狀態: 未登入 | 請先登入


  飲食指南 >> 餐廳 >> 餐廳搜尋
Petite Amanda
 
地址: 中環港景街1號國際金融中心商場二期2樓2096號舖
電話: 2234 7222
地區: 中環
菜式: 法國菜
平均消費: $50 - $100
營業時間: (星期一至五)上午8:00至晚上8:00; (星期六、日)上午10:00至晚上8:00
餐廳類型: 包餅/蛋糕
好味指標:
4分
 
 
寫食評   投佢一票   美食專題/著數   報料   寄給朋友  
 
 
 
共有2 個食評,正顯示第 1 至 2 個食評
1

山區麵包王
電郵: 不顯示
得分: 251
註冊時間: 2010-08-01 22:22:28
標題: 感恩!不單只有得食,仲能夠食得好!
日期: 2011-12-01 15:16:38
評分:
某某國內電信公司,晌23/11嗰日買行晒報紙,請大家晌24/11美國佬嘅感恩節飲咖啡,仲大手筆咁一共派2,000杯,憑換領券就可以免費享用餐牌上任何一款咖啡一杯,又或者換張咖啡贈券(有效期至30/11),遲啲先換咖啡又得,而咖啡供應商戶就係petite amanda!

食完晏第一時同同事走過去睇睇咩環境,嘩,又真係幾多人排,不過好多人都係換咖啡贈券,換完就走,所以流量幾快。可能由朝早到依家,都實在好多人排,見到Amanda都有少少「忟忟憎憎」,加上有啲港男、港佬,一個人揸住一疊咁嚟換,心諗:唔使錢啫,唔使咁貪啩!一個店員負責換贈券兼落單,其他店員同Amanda就不停咁沖咖啡,未停過,真係辛苦晒佢哋!可昔店子係得一部咖啡機,排隊等咖啡嘅人(包括埋我哋)就越排越長。

其實,Amanda嘅法式甜餅晌開店之初,已經好有興趣想試,今趟既然咖啡唔使錢,又走到過嚟,就更大理由要幫襯佢啦!晌排隊之時,雙眼已晌個餅櫃不停掃射,一櫃共11款甜品,好像照磁力共振咁,睇樣又睇係咩味道、成份(每款都有介紹牌仔在前)。最終,我揀咗一款心水,同事又揀咗佢嘅「飛弗」,再加上一件好評如潮嘅,兩個人食三件餅,感覺有啲奢侈。

Charlotte aux Poires $40
- 晌餅櫃裡面,每一款甜點之前都有個名牌,除咗有個名之外,仲有簡單介紹埋成份,因為個名以法文相稱,睇見都未必知係乜,下面一組英文成份,至少俾人有個概念。
- 依個我稱佢為「法式洋梨慕絲蛋糕」啦,其實都可能譯得唔係好準,因為好奇之下,查過Charlotte點解,yahoo字典譯為「水果奶油布丁」,慕絲同布丁質感係好唔同,不過依啲都係題外話,邊位有識之仕不妨指教指教!
- 言歸正傳講番件蛋糕先,先講賣相,外型清新灑脫,餅面十數片梨肉,薄薄而斜切排列,令人覺得如女性般溫柔細膩。味道也跟外型相襯,名片嘅成份係咁樣註明:lady finger biscuit, pear mousse, pears,最底層有別於一般海綿蛋糕,而係用咗lady finger。不過好老實,同整tiramisu時所用嘅lady fingers口感有少許唔同,佢會好餅乾嘅質感,較硬身。但依家食到嘅,個人覺得介乎海綿蛋糕與lady fingers之間,點解咁講?因為佢整體無lady fingers咁硬,而蛋糕體外圍除咗甜,口感仲有粒粒幼沙既感覺,口感酥脆,又幾有趣,同事仲話有種嗒沙糖嘅感覺添。仲有樣嘢係小弟好欣賞個餅底,就係你睇佢橫切面就知,餅底除咗薄薄一層「手指餅」墊底,圍圈嘅「手指餅」同樣厚薄勻均。內餡加入少少果肉,再簡簡單單注滿香梨慕絲,慕絲好有梨味,而且帶有輕微天然雲呢拿香,細心嘅話就會留意到慕絲中點點雲呢拿籽,再者慕絲做得甚有水準,柔滑而唔太甜,當然依個甜度應該調校過較為適合港人嘅。至於最上面嘅梨肉,清甜多汁,感覺很新鮮,食得出用料上乘,果然不愧為鎮店甜品之一呀!

Mille Feuille $43
- 同事「飛弗」、必食嘅酥皮拿破崙蛋糕!明明係一種傳統嘅法國蛋糕,唔知點解跟拿破崙扯上關係,晌網上搵吓,都出現好幾個說法,當然晌度唔多講,「盞」班門弄斧獻醜。我都係鍾意佢另一個較少人用嘅名「法式千層酥」,因為Mille Feuille本身就係有千層酥皮嘅意思嘛!
- 成份註明:puff pastry, light pastry cream,相信唔講大概都知。酥皮鬆化得緊要,食到個口感係由一層又一層好幼薄嘅酥皮組合成一件,又唔會有「啃」牙嘅感覺,即係無話有部分厚咗,佢做嘅酥皮真係技巧同功力兼備,咬落上、中、下層層都咁鬆脆。中間原味嘅吉士,個人評語得兩個字:香、滑,香,有蛋香,清甜;滑,唔係軟身就叫滑,係柔滑,挺身得嚟,質感好柔軟。而且,都加咗少少雲呢拿,多咗朕香味。質素無得講,真係「頂」佢,俾個頂級過佢。同事都話,好似綿花糖咁,睇佢好挺身,原來咁軟,所以同事勁讚佢超好味。

Chocolate Tart $43
朱古力一向都係小弟至愛,所以心水就落晌依個「朱古力撻」身上。唔好單睇佢外表矮矮偏偏咁,其實已經有成4層咁多,橫切一眼就見晒,可見個朱古力撻製作一啲都唔「馬虎」,吓吓都係手工嘢。成份簡述有:flourless chocolate sponge, chocolate ganache。撻殼食落幾脆喎,當然同「千層酥」嗰隻唔同,千層酥係鬆脆,朱古力撻就正如曲奇嗰種甘脆,又有牛油香;然後上一層係薄薄既無麵粉朱古力蛋糕,因為無加麵粉,食起嚟較濕潤,又重朱古力味,有啲似班尼士;佔中間餡心大部份係軟朱古力「ganache」,同事話唔夠軟滑喎,因為佢唔係慕絲,而係軟朱古力,係一種以忌廉加朱古力做成、濃郁且軟嘅朱古力夾層,有時食啲粒裝朱古力都會遇到,確實,層軟朱古力幾濃郁,好在又唔過甜;最後,就係最上面嘅鏡面朱古力漿,做得細緻、有光澤唔啞色、無水泡,鏡面朱古力做到咁光滑其實都唔容易,抵俾個贊佢,再者,朱古力夠濃香,好夠朱古力味,又無死甜!同事都覺得好食,係唔唔鐘意個撻殼咁硬啫。

Café latte with organic milk $42 (12oz)
免費咖啡可以任揀,我就要咗杯鮮奶咖啡,零售價8oz為$38,12oz為$42,雖然係免費送嘅,難得送杯12oz之餘,仲製作認真,故要需時。咖啡感覺幾幽香,有輕微澀口,但奶泡夠,口感柔順,絕對無話送嘅就「求求其其」。

感恩節係美國同加拿大共有嘅節日(網上資料:美國感恩節晌每年11月第四個星期四,加拿大感恩節就晌每年10月第二個星期一),真係唔係好關我哋事。不過,人要學識感恩,好多嘢唔係必然。小弟搵得唔算多,但從來衣食無憂,比上不足,比下有餘,有時仲叫做可以食到啲好嘢。$4件西餅我唔會嫌棄,$40一件嘅我會心存恩感去欣賞。我可以睇到眼前美食個賣相,又可以聞到佢嘅香氣,更可以嚐到內藏嘅味道同質感,唔好只睇你杯中少咗半杯水,其實你手裡仲有半杯水!

又一個題外話,小弟幫佢計過數,賣版廣告我就唔知要幾多錢,但2,000杯咖啡,每杯零售價係$42,即係派咗$84,000出去(咁大量,可能實際唔使俾咁多添)。因為齋晌免費報紙賣版廣告,啲人揭完就算,都唔知你乜水電信公司,依家有咁著數嘢,真係望多兩眼,我見有啲人仲成頁廣告撕落嚟,排隊時有啲人又打電話同朋友講排緊隊換咖啡,係乜乜電信送架,咁做真係幾有宣傳之效。希望第時見到多啲商戶都會用依招,益吓啲小市民都好丫!
推介: Charlotte aux Poires, Mille Feuille, Chocolate Tart
是次每人消費: 63
三款出色法式西餅
Charlotte aux Poires,外型清新灑脫,梨肉清甜新鮮。
Mille Feuille,鬆化得緊要,吉士香滑。
Chocolate Tart,撻殼甘脆,多種朱古力滋味。
Café latte with organic milk,咖啡幽香,口感柔順。

Prince
電郵: 不顯示
得分: 1698
註冊時間: 2009-03-03 12:11:47
標題: 好有心思既甜點
日期: 2011-08-17 11:45:42
評分:
今次食甜品,選擇左中環呢間,係明星開架!! 我叫左4件。。。for 4個人食。。。

Merveille(HKD39):法文意思是奇蹟。 草莓片不算甜不算酸,勝在多汁,其下的草莓慕絲尚算幼滑,草莓味較奶味突出,同時又不失奶味,外圍的沾了草莓果醬的蛋糕雖濕潤,但有點過於薄弱,其內的雲呢拿吉士非常澎湃,薄薄的蛋糕難以承托起上層厚厚的慕絲和爆滿的吉士,若不小心吃用,可會吃得非常狼狽,說回來雲呢拿吉士,吉士有點點的雲呢拿籽,為數不多的雲呢拿香味卻十分明顯,而且吉士是完美的流漿狀,十分迷人,整件甜餅就像果味慕絲的岩漿蛋糕。

Plaisir Sucre(HKD48):由榛子醬、榛子粒、杏仁蛋糕、朱古力片和朱古力慕絲構成,不同的是採用的朱古力是牛奶朱古力,奶味比較明顯,少了份苦澀的可可味,以這點相比我更喜歡這款,而朱古力片造得比較出色,因這裡的朱古力片比較薄,用叉子毫不費力便能切開,杏仁蛋糕層比較厚,杏仁味並不明顯,不怕那杏仁獨特的味道,另外榛子粒十分鬆脆,份量也較多,似乎這裡的更勝龍城的一籌。

Delice Aux Abricots(HKD45):白朱古力慕絲,慕絲幼滑非常,慕絲方面比Merveille優秀許多,白朱古力的含量不高,味道比想像的輕柔不甜膩,餅底撇棄一般慕絲採用的蛋糕片,轉而用上焗牛油餅底,餅底沒有甜味,可能由於加入了少許鹽以凝造鬆脆效果,令餅底微帶鹹味,與上層甜甜的慕絲對比極大,個人不太喜歡這種配搭。在以為這件餅就這樣之際,中心原來還有杏桃蓉,還有片片新鮮果肉,帶來非常新鮮的質感和風味。

Jasmine Vert(HKD39):茉莉味極其微弱,雖然不是沒有,但只是若隱若現,感覺是味蕾跟着茉莉跑似的,相對來說這件甜餅較其他的清新輕怡,慕絲與上者一樣幼滑,中心黏稠的茉莉汁起不了甚麼作用,只是添加了一層嶄新的層次,蛋糕片是茉茶味,由於茉莉味微弱,茉茶味相對地明顯,但亦不過濃,該說只是茉莉不爭氣。
推介: Plaisir Sucre
是次每人消費: 45
 
 
1