狀態: 未登入 | 請先登入

  飲食指南 >> 餐廳 >> 餐廳搜尋
唯一麵家
 
地址: 尖沙咀厚福街10號地下
電話: 2311 1498
地區: 尖沙咀
菜式: 上海菜
平均消費: 50以下
餐廳類型: 粉麵
好味指標:
2分
 
 
寫食評   投佢一票   美食專題/著數   報料   寄給朋友  
 
 
 
共有3 個食評,正顯示第 1 至 3 個食評
1

山區麵包王
電郵: 不顯示
得分: 251
註冊時間: 2010-08-01 22:22:28
標題: 間場想食就食
日期: 2012-07-19 00:02:06
評分:
出開尖沙咀教會聚會,想食得快手又有水準,非唯一「飯堂」莫屬,所以,我哋偶有幫襯,食咗咁多年,水準依然。雖然店內環境勁擠迫,少少地踎,但大有捧場客,經常堆滿人,依家唔只本地客,仲多咗啲遊客,想必旅遊書亦作出唔少嘅介紹。

因為依餐唔係正餐,當係下午茶啦,所以叫嘅嘢唔多,就只有淨水餃雲吞同蔥油餅咁大把!

淨水餃雲吞 $25
賣$25一客嘅淨水餃雲吞,其實份量唔多,水餃、雲吞各得3粒,不過比廣東式嘅就大隻好多,睇外觀都係只有少許分別,前者包得較長形平身,後者則圓啲拱啲。由於係上海做法,唔似廣東式用來貨薄薄嘅雲吞皮,而係自家麵粉搓成嘅外皮,食落厚身有質感。而兩者味道都有水準,水餃以豬肉同韭菜做餡,豬肉調味偏濃,重醬油味,刴得細緻有咬口;至於雲吞就用豬肉配白菜,調味亦無咁重手,個人偏愛水餃多啲!

蔥油餅 $8
我覺得北京餡餅係「唯一」嘅名物,不過次次都係食佢,有啲偏心,所以今次改咗叫蔥油餅。蔥油餅稱得上上海傳統小食,製作簡單,粉漿加上香蔥,香煎就係喇,晌依度仲係即叫即煎,熱辣新鮮度唔使多講,不過,下次都係叫返北京餡餅好啲,因為今次個蔥油餅好少蔥,似係淨食一舊粉糰,唔夠香咯!
推介:
是次每人消費: 17
淨水餃雲吞
水餃以豬肉同韭菜做餡
雲吞就用豬肉配白菜
蔥油餅

山區麵包王
電郵: 不顯示
得分: 251
註冊時間: 2010-08-01 22:22:28
標題: 唔係唯一
日期: 2010-10-23 12:06:34
評分:
唯一好多時係我同太太晌尖沙咀平靚正嘅飯堂選擇,老實講,佢唔係我唯一嘅選擇,因為地方唔好坐之餘,尤其啲二人卡位好細張枱,另外成日有種好似被人催埋單嘅感覺,仲有啲服務應真麻麻;之不過食物質素有保證,價錢又合理,否則一早就唔再幫襯啦!是日加埋舅仔三個人,所以叫多少少嘢一齊食。

餈飯
唔好睇佢細細舊,好錘手,如假包換嘅「真材實料」。「真材」:軟軟糯糯嘅糯米飯,包住有榨菜、油炸鬼、肉鬆做嘅餡,長條形嘅餈飯中間切開,望落真係差唔多餡多過飯;「實料」,就因為整舊餈飯壓到實一實,餡料同糯米飯緊扣一起,食落有種實在感。榨菜嘅鹹味就係成舊餈飯嘅調味劑,唔使再花巧,飽肚好食!

酸辣湯
一大碗,夠兩至三個人分,材料十足,有豆腐、木耳絲、竹筍絲、冬落絲、素肉絲、蛋花,至緊要做到夠酸夠辣,刺激醒胃,咁至係酸辣湯架嘛,而且稀杰度啱啱好,稀少少都OK,最怕啲湯羹太糊,等同灌膠水。

雲吞麵、水餃麵
個樣簡直孖生兄弟,哩到都分唔到邊碗係雲吞麵,邊碗係水餃麵,因為皮係用麵粉自家手搓嘅上海雲吞皮,較厚身,唔係講皮薄,唔會睇到內餡,食質感,食過先知,同廣東麵檔嘅雲吞皮係兩樣嘢,無得比較嘅。份量勝在大粒餡多,味道就一般啦,而麵質因係賣上海麵關係,較粗身少少帶柔韌,一把雪菜跟麵上,成碗一個人食都幾飽肚。

牛肉餡餅
都可以話至愛,因為餡餅以生煎整成,底面香脆,如果個麵粉皮能再做得薄多少少,脆口感仲好仲強。調好味嘅牛肉加上大量蔥粒做餡,肉汁充沛,蔥粒令個餡餅嘅味道唔會太「寡」,同樣,餡料十足絕無呃秤,好食兼抵食!
推介: 餈飯, 酸辣湯, 牛肉餡餅
是次每人消費: 30
餈飯,包住有榨菜、油炸鬼、肉鬆做嘅餡,糯米飯軟軟糯糯,真材實料!
酸辣湯,材料十足,夠酸夠辣,杰度啱啱好!
雲吞麵,上海雲吞皮,較厚身,食質感。
水餃麵,賣嘅係上海麵,較粗身少少帶柔韌。
水餃麵,賣嘅係上海麵,較粗身少少帶柔韌。牛肉餡餅,底面煎得香脆,肉汁充沛!

金魚注意報
電郵: 不顯示
得分: 253
註冊時間: 2010-07-22 12:13:43
標題: 北京餡餅皮薄多汁
日期: 2010-08-26 20:50:53
評分:
早幾日去咗唯一麵家食LUNCH, 叫咗碗水餃麵同北京餡餅, 味道都唔錯, 下次要試下D菜飯先.

水餃麵: 水餃皮厚咗少少, 麵條彈牙, 煙煙韌韌, 面層配有少量雪菜.

北京餡餅: 餡料有豬肉同韭菜, 外層薄薄煎到金黃色, 一啖咬落去好多內汁流出嚟.
推介: 北京餡餅
是次每人消費: $31
 
1