狀態: 未登入 | 請先登入


  飲食指南 >> 餐廳 >> 餐廳搜尋
大家樂
Cafe De Coral
 
地址: 美孚美孚新村萬事達廣場1樓N95(B)
電話: 2785 5821
地區: 美孚
菜式: 港式
平均消費: 50以下
餐廳類型: 快餐店
好味指標:
1分
 
 
寫食評   投佢一票   美食專題/著數   報料   寄給朋友  
 
 
 
共有2 個食評，正顯示第 1 至 2 個食評
1

山區麵包王
電郵: 不顯示
得分: 251
註冊時間: 2010-08-01 22:22:28
標題: 抽水菜名龍骨湯．縮水豬扒咖喱飯
日期: 2012-09-06 11:10:14
評分:
雖然家住美孚，但就好少晌番依區食夜晚飯，食早餐或下午茶就多啲，一來老婆鍾意晌屋企煮，所以有時間都已經返咗屋企煮；二來，如果有飯局，就番啲朋友，美孚唔會喺熱點囉。其中一個情況次次都會出街食嘅，就喺小弟去完大陸出差，返嚟香港依晚，放低行李就會扯埋老婆出去食。點解要出去食，無他嘅，上親去都喺啲苦差，晌啲細縣小鎮「飽嚐地道」，可惜去咗咁多年都仲喺唔多啱口味，返到嚟香港，快餐店啲嘢未必好好，但多份親切感。

今餐想食吓大家樂，因為仲有剩啲信用卡換返嚟嘅現金券，所以用埋唔好嘥啫。知道老婆鍾意飲中湯，所以就幫佢揀咗個老火湯小菜餐，我就鍾咖喱，所以要咗個豬扒飯。

老火湯小菜餐 $48
原煲老火湯，喺老黃瓜赤小豆扁豆煲龍骨湯，味道唔濃，可以講無乜味，唔見老黃瓜，只喺多咗紅蘿蔔、粟米。所謂龍骨，睇水牌嘅英文翻譯都見，其實喺豬骨，改埋啲咁嘅名，好抽水囉，個湯真喺麻麻哋。幸好，個小菜揀口水麻醬雞（半隻），值得一讚，我哋兩個都覺得隻雞做得甚有水準，雖然話喺半隻，但查實雞隻本身好細，所以份量唔喺話好大份，不過真喺勝在雞嫩肉滑，而且花椒引出少少麻，唔太辣，又帶有麻醬香，絕對喺遷就港人口味，不過就啱我囉。

講老實，其實我唔鍾意啲「口水嘢」，因為小弟出差點就喺重慶啲細縣，餐餐都要對住花椒，一餐半餐都無所胃，但早午晚餐餐都喺咁，就唔多頂得順，除非你本身好愛花椒啦，炒個青菜都帶有花椒味，死唔死丫。雖然花椒味道只麻不辣，但係喺地道得重手喎，所以嚟到見到啲水煮系列、口水系列，真喺有啲食到怕、食到驚。咁補充番句，重慶嘢唔喺樣樣都又麻又辣，又啲都好好食，喺衰在重油膩，有時未食到碟底已經油淋淋喇。

千層香咖喱豬扒飯 $32
我個豬扒飯又點呢？千層香當然又喺誇張啲啦，不過個咖喱味道頗香，屬東南亞風味嘅馬來咖喱，椰奶下得比較重手少少。但喺令人O晒咀嘅喺豬扒少得可憐，又細件喎，外觀感覺有少少寒酸。依家啲牛肉喺咁加價，真喺想知，如果依碟喺咖喱牛肉飯，唔知啲牛肉會唔會得嗰兩粒呢！
推介:
是次每人消費: 40
老火湯小菜晚餐系到
口水麻醬雞老火湯小菜晚餐
老黃瓜赤小豆扁豆煲龍骨湯
口水麻醬雞，比想像中好喎！
千層香咖喱豬扒飯

山區麵包王
電郵: 不顯示
得分: 251
註冊時間: 2010-08-01 22:22:28
標題: 我的星期六美孚早餐 ~ 牛乳滑蛋加超值選
日期: 2012-08-06 08:23:43
評分:
大家樂相對所住嘅屋苑遠啲，所以比較少去啲，不過，小弟嘅信用卡積分就最常換啲飲飲食食嘅現金券，大家樂當然都有份，換啲現金券睇門口，不時食番個免費早餐或下午茶餐嘛。

依次上到嚟大家樂，又要對住眾多早餐組合上左揀右揀，「牛乳炒滑蛋」好似幾有睇頭，先揀一份佢，又見佢個「天天超值早餐」類別內有個「新產品」，其實只係麥片拼熱狗，就試試睇你點新產品法？

牛乳炒滑蛋早餐
以牛乳炒滑蛋為主打，跟唔同配菜，如腸仔、餐肉……等等，再跟厚牛油多士或蘿蔔糕，送餐飲，由$20-$24.5不等。老婆真識揀，要個最貴嘅，牛乳炒滑蛋拼牛扒（$24.5），選厚多士，飲熱檸水。塊厚多唔係好大塊，而且無乜點烘過咁款，但佢就鍾意加埋滑蛋一齊食，由於啲牛乳滑蛋好得，加咗少少香草，又帶點蛋漿，好食。廿零蚊份早餐，牛扒都無可能大大塊咁俾你，而且都幾薄身，不過，配洋蔥汁，味道唔差，牛扒又幾鬆軟。

天天超值早餐
好耐無食麥片，又見佢話隻迷你熱狗係新產品，加埋杯熱飲，都係賣$20，都幾超值。鮮奶麥片煮得幾滑口，稀杰度啱啱好，而隻熱狗話迷你，其實都係快餐店常見的正常長度，香腸都只係一般嘅雞肉腸，驚喜位係啲熱狗醬喎，奶黃嘅熱狗醬加咗蛋黃，味道酸酸甜，內裡仲有啲甘筍粒、蔥粒，認真唔錯喎。慢慢嘆埋杯咖啡，跟住行吓荔枝角公園，幾hea呀！

其實嚟快餐店食嘢水準一向都OK，唔太好亦唔太差，但今餐個牛乳炒滑蛋同隻熱狗俾到少少意外驚喜，所以鬆手啲俾個「好食」笑佢！

題外話，雖然依家啲人成日話物價貴，周時諗辦法慳啲錢，但依然見好多人出街食嘢。晌萬事達廣場上面依間大家樂，早餐時段保持九乘幾滿，人流快上快落，純粹睇食早餐嘅人流指數，依家個經濟好似好好咁，或許美孚中產較多啦！
推介:
是次每人消費: 22
牛乳炒滑蛋早餐水牌
牛乳炒滑蛋拼牛扒（$24.5）
厚多士加埋牛乳滑蛋，好食！
天天超值早餐水牌
鮮奶麥片拼迷你熱狗（$20）
 
1