你揀、任你搭。一份6吋長潛艇單價$30-$35,加$21就變成1呎長,再加$15變套餐,多杯中汽水同兩塊曲奇(或一包利士薯片)。
今次試咗個Italian B.M.T.意大利特製潛艇堡,其英文縮寫意思係Biggest, Meatiest, and Tastiest,總之講到乜都係最好(散叫要$35),我哋梗係加錢要足一呎長嘅大潛艇啦,仲有,好似貪心嘅我要咗好多款配菜,都唔記得點咗咩,總之篤手指,樣樣篤篤吓都要。而個B.M.T.主材料有意大利辣味香腸、沙樂美腸同火腿,再加埋我嘅貪心配菜組合,搭上蜜糖芥辣汁,食落味道自然複雜,今次無謂扮高深講到D味道有幾多層次,總之就食得過癮,食得開心!
|
|
|
富泰家
|
標題 : 健康抵食午餐 |
地址 : 旺角通菜街1A-1L威達商業大廈地下C舖 |
地區 : 旺角 |
|
現時分數:
|
日期 : 2010-08-06 15:46:21
係旺角搵食,真係乜都有得食,平有平食,貴有貴食!今次偶然經過哩間富泰家,位置閃縮,女人街街檔入面嘅緊鋪,平時少行入去架啦,仲要門口細細,好易走雞,所以今次幫襯到,真係偶然。睇個名有D土氣,話時話,唔知老闆改個咁嘅名有咩含意,因為快食快走,無心裝截,不過,入到裡面感覺又唔同晒喎,環境幾乾淨企理,白色、杏色、深啡都幾襯色,而侍應又幾好招呼,可能仲早,無乜人,尤其旺角,街檔都未開齊呀!雖然佢係小店一間,但有部份梳化凳幾好坐,又唔算太逼。而之前晌門口經過見佢有紅米飯,賣健康嘢就入哩幫襯吓佢食個午餐!坐低睇完餐牌,原來賣台灣嘢,仲有好多健康菜式,卒之叫咗個葡式排骨紅米飯,配低糖紅茶,都係$30,好過去快餐店,去大家樂有時一個飯加杯嘢都過$30啦。
全套午餐,整體哩講,咁嘅價錢有菜、有肉、有餐飲及生果,算真係幾好喎!不過如果講質素,個葡式排骨紅米飯無乜特別,葡汁排骨OK,排骨幾滑唔肥,份量好足;係飯方面失咗D分,白米飯有少少乾身咗D,紅米亦較硬,雖然叫紅米飯,不過紅米佔飯嘅份量就稍為少咗D。另外,套餐加埋一兜仔少油嘅灼菜心,同埋幾片蘋果,算老闆對健康飲食嘅誠意,都感覺得老闆份心思架。而餐飲可揀低糖綠茶或紅茶,消消滯,兼且又係健康之選,幾十蚊又真係幾抵。 |
|
|
遊樂 Yu-Raku Japanese Restaurant |
標題 : 明搶嘅前菜同飲品 |
地址 : 銅鑼灣謝斐道468號百達中心地下E舖 |
地區 : 銅鑼灣 |
|
現時分數:
|
日期 : 2010-08-06 15:05:42
遊樂真係好鬼細,如果無數錯全店得15個位,雖然有D晌大阪嘅日式薄餅小店風味,但又真係細咗D!其實之前睇過雜誌介紹覺得幾好,加上再想食番晌大阪食燒餅嘅感受,先至哩試下!
星期二8:00pm哩到,好彩啱啱有人準備走,等咗一陣就有位,仲係我覺得係全場最好嗰果兩個位,因為坐晌Bar枱得哩,但唔係對正鐵板爐嗰兩個位,係隔離嗰兩個,睇到師傅整餅一連串動作利落之餘又相對無咁食正D油煙。打開餐牌都好多選擇,但唔係樣樣嘢都有中文翻譯,不過,有D日文有漢字,都明明哋,仲未明,問師傅,因為早晚兩更個師傅係香港人,聽佢講到夜D至深宵更就由D日本師傅負責。
除咗餐牌,佢哋有D人氣榜,睇完揀咗個SOBA奄列,另外要多個蝦、烏賊、豚肉雞蛋薄餅,餐牌內食物嘅價錢我覺得都OK,不過,計埋得3舊仔蘿蔔、魚蛋之類嘅前菜($20,7:00pm後必須收取每人一碟,貴過酒樓D茶芥,仲要入到去至會見到),以及無清水供應,食煎炒嘢無可能唔飲水,最平要支烏龍茶都收你$20(唔好以為咩日本正嘢烏龍茶,只係道地嘅膠樽裝),再加埋一,結果埋單兩舊半,咁就真係唔抵食!
講番個SOBA奄列同個雞蛋燒餅,全部即叫即做,但就要等好耐,奇怪在個奄列同個薄餅又唔係同一時間做,既然個鐵板爐又有位,唔使分開做,搞到食完個奄列,又多等成廿分鐘至哩個燒餅。但係,講真個SOBA奄列真係幾好食,SOBA其實即係炒麵,唔好以為就咁炒麵奄列,都一大輪功夫:先炒麵同椰菜,再煎豚肉(即係煙肉),切件,加醬汁,撈埋晒一齊,然後煎蛋皮(夠晒薄),包好所有餡料,師傅手勢純熟,再唧上沙律醬,撤上紫菜粉,大功告成,熱辣辣,趁熱食,好味!而個雞蛋薄餅一樣唔錯,先兜炒D蝦同烏賊(即係魷魚),再加上粉漿,煎成一個直徑七、八吋左右嘅大餅形,加埋兩大片豚肉,跟住一個反手反轉個薄餅再煎,然後搽醬汁,唧沙律醬,撤上大大量木魚碎,香噴噴,酸酸甜甜嘅醬汁,香脆餅底,餅心粉漿唔餬口,好正!稍覺D蝦同魷魚粒份量少,同埋覺得係雪藏貨,味道差咗D! |
|
|
UCC Vienna Cafe |
標題 : 好抵砌 |
地址 : 尖沙咀廣東道17號海港城G302店 |
地區 : 尖沙咀 |
|
現時分數:
|
日期 : 2010-08-04 23:27:55
UCC個名好親切,因為小弟讀嘅中學英文縮寫都係叫UCC!好多時都好旺,除地理位置有利之外,以日式西餐廳計,佢價錢唔算貴,但主要賣點係加$28,主菜變套餐,有餐湯、有一次性嘅自助沙律、同一杯餐茶,計落真係非常之抵,符合晒攞著數嘅心態,好似我哋砌沙律手勢唔差嘅,雖然D沙律料好普通,無乜貴價嘢,但砌出哩個沙律咁大兜都唔止$28啦,個份量直情可以當一個女仔嘅正餐呀,最重要係過足個份「貪心」癮丫嘛,哈哈!
依餐生日飯,我哋一行2男3女,個個唔算大食,除咗小弟之外,所以叫4個主菜,另加錢2個轉套餐,夠晒食,連加一,埋單三舊半,每人都係$70,尖沙咀區算經濟化算,主要係食物質素都對辦,UCC嘅嘢一晌以哩水準都穩定,比較少出錯,依晚情況都係,質素保持到!至於服務同環境就,算中規中矩啦。
咖喱牛肉飯 $64
小弟唔嗜辣,所以帶微甜嘅日式咖喱就較啱我,4個主菜之中,其實依個最平平無奇,點佢都係純粹為咗食咖喱,別無他想。咖喱依樣濃香,微甜,層次唔複雜,對比印度、泰國等地咖喱,來得簡單一點,亦係另一種感受。牛肉,不期然將佢變咗做配角,唔難食已收貨,況且D牛肉都OK!
海鮮奄列飯(茄汁) $66
奄列飯,或者叫蛋包飯,都係晌日式西餐廳鍾意食嘅另一款菜式,因為可以睇到D師傅煎蛋 + 包飯嘅功力,今次個蛋皮厚度幾好,都幾夠薄,不過,我覺得晌三樓嘅Niji就稍為優勝少少,夠薄之餘仲要厚薄夠平均;另外,今次個奄列飯仲有個小瑕疵,面皮有少少穿咗,或許都係個意外啫。蛋皮包住海鮮炒飯,海鮮料就普通D,外層淋上蘑菇蕃茄汁,整體味道都OK!
魷魚本菇意大利燴飯 $64
有D驚喜喎,「烏卒卒」嘅意大利,因加咗墨魚汁,味道不再單調,加上飯粒濕潤煙韌,幾啱食。餸料有(本地)魷魚、(日本)本菇,前者柔韌啱啱好,係味道無乜,都好過個D橡筋魷魚,無味兼扯唔開,最怕呀;後者爽爽哋,令個意大利燴飯多咗另一種口感,而且,本菇好似有降膽固醇之效,真係多食唔怕!
海鮮湯意粉 $68
全晚最得眾人歡心嘅一道主菜,除了材料豐富之外,有青口、蝦、帶子、魷魚,其次就係湯底蕃茄味濃郁清新,蕃茄味夠實在唔假,而且,湯意粉一樣做到有咬口感,熟透度啱啱好。唯一要挑剔係個樣,上枱之時,你見佢D意粉放得雜亂無章,睇番就好似意粉、海鮮料、蕃茄湯放埋一齊煮,滚起就上碟咁款,如果連賣相都執好D,就起碼俾佢90分喇!
最後,大家都食得好飽,甜品留番下次先!
|
|
|
明記糖水
|
標題 : 懷舊茶室食新潮糖水 |
地址 : 西灣河西灣河街114號 |
地區 : 西灣河 |
|
現時分數:
|
日期 : 2010-08-04 10:48:59
住西灣河老友帶過哩食,因為食咗晏先過哩食,所以當食飯後甜品!
去到明記,雖然佢叫「明記咖啡糖水小食」,但格局好正、好懷舊嘅茶室感覺,地方細細,地板仲係薄荷綠加墨綠一格格嘅紙皮石,卡位仲係舊式硬板硬凳,地方都好新凈,睇埋去似冰室多過糖水鋪!佢哋仲有間新分店晌附近,但因為朋友食開有感情,所以寧願哩番舊鋪。
佢哋有成幾十款糖水,眼花撩亂,新派又有,傳統又有,近輪潮流興嘅佢都有,小食、拉麵、烏冬亦都有!結果我揀咗鮮雜果河粉,老友揀鮮雜果甘露,都好大碗吓,份量係大概平時嘅飯碗兩大碗再多DD,女仔可以一碗兩份食!所以,我哋最後Share哩食,老闆好好人,見我哋食唔晒問使唔使打包,梗要啦,咁好食,攞走唔好嘥!
至於個兩個甜品係乜,鮮雜果河粉其實係鮮雜果西米撈加咗D好似河粉樣嘅椰汁糕,好香椰汁味同好滑身,但就唔會好似椰汁糕咁易軋爤軋斷,雖則話叫河粉,不過都好粗吓,叫烏冬貼切D!D「河粉」鋪滿成個碗面,撥開下面有好多生果(西瓜、哈蜜瓜、蜜瓜、芒果、香蕉同黑珍珠),D生果都幾甜。另一款鮮雜果甘露其實只係楊枝甘露加咗好多鮮雜果,唔算有咩驚喜,西米都好爽,珍珠都好咬口,平穩啦。兩款糖水都好足料, 絕對抵食嘅! |
|
|
園林閣咖啡室 Cafe by the Park |
標題 : 打完波.食返飽D |
地址 : 尖沙咀柯士甸道8號龍堡國際UG層 |
地區 : 尖沙咀 |
|
現時分數:
|
日期 : 2010-08-03 15:30:40
夏日日炎炎星期天,晌九龍公園打完波(打波關係無點食晏),就走過隔離間龍堡國際賓館(救世軍搞嘅酒店),嘆番個下午茶自助餐先,貪佢就腳又夠晒平,兼且環境唔錯添,話時話佢環境又真係幾好,比一D星級酒店仲好添,因為佢係酒店大堂對上,地方幾闊落,樓底又夠高,感覺幾開揚。侍應嘅服務都幾殷勤,可能人少關係啩,而且都幾有禮貌!
收你$78位(大小同價),相信你都唔會期望有咩高檔嘢食啩!佢哋唔係做高檔嘢,但就算大眾化個類,所以抵食得哩質素方面就唔好話同D四、五星級酒店比,但基本上D嘢食都OK嘅,當然想食質素嘅人就唔啱哩喇!放暑假,帶D細路哩,等佢哋嘆吓自助餐,反正佢哋未係好識食貴嘢,平平哋就有交易,都係諗得過!
講番食物方面,質素算係中規中矩,款式亦唔算特別多,叫做樣樣都有,沙律吧、三文治(2-3款)、壽司(3-4款)、班戟、即煮粉麵、小食(2-3款)、點心、熱盤(6-7款)、麵飯、甜品(有成10多款選擇喎)、生果(2-3款)、雪糕、任飲果汁同咖啡茶,算係咁啦!試勻大部份嘢,講唔出有邊樣好突出,好似沙律咁,得5-6款自選材料,比較大路,2款醬汁,預製嘅都係得個2-3款;又如壽司,係有膠紙包好晒來貨嘅貨色。如果要揀,就班戟係幾好,因為師傅即做!而果汁我覺得應該係濃縮果汁哩喇,雪糕只係雀巢啫,始終只係$78一個下午茶自助餐。不過,環境舒適,輕輕鬆,又幾寫意嘅! |
|
|
巴西燒烤餐廳 Brazil BBQ Restaurant |
標題 : 輕輕鬆,燒嘢食 |
地址 : 尖沙咀東加連威老道94號明輝中心1樓101-105室 |
地區 : 尖沙咀 |
|
現時分數:
|
日期 : 2010-08-03 13:45:04
以前去過維園泳池旁嘅巴西燒烤,貪佢有露天位,景觀開揚。今次揀尖沙咀尖東廣場,皆因有親友生日,就番大家,而且,大家對食無乜太高要求,諗住平平哋就揀巴西燒烤!晚市buffet,百鬆D蚊,叫做樣樣食物都有,有中西湯、沙律、壽司、魚生、冷盤、熱盤、炒粉飯麵、糖水、甜品,多款燒烤扒纇及蔬果,算係咁啦。唔好期望D食物質素好好,但有D都唔差,仲唔錯添!
D燒烤扒纇及蔬果都唔錯,尤其烤菠蘿、雞脾菇、豬仔骨同粟米腸,D扒都OK啦,但無乜驚喜。
沙律就一般般,沙律吧D沙律菜麻麻地新鮮,反而食預製嘅沙律仲好。
壽司、魚生、冷盤都係麻麻地,只係人有佢又有咁,可以唔食。
熱盤、炒粉飯麵都有幾款幾好,例如焗蠔、咖喱魚柳、炒伊麵同荷葉飯。
糖水、甜品雖然好多選擇,擺滿咗係正中間張buffet枱度,但質素就好街坊,同酒店級就差一大截,叫做好D嘅有美國芝士餅同藍梅慕絲蛋糕。
因有親友生日,搵咗佢個結他手哩伴奏唱生日歌,今次又幾好喎,又唱英文,又唱中文,搞得個氣氛唔錯。衰就衰在限時食兩個鐘,雖然食咗兩個鐘,佢都無趕我哋走,不過,見外面門口有人等,我哋又食飽晒,都係坐多一陣! |
|
|
君好扒燒西餐廳 Grill Cafe |
標題 : 超正扒燒三文治 |
地址 : 灣仔摩理臣山道23號南洋酒店2樓 |
地區 : 灣仔 |
|
現時分數:
|
日期 : 2010-08-02 15:05:30
Grill Café嘅「扒燒三文治午餐」真係值得一試,其實佢地有多款「精選午餐」,可以揀「扒燒三文治午餐」、焗飯、意粉或任何一款主菜,包餐湯加餐茶,價錢就$68,另外加多$34就可以享用自助沙律吧同甜品,變相$102就成為一個半自助午餐!
我就揀扒燒三文治喇,貪佢特別D,客人可任揀2款材料、1款麵包及1款醬汁,由師博即時為你以鐵板烹調新鮮製造,再伴上沙律菜及脆炸薯條送上。扒燒材料每日精選8-10款以不同香料醃制之肉類、海鮮,例如:紐西蘭西冷牛扒、雞扒、豬扒、漢堡牛扒、珍寶熱狗腸、司華力腸、扇貝、蝦肉、龍利魚、三文魚、鮮魷魚、青口…,;麵包就有5-6款供選擇,例如:裸麥包、農夫包、意式蕃茄香草包、意式軟包、漢堡麥包、英式松包、澳門硬餐包、中東包…,好些都是一些特別的麵包;醬汁就有5款,小弟就揀了意大利蕃茄包配德國腸和香草西冷,好大份,相等於兩個巨無霸,真係挑戰食量。
自助沙律吧同甜品都加錢食得過,因為沙律、生果都好多選擇,不下十幾款,有DIY自由配搭嘅沙律材料,嫌煩亦有預製好嘅特色沙律;甜品也不錯,同樣都有十多款左右選擇,吃罷心滿意足!
Grill Cafe的環境闊落,高樓底,在陽光照耀下,會好舒服,加上侍應的貼心服務,同一班老友hea個lunch都算唔錯! |
|
|
misocool |
標題 : 味噌酷,味真好? |
地址 : 尖沙咀河內道18號K11購物藝術館地庫2層B231及B233 |
地區 : 尖沙咀 |
|
現時分數:
|
日期 : 2010-08-01 22:38:21
星期六收工,同老婆一齊食晏,揀咗K11哩個新場,因為哩搵食,所以無特別逛商場,K11都真係幾多食肆,幾多選擇,都睇咗幾間平平哋嘅,結果揀咗Misocool,原因有三,一係場旺,差唔多近兩點,見佢都仲係有八、九乘客,人氣反映出食物質素衰極有個譜,當然同佢位置可能有關,港鐵通道轉入K11,第一間鋪見就係佢喇;二係價錢,K11大部份都係食中、上價嘢多,佢就係少數比較平嘅食店,佢同一般拉麵專門店或日式西餐廳差唔多價位;三係想食,近排試咗好多唔同地方嘢,所以就想食吓日本嘢!
Misocool裝修都幾有型格,一室黃、綠間線配襯,木枱木凳,光猛有活力,侍應身穿卡奇色恤衫、斜褲配橙色腰帶,好有年輕感!不過,其實座位有D逼,尤其二人位,但還可接受;而侍應真係好唔夠,唔停咁忙哩樣忙個樣,所以揮幾次手佢哋都仲玩「睇我唔到」!題外話,幾鍾意佢個品牌公仔,一個疑似製味噌嘅瓦缸公仔(miso就係味噌,即係日本麵豉),兩隻手指指住自己,個樣有少少「得得戚」咁,旁邊加上一雙筷子夾起一炷麵,真係幾得意,設計者又幾有心思!
miso(味噌)日本代表性嘅調味料,cool(酷)年青人代表性意嘅識形態,撞埋一齊估佢係想表達傳統口味之中,有新派破格嘅態度啩!再一睇佢招牌,ramen(拉麵)、bento(便當)就係佢主打,打開餐牌,有拉麵、烏冬、冷麵、亦有丼同多款日式小食!
北海道帶子拉麵 $57
叫任何麵食或飯,加$20可轉為套餐,可以晌4款小食(麵豉湯、日式蒸蛋、芝麻醬豆腐、野菜沙律)揀2款,同埋多杯餐飲(但即磨咖啡只可以揀招牌咖啡),見轉套餐幾著數,所以個拉麵就轉咗套餐!
- 先上兩個小食,但份量好細,芝麻醬豆腐,係得一舊豆腐,而且唔滑,估計係雪得耐所致,幸好芝麻醬夠香,豆味又足,俾佢緊緊合格啦;野菜沙律,清新爽甜,簡單好食。
- 北海道帶子拉麵就要等得耐少少,不過個侍應都講過要等20min左右,依家15min就有,叫快咗!湯底都有得揀:九州豬骨湯、自家製蕃茄湯、北海道味噌湯、長崎地獄湯,我哋揀咗豬骨湯,所以,拉麵哩到睇到一湯奶白,呷一口豬骨味非常濃郁,雖然無相為証,但我就真係飲晒成碗湯,近乎一滴都無。帶子,睇相已經認住佢有6粒,哩到雖然沉在湯中,但摷番晒6粒足數無花假,而且粒粒飽滿,睇相粒帶子有半隻糖心蛋咁大,而且有晒裙邊唔係假嘢,味道鮮甜!講開糖心蛋,每客拉麵有半隻,糖心效果十足,非常好食,不過自己都蠢咗,早知唔叫餃子追加多隻糖心蛋好過(加$10)。至於拉麵都對板,柔中帶韌,又夠晒大碗,所以$57碗都食得過!
- 餐飲要招牌即磨咖啡,醇香幼滑,不過,唔知點解配上膠匙羮一隻,認真失禮,為一開脫就係佢哋認真唔夠人手囉!
燒三文魚飯糰配蕃茄牛肉湯 $47
- 燒三文魚飯糰,一客有3個飯糰,1個跟蕃茄牛肉湯同上,另外2個另碟上,食法隨意啦。既然有2個另上,我同老婆一人一個齋食,真係好得,飯糰夠結實,兩面煎香帶有微脆,最正係飯糰裡面藏有好多三文魚粒,咬落啖啖三文魚味!
- 蕃茄牛肉湯,蕃茄味夠濃,鹹味亦夠籠,係過晒籠個籠,好鹹,否則個湯會幾好;此外,牛肉唔多之餘,仲要係肥牛,我OK嘅,但老婆最唔鍾意係肥牛,黐住一截截肥膏,所以要扣分!而且,個人感覺,三文魚飯糰同個蕃茄牛肉湯唔係咁夾,蕃茄湯味濃,搶咗飯糰嘅三文魚味,肥牛又好似路過嘅街坊咁,只係好獨立出現咗係D湯度,所以,浸晌湯舊飯糰唔太好食,仲要飯糰本身結實嘅特性,浸一浸無埋!
自家制嫲嫲餃子 $34
嫲嫲餃子,真係麻麻,上交都講過寧願追加多隻糖心蛋好過叫依個餃子,一客6件,雖然唔點醬汁餡肉都夠味,但就如好普通嘅菜肉餃子,周圍都食到,唔需要嘥$34係度食啫。
因為二人枱真算細張吓,加上拉麵、蕃茄牛肉湯都大大個碗大大隻碟,我哋又叫咗唔少嘢,所以哩齊時堆滿枱,為咗影相又將D食物搬哩搬去,先發覺佢D碗碟原來好重,難為咗D侍應好似日日要舉啞鈴咁! |
|
|
|
|