狀態: 未登入 | 請先登入


  飲食指南 >> 餐廳 >> 餐廳搜尋
鳴門魚湯麵亭
 
地址: 何文田勝利道4號
電話: 2711 9088
地區: 何文田
菜式: 日本菜
平均消費: $50 - $100
餐廳類型: 拉麵
好味指標:
2分
 
 
寫食評   投佢一票   美食專題/著數   報料   寄給朋友  
 
 
 
共有1 個食評，正顯示第 1 至 1 個食評
1

山區麵包王
電郵: 不顯示
得分: 251
註冊時間: 2010-08-01 22:22:28
標題: 祝君安康
日期: 2011-06-08 22:03:42
評分:
店舖細得緊要，一眼睇晒，三十多個位左右，除咗對窗及對廚房一列吧位，其他都係二人或四人細枱仔，我哋兩個人坐二人枱叫咗3樣嘢，都緊緊夠擺；真係好逼，近乎背對背，膊頭撞膊頭，好老實，坐就坐得唔太舒服，亦唔方便坐我耐，因為等位者眾。可能環境細先天不足，所以服務幾好，作為後天搭番夠，店員時刻保持笑容之餘，說話有禮。

佢哋主打係個招牌鮟鱇魚湯，不過亦有好多石鍋系產品，樣樣滾熱辣。冷氣似乎唔係好夠，我食嗰晚天氣涼，感覺都OK，但如果大熱天時就真係唔知咩景。確實，無論個魚湯烏冬，抑或石鍋焗飯，都非常有水準，將來會翻叮，但就一定揀番個天冷嘅日子，食咗包你一身暖晒。仲有，無加一，依點有啲睇唔出，因為出面好多賣拉麵、烏冬嘅鋪頭都有收加一嘛！

石鍋招牌鮟鱇魚湯烏冬 $88
一上枱，完全感受到嗰股「氣」，熱力逼人得緊要，奶白色嘅魚湯，呷一口真係好正。魚湯，以鮟鱇魚皮、魚肉熬出嚟，鮮甜重魚味而唔腥，帶少少膠膠哋，但唔係漿口嗰隻；魚肉，肉質緊密唔鬆散，唔係嫩滑嗰類，但又無話「嚡烚烚」得柴皮，應該叫做有咬口啦；烏冬，稍為腍身咗，可能石鍋嘅熱力不斷咁逼熟啲烏冬，食得慢放得耐就越影響佢嘅質感。

黑豚肉石鍋芝士焗飯 $48
黑豚肉帶有脂肪得嚟，食落唔會一口肥膏，而豚肉已醃過再煮，鬆化入味，啖啖肉香。面面加咗大量芝士，好似溶岩傾瀉，溶入豚肉同飯中，自然味道更上一層樓，芝香滿到瀉。飯底亦出色喎，珍珠米飽滿有飯味，帶黏而不削身，扒飯都扒快咗。

炸芝士年糕 $28
其實有啲貪心，因為上面個烏冬同焗飯都好夠我哋兩公婆食，叫埋依個炸芝士年糕純粹貪口痕，賣$28得兩粒（不過就幾大粒吓），心想都覺得有啲貴。年糕裡面混有芝士，浸脆漿酥炸，一口咬落去，咔嚓外皮應聲脆開，甘香，又唔會一口油，第一個觀感已經幾討好；內餡，年糕軟糯糯，煙煙韌，混入嘅芝士溶透，芝香令年糕味道無咁寡。真係幾正，送冰凍汽水或啤酒，相信效果仲夾添！
推介: 石鍋招牌鮟鱇魚湯烏冬, 黑豚肉石鍋芝士焗飯, 炸芝士年糕
是次每人消費: 82
對廚房一列吧位
餐牌
石鍋招牌鮟鱇魚湯烏冬
黑豚肉石鍋芝士焗飯
炸芝士年糕
 
1